1. O ya ɛɛ ku alɔ kwu piya Ācɛ O Yɛce Ukraist nōo jikoko ipu ɛlā ku Ɔwɔico, ɔdi nɛ alɔ cika ō ya piii a?

 Ó WƐ ɔdā ohidaago nɛhi ō má ɛgɛ nɛ ɔyipɛ obene gē jɛ fiyaa gē je piya ijinkpa a. Ó lɛbɛɛka ayipɛ nɛ̄ŋcɛ́ gē jɛ néē gē cɛgbá ō ya oceyitikwu duuma ŋ ma. Amáŋ, ɔdaŋ ku alɔ dɔka ō je piya ācɛ o jikoko ipu ɛlā ku Ɔwɔico, alɔ cɛgbá ō ceyitikwu lɔfu lɔfu. b (1 Ukɔ́r. 13:11; Uhíb. 6:1) O ya ɛɛ kóō tɔɔtɛ lɛ alɔ ō ya ɛnyā, alɔ cɛgbá ō lɛ ɛma olɔfu mla Ujehofa. Alɔ klla cɛgbá alelekwu ihɔ ku nu kóō ta alɔ abɔ ō lɛ ɛnɛɛnɛ auce ō ya nōo géē cɛ lɛ ɔtu he ɔ, ó nwu uklɔ amāŋ ō jé ō ya odee nōo géē ta alɔ abɔ, mla ō ya otutu ku auklɔ ɛyɛɛyɛyi nɛ alɔ lɔfu lɛ ɛcɔbu a.—Aíit. 1:5.

2. Ɔdi nɛ alɔ nwu ŋma ɔkpá ku Ohútu 1:27 a, ɔdi nɛ alɔ kē gáā kɛla lɛyikwu ɔ ipu ikpɛyi ɛlā nyā a?

² Ujehofa ya alɛɛcɛ kéē wɛ ɔcɛnyilɔ amāŋ ɔcɛnya. (Jé Ohútu 1:27.) Ó wɛ ɔkwɛyi kóō má eyī ku acɛnyilɔ mla acɛnya wɛ ɛyɛɛyi, amáŋ ó klla lɛ aɔwɛ ɔhá néē wɛ ɛyɛɛyi kpɔ. Ocabɔ mafu, Ujehofa ya acɛnyilɔ mla acɛnya ō ya auklɔ ocɛgbá ɛyɛɛyɛyi ōhī, ohigbu ɛnyā, é cɛgbá auce ō ya mla ɔdā ō jé nōo géē ta uwa abɔ ō ya auklɔ néē lɛ a. (Ohút. 2:18) Ipu ikpɛyi ɛlā nyā, alɔ géē kɛla lɛyikwu ɔdā nɛ ayinɛ nɔnya nōo wɛ ɛdrɔ lɔfu ya kéē kwu piya ācɛ o jikoko ipu ɛlā ku Ɔwɔico a. Ipu ikpɛyi ɛlā nōo gboce ɛnyā a, alɔ géē kɛla lɛyikwu ɔdā nɛ ayinɛ nɔnyilɔ nōo wɛ ɛdrɔ lɔfu ya a.

3-4. Imi nɛ aa nōo wɛ ayinɛ nɔnya nōo wɛ ɛdrɔ a lɔfu má ɛnɛɛnɛ ocabɔ ku ācɛ nɛ aa lɔfu yɛce a? (Má ifoto a.)

³ Ubáyíbu kɛla lɛyikwu acɛnya alɛwa nōo wɛ ɛnɛɛnɛ ocabɔ ku ācɛ nōo yihɔtu ku Ujehofa klla gba ɔ ɛ̄gbā ŋma ɔtu. (Má ikpɛyi ɛlā nyā ipu jw.org nōo kahinii: “Women in the Bible—What Can We Learn From Them?”) É mafu ɛnɛɛnɛ auce ō ya nɛ ikpɛyi ku oklɔcɛ ku alɔ nyā kɛla lɛyikwu ɔ a: “Uce olɔhi” mla ɔtu ō “yēŋēē ipú ɛjɛ̄ɛ̄jī ɔdā dóódu.” O ka tu ɔ, ayinɛ nɔnya nōo wɛ ɛdrɔ lɔfu má ayinɛ nɔnya nōo jikoko ipu ujɔ ku uwa, néē lɔfu nwu ɛlā alɛwa ŋma ɛgiyi uwa.

