Eko duuma nɛ alɛwa ku ayinɛ alɔ gē tɔɔna, é gē cɛgbá aɔkpá nwune ō bi le yuklɔ. Ayinɛ alɔ nɔnyilɔ nōo yɔ ipu Ubɛtɛlu ku Brooklyn a gē ya aumagajin ku alɔ a, amáŋ é gē gbolo ce aukɔmpani nōo gē ya aɔkpá wɛɛcɛ a kéē ya aɔkpá ku alɔ nɛ igbihi ku uwa gē lɔfu a. Amáŋ ipu ɔya alɛwa, ó tɔɔtɛ lɛ ukɔmpani a ō ya aɔkpá ku alɔ wɛɛcɛ nōo jɛ ō bi le yuklɔ ku ɔna ō ta gɛ ŋ. Ohigbu ɛnyā, Ɔyinɛ alɔ Nɔnyilɔ Rutherford gáā lɛ ɔka da u Robert Martin nōo gē leyikwu uklɔ ku ɔkpá ō ya wɛɛcɛ a, ɔdaŋ nɛ ó géē kɛla lɛ ɔcɛ nōo lɛ ɛga ō ya ɔkpá wɛɛcɛ a, ɔdaŋ ka ó lɔfu ya aku alɔ wɛɛcɛ gla.

Ɔyinɛ alɔ Martin kahinii: “Ɛnyā wɛ ɛnɛɛnɛ ɛlá ō gbo ohigbu ku ɛnyā wɛ ku alɔ géē lɛ ukɔmpani nōo géē ya aɔkpá ku alɔ wɛɛcɛ.” Ayinɛ alɔ nɔnyilɔ a lɛ ɛga éyi néē gē bēē gba ije nu a miyɛ ipu Ulayi 18 néē hi ka u Concord nōo yɔ u Brooklyn a, klla lɛ aɔdā ō bi le yuklɔ a lá duu.

Ó wɛ ɛjɛɛji ācɛ yɔ i gweeye ka ayinɛ a gáā ya aɔkpá wɛɛcɛ abɔyi uwa a ŋ. Ɔcɛ nōo gē leyikwu ukɔmpani nōo gē ya aɔkpá lɛ alɔ a, wɛ ɛga ɛpɛpɛ nyā. Ó kahinii: “Aa lɛ aɛnɛɛnɛ ɔdā ō bi le ya aɔkpá wɛɛcɛ, amáŋ oduuma ku aa kē jé ō bi uwa le yuklɔ ŋ. Ipu ɔya ɛhili foofunu, aa géē je ɛjɛɛji aɔdā ō bi yuklɔ ku aa kpo biya.”

Ɔyinɛ alɔ Nɔnyilɔ Martin gáā ka kahinii: “Ó lɛbɛɛka ɛlā ɔɔma lɔfu ya ɔkwɛyi gla, amáŋ alɔ jé ka Ujehofa géē ta alɔ abɔ, ó kē le ya lɛ a ɔkwɛyi.” Ɛlā nɛ Ɔyinɛ alɔ Nɔnyilɔ Martin ka a wɛ ɔkwɛyi. Ó gboji ŋ, ɔdā ō bi ya ɔkpá wɛɛcɛ néē hi ka bindery a, gbɔɔ ō ya ɔkpá ku alɔ bɛɛka 2,000 a wɛɛcɛ ɛ̄cī doodu.

Batɔ ō yɔ i ya aɔkpá ku alɔ ōhī wɛɛcɛ abɔyi alɔ, ācɛ o gba Ujehofa ɛ̄gbā klla gbɔɔ ō bi ɔwɛ ɛpɛpɛ le tɔɔna ku ɔkoolɔhi a, ɛnyā wɛ ɛlā ō ka tɛɛcɛ ŋma ipu uredio. Ɔlɛnɔ ku ɛ̄cī Alaadi ku Ɔya Ɔmpa 26, ku ihayi ku 1922, Ɔyinɛ alɔ Nɔnyilɔ Rutherford lɛ ɛlā ō ka tɛɛcɛ ku nu aflɛyi ya ŋma ipu uredio. Ikpɛyi ɛlā ku ɛlā ō ka tɛɛcɛ a kahinii: “Millions Now Living  Will Never Die,” ó kē ya ɔ ŋma ipu uredio ku KOG nōo yɔ igeli ku Los Angeles, California, U.S.A. a.

