1. Ɔdi nɛ ɔcɛnyilɔ nōo wɛ Ɔcɛ O Yɛce Ukraist cɛgbá ō ya piii o ya ɛɛ kóō ya lɔhi a?

 UDEFIDI nōo wɛ Ɔcɛ́ a da Usolomɔn kahinii: “Lɛ ɔfú tīiyē ká ā klla lɛ ɔtū lɛ bɛ̄ɛka ɔ̄cɛnyīlɔ ā.” (1 Aɔ́cɛ́ 2:​1-3) Ukɔ́ nyā cɛgbá nɛhi lɛ ɛjɛɛji acɛnyilɔ nōo dɔka ō yɛce ocabɔ ku Ujisɔsi icɛ a. O ya ɛɛ kéē ya lɔhi, é cɛgbá ō lɛyitaajɛ lɛ íne ku Ɔwɔico piii, mla ō bi aukɔ́ ku Ubáyíbu yuklɔ ipu ɛjɛɛji aya ku oyeeyi ku uwa. (Ulúk. 2:52) Ɔdiya nōó cɛgbá nɛhi ku ɛjɛɛji ayinɛ nɔnyilɔ nōo wɛ ɛdrɔ a, kéē kwu piya ācɛ o jikoko ipu ɛlā ku Ɔwɔico a?

2-3. Ɔdiya nōó cɛgbá ku ɔcɛnyilɔ nōo wɛ ɛdrɔ kóō kwu piya ɔcɛ o jikoko ipu ɛlā ku Ɔwɔico a?

² Ayinɛ nɔnyilɔ nōo wɛ Ācɛ O Yɛce Ukraist a lɛ uklɔ ocɛgbá alɛwa ō ya ipu apɔlɛ mla ipu ujɔ. Ayinɛ nɔnyilɔ nōo wɛ ɛdrɔ, ó lɛ aafu ŋ, aa lɔfu gbɛla tu auklɔ ɛyɛɛyɛyi nɛ aa lɔfu lɛ ɛcɔbu a ɛ. Á jé ŋ, aa dɔka ō kwu piya ācɛ o gbɔbu ɔna ō ta eko doodu, ācɛ ō ta anyakwɔcɛ ku ujɔ abɔ, mla anyakwɔcɛ ku ujɔ. Á jé ŋ, aa klla lɔfu yɔ i ya ōmiya ō lɛ ɔnyā klla ma ayi duu. (Āfi. 6:4; 1 Utím. 3:1) O ya ɛɛ kóō tɔɔtɛ lɛ aa ō lɛ aɔdā nɛ aa miya a ya jila a, aa cɛgbá ō kwu piya ācɛ o jikoko ipu ɛlā ku Ɔwɔico. b

³ Ɔdi lɔfu ta aa abɔ ō kwu piya ācɛ o jikoko ipu ɛlā ku Ɔwɔico a? Ó lɛ auklɔ ocɛgbá ōhī nɛ aa cɛgbá ō nwu. Ó lɛ a, ɔdi nɛ aa lɔfu ya babanya o ya ɛɛ ku aa le tutu taajɛ lɛyikwu auklɔ ɛyɛɛyɛyi nɛ aa lɔfu lɛ ɛcɔbu, cɛɛ ku aa lɛ ɔ ya jila a?

4. Imi nɛ a lɔfu má aocabɔ olɔhi ŋma nɛ a lɔfu yɛce a? (Má ifoto a.)

⁴ Fu aocabɔ olɔhi nɛ aa géē yɛce. Ubáyíbu le mu mla aocabɔ olɔhi nɛ aɛdrɔ nōo wɛ acɛnyilɔ lɔfu yɛce. Acɛnyilɔ ŋma eko ikee nyā yihɔtu ku Ɔwɔico klla yuklɔ ɛyɛɛyɛyi néē je lɛ uwa a, mla ō leyikwu ācɛ ɔlɛ Ɔwɔico lɔɔlɔhi. Aa klla lɔfu má ɛnɛɛnɛ ocabɔ ku acɛnyilɔ nōo jikoko ipu ɛlā ku Ɔwɔico ipu apɔlɛ ku aa mla ipu ujɔ ku aa. (Uhíb. 13:7) Aa klla lɛ ɛnɛɛnɛ ocabɔ ku Ujisɔsi nɛ aa lɔfu yɛce duu. (1 Upít. 2:21) Abɔ aa yɔ i klɔcɛ ku aocabɔ nyā lɔɔlɔhi a, aa gbɛla tu ɛnɛɛnɛ uce ō ya ku uwa nōo he aa ɔtu fiyɛ duu a. (Uhíb. 12:​1, 2) Oŋma ɔɔma, aa gbɛla lɛyikwu ɛgɛ nɛ aa lɔfu yɛce ocabɔ ku acɛnyilɔ nyā a.

