1. Ɛgɛnyá nɛ alɔ jé ku uklɔ ō lɛ ācɛ piya ayikpo ku Ukraist wɛ uklɔ ō nya oyeeyi ta a?

UKLƆ ō lɛ ācɛ piya ayikpo ku Ukraist wɛ uklɔ nōo gē nya oyeeyi ta! Ɛgɛnyá nɛ alɔ bi le jé a? Eko nɛ Ujisɔsi yɔ i je ɔ́da nōo yɔ ipu ɔkpá ku Umátiyu 28:19, 20 a, ó kahinii: “Aá nyɔ̄ . . . kú aá yá kéē le pīya ayíkpó kú um. Aá yá uwā ubatísim.” Ɛgɛnyá nɛ ubatisim ō ya cɛgbá lɛ a? Ɔdaŋ ku alɔ dɔka ō lɛ oyeeyi opiyoo alɔ cika ō lɛ ubatisim ya. Ɔcɛ nōo gáā ya ubatisim a cika ō kpɔtuce ka ikwū mla oheyi ŋma ɔlekwu ku Ujisɔsi foofunu, ya nɛ ó gáā lɔfu lɛ oyeeyi opiyoo gla a. Ɛnyā ya ɛɛ nɛ Upita da Ācɛ O Yɛce Ukraist ɔmpa nu kahinii: “Ubatísim [yɔ i] nya alɔ tá . . . o ŋmá lɛ ɔfú nōo je Ujísɔ̄si Ohɔ́nyɛtá héyī ŋmá ɔlékwū ā.” (1 Upít. 3:21) Ó lɛ a, ɔdaŋ ka ɔyikpo ku Ukraist ɛpɛpɛ duuma lɛ ubatisim ya, ɔcɛ ɔɔma lɔfu lɛ eyiyoce ō lɛ oyeeyi opiyoo.

2. Ɛdɔ itica nyá nɛ ɔkpá ku 2 Utímōti 4:1, 2 ku alɔ cika ō wɛ a?

² O ya ɛɛ ku alɔ lɛ ācɛ piya ayikpo ku Ukraist a, alɔ cika ō ya ku alɔ jé ō nwu ɛlā lɔɔlɔhi.” (Jé 2 Utímōti 4:1, 2.) Ohigbu ɔdi? Ohigbu ka Ujisɔsi je ɔ́da lɛ alɔ ka “aá nyɔ̄ . . . kú aá yá kéē le pīya ayíkpó kú um. . . . Aá nwū uwā kéē yá ɔdā dóódu nɛ̄ n da aá ā.” Upɔlu ku alɔ kóō “yɔ ī” yuklɔ ɔɔma, ó ka ‘ɔ́dāŋ ka a yɔ ī ya ɔ, a géē lɔfu nya iyi uwɔ mɛ́mla ācɛ nēe gē jāhɔ̄ gā awɔ ā tá glá.’ Ó lɛ ɔdā olɔhi nōo ya nɛ Upɔlu kahinii: “Lɛ ɛlá kwu . . . ɔdā nāa gē nwū ā.” (1 Utím. 4:16) Abɔ alɔ jé ku alɔ cika ō jé ō nwu ɛlā ɔdaŋ ku alɔ dɔka ō lɛ ācɛ piya ayikpo ku Ukraist a, alɔ cika ō ya ku ɔwɛ nɛ alɔ gē nwu ɛlā a kóō wɛ ɔwɛ ō lɔhi fiyɛ duu a.

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā, lɛyikwu ō ya oklɔcɛ ku Ubáyíbu mɛmla ācɛ a?

