Ɔcocɛhɔ Upɔlu ta ɔkpá fu Ācɛ O Yɛce Ukraist nōo yɔ Utesaloníka a kahinii: “Ɔ́dāŋ ka ɔ̄cɛ dúúmā tá kóō bī ɔdā nɛ̄ alɔ ka ipú ɔkpá nyā yúklɔ́, aá leyī bī ɔ̄.” (2 Utes. 3:14) Gbɔbu a, alɔ ka ka anyakwɔcɛ ku ujɔ gē ya ōmiya nyā a. Ikee a, anyakwɔcɛ ku ujɔ gē ya ɛlā ō ka tɛɛcɛ lɛ ujɔ ɔdaŋ ka é má ka ó lɛ ɔcɛ éyi ipu ujɔ ɔɔma nōo gɔbu ta ō bi ukɔ́ nōo ŋma ipu ɛlā ku Ɔwɔico a le yuklɔ. Igbihi ɛlā ō ka tɛɛcɛ a, eyeeye ku ācɛ ō tɔɔna ɛlā Ɔwɔico a i gáā gɔbu piyatɔha mla ɔcɛ ɔɔma gɛ ŋ. Ayika ipu ōjila ku ujɔ amāŋ uklɔ ku ɔna ō ta foofunu.

Amáŋ, alɔ cɛgbá ō ya opiyabɔ. Babanya, alɔ jɛyi ku ukɔ́ nɛ Upɔlu tu a ka ó wɛ ōmiya nɛ eyeeye ku ācɛ nōo yɔ ipu ujɔ a cɛgbá ō ya ipu āhɔ̄ ōhī. Ohigbu ɛnyā, ó cɛgbá ku anyakwɔcɛ ku ujɔ kéē ya ɛlā ō ka tɛɛcɛ ku ahɔ̄ ō pi gɛ ŋ. Ɔdiya nɛ opiyabɔ nyā ya a? Leyi yɛ ɔdā nɛ Upɔlu yɔ i kɛla lɛyikwu ɔ eko nɛ ó tu ukɔ́ nyā a.

Upɔlu má ka ācɛ ōhī ipu ujɔ a “tá ka aá yúklɔ́ ŋ́.” Ó tu uwa ukɔ́ ŋma ipu ɛlā ku Ɔwɔico gbɔbu ɛ, amáŋ é ta ō bi ɔ le yuklɔ. Ɛpleeko nɛ ó nyɔ gáā má uwa gbɔbu a, ó je ɔdá lɛ uwa kahinii: “Ɔ̄cɛ dúúmā nōó yúklɔ́ ŋ́, í cíkā ō lé ɔdōlé ŋ́.” Amáŋ, ācɛ ōhī ta ō yuklɔ kéē je otabɔ lɛ iyi uwa, naana néē lɛ ɔfu ō yuklɔ a. Ɔdā ɔhá kpɔ, é yɔ i gwo tu ipu ɛlā ku ācɛ ɔhá. Ɛgɛnyá nɛ Ācɛ O Yɛce Ukraist cika ō ya ɛlā mla ācɛ ɛgɛnyā a?—2 Utes. 3:​6, 10-12.

Upɔlu kahinii: “Aá leyī bī” uwa. Ɛlā ku Ugrisii néē bi yuklɔ a lɛ ō ya mla ō lɛ ācɛ ɛgɛnyā jé klla leyi kwɛɛcɛ lɔɔlɔhi o ya ɛɛ kéē lɛ abɔ kwu alɔ ŋ. Upɔlu tu ukɔ́ nyā lɛ ɛjɛɛji ācɛ nōo yɔ ipu ujɔ a, ó wɛ anyakwɔcɛ ku ujɔ foofunu ŋ. (2 Utes. 1:1; 3:6) Ohigbu ɛnyā eyeeye ku Ācɛ O Yɛce Ukraist nōo má ɔyinɛ ta ō lɛyitaajɛ lɛ ukɔ́ nōo ŋma ipu Ubáyíbu a, lɔfu miya ō hii “lé tɔ̄há [amāŋ piyatɔha] mla anú gɛ ŋ́.”