5. Ɛgɛnyá nɛ a lɔfu nwu ō jé ō gbɛla lɔɔlɔhi a, ɔdiya nōo ya ɔɔma kē cɛgbá a? (Aíjē Kú Ɛ̄gbā 119:9)

⁵ “Lɛ abɔ̄ bī . . . [ɛlá ō gbo olɔhi] kú uwɔ ká.” (Aíit. 3:21) Ɔcɛnyilɔ nōo gē gbɛla lɔɔlɔhi i gē ya odee ipu iŋmuleyikwu ŋ, amáŋ ó gē gbɛla lɔɔlɔhi gbɔbu ɛɛ kóō miya ɔdā duuma ō ya. Ohigbu ɛnyā, yuklɔ lɔfu lɔfu o ya ɛɛ ku a jé ō ya ɛnyā ku a klla gɔbu yɔ i ya lɛ a. Ɔdiya a? Ohigbu ka ɛyinɛhi ku aɛdrɔ nōo yɔ ipu ɛcɛ icɛ a, gē ya ōmiya nōo gbolo ce ɛlá ō gbo ku uwa mla ɛgɛ nɛ ɔtu gē ya uwa lɛ a. (Aíit. 7:7; 29:11) Ɔdā ɔhá kpɔ, aɔdā nɛ a gē má ŋma ipu TV, aɔka nɛ a gē jé, mla ɛgɛ nɛ a gē bi ɛga ō kɔka le yuklɔ a, lɔfu lɛ abɔ kwu ɛlá ō gbo mla uce ō ya ku uwɔ. Amáŋ ɛgɛnyá nɛ a gáā nwu ō jé ō gbɛla lɔɔlɔhi a? Aflɛyi, nwu ŋma ipu Ubáyíbu ɛgɛ nɛ Ujehofa gē gbɛla mla ɛgɛ nɛ ɔtu klla gē ya ɔ lɛ a, cɛɛ ku a gbɛla lɛyikwu ɔdā nōo ya ɛɛ nōó lɔhi ku a ya ɔdā nɛ ó ka a. Oŋma ɔɔma, bi aɛlā nɛ a nwu a le ya ōmiya nōo géē ya ku ɔtu kóō he Ujehofa. (Jé Aíjē Kú Ɛ̄gbā 119:9.) Ɔdaŋ ku a nwu ō gbɛla ɔwɛ ɛgɛnyā, ó gee ta uwɔ abɔ nɛɛnɛhi ō kwu piya ɔcɛ o jikoko ipu ɛlā ku Ɔwɔico. (Aíit. 2:​11, 12; Uhíb. 5:14) Leyi yɛ ɛgɛ nōo gbɛla lɔɔlɔhi lɔfu ta uwɔ abɔ ipu āhɔ̄ ɛpa nyā a: (1) ɔwɛ nɛ a gē ya ɛlā mla ayinɛ nɔnya mla (2) ōmiya ku ɛgɛ nɛ a gē ya ifa lɛ a.

6. Ɛgɛnyá nōo gbɛla lɔɔlɔhi lɔfu ta ɔyinɛ nɔnyilɔ nōo wɛ ɛdrɔ abɔ ō mafu ojilima lɛ ayinɛ nɔnya a?

