Ɛpla ihayi ɔɔma, ɔwa ku alɔ ya opiyabɔ ōhī nōo ta Ācɛ O Klɔcɛ Ku Ubáyíbu a abɔ kéē piyatɔha ipu ɛ̄gbā ō gba ku uwa. Ɔda Ō Gbaajɛ a gbɔɔ ō je aɛlā ōhī ŋma ipu Ubáyíbu teyi peee néē gē leyi yɛ ɔ ipu ōjila ku ɔtahɛ ku alaadi doodu néē gē ya ɔkɔ ō gba klla gē je owoofu lɛ Ujehofa a. Ācɛ O Klɔcɛ Ku Ubáyíbu a klla gbɔɔ ō ya aukalɛnda ōhī wɛɛcɛ nōo gē mafu aɛga ku Ubáyíbu néē géē kɛla lɛyikwu ɔ ipu ōjila ku ɔtahɛ ku alaadi doodu, mla ijé néē géē gwo ɛ̄cī doodu ɛpleeko néē gē ya oklɔcɛ ku abɔyi uwa amāŋ ɛ̄gbā ō gba ku apɔlɛ a.

Ipu aōjila ku uwa a, Ācɛ O Klɔcɛ Ku Ubáyíbu a gē kɛla lɛyikwu aɔdā ōhī néē má ipu uklɔ ku ɔna ō ta, géē ka ɔdā nɛ Ujehofa ya lɛ uwa nōo jɛ uwa eyī, géē gwo ijé klla gbɔɔkɔ. Eva Barney, nōo ya ubatisim ipu ihayi ku 1923 eko nɛ ó wɛ ihayi 15 a kahinii: “Ɔdaŋ ku a dɔka ō kɛla lɛyikwu ɔdā nɛ Ujehofa ya gā uwɔ nōo jɛ uwɔ eyī a, a géē caŋjɛ cɛɛ a gbɔɔ ɛlā ō ka ku uwɔ ɔwɛ ɛgɛnyā kahinii: ‘N ta Ondu ahinya ku ɛjɛɛji aɔdā olɔhi nɛ ó ya gā um a.’” Ó gē he ōhī ku ayinɛ a ɔtu nɛhi ō kɛla lɛyikwu ɔdā nɛ Ujehofa ya lɛ uwa nōo jɛ uwa eyī a. Ɔyinɛ alɔ Nɔnya Barney gɔbu kahinii: “Ɔyinɛ alɔ Nɔnyilɔ Godwin o he alɔ ɔtu nōo le hilokplici ɛ ma lɛ aɔdā olɔhi alɛwa ō ta Ondu a ahinya ku nu. Amáŋ eko nɛ ɔnyā nu le má ka ɔyinɛ nōo yɔ i gbɔbu ipu ōjila ku ujɔ a i yɔ i lɛ ɔtu ɛbɔ gɛ ŋ, ó géē lɛ abɔ kwu ɔba nu ili ligii cɛɛ ó gáā yaajɛ.”

Ipu ɔya doodu, eyeeye ku aujɔ a gē lɛ ɛnɛɛnɛ ōjila néē gē ya ɔkɔ ō gba klla gē je owoofu lɛ Ujehofa. Ō kɛla lɛyikwu ōjila a, Ɔda Ō Gbaajɛ ku Ɔya Ɔmɛnɛ 1, 1923 kahinii: “Ɛyinɛhi ku aya nōo yɔ ipu ōjila a lɛ ō ya mla ɛnɛɛnɛ ɔdā nɛ ayinɛ a má ipu uklɔ ku ɔna ō ta mla aɛlā nōo géē ta ayinɛ ɔhá ɔtu kwu ɔtu. . . . Alɔ kpɔtuce ku aōjila ō ta ɔtu kwu ɔtu nyā géē ya ku ayinɛ kóō pi bla iyi uwa ajaajɛ.”

