1. Ɔdi gē mafu ka ɔcɛ dɔka ō piyabɔ a?

 EKO duuma nɛ alɔ lɛ íne biya, ó cɛgbá ku alɔ le piyabɔ. Ubáyíbu ka ka ɔcɛ gē piyabɔ eko duuma nɛ ó gbɔɔ ō wɔtu aɔdā nɛ ó ya nɛ ó má ka ó lɔhi ŋ, nɛ ó gɔbu ipu uce ō ya ɔɔma gɛ ŋ, klla lɛ ɔtu ku nu ya ekponu ō hii ya ɔdā ɔɔma ɛɛ gɛ ŋ.—Umát. 3:8; Ācot. 3:19; 2 Upít. 3:9.

 2. Ɔdiya nɛ ɛjɛɛji alɔ cɛgbá ō nwu ɛlā lɛyikwu opiyabɔ a? (Unehemíya 8:​9-11)

² Ɛjɛɛji ācɛ nōo lā ipu ɛcɛ a cɛgbá ō nwu ɛlā lɛyikwu opiyabɔ. Ɔdiya a? Ohigbu ka abɔ ɛjɛɛji alɔ wɛ ayaayi ku Adam mla Iifu a, alɔ lugwu ku íne ō biya mla ikwū. (Uróm 3:23; 5:12) Ɔkwɛyi a wɛ ka ɛjɛɛji alɔ gē biya íne klla cɛgbá ō piyabɔ. Ācɛ nōo kóō lɛ ɔtu okpoce olɔfu naana bɛɛka ɔcocɛhɔ Upɔlu a, ó tɔɔtɛ lɛ uwa ō ta ɛlá ō gbo obɔbi ŋ. (Uróm 7:​21-24) Ɛnyā wɛ ka ɔtu cika ō yɔ i gbenyi lɛ alɔ eko doodu ohigbu íne nɛ alɔ biya a nɛɛ? Ehee, Ujehofa wɛ Ɔwɔico nōo gē menyinyi ó kē dɔka ku alɔ yɔ i gweeye. Leyi yɛ ocabɔ ku ācɛ Ujiyu ɛpleeko ku Unehemiya a. (Jé Unehemíya 8:​9-11.) Ujehofa i dɔka kē yɔ i ya ɔtu nobi fiyɛ ɔfu ohigbu íne néē biya ŋma igbihi a ŋ. Ó dɔka ka é yɔ i gba ɔ ɛ̄gbā mla eeye. Ujehofa jé ka eko duuma nɛ alɔ le piyabɔ ó gē ya ku alɔ lɛ eeye. Ohigbu ɛnyā, ó gē nwu alɔ ɛlā lɛyikwu ɔ. Ɔdaŋ ka alɔ le piyabɔ ŋma íne ō biya ku alɔ, alɔ lɔfu lɔtuce kpɔcii ka Adā alɔ nōo lɛ eyinyinyi a géē je ya alɔ ɛhi.

 3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Ipu ikpɛyi ɛlā nyā, alɔ géē kɛla lɛyikwu opiyabɔ. Oŋma ɔɔma, alɔ géē kɛla lɛyikwu ɛlā ɛta. Aflɛyi, alɔ géē nwu ɛlā lɛyikwu ɛlā nɛ Ujehofa nwu ācɛ ku Isrɛlu lɛyikwu opiyabɔ a. Oŋma ɔɔma, alɔ géē nwu ɛlā lɛyikwu ɛgɛ nɛ Ujehofa gē ta ācɛ abɔ kéē ya opiyabɔ a. Amoomɛ, alɔ géē nwu ɛlā lɛyikwu ɛlā  nɛ Ujisɔsi nwu ayikpo ku nu lɛyikwu opiyabɔ a.

ƐLĀ NƐ UJEHOFA NWU ĀCƐ KU ISRƐLU LƐYIKWU OPIYABƆ A

 4. Ɛlā nyá nɛ Ujehofa nwu ācɛ ku Isrɛlu lɛyikwu ō je ya ɛhi a?

