Ó LƐ aafu ŋ, a gē jɔɔnyɛ aɛhi ɛyɛɛyɛyi nɛ Ujehofa je gā uwɔ a, ó kē jɛ uwɔ eyī nɛhi ɛgɛ nɛ Ujehofa jɛga gā uwɔ ō fu ɛgɛ nɛ a géē bi le jɔɔnyɛ ku aɛhi nyā a. Ɛgɛ nɛ Ubáyíbu ka a, ejé wɛ ɛhi ŋma ɛgiyi Ɔwɔico. Ubáyíbu da alɔ kahinii: “Ucɛ ō lé gē cɛ̄ lɛ ɔ̄cɛ ī gwéeyē ī yɛhɛ. Ejé ō gwá kē í je éeyē lɛ ɔ̄cɛ.” (Ɔ̄cok. 10:19; Aíjē 104:15) Amáŋ naana kpɔ a, a lɔfu má ɛ ka ó lɛ ācɛ alɛwa nōo gē lɛ unwalu mla ejé olɔfu ō gwa. Ācɛ ŋma éwo ɛyɛɛyɛyi klla lɛ ɔwɛ néē gē leyi má ejé olɔfu ō gwa. Ó lɛ a, ɔdi lɔfu ta Ɔcɛ O Yɛce Ukraist abɔ kóō ya ōmiya olɔhi lɛyikwu ejé olɔfu ō gwa a?

Eko duuma nɛ alɔ gē ya ōmiya, alɔ gbolo ce ukɔ́ ku Ɔwɔico, ó wɛ ɔdā nɛ ācɛ nōo yɛ jila alɔ ta a gē gbɛla a ŋ. Oŋma lɛ ō ya ɛgɛnyā, alɔ géē lɛ eeye ipu oyeeyi ku alɔ.

Ɛgɛ nɛ a lɔfu má ɛ ma, ācɛ alɛwa ipu ɛcɛ gē gwa ejé olɔfu eko doodu klla gē gwa ɔ fiyɛ ɔfu. Ācɛ alɛwa gē gwa ejé olɔfu ohigbu ka ó gē cɛ lɛ ɔtu ku uwa gbo nɛɛ. Ācɛ ōhī gē gwa ejé olɔfu ohigbu ka é dɔka ō junwalu lɛ iyi uwa ohigbu unwalu néē yɔ i má a ŋ. Ó kē lɛ aɛga ōhī nɛ ācɛ gē gbɛla ka ɔcɛ nōo gē gwa ejé olɔfu nwune, wɛ ɔcɛ o jikoko klla lɔfu iyē.

Amáŋ Ācɛ O Yɛce Ukraist lɛ ɛnɛɛnɛ ukɔ́ ku ijeeyi ŋma ɛgiyi ɔcɛ nōo ya uwa a. Ocabɔ mafu, ó da alɔ lɛyikwu unwalu obɔbi nōo gē bɛɛcɛ ŋma ō gwa ejé olɔfu fiyɛ ɔfu a. Alɔ lɔfu jé ɔ̄kā nōo yɔ ipu ɔkpá ku Aíita 23:​29-35 nōo kɛla lipu lipu lɛyikwu ɔcɛ o gwa ejé olɔfu fiyɛ ɔfu, mla unwalu nōo bɛɛcɛ ŋma anu a. a Daniel nōo wɛ ɔnyakwɔcɛ ku ujɔ nōo yɔ Europe a, blatu ɛgɛ nɛ oyeeyi ku nu lɛ gbɔbu ɛɛ nɛ ó gáā jé Ujehofa klla gbɔɔ ō bi aukɔ́ ku nu le yuklɔ a. Ó kahinii: “Gbɔbu a, n gē gwa ejé olɔfu nɛɛnɛhi, ɛnyā kē cɛ gā um gē ya aōmiya obɔbi. Ohigbu ɛnyā n má unwalu alɛwa, ɛnyā gē ya ku ɔtu kóō biya gā um jaa kwu obabanya, eko duuma nɛ um gbɛla lɛyikwu uwa.”