⁶ Ɔcɛnyilɔ nōo le nwu ō gbɛla ɛgɛ nɛ Ujehofa gē gbɛla a, gē lɛ ojilima ce acɛnya. Ocabɔ mafu, ɔyinɛ nɔnyilɔ éyi lɔfu miya ō jé ɔyinɛ nɔnya éyi lɔɔlɔhi, ō ya ɔɔma i kē wɛ ɔdobɔbi ŋ. Amáŋ ɔyinɛ nɔnyilɔ nōo gē gbɛla lɔɔlɔhi, i gáā kɛla, ta ɔkpá,  amāŋ ya ɔdā duuma nōo géē ya ku ɔyinɛ nɔnya a kóō gbɛla, ku ɔ dɔka ō jé anuɔ lɔɔlɔhi o ya ɛɛ kóō lɛ anuɔ lɛ, ɔdaŋ nɛ ó kē bi ɔtu ō lɛ ɔ ŋ. (1 Utím. 5:​1, 2) Ɔdaŋ nɛ ó kē yɔ i jé ɔyinɛ nɔnya o ya ɛɛ kóō kwu ɔ u lɛ, ó géē dɔka ō gbo iye olɔhi nɛ ɔyinɛ nɔnya ɔɔma lɛ a ɔdaŋ néē gē yɔ foofu uwa ŋ, amáŋ gē yɔ mla ācɛ.—1 Ukɔ́r. 6:18.

7. Ɛgɛnyá nōo gbɛla lɔɔlɔhi lɔfu ta ɔyinɛ nɔnyilɔ nōo wɛ ɛdrɔ abɔ, eko nɛ ó gáā ya ōmiya lɛyikwu ɛdɔ ili nɛ ó géē je wiye mla ɛdɔ ɛyi nɛ ó géē gbɛ a?

⁷ Ɔyinɛ nɔnyilɔ nōo wɛ ɛdrɔ nōo le nwu ō gbɛla ɛgɛ nɛ Ujehofa gē gbɛla a, klla gē ma ɔ fu oŋma lɛ ɛdɔ ili nɛ ó gē le wiye mla ɛdɔ ɛyi nɛ ó gē gbɛ a. Ācɛ alɛwa nōo gē gá ili ɛpɛpɛ klla gē ma ɔ fu o ya ɛɛ ku ācɛ kéē lá a, wɛ ācɛ nōó gē lɛ ojilima ce Ujehofa ŋ, klla gē lā oyeeyi ku aja ō gbo amāŋ ikpo ɔnyā ō ce. Ohigbu ɛnyā, ɛdɔ ili néē gē gá a wɛ ɛ̄nɛ̄ o gē ba uwa iyē piyɛkpɛɛ, amāŋ ɛ̄nɛ̄ o lɔfu ya ku ɔcɛnyilɔ kóō lɛbɛɛka ɔcɛnya a. Ohigbu ɛnyā, eko nɛ ó yɔ i ya ōmiya ku ɛdɔ ili nɛ ó géē je wiye, ɔyinɛ nɔnyilɔ nōo wɛ ɛdrɔ nōo yɔ i ceyitikwu kóō kwu piya ɔcɛ o jikoko ipu ɛlā ku Ɔwɔico, cika ō yɛce aukɔ́ nōo yɔ ipu Ubáyíbu mla ocabɔ olɔhi ku ayinɛ nōo yɔ ipu ujɔ a. Ó lɔfu da iyi nu ɔka kahinii: ‘Aōmiya nɛ um gē ya a mafu ku um wɛ ɔcɛ o jikoko ipu ɛlā ku Ɔwɔico klla gē lɛ ojilima ce ācɛ ɔhá? Ɔwɛ nɛ um gē ya ifa a gē ya kóō tɔɔtɛ lɛ ācɛ ɔhá fiyaa ō kpɔtuce ku um wɛ ɔcɛ nōo gē gba Ɔwɔico ɛ̄gbā?’ (1 Ukɔ́r. 10:​31-33; Utáy. 2:6) Ɔyinɛ nɔnyilɔ nōo gē gbɛla lɔɔlɔhi gbɔbu ɛɛ kóō ya odee, i gáā teyi olɔhi ku ayinɛ nōo yɔ ipu ujɔ a foofunu ŋ, amáŋ ó géē teyi olɔhi ku Adā nu nōo yɔ ɔkpanco a duu.

8. Ɛgɛnyá nɛ ɔyinɛ nɔnyilɔ nōo wɛ ɛdrɔ lɔfu nwu ō wɛ ɔcɛ néē lɔtuce gla a?