⁴ Eko nɛ Ujehofa je íne lɛ ācɛ ku Isrɛlu a, é cokonu ō lɛ íne ɔɔma tu. Ujehofa kē cokonu ka ɔdaŋ néē lɛyitaajɛ lɛ aíne a, anuɔ géē je ogbotu lɛ uwa klla hɔha ce uwa. Ó kɛla lɛyikwu íne a kahinii: “Íne nɛ̄ anúɔ yɔ̄ gē je lɛ uwá ícíícɛ ɔ́ɔmā ɔ́ɔ lɛ ɔnɔ nēe í jɛ́yí nū kéē lɛ uwá tū glá ŋ́ nɛɛ ŋ́.” (Obla. 30:​11, 16) Amáŋ, ɔdaŋ néē lɛyitaajɛ lɛ aíne ku anuɔ ŋ amāŋ le miya ō gba aɔwɔ ɔhá ɛ̄gbā, anuɔ i gáā je ogbotu lɛ uwa ɛɛ gɛ ŋ é klla géē má owe. Amáŋ, ɔɔma i wɛ ka Ujehofa géē habɔ uwa ta duudu ŋ. É lɔfu “cīgbīhi wā ɛgiyí Óndú ā [nōo wɛ Ɔwɔico ku uwa a]” o ya ɛɛ kéē lɛyitaajɛ lɛ ɔ. (Obla. 30:​1-3, 17-20) É lɔfu ya opiyabɔ. Ɔdaŋ néē kē le ya lɛ a, Ujehofa géē tubla uwa ajaajɛ klla hɔha ce uwa igbɔha kpɔ.

 5. Ɛgɛnyá nɛ Ujehofa mafu ka ó leyi gwu ācɛ ɔlɛ nu bonu ŋ ma? (2 Aɔ́cɛ́ 17:​13, 14)

⁵ Ācɛ ku Isrɛlu nɛ Ujehofa fu a ya ikpɛyi olɔfu tu ɔ igbalɛwa. É gba aɔwɔ ɔhá ɛ̄gbā klla ya aɔdobɔbi nɛhi alɛwa. Ohigbu ɛnyā, é má owe nɛhi. Amáŋ Ujehofa gɔbu yɔ i ceyitikwu ta uwa abɔ kéē wa i gba ɔ ɛ̄gbā kpɔ. Ó tu acomɛɛbɛ ku nu ɛhɔ fu uwa igbalɛwa kéē ta ācɛ ɔlɛ nu ɔtu kwu ɔtu kéē le piyabɔ, klla wa i gba anuɔ ɛ̄gbā ŋma ɛjɛɛji ɔtu ku uwa.—Jé 2 Aɔ́cɛ́ 17:​13, 14.

 6. Ɛgɛnyá nɛ Ujehofa bi acomɛɛbɛ ku nu le nwu ācɛ ɔlɛ nu ɔdā nōo ya ɛɛ néē cɛgbá ō ya opiyabɔ a? (Má ifoto a.)

