Ɔyikpo Upɔlu ta ɔkpá gē lɛ Utimoti nōo wɛ ɔnyakwɔcɛ ku ujɔ bɛɛka anu a. Ó kahinii: “N hi Ɔwɔicō mɛ́mla Ohɔ́nyɛtá Ujísɔsi mɛ́mla aálelékwū otɛ̄hɔ ā ijáalí kú ukɔ́ nɛ̄ n gáā tū uwɔ nyā a. N dɔɔ̄kā ká ā lɛ ukɔ́ ā tū ká ā híī yúufi eyī kú ɔ̄cɛ dúúmā ŋ́, ámāŋ́ ka o gwó ɔwɛ ce abɔ̄ éyi, ipú ɔda dúúmā nāa ī yá ā.”—1 Utím. 5:21.

O ya ɛɛ kóō ta alɔ abɔ ō jé ācɛ nɛ aalelekwu otɛhɔ nyā wɛ a, alɔ géē kɛla lɛyikwu aalelekwu otɛhɔ nōó wɛ ipu ígwu ku aalelekwu otɛhɔ nyā ŋ ma. Ó teyi peee ka aalelekwu otɛhɔ nōo wɛ ula ofigwahata (144,000) a, i wɛ ipu aalelekwu otɛhɔ nyā ŋ. Eko nɛ Upɔlu ta ɔkpá gē lɛ Utimoti a, ó lɛ oduuma ku ācɛ néē lɛ anɔ tu uwa ɛyi a néē je heyi ŋma ɔlekwu gā ɔkpanco ɛ ŋ. Ayikpo a mla ācɛ ɔhá néē lɛ anɔ tu uwa ɛyi a i je piya aalelekwu otɛhɔ ɛ ŋ, ohigbu ɛnyā, ó wɛ uwa wɛ “aálelékwū otɛ̄hɔ [néē fu]” néē yɔ i kɛla lɛyikwu ɔ a ŋ.—1 Ukɔ́r. 15:​50-54; 1 Utes. 4:​13-17; 1 Ujɔ́n. 3:2.

O ka tu ɔ, “aálelékwū otɛ̄hɔ [néē fu]” a, i wɛ aalelekwu otɛhɔ nōo ta ō lɛyitaajɛ lɛ Ujehofa eko nɛ Eŋkpɔ Ceenyi a ŋ. Aalelekwu otɛhɔ ɔɔma cɛ ō yɛce Usetan kwu piya aalelekwu obɔbi, é klla kwu piya olɛla ku Ujisɔsi. (Ohút. 6:2; Ulúk. 8:​30, 31; 2 Upít. 2:4) Ɛcɔbu, Ujisɔsi géē je uwa tɛcɔ gā ipu ɔgɔ nōó lɛ oŋmɛyi ŋ ɛga néē géē yɔ ipu ihayi ula ɛpa ce ofu igwo (1,000) a. Igbihi ɔɔma, é géē je ɛjɛɛji uwa yiifi tɔha mla Usetan.—Ujúd 6; Mafú 20:​1-3, 10.

Ohigbu ɛnyā, “aálelékwū otɛ̄hɔ [néē fu]” a, yɔ i kɛla lɛyikwu aalelekwu otɛhɔ nōo yɔ ɔkpanco nōo hayi kpaakpa lɛ “Ɔwɔicō mɛ́mla Ohɔ́nyɛtá Ujísɔsi” a.

Alɔ lɛ utajan alɛwa ku aalelekwu otɛhɔ nōo hayi kpaakpa. (Uhíb. 12:​22, 23) Ó lɛbɛɛka Ujehofa i gē je uklɔ ekponu lɛ eyeeye ku aalelekwu otɛhɔ a ŋ ma. (Mafú 14:​17, 18) Ocabɔ mafu, Ujehofa da alelekwu otɛhɔ ekponu foofunu kóō lɛ aicɔɔja ku ācɛ Asiriya nōo wɛ u 185,000 a ŋmo. (2 Aɔ́cɛ́ 19:35) Amáŋ, aalelekwu otɛhɔ alɛwa lɔfu lɛ uklɔ ō “tū odúúdú ācɛ nēe yá ká ācɛ kéē bīya íne ā mɛ́mla ācɛ nēe ī yá ɔdōōbɔ̄bí ā bá ŋmá ipú ajɔ̄ɔ̄cɛ́ kú [Ujisɔsi].” (Umát. 13:​39-41) Aalelekwu otɛhɔ ɔhá lɔfu lɛ uklɔ ō “tū ācɛ nēé fu ā bá” gā ɔkpanco. (Umát. 24:31) Ó kē lɛ aígwu ɔhá ku aalelekwu otɛhɔ néē je ɔ́da lɛ uwa kéē ‘gbo alɔ ɛga dúúmā nɛ alɔ gē nyɔ̄ ā.’—Aíjē 91:11; Umát. 18:10; má Umátiyu 4:11; Ulúku 22:43.

Á jé ŋ, “aálelékwū otɛ̄hɔ [néē fu]” néē kɛla lɛyikwu ɔ ipu ɔkpá ku 1 Utímōti 5:21 a, lɔfu lɛ uklɔ ō tabɔ ō leyi kwu aujɔ a. Ipu aɔgba nōo yɛ jila ɛlā a ta a, Upɔlu tu ukɔ́ lɛyikwu ɛgɛ nɛ anyakwɔcɛ ku ujɔ cika ō yuklɔ ku uwa a, klla tu ukɔ́ ku ācɛ nōo yɔ ipu ujɔ a cika ō lɛ ojilima ce anyakwɔcɛ ku ujɔ a. Oŋma aya ku uwa, anyakwɔcɛ ku ujɔ cika ō yuklɔ ku uwa néē gáā “yúufi eyī kú ɔ̄cɛ dúúmā ŋ́, ámāŋ́ ka ō gwó ɔwɛ ce abɔ̄ éyi, ipú ɔda dúúmā [néē] ī yá ā ŋ́.” É klla cika ō ŋmuleyikwu ō ya ōmiya amāŋ kɛpɔ ŋ. Oŋma ɔɔma, Upɔlu da uwa ɔdā nōo ya ɛɛ néē cɛgbá ō yɛce ukɔ́ nɛ ó tu uwa a. Ó ka ka anyakwɔcɛ ku ujɔ a yɔ i ce ayinɛ uwa ɛhɔ iyɔbu “Ɔwɔicō mɛ́mla Ohɔ́nyɛtá Ujísɔsi mɛ́mla aálelékwū otɛ̄hɔ [néē fu]” a. Ɛnyā kē wɛ ka Ujehofa, Ujisɔsi, mla aalelekwu otɛhɔ néē fu a, yɔ i má ɛgɛ nɛ anyakwɔcɛ ku ujɔ a gē leyi kwu ujɔ a lɛ a. Ohigbu ɛnyā, aalelekwu otɛhɔ ōhī lɛ uklɔ ō tabɔ ō leyikwu ujɔ a. Ba tu aɔdā néē lɛ ō ya a, é gē je ogbotu lɛ ācɛ ɔlɛ Ɔwɔico, gē je otabɔ lɛ uwa ipu uklɔ ku ɔna ō ta a, mla ō da Ujehofa lɛyikwu ɔdā néē má a.—Umát. 18:10; Mafú 14:6.