Ɛ̄cī éyi, ɔyinɛ alɔ nɔnya éyi nōo lā ipu New Zealand a lɛ uvidio nyā nōo kahinii: “Have . . . Concern for One Another” a má ipu jw.org, nōo ka ka ó wɛ ipu ɔtu foofunu nɛ Ujehofa gē mafu ka ó lɛ eyinyinyi lɛ ācɛ a ŋ, amáŋ ó gē ma ɔ fu. (Ayis. 63:​7-9) Ó le miya ō bi ɛlā nɛ ó nwu a le yuklɔ ŋma lɛ ō dɔka ɔwɛ ɛyɛɛyɛyi nɛ ó lɔfu je otabɔ lɛ ācɛ ɔhá. Igbihaajɛ ku ɛ̄cī ɔɔma eko nɛ ó yɔ i lá aɔdole a, ó gáā lɛ ɔnyā éyi nōó lɛ ɛga ō lā ŋ má, anu ó le miya ō lɛ ɔdole lá lɛ ɔ a. Ɔnyā a cɛ. Eko nɛ ɔyinɛ alɔ nɔnya a lɛ ɔdole a lá gē lɛ ɔ a, ó bi ɛnɛɛnɛ ɛga ɔɔma le kɛla lɛ ɔnyā a lɛyikwu Ujehofa, klla lɛ utract nōo kahinii: Owe Géē Mɛ Gla A? je lɛ ɔ.

Ɔnyā a gbɔɔ ō jikwu. Ó ka ka ɛ́nɛ́ mla adā anuɔ wɛ Ācɛ Ocijali Ku Ujehofa klla nwu ɔ ɛlā ɔkwɛyi a, amáŋ ó gboji nɛ anuɔ habɔ ɔkwɛyi a ta ɛ. Amáŋ ó gboji nɛ ó gbɔɔkɔ lɛ Ujehofa cɛɛ kóō miyɛ otabɔ ó le cigbihi gā ɛgiyi nu ɛ ŋ. Ɔyinɛ alɔ nɔnya a lɛ Ubáyíbu éyi je lɛ ɔ, ó kē cɛ ō gbɔɔ oklɔcɛ ku Ubáyíbu. a

Bɛɛka Ujehofa a, alɔ lɔfu mafu eyinyinyi lɛ ācɛ ɔhá duu, kwu aɔmaapu alɔ mla ayinɛ alɔ nōo yɔ ipu ujɔ a. Alɔ kē lɔfu mafu enyinyinyi, ŋma lɛ ō dɔka ɛnɛɛnɛ ɛga nɛ alɔ lɔfu nwu ācɛ ɔhá ɛlā lɛyikwu Ujehofa.