⁶ Eko duuma nɛ ācɛ ɔlɛ Ujehofa ta ō lɛyitaajɛ lɛ ɔ, igbalɛwa ó gē tu acomɛɛbɛ ku nu ɛhɔ kéē pi uwa ahɔ̄ lɛyikwu ɔdā nōo géē ya da uwa ɔdaŋ néē ta ō piyabɔ a. Ocabɔ mafu, Ɔwɔico da Ujɛrɛmiya kóō le da ācɛ Isrɛlu a kahinii: “Ācɛ Ísrɛ̄lu, aá nēé ī gbā um kpaakpa ŋ́ mā, aá kwúcē wā ɛgiyí um. N gáā cɔ̄nū da aá gɛ ŋ́, ohígbū ka n gē ményinyi. Ń gáā klá ī cɔ̄nū da aá piyóó gɛ ŋ́. Aá cɛ̄ ofōōfūnū ka aá le ɛpɔ̄bí lé. Ka aá klla lɛ īkpɛ̄yí olɔfu yá tá ami,  Óndú ā nōo wɛ Ɔwɔicō kú aá ā.” (Ujɛr. 3:​12, 13) Ujehofa da Ujowɛlu kóō le da ācɛ ɔlɛ nu kahinii: “Aá lɛ pīyabɔ̄ cɛ́ɛ́ kú aá kwúcē wā ɛgiyí um.” (Ujów 2:​12, 13) Ó ya ku Ayisaya kóō le da ācɛ ɔlɛ nu kahinii: “Aá lɛ ucē obɔ̄bí kú aá kpó bōnū. Aá habɔ̄ ɔdōbɔ̄bí nɛ̄ n má aá yɔ̄ ī yá ā tá.” (Ayis. 1:​16-19) O bu ipu Isikɛlu, Ujehofa kahinii: “Ikwū kú ɔ̄cōbɔ̄bíipú í gē lɔnyɛ tū um ŋ́, amáŋ ó géē he um ɔtū ka ó le pīyabɔ̄ ka ó yēeyī. . . . Ń tíne ka ɔ̄cɛ dúúmā ká ō kwú ŋ́. Aá kwúcē ŋmá ɔ́bíipú kú aá ka aá yēeyī.” (Isík. 18:​23, 32) Ujehofa gē gweeye nɛɛnɛhi eko duuma nɛ ɔcɛ ō biya íne le piyabɔ, ohigbu ka ó dɔka kéē yeeyi piyoo! Amáŋ, Ujehofa i gē gbeyi ku ɔcɛ kóō le piyabɔ gbɔbu ɛɛ kóō je otabɔ lɛ ɔ ŋ. Alɔ leyi yɛ aocabɔ ɔhá.

 7. Ŋma ocabɔ ku ɔcomɛɛbɛ Uhosiya mla ɔnyā nu, ɛlā nyá nɛ Ujehofa nwu ācɛ ɔlɛ nu a?

⁷ Ujehofa nwu ācɛ ɔlɛ nu ɛgɛ nɛ ó tutu ō ta uwa abɔ kéē le piyabɔ ŋma lɛ ɔdā nōo ya ɔkwɔɔkwɛyi ipu oyeeyi ku ɔcomɛɛbɛ Uhosiya, mla ɔnyā nu Ugoma a. Igbihi nɛ ó lɛ aja gbo a, ó habɔ Uhosiya ta le ta ɛgiyi ɔcɛnyilɔ ɔhá. Ɔdi nɛ Ujehofa ya a? Ujehofa nōo lɛ ɔfu ō jé ɔdā nōo yɔ ipu ɔtu ku ɔcɛ a, da Uhosiya “kóō nyɔ̄ gaá i kagwo mla ɔnyā [nu] nōo wɛ akwuna klla ī gbaajā a. Ka ɔ́ɔ géē yíihɔtū tá ɔ̄ ɛ́gɛ́nɛ̄ anúɔ yíihɔtū tá ācɛ kú Ísrɛ̄lu, nááná nēé nyɛ̄ɛ̄ ŋmá ɔwɛ nēé ī gbā anúɔ ɛ̄gbā gaá yɔ̄ ī gbā ɔwɔ ɔhá ɛ̄gbā” a. (Uhos. 3:1; Aíit. 16:2) Leyi bi ɔ ka ɔnyā ku Uhosiya yɔ i biya íne bɔbi bɔbi eko ɔɔma kpɔ ɛɛ. Naana kpɔ a, Ujehofa da Uhosiya kóō kwu je ya ɔ ɛhi klla miyɛ ɔ ō kwu piya ɔnyā nu kpɔ. a Oŋma lɛ ocabɔ nyā, Ujehofa dɔka ō nwu ācɛ ɔlɛ nu ɛlā ɛgɛ nɛ ɔtu gē ya ɔ lɛyikwu uwa a. Naana néē yɔ i ya ɔdobɔbi nɛhi kpɔ a, ó yihɔtu ku uwa kpɔ. Ó gɔbu yɔ i tu acomɛɛbɛ ku nu ɛhɔ fu uwa kéē ta uwa abɔ lɛ opiyabɔ ya. Ocabɔ nyā nwu alɔ ka Ujehofa jé ɛjɛɛji ɔdā doodu lɛyikwu ɔcɛ, ó kē géē ceyitikwu ō ta ɔcɛ nōo kóō yɔ i biya íne bɔbi bɔbi a abɔ kóō le piyabɔ. (Aíit. 17:3) Alɔ leyi yɛ ɛgɛ nɛ Ujehofa gē bi le ya ɛnyā a.

