1. Ɛgɛnyá nōo gbɛla lipu lipu tu okonu ō ce ku Ujehofa ō je oyeeyi opiyoo lɛ alɔ gē lɛ abɔ kwu alɔ iyē a?

 UJEHOFA cokonu ku ācɛ nōo lɛyitaajɛ lɛ ɔ a géē lɛ “oyēeyī nōó ī mɛ ŋ́” ma. (Uróm 6:23) Ɔdaŋ ku alɔ gbɛla lipu lipu tu ɔdā nɛ Ujehofa yɔ i jɛga ku nu lɛ alɔ a, ihɔtu nɛ alɔ lɛ lɛ ɔ a géē je lɔfu fiyɛ. Gbɛla tu ɛlā nyā ɛ: Adā alɔ nōo yɔ ɔkpanco a yihɔtu alɔ nɛɛnɛhi nɛ ɔdā duuma i gáā kɔ alɔ ŋma ɛgiyi nu gla ŋ.

2. Ɛgɛnyá nɛ okonu ō ce ku oyeeyi opiyoo a gē ta alɔ abɔ a?

² Okonu ō ce ku Ɔwɔico ō lā oyeeyi opiyoo a gē ta alɔ abɔ ō lɔtu unwalu ɛyɛɛyɛyi nɛ alɔ lɛ babanya a. Eko nɛ aolɛla ku alɔ gē ta alɔ ufi ka é géē je alɔ ŋmo naana, alɔ i gáā ma ō gba Ujehofa ɛ̄gbā ŋ. Ɔdiya a? Ɔdā éyi nōo ya wɛ ohigbu ku alɔ jé ku ɔdaŋ ku alɔ gekwu ipu ɛ̄gbā ō gba ku alɔ lɛ Ujehofa kpaakpa, ó géē je alɔ heyi ŋma ɔlekwu mla eyiyoce ku alɔ i gáā kwū gboogboo gɛ ŋ. (Ujɔ́n. 5:28, 29; 1 Ukɔ́r. 15:55-58; Uhíb. 2:15) Ɔdiya nɛ alɔ lɔfu lɔtuce kpɔcii ka ó géē tɔɔtɛ lɛ alɔ ō lā oyeeyi opiyoo a? Leyi yɛ aɔdā ōhī nōo ya a.

3. Ɔdiya nɛ alɔ jé kpɔcii ka ó tɔɔtɛ lɛ Ujehofa ō ya ku alɔ yeeyi piyoo a? (Aíjē Kú Ɛ̄gbā 102:12, 24, 27)

³ Alɔ jé ka ó tɔɔtɛ lɛ Ujehofa ō ya ku alɔ lā oyeeyi opiyoo ohigbu ka ɛgiyi nu nɛ oyeeyi ŋma a, ó klla géē yeeyi piyoo. (Aíjē 36:9) Leyi bi aɛga ku Ubáyíbu nyā nōo mafu ka Ujehofa humayi yeeyi ɛ, ka ó klla géē yeeyi piyoo a. Aíjē Kú Ɛ̄gbā 90:2 ka ka Ujehofa ‘wɛ Ɔwɔicō nɛ̄ ó géē yeeyi piyoo.’ Aíjē Kú Ɛ̄gbā 102 ka ɔdā ekponu ɔɔma duu. (Jé Aíjē Kú Ɛ̄gbā 36:9.) Uhabakuku  ɔcomɛɛbɛ a ta ɔkpá lɛyikwu Ujehofa Adā alɔ nōo yɔ ɔkpanco a kahinii: “Óndú ā, o ŋmá ohútu ā, awɔ wɛ Ɔwɔicō á. Awɔ wɛ Ɔwɔicō ō tīihɔ kú um, nōo yɔ̄ piyóó á.”—Uháb. 1:12.