Ācɛ bɛɛka utanja ofu ce ɛhɔ (25,000) jahɔ tu ɛlā ō ka tɛɛcɛ ɔɔma. Ōhī ku uwa ta uleta gē lɛ Ɔyinɛ alɔ Rutherford yɔ i ta ɔ ahinya ku ɛlā ō ka tɛɛcɛ a. Éyi ku uleta ɔɔma wa ŋma ɛgiyi u Willard Ashford, nōo lā ipu igeli ku Santa Ana, California a. Ó ta Ɔyinɛ alɔ Nɔnyilɔ Rutherford ahinya ku “ɛgɛ nɛ ó jɔɔnyɛ ɛlā ō ka tɛɛcɛ a mla ɔwɛ ɛnɛɛnɛ” nɛ ó bi le ya ɔ a. Ó klla ka kahinii: “Ipu apɔlɛ ku um, ācɛ ɛta yɔ i doōcē nōó tɔɔtɛ lɛ uwa ō bɛɛcɛ ŋma ɔlɛ gla ŋ. Ohigbu ɛnyā, ó gē yɛ i tɔɔtɛ lɛ alɔ ō wa gáā jahɔ tu ɛlā ō ka tɛɛcɛ ku uwɔ gla ŋ, ɔdaŋ ku ɛga nɛ a ya ɛlā ō ka tɛɛcɛ a kóō gē yɛ i kwu alɔ ajaajɛ naana.”

É gɔbu ya ɛlā ō ka tɛɛcɛ alɛwa ipu alaadi nōo gboce ɔ a. Abɔ ihayi ku 1922 yɔ i wa oŋmɛyi a, ó gáā le bɛɛcɛ ipu Ɔda Ō Gbaajɛ ku “ācɛ bɛɛka utanja ofu igwɛhɔ (300,000) a, lɛ ɔkoolɔhi a po o bu ipu uredio ɛ.”

Ohigbu ɔtu ō tu kwu ɔtu nɛ Ācɛ Oklɔcɛ Ku Ubáyíbu nyā miyɛ ŋma ipu uleta nɛ ācɛ ta mla ɛlā néē ka a, é gáā le miya ō lɛ ɔlɛ ku uredio ku abɔyi uwa lɛ ipu ajɛ ku uwa nōo yɔ igeli ku Staten Island, nōó ligbo ŋma Ubɛtɛlu nōo yɔ u Brooklyn ŋ ma. Ɛnyā mafu ka ihayi ōhī nōo yɔ i wa a, Ācɛ Oklɔcɛ Ku Ubáyíbu nyā géē gbɔɔ ō bi ɔlɛ ku uredio nōo wɛ u WBBR a, le tɔɔna lɛyikwu Ajɔɔcɛ a nɛɛnɛhi.

Oklɔcɛ ku Ɔda Ō Gbaajɛ ku Ɔya Ɔmɛhili 15, 1922, le ka tɛɛcɛ ka ojileyi nɛhi géē yɔ ipu igeli ku Cedar Point, Ohio, ŋma ɛ̄cī 5 gā ɛ̄cī 13 ku Ɔya Ɔmahaanɛ ku ihayi ku 1922. Ācɛ Oklɔcɛ Ku Ubáyíbu a gweeye nɛhi eko néē wa igeli ku Cedar Point a.

