1. Eko kpii gɔbu ɛɛ ka Ujisɔsi kóō kwū a, ɔdi nɛ ó da uwi éyi néē le playi ɛyi ɔcí mla ɔ a? (Ulúku 23:39-43)

 UJISƆSI mla auwi ɛpa néē le playi ɛyi ɔcí mla ɔ a yɔ i má owe nɛɛnɛhi abɔ é yɔ i kwū ɛmɛɛma a. (Ulúk. 23:32, 33) Auwi ɛplɛɛpa a yɔ i ŋmo Ujisɔsi okonu, ohigbu ɛnyā ó teyi peee ka é wɛ ayikpo ku nu ŋ. (Umát. 27:44; Umák. 15:32) Amáŋ éyi ku uwa kwu ɔtu ku nu i piyabɔ. Ó kahinii: “Gbɛlá kwú um, Ujísɔ̄si, eko nɛ̄ a géē wā í cɔcɛ́ ā!” Ujisɔsi toohi kahinii: ‘N cokónu ga awɔ ka ícɛ nyā a géē yɔ̄ mla um ipu Uparadais.’ (Jé Ulúku 23:39-43.) Ó lɛ ɔdā duuma nōo mafu ka uwi nyā miyɛ ɛlā ku ‘ajɔ̄ɔ̄cɛ́ kú ɔkpáncō’ nɛ Ujisɔsi tɔɔna lɛyikwu ɔ a cɛ ŋ. Ujisɔsi i kē ka ka adā ɔɔma géē yɔ ipu Ajɔɔcɛ ku ɔkpanco a ŋ. (Umát. 4:17) Ujisɔsi yɔ i kɛla lɛyikwu Uparadais nōo géē wa ɛcɔbu ipu ɛcɛ nyā a. Ɔdiya nɛ alɔ lɔfu ka lɛ a?

2. Ɛgɛnyá nɛ alɔ bi le jé ka uwi nōo ya opiyabɔ a wɛ ɔcɛ Ujiyu a?

² Á jé ŋ, uwi nōo ya opiyabɔ a lɔfu wɛ ɔcɛ Ujiyu. Uwi ɔɔma da ɔmpa nu a kahinii: “Á yúúfi Ɔwɔicō ŋ́ nɛɛ? É ŋmó uwɔ ɛdɔ ɛpɔ̄bí ékpó mla anú?” (Ulúk. 23:40) Ācɛ Ujiyu gē gba Ɔwɔico ekponu ɛ̄gbā, amáŋ ācɛ ŋma aéwo ɔhá a kpɔtuce aɔwɔ alɛwa. (Oyɛb. 20:2, 3; 1 Ukɔ́r. 8:5, 6) Ɔdaŋ ku auwi a i gē wɛ ācɛ Ujiyu ŋ nɛ, uwi ɔɔma gē yɛ i lɔfu da ɔ ɔka kahinii: “Á yúúfi aɔwɔ ŋ́ nɛɛ?” Ɔdā ɔhá kpɔ, é ta Ujisɔsi ɛhɔ gā ɛgiyi ācɛ aéwo ɔhá nóó, amáŋ “ɛgiyí aálá kú Ísrɛ̄lu, nēe bī ā” nɛ. (Umát. 15:24) Ɔwɔico kē cɛ ku ācɛ Isrɛlu kéē jé ka ó géē je ācɛ nōo kwū a heyi ŋma ɔlekwu. Uwi nōo ya opiyabɔ a lɔfu jé ɛnyā, ohigbu ka oŋma ɛlā nɛ ó ka a, ó jé ka Ujehofa géē je Ujisɔsi heyi ŋma ɔlekwu kóō  lé ɔcɛ́ ipu Ajɔɔcɛ ku Ɔwɔico. Adā ɔɔma leyice ka Ɔwɔico géē je ɔ heyi ŋma ɔlekwu duu.

