Umana wɛ ɔdole kpɔcii nɛ ācɛ Isrɛlu a lé ɛpleeko néē yɔ ipu igbili ipu ihayi ofu ɛpa a. (Oyɛb. 16:35) Ó lɛ āhɔ̄ ɛpa nɛ Ujehofa klla je ɛbɛ́ ku igbaanɔ néē gē hi ka ɛwa ɔkpa a lɛ uwa. (Oyɛb. 16:12, 13; Áluk. 11:31) Amáŋ, ó lɛ ɔdole ɔhá nɛ ācɛ Isrɛlu a lɛ ō lé.

Ocabɔ mafu, ó lɛ ekoohi nɛ Ujehofa gē gbo ācɛ ɔlɛ nu gā “ɛga . . . nēé géē lā,” ɛga néē géē má eŋkpɔ gwa mla ɔdole néē géē lé. (Áluk. 10:33) Ɛga éyi ku aɛga nyā wɛ ɛga néē hi ka u Elim, “ɛga nɛ̄ obuga igwɛ́ɛpa bá ipú alī ofu ɛtá ce igwó (70) ā.”—Ó lɛ aafu ŋ, aali nyā kē wɛ ali nɛ alɔ lɛ babanya a. (Oyɛb. 15:27) Ɔkpá néē hi ka u Plants of the Bible a ka ka ali nyā nōo gē jɛ ɛga alɛwa a, wɛ ikpo ɔcí kpɔcii néē gē je kóō wɛ ɔdole ipu ɛga nōo wɛ ikpakpla a. É gē bi ɔ le ya ɔdole, anɔ, klla wɛ ɔcí nɛ umiliyɔn ku ācɛ gē je kóō wɛ ɛga omlɛnyɔ ku uwa.

Ācɛ ku Isrɛlu a klla lɔfu mahayi ɛga olɔwa nɛhi ku oasis néē gē hi ka u Feiran babanya nōo yɔ u Wadi Feiran a. a Ɔkpá néē hi ka u Discovering the World of the Bible a kahinii: Olikpo mla olɔwa ku wadi nyā wɛ “umiyilu ofu ɛnɛ ce éyi (81) nōo wɛ u [ukilomita 130] ó likpo, heyifuu mla ɛga nɛ ācɛ jé fiyɛ duu ipu wadi Sinai a.” Ɔkpá a klla ka kpɔ ka ɔdaŋ “nɛ ɔcɛ lɛ iyawu yɛ bɛɛka umiyilu ofu ce ahaata (28) nōo wɛ u [ukilomita 5] ŋma abɔɔ gā ɛga nɛ eŋkpɔ a gáā piyatɔha mla isu nɛhi a, ó géē fu ɛga néē hi ka u Feiran Oasis a. Olico ku oasis nyā ŋma ɛgiyi eŋkpɔ wɛ utajan ɛpa, olikpo ku nu kē wɛ umiyilu ɛta. Aɔcí ali alɛwa yɔ abɔɔ, ó klla heyifuu nɛɛnɛhi nōo ya ku ācɛ kéē lɛ ɔ gbla iga ku Idɛn. Ŋmiifi ihayi utajan alɛwa, ācɛ alɛwa gā abɔɔ ɛ ohigbu aɔcí ali alɛwa nōo yɔ abɔɔ a.”

Gbɔbu ɛɛ kéē ŋma éwo ku Ijipiti a, ācɛ ku Isrɛlu a bi aɔdā nōo ba nyā yɛce iyi uwa: amu ku igbo, ógo ō ya igbo, á jé ŋ é klla lɔfu bi ikpɔdɛhɔ ōhī mla anɔ yɛce iyi uwa duu. Ku ɛlā ɔkwɛyi a, aɔdā nōo ba nyā i lɔfu bi uwa gboji ajɛ ŋ. Ācɛ a klla bi “ɛwa nɛ̄hi kú ācɛ ɔhá mɛ́mla aálá, aɛ́wū mɛ́mla aɛ́na nyɔ̄ mla uwá dúú.” (Oyɛb. 12:34-39) Ohigbu ɛgɛ nɛ āhɔ̄ ku igbili a lɔfu bɔbi nɛhi lɛ a, ōhī ku aɛ́bɛ́ a lɔfu le pɛ kwū. Ācɛ ku Isrɛlu a lɔfu lé ōhī ku uwa. É kē lɔfu bi ōhī ku uwa le gwɛɛya, é kóō lɔfu bi uwa le gwɛɛya lɛ aɔwɔ ɛkɛmgbɛ duu. b (Ācot. 7:39-43) Naana kpɔ a, ó teyi peee ku ācɛ Isrɛlu a lɛ aala mɛmla aɛnɛ alɛwa kpɔ. Ɛnyā le teyi peee ŋma ɛlā nɛ Ujehofa da ācɛ ɔlɛ nu eko néē ta ō lɛ ɛyi taajɛ lɛ ɔ a. Ó da uwa kahinii: “Ayípɛ̄ ɔlɛ́ aá  géē [wɛ acogbaala] ipú ígbíli ā iháyí ofɛpa.” (Áluk. 14:33) Amáŋ ó klla wɛ ɔdā nōo tɔɔtɛ ka é lɔfu lɛ enyi amɛ ŋma aala mla aɛna ku uwa mla ɛ́bɛ́ néē lɔfu lé, amáŋ ó teyi peee ka ó wɛ ɛ̄nɛ̄ o géē jɛ ācɛ nōo lɛbɛɛka umiliyɔn ɛta ipu ihayi ofu ɛpa a ŋ. c

Imi nɛ aɛ́bɛ́ ku uwa gē má ɔdole néē gē lé mla eŋkpɔ néē gē gwa a? d Ɛpleeko ɔɔma, ó lɔfu wɛ ka ɔwɔ gē ya nɛhi aikpo ɔcí alɛwa klla yɔ ipu igbili a. Ɔkpá néē hi ka u Insight on the Scriptures, Volume 1, a ka ka ihayi 3,500 nōo gáā yɛ a, “eŋkpɔ alɛwa yɔ ɔwɛ ɛga nɛ ācɛ Isrɛlu yɔ gbɔbu a fiyɛ ɛgɛ nɛ ó lɛ babanya a. Alɔ jé ɛnyā ohigbu ka ó lɛ ɛga olipu mla ɛga alɛwa nɛ eŋkpɔ ŋmo ŋma ohigbu ɔkpa nɛhi nōo yɔ abɔɔ gbɔbu a.” Naana kpɔ a, igbili a wɛ ɛga ikpakpla mla ɛga nōo tuufi nɛhi. (Obla. 8:14-16) Ɔdaŋ ka Ujehofa i gē yɛ i ya eŋkpɔ tɔɔtɛ lɛ uwa ɔwɛ ohidaago ŋ nɛ, ācɛ Isrɛlu a mɛmla aɛ́bɛ́ ku uwa gē yɛ i lɛ pɛ kwū.—Oyɛb. 15:22-25; 17:1-6; Áluk. 20:2, 11.

Umosisi da ācɛ Isrɛlu a ka Ujehofa je umana lɛ uwa kóō wɛ ɔdole ku uwa o ya ɛɛ “kóō nwū uwā ka ɔ́ɔ wɛ ɔdōlé ōfōōfūnū nɛ̄ alɛɛcɛ í lé kéē yēeyī ā ŋ́, amáŋ ɔlɛɛcɛ cɛgbá ɛjɛ̄ɛ̄jī ɔdā dóódu nɛ̄ Óndú ā ka ā.”—Obla. 8:3.