³ Ipu oduudu ɛcɛ, alɔ yɔ i ya oklɔcɛ ku Ubáyíbu mla umiliyɔn ku ācɛ. Amáŋ ɛgɛ nɛ ikpɛyi ɛlā nɛ alɔ klɔcɛ gáā yɛ a ka lɛ a, alɔ  dɔka ō jé ɛgɛ nɛ alɔ géē je otabɔ lɛ alɛwa ku ācɛ nōo ba nyā kéē gáā lɛ ubatisim ya. Ipu ikpɛyi ɛlā nyā, alɔ géē kɛla lɛyikwu aɔdā ɛhɔ ɔhá nɛ ācɛ nōo gē klɔcɛ mla ācɛ a lɔfu ya, o ya ɛɛ kéē ta ācɛ néē gē klɔcɛ mla uwa a abɔ kéē gáā lɛ ubatisim ya a.

4. Ɔdiya nɛ ɔcɛ nōo gē klɔcɛ mla ɔcɛ i cika ō kɛla nwune eko nɛ ó i ya oklɔcɛ a ŋ ma? (Má ɛlā néē ta ɛhaajɛ a duu.)

⁴ Ɛlā nɛ alɔ gē nwu ŋma ɛlā ku Ɔwɔico a he alɔ ɔtu i bi. Ohigbu ɛnyā a, ó lɔfu bēē ya alɔ ō yɔ i kɛla nwune nwune lɛyikwu ɔ. Amáŋ, ɔdaŋ ku alɔ yɔ i leyi kwu aya ku Oklɔcɛ ku Ɔda Ō Gbaajɛ, Ubáyíbu Ō Klɔcɛ ku Ujɔ, amāŋ Ubáyíbu ō klɔcɛ ɔlɛ, alɔ kóō hii bēē kɛla nwune ŋ. Ɔcɛ ō nwu ɔkpá duuma dɔka ō bi Ubáyíbu le yuklɔ lɔɔlɔhi eko duuma nɛ ó yɔ i nwu ɛlā, ohigbu ɛnyā, ó cika ō leyi kwɛɛcɛ gɛɛ, o ya ɛɛ kóō hii kɛla nwune ŋ. Ó klla cika ō lɛ ɛlá kwu ɔ kóō hii kɛla lɛyikwu ɛjɛɛji aɔda nɛ ó jé lɛyikwu ɛga ku Ubáyíbu éyi amāŋ ikpɛyi ɛlā duuma ŋ. * (Ujɔ́n. 16:12) Gbɛla lɛyikwu ɛdɔ ɛlā nɛ a jé ŋma Ubáyíbu eko aflɛyi nɛ a ya ubatisim a, mla ɔdā alɛwa nɛ a jé babanya a. Á jé ŋ eko aflɛyi ɔɔma nɛ a ya ubatisim a, aɛlā okpɔci nɛ Ubáyíbu gē nwu a nɛ a jé foofunu a. (Uhíb. 6:1) Ó je uwɔ ihayi alɛwa gbɔbu ɛɛ nɛ a gáā jé aɔdā nɛ a jé icɛ a, ó lɛ a, a hii ceyitikwu ya ku a nwu ɔcɛ ɛpɛpɛ ɛjɛɛji odee igbekponu ŋ.

5. (a) Oŋma ɛlā nōo yɔ ipu ɔkpá ku 1 Ācɛ Utesaloníka 2:13 a, ɔdi nɛ alɔ dɔka ku ɔcɛ nɛ alɔ gē klɔcɛ mla ɔ a kóō jé ŋma oklɔcɛ ku nu a? (b) Ɛgɛnyá nɛ alɔ gáā ta ɔcɛ nɛ alɔ gē klɔcɛ mla ɔ a ɔtu kwu ɔtu kóō kɛla lɛyikwu ɔdā nɛ ó yɔ i nwu a?