⁴ Ayinɛ nɔnya nōo wɛ ɛdrɔ, aa jé ayinɛ nɔnya duuma nōo gē lɛ ɛnɛɛnɛ ocabɔ taajɛ nɛ aa lɔfu yɛce? Aa leyi taajɛ ku aa má ɛnɛɛnɛ uce ō ya néē gē mafu a, cɛɛ ku aa gbɛla lɛyikwu ɛgɛ nɛ aa lɔfu mafu ɛdɔ uce ō ya ɛgɔɔma a. Abɔ alɔ yɔ i gɔbu a, alɔ géē má ɛnɛɛnɛ uce ō ya ɛpa nɛ ayinɛ nɔnya nōo wɛ ɛdrɔ cɛgbá ō lɛ a.

5. Ɔdiya nōo tu iyi ɔcɛ waajɛ wɛ uce ō ya nōo cɛgbá lɛ ɔcɛnya nōo wɛ ɔcɛ o jikoko ipu ɛlā ku Ɔwɔico a?

⁵ O ya ɛɛ ku alɔ kwu piya ācɛ o jikoko ipu ɛlā ku Ɔwɔico, alɔ cɛgbá uce kóō tu iyi ɔcɛ waajɛ. Ɔdaŋ ku ɔcɛnya wɛ ɔcɛ o tu iyi nu waajɛ, ó géē jɔɔnyɛ ɛnɛɛnɛ ɛma mla Ujehofa mla ācɛ ɔhá. (Ujɛ́m. 4:6) Ocabɔ mafu, ɔcɛnya nōo yihɔtu ku Ujehofa géē tu iyi nu waajɛ ō yɛce ɛlā néē ta ipu ɔkpá ku 1 Ācɛ Ukɔ́rīnti 11:3 a. Abɔɔ a, Ujehofa lɛ ɔ teyi peee ācɛ nɛ ó je íkwu ōhī lɛ uwa ō bi alɔ jé ɔwɛ ipu ujɔ, mla ɔcɛ nōo géē wɛ otrɛyi ku apɔlɛ a. c

6. Ɔdi nɛ ayinɛ nɔnya nōo wɛ ɛdrɔ lɔfu nwu lɛyikwu ō tu iyi ɔcɛ waajɛ ŋma ɛgiyi Urebeka a?

⁶ Leyi yɛ ocabɔ ku Urebeka. Ó wɛ ɔnyā nōo ya ōmiya nōo mafu ɔtu ō lɛ ipu ɛjɛɛji oyeeyi ku nu, klla wɛ ɔcɛ nōo jé eko mla ɛgɛ nɛ ó cika ō ya odee a. (Ohút. 24:58; 27:​5-17) Naana kpɔ a, ó wɛ ɔcɛ nōo gē mafu ojilima klla le tutu eko doodu ō yɛce ɔwɛ néē gē mafu lɛ ɔ a. (Ohút. 24:​17, 18, 65) Ɔdaŋ ku a wɛ ɔcɛ o tu iyi uwɔ waajɛ bɛɛka  Urebeka, nɛ a klla je otabɔ lɛ ācɛ nɛ Ujehofa je íkwu lɛ uwa ō bi alɔ jé ɔwɛ a, a géē wɛ ocabɔ olɔhi lɛ ɛjɛɛji ācɛ nōo yɔ ipu apɔlɛ ku uwɔ mla ipu ujɔ a.

7. Ɛgɛnyá nɛ ayinɛ nɔnya nōo wɛ ɛdrɔ lɔfu yɛce ocabɔ ku Ɛsta ō mafu ka é wɛ ācɛ o tu iyi uwa waajɛ a?