3. Ɔdi nɛ uwi a lɔfu gbɛla eko nɛ Ujisɔsi kɛla lɛyikwu Uparadais a? Lɛ ɔ teyi peee. (Ohútu 2:15)

³ Ohigbu ka uwi nōo piya ɔtu ku nu abɔ a wɛ ɔcɛ Ujiyu a, ó lɛ aafu ŋ, ó lɔfu jé ɔ̄kā ku Adam mla Iifu mɛmla Uparadais nɛ Ujehofa ya lɛ uwa a. Uwi a lɔfu kpɔtuce ka Uparadais nɛ Ujisɔsi yɔ i kɛla lɛyikwu ɔ a, géē wɛ iga nōo heyifuu ipu ɛcɛ nyā.—Jé Ohútu 2:15.

4. Ɔdi nɛ ɛlā nɛ Ujisɔsi ka lɛ auwi a cika ō lɛ abɔ kwu alɔ ɔtu ō gbɛla lɛyikwu ɔ a?

⁴ Ɛlā nɛ Ujisɔsi ka lɛ uwi ɔɔma a, cika ō lɛ abɔ kwu alɔ ɔtu ku alɔ gbɛla lɛyikwu ɛgɛ nɛ oyeeyi gáā lɛ ipu Uparadais a. Ku ɛlā ɔkwɛyi a ba, alɔ lɔfu nwu odee lɛyikwu Uparadais oŋma lɛ ɔwɛ ku ɛbɔ nɛ Usolomɔn lé Ɔcɛ́ a. Ubáyíbu da alɔ ka Ujisɔsi fiyɛ Usolomɔn a. Ohigbu ɔɔma, alɔ leyice ka Ujisɔsi géē yuklɔ tɔha mla ācɛ nōo géē lé ɔcɛ́ mla anu a, o ya ɛɛ kéē kwu ɛcɛ nyā u piya uparadais nōo heyifuu nɛhi. (Umát. 12:42) Ó teyi peee ka ó cika ō he “aálá ɔhá” ɔtu ō jé ɔdā néē cika ō ya, o ya ɛɛ kéē cika jɛ ō lā oyeeyi opiyoo ipu Uparadais a.—Ujɔ́n. 10:16.

5. Ɛgɛnyá nɛ a gbɛla ka oyeeyi gáā lɛ ipu Uparadais a?

⁵ Ɛgɛnyá nɛ a gbɛla ka oyeeyi gáā lɛ ipu Uparadais a? Á jé ŋ, a lɔfu gbɛla lɛyikwu ɛga oheyifuu nɛhi éyi nōo lɛbɛɛka iga ku Idɛn a. (Ohút. 2:7-9) A lɔfu blakwu akacɛ nōo yɔ ipu ɔkpá ku Umayika nōo ka ka “ɔnyɔɔnyɛ géē cīce ɔkwu ɔcí kú ufáyin mla ufíg kú nū ɛbɔ́” a. (Umáy. 4:3, 4) A klla lɔfu blakwu aɛga ku Ubáyíbu ɔhá nōo ka ka ɔdole géē yɔ ɛbɛɛbɛ a. (Aíjē 72:16; Ayis. 65:21, 22) Ohigbu ɛnyā, a lɔfu yɔ i leyi má iyi uwɔ yaajɛ ipu iga nōo heyifuu nɛhi ɛgiyi utebulu nɛ ɔdole olɔɔnyɛ le mu ɔ. A klla lɔfu gbɛla ka ɛjɛɛji owu nōo yɔ i ta a yɔ i kpoocu ku aɔcí mla aododo. Á jé ŋ, a klla lɔfu gbɛla ku a yɔ i má iyi uwɔ, aɔmaapu uwɔ, mla aɔya ku uwɔ, kwu ācɛ néē je heyi ŋma ɔlekwu a yɔ i yɛhɛ tɔha klla yɔ i jɔɔnyɛ ō yɔ mla iyi aa. Aɔdā nōo ba kpɛmm nyā, i wɛ ɔna aŋca nóó. Ó lɛ aafu ŋ, alɔ lɔtuce lɔfu lɔfu ka aɔdā nōo ba nyā géē ya ipu ɛcɛ nyā. Ipu Uparadais, alɔ klla géē yuklɔ nɛ alɔ géē jɔɔnyɛ nu.