Charles Martin, nōo wɛ ihayi 19 nōo wɛ ɔcɛ o tɔɔna Ɛlā Ɔwɔico nōo ŋma u Vancouver, Canada a, lɛ itene nɛhi ŋma aōjila ku ujɔ nyā. Ó kahinii: “Amanya wɛ ɛga aflɛyi nɛ um nwu ɛlā nɛ um géē ka eko nɛ um gē yuklɔ ku ɔna ō ta ŋma ɔlɛ gā ɔlɛ a. Ŋma eko teeko, ɔcɛ éyi gē kɛla lɛyikwu ɛnɛɛnɛ ɛlā nōó má ipu uklɔ ku ɔna ō ta ŋma ɔlɛ gā ɔlɛ a. Ɛnyā cɛ gā um jé aɔdā ōhī nɛ um géē ka mla ɛgɛ nɛ um lɔfu je ōhī lɛ ɔka nɛ ācɛ nōó dɔka ō jahɔ ŋ ma gē da a.”

“Ayinɛ a klla gáā le piyatɔha tōōtɔ̄ɔ̄ ŋma lɛ ō lɛ ɛ̄cī ōhī taajɛ néē gē ta ɛjɛɛji ayinɛ a ɔtu kwu ɔtu kéē gɛɛcɛ ku uklɔ ku ɔna ō ta.” Ɔda Ō Gbaajɛ ku Ɔya Ɔmɛnɛ 1, 1923 ya ɛlā ō ka tɛɛcɛ nyā kahinii: “O ya  ɛɛ ku ɛjɛɛji alɔ kóō piyatɔha ipu uklɔ ekponu nɛ alɔ gē ya a . . . , ɛ̄cī Utiyusde, ku Ɔya Ɔmɛhɔ 1, 1923, géē wɛ ɛ̄cī nɛ ɛjɛɛji alɔ géē yɔ i gɛɛcɛ ku uklɔ ku ɔna ō ta. Igbihi ɔɔma, Utiyusde aflɛyi ku ɔya doodu géē wɛ ɛ̄cī ku uklɔ ku ɔna ō ta. . . . Eyeeye ku ayinɛ nōo yɔ ipu ujɔ a cika ō ya aya ku uwa ipu uklɔ ku ɔna ō ta a.”

Ācɛ O Klɔcɛ Ku Ubáyíbu nōo wɛ ɛdrɔ a gē yuklɔ ku ɔna ō ta a duu. Hazel Burford, nōo wɛ ihayi 16 foofunu eko ɔɔma a kahinii: “Aɔkpá petepete néē gē ya wɛɛcɛ a gē lɛ ocabɔ ku ɔka ō ka nɛ ɔcɛ lɔfu bi tu ɛyi. a Ami mla upapa nɛhi ku um gē ceyitikwu lɔfu lɔfu ō ya ɛjɛɛji aɔdā nōo ba nyā.” Amáŋ, ó le hɛ ɔyinɛ alɔ Nɔnya Burford idaago ɛgɛ nɛ ɔtu ya ɔyinɛ alɔ nɔnyilɔ éyi lɛyikwu uklɔ ku ɔna ō ta ku nu a. Ó kahinii: “Ɔtu ya ɔyinɛ alɔ nɔnyilɔ éyi nōo le hilokplici a, ku ń cika ō tɔɔna lɛ ācɛ ŋ. Eko ɔɔma, ó ta ācɛ ōhī eyī peee ka ɛjɛɛji Ācɛ O Klɔcɛ Ku Ubáyíbu, kwu ‘ayípōklóbīya mɛ́mla ayípɔ̄nɔ̄nyā’ cika ō je owoofu lɛ Ɔwɔico nōo Ya Ɛjɛɛji Odee a ŋ.” (Aíjē 148:12, 13) Amáŋ ɔyinɛ alɔ Nɔnya Burford gɔbu yɔ i tɔɔna kpɔ. Igbihaajɛ, ó gā inɔkpa ku Ugilɛdi ku uklasi ɔmpa klla kwu piya ɔcɛ o tɔɔna ŋma éwo éyi gā éwo ɔhá ipu Panama. Igbihaajɛ, ohile ku ayinɛ nɔnyilɔ a lɛ ɛlá ō gbo ku uwa ka ayipoklobiya mɛmla ayipɔnɔnya i cika ō yuklɔ ku ɔna ō ta ŋ ma piyabɔ.