⁷ Ɛjɛɛji Ācɛ O Yɛce Ukraist nōo jikoko ipu ɛlā ku Ɔwɔico cɛgbá uce kóō tu iyi ɔcɛ waajɛ. Ubáyíbu kahinii: “Ɔ́dāŋ ka ɔ̄cɛ lɛ iyī nū tú wāajɛ, ayíka ó jéeyī.” (Aíit. 11:2) Ɛsta wɛ ɔcɛ o tu iyi nu waajɛ nōo klla gba Ɔwɔico ɛ̄gbā kpaakpa. Ohigbu ka ó wɛ ɔcɛ o tu iyi nu waajɛ a, ó yɔbɔɔcɛ eko nɛ ó je piya ɔcanya a ŋ. Ó jahɔ tu ukɔ́ nɛ Umɔdɛkayi tu ɔ a klla yɛce ɔ. (Ɛ́sta 2:​10, 20, 22) Awɔ abɔyi uwɔ lɔfu mafu ku a wɛ ɔcɛ o tu iyi uwɔ waajɛ, ŋma lɛ ō da ācɛ ɔhá kéē tu uwɔ ɛnɛɛnɛ ukɔ́, mla ō yɛce ukɔ́ néē tu uwɔ a.—Utáy. 2:​3-5.

8. Ɛgɛ nɛ ɔkpá ku 1 Utímōti 2:​9, 10 ka a, ɛgɛnyá nōo tu iyi ɔcɛ waajɛ lɔfu ta ɔyinɛ nɔnya abɔ kóō ya ifa ɔwɛ ijeeyi a?

⁸ Ó klla lɛ ɔwɛ ɔhá nɛ Ɛsta mafu ka ó wɛ ɔcɛ o tu iyi nu waajɛ. Ɛsta “lɔhi klla jɔ̄ɔ́ncɛ́nyā nɛ̄hi,” naana kpɔ a, ó ceyitikwu ya ku eyī kóō kwu ɔ ŋ. (Ɛ́sta 2:​7, 15) Ɛgɛnyá nɛ ayinɛ nɔnya nōo wɛ ɛdrɔ lɔfu lɛ itene ŋma ocabɔ ku Ɛsta a? Ɔwɛ éyi néē lɔfu ya ɛnyā a, wɛ ō yuklɔ mla ɛlā nōo yɔ ipu ɔkpá ku 1 Utímōti 2:​9, 10. (Jé.) Ipu ɛga ku Ubáyíbu ɔɔma, Upɔlu da acɛnya nōo wɛ Ācɛ O Yɛce Ukraist kéē ya ifa ɔwɛ nōo géē mafu ka é lɛ ojilima ce Ɔwɔico. Ɛlā ku Ugrisii nɛ ó bi le yuklɔ a mafu ku acɛnya cika ō ya ifa ɔwɛ okpaakpa eko doodu, ka é klla cika ō gbɛla lɛyikwu ɛgɛ nɛ ɔtu gē ya ācɛ ɔhá lɛyikwu ɛdɔ ifa néē gē ya a. Ɛlā ku aa nōo wɛ ayinɛ nɔnya nōo gē ya ifa ɔwɛ okpaakpa a he alɔ ɔtu ibi!

9. Ɔdi nɛ alɔ lɔfu nwu ŋma ocabɔ ku Abigɛlu a?

⁹ Ohilipu ō jɛyi odee klla wɛ ɛnɛɛnɛ uce ō ya ɔhá nɛ ɛjɛɛji ayinɛ nɔnya nōo wɛ ɛdrɔ cɛgbá ō lɛ, o ya ɛɛ kéē kwu piya ācɛ o jikoko ipu ɛlā ku Ɔwɔico. Ɔdi wɛ ohilipu ō jɛyi odee a? Ó wɛ ō jé ɔdā nōo wɛ ɛyɛɛyɛyi ku ɔdā olɔhi mla ɔdobɔbi, mla ō fu ɔdā okpaakpa a ō ya. Leyi yɛ ocabɔ ku Abigɛlu. Ɔba nu ya ōmiya obɔbi éyi nōo gē yɛ i lɛ unwalu bi gē lɛ ɛjɛɛji apɔlɛ ku nu a. Abigɛlu ya odee boobu. Ohigbu ka ó lɛ ohilipu ō jɛyi odee a, ó lɛ ɔdā okpaakpa nɛ ó cika ō ya a ya, ɛnyā kē lɛ oyeeyi ku ācɛ alɛwa nyata. (1 Usám. 25:​14-23, 32-35) Ohilipu ō jɛyi odee klla gē ta alɔ abɔ ō jé eko okpaakpa nɛ alɔ cika ō kɛla, mla eko nɛ alɔ cika ō yɔ cii a. Ó klla gē ta alɔ abɔ ō lɛ ɛlá wu ācɛ ɔhá, nɛ alɔ i gáā ya ku ɔtu kóō hɛ uwa kó ŋ.—1 Utes. 4:11.