6. Ɔdi nɛ alɔ gáā bēē ya ipu Uparadais a? (Má ifoto a.)

⁶ Ujehofa ya alɔ ɔwɛ nɛ alɔ géē jɔɔnyɛ uklɔ nɛ alɔ gē ya a. (Ɔ̄cok. 2:24) Alɔ géē lɛ uklɔ alɛwa ō ya ɛpleeko nɛ Ukraist Géē Lé Ɔcɛ́ Ihayi Ula Ɛpa Ce Ofu Igwo a. Ācɛ nōo wi ŋma owe nɛhi mla umiliyɔn alɛwa ku ācɛ néē géē je heyi ŋma ɔlekwu a géē cɛgbá ili, ɔdole, mla ɛga néē géē lā. O ya ɛɛ ku alɔ ya aɔdā nyā tɔɔtɛ a, alɔ géē cɛgbá ō yuklɔ nɛhi nɛ alɔ géē jɔɔnyɛ nu. Ɛgɛ nɛ Ujehofa kē da Adam mla Iifu kéē leyikwu ɛcɛ nyā lɔɔlɔhi a, alɔ géē lɛ ɛnɛɛnɛ uklɔ ō je ɛcɛ nyā piya Uparadais. Gbɛla lɛyikwu ɛgɛ nɛ alɔ géē jɔɔnyɛ ō nwu ācɛ néē je heyi ŋma  ɔlekwu nōó jé ɔdā alɛwa lɛyikwu Ujehofa ŋ ma ɛlā, o ya kéē lɛ ɔdā nɛ ó bi ɔtu ō ya a jé, mla ō ta ācɛ nōo hayi kpaakpa lɛ Ujehofa gbɔbu ɛɛ ku Ujisɔsi kóō wa ɛcɛ nyā a abɔ, kéē gáā lɛ ɔdā nōo ya ŋmiifi néē kwū a jé duu a!

7. Ɔdi nɛ alɔ lɔfu lɔtuce lɔfu lɔfu a, ɔdi kē ya a?

⁷ Alɔ lɔfu lɔtuce lɔfu lɔfu ka ɔdaŋ ku alɔ yɔ ipu Uparadais, alɔ géē lā ɛbɔ, lɛ ɛjɛɛji ɔdā nɛ alɔ cɛgbá, klla géē ya odee lɔɔlɔhi. Ɔdiya a? Ohigbu ka Ujehofa le mafu lɛ alɔ ɛgɛ nɛ oyeeyi géē lɛ ɛhaajɛ ɔcɛ́ ō lé ku Ɔyinɔnyilɔ ku nu ɛ. Ɔ̄kā ku ɔcɛ́ ō lé ku Usolomɔn wɛ ocabɔ éyi.

8. Ɛgɛnyá nɛ aɛlā nōo yɔ ipu ɔkpá ku Aíjē Kú Ɛ̄gbā 37:10, 11, 29 a, ya jila igbihi nɛ Udefidi nōo wɛ Ɔcɛ́ a ta uwa taajɛ a? (Má “Aɔka Nɛ Ācɛ O Jé Ɔkpá Ku Alɔ Gē Da” nōo yɔ ipu oklɔcɛ nyā a.)