4. Alɔ cika ō junwalu lɛ iyi alɔ ɔdaŋ ka ó tɔɔtɛ lɛ alɔ ō cɛ ka Ujehofa humayi yeeyi ŋ? Lɛ ɔ teyi peee.

⁴ Ó gē lɔnɔ tu uwɔ ō miyɛ cɛ ka Ujehofa wɛ “Ɔwɔicō nōo yɔ̄ piyóó”? (Ayis. 40:28) Ó gē tɔɔtɛ lɛ ɛyinɛhi ku ācɛ kéē miyɛ ɛlā nyā cɛ ŋ duu. Ɛlayihu ka lɛyikwu Ɔwɔico kahinii: “Alɔ í kē jé ɛ́gɛ́nɛ̄ ó lé ɛcɛ lɛ ā glá ŋ́.” (Ujób. 36:26) Amáŋ ohigbu ku alɔ i jɛyi ku odee ŋ, i wɛ ku ɔdā ɔɔma i wɛ ɔkwɛyi ŋ nɛ nóó. Ocabɔ mafu, naana nɛ alɔ i jé ɛgɛ nɛ ɔla gē yuklɔ lɔɔlɔhi lɛ a ŋ ma, ɔɔma wɛ ku ɔla i yɔ ŋ nɛɛ? Ehee ó lɛ a ŋ! Ɔwɛ ekponu ɔɔma, ó gáā tɔɔtɛ lɛ alɔ nōo wɛ alɛɛcɛ ō jɛyi ku ɔdā nōó wɛ ka Ujehofa humayi yeeyi, ka ó klla géē yeeyi piyoo a ŋ. Amáŋ ɛnyā i wɛ ka Ɔwɔico i humayi yeeyi ŋ nɛ ŋ. Naana nɛ alɔ i jé ɛjɛɛji ɔdā doodu lɛyikwu Ɔcɛ nōo ya alɔ a ŋ ma i wɛ ka ó nyɛ ɔwɛ duuma ŋ. (Uróm 11:33-36) Ó yeeyi gbɔbu ɛɛ nɛ ó ya ɛjɛɛji ɔdā doodu nōo yɔ ɔkpanco mɛmla ɛcɛ nyā a, kwu ɔlɛɛnɔ mɛmla anyilɔwɔ. Ujehofa cɛ lɛ alɔ jé kpɔcii ka anu “bī ɔfú mɛ́mla íjéeyī kú nū yá ɛcɛ” a. Ó klla humayi yeeyi gbɔbu ɛɛ nɛ ó “nā ɔkpáncō daa á.” (Ujɛr. 51:15; Ācot. 17:24) Ɔdi wɛ ɔdā ɔhá nōo ya ɛɛ nɛ alɔ jé kpɔcii ka ó tɔɔtɛ lɛ Ujehofa ō ya ku alɔ yeeyi piyoo a?

5. Eyiyoce nyá nɛ ɔba mla ɔnyā aflɛyi a lɛ a?

⁵ Ɛjɛɛji aɔdā oyeeyi nɛ Ujehofa ya ipu ɛcɛ nyā a lɔfu kwū gla, ayika alɛɛcɛ foofunu nɛ. Ó ya alɛɛcɛ mla ɛnɛɛnɛ ɛga ō yeeyi piyoo. Amáŋ Ujehofa pi Adam ahɔ̄ kahinii: “Á gáā lé īkpō kú ɔcí nōo ī yá kú ɔ̄cɛ kóō jé ɔdā olɔhi mɛ́mla ɔdōbɔ̄bí ā ŋ́. Ohígbū ka ɛ̄cī nɛ̄ a i lé, a géē kwú.” (Ohút. 2:17) Ɔdaŋ ka Adam mla Iifu gē yɛ i lɛyitaajɛ lɛ Ujehofa nɛ, é gē yɛ i kwū ŋ. Ó géē wɛ ɔdā okpaakpa ō gbɛla ka Ujehofa lɔfu jɛga lɛ uwa ō lé “īkpō kú ɔcí nōo gē je oyēeyī opiyóó ā.” Ɔdaŋ néē kóō lɛ ikpo ku ɔcí a lé naana, é géē jé kpɔcii ku aa géē lɛ “oyēeyī opiyóó” ohigbu ka Ujehofa jɛga ɔɔma lɛ uwa a. b—Ohút. 3:22.

6-7. (a) Ɔdā ɔhá nyá mafu ka Ujehofa i ya alɛɛcɛ kéē kwū ŋ ma? (b) Ɔdi he uwɔ ɔtu nɛ a géē dɔka ō ya eko nɛ a lɛ oyeeyi opiyoo lɛ a? (Má aifoto a.)