10-11. Ɛgɛnyá nɛ awɔ abɔyi uwɔ mla ācɛ ɔhá lɔfu lɛ itene ɔdaŋ ku a jé ō ta ɔkpá mla ō jé ɔkpá lɔɔlɔhi a? (Má ifoto a.)

¹⁰ Ɔcɛnya nōo wɛ Ɔcɛ O Yɛce Ukraist cɛgbá ō nwu ō jé ō ya odee nōo géē ta ɔ abɔ. Uklɔ ōhī nɛ ɔcɛnya nwu ō jé ō ya ŋma eko nɛ ó wɛ ɔyipɛ a, géē gɔbu yɔ i ta ɔ abɔ ipu ɛjɛɛji oyeeyi ku nu. Leyi yɛ ocabɔ ōhī.

¹¹ Nwu ō jé ō jé ɔkpá mla ō ta ɔkpá lɔɔlɔhi. Ipu  uculo ōhī, é gē leyi má ɔkpá ō jé mla ō jé ō ta ɔkpá ka ó wɛ uklɔ ocɛgbá nɛ acɛnya cika ō nwu ŋ. Amáŋ, ó wɛ ɔdā olɔhi klla cɛgbá nɛhi ku ɛjɛɛji Ācɛ O Yɛce Ukraist kéē nwu ō jé ō jé ɔkpá mla ō ta ɔkpá lɔɔlɔhi. d (1 Utím. 4:13) Ohigbu ɛnyā, ɔdaŋ nōó kóō lɔnɔ naana, ceyitikwu ku a nwu ō jé ō jé ɔkpá mla ō ta ɔkpá lɔɔlɔhi. Itene nyá nɛ a gáā lɛ a? Ō nwu ɛdɔ uklɔ ō ya ɛgɛnyā géē ta uwɔ abɔ ō lɛ uklɔ nɛ a géē bi le ya ɛgbá ku uwɔ. Ó klla géē tɔɔtɛ gā uwɔ fiyɛ ō ya oklɔcɛ ku Ubáyíbu mla ō nwu ācɛ ɔhá. Ɛ̄nɛ̄ o kē lɔhi fiyɛ duu a, wɛ ku a géē tubla Ujehofa ajaajɛ eko duuma nɛ a gē jé Ɛlā ku nu klla gē gbɛla tu ɔ lipu lipu.—Ujós. 1:8; 1 Utím. 4:15.

12. Ɔdi nɛ a nwu ŋma ɔkpá ku Aíita 31:26 a?