Ipu ɛlā ō ka tɛɛcɛ aflɛyi ku nu a, Ɔyinɛ alɔ Nɔnyilɔ Rutherford da ācɛ nōo yɔ i jahɔ tu ɔ a kahinii: “N jé kpɔcii ka Ondu a géē . . . hɔha ce ojileyi nɛhi ku alɔ nyā, klla jé kpɔcii ka uklɔ ku ɔna ō ta nɛ ɛdɔ ku nu i ya jeeje ipu ɛcɛ nyā ɛ ŋ ma géē ya.” Eyeeye ku ayinɛ nɔnyilɔ nōo ya ɛlā ō ka tɛɛcɛ ipu ojileyi nɛhi ɔɔma a, tu ayinɛ a ɔtu kwu ɔtu kéē yuklɔ ku ɔna ō ta a.

Ɛ̄cī Ajuma ku Ɔya Ɔmahaanɛ 8, ācɛ bɛɛka 8,000 nōo wa ojileyi ɔɔma a yɔ i ya ɔtu caca ō po ɛlā ō ka tɛɛcɛ nɛ Ɔyinɛ alɔ Nɔnyilɔ Rutherford gáā ya a. É yɔ i leyice ka ó géē je ɛyi ku ɔdā nɛ u “ADV,” nōo yɔ ipu ɔkpá ō higwu ku ojileyi nɛhi néē  ya a wɛɛcɛ a tu uwa eyī peee. Eko néē gáā yaajɛ a, alɛwa ku uwa má ɔkpá nɛhi éyi nōo playi ico ku ɛyi ede a. Arthur Claus, nōo wa ojileyi nɛhi ɔɔma ŋma igeli ku Tulsa, Oklahoma, U.S.A. a, lɛ ɛga ō yaajɛ éyi má nōo géē ya kóō po ɛlā ō ka tɛɛcɛ a lɔɔlɔhi. Āhɔ̄ i tɔɔtɛ ɛpleeko ɔɔma ŋ, ohigbu ka microphone amáŋ ɔdā nōo géē je ɔkɛla ku ɔcɛ gā ico i yɔ eko ɔɔma ŋ.

O ya ɛɛ ku ɔcɛ duuma kóō hii junwalu lɛ ɛlā ō ka tɛɛcɛ a ŋ ma, ɔcugada ku ojileyi a le ka tɛɛcɛ ka é hii jɛga lɛ ɔcɛ duuma kóō wa ipu ɛga néē yɔ i ya ojileyi a, eko nɛ Ɔyinɛ alɔ Nɔnyilɔ Rutherford gáā ya ɛlā ō ka tɛɛcɛ a ŋ. Eko nɛ u 9:30 ku ɔcɔɔci le ya a, Ɔyinɛ alɔ Nɔnyilɔ Rutherford gbɔɔ ɛlā ō ka tɛɛcɛ ku nu, ŋma lɛ ō bi ɛlā nɛ Ujisɔsi ka nōo yɔ ipu ɔkpá ku Umátiyu 4:17 a le yuklɔ. Ó kahinii: “Ajɔ̄ɔ̄cɛ́ kú ɔkpáncō le kwu ajaajɛ ɛɛ́.” Eko nɛ ó kɛla lɛyikwu ɛgɛ nɛ ācɛ géē po ɛlā lɛyikwu Ajɔɔcɛ nyā a, ó kahinii: “Ujisɔsi abɔyi nu ka tɛɛcɛ ka ɛpleeko kóō wa ku nu a, ó géē ta ācɛ ɔlɛ nu ba ɛgɛ nɛ ɔcɛ i ce ɔdɛhɔ a i kpo uwa ba ɛga éyi, ɛpleeko ɔɔma nɛ ó kē gáā ta ācɛ nōo hayi kpaakpa lɛ Ujehofa klla wɛ ācɛ ɔkwɛyi a ba duu a.”