⁶ Ācɛ usayɛnsi ōhī gáā le má ɛ, ku ɔkɔtɔ ku alɔ lɔfu bi aɛlā alɛwa fiyɛ eko nɛ alɔ kóō lɔfu yeeyi gáā kwu a. Ɔɔma wɛ ɔdā ohidaago ibi. Ipu ihayi ku 2010, ó lɛ ikpɛyi ɛlā éyi nōo bɛɛcɛ ipu ɔkpá néē hi ka u Scientific American  Mind nōo kahinii: Ɔkɔtɔ ku alɔ lɔfu bi aɛlā ɛyɛɛyɛyi nōo ya ipu awa umiliyɔn ɛta, amāŋ ōmiya néē lɔfu ya ipu TV nōo fiyɛ ihayi ofu igwo ɛhɔ a. Ó kē lɔfu wɛ ka ɔkɔtɔ ku alɔ lɔfu bi aɛlā nōo fiyɛ ɔɔma. Ɛnyā mafu ka Ujehofa ya ɔkɔtɔ ku alɔ kóō bi ɛlā nōo fiyɛ ɔdā nɛ alɔ lɔfu nwu ipu ihayi ofu ɛta ce igwo, amāŋ ihayi ofu ɛnɛ nɛ alɔ lɔfu yeeyi a.—Aíjē 90:10.

⁷ Ujehofa ya alɔ mla unwu nɛhi ō yeeyi piyoo. Ubáyíbu ka Ɔwɔico “kwú ɛlá kú ɔdā ō yɔ̄ piyóó í tá ipú ɔtū kú alɛɛcɛ.” (Ɔ̄cok. 3:11) Ɔɔma wɛ ɔdā éyi nōo ya ɛɛ nɛ alɔ gē leyi má ikwū ku olɛla ku alɔ a. (1 Ukɔ́r. 15:26) Ɔdaŋ ku alɔ gbɔɔ ō doōcē bɔbi bɔbi, alɔ i gē ya ɔdā duuma ŋ gē gbeyi ku alɔ gekwu nɛɛ? Ehee. Igbalɛwa, alɔ gē gā ɛgiyi idɔkitɔ klla gē gwa ɛcí o ya ɛɛ ka ōcē a kóō mɛ. Ku ɛlā ɔkwɛyi a ba, alɔ gē ya ɛjɛɛji ɔdā nɛ alɔ ya gla a o ya ɛɛ ku alɔ kwū ŋ. Eko duuma nɛ ɔcɛ nɛ alɔ kē yihɔtu nu nɛhi gekwu, ɔdaŋ ku ɔcɛ ɔɔma kóō wɛ ɛdrɔ amāŋ kwu hila ɛ, ó gē kwu alɔ iyē nɛhi, ó lɛ a ŋ nɛɛ? (Ujɔ́n. 11:32, 33) Alɔ lɔfu gɔbu yɔ i nwu ɛlā klla lɛ unwu nɛhi ō yeeyi piyoo ohigbu ku ɛgɔɔma nɛ Ujehofa ya alɔ lɛ a. Ó lɛ aafu ŋ, ó géē ya ku alɔ yeeyi piyoo. Amáŋ ó lɛ ɔdā alɛwa nōo ya nɛ alɔ lɔfu kpɔtuce ka ó géē tɔɔtɛ ku alɔ yeeyi piyoo gla. Babanya, alɔ géē kɛla lɛyikwu ɔdā nɛ Ujehofa ya ŋma igbihi mla ɔdā nɛ ó yɔ i ya babanya, nōo mafu ka ó piya ɔdā nɛ ó bi ɔtu a abɔ ɛ ŋ ma.

8. Ɔdi nɛ ɔkpá ku Ayisáya 55:11 nwu alɔ lɛyikwu ɔdā nɛ Ujehofa bi ɔtu ō ya lɛ ācɛ nōo hayi kpaakpa lɛ ɔ a?

⁸ Naana nɛ Adam mla Iifu lɛ íne biya nōo ya ku ayi uwa kóō gbɔɔ ō kwū a, Ujehofa i piya ɔtu ku nu abɔ ŋ kpɔ. (Jé Ayisáya 55:11.) Ɔdā nɛ ó bi ɔtu a wɛ ku ācɛ nōo hayi kpaakpa lɛ ɔ  a kéē lā oyeeyi opiyoo. Alɔ jé ɛnyā oŋma lɛ ɛlā nɛ Ujehofa ka mla ɔdā nɛ ó ya, o ya ɛɛ kóō lɛ ɔdā nɛ ó bi ɔtu a ya a.