⁸ Alelekwu Ihɔ ku Ɔwɔico ta Udefidi abɔ kóō ta ɔkpá lɛyikwu ɛgɛ nɛ oyeeyi géē lɛ, eko nɛ ɔcɛ́ nōo jeeyi klla hayi kpaakpa géē lɛ ɔcɛ́ ɛcɔbu a. (Jé Aíjē Kú Ɛ̄gbā 37:10, 11, 29.) Igbalɛwa alɔ gē jé ɛlā nōo yɔ ipu ɔkpá ku Aíjē Kú Ɛ̄gbā 37:11 lɛ ācɛ ɔhá, eko duuma nɛ alɔ gē kɛla lɛyikwu Uparadais nōo géē wa ɛcɔbu a. Alɔ lɛ ɔdā okpɔcii nōo ya ɛɛ nɛ alɔ cika ō ya ɔɔma, ohigbu ka Ujisɔsi kɛla ŋma ɛga ku Ubáyíbu ɔɔma ipu Ɛlā Ō Ka Tɛɛcɛ ku nu ɛyi ku Olifu, ó kē mafu ku ɛlā ɔɔma géē ya jila ɛcɔbu. (Umát. 5:5) Amáŋ aɛlā nɛ Udefidi ka a klla mafu ɛgɛ nɛ oyeeyi géē lɛ ɛpleeko ku Ɔcɛ́ Ō Lé Ku Usolomɔn a. Eko nɛ Usolomɔn lé ɔcɛ́ ajɛ ku Isrɛlu a, ācɛ ɔlɛ Ɔwɔico jɔɔnyɛ ɛbɔ klla gba agbenu ipu “ajɛ olɔhi o yá ɔdɛ̄hɔ̄ nɛ̄hi” a. Ɔwɔico kahinii: “Ɔ́dāŋ ka aá bá gē lɛ íne kú um tū . . . , N géē je ɛbɔ́ lɛ aá ipú ajɛ ā, nɛ̄ aá géē gbiyɔ̄lā nɛ̄ aá gáā yúúfi kú ɔ̄cɛ dúúmā otú ŋ́.” (Ulīf. 20:24; 26:3, 6) Aokonu ō ce nyā le ya jila ɛpleeko nɛ Usolomɔn lé ɔcɛ́ ajɛ ku Isrɛlu a. (1 Uklɔ. 22:9; 29:26-28) Ujehofa klla cokonu ku acobɔbiipu nōo gē gba aɔwɔ ɔhá ɛ̄gbā a géē “bí tāajɛ.” (Aíjē 37:10) Ohigbu ɛnyā, ɛlā nōo yɔ ipu ɔkpá ku Aíjē Kú Ɛ̄gbā 37:10, 11, 29 a le ya jila gbɔbu ɛ, ó klla géē ya jila ɛcɔbu kpɔ.

9. Ɔdi nɛ ɔcanya ku Ussɛba ka lɛyikwu ɔcɛ́ ō lé ku Usolomɔn a?

⁹ Ɔcanya ku Ussɛba lɛ ɔ̄kā ku ɛbɔ mla ɛgɛ nɛ éwo ku Isrɛlu gba agbenu lɛ ɛpleeko nɛ Usolomɔn  yɔ i lé ɔcɛ́ a po. Ohigbu ɛnyā, ó yɛ ŋma ɛga oligbo wa Ujɛrusalɛm o ya ɛɛ kóō lɛ āhɔ̄ a má abɔyi nu. (1 Aɔ́cɛ́ 10:1) Igbihi nɛ ó leyi yɛ agblɔcɛ ku Usolomɔn a, ó kahinii: “Ń kōō pó gaajɛ āyā kú ɔdā nɛ̄ um má ā ŋ́. . . . Ɛyí lɔhi lɛ anyā ɔlɛ́ uwɔ mɛ́mla aígabɔ̄ kú ɔlɛ́ uwɔ íbí. Uwá nēe gē bá iyɔ̄bū uwɔ gē pó ɛlā kú íjééyī kú uwɔ nyā eko dóódu ā.” (1 Aɔ́cɛ́ 10:6-8) Amáŋ āhɔ̄ nɛ ācɛ Isrɛlu jɔɔnyɛ nu ɛhaajɛ ɔcɛ́ ō lé ku Usolomɔn a, wɛ ocabɔ ligii ku ɔdā nɛ Ujehofa géē ya lɛ alɛɛcɛ ɛhaajɛ ɔcɛ́ ō lé ku Ɔyinɔnyilɔ ku nu Ujisɔsi a.