Ɛgɛnyá nɛ alɔ gáā ya ōmiya ku ijeeyi lɛyikwu ejé olɔfu ō gwa fiyɛ ɔfu, cɛɛ ku alɔ le kwu ŋma unwalu nōo ta ɔ ɔkwu a? Alɔ cɛgbá ō jɛga lɛ ɛlá ō gbo ku Ɔwɔico, kóō lɛ abɔ kwu ōmiya nɛ alɔ gē ya mla uce ō ya ku alɔ.

Alɔ leyi yɛ ɛlā nɛ Ubáyíbu ka lɛyikwu ejé olɔfu ō gwa, mla ɔdā nōo ya ɛɛ nɛ ācɛ ōhī gē gwa ejé olɔfu a.

Ubáyíbu i ŋmo ejé olɔfu ō gwa ɛpɔbi nóó. Ku ɛlā ɔkwɛyi a, Ubáyíbu da alɔ ka ejé ō gwa gē cɛ lɛ ɔcɛ gweeye. Ubáyíbu da alɔ kahinii: “Nyɔ̄, ká ā lé ɔdōlé kú uwɔ mla ɔtū nɛ̄hɛ́, ká ā gwá ejé kú uwɔ mla éeyē.” (Ɔ̄cok. 9:7) Ó lɛ ekoohi nɛ Ujisɔsi gwa ejé, ɛgɔɔma nōó kē lɛ mla ācɛ ɔhá nōo hayi kpaakpa lɛ Ujehofa eko ikee a duu a.—Umát. 26:​27-29; Ulúk. 7:34; 1 Utím. 5:23.

Naana nɛ Ubáyíbu i ŋmo ejé ō gwa ɛpɔbi ŋ ma, ó lɛ ō gwa fiyɛ ɔfu ŋmo ɛpɔbi. Ubáyíbu lɛ ɔ teyi peee kahinii: “Aá cɛ̄ kú ejé kóō kwú aá ŋ́.” (Āfi. 5:18) Ubáyíbu klla ka kpɔ kahinii: “Ācogwéjé nɛ̄ɛ̄nɛ̄hi ā . . . í gáā lúgwū kú ajɔ̄ɔ̄cɛ́ kú Ɔwɔicō glá ŋ́.” (1 Ukɔ́r. 6:10) Ku ɛlā ɔkwɛyi a, Ubáyíbu ŋmo ejé olɔfu ō gwa fiyɛ ɔfu ɛpɔbi nɛɛnɛhi. Ohigbu ɔɔma, ikɔkɔ nɛ alɔ géē yɛce ocabɔ ku ɔdā nɛ ācɛ nōo yɛ jila alɔ ta a gē ya a, alɔ cika ō ya ōmiya ku alɔ ɔwɛ nōo géē cɛ lɛ ɔtu he Ɔwɔico.

Ācɛ ōhī lɔfu gbɛla ka é lɔfu gwa ejé olɔfu nɛɛnɛhi nōó gáa kwu uwa gla ŋ. Amáŋ, ɔɔma wɛ ɔdobɔbi nɛhi. Ubáyíbu lɛ ɔ teyi peee ka ɔcɛ duuma nōo kwu piya “ɔfiyɛ” ku ejé, ó lɔfu ya inyileyi bɔbi bɔbi nōo lɔfu biya ɛma nōó lɛ mla Ujehofa a. (Utáy. 2:3; Aíit. 20:1) Ujisɔsi klla pi alɔ ahɔ̄ duu, kóō “yɔ̄ ī gwá ejé fiyɛ ɔ fu” lɔfu ci ɔcɛ ŋmo gā ɛcɛ ɛyipɛ ku Ɔwɔico a. (Ulúk. 21:​34-36) Ó lɛ a, ɔdi lɔfu ta Ɔcɛ O Yɛce  Ukraist abɔ kóō kwu ŋma unwalu nōo gē wa ohigbu ejé olɔfu ō gwa fiyɛ ɔfu a?

