1. Eyiyoce nyá nɛ Ujehofa je lɛ alɔ a?

 UJEHOFA je ɛnɛɛnɛ eyiyoce ku oyeeyi opiyoo lɛ alɔ. Ācɛ ōhī lɛ eyiyoce ō lā oyeeyi opiyoo ipu ɔkpanco mla ɔkpiye ku alelekwu nōó gáā kwū gɛ ŋ. (1 Ukɔ́r. 15:50, 53) Amáŋ, ācɛ alɛwa kē lɛ eyiyoce ō lā ipu ɛcɛ nyā piyoo néē géē jila iyē mɛɛlɛ klla lā mla eeye. (Mafú 21:3, 4) Ɔdaŋ nɛ alɔ lɛ eyiyoce ō lā oyeeyi opiyoo ipu ɔkpanco amāŋ ɛcɛ nyā, eyiyoce nɛ alɔ lɛ a jɛ alɔ eyī ibi.

2. Ɔdi nɛ eyiyoce ku alɔ gbolo ce ɔ a, ɔdiya nɛ alɔ kē lɔfu ka lɛ a?

² Ɛlā nōo wɛ “eyīyōce” ɛgɛ nɛ Ubáyíbu bi ɔ yuklɔ lɛ a, lɛ ō ya “mla ō leyice ku aɔdā olɔhi géē ya ɛcɔbu.” Alɔ lɔtuce lɔfu lɔfu ku eyiyoce nɛ alɔ lɛ lɛyikwu ɛcɔbu a géē ya piii, ohigbu ka ɛgiyi Ujehofa nōó ŋma a. (Uróm 15:13) Alɔ jé ɔdā nɛ ó cokonu ku nu a, alɔ kē jé ka ó gē ya ɔdā nɛ ó cokonu ku nu a eko doodu. (Áluk. 23:19) Alɔ lɔtuce lɔfu lɔfu ka ó yɔ i ŋmo Ujehofa unwu klla jé ka ó lɔfu ō ya ɛjɛɛji ɔdā nɛ ó ka ka anuɔ géē ya a. Ohigbu ɛnyā, eyiyoce ku alɔ i gbolo ce ɔdā nɛ alɔ gē gbɛla nu amāŋ ɔdā nɛ alɔ dɔka kóō ya a ŋ. Eyiyoce ku alɔ gbolo ce ɔdā nōo géē ya piii a.

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a? (Aíjē Kú Ɛ̄gbā 27:14)

³ Adā alɔ nōo yɔ ɔkpanco a yihɔtu alɔ, ó kē dɔka ku alɔ kpɔtuce ɔ. (Jé Aíjē Kú Ɛ̄gbā 27:14.) Ɔdaŋ ku eyiyoce ku alɔ lɛ Ujehofa lɔfu, ó géē tɔɔtɛ lɛ alɔ ō lɔtu unwalu nɛ alɔ géē má, klla hayi lɔfu mla eeye ɛgɛ duuma nɛ ɔdā nōo géē ya alɔ a kóō lɛ a. Alɔ kɛla lɛyikwu ɛgɛ nɛ eyiyoce ku alɔ gē gbo alɔ a. Amáŋ aflɛyi, alɔ géē kɛla lɛyikwu ɛgɛ nɛ eyiyoce ku alɔ lɛbɛɛka ekli o  kwaajɛ klla lɛbɛɛka ɔkpu o kwɛyi a. Oŋma ɔɔma, alɔ klla géē kɛla lɛyikwu ɛgɛ nɛ alɔ lɔfu ya ku eyiyoce ku alɔ kóō lɔfu tōōtɔ̄ɔ̄ a.