⁵ Alɔ dɔka ku ācɛ nɛ alɔ gē klɔcɛ mla uwa a, kéē jé ku ɛlā néē yɔ i nwu a ŋma ipu Ubáyíbu. (Jé 1 Ācɛ Utesaloníka 2:13.) Ɛgɛnyá nɛ alɔ gáā ya ɛnyā a? Ta ɔ ɔtu kwu ɔtu kóō kɛla lɛyikwu ɛlā nɛ ó yɔ i nwu a. Ikɔkɔ ō yɔ i je ɛlā ku Ubáyíbu ta ɔ eyi peee eko doodu a, da ɔ kóō lɛ ōhī ku nu teyi peee gā uwɔ. Ta ɔcɛ nɛ a gē klɔcɛ mla ɔ abɔ kóō má ɛgɛ nɛ ó lɔfu bi ɛlā ku Ɔwɔico le yuklɔ ipu oyeeyi ku nu a. Da ɔ ɔka nōo géē ta ɔ abɔ kóō da uwɔ ɔdā nɛ ó yɔ i gbɛla, mla ɛgɛ nɛ ɔtu gē ya ɔ lɛ lɛyikwu ɛga ku Ubáyíbu nɛ ó jé a. (Ulúk. 10:25-28) Ocabɔ mafu, da ɔ ɔka kahinii: “Ɛgɛnyá nɛ ɛga ku Ubáyíbu nyā ta ɔ abɔ ku a má uce ō ya éyi ku Ujehofa a?” “Ɛgɛnyá nɛ ɛlā nɛ a jé ŋma ipu Ubáyíbu anana gáā ta ɔ abɔ a?” “Ɛgɛnyá nɛ ɔtu gē ya uwɔ lɛ lɛyikwu ɔdā nɛ a nwu anana a?” (Aíit. 20:5) Ó wɛ aɔda alɛwa nɛ ɔcɛ nɛ a gē klɔcɛ mla ɔ a jé a wɛ ɔdā nōo cɛgbá a ŋ, amáŋ ɛgɛ nɛ ɔdā nɛ ó yɔ i jé a he ɔ ɔtu lɛ, nɛ ó klla gē bi ɔ le yuklɔ a cɛgbá fiyɛ a.

6. Ɔdiya nōó géē wɛ ɔdā olɔhi ō bi ɔcɛ nōo jé ō nwu ɛlā lɔɔlɔhi mla iyi alɔ gáā ya oklɔcɛ mla ɔcɛ a?

⁶ Eko duu nɛ a gáā nyɔ i ya oklɔcɛ mla ɔcɛ,  a gē bi ɔcɛ ō tɔɔna nōo jé ō ya oklɔcɛ lɔɔlɔhi mla iyi uwɔ gáā ya oklɔcɛ ɔɔma a? A lɔfu da uwa ɔka ku ɔdā néē gbɛla lɛyikwu ɛgɛ nɛ a gē ya oklɔcɛ a, amāŋ ɔdaŋ ku a yɔ i bi Ubáyíbu yuklɔ lɔɔlɔhi eko nɛ a yɔ i nwu ɛlā a. Ɔdaŋ ku a dɔka ō wɛ ɔcɛ nōo jé ō nwu ɛlā lɔɔlɔhi, a cika ō wɛ ɔcɛ ō tu iyi uwɔ waajɛ. (Má Ācot. 18:24-26.) Igbihaajɛ, da ɔcɛ ō tɔɔna ɛlā Ɔwɔico nōo jé ō nwu ɛlā lɔɔlɔhi a ɔka, ɔdaŋ ka ó gbɛla ku ɔcɛ nɛ a gē klɔcɛ mla anu a jɛyi ɔdā nɛ ó yɔ i nwu a. A kē lɔfu da ɔcɛ ō tɔɔna ɛlā Ɔwɔico ɔɔma piii kóō ya oklɔcɛ ɔɔma gā uwɔ, ɔdaŋ ku a gáā yɔ alaadi ɛpa amāŋ fiyɛ ŋ. Ɔɔma géē cɛ lɛ oklɔcɛ a yɔ i gɔbu ojigogo, klla géē ya kóō mafu lɛ ɔcɛ nɛ a gē klɔcɛ mla anu a, ɛgɛ nɛ oklɔcɛ a cɛgbá nɛhi lɛ a. Ɔtu ku uwɔ kóō hii ya uwɔ ku oklɔcɛ a wɛ “aku uwɔ” foofunu, ku ɔcɛ duuma ɔhá i kē cika ō ya ɔ ŋ. Ó lɛ afuu ŋ, ɔdā nɛ a tine lɛ ɔcɛ nɛ a gē klɔcɛ mla anu a wɛ ɔdā olɔhi fiyɛ duu a, o ya ɛɛ kóō yɔ i jɛ gɔbu ojigogo ipu ɛlā ɔkwɛyi nɛ ó yɔ i nwu a.