⁸ Wɛ ɔcɛ néē lɔtuce gla. Ɔyinɛ nɔnyilɔ nōo wɛ ɛdrɔ néē lɔtuce gla, wɛ ɔcɛ nōo gē ya ɛjɛɛji uklɔ néē je lɛ ɔ a lɔɔlɔhi. (Ulúk. 16:10) Leyi yɛ ocabɔ ku Ujisɔsi. Ó ta uklɔ duuma néē je lɛ ɔ kóō ya a jejee ɛ ŋ. Ikɔkɔ ɔɔma, ó lɛ ɛjɛɛji uklɔ nɛ Ujehofa da ɔ kóō ya a ya, kwu eko nōo ya ɔɔma kóō le lɔnɔ naana. Ó yihɔtu ācɛ nɛhi—ofiyɛ duu ayikpo ku nu—klla cɛ ō kwu oyeeyi ku nu i gwɛɛya kwɛyi uwa. (Ujɔ́n. 13:1) Yɛce ɛnɛɛnɛ ocabɔ ku Ujisɔsi, cɛɛ ku a lɛ ɛjɛɛji uklɔ néē je gā uwɔ a ya. Ɔdaŋ ku á jé ɛgɛ nɛ a géē bi le yuklɔ duuma néē je gā uwɔ a ŋ, tu iyi uwɔ waajɛ ku a da ɔyinɛ duuma nōo jikoko ipu ɛlā ku Ɔwɔico a kóō ta uwɔ abɔ. A hii ceyitikwu ya ligii ɛgɛ nɛ a gbɛla ku anuɔ lɔfu ya gla a ŋ. (Uróm 12:11) Ikɔkɔ ɔɔma, ceyitikwu ku a lɛ ɛjɛɛji uklɔ néē je gā uwɔ a ya. Ya ɔ ‘ŋma ipu ɔtu ku uwɔ lɛ Ondu a nōó wɛ ō ya lɛ ācɛ ŋ ma.’ (Ukól. 3:23) Ó wɛ ɔkwɛyi ku á jila iyē ŋ, ohigbu ɔɔma, tu iyi uwɔ waajɛ ku a cɛ eko duuma nɛ a lɛ inyileyi ya.—Aíit. 11:2.

9. Ɔdiya nōó cɛgbá ku ɔyinɛ nɔnyilɔ nōo wɛ ɛdrɔ kóō lɛ uklɔ amāŋ odee nōo lɔfu ta ɔ abɔ nwu a?

⁹ O ya ɛɛ ku a kwu piya ɔcɛ o jikoko ipu ɛlā ku Ɔwɔico, a cɛgbá ō nwu auklɔ ocɛgbá ōhī. Ɛnyā géē ta uwɔ abɔ ō miyɛ uklɔ duuma néē je gā uwɔ ipu ujɔ, ō yuklɔ néē géē gbo ije gā uwɔ nɛ a lɔfu bi le ta iyi uwɔ mla apɔlɛ ku uwɔ abɔ, mla ō ya ku a lɛ ɛma olɔhi mla ācɛ ɔhá. Leyi yɛ ōhī ku aɛnɛɛnɛ uklɔ nyā.

10-11. Ɔdaŋ ku ɔyinɛ nɔnyilɔ nōo wɛ ɛdrɔ le nwu ō jé ō ta ɔkpá mla ō jé ɔkpá lɔɔlɔhi, ɛgɛnyá nɛ anu mla ujɔ a lɔfu lɛ itene a? (Aíjē Kú Ɛ̄gbā 1:​1-3) (Má ifoto a.)

 ¹⁰ Nwu ō jé ō jé ɔkpá mla ō ta ɔkpá lɔɔlɔhi. Ubáyíbu ka ka ɔcɛ nōo gē ya lɔhi klla gē lɛ eeye ipu oyeeyi ku nu, wɛ ɔcɛ nōo gē jé Ɛlā ku Ɔwɔico ɛ̄cī doodu klla gē gbɛla lipu lipu tu ɛlā nɛ ó jé a. (Jé Aíjē Kú Ɛ̄gbā 1:​1-3.) Oŋma lɛ ō klɔcɛ ku Ubáyíbu ɛ̄cī doodu, ó géē wa i jé ɛgɛ nɛ Ujehofa gē gbɛla a. Ɛnyā kē géē ta ɔ abɔ kóō nwu ɛgɛ nɛ ó géē bi aɛlā nɛ ó jé ŋma ipu Ubáyíbu a le yuklɔ lɔɔlɔhi. (Aíit. 1:​3, 4) É cɛgbá acɛnyilɔ ɛgɛnyā ipu ujɔ. Ɔdiya a?