ƐGƐ NƐ UJEHOFA GĒ TA ĀCƐ ABƆ KÉĒ LE PIYABƆ A

 8. Ɔdi nɛ Ujehofa ya o ya ɛɛ kóō ta Ukeni abɔ ō le piyabɔ a? (Ohútu 4:​3-7) (Má ifoto a.)

⁸ Ukeni wɛ ɔyi nɔnyilɔ aflɛyi ku Adam mla Iifu a. Ó lugwu ku íne ō biya ŋma ɛgiyi ɛ́nɛ́ mla adā nu. Ubáyíbu kɛla lɛyikwu ɔ kahinii: “Ɔdā nɛ̄ anú abɔ̄yī nū yá ā bɔ̄bí.” (1 Ujɔ́n. 3:12) Á jé ŋ, ɛnyā lɔfu lɛ ɔ teyi peee ɔdā nōo ya ɛɛ nɛ Ujehofa i “mīyɛ [ɛhi] ákú Ukéni” eko nɛ ó gwɛɛya lɛ ɔ a ŋ ma. Ikɔkɔ nɛ ó géē lɛ uce ō ya ku nu piyabɔ a, “Ukéni kwú cɔ̄nū, cɛ́ɛ́ ikpēyī kú nū kwú kplá gɔɔ.” Ɔdi nɛ Ujehofa ya a? Ó kɛla lɛ Ukeni. (Jé Ohútu 4:​3-7.) Bla ka Ujehofa kɛla lɛ Ukeni ɔwɛ ogbonɛnɛ klla da ɔ ka anuɔ géē hɔha ce ɔ ɔdaŋ ka ó cɛ ō ya ɔdā olɔhi. Ujehofa klla pi Ukeni ahɔ̄ ka icɔnu ku nu lɔfu ya kóō nyɔ gáā ya ɔdobɔbi. Amáŋ ó wɛ ɔdā okwiye ka Ukeni i jahɔ ŋ, ó cɛ ku Ujehofa kóō ta ɔ abɔ kóō le piyabɔ ŋ. Ohigbu ka Ukeni i jahɔ ta Ujehofa ŋ ma, Ujehofa le miya ka anuɔ i gáā ta ɔcɛ ɔhá abɔ gɛ ŋ? Ehee, ó ya lɛ a ŋ!

 9. Ɛgɛnyá nɛ Ujehofa ta Udefidi abɔ kóō le piyabɔ a?

⁹ Ujehofa yihɔtu Udefidi nōo wɛ Ɔcɛ́ a nɛhi. Ó kóō hi ɔ ka “ɛdɔ ɔ̄cɛ nōo he um ɔtū.” (Ācot. 13:22) Amáŋ Udefidi ya aɔdobɔbi nɛhi, bɛɛka ikpo ɔnyā ɔcɛ ɔhá ō ce mla ɔcɛ ō ŋmo. Oŋma lɛ ɛgɛ nɛ Íne Ku Umosisi ka a, é cika ō lɛ Udefidi ŋmo. (Ulīf. 20:10; Áluk.  35:31) Amáŋ, Ujehofa dɔka ō ta Udefidi abɔ kóō le piyabɔ. b Ó lɛ ɔcomɛɛbɛ ku nu Unatan tɛhɔ kóō nyɔ gáā lɛ ɔcɛ́ a má, naana nɛ ó ka íne ō biya ku nu tɛɛcɛ klla piyabɔ ɛ ŋ ma. Unatan bi aciije le ta Udefidi abɔ kóō má ka ó lɛ íne biya bɔbi bɔbi ɛ. Udefidi gáā le má ka ó lɛ Ujehofa ɔtu biya nɛɛnɛhi ɛ, anu ó kē le piyabɔ a. (2 Usám. 12:​1-14) Udefidi gwo ijé éyi nōo mafu ɛgɛ nɛ ɔdā nɛ ó ya a kwu ɔ iyē lɛ a. (Aíjē 51, ɛlā néē ta o gbɔɔ ku ɛyi ku Ubáyíbu) Ijé nɛ ó gwo nyā lɛ abɔ kwu ācɛ alɛwa nōo biya íne a ɔtu o ya ɛɛ kéē le piyabɔ. Ó wɛ ɔdā ō jɛ alɔ eyī nɛhi ɛgɛ nɛ Ujehofa ta Udefidi abɔ kóō le piyabɔ a.