7. Ɔdi gáā ta ɔcɛ nɛ a gē klɔcɛ mla ɔ a abɔ, ku ɛlā nɛ a yɔ i nwu a kóō he ɔ ɔtu a?

⁷ Ɔcɛ nɛ a gē klɔcɛ mla ɔ a cika ō má, ku a cɛla nɛ Ubáyíbu gē nwu a, ka ó klla he uwɔ ɔtu. (1 Utes. 1:5) Ɛnyā géē ya ku ɔdā nɛ ó yɔ i nwu a kóō he ɔ ɔtu tōōtɔ̄ɔ̄. A lɔfu da ɔ ɛgɛ nɛ Ubáyíbu ta uwɔ abɔ ipu oyeeyi ku uwɔ ɛ ma. Cɛɛ ō géē wa gáā má ku Ubáyíbu lɔfu ta ɔ abɔ ɛgɔɔma duu.

8. Ɔdā ɔhá nyá nɛ a lɔfu ya o ya ɛɛ ku a ta ɔcɛ nɛ a gē klɔcɛ mla ɔ a abɔ a, ɔdiya nɛ a kē gáā ya lɛ a?

⁸ Eko duuma nɛ aa yɔ i ya oklɔcɛ, da ɔ lɛyikwu ayinɛ alɔ ɔhá nōo má ɛdɔ unwalu nɛ ó yɔ i má, néē klla lɛ uwa yale a. Eko nɛ a gáā nyɔ i ya oklɔcɛ a, a lɔfu bi ɔcɛ éyi ŋma ujɔ ku uwɔ mla iyi uwɔ, nɛ ocabɔ mafu ku nu lɔfu ta ɔcɛ nɛ a gē klɔcɛ mla ɔ a abɔ. Amāŋ a lɔfu má ɔ̄kā ku ayinɛ alɔ, nōo gē ta ɔcɛ ɔtu kwu ɔtu ipu aya nōo kahinii: “The Bible Changes Lives” * nōo yɔ ipu jw.org a. Ikpɛyi ɛlā mla auvidio ɛgɛnyā, géē ta ɔcɛ nɛ a gē klɔcɛ mla ɔ a abɔ, kóō ya opiyabɔ ipu oyeeyi ku nu.

9. Ɛgɛnyá nɛ a gáā ta ɔcɛ nɛ a gē klɔcɛ mla ɔ a ɔtu kwu ɔtu, kóō da ācɛ apɔlɛ ku nu mla aɔya ku nu lɛyikwu ɛlā nɛ ó yɔ i nwu a?