¹¹ Ayinɛ alɔ cɛgbá ācɛ nōo géē nwu uwa ɛlā klla tu uwa ukɔ́ ŋma ipu Ubáyíbu. (Utáy. 1:9) Ohigbu ɛnyā, ɔdaŋ ku a jé ō jé ɔkpá mla ō ta ɔkpá lɔɔlɔhi, ó géē ta uwɔ abɔ ō ya otutu ku ɛnɛɛnɛ ɛlā ō ka tɛɛcɛ mla ōhī ō ta, nōo géē ta ayinɛ abɔ klla ya ku ɔtu okpoce ku uwa kóō lɔfu. Ó klla géē tɔɔtɛ gā uwɔ ō ta aɛnɛɛnɛ ɛlā ōhī taajɛ nōo géē ta uwɔ abɔ eko nɛ a yɔ i ya oklɔcɛ, eko nɛ a yɔ i jahɔ tu aɛlā ō ka tɛɛcɛ ipu ujɔ, eko nɛ a yɔ ojileyi, mla ojileyi nɛhi ku alɔ. Ɔkpá nɛ a ta taajɛ nyā géē ta uwɔ abɔ ya ku ɔtu okpoce ku uwɔ kóō lɔfu, mla ō ta ācɛ ɔhá ɔtu kwu ɔtu.

12. Ɔdi gáā ta uwɔ abɔ ō je piya ɔcɛ nōo jé ō kɛla mla ācɛ lɔɔlɔhi a?

¹² Nwu ō jé ō kɛla mla ācɛ lɔɔlɔhi. Ɔyinɛ nɔnyilɔ nōo wɛ Ɔcɛ O Yɛce Ukraist cɛgbá ō nwu piii, ō wɛ ɔcɛ nōo jé ō kɛla mla ācɛ lɔɔlɔhi. Ɛyi ɛnyā wɛ ka ó géē wɛ ɔcɛ nōo gē jahɔ lɔɔlɔhi, nōo klla gē jɛyi ɛlā mla ɛgɛ nɛ ɔtu gē ya ācɛ ɔhá lɛ a. (Aíit. 20:5) Ó lɔfu nwu ō jé eko nɛ ɔcɛ gē kɛla ipu icɔnu amāŋ eeye, oŋma lɛ ɛgɛ nɛ ɔcɛ ɔɔma gē ya eyī, mla ɔwɛ nɛ ó gē ya ɔkpiye lɛ a. Ó gáā tɔɔtɛ gā uwɔ ō ya ɛnyā gla, ɔdaŋ ku á gē bi eko alɛwa le ya ɔ mla ācɛ ŋ. Ɔdaŋ ku a gē bi ɔdā ō le gwo uwaya le yuklɔ eko doodu ō ta umail amāŋ umɛseji ɛhɔ fu ācɛ, ó lɔfu lɔnɔ tu uwɔ ō kɛla mla ācɛ eyī caa. Ohigbu ɛnyā, dɔka ɔwɛ nɛ a lɔfu kɛla mla ācɛ eyī caa.—2 Ujɔ́n. 12.

13. Ɔdā ɔhá nyá nɛ ɔyinɛ nɔnyilɔ nōo wɛ ɛdrɔ lɔfu nwu piii a? (1 Utímōti 5:8) (Má ifoto a.)