10. Ɛgɛnyá nɛ ɔtu ya uwɔ ō jé ka Ujehofa gē lé ɔtu lɛ alɔ klla gē je ya alɔ ɛhi a?

¹⁰ Ujehofa gē wɔtu ɛdɔ ku íne ō biya doodu. (Aíjē 5:​4, 5) Amáŋ Ujehofa yihɔtu alɔ, eko duuma nɛ alɔ kē lɛ íne biya ó gē dɔka ō ta alɔ abɔ. Ó gē ceyitikwu eko doodu ō ta ācɛ nōo biya íne bɔbi bɔbi a abɔ, kéē le piyabɔ klla tubla ɔ ajaajɛ. Ó wɛ ɔdā ō ta ɔtu kwu ɔtu ō jé ka Ujehofa dɔka ō je ya alɔ ɛhi! Eko duuma nɛ alɔ gbɛla lɛyikwu ɛgɛ nɛ Ujehofa gē lé ɔtu klla gē je ya alɔ ɛhi a, ó gē lɛ abɔ kwu alɔ ɔtu ō gɔbu hayi kpaakpa lɛ ɔ klla piyabɔ fiyaa eko duuma nɛ alɔ lɛ íne biya. Babanya, alɔ géē nwu ɛlā ŋma ɛlā nɛ Ujisɔsi nwu ayikpo ku nu lɛyikwu opiyabɔ a.

ƐLĀ NƐ UJISƆSI NWU AYIKPO KU NU LƐYIKWU OPIYABƆ A

11-12. Aciije nyá nɛ Ujisɔsi bi yuklɔ ō nwu alɔ ka Ujehofa yɔ i ya ɔtu caca ō je ya alɔ ɛhi a? (Má ifoto nōo yɔ ku Ɔda Ō Gbaajɛ nyā a.)

¹¹ Abɔ eko nɛ Umɛsayiya gáā wa ipu ɛcɛ nyā le ya a, Ujehofa ya ku Ujɔni o ya Ubatisim kóō tɔɔna lɛ ācɛ klla ta uwa ɔtu kwu ɔtu kéē le piyabɔ. Eko nɛ Ujisɔsi kē gbɔɔ uklɔ ku ɔna ō ta ku nu a, ó nwu ācɛ ɛgɛ nōó cɛgbá lɛ kéē le piyabɔ a.—Umát. 3:​1, 2; 4:17.

¹² Eko nɛ Ujisɔsi yɔ ipu ɛcɛ nyā a, ó nwu ācɛ ka Adā nu gē ya ɔtu caca ō je ya alɔ ɛhi eko duuma nɛ alɔ lɛ íne biya. Ɔwɛ éyi nɛ Ujisɔsi ya ɛnyā a wɛ oŋma lɛ ō ta ɛnɛɛnɛ aciije lɛyikwu adā éyi mla ɔyi nu. Ɔyi a le miya ō nyɛɛ  ŋma ɔlɛ klla ya ɔdobɔbi alɛwa. Amáŋ abɔ eko yɔ i nyɔ “nɛ̄ eyī gbo ɔ́ gɔɔ ā,” ó kwu cigbihi wa ɔlɛ. Ɔdi nɛ adā nu ya a? Ujisɔsi ka ka ɔyi a yɔ “ɛga oligbó ŋmá ɔlɛ́ ɛ́ɛ́ nɛ̄ ádā nū má ɔ̄ á. Ó le tū ɔ̄ eyīnyinyi, anɔ́ɔ ó le inya kwu nyɔ̄ gaá lɛ ɔ́ kwú bá ɔtū lɔɔlɔhi á.” Ɔyi a i leyice ka adā nu géē je ya ɔ ɛhi ŋ. Ohigbu ɛnyā, ó da adā nu ɔ̄kā ɔdaŋ nɛ ó géē yuklɔ ku ɔcocɛhɔ ɔlɛ nu. Amáŋ adā a yɔ i ya ɔtu caca ō kwu je ya ɔ ɛhi. Ó hi ɔ “ka ɔyí um,” klla lɛ ɔ miyɛ cigbihi wa ipu apɔlɛ a. Adā a kahinii: “[Ɔyi um nyā] gebí, é kē lɛ ɔ́ pīyɛ̄ ɛɛ́!” (Ulúk. 15:​11-32) Eko nɛ Ujisɔsi lā ɔkpanco a, ó lɛ aafu ŋ ó gē má igbalɛwa ɛgɛ nɛ Adā nu gē mafu eyinyinyi klla gē je ya ācɛ nōo le piyabɔ ŋma íne néē biya a ɛhi fiyaa a. Aciije nɛ Ujisɔsi ta nyā tu alɔ ɔtu kwu ɔtu klla mafu ɛgɛ nɛ Adā alɔ Ujehofa gē mafu eyinyinyi nɛhi lɛ a!

