A lɛ Ɔdā Ō Gbaajɛ ku ihayi nyā jé lɔɔlɔhi ɛ? Ó lɛ a, má ɔ ɔdaŋ ku a géē lɔfu cila ohi ku aɔka nyā gla:

Ɔdi wɛ ɛyi ō “lɛ ɔwɛ nɛ̄ a gē gbɛlá ā pīyabɔ̄” a? (Uróm 12:2)

Ɛnyā i wɛ ku alɔ cika ō yɔ i ya aɔdā olɔhi ligii foofunu ŋ. Ikɔkɔ ɔɔma, alɔ cɛgbá ō yɔ i jila ɛdɔ ɔcɛ nɛ alɔ wɛ ipu ɔtu ku alɔ a má, klla lɛ opiyabɔ duuma nɛ alɔ cɛgbá ō ya a ya, o ya ɛɛ ku alɔ lɔfu lā oyeeyi ku alɔ ɔwɛ nɛ Ujehofa dɔka a.—w23.01, pp. 8-9.

Ɛgɛnyá nɛ alɔ gáā mafu ku alɔ leyi kwɛɛcɛ lɔɔlɔhi eko nɛ alɔ yɔ i má aɔdā ɛyɛɛyɛyi nōo yɔ i ya ipu ɛcɛ nyā a?

Ó lɛ aɔdā olɔhi nōo ya nōó gē he alɔ ɔtu ō má ɛgɛ nɛ aɔdā nōo yɔ i ya ipu ɛcɛ icɛ a, yɔ i ya akacɛ ku Ubáyíbu jila a. Ikɔkɔ nɛ alɔ gē gbɔɔ ō hɛce lɛyikwu ɔdā nōo géē ya, nōo lɔfu lɛ abɔ kwu opiyatɔha nōo yɔ ipu ujɔ a, alɔ cika ō jila ɛlā má ku alɔ jé ɔdā nɛ ɔwa ku Ujehofa ka lɛyikwu ɛlā ɔɔma nōó gboji ɛ ŋ ma. (1 Ukɔ́r. 1:10)—w23.02, p. 16.

Ɛgɛnyá nɛ ubatisim ku Ujisɔsi mla ubatisim ku ācɛ nōo gē yɛce ɔ a wɛ ɛyɛɛyi a?

Ó cɛgbá ō je iyi nu gwɛɛya lɛ Ujehofa gɛ ŋ, ohigbu ka é ma ɔ gā ipu éwo nōo le gwɛɛya lɛ Ɔwɔico gbɔbu ɛ. Ujisɔsi wɛ ɔcɛ nōo jila iyē nōó lɛ ɛnyá duuma ŋ. Ó cɛgbá ō ya opiyabɔ ŋma íne ō biya duuma ŋ.—w23.03, p. 5.

Ɛgɛnyá nɛ alɔ lɔfu ta ācɛ ɔhá abɔ kéē ta ohi ipu ōjila ku ujɔ a?

Alɔ lɔfu ya ku ohi ku alɔ kóō le kpii, ku eko kóō yɔ lɛ ācɛ alɛwa ō ta ohi. Alɔ ka ó hii kɛla lɛyikwu ɔcɛla alɛwa duu ŋ. Ɔdaŋ ku alɔ ya lɛ a, ɛga géē yɔ lɛ ācɛ ɔhá ō ta ohi.—w23.04, p. 23.

Ɔdi wɛ ‘Ɔwɛ Otiihɔ’ nɛ ɔkpá ku Ayisáya 35:8 kɛla lɛyikwu ɔ a?

Ujehofa lɛ ɔwɛ nɛ ācɛ Isrɛlu yɛ anu ŋma ajɛ ku Ubabilɔn a gbla ‘Ɔwɛ Otiihɔ’ a. Ujehofa tu ɛdɔ ɔwɛ ɛgɔɔma tu lɛ ācɛ ɔlɛ nu ɛpleeko ku alɔ nyā a? Ŋmiifi ihayi ku 1919 a, Ujehofa gbɔɔ ō bi acɛnyilɔ nōo gē lɛ ojilima ce ɔ nɛhi a le ya kóō tɔɔtɛ lɛ ācɛ ɔhá kéē nyɛɛ ŋma Ubabilɔn Nɛhi a. É cɔwɔ klla ya Ubáyíbu wɛɛcɛ fiyɛ ɔkpá duuma ɔhá. Ācɛ ɔlɛ Ɔwɔico humayi yɛ ipu ‘Ɔwɛ Otiihɔ’ a ɛ, nōo ya kóō tɔɔtɛ lɛ uwa ō gɔbu yɔ i gba Ujehofa ɛ̄gbā babanya mla eyiyoce ku ɛcɔbu, eko nɛ Ajɔɔcɛ a géē ya ku alɔ gbɔɔ ō jɔɔnyɛ ɛnɛɛnɛ ɔhā ipu ɛcɛ nyā a.—w23.05, pp. 15-19.

Ukɔ́ nyá nɛ ɔkpá ku Aíita ɛyi 9 tu alɔ lɛyikwu acɛnya ɛpa nōó kɛla lɛyikwu ɔ a?