¹² Nwu ō jahɔ lɔɔlɔhi mla ō kɛla ɔwɛ ogbonɛnɛ. Ɛjɛɛji Ācɛ O Yɛce Ukraist cɛgbá ɛnɛɛnɛ uce ō ya nyā. Ɔyikpo Ujɛmisi tu ɛjɛɛji alɔ ɛnɛɛnɛ ukɔ́ nyā kahinii: “Odúúdú aá kéē jāhɔ̄ kéē pó ɛlā fíyaa, amáŋ aá ŋmúléyīkwū kɛlā fíyaa ŋ́.” (Ujɛ́m. 1:19) Ɔdaŋ ku a gē jahɔ lɔɔlɔhi eko duuma nɛ ācɛ ɔhá gē kɛla, a géē mafu eyinyinyi amāŋ “gbonɛnɛ” lɛ uwa. (1 Upít. 3:8) Ɔdaŋ ku á jɛyi ɛlā nɛ ɔcɛ yɔ i ka amāŋ ɛgɛ nɛ ɔtu yɔ i ya ɔ lɛ a ŋ, da ɔka nōo cɛgbá a. Cɛɛ ku a klla gbɛla lɔɔlɔhi gbɔbu ɛɛ ku a kɛla. (Aíit. 15:28) Da iyi uwɔ aɔka nōo ba nyā kahinii: ‘Ɛlā nɛ um dɔka ō ka nyā wɛ ɔkwɛyi klla wɛ ɛlā ō ta ɔtu kwu ɔtu? Ó mafu ojilima klla wɛ ɛlā ogbonɛnɛ?’ Nwu ɛlā ŋma ɛgiyi ayinɛ nɔnya nōo jikoko nōo gē jahɔ lɔɔlɔhi klla gē kɛla ɔwɛ ogbonɛnɛ a. (Jé Aíita 31:26.) Jahɔ lɔɔlɔhi tu ɛlā néē gē ka mla ɛgɛ néē gē ka ɔ a. Ɔdaŋ ku a nwu aɔdā nōo ba nyā lɔɔlɔhi, ó géē tɔɔtɛ gā uwɔ fiyɛ ō wɛ ɔkpa ku ācɛ ɔhá mla ō yɔ ɛbɔ mla uwa.

13. Ɛgɛnyá nɛ a lɔfu nwu ō jé ō leyikwu ɔlɛ lɔɔlɔhi a? (Má ifoto a.)

¹³ Nwu ɛgɛ nɛ a gē jé ō leyikwu ɔlɛ lɔɔlɔhi. Ipu ɛga alɛwa, acɛnya gē ya ɛyinɛhi ku uklɔ ɔlɛ a. Ɛ́nɛ́ uwɔ amāŋ ɔyinɛ nɔnya ɔhá nōo jikoko lɔfu nwu uwɔ ɛgɛ nɛ a gē jé ō yuklɔ nyā lɔɔlɔhi. Ɔyinɛ alɔ nɔnya éyi nōo lé ka u Cindy a kahinii: “Ɔdā olɔhi fiyɛ duu éyi nɛ um nwu ŋma ɛgiyi umama ku um a, wɛ kóō yuklɔ lɔfu lɔfu gē cɛ lɛ ɔcɛ gweeye. Ohigbu ka umama ku um nwu um ɛgɛ nɛ um gē jé ō hɛ ɔdole, ō tu ɔlɛ bi, ō gá ili, mla ō bi ije le lá ɔlá ɔwɛ ijeeyi a, ó le tɔɔtɛ gā um ō teyi kwu iyi um mla ō ya nwune ipu ɛ̄gbā ō gba ku Ujehofa. Umama ku um klla nwu um ɛgɛ nɛ um géē mafu uce ogbonɛnɛ lɛ ācɛ ɔhá, ɛnyā kē lɛ ɔ ya tɔɔtɛ gā um ō má ɛnɛɛnɛ ayinɛ nɛ um lɔfu yɛce ocabɔ ku uwa.” (Aíit. 31:​15, 21, 22) Ɔcɛnya nōo gē yuklɔ lɔfu lɔfu klla gē mafu uce ogbonɛnɛ, wɛ ɔhā lɛ ɛjɛɛji ācɛ nōo yɔ ipu apɔlɛ ku nu mla ujɔ a.—Aíit. 31:​13, 17, 27; Ācot. 16:15.

14. Ɔdi nɛ a nwu ŋma ocabɔ ku Crystal a, ɔdi nɛ a kē cika ō bi ipu ɔtu a?