10. Ɔwɛ ɛyɛɛyɛyi nyá nɛ Ujisɔsi fiyɛ Usolomɔn a?

¹⁰ Ujisɔsi fiyɛ Usolomɔn aya doodu. Usolomɔn wɛ ɔcɛ nōó jila iyē ŋ nōo ya inyileyi bɔbi bɔbi, ɔɔma kē bi unwalu nɛhi gē lɛ ācɛ ɔlɛ Ɔwɔico igbihaajɛ. Amáŋ Ujisɔsi wɛ Ɔcɛ́ nōo jila iyē mɛɛlɛ nōó gē ya inyileyi ŋ. (Ulúk. 1:32; Uhíb. 4:14, 15) Ujisɔsi hayi kpaakpa lɛ Ɔwɔico gā ajaajɛ naana nɛ Usetan ya ɔ ojama bɔbi bɔbi a. Ujisɔsi le mafu ka ó gáā ya ɔdobɔbi amāŋ ya ɔdā duuma nōo géē ya ācɛ nɛ ó géē lé ɔcɛ́ ikpɛyi ku uwa a agbe gboogboo ŋ. Anu wɛ Ɔcɛ́ nōo lɔhi fiyɛ duu nɛ alɔ lɔfu lɛ a.

11. Anyɛ gáā lé ɔcɛ tɔha mla Ujisɔsi a?

¹¹ Ujisɔsi géē fu ācɛ ula ofigwaahata (144,000) nōo géē lé ɔcɛ́ mla ɔ, o ya ɛɛ kéē leyikwu alɛɛcɛ klla lɛ ɔdā nɛ Ujehofa bi ɔtu lɛyikwu ɛcɛ nyā ya jila. (Mafú 14:1-3) Ācɛ nōo ba nyā lɔtu unwalu klla má ojama ɛyɛɛyɛyi ɛpleeko néē yɔ ipu ɛcɛ a, ohigbu ɛnyā ó géē tɔɔtɛ lɛ uwa ō jɛyi ɔdā nɛ ācɛ nōo yɔ ipu ɛcɛ nyā yɔ i má a. Uklɔ nyá nɛ ācɛ nōo gáā lé ɔcɛ́ mla Ujisɔsi a lɛ ō ya a?

12. Uklɔ nyá nɛ Ujehofa gáā je lɛ ācɛ ula ofigwaahata (144,000) a?

¹² Ujisɔsi mla ācɛ nōo gáā lé ɔcɛ́ mla ɔ a lɛ uklɔ nɛhi ō ya fiyɛ ɛ̄nɛ̄ Usolomɔn ya a. Usolomɔn nōo wɛ Ɔcɛ́ a cɛgbá ō leyikwu umiliyɔn alɛwa ku ācɛ ipu éwo ekponu foofunu. Amáŋ ācɛ nōo gáā lé ɔcɛ́ ipu Ajɔɔcɛ Ku Ɔwɔico a, géē tabɔ leyikwu ubiliyɔn alɛwa ku ācɛ nōo yɔ ipu odoodu ɛcɛ a. Ó lɛ aafu ŋ, ɛga ojilima nɛhi nɛ Ujehofa je lɛ ācɛ ula ofigwaahata (144,000) nyā a!

13. Ɛnɛɛnɛ uklɔ nyá nɛ ācɛ nōo gáā lé ɔcɛ́ mla Ujisɔsi a lɛ a?