¹³ Nwu ō ta iyi uwɔ abɔ. Ɔyinɛ nɔnyilɔ nōo jikoko ipu ɛlā ku Ɔwɔico, wɛ ɔcɛ nōó gē tɔɔtɛ lɛ ɔ ō ta iyi nu mla ācɛ apɔlɛ ku nu abɔ. (Jé 1 Utímōti 5:8.) Ipu éwo ōhī, ayinɛ nɔnyilɔ nōo wɛ ɛdrɔ gē nwu uklɔ ŋma ɛgiyi adā uwa amāŋ ācɛ apɔlɛ ku uwa. Amáŋ ó kē lɛ ipu éwo ōhī nɛ ayinɛ nɔnyilɔ nōo wɛ ɛdrɔ a, cɛgbá ō nwu ɛdɔ uklɔ ōhī nōo géē ta uwa abɔ ipu inɔkpa ku uwa. Ɛgɛ duuma nɛ āhɔ̄ a kóō lɛ naana, ó cɛgbá eko doodu ō nwu odee nōo géē ta uwɔ abɔ ō lɛ uklɔ. (Ācot. 18:​2, 3; 20:34; Āfi. 4:28) Ceyitikwu ō wɛ ɔcɛ nōo gē yuklɔ lɔfu lɔfu, nōo klla gē yuklɔ néē je gā uwɔ a kwɛyi. Ācɛ alɛwa gē yɔ i má ɔdā nɛ a gē ya ɔɔma, ɛnyā kē géē ya ku uklɔ ku uwɔ kóō he uwa ɔtu nɛɛnɛhi. Ɔdaŋ ku a ya lɛ a, ó lɛ aafu ŋ, a géē lɛ uklɔ  nōo géē gɔbu yɔ i ta uwɔ abɔ. Aɛnɛɛnɛ uce ō ya mla auklɔ nɛ alɔ kɛla lɛyikwu ɔ nyā, cɛgbá nɛɛnɛhi nōo lɔfu ta ɔyinɛ nɔnyilɔ nōo wɛ Ɔcɛ O Yɛce Ukraist abɔ, o ya ɛɛ kóō lɛ auklɔ ɔhá nɛ ó lɔfu lɛ ɛcɔbu a ya jila. Babanya, alɔ leyi yɛ auklɔ ōhī nyā.

14. Ɛgɛnyá nɛ ɔyinɛ nɔnyilɔ nōo wɛ ɛdrɔ lɔfu tutu ō kwu piya ɔcɛ o yuklɔ lɛ Ujehofa eko doodu a?

¹⁴ Ō je piya ɔcɛ o yuklɔ lɛ Ujehofa eko doodu. Alɛwa ku ayinɛ alɔ nɔnyilɔ nōo wɛ Ācɛ O Yɛce Ukraist a, gbɔɔ uklɔ ō ya lɛ Ujehofa eko doodu eko néē wɛ ɛdrɔ a. Uklɔ ku ɔcɛ o gbɔbu ɔna ō ta gē ta ɔyinɛ nɔnyilɔ nōo wɛ ɛdrɔ abɔ ō nwu ō yuklɔ mla ɛdɔ ku ācɛ ɛyɛɛyɛyi lɔɔlɔhi. Ó klla gē ta ɔ abɔ ō ŋmo ije ku nu ɔwɛ ijeeyi, nɛ ó gáā ŋmo fiyɛ ɔdā nɛ ó lɛ a ŋ. (Ufíl. 4:​11-13) Ɔwɛ ɛnɛɛnɛ ō gbɔɔ uklɔ ō ya lɛ Ujehofa eko doodu, wɛ ō gbɔɔ uklɔ ku ɔcɛ o gbɔbu ɔna ō ta ŋma eko teeko. Ācɛ alɛwa gē yuklɔ ku ɔcɛ o gbɔbu ɔna ō ta ŋma eko teeko, nōo gē ta uwa abɔ kéē le tutu ō gbɔɔ uklɔ ku ɔcɛ o gbɔbu ɔna ō ta eko doodu. Ɔdaŋ ka é gbɔɔ uklɔ ku ɔcɛ o gbɔbu ɔna ō ta eko doodu, é lɔfu hi uwa igwú wa aya ɛyɛɛyɛyi ku uklɔ ō ya lɛ Ujehofa eko doodu, bɛɛka uklɔ ku ɔlɛ ō gwo amāŋ uklɔ ku Ubɛtɛlu.

15-16. Ɔdi gáā ta ɔyinɛ nɔnyilɔ nōo wɛ ɛdrɔ abɔ kóō le cika jɛ ō kwu piya ɔcɛ o ta anyakwɔcɛ ku ujɔ abɔ amāŋ ɔnyakwɔcɛ ku ujɔ a?

