Eko nɛ Ujehofa je ɔ́da lɛ alɛɛcɛ kéē “ma ayí alɛwa [kéē] nyīla tū ipú ɛcɛ” a, ó mafu ku ɛjɛɛji ɛcɛ a gée jē piya uparadais. (Ohút. 1:28) Ācɛ nōo géē lā ipu ɛcɛ nyā piyoo a géē cɛgbá ō lɛyitaajɛ lɛ ɔ́da ɔɔma piii. Ɛcɛ a i gáā wɛ uparadais eko aflɛyi ŋ, ohigbu ku iga ku Idɛn i yɔ gɛ ŋ. Boobu nɛ ɛfú ku Amagɛdɔn mɛ, alɔ géē lɛ uklɔ alɛwa ō ya o ya ɛɛ ku alɔ lɛ aya ɛyɛɛyɛyi ku ɛcɛ nōo je biya a tu yeŋee. Ɔɔma géē cɛgbá uklɔ nɛhi!

Ɛnyā ta alɔ ɛlá kwu uklɔ nɛ ācɛ Isrɛlu a cɛgbá ō ya eko néē cigbihi ŋma Ubabilɔn a. Ɔcɛ duuma i lā ipu ajɛ ku uwa ŋ ipu ihayi ofu ɛta ce igwo. Amáŋ Ayisaya le ka taajɛ ka u mla otabɔ ku Ujehofa, ó géē tɔɔtɛ lɛ uwa ō ya ku ajɛ ku uwa kóō heyifuu kpɔ. Akacɛ a kahinii: “Ó ka anúɔ géē je ajɛ kú nū nōo lɛbɛ̄ɛka ígbíli ā, pīya ajɛ olɔhi o hɛ́ɛhɔ̄ bɛ̄ɛka ajɛ nɛ̄ anúɔ le hɛ́ɛ́hɔ̄ ipú ajɛ kú Ídɛn ā.” (Ayis. 51:3) Ujehofa ta ācɛ Isrɛlu abɔ kéē ya ku ajɛ ku uwa kóō le heyifuu kpɔ. Ɔwɛ ekponu ɔɔma, mla otabɔ ku Ujehofa, ó géē tɔɔtɛ  lɛ ācɛ nōo gáā lugwu ku ɛcɛ nyā ō je ɔ piya uparadais nōo heyifuu. Ó lɛ aɔdā ōhī nɛ a lɔfu ya babanya nōo géē mafu ku a dɔka ō lɛ abɔ ipu uklɔ ɔɔma.

Ɔwɛ éyi wɛ ō ya ɔdā duuma nɛ a ya gla ō lɛ ɔlɛ uwɔ tu yeŋee. A lɔfu ya ɔɔma ɔdaŋ ku aoladogbe ku uwɔ i wɛ ācɛ ō yeŋee ŋ naana. A klla lɔfu tabɔ ō tu Agbla ku Ajɔɔcɛ mla Agbla ku Ojileyi ku uwɔ yeŋee mla ō teyi tu uwa. Ɔdaŋ ku āhɔ̄ ku uwɔ jɛga gā uwɔ, a klla lɔfu lɛ abɔ ta ɔkpá ō fu iyi uwɔ tɛɛcɛ ō tabɔ eko nɛ ɔdā amiya le ya ɔwɛ ɛga nɛ a lā a. Ɔɔma mafu ku a géē dɔka ō je otabɔ lɛ ayinɛ uwɔ eko nɛ ɛgbá ɔɔma yɔ. Da iyi uwɔ ɔka kahinii: ‘Ó lɛ uklɔ duuma nɛ um lɔfu nwu ō bi le je otabɔ ɔdaŋ ka Ujehofa jɛga gā um ō lā oyeeyi opiyoo ipu ɛcɛ nyā?’

Boobu igbihi nɛ ó lɛ ɔyinɔnya ku Ujayirɔsi heyi ŋma ɔlekwu a, Ujisɔsi ka kéē lɛ ɔdole je lɛ ɔyi a kóō le lé. (Umák. 5:42, 43) Ó lɔfu wɛ uklɔ olɔnɔ ō teyi tu ɔyinɔnya ɔɔma nōo wɛ ihayi igwo ɛpa a ŋ. Amáŋ, gbɛla lɛyikwu ɛdɔ uklɔ nɛ alɔ géē cɛgbá ō ya eko nɛ Ujisɔsi lɛ okonu ō ce ku nu ya jila nōo kahinii: “Ācɛ dóódu nēe bá únóji ā géē pó ɔkɔ kú nū. É kē géē pɛ́ wɛ̄ɛcɛ ŋmá únóji kú uwā.” (Ujɔ́n. 5:28, 29) Naana nɛ Ubáyíbu i da alɔ ɔdā alɛwa lɛyikwu ɛgɛ nɛ oheyi ŋma ɔlekwu a géē lɛ a ŋ ma, alɔ lɔfu gbɛla ku ācɛ néē géē heyi ŋma ɔlekwu a géē cɛgbá otabɔ ō lɛ ɔdole, ɛga néē géē lā, mla ili néē géē le wiye a. Babanya, a kóō lɔfu mafu ku a le tutu ō je otabɔ eko ɔɔma. Ó lɛ aɔdā oligii ōhī nɛ a lɔfu ya.