⁹ Ɔdaŋ ku ɔcɛ nɛ a gē klɔcɛ mla ɔ a wɛ ɔcɛ ō lɛ ɔba amāŋ ɔnyā, ɔba amāŋ ɔnyā nu gē klɔcɛ? Ɔdaŋ ka ó lɛ a ŋ, hi obiye ku nu a igwu kóō gáā ba aa iyē ipu oklɔcɛ a. Ta ɔcɛ nɛ a gē klɔcɛ mla ɔ a ɔtu kwu ɔtu, kóō da ācɛ apɔlɛ ku nu mla aɔya ku nu lɛyikwu ɛlā nɛ ó yɔ i nwu a. (Ujɔ́n. 1:40-45) Ɛgɛnyá a? A lɔfu da ɔ ɔka nyā: “Ɛgɛnyá nɛ a gáā da apɔlɛ ku  uwɔ lɛyikwu ɛlā nɛ a yɔ i nwu nyā a?” amāŋ “Ɛga ku Ubáyíbu nyá nɛ a gáā bi le mafu lɛ ɔya ku uwɔ ku ɛlā nyā wɛ ɔkwɛyi a?” Ɔwɛ ɛgɛnyā a, a géē yɔ i nwu ɔcɛ nɛ a gē klɔcɛ mla ɔ a ɛgɛ nɛ ó géē wɛ ɔcɛ ō jé ō nwu ɛlā lɔɔlɔhi. Cɛɛ eko duu nɛ ó cika jɛ, ó géē gbɔɔ ō gɛɛcɛ gáā tɔɔna mla ujɔ a. A lɔfu da ɔcɛ nɛ a gē klɔcɛ mla ɔ a ɔka, ɔdaŋ ka ó jé ɔcɛ duuma nōo géē dɔka ō klɔcɛ ku Ubáyíbu. Ɔdaŋ ka ó jé ɔcɛ duuma, le yɛ faajɛ ɔcɛ ɔɔma boobu, cɛɛ ku a le miya ō ya oklɔcɛ mla anu. Mafu uvidio nyā lɛ ɔ nōo kahinii: Ɔdi Gē Ya Eko N’alɔ Gē Y’oklɔcɛ K’ubáyíbu a? *

10. Oŋma ɛlā nōo yɔ ipu ɔkpá ku 1 Ācɛ Utesaloníka 2:7, 8 a, ɛgɛnyá nɛ ɔcɛ ō nwu ɛlā lɔfu gbla ocabɔ mafu ku Upɔlu ya a?

¹⁰ Ācɛ nōo gē nwu ɛlā a cika ō lɛ ɛlá wu ācɛ néē gē ya oklɔcɛ mla uwa a lɔɔlɔhi. É lɔfu je piya ayinɛ alɔ ipu ujɔ ɛcɔbu nōó gboji ŋ. (Jé 1 Ācɛ Utesaloníka 2:7, 8.) Ó tɔɔtɛ lɛ uwa ō habɔ aɔya néē lɛ ipu ɛcɛ a ta, klla ya opiyabɔ nōo cɛgbá o ya ɛɛ kē gba Ujehofa ɛ̄gbā ŋ. Alɔ cika ō ta uwa abɔ kéē lɛ aɛnɛɛnɛ ɔya ipu ujɔ a. Awɔ mɛmla ɔcɛ nɛ a gē ya oklɔcɛ mla ɔ a cika ō wɛ oklobiya amāŋ ɔncɛnya. A kē i ya ɛnyā gla, ŋma lɛ ō lɛ eko ku uwɔ taajɛ lɛ ɔ, kóō hii wɛ eko nɛ a gē ya oklɔcɛ mla ɔ a foofunu ŋ. Ō kɔlu ɔcɛ ɔɔma, ō ta umeseji ɛhɔ fu ɔ, amāŋ ō bi eko kpii gáā má ɔ ɔlɛ gbɔbu lɛ ɛ̄cī ku oklɔcɛ a, géē mafu ka lɛ ɛlá wu ɔ nɛhi.

11. Ɔdi nɛ alɔ dɔka ku ācɛ nɛ alɔ gē klɔcɛ mla uwa a kéē ya ipu ujɔ a, ɔdi kē ya a?