¹⁵ Ō je piya ɔcɛ o ta anyakwɔcɛ ku ujɔ abɔ amāŋ ɔnyakwɔcɛ ku ujɔ. Ɛjɛɛji ayinɛ nɔnyilɔ cɛgbá ō lɛ ɔ ya ōmiya ku uwa kéē lɛ cika jɛ ō kwu piya anyakwɔcɛ ku ujɔ, o ya ɛɛ kéē cɛ ayinɛ uwa ɛhɔ ipu ujɔ. Ubáyíbu ka acɛnyilɔ nōo gē ceyitikwu kéē le cika jɛ lɛ ɛdɔ uklɔ nyā, ka “úklɔ́ olɔhi [néē] dɔɔ̄kā á.” (1 Utím. 3:1) Gbɔbu ɛɛ kóō je piya ɔnyakwɔcɛ ku ujɔ, ɔyinɛ nɔnyilɔ géē cika jɛ ō je piya ɔcɛ o ta anyakwɔcɛ ku ujɔ abɔ piii. Ācɛ o ta anyakwɔcɛ ku ujɔ abɔ gē ta anyakwɔcɛ ku ujɔ abɔ ɔwɛ ocɛgbá alɛwa. Anyakwɔcɛ ku ujɔ mla ācɛ o ta anyakwɔcɛ ku ujɔ abɔ, gē tu iyi uwa waajɛ ō cɛ ayinɛ uwa ɛhɔ, klla gē yuklɔ lɔfu lɔfu ipu uklɔ ku ɔna ō ta a. Ayinɛ nɔnyilɔ nōo wɛ ɛdrɔ kóō lɔfu cika jɛ ō je piya ācɛ o ta anyakwɔcɛ ku ujɔ abɔ, ɔdaŋ néē kóō faajɛ ihayi ofu ɛ ŋ naana. É lɔfu je ɔcɛ o ta anyakwɔcɛ ku ujɔ abɔ nōo le cika jɛ piya ɔnyakwɔcɛ ku ujɔ gla, ɔdaŋ nɛ ó kóō wɛ ihayi ofu foofunu amāŋ fiyɛ.

¹⁶ Ɛgɛnyá nɛ a gáā lɔfu lɛ aɛnɛɛnɛ uce ō ya, o ya ɛɛ ku a le cika jɛ ō kwu piya ɔcɛ o ta anyakwɔcɛ ku ujɔ abɔ amāŋ ɔnyakwɔcɛ ku ujɔ a? Ubáyíbu kɛla lɛyikwu aɛnɛɛnɛ uce ō ya nɛ a cɛgbá ō lɛ a. Amáŋ bla, ka ɛjɛɛji auce ō ya nyā gbolo ce ɛlā nōo yɔ ipu Ubáyíbu, ihɔtu nɛ a lɛ lɛ Ujehofa, ācɛ apɔlɛ ku uwɔ, mla ujɔ a. (1 Utím. 3:​1-13; Utáy. 1:​6-9; 1 Upít. 5:​2, 3) Ceyitikwu ku a jɛyi ku eyeeye ku auce ō ya nōo géē ta uwɔ abɔ ō le cika jɛ a. Gbɔɔkɔ lɛ Ujehofa kóō ta uwɔ abɔ ku a lɛ auce ō ya ɔɔma lɛ. c

17. Ɔdi lɔfu ta ɔyinɛ nɔnyilɔ nōo wɛ ɛdrɔ abɔ kóō tutu taajɛ ō je piya ɔba amāŋ otrɛyi ku apɔlɛ olɔhi a? (Má ifoto a.)

 ¹⁷ Ō je piya ɔba mla otrɛyi ku apɔlɛ. Ɛgɛ nɛ Ujisɔsi ka a, ayinɛ nɔnyilɔ ōhī nōo jikoko ipu ɛlā ku Ɔwɔico a i lɛ ɔnyā. (Umát. 19:12) Amáŋ ɔdaŋ ku a le miya ō lɛ ɔnyā, a klla géē lɛ uklɔ ɔhá ō je piya ɔba mla otrɛyi ku apɔlɛ. (1 Ukɔ́r. 11:3) Ujehofa dɔka ku ɔba kóō yihɔtu ɔnyā nu, ō ya ɛgbá ku nu, ō je piya ɛnɛɛnɛ ɔkpa ku nu, mla ō ta ɔ abɔ kóō yɔ kwu ɔ ajaajɛ. (Āfi. 5:​28, 29) Aɛnɛɛnɛ uce ō ya mla auklɔ nɛ alɔ kɛla lɛyikwu ɔ ipu ikpɛyi ɛlā nyā ɛ ma, bɛɛka ō gbɛla lɔɔlɔhi, ō lɛ ojilima ce acɛnya, ō wɛ ɔcɛ néē lɔtuce gla, géē ta uwɔ abɔ ō je piya ɔba olɔhi. A klla géē le tutu lɔɔlɔhi ō ya auklɔ nɛ a lɛ ō wɛ ɔba mla otrɛyi ku apɔlɛ a.