Eko duuma nɛ alɔ yɔ i ya ōmiya lɛyikwu ō gwa ejé olɔfu, ó géē wɛ ɔdobɔbi ō leyi má ɔ ɛgɛ nɛ ācɛ nōo yɛ jila alɔ ta a gē leyi má ɔ a. Ācɛ O Yɛce Ukraist gē bi ijeeyi le ya ɔdā nōo he Ujehofa ɔtu, eko duuma nōó gā aya ku ɔdole mla ejé ō gwa. Ubáyíbu ta alɔ ɛlá kwu ɔ kahinii: “Ɔdā dúú nɛ̄ aá ī yá, ka aá lé ɔdōlé ámāŋ gwá ɔdā dóódu, aá yá ɔ̄ cɛ́ɛ́ kú ācɛ kéē cɛ̄tra Ɔwɔicō.” (1 Ukɔ́r. 10:31) Má aɔka mla aukɔ́ ku Ubáyíbu ōhī nɛ alɔ lɔfu leyi yɛ ɔ a:

N gē gwa ejé olɔfu o ya ɛɛ ku ācɛ ɔhá kóō hii ŋmo um okonu ŋ? Ɔkpá ku Oōyɛbɛ̄ɛcɛ 23:2 da alɔ kahinii: ‘A hii yɛce ɛwa ya ɔdā néē gē ya ŋ.’ Ipu ɛga ku Ubáyíbu nyā, Ujehofa yɔ i pi ācɛ ku Isrɛlu ahɔ̄ kéē hii yɛce ācɛ nōo gē ya ɔdā nōo gē kwu ɔ iyē a ŋ. Ukɔ́ nyā cɛgbá lɛ Ācɛ O Yɛce Ukraist icɛ duu. Ɔdaŋ ku alɔ jɛga lɛ ācɛ kéē lɛ abɔ kwu ɛlá ō gbo mla ōmiya ku alɔ lɛyikwu ejé olɔfu ō gwa, ɛmɛɛma alɔ géē gbɔɔ ō lɛ abɔ ci ɔwɛ nɛ Ujehofa dɔka ku alɔ lā oyeeyi ku alɔ a, cɛɛ ɛma nɛ alɔ lɛ mla ɔ a hɛ alɔ abɔ.—Uróm 12:2.

N gē gwa ejé olɔfu o ya ɛɛ ku ācɛ kéē gbɛla ku um wɛ ɔcɛ olɔfu? Ipu uculo ōhī, é gē leyi má ejé olɔfu ō gwa eko doodu mla ō gwa nwune ka ɔdā okpaakpa. (1 Upít. 4:3) Amáŋ, leyi bi ɛlā nɛ ɔkpá ku 1 Ācɛ Ukɔ́rīnti 16:13 ta alɔ ɔtu kwu ɔtu ō ya a. Ó kahinii: “Aá leyī kwɛcɛ, aá háyi lɔfú ipú ɔtōōce Ɔwɔicō kú aá, aá kóō lɔtū, aá lɔfú tīiyē.” Ejé olɔfu ō gwa fiyɛ ɔfu lɔfu ta ɔcɛ abɔ hayi lɔfu ipu ɔtu ō ce Ɔwɔico ɔkwɔɔkwɛyi gla a? Ehee, ó tɔɔtɛ gla ŋ. Ejé olɔfu ō gwa fiyɛ ɔfu lɔfu ya ku alɔ hii gbɛla lɔɔlɔhi amāŋ ya ōmiya olɔhi gla ŋ. Ohigbu ɛnyā, ō gwa ejé olɔfu fiyɛ ɔfu i mafu ka ɔcɛ wɛ ɔcɛ olɔfu ŋ. Ikɔkɔ ɔɔma, ó gē mafu ka ɔcɛ ɔɔma wɛ olila. Ɔkpá ku Ayisáya 28:7 kɛla lɛyikwu uce ō ya ku ɔcɛ nɛ ejé lɛ ɔ kwu, ka ɔcɛ nōó gē ya ōmiya olɔhi ŋ, klla gē yɛ gā ɔwɛ gā ací bɛɛka olila a.