¹³ Bɛɛka Ujisɔsi a, ācɛ ula ofigwaahata (144,000) a géē wɛ aɔcɛ́ mla acogwɛɛya. (Mafú 5:10) Eko nɛ ācɛ Isrɛlu a cɛgbá ō lɛyitaajɛ lɛ íne ku Umosisi a, acogwɛɛya a lɛ uklɔ ō ta uwa abɔ kéē lɛ ɛbɔla ku ɔkpiiye mla ō yɔ kwu Ujehofa ajaajɛ a. Íne ɔɔma “wɛ ofu kú ɔdā ɔkwɔ̄ɔ̄kwɛ̄yi nōo yɔ̄ ī wā ɛ̄cɔ̄bū ā,” ohigbu ɔɔma ó géē le kpaakpa ō ka ka ācɛ nōo gáā lé ɔcɛ́ mla Ujisɔsi a, géē ta ācɛ ɔlɛ Ɔwɔico abɔ kéē lɛ ɛbɔla ku ɔkpiiye mla ō yɔ kwu Ujehofa ajaajɛ. (Uhíb. 10:1) Babanya alɔ i jé ɛgɛ nɛ aɔcɛ́ mla acogwɛɛya nyā, gáā yuklɔ tɔha mla ācɛ nōo gáā yɔ ɛhaajɛ ku ɔcɛ́ ō lé ku uwa ipu ɛcɛ nyā ŋ. Amáŋ alɔ jé ka ōmiya duuma nɛ Ujehofa le kwaajɛ, alɔ lɔfu kpɔtuce kpɔcii ka ipu Uparadais nōo yɔ i wa a, ācɛ nōo gáā yɔ ipu ɛcɛ a géē miyɛ ɔwɛ ō ya odee néē géē cɛgbá ō yɛce a.—Mafú 21:3, 4.

14. Ɔdi wɛ ɛma nōo yɔ ɔtahɛ ku “aálá ɔhá” mla ayinɛ ku Ukraist a?

¹⁴ Ujisɔsi hi ācɛ nōo gáā lé ɔcɛ́ mla ɔ a ka “aígwu nɛ̄ŋ́cɛ́.” (Ulúk. 12:32) Ó klla kɛla lɛyikwu ígwu ɔmpa nɛ ó hi ka “aálá ɔhá” a. Aígwu ɛpa nyā wɛ ígwu ku aala ekponu nōo piyatɔha. (Ujɔ́n. 10:16) Ɛjɛɛji ācɛ nōo wɛ ipu ígwu nyā yɔ i yuklɔ tɔha icɛ. É kē géē gɔbu yɔ i yuklɔ tɔha eko nɛ ɛcɛ nyā géē je piya Uparadais a. Ku ɛlā ɔkwɛyi a ba, “aígwu nɛ̄ŋ́cɛ́” a géē yɔ ɔkpanco, “aálá ɔhá” a kē géē lɛ eyiyoce ō  jɔɔnyɛ oyeeyi piyoo ipu ɛcɛ nyā. Amáŋ ó lɛ ɔdā nɛ “aálá ɔhá” a géē cɛgbá ō ya, o ya ɛɛ kéē le cika jɛ ō lā ipu Uparadais.

15. (a) Ɛgɛnyá nɛ “aálá ɔhá” a gē yuklɔ tɔha mla ayinɛ ku Ukraist a? (b) Ɛgɛnyá nɛ alɔ lɔfu yɛce ocabɔ ku ɔyinɛ alɔ nɔnyilɔ nōo yɔ ɛga néē gē je ɛcí lā a? (Má ifoto a.)