4. Ɛgɛnyá nɛ eyiyoce ku alɔ lɛbɛɛka ekli ō kwaajɛ a? (Ācɛ Uhíbru 6:19)

⁴ Ipu ɔkpá nɛ ó ta gē lɛ Ācɛ Uhibru a, Upɔlu lɛ eyiyoce ku alɔ gbla ekli o kwaajɛ. (Jé Ācɛ Uhíbru 6:19.) Igbalɛwa Upɔlu gē bi ɔkɔ amāŋ ugbeenyi le gā iyawu, ohigbu ɛnya ó jé kē gē bi ekli o kwaajɛ le ya ku eŋkpɔ ka ó hii kpo ɔkɔ amāŋ ugbeenyi ɔɔma ŋ. Ó lɛ eko éyi lɛ a, ó yɔ ipu ugbeenyi yɔ i gā iyawu anu isu a gbɔɔ ō tugbagwu a. Ɛpleeko ɔɔma, ó má ācɛ o pɛ ugbeenyi a yɔ i ta ekli o kwaajɛ gā ipu eŋkpɔ a o ya ɛɛ kéē ci ugbeenyi a ŋma ō nyɔ gáā gbo ɛcɔ ŋ. (Ācot. 27:29, 39-41) Bɛɛka ekli o kwaajɛ a, eyiyoce ku alɔ gē ta alɔ abɔ ō yɔ kwu Ujehofa ajaajɛ cɛɛ ku alɔ hii ma ō gba ɔ ɛ̄gbā, eko duuma nɛ alɔ gbɔɔ ō má unwalu nōo lɛbɛɛka ugbagwu ku isu a ŋ. Eyiyoce ku alɔ gē ya ku alɔ yɔ cii eko duuma nɛ alɔ gē má unwalu, ohigbu ku alɔ jé ku āhɔ̄ a géē lɔhi. Alɔ bla, ka Ujisɔsi pi alɔ ahɔ̄ kē géē ya alɔ ŋmo piii. (Ujɔ́n. 15:20) Ohigbu ɛnyā, ō gbɛla tu aɔdā nɛ Ujehofa cokonu ku nu a géē ta alɔ abɔ ō gba ɔ ɛ̄gbā gɔbu.

5. Ɛgɛnyá nɛ eyiyoce ta Ujisɔsi abɔ eko nɛ ó jé ka ó géē kwū a?

⁵ Leyi yɛ ɛgɛ nɛ eyiyoce ta Ujisɔsi abɔ kóō hayi kpaakpa naana nɛ ó jé ka anuɔ géē kwu ikwū obɔbi nɛhi a. Ɛ̄cī ku Upɛntikɔsi 33 Eko Ku Ukraist, ɔyikpo Upita kɛla lɛyikwu ɛgɛ nɛ Ujisɔsi yɔ cii klla lɔtuce lɔfu lɔfu a kahinii: “N leyīce ɔdā nɛ̄ awɔ Ɔwɔicō í yá ga um ā ohígbū ka á gáā habɔ̄ um tá ɔlékwū ŋ́, á kōō gáā cɛ̄ ká ɔkpíyē kú ɔ̄cocɛ̄hɔ̄ kú uwɔ kóō wā tāajɛ ipú únóji ŋ́. . . . Abɔ̄ a yɔ̄ pī um ā, ɔtū he um nɛ̄hi.” (Ācot. 2:25-28; Aíjē 16:8-11) Naana nɛ Ujisɔsi jé ka ó géē kwū a, ó lɔtuce lɔfu lɔfu ka Ɔwɔico géē je ɔ heyi ŋma ɔlekwu, nɛ ó klla géē lɛ eeye ō gáā yɔ mla Adā nu nōo yɔ ɔkpanco a kpɔ.—Uhíb. 12:2, 3.

6. Ɔdi nɛ ɔyinɛ alɔ éyi ka lɛyikwu eyiyoce a?