¹⁴ Nwu ɛgɛ nɛ a gē jé ō ya odee abɔyi uwɔ nōo géē ta uwɔ abɔ. Ó cɛgbá nɛhi ku ɛjɛɛji Ācɛ O Yɛce Ukraist kéē nwu ɛgɛ néē gē jé ō ta iyi uwa abɔ, mla ō ceyitikwu ya ku ɔdā néē lɛ a kóō jɛ uwa eyī. (Ufíl. 4:11) Ɔyinɛ alɔ nɔnya éyi nōo lé ka u Crystal a kahinii: “Ɛ́nɛ́ mla adā um ta um  ɔtu kwu ɔtu ō nwu uklɔ abɔ éyi ipu inɔkpa, nōo géē ta um abɔ igbihaajɛ ipu oyeeyi ku um. Upapa ku um ta um ɔtu kwu ɔtu ō gā uklasi néē géē nwu um ɛgɛ nɛ um géē jé ō gbo ije tu, mla ɛgɛ nɛ um gē jé ō ta ije nɛ ukɔmpani ŋmo a taajɛ. Ō ya ɔɔma kē ta um abɔ nɛhi.” Ó jɛ ɔdaŋ ku a nwu ɛgɛ nɛ a gē jé ō ya ije foofunu ŋ, amáŋ a cɛgbá ō nwu ɛgɛ nɛ a géē jé ō bi ije nɛ a ya a le yuklɔ ɔwɛ ijeeyi, o ya ɛɛ ku a hii ŋmo ije a fiyɛ ɛ̄nɛ̄ a lɛ a ŋ. (Aíit. 31:​16, 18) Ɔdaŋ ku aɔdā nɛ a lɛ a jɛ uwɔ, nɛ á klla gē lá aɔdā nōo géē bi uwɔ gā ipu ule ŋ, ó géē ta uwɔ abɔ ō ya ōmiya ku uwɔ jila, mla ō ya nwune ipu ɛ̄gbā ō gba ku Ujehofa.—1 Utím. 6:8.

15-16. Ɔdiya nɛ ayinɛ nɔnya nōó lɛ ɔba ɛ ŋ ma cɛgbá nɛɛnɛhi a? (Umáki 10:​29, 30)

¹⁵ Ɔdaŋ ku a lɛ auce ō ya nōo gē cɛ lɛ ɔtu he Ujehofa, nɛ a klla nwu uklɔ nōo géē ta uwɔ abɔ, ɔɔma géē ta uwɔ abɔ ō fu aɔdā nɛ a géē ya ipu oyeeyi ku uwɔ igbihaajɛ a. Leyi yɛ aocabɔ ōhī ku aɔdā nɛ a lɔfu ya a.

¹⁶ A lɔfu miya ku á gáā lɛ ɔba ŋ. Ɛgɛ nɛ Ujisɔsi ka a, acɛnya ōhī lɔfu miya ku aa i gáā lɛ ɔba ŋ, ɔdaŋ nɛ uculo ku uwa i kóō gē ta acɛnya ɔtu kwu ɔtu ō ya lɛ a ŋ naana. (Umát. 19:​10-12) Ācɛ ōhī lɔfu miya ku aa i gáā lɛ ɔba ŋ ohigbu āhɔ̄ ōhī. Le jé kpɔcii ka Ujehofa mla Ujisɔsi i gē gbɛla ka ohigbu ku á lɛ ɔba ŋ ma, ku á tiile ŋ nɛ ŋ. Ipu oduudu ɛcɛ, ayinɛ alɔ nɔnya nōó lɛ ɔba ɛ ŋ ma wɛ ɛnɛɛnɛ ocabɔ ipu ujɔ. Ohigbu ka é lɛ ihɔtu klla gē lɛ ɛlá wu ācɛ ɔhá a, é gáā lɛbɛɛka ayinɛ nɔnya mla ɛ́nɛ́ lɛ ācɛ alɛwa.—Jé Umáki 10:​29, 30; 1 Utím. 5:2.

17. Ɛgɛnyá nɛ ɔyinɛ nɔnya nōo wɛ ɛdrɔ lɔfu ya otutu babanya ō gā ipu uklɔ ō ya lɛ Ujehofa eko doodu a?