¹⁵ Uwi nōo piya ɔtu ku nu abɔ a yɔ i kwū gbɔbu ɛɛ nɛ ó lɛ ɛga ō mafu ka ɔdā nɛ Ujisɔsi ya lɛ ɔ a jɛ ɔ eyī a. Amáŋ, alɔ nōo wɛ ipu ígwu ku “aálá ɔhá” a, lɛ ɛnɛɛnɛ ɛga ō mafu babanya ɛgɛ nɛ ɔtu gē ya alɔ lɛyikwu ɔdā nɛ Ujisɔsi ya lɛ alɔ a. Ocabɔ mafu, alɔ gē mafu ɛgɛ nɛ alɔ yihɔtu ku nu lɛ oŋma lɛ ɛgɛ nɛ alɔ gē ya ɛlā mla ayinɛ ku nu néē lɛ anɔ tu uwa ɛyi nōo yɔ ipu ɛcɛ nyā a. Ujisɔsi ka anuɔ géē kɛpɔ tu aala ɔhá a oŋma lɛ ɛgɛ néē ya ɛlā mla ayinɛ ku nu a. (Umát. 25:31-40) Alɔ lɔfu je otabɔ lɛ ayinɛ ku Ukraist nyā, ŋma lɛ ō bi ɔtu caca le ta uwa abɔ ipu uklɔ ku ɔna ō ta a. (Umát. 28:18-20) Ɔɔma ya ɛɛ nɛ alɔ gē dɔka ō yuklɔ mla ɔdā nɛ alɔ gē bi le ya oklɔcɛ mla ācɛ néē ya tɔɔtɛ lɛ alɔ, bɛɛka ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma. Ɔdaŋ ku á yɔ i ya oklɔcɛ ku Ubáyíbu mla ɔcɛ duuma babanya ɛ ŋ, a lɔfu lɛ ɔ ya ōmiya ku uwɔ ō klɔcɛ mla ācɛ alɛwa nɛ a lɔfu klɔcɛ mla uwa gla a.

16. Ɔdi nɛ alɔ lɔfu ya babanya nōo géē mafu ku alɔ yɔ i tutu ō lā ipu Ajɔɔcɛ Ku Ɔwɔico a?

¹⁶ Alɔ i cɛgbá ō gbeyi jaa gbeeko nɛ alɔ gáā lā Uparadais gbɔbu ɛɛ ku alɔ je piya ɛdɔ ɔcɛ nɛ Ujehofa dɔka abɔɔ a ŋ. Babanya alɔ cika ō ceyitikwu ō bēē kɛla ɔkwɛyi mla ō yɔ yeŋee ipu uce ō ya ku alɔ, klla lā oyeeyi ɔwɛ okpaakpa. Alɔ klla lɔfu yɔ kwu Ujehofa, obiye ku alɔ, mla Ācɛ O Yɛce Ukraist ɔmpa alɔ gā ajaajɛ. Ɔdaŋ ku alɔ lɛyitaajɛ lɛ Ujehofa ipu ɛcɛ obɔbi ku ó babanya, ó géē tɔɔtɛ lɛ alɔ ō lɛyitaajɛ lɛ ɔ fiyɛ ipu Uparadais. Alɔ klla lɔfu nwu odee amāŋ auce ō ya nōo géē mafu ku alɔ yɔ i tutu ō lā ipu Uparadais. Má ikpɛyi ɛlā nōo kahinii: “A Le Tutu Ō ‘Lugwu Ku Ɛcɛ A Ɛ’?” nōo yɔ ipu oklɔcɛ nyā a.