¹¹ Ó lɛ ita éyi néē kwu kahinii: “Ó wɛ ɔcɛ ekponu gē bi ɔyi a ŋ.” Alɔ lɔfu ka kahinii: “Ó gē je ɛjɛɛji ujɔ a kéē je ɔcɛ piya ɔyikpo ku Ukraist.” Ohigbu ɛnyā, eko duuma nɛ ɔcɛ ō nwu ɛlā lɔɔlɔhi ta ācɛ nɛ ó gē klɔcɛ mla uwa a abɔ kéē gáā jé ācɛ ɔhá nōo yɔ ipu ujɔ a, ācɛ a géē ta uwa abɔ kéē tubla Ujehofa ajaajɛ duu. Ācɛ nɛ a gē klɔcɛ mla uwa nyā kē i jɔɔnyɛ opiyatɔha mla ācɛ ɔlɛ Ɔwɔico, ayinɛ alɔ nyā géē ta uwa abɔ kéē je piya ɛnɛɛnɛ ɔya ku Ujehofa, é klla lɔfu ta uwa ɔtu kwu ɔtu eko duuma néē lɛ unwalu. Alɔ dɔka ku ɔtu kóō ya eyeeye ku ācɛ nɛ alɔ gē klɔcɛ mla uwa a kē lɛ ɛga ipu ujɔ a, klla wɛ ipu apɔlɛ ku alɔ nōo gē gba Ujehofa ɛ̄gbā a. Alɔ dɔka ku ɔcɛ nɛ alɔ gē ya oklɔcɛ mla ɔ a kóō piyatɔha mla ayinɛ alɔ nɔnyilɔ mɛmla ayinɛ nɔnya nōo yihɔtu iyi uwa a. Cɛɛ ó géē tɔɔtɛ lɛ ɔ, ó lɛ abɔ ci opiyatɔha mla ācɛ nōó gē ta ɔ abɔ ō yihɔtu ku Ujehofa ŋ ma. (Aíit. 13:20) Ɔdaŋ ku ācɛ nɛ ó gē piyatɔha mla uwa gbɔbu a i dɔka kóō lɛ ɔdā duuma ō ya mla uwa gɛ ŋ, ó géē jé ka ó lɔfu lɛ aɛnɛɛnɛ ɔya ipu ɔwa ku Ujehofa.—Umák. 10:29, 30; 1 Upít. 4:4.

12. Ɔdiya nɛ alɔ cika ō kɛla lɛyikwu ō lɛ iyi ɔcɛ gwɛɛya mla ō ya ubatisim mla ɔcɛ nɛ alɔ gē klɔcɛ mla ɔ a?

¹² A cika ō bēē kɛla ojigogo lɛyikwu ɛgɛ nōó cɛgbá nɛhi ku ɔcɛ kóō lɛ iyi nu gwɛɛya lɛ Ujehofa klla ya ubatisim a. Ɔdā nōo ya nɛ alɔ gē klɔcɛ mla ɔcɛ a, wɛ ō ta ɔ abɔ kóō gáā gba Ujehofa ɛ̄gbā klla gáā lɛ ubatisim ya nɛ. Igbihi nɛ ɔcɛ ɔɔma lɛ oklɔcɛ ya ɔya ligii ɛ ma, ofluflu eko nɛ ó gbɔɔ ō wa ōjila ku ujɔ a, ó cika ō wa i jé peee ku alɔ dɔka ō ta ɔ abɔ kóō kwu piya éyi ku Ɔcɛ Ocijali Ku Ujehofa nɛ.

13. Ɔdi nɛ ɔcɛ nɛ a gē klɔcɛ mla ɔ a cika ō ya, o ya ɛɛ kóō lɔfu ya ubatisim a?