9. Ɔdi nɛ Ɔwɔico cokonu ku nu a? (Udánīyɛ̄lu 12:2, 13)

⁹ Ujehofa cokonu ka anuɔ géē je ācɛ nōo kwū a heyi ŋma ɔlekwu, klla géē je ɛnɛɛnɛ ɛga lɛ uwa ō lā oyeeyi opiyoo. (Ācot. 24:15; Utáy. 1:1, 2) Ujobu nōo wɛ ɔcɛ ō hayi kpaakpa a ka ka ó yɔ i ŋmo Ujehofa unwu ō je ācɛ nōo kwū a heyi ŋma ɔlekwu. (Ujób. 14:14, 15) Udaniyɛlu nōo wɛ ɔcomɛɛbɛ a jé ka Ujehofa géē jé ācɛ nōo kwū a heyi ŋma ɔlekwu, cɛɛ kéē lɛ ɛnɛɛnɛ ɛga ō lā oyeeyi opiyoo. (Aíjē 37:29; jé Udánīyɛ̄lu 12:2, 13.) Ācɛ Ujiyu ɛpleeko ku Ujisɔsi a jé ka Ujehofa géē je “oyēeyī nōó ī mɛ ŋ́” ma lɛ ācɛ nōo hayi kpaakpa lɛ ɔ a. (Ulúk. 10:25; 18:18) Ujisɔsi kɛla lɛyikwu okonu ō ce nyā igbalɛwa, Adā nu kē lɛ ɔ heyi ŋma ɔlekwu duu.—Umát. 19:29; 22:31, 32; Ulúk. 18:30; Ujɔ́n. 11:25.

10. Ɔdi nɛ oheyi ŋma ɔlekwu nōo ya ikee a mafu a? (Má ifoto a.)

¹⁰ Ujehofa wɛ ɔcɛ nōo gē je oyeeyi a, ó kē lɛ ɔfu ō je ācɛ heyi ŋma ɔlekwu. Ó je ɔfu lɛ Ɛlayija nōo wɛ ɔcommɛɛbɛ a kóō lɛ ɔyinɔnyilɔ ku ɔnyokwu ku Usarefati a heyi ŋma ɔlekwu. (1 Aɔ́cɛ́ 17:21-23) Igbihaajɛ mla otabɔ ku Ɔwɔico, Ɛlayissa nōo wɛ ɔcomɛɛbɛ a lɛ ɔyinɔnyilɔ ku ɔnyā ku Ussunɛm a heyi ŋma ɔlekwu. (2 Aɔ́cɛ́ 4:18-20, 34-37) Aocabɔ nyā mla ɔhá lɛyikwu oheyi ŋma ɔlekwu a mafu ka Ujehofa lɛ ɔfu ō je ācɛ nōo kwū a heyi ŋma ɔlekwu. Ɛpleeko nɛ ó yɔ ipu ɛcɛ a, Ujisɔsi mafu ka Adā nu je ɔfu ɔɔma lɛ ɔ ō je ācɛ heyi ŋma ɔlekwu. (Ujɔ́n. 11:23-25, 43, 44) Babanya Ujisɔsi yɔ ɔkpanco, é kē kwu ɛjɛɛji “ɔfú dóódu nōo yɔ̄ ɔkpáncō mɛ́mla ɛcɛ” a u lɛ ɔ ɛ. Ohigbu ɛnyā, ó lɔfu ya okonu ō ce nyā jila nōo ka ka “ācɛ dóódu nēe bá únóji ā,” géē heyi ŋma ɔlekwu mla ɛnɛɛnɛ ɛga ō yeeyi piyoo.—Umát. 28:18; Ujɔ́n. 5:25-29.

11. Ɛgɛnyá nɛ ikwū nɛ Ujisɔsi kwū a ya kóō tɔɔtɛ lɛ alɔ ō lā oyeeyi opiyoo a?