17. Alɔ cika ō yɔ i ŋmo iyi alɔ ɛpɔbi ku ɔdā obɔbi nɛ alɔ ya gáā yɛ a? Lɛ ɔ teyi peee.

¹⁷ Alɔ klla cika ō ceyitikwu ō lɛ abɔ ci ō ŋmo iyi alɔ ɛpɔbi ku ɔdā obɔbi nɛ alɔ ya gáā yɛ a. Ó wɛ ɔkwɛyi, ku alɔ i gáā leyi má ikwū nɛ Ujisɔsi kwū lɛ alɔ a ka ó wɛ ɛga ō ‘kweyigēdēē bīya  íne’ ŋ. (Uhíb. 10:26-31) Amáŋ, alɔ lɔfu jé kpɔcii ka ɔdaŋ ku alɔ le piyabɔ ɔkwɔɔkwɛyi ŋma íne nɛ alɔ biya bɔbi bɔbi a, lɛ otabɔ miyɛ ŋma ɛgiyi Ujehofa mla anyakwɔcɛ ku ujɔ, klla lɛ uce ō ya ku alɔ piyabɔ, ayika Ujehofa kwu je ya alɔ ɛhi ɛ. (Ayis. 55:7; Ācot. 3:19) Blakwu ɛlā nɛ Ujisɔsi da ācɛ Ufarisii a, ó kahinii: “Ń wā gaá hī ācɛ olɔhi igwú ŋ́, amáŋ ācobīyíne kéē pīyabɔ̄.” (Umát. 9:13) Ikwū nɛ Ujisɔsi kwū lɛ alɔ a lɛ ɔfu nɛhi ō ya ka Ujehofa kóō je ɛjɛɛji íne obiya ku alɔ ya alɔ ɛhi.

18. Ɔdi gáā he uwɔ ɔtu ō kɛla lɛyikwu ɔ mla uwi nōo kwū mla Ujisɔsi a?

¹⁸ Leyi má iyi uwɔ ku a yɔ ipu Uparadais yɔ i kɛla mla uwi ɔɔma nɛ Ujisɔsi kɛla lɛ ɔ a. Aa ɛplɛɛpa gē yɔ i ka ɛgɛ nɛ ɛya nɛ Ujisɔsi gwo a jɛ aa eyī nɛhi lɛ a. A klla lɔfu yɔ i da ɔ ɔka kóō da uwɔ ɔdā amoomɛ nōo ya ipu awa kpii ku oyeeyi ku Ujisɔsi ipu ɛcɛ a, mla ɛgɛ nɛ ɔtu ya ɔ eko nɛ Ujisɔsi cɛ ō ya ɔdā nɛ ó ba ɔ ɛba ku nu a. Anu a kē lɔfu da uwɔ ɔka duu, ɛgɛ nɛ oyeeyi lɛ ō lā ɛpleeko amoomɛ ku ɛcɛ ku Usetan a. Ó géē wɛ ɔdā ojilima nɛhi ō klɔcɛ ku Ɛlā ku Ɔwɔico mla ācɛ bɛɛka adā ɔɔma a!—Āfi. 4:22-24.

19. Ɔdiya nɛ oyeeyi i gáā jɛ alɔ ɛ̄jɛ̄ gboogboo ipu Uparadais ŋ ma? (Má ifoto nōo yɔ iyɔbu ku Ɔda Ō Gbaajɛ a.)

¹⁹ Oyeeyi ipu Uparadais i gáā jɛ alɔ ɛ̄jɛ̄ gboogboo ŋ. Alɔ géē yɔ i má ɛnɛɛnɛ ācɛ ɛyɛɛyɛyi eko doodu klla géē lɛ ɛnɛɛnɛ uklɔ ō ya. Ofiyɛ duu a, ɛ̄cī doodu alɔ géē wa i je Adā alɔ nōo yɔ ɔkpanco a tōōtɔ̄ɔ̄ fiyɛ, klla géē yɔ i jɔɔnyɛ ɔdā nɛ ó ya tɔɔtɛ lɛ alɔ a. Alɔ géē yɔ i nwu ɔdā ɛpɛpɛ alɛwa lɛyikwu ɔ eko doodu, klla géē nwu ɔdā alɛwa lɛyikwu aɔdā nɛ ó ya a. Ɛgɛ nɛ alɔ gē lā oyeeyi likpo lɛ a, ɛgɔɔma nɛ ihɔtu nɛ alɔ lɛ lɛ Ɔwɔico a gáā bēē lɔfu tōōtɔ̄ɔ̄ a. Alɔ ta Ujehofa mla Ujisɔsi ahinya nɛhi ku eyiyoce néē je lɛ alɔ ō lā oyeeyi opiyoo ipu Uparadais a!