Aojileyi nɛhi ku alɔ klla ta ayinɛ a abɔ kéē piyatɔha tōōtɔ̄ɔ̄. Ɛpleeko néē gē ya ojileyi nɛhi ku alɔ nyā a, ó lɛ ɛ̄cī néē je taajɛ ō bi le yuklɔ ku ɔna ō ta. Ocabɔ mafu, ipu ojileyi nɛhi ku alɔ néē ya ipu Winnipeg, Canada a, é ta ɛjɛɛji ācɛ nōo wa ojileyi nɛhi ɔɔma a ɔtu kwu ɔtu kéē yuklɔ ku ɔna ō ta ipu igeli ɔɔma ɛ̄cī 31 ku Ɔya Ɔmɛta. É yɛ fu ɛyinɛhi ku ācɛ ɛpleeko néē yɔ i ya ɛnɛɛnɛ uklɔ ku ɔna ō ta nyā a. Ɔdā olɔhi alɛwa kē bɛɛcɛ ŋma anu. Ipu ɛ̄cī 5 ku Ɔya Ɔmahata, ācɛ bɛɛka 7,000 a gā ojileyi nɛhi ɔhá néē ya ipu Winnipeg a. Ɛnyā wɛ ojileyi nɛhi néē ya ipu Canada nɛ ācɛ wa fiyɛ duu eko ɔɔma a.

Ojileyi nɛhi ocɛgbá fiyɛ duu nɛ Ācɛ Ocijali Ku Ujehofa ya ipu ihayi ku 1923 a, wɛ ɛ̄nɛ̄ é ya ipu Los Angeles, California ipu Ɔya Ɔmahata 18-26 a. Alaadi ōhī gbɔbu lɛ ɛ̄cī ku ojileyi nɛhi a, aɔkpá ku ɔka kɛla lɛyikwu ojileyi nɛhi a. A̱cɛ O Klɔcɛ Ku  Ubáyíbu a klla je ɔkpá petepete ō hi ācɛ igwu a lɛ ācɛ nōo fiyɛ 500,000. É lɛ aubana nōo kɛla lɛyikwu ojileyi nɛhi a, ba aumoto nōo gē bi ācɛ gā iyawu mla aumoto néē lɛ abɔyi uwa o ya ɛɛ kéē bi ɔ le hi ācɛ igwu.

Usati ku ɛ̄cī 25 ku Ɔya Ɔmahata, ɔyinɛ alɔ Nɔnyilɔ Rutherford ya ɛlā o ka tɛɛcɛ éyi nōo kahinii: “Sheep and Goats.” Ipu ɛlā ō ka tɛɛcɛ a, ó lɛ ɔ teyi peee ka “aala” a wɛ ācɛ nōo hayi kpaakpa nōo géē lā oyeeyi opiyoo ipu uparadais ɛcɛ nyā. Ó klla ya ɛlā o ka tɛɛcɛ ɔhá nōo kahinii: “A Warning.” Ɛlā ō ka tɛɛcɛ a kɛla lɛyikwu ɛ̄gbā ō gba ku ɛkɛmgbɛ, klla ta ācɛ nōo lɛ ɔtu olɔhi a ɔtu kwu ɔtu kéē nyɛɛ ŋma ‘Ubábīlɔn Nɛhi’ a. (Mafú 18:2, 4) Igbihaajɛ, Ācɛ O Klɔcɛ Ku Ubáyíbu nōo lɛ ɔtu caca nōo yɔ ipu oduudu ɛcɛ a, kɔ umiliyɔn ku autrati nyā nōo kɛla lɛyikwu ikpɛyi ɛlā ō ka tɛɛcɛ a lɛ ācɛ.

Ɛ̄cī amoomɛ ku ojileyi nɛhi a, ācɛ nōo fiyɛ 30,000 a po ɛlā ō ka tɛɛcɛ nɛ ɔyinɛ alɔ Nɔnyilɔ Rutherford ya nōo kahinii: “All Nations Marching to Armageddon, but Millions Now Living Will Never Die.” Abɔ Ācɛ O Klɔcɛ Ku Ubáyíbu a leyice ka ācɛ alɛwa géē wa a, é gáā lɛ ɔlɛ nɛhi éyi néē gwo ipu Los Angeles ɛpɛpɛ a miyɛ néē géē gba ije nu. O ya ɛɛ ku ɛjɛɛji ācɛ nōo wa a kóō lɔfu po ɛlā néē géē ka a, ayinɛ a bi umicrophone nōo yɔ ipu ɔlɛ néē miyɛ néē gba ije nu a le yuklɔ. Eko ɔɔma aumicrophone nyā kē wɛ ɛyipɛ. Ācɛ alɛwa ɔhá kē po ɛlā ō ka tɛɛcɛ nyā o bu ipu uredio.