Eko duuma néē lɛ ɛlā ō ka tɛɛcɛ ya ku ɔcɛ o leyikwu usɛkut géē wa i jila ujɔ ku aa má, a gē je iyi uwɔ tɛɛcɛ ō hi ɔ igwú kóō wa i lé ɔdole mla aa? Ɔdaŋ kē lɛ uklɔ ku ācɛ ō yuklɔ Ubɛtɛlu piyabɔ amāŋ eko nɛ uklɔ ku ɔcɛ ō leyikwu usɛkut ō jila aujɔ má mɛ, a tabɔ ō dɔka ɛga néē géē lā a lɛ uwa gla a? Ɔdaŋ kē géē ya ojileyi nɛhi amāŋ ojileyi ku oduudu éwo ɔwɛ ɛga nɛ a lā a, a lɔfu je iyi uwɔ tɛɛcɛ gbɔbu lɛ ojileyi a amāŋ igbihi nɛ ojileyi a le ŋmɛyi, amāŋ ō yɔ cɛɛ ku a ya ācɛ nōo géē wa omaaba?

Ohigbu ɔdā nɛ alɔ jé ipu ɔkpá ku Úklɔ́ kú Ācotɛ̄hɔ̄ 24:15 a, alɔ leyice kē géē je ubiliyɔn ku ācɛ nōo kwū a heyi ŋma ɔlekwu. Alɛwa ku uwa wɛ ācɛ nōó jé Ujehofa gbɔbu ɛɛ kéē kwū ŋ. Amáŋ, é géē lɛ ɛnɛɛnɛ ɛga ɔɔma igbihi néē lɛ uwa heyi ŋma ɔlekwu. a Ācɛ o gba Ujehofa ɛ̄gbā kpaakpa nōo klla jikoko géē tabɔ ō nwu uwa ɛlā. (Ayis. 11:9) Charlotte nōo tɔɔna ipu Europe, South America, mla Africa ɛ ma, yɔ i leyice eko ɔɔma. Ó ka mla eeye kahinii: “N yɔ i leyice eko nɛ um géē lɛ ɛga ō nwu ācɛ néē je heyi ŋma ɔlekwu lɛyikwu Ujehofa, mla ɛgɛ nɛ oyeeyi ku uwa géē lɔhi fiyɛ ɔdaŋ kē le miya ō gba ɔ ɛ̄gbā a.”

Ācɛ nōo gba Ujehofa ɛ̄gbā kpaakpa gbɔbu ɛɛ ku Ujisɔsi kóō wa ipu ɛcɛ nyā a géē lɛ ɔdā alɛwa ō nwu. Gbɛla lɛyikwu ɛgɛ nōo géē cɛ lɛ alɔ gweeye mla ɛgɛ nōó géē wɛ ɔdā ojilima, ō da Udaniyɛlu lɛyikwu ō ya jila ku aakacɛ nɛ ó ta taajɛ, amáŋ nɛ ó jɛyi nu ŋ ma. (Udán. 12:8) Amāŋ gbɛla lɛyikwu ō je otabɔ lɛ Urutu mɛmla Unaomi kéē nwu ku ipɔɔma ku uwa nɛ Umɛsayiya ŋma a. Alɔ géē jɔɔnyɛ ō nwu ācɛ ɛlā ipu oduudu ɛcɛ a, alɔ i kē gáā lɛ unwalu amāŋ aɔdā nōo gē je alɔ ɛlá bɛɛka ɛ̄nɛ̄ alɔ lɛ ipu ɛcɛ obɔbi ku icɛ nyā ŋ!

Ɔdi nɛ a lɔfu ya babanya o ya ɛɛ ku a le tutu ō tabɔ nwu ācɛ néē géē je heyi ŋma ɔlekwu ɛlā a? Ɔwɛ éyi wɛ ō ya ɔdā duuma nɛ a ya gla ku a wɛ ɔcɛ nōo jé ō nwu ɛlā mla ō tɔɔna lɔɔlɔhi ojigogo. (Umát. 24:14) Ɔdaŋ nōó kóō tɔɔtɛ gā uwɔ ō tɔɔna ɛgɛ nɛ a géē dɔka ō ya ohigbu ku a kwu hila ɛ amāŋ ohigbu aɔdā ɔhá naana, a lɔfu mafu ku a lɛ ɔtu caca ō nwu ācɛ néē géē je heyi ŋma ɔlekwu a ɛlā, ŋma lɛ ō ya ɛji ɔfu ku uwɔ ipu uklɔ ku ɔna ō ta babanya.

Ó lɔhi cɛɛ ku a gbɛla lɛyikwu aɔka ocɛgbá nyā: A yɔ i leyice eko nɛ a géē lugwu ku ɛcɛ nyā ɔkwɔɔkwɛyi? A yɔ i leyice eko nɛ a géē má ayi cɛɛ ku a nyila tu ipu ɛcɛ a, amāŋ ō je otabɔ lɛ ācɛ néē géē heyi ŋma ɔlekwu mla ō nwu uwa ɛlā lɛyikwu Ujehofa? A lɔfu mafu ku a le tutu ō lā ipu ɛcɛ nyā piyoo, ŋma lɛ ō yuklɔ nōo wɛ ekponu bɛɛka uklɔ nɛ a géē ya eko nɛ a géē lugwu ku ɛcɛ a!