Ehee. Ɔdā nɛ ó ta a le kpaakpa.

Leyi yɛ ɔdā nɛ ó ta ipu ɔgba ɔɔma mla aɔgba nōo gboce ɔ a. Ó kahinii: “N̄ gē yɔ̄ ī gwíijē, yɔ̄ ī cɛ̄tra uwɔ piyóó. Cɛ́ɛ́ ká n̄ gē yɔ̄ ī yá okónu nɛ̄ n ce gā uwɔ ā jīla eko dóódu.” “N géē cɛ̄tra uwɔ mla odúúdú ɔtū kú um, Óndú, Ɔwɔicō kú um. N géē ka ɛ́gɛ́nɛ̄ a lɔfú nɛ̄hi lɛ ā tɛ́ɛcɛ piyóó.” “N géē cɛ̄tra uwɔ piyóó.”—Aíjē 61:8; 86:12; 145:1, 2.

Eko nɛ Udefidi ta aɛlā nyā, ó gbɛla ka anuɔ i gáā kwū ŋ nɛ nóó. Ó jé ka Ujehofa le ka ku alɛɛcɛ géē kwū ohigbu kē lɛ íne biya. Udefidi klla jé ka anuɔ wɛ ɔcɛ ō biya íne. (Ohút. 3:3, 17-19; Aíjē 51:4, 5) Ó jé ka acɛnyilɔ nōo gba Ujehofa ɛ̄gbā kpaakpa bɛɛka Ebraham, Ayisiki, mla Ujekɔpu a gekwu ɛ. Udefidi klla jé ka anuɔ géē kwū duu. (Aíjē 37:25; 39:4) Amáŋ aɛlā ku nu nōo yɔ ipu ɔkpá ku Aíjē Kú Ɛ̄gbā 61:8 a, mafu ɛgɛ nɛ ó lɛ ɔtu caca ō cɛtra Ɔwɔico piyoo gbeeko nɛ ó géē kwū a.—2 Usám. 7:12.

Ekoohi Udefidi gē ta ɔkpá lɛyikwu aɔdā ōhī nɛ ó má ipu oyeeyi ɛ, bɛɛka ɛ̄nɛ̄ alɔ lɔfu má ŋma ɔdā nōo wɛ ikpɛyi ɛlā ō gbɔɔ ku Aíjē Kú Ɛ̄gbā 18, 51, mla 52 a. Ipu ɔkpá ku Aíjē Kú Ɛ̄gbā 23, Udefidi ka ka Ujehofa lɛbɛɛka ɔcogbaala nōo gē mafu ɔwɛ lɛ alɔ, nōo gē ya ku alɔ lɛ ɔtu ogbonɛnɛ, mla ɔcɛ nōo gē je ogbotu lɛ alɔ. Udefidi lɛbɛɛka ɔcogbaala ɔɔma a. Ó kē dɔka ō gba Ɔwɔico ɛ̄gbā ‘ipú odúúdú oyēeyī kú nu.’—Aíjē 23:6.

Bla ka Ujehofa je ijeeyi lɛ Udefidi kóō ta ɛjɛɛji ɔdā nɛ ó ta a. Ɔdā nɛ ó ta a lɛ ō ya mla aakacɛ lɛyikwu ɔdā nōo géē ya igbihaajɛ a. Ocabɔ mafu, ipu ɔkpá ku Aíjē Kú Ɛ̄gbā 110, Udefidi ta ɔkpá lɛyikwu eko nɛ Ondu ku nu géē “cīce abɔ̄lɔ́ná kú [Ɔwɔico]” ipu ɔkpanco klla géē miyɛ ɔfu nɛhi a. Ɔdi nɛ ó gáā ya? Ō lɛ aolɛla ku Ɔwɔico yale mla ō “hɛ́pɔ̄ kú aéwɔhá” nōo yɔ ipu ɛcɛ a. Ipɔɔma ku Udefidi nɛ Ujisɔsi nōo wɛ Umɛsayiya a ŋma a. Umɛsayiya géē lé ɔcɛ́ ŋma ɔkpanco klla géē wɛ “ɔ̄cogwɛ́ɛya piyóó.” (Aíjē 110:1-6) Ujisɔsi ka ka akacɛ nōo yɔ ipu ɔkpá ku Aíjē Kú Ɛ̄gbā 110 a yɔ i kɛla lɛyikwu ɔ, klla géē ya jila ɛcɔbu.—Umát. 22:41-45.

Ujehofa bi Udefidi kóō ta ɔkpá lɛyikwu ɔdā nōo géē ya eko ku nu mla ɛcɔbu, eko nɛ ó géē heyi ŋma ɔlekwu kóō cɛtra iye ku Ujehofa piyoo a. Ohigbu ɛnyā, ɔkpá ku Aíjē Kú Ɛ̄gbā 37:10, 11, 29 lɔfu tɛɛma kwu eko néē ta ɔ a mla ɛcɔbu. Aɛga ku Ubáyíbu ɔɔma ya jila eko ikee ipu ajɛ ku Isrɛlu, ó klla géē ya jila ɛcɔbu eko nɛ Ɔwɔico géē ya okonu ō ce ku nu jila a.—Má ogwotu ɔmɛ 8 ku ikpɛyi ɛlā nōo kahiniii: “A Géē Yɔ Mla Um Ipu Uparadais” nōo yɔ ipu oklɔcɛ nyā a.

Ɔkpá ku Aíjē Kú Ɛ̄gbā 61:8 mla aɛga ku Ubáyíbu ekponu ɔɔma, mafu ka Udefidi dɔka ō cɛtra iye ku Ujehofa ipu ajɛ ku Isrɛlu ikee a gbeeko nɛ ó géē kwū. É mafu ɔdā nɛ Udefidi géē ya ɛcɔbu ɔdaŋ ka Ujehofa lɛ ɔ heyi ŋma ɔlekwu a.