Ɔyinɛ alɔ nɔnyilɔ Claus nōo yaajɛ ɛga néē yɔ i ya ojileyi a piii a ka kahinii: “Alɔ gē jahɔ lɔɔlɔhi tu ɛjɛɛji ɛlā ō ka tɛɛcɛ a.” Amáŋ acigili ó gbɔɔ ō doōcē nɛhi nɛ ó cɛgbá ō ŋma ɛga néē yɔ i ya ojileyi a. Arthur kē le yɛ ŋma ɛga néē yɔ i ya ojileyi a, naana nɛ ó jé ka é gáā jɛga lɛ ɔ ō wa cigbihi gɛ ŋ ma.

Abɔ uminiti ōhī le gla a, ó gbɔɔ ō lɔfu iyē fiyɛ. Anu ó ka ka eko nɛ anuɔ yɔ i cigbihi wa ɛga néē yɔ i ya ojileyi a, anuɔ po abɔ ācɛ yɔ i gwo abɔ nɛɛnɛhi. Ɛnyā cɛ lɛ ɔ gbɔɔ ō gweeye nɛɛnɛhi! Ó le miya ka ó géē jahɔ tu ɛlā ō ka tɛɛcɛ amoomɛ ku nu a ɔdaŋ ka ó géē cɛgbá ō tu ico ɛyi inu a o ya ɛɛ kóō po ɛlā a. Ɔyinɛ alɔ nɔnyilɔ Claus nōo wɛ ihayi ofu ce ɛta (23) eko ɔɔma a, lɛ ico ku ɔlɛ a tu ɔkwɔɔkwɛyi. Ɛyi ico ku ɔlɛ ku ojileyi a le nwula, ohigbu ɔɔma ó ka ka abɔ anuɔ le tubla uwa ajaajɛ a, ó le tɔɔtɛ lɛ anuɔ ō po ɛlā ō ka tɛɛcɛ a lɔɔlɔhi fiyɛ.

 Amáŋ, ó wɛ Arthur foofonu yɔ abɔɔ a ŋ. Aoklobiya ku nu ōhī yɔ mɛmla anu ico ɔlɛ a duu. Éyi ku uwa nōo lé ka u Frank Johnson a, kwinya wa gáā da ɔ ɔka kahinii: “A bi ɛwa olule ligii duuma néē gē je tu ipu ɛkpa gla a nɛɛ?”

Arthur kahinii: “Ii n bi gboo.”

Frank ta ɔ ohi kahinii: “Alɔ humayi gbɔɔkɔ ɔdaŋ ka alɔ géē ma ɔcɛ duuma nōo bi ɛwa. A má ɔkpá nɛɛnɛhi nōo playi nyā a? Ɔdā ocabɔ mafu nōó wɛ néē gbo batu ikpusa nyā a. Jahɔ lɔɔlɔhi tu ɔdā nɛ ɔcɛ o kɛpɔ yɔ i ka a. * Eko duuma nɛ ó kahinii, ‘Aa géē kɛla nyā tɛɛcɛ piii, aa géē ka ɔ piii,’ lɛ ɔŋgba ɛnɛ nyā kpo hɛ.”