Ɔfu nɛ alɔ cɛgbá o ya ɛɛ ku alɔ yɔ i ya ɔdā okpaakpa a gē wa ŋma ɛgiyi Ujehofa, ó kē ‘cɛgbá ku alɔ leyi kwɛɛcɛ klla hayi lɔfu ipu ɔtu okpoce.’ (Aíjē 18:32) Alɔ kē i ya ɛnyā oŋma lɛ ō leyi kwɛɛcɛ lɔɔlɔhi, o ya ɛɛ ku alɔ gā ipu unwalu amāŋ ya ōmiya duuma nōo géē biya ɛma ku alɔ mla Ujehofa ŋ. Ujisɔsi lɛ ɛma olɔfu mla Ujehofa, ɛnyā kē ya ku ācɛ alɛwa kéē lɛ ojilima ce ɔ, ohigbu ka ó wɛ ɔcɛ o lɛ ɔtu klla lɛ ɔtu ya ekponu ō ya ɔdā okpaakpa a.

 N gē gwa ejé olɔfu o ya ɛɛ ku um junwalu lɛ iyi um lɛyikwu aunwalu ku um? Ɔcɛ éyi nōo ta ɔkpá ku Aíjē Kú Ɛ̄gbā a kahinii: “Eko dúú nɛ̄ ɛlā kú ɔdā dúúmā le kwú um iyē, [awɔ Ujehofa] gē tá um ɔtū lé, klla ī cɛ̄ lɛ ɔtū gē he um.” (Aíjē 94:19) Ɔdaŋ ku a yɔ i junwalu lɛ iyi uwɔ lɛyikwu ɔdā duuma, gbolo ce Ujehofa kóō ta uwɔ abɔ, ó wɛ ejé olɔfu ō gwa fiyɛ ɔfu ŋ. Ɔwɛ olɔhi fiyɛ duu nōo géē ta uwɔ abɔ, o ya ɛɛ ku a hii junwalu lɛ iyi uwɔ lɛyikwu unwalu ku uwɔ fiyɛ ɔfu ŋ ma, wɛ ō yɔ i gbɔɔkɔ lɛ Ujehofa eko doodu. Ācɛ alɛwa klla gáā le má ɛ, ka ō dɔka ukɔ́ ŋma ɛgiyi ɔkpa ku uwa nōo jikoko ipu ujɔ lɔfu ta uwa abɔ nɛhi. Ku ɛlā ɔkwɛyi a, ō gwa ejé olɔfu fiyɛ ɔfu o ya ɛɛ ku a lɔtu unwalu ku uwɔ, lɔfu ya ku ɔcɛ kóō hii lɛ ɔtu caca ō ya ɔdā okpaakpa ŋ. (Uhos. 4:11) Daniel nɛ alɔ kɛla lɛyikwu ɔ gbɔbu a kahinii: “N gē nya mla ɔtooplico mla ɔtu nōo gē ŋmo um ɛpɔbi fiyɛ ɔfu a. Ohigbu ɔɔma, n gē gwa ejé olɔfu fiyɛ ɔfu o ya ɛɛ ku um hii junwalu lɛ iyi um lɛyikwu unwalu ku um. Naana kpɔ a, ɛnyā klla gē bi um gā ipu unwalu alɛwa. Ohigbu ɔɔma, ń lɛ aɔkpa mla ojilima gɛ ŋ.” Ɔdi ta u Daniel abɔ a? Ó kahinii: “N gáā le má ka um cɛgbá ō gbolo ce Ujehofa, ó wɛ ejé olɔfu ō gwa fiyɛ ɔfu ŋ. Abɔ um lɛ ɛnyā ya a, ó le tɔɔtɛ gā um ō lɔtu unwalu ku um klla lɛ uwa yale.” Ɔkwɛyi a wɛ kahinii, Ujehofa le tutu eko doodu ō ta alɔ abɔ, kwu eko nōó kóō ya alɔ bɛɛka alɔ i gáā má otabɔ duuma ipu āhɔ̄ ku alɔ gla gɛ ŋ ma.—Ufíl. 4:​6, 7; 1 Upít. 5:7.