¹¹ Ɔdiya nɛ Ujehofa jɛga ku ɔyinɔnyilɔ ku nu nōo he ɔ ɔtu nɛhi a kóō kwū ikwū ɔnɔ nɛhi a? Ujisɔsi cila ohi ku ɔka ɔɔma eko nɛ ó kahinii: “Ɔwɔicō yíihɔtū tū ɛcɛ ā fíyábɔ̄, anɔ́ɔ ó je Ɔyínɔ̄nyīlɔ ékpónú kú nū ā, ka ɔ̄cɛ dúúmā nōo lɔtūce ɔ́ í gáā yíífi ŋ́, amáŋ ó géē lɛ oyēeyī opiyóó.” (Ujɔ́n. 3:16) Oŋma lɛ ō je ɔyinɔnyilɔ ku nu gwɛɛya ohigbu íne obiya ku alɔ, Ɔwɔico ya kóō tɔɔtɛ lɛ alɔ ō lɛ oyeeyi opiyoo. (Umát. 20:28) Ɔyikpo Upɔlu lɛ aya ocɛgbá ku ɔdā nɛ Ɔwɔico bi ɔtu ō ya a teyi peee eko nɛ ó ta ɔkpá kahinii: “Ohígbū ka ɛ́gɛ́nɛ̄ ācɛ gbɔɔ́ ō kwú oŋmá lɛ ɔdā nɛ̄ ɔ̄cɛ éyi yá ā, ɔwɛ ékpó ɔ́ɔmā, é í je ācɛ héyī ŋmá ɔlékwū ohígbū ɔdā nɛ̄ ɔ̄cɛ éyi yá ā. Ohígbū ka ɛ́gɛ́nɛ̄ odúúdú ācɛ í kwú ohígbū kéē ŋmá iyē Ádām ā. Ɔwɛ ékpó ɔ́ɔmā, é í héyī ŋmá ɔlékwū ohígbū ɛma kú uwā mla Ohɔ́nyɛtá ā.”—1 Ukɔ́r. 15:21, 22.

12. Ɛgɛnyá nɛ Ajɔɔcɛ a gáā tabɔ ya ɔdā nɛ Ujehofa bi ɔtu ō ya lɛ alɔ a?

¹² Ujisɔsi nwu ayikpo ku nu kéē gbɔɔkɔ ku Ajɔɔcɛ ku Ɔwɔico kóō gā, ka ococɛ ku nu kóō le ya jila ipu ɛcɛ nyā. (Umát. 6:9, 10) Ipu aɔdā nɛ Ɔwɔico bi ɔtu ō ya a, wɛ ku alɛɛcɛ kéē lā oyeeyi opiyoo ipu ɛcɛ nyā. O ya ɛɛ kóō lɛ ɔɔma ya jila a, Ujehofa kwu Ɔyinɔnyilɔ ku nu u piya Ɔcɛ́ ku Ajɔɔcɛ ku nu a. Ɔwɔico humayi ta ācɛ ula ofigwaahata (144,000) ba ŋma ipu ɛcɛ nyā, kéē yuklɔ tɔha mla Ujisɔsi kéē lɛ ococɛ ku Ɔwɔico ya jila.—Mafú 5:9, 10.

13. Ɔdi nɛ Ujehofa yɔ i ya babanya a, ɔdi nɛ a kē cika ō ya piii a?

¹³ Babanya, Ujehofa yɔ i ta “ɛwa nɛ̄hi” ku ācɛ ba. Ó yɔ i nwu uwa ɛgɛ néē géē lā ɛhaajɛ ku Ɔcɛ́ ō lé ipu Ajɔɔcɛ ku nu a. (Mafú 7:9, 10;  Ujɛ́m. 2:8) Naana nɛ ācɛ alɛwa ipu ɛcɛ icɛ le kɔ ígwu ígwu ohigbu iwɔtu mla ɛfú ō kpo a, ācɛ nōo wɛ ipu “ɛwa nɛ̄hi” a gē ceyitikwu lɔfu lɔfu kéē lɛ ɛdɔ ku iwɔtu doodu fu ŋma ɔtahɛ iyi uwa. É gē mafu ipu uce ō ya ku uwa kē yɔ i je ɔkpacaŋgeli ku uwa na ɛnū. (Umáy. 4:3) Ikɔkɔ néē géē lɛ abɔ ipu ɛfú ō kpo nōo gē ya ku ācɛ alɛwa kéē kwū a, é yɔ i ta ācɛ abɔ kéē lɛ “oyēeyi ɔkwɛ̄yi” ŋma lɛ ō nwu uwa ɛlā lɛyikwu Ɔwɔico ɔkwɛyi, mla aɔdā nɛ ó bi ɔtu ō ya a. (1 Utím. 6:19) Ācɛ apɔlɛ ku uwa lɔfu ya uwa ŋmo amāŋ ya uwa ɔnɔ ije ohigbu kē gē cɛtra Ajɔɔcɛ ku Ɔwɔico, amáŋ Ujehofa géē ya kéē lɛ aɔdā nōo ce uwa ɛgbá a. (Umát. 6:25, 30-33, 30-33; Ulúk. 18:29, 30) Aɛlā ɔkwɛyi nyā cɛ lɛ alɔ jé kpɔcii ka Ajɔɔcɛ ku Ɔwɔico géē wa piii, ka ó klla géē gɔbu ya ɔdā nɛ Ujehofa bi ɔtu ō ya a.