⁶ Eyiyoce nɛ alɔ lɛ abɔ alɔ wɛ Ācɛ O Yɛce Ukraist a, ta ayinɛ alɔ alɛwa abɔ kéē lɔtu ɛ. Leyi yɛ ocabɔ ku ɔyinɛ alɔ Leonard Chinn, ɔcɛ o hayi kpaakpa éyi nōo lā ipu England a. Ɛpleeko ku Ɛfú Ō Kpo Ku Oduudu Ɛcɛ Aflɛyi a, é kwu u ta agba ohigbu ka ó ta ō wɛ ipu icɔɔja. É kwu u ta inu agba nɛ anu foofunu yɔ ɔya ɛpa. Igbihi ɔɔma, é kwu ɔ abɔfu kóō yuklɔ nōo lɔfu nɛhi. Ó ka igbihaajɛ kahinii: “Ɔdā nɛ um má ipu oyeeyi a ta um abɔ ku um jé ɛgɛ nɛ alɔ cɛgbá eyiyoce, o ya ɛɛ ku alɔ lɔtu a. Alɔ lɛ ocabɔ ku Ujisɔsi, ayikpo ku Ujisɔsi, acomɛɛbɛ, mla aɛnɛɛnɛ okonu ō ce nōo yɔ ipu Ubáyíbu a. Ɛjɛɛji aɔdā nōo ba nyā gē je eyiyoce ku ɛcɔbu lɛ alɔ nɛhi klla gē lɛ ɔfu tu alɔ iyē ō lɔtu.” Eyiyoce lɛbɛɛka ekli o kwaajɛ lɛ u Leonard, ó kē lɔfu wɛ ekli o kwaajɛ lɛ alɔ gla duu.

7. Ɛgɛnyá nɛ unwalu ɛyɛɛyɛyi nɛ alɔ gē má a gē ya ku eyiyoce ku alɔ kóō lɔfu tōōtɔ̄ɔ̄ a? (Ācɛ Uróm 5:3-5; Ujɛ́mīsi 1:12)

⁷ Eko duuma nɛ alɔ lɔtu unwalu ɛyɛɛyɛyi klla má ɛgɛ nɛ Ujehofa ta alɔ abɔ ɛ ma, ó gē cɛ lɛ alɔ jé kpɔcii ku alɔ teyi olɔhi ku nu. (Jé Ācɛ Uróm 5:3-5; Ujɛ́mīsi 1:12.) Ohigbu ɛnyā, eyiyoce ku alɔ le lɔfu fiyɛ babanya fiyɛ eko nɛ alɔ miyɛ ɔkoolɔhi a. Usetan dɔka ku unwalu nɛ alɔ gē má a kóō ya ku abɔ kóō hɛ alɔ iyē, amáŋ mla otabɔ ku Ujehofa alɔ lɔfu lɔtu ku unwalu ɛyɛɛyɛyi nɛ alɔ gē má a mɛɛlɛ.

8. Ɛgɛnyá nɛ eyiyoce lɛbɛɛka ɔkpu o kwɛyi a? (1 Ācɛ Utesaloníka 5:8)

⁸ Ubáyíbu lɛ eyiyoce ku alɔ gbla ɔkpu o kwɛyi. (Jé 1 Ācɛ Utesaloníka 5:8.) Icɔɔja gē bi ɔkpu o kwɛyi o ya ɛɛ kóō gbo ɛyi ku nu, ŋma  ɛjɛɛji aɔdā nɛ aolɛla ku nu géē ceyitikwu ō ta kla ɔ ɛyi a. Ipu unu nɛ alɔ gē nu ta Ebilii a, alɔ cɛgbá ō gbo ɔtu ku alɔ ŋma ɛgiyi aɔdā obɔbi ku Ebilii. Ó gē bi aɔda ɛyɛɛyɛyi le ja alɔ ma mla ō biya ɛlá ō gbo ku alɔ. Ɛgɛ nɛ ɔkpu o kwɛyi gē gbo ɛyi ku icɔɔja a, eyiyoce nɛ alɔ lɛ a gē gbo ɛlá ō gbo ku alɔ o ya ɛɛ ku alɔ hayi kpaakpa lɛ Ujehofa.