18. Ɛgɛnyá nɛ ɔyinɛ nɔnyilɔ nōo wɛ ɛdrɔ lɔfu ya otutu taajɛ ō je piya adā olɔhi a?

¹⁸ Ō je piya adā. Igbihi nɛ a kwu ɔnyā u lɛ, a lɔfu je piya adā. Ɔdi nɛ a lɔfu nwu ŋma ocabɔ ku Ujehofa ō je piya adā olɔhi a? Ó lɛ aɛlā ō nwu alɛwa. (Āfi. 6:4) Ujehofa da Ɔyinɔnyilɔ ku nu nōo wɛ Ujisɔsi a, ka anuɔ yihɔtu ku nu, ka ɛlā ku nu klla he anuɔ ɔtu nɛhi. (Umát. 3:17) Eko nɛ a kwu piya adā, le má ku a gē da ayipɛ ɔlɛ uwɔ eko doodu ka yihɔtu ku uwa. Bēē cɛtra uwa eko doodu ku aɔdā olɔhi néē gē ya a. Aadā nōo gē yɛce ocabɔ ku Ujehofa gē ta ayipɛ ɔlɛ uwa abɔ, kéē kwu piya acɛnyilɔ mla acɛnya nōo jikoko ipu ɛlā ku Ɔwɔico. A lɔfu nwu babanya ō kwu piya adā olɔhi, oŋma lɛ ō mafu ihɔtu lɛ ācɛ apɔlɛ ku uwɔ mla ayinɛ nōo yɔ ipu ujɔ a, mla ō leyikwu uwa lɔɔlɔhi. A klla cika ō nwu ō da uwa ku a yihɔtu ku uwa ka é klla cɛgbá gā uwɔ nɛhi. (Ujɔ́n. 15:9) Ɛnyā géē ta uwɔ abɔ ō kwu piya ɔba mla adā olɔhi ɛcɔbu. Amáŋ jaa gbeeko ɔɔma, a géē wɛ ɔcɛ o cɛgbá nɛhi lɛ Ujehofa, klla géē wɛ otabɔ lɛ ācɛ apɔlɛ ku uwɔ mla ujɔ a.

19-20. Ɔdi gáā ta ɔyinɛ nɔnyilɔ nōo wɛ ɛdrɔ abɔ ō kwu piya ɔcɛ o jikoko ipu ɛlā ku Ɔwɔico a? (Má ifoto nōo yɔ iyɔbu ku Ɔda Ō Gbaajɛ nyā a.)

¹⁹ Ayinɛ nɔnyilɔ nōo wɛ ɛdrɔ, ó géē cɛgbá oceyitikwu lɔfu lɔfu gbɔbu ɛɛ ku aa je piya ācɛ o jikoko ipu ɛlā ku Ɔwɔico. Aa géē cɛgbá ō fu aocabɔ olɔhi nɛ aa géē yɛce, ō nwu ō jé ō gbɛla lɔɔlɔhi, ō wɛ ācɛ néē lɔtuce gla, ō nwu uklɔ amāŋ odee nōo géē ta aa abɔ ipu oyeeyi ku aa, mla ō ya otutu lɛyikwu auklɔ nɛ aa lɔfu lɛ ɛcɔbu a.

²⁰ Ekoohi, ɔdaŋ ku aa gbɛla lɛyikwu auklɔ nɛ aa lɛ ō ya ɛcɔbu a, ɔtu lɔfu ya aa bɛɛka ó le lɔnɔ nɛhi a. Amáŋ aa ya ɔ gla. Bla, ka Ujehofa le tutu eko doodu ō ta aa abɔ. (Ayis. 41:​10, 13) Ku ɛla ɔkwɛyi a, ayinɛ ipu ujɔ géē ta aa abɔ duu. Eko nɛ aa kwu piya ɛdɔ acɛnyilɔ nɛ Ujehofa dɔka ku aa wɛ a, aa géē jɔɔnyɛ oyeeyi ku aa nɛhi. Ayinɛ alɔ nɔnyilɔ nōo wɛ ɛdrɔ, alɔ yihɔtu ku aa nɛhi! Ujehofa kóō hɔha ce aa nɛɛnɛhi abɔ aa yɔ i ceyitikwu ō kwu piya acɛnyilɔ nōo jikoko ipu ɛlā ku Ɔwɔico a.—Aíit. 22:4.