Ipu ihayi ku 1923, ó gáā le teyi peee ka uklɔ ku ɔna ō ta a yɔ i nyila ipu éwo bɛɛka Africa, Europe, India, mla u South America. Ipu India, naana nɛ ɔyinɛ alɔ nɔnyilɔ A. J. Joseph yɔ i teyi kwu ɔnyā nu mla ayipɛ ɔlɛ nu ɛhili a, ó tabɔ ō ya aɔkpá ku alɔ wɛɛcɛ ipu uce ku Hindi, Tamil, Telugu, mla Urdu.

Ipu Sierra Leone, Ācɛ O Klɔcɛ Ku Ubáyíbu bɛɛka Alfred Joseph mla u Leonard Blackman, ta ɔkpá gā ɔlɛ ɔtahɛ ku abɔ ku ɛga o yuklɔ ku alɔ nōo yɔ Brooklyn, New York a, ka é yɔ i cɛgbá otabɔ. Ipu ɛ̄cī 14 ku Ɔya Ɔmɛnɛ, 1923, é gáā lɛ ohi ta uwa. Alfred kahinii: “Otu ku ɛ̄cī Usati éyi, n miyɛ ukɔɔlu nɛ ń leyice ŋ.” Ó po ɔkɛla ku ɔcɛ éyi nōo kɛla gbomgbom kahinii: “Awɔ wɛ ɔcɛ nōo ta ɔkpá gē lɛ u Watch Tower Society yɔ i ka ku aa cɛgbá ācɛ o tɔɔna Ɛlā Ɔwɔico a?” Alfred toohi kahinii: “Ii ami nɛ.” “Ami néē tɛhɔ a.” Ɔkɛla a wɛ ɔkɛla ku William R. Brown. Anu mla ɔnyā nu Antonia wa ŋma u Caribbean ɛ̄cī ɔɔma mla ayi nɔnya ku uwa ɛpa, Louise mla u Lucy. Ayinɛ a i gáā gbeyi gboji ajɛ gbɔbu ɛɛ kéē má ɔyinɛ alɔ nɔnyilɔ Brown mla apɔlɛ ku nu ŋ.

 Alfred gɔbu kahinii: “Ɔcɔɔci ku ɛ̄cī nōo gboce ɔ a, ami mla u Leonard yɔ i kɔka ŋma ipu Ubáyíbu ɛgɛ nɛ alɔ gē ya alaadi doodu a. Acigili, alɔ má ɔcɛnyilɔ éyi nōo jɛ nɛɛnɛhi hayi iyɔbu ɔwɛ ku alɔ a. Ɔyinɛ alɔ Brown nɛ. Ó lɛ ɔtu caca lɛ ɛlā ɔkwɛyi a nɛɛnɛhi nɛ ó dɔka ō ya ɛlā ō ka tɛɛcɛ boobu ɛ̄cī nōo gboce ɔ a.” Ó kóō gaajɛ ɔya éyi ŋ, ɔyinɛ alɔ Nɔnyilɔ Brown kwu ɛjɛɛji ɔkpá nɛ ó bi a u kɔ mɛ. Ó gboji ŋ ó miyɛ aɔkpá nōo fiyɛ 5,000, abɔ eko dee gla ligii a alɔ klla cɛgbá aɔkpá alɛwa kpɔ. Amáŋ é jé ɔyinɛ alɔ Nɔnyilɔ Brown ka ɔcɛ nōo gē je ɔkpá lá ŋ. Ipu ɛjɛɛji eko nɛ ó gba Ujehofa ɛ̄gbā mla ɔtu caca a, igbalɛwa ó gē kɛla lɛyikwu Ubáyíbu ipu ɛlā ō ka tɛɛcɛ ku nu. Ohigbu ɛnyā, ācɛ gbɔɔ ō hi ɔ ka Ubáyíbu Brown.