9. Ɔdi gē ya da ācɛ ɔdaŋ kē lɛ eyiyoce ŋ ma?

⁹ Eyiyoce ku oyeeyi opiyoo nɛ alɔ lɛ a géē ta alɔ abɔ ō ya ōmiya ku ijeeyi. Abɔ ɔhá ku nu, ɔdaŋ ku eyiyoce ku alɔ i lɔfu gɛ ŋ, nɛ alɔ klla gbɔɔ ō gbɛla lɛyikwu ɔdā unwu ku alɔ foofunu, alɔ lɔfu je eyiyoce nɛ alɔ lɛ ō lā oyeeyi opiyoo a mlanyi. Leyi yɛ ocabɔ ku Ācɛ O Yɛce Ukriast nōo lā ipu Ukɔrinti ku ikee a. É lɛ ɔtu okpoce lɛ ɛnɛɛnɛ okonu ō ce ku Ɔwɔico éyi gɛ ŋ, anu kē wɛ eyiyoce ka oheyi ŋma ɔlekwu a. (1 Ukɔ́r. 15:12) Upɔlu ta ɔkpá ku ācɛ nōó kpɔtuce oheyi ŋma ɔlekwu ŋ ma, gē lā oyeeyi kéē ya ɔdā nōo gē ŋmo uwa unwu a foofunu. (1 Ukɔ́r. 15:32) Icɛ, ācɛ alɛwa nōó lɛ eyiyoce duuma lɛyikwu aokonu ō ce ku Ɔwɔico ŋ ma, gē ya ɔdā duuma néē ya gla ku oyeeyi ku uwa kóō lɛ eeye babanya. Amáŋ alɔ wɛ ɛyɛɛyi ohigbu ku alɔ lɛ ɔtu ku alɔ kpɔtuce ɛcɔbu nɛ Ɔwɔico cokonu ku nu a. Eyiyoce nɛ alɔ lɛ a lɛbɛɛka ɔkpu o kwɛyi nōo gē gbo ɛlá ō gbo ku alɔ, klla ge ta alɔ abɔ ku alɔ hii gbɛla iyi alɔ foofunu ŋ, ohigbu ka ɔɔma lɔfu biya ɛma ku alɔ mla Ujehofa.—1 Ukɔ́r. 15:33, 34.

10. Ɛgɛnyá nɛ eyiyoce gáā lɔfu gbo alɔ ŋma ō lɛ ɛlá ō gbo obɔbi a?

¹⁰ Eyiyoce nɛ alɔ lɛ a klla lɔfu gbo alɔ ŋma ō gbɛla ka ó gáā tɔɔtɛ lɛ alɔ ō ya ɔdā nōo géē he Ujehofa ɔtu ŋ. Ocabɔ mafu, ācɛ ōhī lɔfu gbɛla kahinii: ‘Ń gáā wɛ ipu ācɛ nōo géē lā oyeeyi piyoo a gla ŋ. Ń lɔhi jɛ fluflu ŋ. Ó gáā tɔɔtɛ gā um ō ya ɔdā nɛ Ɔwɔico tine a gla gboogboo ŋ.’ Bla ku Ɛlifaasi ɔcɛ ɛkɛmgbɛ nōo nyɔ gáā ta Ujobu ɔtu kwu ɔtu a bi ɛdɔ ɛlá ō gbo ɔɔma le gbo ojuju mla Ujobu ɛ. Ɛlifaasi kahinii: “Ɔlɛɛcɛ í yá lɛbɛ̄ɛka ɔdā nōó le yēŋēē ā glá ŋ́.” Ó klla ka lɛyikwu Ɔwɔico kpɔ kahinii: “Ɔwɔicō í lɔtūce aálelékwū-ōtɛ̄hɔ̄ kú nū ā ŋ́. Ɔkpáncō nááná í kōō le yēŋēē tū Ɔwɔicō ŋ́.” (Ujób. 15:14, 15) Ɛnyā wɛ ɛkɛmgbɛ obɔbi nɛhi! Bla ka Usetan wɛ ɔcɛ nōo dɔka ku a gbɛla lɛ a. Ó jé ka ɔdaŋ ku a gɔbu yɔ i gbɛla lɛ a, eyiyoce nɛ a lɛ a géē gbɔɔ ō mɛ ɛmɛɛma. Ó lɛ a, ta aɛlā ɛkɛmgbɛ ɛgɔɔma cɛɛ ku a lɛ ɔtu ku uwɔ kwu aokonu ō ce ku Ujehofa. A hii lɛ aafu ka ó dɔka ku a lā oyeeyi opiyoo, klla géē ta uwɔ abɔ ō ya ōmiya ku uwɔ jila ŋ.—1 Utím. 2:3, 4.