¹³ Ó lɛ aɔdā alɛwa nɛ ɔcɛ nɛ alɔ gē klɔcɛ mla ɔ, nōo dɔka ō ya ubatisim a lɔfu ya! Aflɛyi, ó cika ō gáā jé Ujehofa, yihɔtu nu, klla kpɔtuce ɔ. (Ujɔ́n. 3:16; 17:3) Ó cika ō je piya ɔya ku Ujehofa mla ɔya ku ayinɛ nōo yɔ ipu ujɔ a duu. (Uhíb. 10:24, 25; Ujɛ́m. 4:8) Igbihaajɛ a, ó cika ō ta ɔdobɔbi nɛ ó gē ya gbɔbu a, klla le piyabɔ ŋma íne ō biya ku nu. (Ācot. 3:19) Ó klla géē da ācɛ ɔhá lɛyikwu ɔdā nɛ ó kpɔtuce ɔ babanya a. (2 Ukɔ́r. 4:13) Cɛɛ ó lɛ iyi nu gwɛɛya lɛ Ujehofa, klla ma ɛnyā fu ŋma lɛ ō ya ubatisim. (1 Upít. 3:21; 4:2) Ɛ̄cī ɔɔma kē i wɛ ɛ̄cī eeye nɛhi lɛ ɛjɛɛji ācɛ! Eko duu nɛ ɔcɛ nɛ a gē klɔcɛ mla ɔ a, lɛ aɔdā nɛ ó cika ō ya a ya, bēē ta ɔ ahinya. A klla cika ō bēē ta ɔ ɔtu kwu ɔtu kóō gɔbu yɔ i ya ɛjɛɛji aɔdā nyā.

14. Ɛgɛnyá nɛ ɔcɛ ō nwu ɛlā gáā lɔfu jila ɛgɛ nɛ ɔcɛ nɛ ó gē klɔcɛ mla ɔ a yɔ i jɛ gɔbu lɛ a?

¹⁴ Alɔ cika ō lɛ ɔtoole, eko duuma nɛ alɔ yɔ i je otabɔ lɛ ɔcɛ nɛ alɔ gē klɔcɛ ku Ubáyíbu mla ɔ a, kóō gáā cika jɛ ō ya ubatisim. Amáŋ, alɔ a klla cika ō jila má, ɔdaŋ ka ó dɔka ō gba Ujehofa nōo wɛ Ɔwɔico a ɛ̄gbā a. Ɔcɛ nɛ a gē klɔcɛ mla ɔ a gē mafu ka ó yɔ i ceyitikwu kóō lɛyi taajɛ lɛ aɔ́da ku Ujisɔsi nɛɛ? Kɛɛ ka ó dɔka ō jé lɛyikwu aɔdā nōo he ɔ ɔtu ŋma ipu Ubáyíbu foofunu?

15. Ɔdi gáā mafu lɛ ɔcɛ nōo gē nwu ɔcɛ ɛlā, ku ɔcɛ nɛ ó gē klɔcɛ mla ɔ a le tutu ō ya ubatisim ɛ ma?

¹⁵ Bēē leyi taajɛ lɔɔlɔhi ku a má ɛgɛ nɛ ɔcɛ nɛ a gē klɔcɛ mla ɔ a yɔ i jɛ gɔbu lɛ a. Ocabɔ mafu, ó gē ka ɛgɛ nɛ ɔtu gē ya ɔ lɛ a lɛyikwu Ujehofa a? Ó gē gbɔɔkɔ lɛ Ujehofa? (Aíjē 116:1, 2) Ó gē jɔɔnyɛ ō jé Ubáyíbu? (Aíjē 119:97) Ó gē wa ōjila ku ujɔ ojigogo? (Aíjē 22:22) Ó lɛ opiyabɔ duuma nɛ ó ya ipu oyeeyi ku nu, nōo mafu ka ó yɔ i bi ɔdā nɛ ó yɔ i nwu a le yuklɔ? (Aíjē 119:112) Ó gbɔɔ ō da ācɛ apɔlɛ ku nu mla aɔya ku nu lɛyikwu ɛlā nɛ ó yɔ i nwu a ɛ? (Aíjē 9:1) Ɔdā nōo cɛgbá fiyɛ  duu a, wɛ ka ó dɔka ō wɛ éyi ku Ācɛ Ocijali Ku Ujehofa? (Aíjē 40:8) Ɔdaŋ ka ó yɔ i jɛ gɔbu ɔwɛ duuma nōo ba nyā ŋ, bi ijeeyi le dɔka ɔdā nōo ya a, cɛɛ a bi ɔwɛ ogbonɛnɛ le kɛla lɛ ɔ lɛyikwu ɛlā a, amáŋ a hii je ɔdā duuma tayinu ŋ. *