13-14. Ɛlā nyá nɛ ɔcocɛhɔ Upita nwu lɛyikwu ō je ya ɛhi a, ɔdi nɛ ó kē nwu ācɛ ɔhá lɛyikwu ɔ a? (Má ifoto a.)

¹³ Ɔcocɛhɔ Upita nwu aɛlā ocɛgbá ŋma ɛgiyi Ujisɔsi lɛyikwu ɛgɛ nɛ Ujehofa gē je ya ācɛ nōo le piyabɔ a ɛhi a. Upita ya inyileyi alɛwa, amáŋ Ujisɔsi kē lɛ ɔtu caca ō je ya ɔ ɛhi. Ocabɔ mafu, igbihi nɛ Upita lɛ iho ku Ondu nu hɛ igbo ɛta a, ɔtu ŋmo ɔ ɛpɔbi nɛɛnɛhi. (Umát. 26:​34, 35, 69-75) Amáŋ igbihi nɛ Ujisɔsi le heyi ŋma ɔlekwu a, ó lɛ iyi nu mafu lɛ Upita eko nɛ ó yɔ ofoofunu o ya ɛɛ kóō kɛla mla ɔ. (Ulúk. 24:​33, 34; 1 Ukɔ́r. 15:​3-5) Ujisɔsi jé ka Upita kwu piyabɔ ɛ, ó kē dɔka ō cɛ lɛ ɔ jé kpɔcii ka ó kwu je ya ɔ ɛhi ɛ.

¹⁴ Ó gáā le ta Upita eyī peee ɛgɛ nɛ ɔtu gē ya ɔcɛ eko nɛ ó kwu piyabɔ néē klla kwu je ya ɔ ɛhi a. Ohigbu ɛnyā, ó nwu ācɛ ɔhá lɛyikwu aɛlā nɛ ó nwu a. Igbihi Upɛntikɔsi, Upita lɛ ɔ ta ɛwa ku ācɛ Ujiyu eyī peee ka é lɛ Umɛsayiya ŋmo ɛ. Naana kpɔ a, ó ta uwa ɔtu kwu ɔtu ŋma lɛ ō ka kahinii: ‘Aá le pīyabɔ̄ kú aá kwúcē wā ɛgiyí Ɔwɔicō, cɛ́ɛ́ kóō kwú íne nɛ aa bīya ā í yá aá ɛhi. Ɔ́dāŋ́ ka aá le yá lɛ ā, cɛɛ aa géē jɔɔnyɛ eko ku ɛbɔ ŋma ɛgiyi Ujehofa.’ (Ācot.  3:​14, 15, 17, 19) Upita nwu ka ɔcɛ o biya íne gē piyabɔ ŋma lɛ ō kwuce wa ɛgiyi Ɔwɔico. Ɛnyā wɛ ka ó géē piya ɔwɛ obɔbi nɛ ó gē gbɛla a abɔ, lɛ abɔ ci ō ya ɔdobɔbi, klla gbɔɔ ō ya ɔdā nōo he Ɔwɔico ɔtu a. Ɔcocɛhɔ a klla nwu ka Ujehofa gē je íne ō biya a ya uwa ɛhi duu. Ó lɛbɛɛka ó lɛ íne ō biya ɔɔma nya duudu nɛ ɔcɛ duuma i gáā má ɔ gla gɛ ŋ ma. Abɔ ihayi alɛwa le gla a, Upita cɛ lɛ Ācɛ O Yɛce Ukraist a jé kpɔcii kahinii: “Óndú ā í . . . tíne kú ɔ̄cɛ dúúmā kóō le yíífi ŋ́, amáŋ ó . . . tíne ka odúúdú uwā kéē le pīyabɔ̄ ŋmá íne nēé bīya ā.” (2 Upít. 3:9) Eko duuma nɛ alɔ le piyabɔ ŋma íne ō biya, ɔdaŋ nōó kóō wɛ íne ō biya bɔbi bɔbi naana, ó wɛ ɔdā ō ta ɔtu kwu ɔtu ō jé ka Ujehofa gē je ya alɔ ɛhi duu!