11. Ɔdiya nɛ alɔ cika ō gbeyi cii ku Ɔwɔico kóō lɛ eyiyoce ku alɔ ya jila a?

¹¹ Ó gē tɔɔtɛ ku alɔ lɛ abɔ bi eyiyoce ku alɔ lɔfu lɔfu eko doodu ŋ. Ó lɔfu tɔɔtɛ lɛ alɔ ō gbeyi cii ku Ɔwɔico kóō ya aokonu ō ce ku nu jila ŋ. Amáŋ ohigbu ka Ujehofa humayi yeeyi ɛ ma, ɔdā nōo lɔfu lɛbɛɛka ó le gboji tu alɔ a lɔfu le kpii tu ɔ. (2 Upít. 3:8, 9) Ó géē ya ɔdā nɛ ó cokonu ku nu a ɔwɛ nōo lɔhi fiyɛ duu a, amáŋ ó lɔfu ya ɔ eko nɛ alɔ leyice a ŋ. Ɔdi gáā ta alɔ abɔ ō lɛ abɔ bi eyiyoce ku alɔ lɔfu lɔfu, abɔ alɔ yɔ i gbeyi cii ka Ɔwɔico kóō lɛ aokonu ō ce ku nu ya jila a?—Ujɛ́m. 5:7, 8.

12. Oŋma ɛlā nōo yɔ ipu ɔkpá ku Ācɛ Uhíbru 11:1, 6 a, ɛgɛnyá nɛ eyiyoce tɛɛma kwu ɔtu okpoce a?

¹² Alɔ géē lɛ abɔ bi eyiyoce ku alɔ lɔfu lɔfu ɔdaŋ ku alɔ yɔ kwu Ujehofa ajaajɛ, ohigbu ka anu gáā ya ku eyiyoce ku alɔ kóō ya jila a. O ya ɛɛ ku alɔ lɛ eyiyoce, alɔ cika ō lɛ ɔtu okpoce ku Ujehofa yɔ, ka ó klla “géē cíla ācɛ nēe dɔɔ̄kā nū ā ulé.” (Jé Ācɛ Uhíbru 11:1, 6.) Ɔdaŋ ku alɔ kpɔtuce ɔkwɔɔkwɛyi ka Ujehofa yɔ, alɔ géē lɔtuce lɔfu lɔfu fiyɛ ka ó géē ya ɛjɛɛji ɔdā nɛ ó cokonu ku nu a. Alɔ leyi yɛ ɛnɛɛnɛ ɔwɛ ōhī nɛ alɔ lɔfu ya ku ɛma ku alɔ  mla Ujehofa kóō lɔfu fiyɛ, nōo géē ya ku alɔ lɛ abɔ bi eyiyoce ku alɔ lɔfu lɔfu a.

13. Ɛgɛnyá nɛ alɔ lɔfu tubla Ɔwɔico ajaajɛ a?