Ɔdaŋ ku a gē gwa ejé olɔfu, a lɔfu bi aɔka nōo ba nyā le jila iyi uwɔ má, o ya ɛɛ ku a má ɛga nɛ a lɔfu ya lɔhi fiyɛ lɛyikwu igbo ɛmula nɛ a géē gwa, mla ɛji nɛ a géē gwa gáā kwu a. Da iyi uwɔ ɔka kahinii: ‘Ɔcɛ apɔlɛ amāŋ ɔkpa ku um nōo kwu um ajaajɛ ka ɛgɛ nɛ ɔtu ya uwa lɛ lɛyikwu ɛgɛ nɛ um gē bi le gwa ejé a ɛ?’ Ɔdaŋ ka ó lɛ a, ɛnyā mafu ku a lɛ uce ō ya amāŋ unwalu éyi nɛ a jé lɛyikwu ɔ ŋ. ‘N gē gwa ejé babanya fiyɛ ɛgɛ nɛ um gē gwa gbɔbu a?’ Ɛnyā lɔfu lɛ ō ya mla āhɔ̄ ku ɔcɛ nōó lɔfu gbɔɔ ō gwa ejé fiyɛ ɔfu ɛ ŋ, amáŋ yɔ i gā ipu nu ɛmɛɛma. ‘Ó gē lɔnɔ tu um ō hii gwa ejé olɔfu ŋ ɛ̄cī ōhī?’ Ɔdaŋ ka ó lɛ a, ayika ejé olɔfu ō gwa fiyɛ ɔfu kwu piya uce ō ya ku uwɔ amāŋ kwu jé uwɔ iyē nɛɛnɛhi ɛ. Ɔdaŋ ka ó lɛ a, ó lɛ aafu ŋ, ayika géē cɛgbá ɛnɛɛnɛ otabɔ ō le bɛɛcɛ ŋma ipu unwalu ɔɔma.

Ohigbu ka ejé olɔfu ō gwa lɔfu bi unwalu alɛwa wa a, Ācɛ O Yɛce Ukraist ōhī le miya ku aa i gáā  gwa ejé olɔfu fluflu ŋ. Ācɛ ōhī le miya ku aa i gáā gwa ejé olɔfu ŋ, ohigbu ka é dɔka ɛgɛ nōó gē ya uwa lɛ ipu okonu a ŋ. Ɔdaŋ ka ɔkpa ku uwɔ duuma lɛ ōmiya ɛgɛnyā ya, a lɔfu mafu uce ō gbonɛnɛ lɛ ɔ, ŋma lɛ ō lɛ ojilima ce ōmiya nɛ ó ya a, nɛ á gáā ŋmo ɔ okonu ŋ.