15-16. (a) Ɛgɛnyá nɛ ɔyikpo Upɔlu bi le nwu ɛlā lɛyikwu ō je ya ɛhi a? (1 Utímōti 1:​12-15) (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā ɔhá a?

¹⁵ Upɔlu nōo ŋma Utasusi a ya ɔdobɔbi alɛwa. Ó ya Ācɛ O Yɛce Ukraist ŋmo nɛɛnɛhi. (Ācot. 7:58–8:3) Ācɛ O Yɛce Ukraist alɛwa lɔfu gbɛla ka ó gáā piyabɔ gboogboo gla ŋ. Amáŋ, Ujisɔsi jé ka Upɔlu lɔfu piyabɔ gla. Anu mla Adā nu má auce olɔhi ɛgiyi Upɔlu. Ujisɔsi kahinii: “Ó wɛ ɔ̄cɛ nɛ̄ n le fu kóō cɛ̄ um ɛhɔ̄, kóō yá ká aílɔ́wá, aɔ́cɛ́ mɛ́mla ācɛ kú Ísrɛ̄lu kéē lɛ iyē kú um jé.” (Ācot. 9:15) Ujisɔsi kóō bi ɔwɛ ohidaago le ta Upɔlu abɔ kóō kwu piyabɔ. (Ācot. 9:​1-9, 17-20) Upɔlu kwu piyabɔ klla kwu piya Ɔcɛ O Yɛce Ukraist. Ujisɔsi klla lɛ uklɔ ku ɔcocɛhɔ je lɛ ɔ kóō ya. Upɔlu ka igbalɛwa ɛgɛ nɛ ó jɛ ɔ eyī lɛ ka Ujehofa mla Ujisɔsi gbonɛnɛ klla mafu eyinyinyi lɛ ɔ a. (Jé 1 Utímōti 1:​12-15.) Upɔlu da ayinɛ nu nɔnyilɔ mla ayinɛ nu nɔnya kahinii: “[Ɔwɔico] gē cībū aá gbojī ajɛ ohígbū ka ó yɔ̄ ī yá ká aá le pīyabɔ̄ ŋmá íne ō bīya.”—Uróm 2:4.

¹⁶ Ó lɛ eko éyi nɛ Upɔlu po ka ujɔ nōo yɔ Ukɔrinti a, jɛga lɛ ɔcɛnyilɔ éyi nōo cikpo ɔnyā ɔhá kóō gɔbu yɔ ipu ujɔ a. Ɔdi nɛ Upɔlu da uwa kéē ya a? Oŋma ɛlā nɛ ó ka a, alɔ lɔfu nwu ɛgɛ nɛ Ujehofa gē mafu ihɔtu eko nɛ ó yɔ i ya ācɛ nōo gē gba ɔ ɛ̄gbā a itala mla ɛgɛ nɛ ó gē mafu ihɔtu lɛ uwa eko néē le piyabɔ a. Alɔ klla géē nwu ɛgɛ nɛ alɔ lɔfu gbla ɔ ya a. Ipu ikpɛyi ɛlā nōo gboce ɛnyā a, alɔ géē kɛla lɛyikwu ɔdā nōo ya ipu ujɔ nōo yɔ Ukɔrinti a.