¹³ Gbɔɔkɔ lɛ UJehofa, ku a klla jé Ɛlā ku nu. Naana nɛ alɔ i má Ujehofa eyī gla ŋ ma, alɔ lɔfu tubla ɔ ajaajɛ gla. Alɔ lɔfu kɛla lɛ ɔ ipu ɔkɔ ō gba, klla lɔtuce lɔfu lɔfu ka ó géē po ɔkɔ ō gba ku alɔ. (Ujɛr. 29:11, 12) Alɔ lɔfu jahɔ tu Ɔwɔico ŋma lɛ ō jé Ɛlā ku nu mla ō gbɛla tu ɔ. Abɔ alɔ gē jé ɔ̄kā lɛyikwu ɛgɛ nɛ Ujehofa teyi tu ācɛ nōo hayi kpaakpa lɛ ɔ eko ikee a, eyiyoce ku alɔ gē je lɔfu fiyɛ. Ɛjɛɛji ɔdā nōo yɔ ipu Ɛlā ku Ɔwɔico a “wɛ ɔdā ō bī nwū alɔ ɛlā, cɛ́ɛ́ ká ālɔ̄ lɛ eyīyōce lɛ ŋmá lɛ ɔtū ō lé mɛ́mla ɔtū ō tū kwu ɔtū nɛ̄ ɔkpá kú ɛlɔ̄ɔwɔicō ā ī je lɛ alɔ ā.”—Uróm 15:4.

14. Ɔdiya nɛ alɔ cika ō gbɛla lɛyikwu ɔdā nɛ Ujehofa ya lɛ ācɛ ɔhá ɛ ma?

¹⁴ Gbɛla lipu lipu tu ɛgɛ nɛ Ujehofa ya aokono nɛ ó ce a jila ɛ ma. Leyi yɛ ɔdā nɛ Ɔwɔico ya lɛ Ebraham mla Usara a. É le hilokplici néē lɔfu ma ɔyi gla gɛ ŋ. Naana kpɔ a, Ɔwɔico cokonu lɛ uwa ka é géē ma ɔyi. (Ohút. 18:10) Ɔdi nɛ Ebraham ya a? Ubáyíbu da alɔ kahinii: “Ébrahām cɛ̄ɛ̄lā nū yɔ̄ ī kpɔ́tūce nááná nōó lɛ ɔdā nōó í kpɔ́tūce ɔ́ ŋ́ mā.” (Uróm 4:18) Naana nɛ Ebraham i jé ɛgɛ nɛ Ɔwɔico gáā bi le ya okonu nɛ ó ce a jila ŋ ma, ó lɔtuce lɔfu lɔfu kpɔ ka Ɔwɔico géē ya okonu nɛ ó ce a jila. Ujehofa i kē je ɔcɛ ō hayi kpaakpa ɔɔma abɔ gaajɛ ŋ. (Uróm 4:19-21) Aɔ̄kā ɛgɛnyā gē cɛ lɛ alɔ jé kpɔcii ka Ujehofa géē ya ɛjɛɛji okonu nɛ ó ce a jila, ɔdaŋ nōó kóō lɛbɛɛka ó gáā tɔɔtɛ gla gboogboo ŋ ma.

15. Ɔdiya nɛ alɔ cika ō gbɛla lɛyikwu aɔdā nɛ Ɔwɔico ya lɛ alɔ ɛ ma?