Ipu Germany, ayinɛ alɔ a le miya ō nyɛɛ ŋma abɔ ku ɛga ō yuklɔ ku alɔ nōo yɔ u Barmen a ohigbu ka ó le nyɛ nɛɛnɛhi. É klla po ɔ̄kā ka ó gáā gboji ŋ, aicɔɔja ku France géē wa i nuunu ipu igeli ɔɔma. Ācɛ O Klɔcɛ Ku Ubáyíbu a gáā lɛ ɔlɛ éyi má ipu Magdeburg nōo wɛ ɛga omɛɛlɛ ō bi le ya aɔkpá ku alɔ wɛɛcɛ. Ipu ɛ̄cī 19 ku Ɔya Ɔmɛhili, ayinɛ a lɛ aɔdā ō bi le ya aɔkpá wɛɛcɛ mla aɔdā ocɛgbá ōhī kpo le calɛ gā Ubɛtɛlu ɛpɛpɛ nōo yɔ u Magdeburg a. Ɛ̄cī piii nɛ ɔlɛ ɔtahɛ ku abɔ ku ɛga ō yuklɔ ku alɔ miyɛ ohi ku ayinɛ a le calɛ ɛ ma, aɔkpá ku ɔ̄kā le ka tɛɛcɛ ku éwo ku France miyɛ igeli ku Barmen tabɔ ɛ. Ayinɛ a ta Ujehofa ahinya ku ɛgɛ nɛ ó je ogbotu lɛ uwa klla ta uwa abɔ a.

Ipu Brazil, George Young nōo gē ŋma ɛga éyi gā ɛga ɔhá o ya ɛɛ kóō tɔɔna ku ɔkoolɔhi a lɛ abɔ ku ɛga ō yuklɔ ku alɔ ɛpɛpɛ kwaajɛ, klla gbɔɔ ō ya Ɔda Ō Gbaajɛ wɛɛcɛ ipu uce ku Portuguese. Ó kóō gaajɛ ɔya éyi ŋ, ó lɛ aɔkpá ku alɔ nōo fiyɛ 7,000 a je lɛ ācɛ. Sarah Ferguson gweeye nɛɛnɛhi eko nɛ ɔyinɛ alɔ Young gáā má apɔlɛ ku uwa a. Ó gbɔɔ ō jé Ɔda Ō Gbaajɛ a ŋmiifi ihayi ku 1899, amáŋ ó tɔɔtɛ lɛ ɔ ō je iyi nu gwɛɛya o bu ipu ubatisim ō ya ŋ. Abɔ ɔya ōhī le gla a, ɔyinɛ alɔ Nɔnya Ferguson mla ayi nu ɛnɛ gáā lɛ ubatisim ya.

Abɔ ihayi ku 1923 yɔ i wa oŋmɛyi a, Ɔda Ō Gbaajɛ ku Ɔya Ɔmigwɛɛpa 15, 1923 kɛla lɛyikwu ɛgɛ nɛ opiyabɔ néē ya ɛgɛ néē géē bēē ya ōjila ku ujɔ, uklɔ ku ɔna ō ta, mla aojileyi nɛhi a lɛ abɔ kwu Ācɛ Oklɔcɛ Ku Ubáyíbu a. Ó kahinii: “Ó wɛ ɔdā nōo teyi peee ku ɛjɛɛji aujɔ a lɛ ɔtu okpoce olɔfu. . . . Alɔ le tutu ō yuklɔ alɛwa klla gɔbu yɔ i gba Ɔwɔico ɛ̄gbā mla ɔtu caca mla eeye ɛpla ihayi ku 1924.”

Ihayi ku 1924 klla wɛ ihayi ku eeye lɛ Ācɛ O Klɔcɛ Ku Ubáyíbu a. Ayinɛ nōo yɔ Ubɛtɛlu a gbɔɔ ō bi aɔya ōhī le yuklɔ lɔfu lɔfu ipu ajɛ néē lá nōo yɔ Staten Island, ɛga nōo yɔ kwu ɔlɛ ɔtahɛ ku abɔ ku ɛga ō yuklɔ ku alɔ nōo yɔ Brooklyn ajaajɛ a. É kpo eko bonu gbɔbu ɛɛ néē gwo ɔlɛ ɛpɛpɛ ɔɔma mɛ ipu ihayi ku 1924 ŋ, ɛnyā kē tabɔ ya ku ayinɛ a kéē piyatɔha klla nyila ɔkoolɔhi a ɔwɛ nōó ya jejee ɛ ŋ ma.