Ɔkpá ku Aíita kɛla lɛyikwu acɛnya ɛpa nɛ éyi ku uwa ‘kwɛyi olila,’ nɛ ɔcɛ duu nōo cigwu ku nu a “í jé ka ikwū ō ŋmó ɔ̄cɛ, ɔ́ɔ yɔ̄ ɔlɛ́ nū ŋ́.” Ɔnyā ɔhá a kē kwɛyi ‘ijeeyi ɔkwɛyi,’ nōo cigwu ku nu gē bi ɔcɛ gā “ɔwɛ kú ɔdōōjé” mla oyeeyi opiyoo a. (Aíit. 9:​1, 6, 13, 18)—w23.06, pp. 22-24.

Ɛgɛnyá nɛ Ɔwɔico mafu ka ó wɛ ɔcɛ o tu iyi nu waajɛ klla wɛ ɔcɛ nōó gē pi ojigogo ka aku anuɔ le kpaakpa piii ŋ ɔwɛ nɛ ó ya ɛlā mla Ulɔtu a?

Ujehofa le da Ulɔtu kóō le kwu ŋma Usɔdɔm gā ɛyi ɛfu. Eko nɛ ó lɛ ɛba ba ɔ kóō jɛga lɛ anu mla ācɛ apɔlɛ ku nu kéē nyɔ gā Usowa a, Ujehofa lɛ ɛga ɔɔma je lɛ ɔ.—w23.07, p. 21.

Ɔdi nɛ ɔnyā lɔfu ya ɔdaŋ ka ɔba nu gē má ifoto ku ācɛ o tɔhɛwa a?

Ó cika ō bēē ŋmo iyi nu ɛpɔbi ŋ. Ikɔkɔ ɔɔma, ó cika ō ceyitikwu lɛ ɔtu ku nu kwu ɛma nɛ ó lɛ mla Ujehofa a. Ó klla cika ō gbɛla lipu lipu tu aɔ̄kā ku Ubáyíbu ku acɛnya nɛ ɔtu biya lɛ uwa nɛhi, nōo lɛ ɔtu ō tu kwu ɔtu ŋma lɛ ō gbolo ce otabɔ ku Ujehofa a. Ó klla lɔfu ta ɔba nu abɔ kóō lɛ abɔ ci āhɔ̄ ɛyɛɛyɛyi nōo lɔfu jé ɔ ma.—w23.08, pp. 14-17.

Eko duuma néē gē da alɔ ɔka lɛyikwu ɔdā nɛ alɔ kpɔtuce a, ɛgɛnyá nɛ ohilipu lɔfu ta alɔ abɔ ō wɛ ācɛ o gbonɛnɛ a?

Alɔ lɔfu ceyitikwu ō gbɛla lɛyikwu ɛgɛ nɛ ɔka nɛ ɔcɛ ɔɔma da a, lɔfu ta alɔ abɔ ō nwu ɛlā lɛyikwu ɔdā nōo cɛgbá lɛ ɔcɛ ɔɔma fiyɛ duu a. Ɛnyā géē ta alɔ abɔ fiyɛ ō ta ohi ɔwɛ ogbonɛnɛ.—w23.09, p. 17.

Ɔdi nɛ alɔ lɔfu nwu ŋma ɛgiyi Umeri lɛyikwu ō miyɛ ɔfu ŋma ɛgiyi ācɛ ɔhá a?

Eko nɛ Umeri le jé ka ó géē je piya ɛ́nɛ́ ku Umesayiya a, Umeri miyɛ ɔfu ŋma ɛgiyi ācɛ ɔhá. Ugebriyɛlu mla Ɛlisabeti je ɔtu ō tu kwu ɔtu lɛ Umeri ŋma ipu Ɛlā ku Ɔwɔico. Ayinɛ alɔ nōo yɔ ipu ujɔ a lɛ ɔfu tu alɔ iyē gla duu.—w23.10, p. 15.

Ɛgɛnyá nɛ Ujehofa lɔfu cila ɔkɔ ō gba ku alɔ a?

Ujehofa cokonu ō jahɔ tu ɔkɔ ō gba ku alɔ, klla gē leyi yɛ ɛgɛ nɛ ó tɛɛma kwu ɔdā nɛ ó bi ɔtu ō ya a. (Ujɛr. 29:12) Ujehofa lɔfu cila ɔkɔ ō gba ekponu ɔwɛ ɛyɛɛyɛyi, amáŋ ó géē je otabɔ lɛ alɔ eko doodu.—w23.11, pp. 21-22.

Ɔkpá ku Ācɛ Uróm 5:2 kɛla lɛyikwu “eyīyōce,” ó lɛ a, ɔdiya nɛ Upɔlu kɛla lɛyikwu ɔ kpɔ ipu ɔgba 4 a?

Igbihi nɛ ɔcɛ lɛ ɛnɛɛnɛ ɛlā lɛyikwu eyiyoce nōo yɔ ipu Ɛlā ku Ɔwɔico a po, ó lɔfu lɛ ɛnɛɛnɛ eyiyoce ō lā oyeeyi opiyoo ipu Uparadais ɛcɛ nyā. Amáŋ abɔ ó gē má owe ɛyɛɛyɛyi, gē lɔtu ku aowe nɛ ó gē má, mla ō má ɛgɛ nɛ Ujehofa gē mafu lɛ ɔ ka ó cɛɛla nu a, eyiyoce ku nu gē lɔfu fiyɛ ɛgɛ nōó lɛ gbɔbu a, ó klla jé kpɔcii ku aɔdā nɛ ó leyice a géē ya jila ɔkwɔɔkwɛyi.—w23.12, pp. 12-13.