Ɛnyā wɛ ka é géē ya ɛlā mla ɔcɛ a bɛɛka ɔcɛ néē fu ŋma ipu ujɔ nɛɛ? Ehee, ohigbu ka Upɔlu klla kahinii: “Aá pi uwá ahɔ̄ abɔ̄ é wɛ ācɔ̄lóhɔ́nyɛtá ɔ́mpā aá.” Eyeeye ku Ācɛ O Yɛce Ukraist géē gɔbu piyatɔha mla ɔ ipu ōjila ku ujɔ mla uklɔ ku ɔna ō ta, amáŋ é lɔfu miya ka é gáā lɛ eko taajɛ mla anu ō jɔɔnyɛ iyi uwa gɛ ŋ. Ɔdiya a? Upɔlu kahinii: “Cɛ́ɛ́ kú uwēyī kóō lɛ ɔ́ kwú.” Eko duuma nɛ alɔ kwu abɔ i ci ō piyatɔha mla ɔyinɛ alɔ ɔwɛ ɛgɛnyā, uweyi lɔfu lɛ ɔ kwu ohigbu ɔdā nɛ ó yɔ i ya a cɛɛ ó kē le piyabɔ.—2 Utes. 3:​14, 15.

Ɛgɛnyá nɛ Ācɛ O Yɛce Ukraist lɔfu bi ukɔ́ nyá yuklɔ icɛ a? Aflɛyi, alɔ cɛgbá ō jé kpɔcii ka uce ō ya ku ɔcɛ a i le kpaakpa ŋ, ɛgɛ nɛ Upɔlu ka a. Upɔlu i yɔ i kɛla lɛyikwu ācɛ nōo lɔfu ya odee nɛ ɔtu ku alɔ i gáā lɔfu jɛga lɛ alɔ ō ya ŋ, amáŋ nōó kē biya aíne amāŋ aukɔ́ ku Ubáyíbu duuma ŋ. Ó kē yɔ i kɛla lɛyikwu ācɛ nōo gē leyi má odee ɔwɛ ɛyɛɛyi gwu alɔ ta a ŋ. Ó kē yɔ i kɛla lɛyikwu ācɛ nōo ya alɔ ɔdā ō kwiiye a ŋ. Ikɔkɔ ɔɔma, ó yɔ i kɛla lɛyikwu ācɛ nōo kweyigedee ta ō lɛyitaajɛ lɛ aukɔ́ nōo ŋma ipu ɛlā ku Ɔwɔico a.

Icɛ, ɔdaŋ ku alɔ má ɔyinɛ duuma nōo gɔbu ta ō lɛyitaajɛ lɛ aukɔ́ nōo ŋma ipu ɛlā ku Ɔwɔico a, a alɔ géē miya abɔyi alɔ ku alɔ i gáā piyatɔha mla anu amāŋ jɔɔnyɛ iyi alɔ tɔha mla anu gɛ ŋ. Ohigbu ka ɛnyā wɛ ōmiya nɛ ɔcɛ gē ya abɔyi nu a, ācɛ apɔlɛ ku alɔ nōo wɛ Ācɛ Ocijali Ku Ujehofa nɛ alɔ lā ɔlɛ mla uwa a nɛ alɔ gáā da uwa foofunu a, alɔ hii dā ācɛ ɔhá ŋ. Alɔ kē géē gɔbu piyatɔha mla ɔyinɛ a ipu ōjila ku ujɔ mla uklɔ ku ɔna ō ta. Eko duuma nɛ ó lɛ ɛlá ō gbo mla uce ō ya ku nu piyabɔ, alɔ géē piyatɔha mla ɔ kpɔ.