Á jé ŋ, a gáā le má ɛ, ka ó géē wɛ ɔdā ijeeyi ō lɛ ɛji tu lɛ iyi uwɔ lɛyikwu ɛgɛ nɛ a géē gwa ejé olɔfu gáā kwu a. Á jé ŋ, igbo éyi ipu alaadi amāŋ ō gwa ligii eko nɛ a lɛ ɔdole lé. Ācɛ ōhī kē lɛ ɛji tu lɛ iyi uwa lɛyikwu ɛdɔ ejé olɔfu néē géē gwa a, bɛɛka ō gwa ejé olɔfu ligii néē gáā gwa ɛ̄nɛ̄ o lɔfu nɛɛnɛhi a ŋ, amāŋ ō lɛ ejé olɔfu piya tu ipu ejé olɔɔnyɛ, é gáā cɛ ō gwa ŋ. Ɔdaŋ ka ɔcɛ lɛ ɛji tu lɛ iyi nu lɔɔlɔhi ku ɛji ku ejé olɔfu nɛ ó géē gwa a, ó géē tɔɔtɛ lɛ ɔ fiyɛ ō yɛce ɔ. Ɔcɛ o jikoko ipu ɛlā ku Ɔwɔico i kē cika ō junwalu lɛ iyi nu lɛyikwu ɔdā nɛ ācɛ ɔhá lɔfu gbɛla lɛyikwu ɔ ohigbu ōmiya nɛ ó ya, mla ɛgɛ nɛ ó lɛ ɔtu ya ekponu ō lɛ ɔ tu a ŋ.

Eko nɛ alɔ yɔ i ya ōmiya ku ejé olɔfu ō gwa, alɔ cika ō gbɛla lɛyikwu ɛgɛ nɛ ɔtu gē ya ācɛ ɔhá lɛ a. Ɔkpá ku Ācɛ Uróm 14:21 kahinii: “Ɔdā nōo lɔhi ā wɛ ka aá lɛ iyī aá tū ŋmá o yɔ̄ ī lé ɔdōlé, yɔ̄ ī gwá ejé, ámāŋ ka o yɔ̄ ī yá ɔdā dúúmā nōo í yá kú ayínɛ́ aá kéē bīya íne kú Ɔwɔicō.” Ɛgɛnyá nɛ a lɔfu bi ukɔ́ nyā le yuklɔ a? Mafu ihɔtu lɛ ayinɛ uwɔ. Ɔdaŋ ku a gbɛla kóō gwa ejé olɔfu lɔfu ya ku ɔcɛ duuma kóō cɔnu, ihɔtu cika ō lɛ abɔ kwu uwɔ ɔtu ō ya ku a hii gwa ejé ipu āhɔ̄ ɔɔma ŋ. Ɔdaŋ ku a ya ɛnyā, a gē mafu ku a lɛ ojilima ce ācɛ, yihɔtu ku uwa, lɛ ɛlá wu uwa fiyɛ iyi uwɔ, mla ɛgɛ nɛ ɔtu gē ya uwa lɛ a.—1 Ukɔ́r. 10:24.

Ɔwɛ ɔhá kpɔ, aigɔmɛnti lɔfu lɛ íne kwaajɛ lɛyikwu ejé olɔfu ō gwa. Ku ɛlā ɔkwɛyi a, Ācɛ O Yɛce Ukraist géē lɛyitaajɛ lɛ aíne nyā. Aíne ɔɔma lɔfu ka ka ó lɛ ihayi nɛ ɔcɛ lɔfu fu piii gbɔbu ɛɛ kóō gwa ejé olɔfu. Amāŋ íne a lɔfu ci ɔcɛ ŋma ō gwa ejé olɔfu gbɔbu ɛɛ ku ɔcɛ kóō pɛ ɔdā okwinya, amāŋ ō bi engine duuma le yuklɔ.— Uróm 13:​1-5.

Ujehofa je ɛnɛɛnɛ ɛhi alɛwa lɛ alɔ. Éyi ku aɛhi nyā wɛ ɛga nɛ alɔ lɛ ō ya ōmiya abɔyi alɔ ɛgɛ nɛ alɔ géē bi aɛhi nyā le yuklɔ a. Ɛnyā kē lɛ ō ya mla ō fu ɔdā nɛ alɔ géē lé mla ɔdā nɛ alɔ géē gwa a. Alɔ mafu ku aɛhi nyā jɛ alɔ eyī, oŋma lɛ ō fu aɔdā nōo géē cɛ lɛ ɔtu he Adā alɔ nōo yɔ ɔkpanco a.