¹⁵ Leyi yɛ ɔdā nɛ Ujehofa ya gā uwɔ ɛ ma. Gbɛla lɛyikwu ɛgɛ nɛ awɔ abɔyi uwɔ lɛ itene ŋma ō ya jila ku aokonu ō ce nōo yɔ ipu Ɛlā ku Ɔwɔico a. Ocabɔ mafu, Ujisɔsi cokonu ka Adā  nu géē je aɔdā nōo ce uwɔ ɛgbá ipu oyeeyi a gā uwɔ. (Umát. 6:32, 33) Ujisɔsi klla je ɔtu ō tu kwu ɔtu gā uwɔ ka Ujehofa géē je Alelekwu Ihɔ ku nu gā uwɔ eko duuma nɛ a ba ɔ ɛbɔ ku nu. (Ulúk. 11:13) Ujehofa lɛ aokonu ō ce nyā ya jila ɛ. Á jé ŋ, a lɔfu gbɛla lɛyikwu aokonu ō ce ɔhá nɛ ó ya jila ohigbu uwɔ a. Ocabɔ mafu, ó cokonu ka anuɔ géē je íne obiya ku uwɔ ya uwɔ ɛhi, géē je ɔtu ō tu kwu ɔtu gā uwɔ, klla géē je ɔdā nɛ a cɛgbá o ya ɛɛ ku a yɔ kwu ajaajɛ a gā uwɔ. (Umát. 6:14; 24:45; 2 Ukɔ́r. 1:3) Ɔdaŋ ku a gbɛla lɛyikwu aɔdā nɛ Ɔwɔico ya gā uwɔ ɛ ma, a géē ya ku eyiyoce ku uwɔ lɛyikwu ɔdā nɛ ó géē ya ɛcɔbu a kóō lɔfu tōōtɔ̄ɔ̄.

16. Ɔdiya nɛ eyiyoce nɛ alɔ lɛ a wɛ ɛnɛɛnɛ ɛhi a?

¹⁶ Eyiyoce ka oyeeyi opiyoo nɛ alɔ lɛ a wɛ ɛnɛɛnɛ ɛhi ŋma ɛgiyi Ɔwɔico. Alɔ yɔ i leyice ɛnɛɛnɛ ɛcɔbu nɛ alɔ jé kpɔcii ka ó géē ya piii a. Ó lɛbɛɛka ekli o kwaajɛ nōo gē ya ku alɔ hayi lɔfu ō lɔtu ku unwalu, o ya ŋmo, mla eko nɛ oyeeyi ku alɔ kwu ikwū ajaajɛ. Eyiyoce a lɛbɛɛka ɔkpu o kwɛyi nōo gē gbo ɛlá ō gbo ku alɔ, o ya ɛɛ ku alɔ ta aɛlā ō gbo obɔbi mla ō ya aɔdā nōo lɔhi a. Eyiyoce nyā nɛ Ubáyíbu kɛla lɛyikwu ɔ a gē ta alɔ abɔ ō jé Ɔwɔico lɔɔlɔhi fiyɛ, klla gē mafu lɛ alɔ ɛgɛ nɛ Ɔwɔico yihɔtu alɔ lɛ a. Alɔ gē lɛ itene nɛhi abɔ alɔ lɛ abɔ bi eyiyoce ku alɔ lɔfu lɔfu a.

17. Ɔdiya nɛ eyiyoce nɛ alɔ lɛ a gē ya ku alɔ gweeye a?

¹⁷ Ipu ɔkpá nɛ Upɔlu ta gē lɛ Ācɛ Urom a, ó ta uwa ɔtu kwu ɔtu kahinii: “Aá . . . gwéeyē ohígbū ka aá lɛ eyīyōce.” (Uróm 12:12) Upɔlu lɔfu gweeye ohigbu ka ó jé ku ɔdaŋ ka ó hayi kpaakpa gā ajaajɛ, ó géē lɛ oyeeyi opiyoo ipu ɔkpanco. Alɔ lɔfu gweeye ohigbu eyiyoce nɛ alɔ lɛ a duu, ohigbu ka alɔ jé kpɔcii ka Ujehofa géē ya aɔdā nɛ ó cokonu ku nu a. Ɛgɛ nɛ ɔcɛ o ta ɔkpá ku Aíjē Kú Ɛ̄gbā nyā ka a: “Ɔ̄cɛ dúúmā . . . nōo gbolóce Óndú, Ɔwɔicō ā kóō gwéeyē. . . . Ó gē yá ɛlā nōó ka ā eko dóódu.”—Aíjē 146:5, 6.