¹⁷ A lɔfu miya ō gā ipu uklɔ ō ya lɛ Ujehofa eko doodu. Ayinɛ alɔ nɔnya gē ya nwune fiyɛ ipu uklɔ ku ɔna ō ta ipu oduudu ɛcɛ a. (Aíjē 68:11) A lɔfu lɛ ɔ ya ōmiya ku uwɔ babanya ō gā ipu uklɔ ō ya lɛ Ujehofa eko doodu? A lɔfu miya ō je piya ɔcɛ o gbɔbu ɔna ō ta, ō je iyi uwɔ tɛɛcɛ ō yuklɔ ku ɔlɛ ō gwo, amāŋ ō je piya ɔcɛ o yuklɔ ku Ubɛtɛlu. Gbɔɔkɔ lɛyikwu ōmiya nɛ a ya a. Kɛla mla ācɛ ɔhá nōo ya ɛdɔ ōmiya ɔɔma jila ɛ ma, ku a klla nwu ɛlā ŋma ɛgiyi uwa ɔdā nɛ a cɛgbá ō ya, o ya ɛɛ ku a kwu piya ɔcɛ o yuklɔ lɛ Ujehofa eko doodu a. Oŋma ɔɔma, ya ɔdā nōo géē ta uwɔ abɔ ō ya ōmiya ku uwɔ ɔɔma jila a. Ɔdaŋ ku a kwu piya ɔcɛ o yuklɔ lɛ Ujehofa eko doodu, ó géē tɔɔtɛ gā uwɔ ō ya aɔdā alɛwa ɔhá lɛ Ujehofa nōo géē je eeye gā uwɔ.

18. Ɔdiya nɛ ɔyinɛ nɔnya cika ō lɛ eko taajɛ ō gbɛla lɔɔlɔhi lɛyikwu ɔcɛ nɛ ó géē fu kóō wɛ ɔba nu a? (Má ifoto a.)

¹⁸ A lɔfu miya ō lɛ ɔba. Ɛnɛɛnɛ auce ō ya mla  uklɔ nɛ a lɔfu nwu ō jé ō ya nɛ alɔ kɛla lɛyikwu ɔ ɛ ma, géē ta uwɔ abɔ ō je piya ɔnyā olɔhi. Ó wɛ ɔkwɛyi, ka ɔdaŋ ku a yɔ i gbɛla ō lɛ ɔba, a cika ō lɛ eko taajɛ ō gbɛla lɔɔlɔhi lɛyikwu ɔcɛ nɛ a géē fu kóō wɛ ɔba uwɔ a. Ōmiya ɔɔma wɛ éyi ku aōmiya nōo cɛgbá fiyɛ duu ipu oyeeyi ku uwɔ a. Bla, ku a géē cɛgbá ō yɔ ɛhaajɛ íkwu ku ɔcɛnyilɔ nɛ a fu ō lɛ a. (Uróm 7:2; Āfi. 5:​23, 33) Ohigbu ɔɔma, da iyi uwɔ aɔka nōo ba nyā: ‘Ó wɛ ɔcɛ nōo jikoko ipu ɛlā ku Ɔwɔico? Ó gē lɛ Ujehofa ta aflɛyi ipu oyeeyi ku nu? Ó gē ya ōmiya ku ijeeyi? Ó gē cɛ ɔdaŋ ka ó lɛ inyileyi ya? Ó gē lɛ ojilima ce acɛnya? Ó géē tɔɔtɛ lɛ ɔ ō ya ku ɛma nɛ um lɛ mla Ujehofa a kóō lɔfu, ō ya ɛgbá ku um, klla géē wɛ ɔkpa olɔhi ku um? Ó gē ya auklɔ nɛ ó lɛ a lɔɔlɔhi? Ocabɔ mafu, uklɔ nyá nɛ ó lɛ ō ya ipu ujɔ a, ɛgɛnyá nɛ ó kē i ya auklɔ ɔɔma lɛ a?’ (Ulúk. 16:10; 1 Utím. 5:8) Ku ɛlā ɔkwɛyi a, ɔdaŋ ku a yɔ i dɔka ɔba olɔhi, awɔ abɔyi uwɔ cika ō wɛ ɔnyā olɔhi duu.

19. Ɔdiya nɛ ɔnyā cika ō gweeye ka ó wɛ ɔcɛ je “otábɔ̄” lɛ ɔba nu a?