16. Eko nyá nɛ a cika ō lɛ abɔ ci ō ya oklɔcɛ mla ɔcɛ a?

¹⁶ Bēē da iyi uwɔ ɔka ŋma eko ta eko, ɔdaŋ ku a cika ō gɔbu yɔ i ya oklɔcɛ mla ɔcɛ. Da iyi uwɔ ɔka: ‘Ɔcɛ nɛ a gē klɔcɛ mla ɔ a i gē ya otutu ku oklɔcɛ a ŋ? Ó gē dɔka ō wa ōjila ku ujɔ ŋ? Ó lɛ auce ō ya obɔbi duuma kpɔ ɛ? Ó wɛ éyi ku ācɛ ō gba ɛ̄gbā ku ɛkɛmgbɛ kpɔ ɛ?’ Ɔdaŋ ka ohi ku aɔka nyā wɛ ii, ō yɔ i gɔbu mla oklɔcɛ a mɛmla ɛdɔ ɔcɛ ɛgɔɔma, lɛbɛɛka ō yɔ i ceyitikwu ku a nwu ɔcɛ ɛgɛ nɛ ó géē jé ō tangwa, amáŋ ɔcɛ ɔɔma i kē dɔka ku eŋkpɔ kóō lɛ iyē kwu ɔ ŋ! Ɔdaŋ ku ɛlā nɛ ó yɔ i nwu a i he ɔ ɔtu ŋ, nɛ ó klla tutu ō ya opiyabɔ ipu oyeeyi ku nu ŋ, ó géē cɛgbá ku a gɔbu mla oklɔcɛ ɔɔma kpɔ?

17. Oŋma ɛlā nōo yɔ ipu ɔkpá ku 1 Utímōti 4:16 a, ɔdi nɛ ɛjɛɛji ācɛ nōo gē nwu ācɛ Ubáyíbu a cika ō ya a?

¹⁷ Ó wɛ ɔdā nōo cɛgbá nɛhi ku alɔ lɛ uklɔ ō je ācɛ piya ku Ukraist a ya gā ajaajɛ. Alɔ klla dɔka ō ta ācɛ nɛ alɔ gē ya oklɔcɛ mla uwa a abɔ kéē jɛ gɔbu ō gáā ya ubatisim. Ɛnyā ya nɛ alɔ cika ō bi Ubáyíbu le nwu ɛlā a. Alɔ klla cika ō nwu ɛlā a mla ɔtu caca, ɔwɛ nōo géē mafu ku alɔ kpɔtuce ɛlā nɛ alɔ yɔ i nwu a. Alɔ cika ō ta ɔcɛ nɛ alɔ gē klɔcɛ mla ɔ a ɔtu kwu ɔtu kóō ya ɔkpa mla ayinɛ nōo yɔ ipu ujɔ a. Alɔ klla cika ō bēē kɛla lɛ ɔ, lɛyikwu ō lɛ iyi nu gwɛɛya mla ō ya ubatisim. A kē i leyi taajɛ lɔɔlɔhi ku a má ɛgɛ nɛ ó yɔ i jɛ gɔbu lɛ a. (Má ikpati ku upeji ɔmɛ 13 nōo kahinii: “ Ɔdā Nɛ Ācɛ Ō Nwu Ɛlā Cika Ō Ya Ku Ācɛ Néē Gē Klɔcɛ mla Uwa Kéē Cika Lɛ Ubatisim.”) Alɔ gweeye nɛhi ku alɔ wɛ ipu uklɔ nyā nōo gē nya oyeeyi ta a! Alɔ dɔka ō ya ɔdā duuma nɛ alɔ ya gla, o ya ɛɛ ku alɔ je otabɔ lɛ ācɛ nɛ alɔ gē klɔcɛ mla uwa kéē cika jɛ ō gáā ya ubatisim.