14-15. Ɛgɛnyá nɛ okonu ō ce ku Ujehofa ō je ikwū yiifi piyoo a gáā ya jila a?

¹⁴ Babanya, Ujisɔsi wɛ Ɔcɛ́ ku Ajɔɔcɛ ku Ɔwɔico ɔkpanco a, ó kē géē ya ɛjɛɛji aɔdā nɛ Ujehofa cokonu ku nu a jila. (2 Ukɔ́r. 1:20) Ŋmiifi ihayi ku 1914, Ujisɔsi humayi ya aolɛla ku nu lé ɛ. (Aíjē 110:1, 2) Ó gboji gɛ ŋ, Ujisɔsi mla ācɛ nōo gáā lé ɔcɛ́ mla ɔ a géē je ɛjɛɛji acobɔbiipu nōo yɔ ipu ɛcɛ nyā a cataajɛ.—Mafú 6:2.

¹⁵ Ɛpla Ihayi Ula Ɛpa Ce Ofu Igwo Nɛ Ujisɔsi Gáā Lé Ɔcɛ́ a, ó géē je ācɛ nōo kwū a heyi  ŋma ɔlekwu, klla géē je otabɔ lɛ ācɛ nōo lɛyitaajɛ lɛ Ujehofa a kéē kwu jila iyē mɛɛlɛ. Igbihi ojama amoomɛ a, ācɛ nɛ Ujisɔsi hɛpɔhi lɛ uwa ka é wɛ ācɛ okpaakpa a “géē lé úgwū kú ajɛ ā, klla í lā ipú ajɛ ā piyóó.” (Aíjē 37:10, 11, 29) Ó kē géē wɛ ɔdā eeye nɛhi ka “olɛlā ámōōmɛ, nɛ̄ Ɔwɔicō í yálé ā géē wɛ ikwū.”—1 Ukɔ́r. 15:26.

16. Ɔdi cika ō wɛ ɔdā okpɔcii nōo ya nɛ alɔ gē gba Ujehofa ɛ̄gbā a?

¹⁶ Ɛgɛ nɛ alɔ má ɛ ma, eyiyoce ku alɔ ō lā oyeeyi opiyoo a gbolo ce Ɛlā ku Ɔwɔico. Eyiyoce ɔɔma lɔfu ta alɔ abɔ ō hayi kpaakpa lɛ Ujehofa ɛpleeko olɔnɔ amoomɛ nyā. Amáŋ o ya ɛɛ ku alɔ ya ɔdā nōo géē he Ujehofa ɔtu a, alɔ cika ō lɛ ɔtu ku alɔ ya ekponu ō gba Ujehofa ɛ̄gbā, ó wɛ ohigbu ku alɔ géē lā oyeeyi opiyoo foofunu ŋ. Ɔdā okpɔcii nōo ya ɛɛ nɛ alɔ hayi kpaakpa lɛ Ujehofa mla Ujisɔsi a, wɛ ohigbu ku alɔ yihɔtu uwa nɛhi. (2 Ukɔ́r. 5:14, 15) Ihɔtu ɔɔma gē lɛ abɔ kwu alɔ ɔtu ō ya ɛgbla ku uwa, mla ō da ācɛ ɔhá lɛyikwu eyiyoce nɛ alɔ lɛ a. (Uróm 10:13-15) Ɔdaŋ ku alɔ nwu ō gbɛla iyi alɔ foofunu ŋ klla wɛ ācɛ ō nwula abɔ, Ujehofa géē dɔka ō je piya ɔya ku alɔ piyoo.—Uhíb. 13:16.

17. Ɔdi wɛ uklɔ nɛ ɔnyɔɔnyɛ ku alɔ lɛ a? (Umátiyu 7:13, 14)

¹⁷ Alɔ géē wɛ ipu ācɛ nōo géē lɛ oyeeyi opiyoo a? Ujehofa lɛ ɛnɛɛnɛ ɛga ɔɔma je lɛ alɔ ɛ. Babanya, alɔ cɛgbá ō miya ō yɔ ɔwɛ nōo géē bi alɔ gā oyeeyi a. (Jé Umátiyu 7:13, 14.) Ɛgɛnyá nɛ oyeeyi gáā lɛ ɔdaŋ ku alɔ gbɔɔ ō lā oyeeyi opiyoo a? Alɔ géē cila ɔka ɔɔma ipu ikpɛyi ɛlā nōo gboce ɛnyā a.