Arthur bi ɛwa a abɔ yɔ i gbeyi mla aoklobiya ku nu kéē po aɛlā nɛ Ɔyinɛ alɔ Nɔnyilɔ Rutherford géē ka, nōo géē wɛ ɔdā ocabɔ lɛ uwa ō lɛ ɔŋgba a hɛ a. Ó gboji ŋ, Ɔyinɛ alɔ Nɔnyilɔ Rutherford gā aya ō cɛgbá fiyɛ duu ku ɛlā ō ka tɛɛcɛ ku nu a. Ɔyinɛ alɔ Nɔnyilɔ Rutherford yɔ i gweeye nɛɛnɛhi mla ɔtu caca nɛ á je ŋ nōó hile ligii kóō lɛ ɛgba dɛ eko nɛ ó kahinii: “Aa hayi kpaakpa ku a cijali ɔkwɛyi a lɛ Ondu. Aa gɔbu ipu ō ceyitikwu ku aa, jaa gbeeko néē géē je ɛjɛɛji ɛ̄gbā ō gba ku ɛkɛmgbɛ cataajɛ a. Aa tɔna ku ɔkoolɔhi a gā ɛga doodu. Ɛjɛɛji ɛcɛ cɛ̄gbá ō jé piii ka Ujehofa wɛ Ɔwɔico a, Ujisɔsi Ukraist kē wɛ Ɔcɛ́ ku aɔcɛ́ mla Ondu ku aondu a. Ɛ̄cī nyā wɛ ɛ̄cī ō cɛgbá fiyɛ duu ipu ɔ̄kā ku alɛɛcɛ a. Aa le jé kpɔcii ka Ɔcɛ́ a gbɔɔ ō lé ɔcɛ́ ɛ! Aa kē lɛ uklɔ ō da ɛjɛɛji ācɛ kéē lɛ ɛlā nyā po. Ohigbu ɔɔma, aa ka ɔ tɛɛcɛ, aa ka ɔ tɛɛcɛ, ka ɔ tɛɛcɛ, kɛla lɛyikwu Ɔcɛ́ a mla Ajɔɔcɛ ku nu tɛɛcɛ!”

Arthur ka anuɔ mla ayinɛ ɔhá a kwu ɔdā ocabɔ néē je playi a i hɛ, anu ó gbɔɔ ō wa ajɛ ɛmɛɛma a. Ɛgɛ nōó cɛtɔha mla ɔkpá néē ta a, ɛyi ku “ADV” néē ta tu ɔdā ocabɔ nōo playi a wɛ kahinii: “Da Ācɛ Lɛyikwu Ɔcɛ́ A Mla Ajɔɔcɛ Ku Nu.”

Ojileyi nɛhi néē ya ipu igeli ku Cedar Point ɔɔma, tu ayinɛ a abɔ kéē lɛ ɔtu ku uwa kwu uklɔ ku ɔna ō ta lɛyikwu Ajɔɔcɛ nōo wɛ uklɔ nōo cɛgbá fiyɛ duu a, ācɛ nōo kē cɛ a kē gweeye nɛhi ō lɛ abɔ ipu uklɔ ku ɔna ō ta nyā. Ɔcɛ éyi nōo wɛ u colporteur (néē hi ka ɔcɛ o gbɔbu ɔna ō ta babanya) nōo ŋma igeli ku Oklahoma, U.S.A. a, kahinii: “Ɛga nɛ alɔ yuklɔ kóō leyikwu udistrict a, wɛ ɛga nɛ ācɛ gē yuklɔ kóō bu aɔdā ocɛgbá néē hi ka u coal a ŋma ajɛ, é wɛ ācɛ nōo gbɛha nɛhi.” Ó ka ku igbalɛwa eko nɛ ācɛ lɛ ɛlā nōo yɔ ipu umagajin ku Golden Age a po, “é gē gbɔɔ ō jikwu boobu.” Ó kahinii: “Alɔ gweeye nɛhi ohigbu ku alɔ lɔfu je otabɔ lɛ uwa gla.”

Ācɛ Oklɔcɛ Ku Ubáyíbu a gáā le má peee, ɛgɛ nɛ ɛlā ku Ujisɔsi nōo yɔ ipu ɔkpá ku Ulúku 10:2 a cɛgbá fiya fiya lɛ a. Ó kahinii: “Īkpɔ̄dɛ̄hɔ̄ ā nwuné nɛ̄hi, amáŋ ācocɔ̄dɛ̄hɔ̄ í nwuné ŋ́.” Abɔ ihayi ɔɔma le ŋmɛyi a, é lɛ ɔtu ku uwa ya ekponu fiyɛ otɛtɛ ō da ācɛ lɛyikwu Ajɔɔcɛ a ɛga doodu.