¹⁹ Ubáyíbu ka ka ɔnyā olɔhi wɛ ɔcɛ nōo gē je “otábɔ̄” lɛ ɔba nu. (Ohút. 2:18) Ɛnyā wɛ ka ɔnyā i cɛgbá ŋ nɛɛ? Ehee! Ɔɔma wɛ ɛnɛɛnɛ ɛga lɛ ɔ. Ku ɛlā ɔkwɛyi a, igbalɛwa Ubáyíbu gē hi Ujehofa ka “ɔ̄cɛ o tá alɔ abɔ̄.” (Aíjē 54:4; Uhíb. 13:6) Ɔnyā géē wɛ otabɔ lɛ ɔba nu ɔkwɔɔkwɛyi, ɔdaŋ nɛ ó gē cɛ ō yɛce ōmiya nɛ ɔba nu gē ya a. Ocabɔ mafu, ɔdaŋ ka ɔba nu lɛ ōmiya ya ipu apɔlɛ a, ó géē ya ɔdā duuma nɛ ó ya gla ku ōmiya ɔɔma kóō lɛyi lɛ. Ohigbu ka ó yihɔtu ku Ujehofa a, ó gē ya ɔdā duuma nɛ ó ya gla a ō ta ācɛ ɔhá abɔ kéē má ɛnɛɛnɛ uce ō ya ku ɔba nu. (Aíit. 31:​11, 12; 1 Utím. 3:11) A lɔfu gbɔɔ ō ya otutu babanya ō je piya ɛnɛɛnɛ ɔnyā, ŋma lɛ ō ya ku ihɔtu nɛ a lɛ lɛ Ujehofa a kóō lɔfu fiyɛ, mla ō je otabɔ lɛ ācɛ ɔhá ɔlɛ uwɔ mla ipu ujɔ.

20. Ɔdā olɔhi nyá nɛ ɛ́nɛ́ lɔfu ya lɛ ācɛ apɔlɛ ku nu a?

²⁰ A lɔfu miya ō ma ayi. Igbihi nɛ a lɛ ɔba lɛ, awɔ mla ɔba uwɔ lɔfu miya ō ma ayi. (Aíjē 127:3) Ohigbu ɛnyā, ó géē lɔhi ku a gbɛla lɛyikwu ɔdā nɛ a cɛgbá ō ya, o ya ɛɛ ku a wɛ ɛ́nɛ́ olɔhi a. Ɛnɛɛnɛ uce ō ya mla uklɔ ocɛgbá nɛ a lɔfu nwu ō ya nɛ alɔ kɛla lɛyikwu ɔ ipu ikpɛyi ɛlā nyā ɛ ma, géē ta uwɔ abɔ ō je piya ɔnyā mla ɛ́nɛ́ olɔhi. Ɔdaŋ ku a lɛ ihɔtu, gbonɛnɛ, klla gē gbeyi cii, a géē ta apɔlɛ ku uwɔ abɔ kéē lɛ eeye, ayipɛ ɔlɛ uwɔ klla géē lɛ ogbotu.—Aíit. 24:3.

21. Ɛgɛnyá nɛ ɔtu gē ya alɔ lɛyikwu ayinɛ alɔ nɔnya a, ɔdi kē ya a? (Má ifoto nōo yɔ iyɔbu ku Ɔda Ō Gbaajɛ nyā a.)

²¹ Ayinɛ alɔ nɔnya, alɔ yihɔtu aa nɛɛnɛhi ohigbu ɔdā nɛ aa gē ya lɛ Ujehofa mla ācɛ ɔhá a. (Uhíb. 6:10) Aa gē ceyitikwu lɔfu lɔfu ō lɛ ɛnɛɛnɛ uce ō ya mla ō nwu uklɔ ocɛgbá, nōo géē ya ku oyeeyi ku aa mla aku ācɛ ɔhá nōo yɛ jila aa ta kóō lɛ eeye, mla ō ya otutu lɛyikwu ɛcɔbu ku aa. Aa cɛgbá nɛɛnɛhi lɛ ɔwa ku Ujehofa!