1. Ɛgɛnyá nɛ alɔ bi le jé ka Ujehofa dɔka ō tubla alɔ ajaajɛ a?

 UJEHOFA gē hi alɔ igwú ku alɔ tubla ɔ ajaajɛ. (Ujɛ́m. 4:8) Ó dɔka ō wɛ Ɔwɔico ku alɔ, Adā alɔ, mla Ɔya ku alɔ. Ó gē cila ɔkɔ ō gba ku alɔ klla ta alɔ abɔ eko duuma nɛ alɔ yɔ ipu unwalu. Ó klla gē bi ɔwa ku nu le nwu alɔ ɛlā klla je ogbotu lɛ alɔ. Amáŋ ɔdi nɛ alɔ cɛgbá ō ya, o ya ɛɛ ku alɔ tubla Ujehofa ajaajɛ a?

2. Ɛgɛnyá nɛ alɔ gáā bi le tubla Ujehofa ajaajɛ a?

² Alɔ lɔfu tubla Ujehofa ajaajɛ ŋma lɛ ō gbɔɔkɔ lɛ ɔ, ō jé Ɛlā ku nu mla ō gbɛla tu ɔ lipu lipu. Abɔɔ alɔ yɔ i ya ɛnyā a, ó géē ya ku alɔ yihɔtu nu nɛhi. Ɛnyā géē lɛ abɔ kwu alɔ ɔtu ku alɔ lɛyitaajɛ lɛ ɔ, klla je owoofu nōo wɛ aku nu a lɛ ɔ. (Mafú 4:11) Abɔɔ alɔ yɔ i jé Ujehofa tōōtɔ̄ɔ̄ a, ɛgɔɔma nɛ alɔ gáā yɔ i kpɔtuce ɔ tōōtɔ̄ɔ̄ mla ɔwa ku nu nɛ ó gē bi le ta alɔ abɔ a.

3. Ɛgɛnyá nɛ Ebilii gē ceyitikwu kóō lɛ alɔ ci ŋma ō gba Ujehofa ɛ̄gbā a, amáŋ ɔdi gáā ta alɔ abɔ ku alɔ hii cigbihi kwu Ɔwɔico mla ɔwa ku nu ŋ ma? (Aíjē Kú Ɛ̄gbā 31:13, 14)

³ Amáŋ, Ebilii gē ceyitikwu kóō lɛ ɛma nɛ alɔ lɛ mla Ujehofa a hɛ, ofluflu eko nɛ alɔ yɔ i má unwalu ɛyɛɛyɛyi. Ɛgɛnyá nɛ ó gē ya ɔɔma a? Ó gē bi ɔwɛ ɛmɛɛma, gē ya ku alɔ hii kpɔtuce Ujehofa mla ɔwa ku nu gɛ ŋ. Ɛgɛ duuma nōó lɛ, alɔ gbo iyi alɔ ŋma ɛgiyi ukpa ku nu gla. Ɔdaŋ ku alɔ gbolo ce Ujehofa klla kpɔtuce ɔ lɔfu lɔfu, alɔ i gáā cigbihi kwu Ɔwɔico ku alɔ mla ɔwa ku nu ŋ.—Jé Aíjē Kú Ɛ̄gbā 31:13, 14.

4. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

⁴ Ipu ikpɛyi ɛlā nyā, alɔ géē kɛla lɛyikwu ojama ɛta nōó lɔfu wa ŋma ipu ujɔ ŋ. Eyeeye ku ojama nyā kē lɔfu ya, ku ɔtu nɛ  alɔ kpoce Ujehofa mla ɔwa ku nu a kóō waajɛ gla. Ɛgɛnyá nɛ ojama nyā lɔfu ya ku alɔ hii gba Ujehofa ɛ̄gbā gɛ ŋ ma? Ɔdi nɛ alɔ kē lɔfu ya o ya ɛɛ ku alɔ ta ojama ku Ebilii a?

5. Ɛgɛnyá nɛ unwalu lɔfu ya ku ɔtu nɛ alɔ kpoce Ujehofa mla ɔwa ku nu a kóō gbɔɔ ō waajɛ a?

⁵ Ekoohi, alɔ gē má unwalu bɛɛka ojama ŋma ɛgiyi apɔlɛ amāŋ uklɔ ku alɔ lɔfu hɛ alɔ abɔ. Ɛgɛnyá nɛ unwalu nyā lɔfu ya ku ɔtu nɛ alɔ kpoce ɔwa ku Ujehofa a kóō gbɔɔ ō waajɛ, klla lɛ alɔ hɛ ŋma ɛgiyi nu a? Eko duuma nɛ unwalu nɛ alɔ yɔ i má a le gboji ajɛ, abɔ lɔfu hɛ alɔ iye, ó klla lɔfu ya alɔ bɛɛka alɔ i lɛ eyiyoce gɛ ŋ ma. Ebilii gē bi eko ɛgɛnyā le ya ku alɔ taafu ɔdaŋ ka Ujehofa yihɔtu alɔ ɔkwɔɔkwɛyi. Ebilii dɔka ku alɔ gbɛla ka Ujehofa amáŋ ɔwa ku nu gē ya nɛ alɔ gē má owe a. Ɔdā ekponu ɔɔma ya da ācɛ Isrɛlu ōhī eko néē yɔ Ijipiti á. Aflɛyi a, é miyɛ cɛ ka Ujehofa fu Umosisi mɛmla Arɔni kéē lɛ uwa hɛta ŋma ō wɛ ɔfiyɛ. (Oyɛb. 4:29-31) Amáŋ igbihaajɛ nɛ Ufero ya ku oyeeyi kóō le lɔɔnɔ ta uwa tōōtɔ̄ɔ̄ a, é gbɔɔ ō kpo ɛlā ce Umosisi mɛmla Arɔni ka uwa ya nēé yɔ i má owe a. É da uwa ɛplɛɛpa kahinii: ‘Aá je alɔ tá eyī obɔ̄bí kú Uféro mɛ́mla aígabɔ̄ kú ɔlɛ́ nū á, aá klla kwú ɛ̄wā ú tú ūwā abɔ̄ kéē lɛ alɔ kpó ŋmó.’ (Oyɛb. 5:19-21) É lɛ ācɛ okpaakpa nɛ Ɔwɔico tɛhɔ kóō gáā ta uwa abɔ a ŋmo ɛpɔbi. Ɛnyā kē wɛ ɔdā ō kwiiye nɛhi! Ɔdaŋ ku a humayi lɔtu ku unwalu nōo gboji ajɛ nɛɛnɛhi ɛɛ, ɔdi gáā ta uwɔ abɔ cɛɛ ku ɔtu nɛ a kpoce Ujehofa mla ɔwa ku nu a kóō yɔ i lɔfu tōōtɔ̄ɔ̄ a?

6. Ɔdi nɛ alɔ nwu ŋma ɛgiyi ɔcomɛɛbɛ Uhabakuku lɛyikwu ɛgɛ nɛ alɔ géē lɔtu ku unwalu ku alɔ a? (Uhábakūku 3:17-19)

⁶ Ka ɛjɛɛji ɔtu ku uwɔ lɛ Ujehofa ipu ɔkɔ ō gba, ku a klla gbolo ce ɔ ku otabɔ. Ɔcomɛɛbɛ nōo wɛ Uhabakuku a má unwalu alɛwa. Ó kóō lɛ ɛpleeko éyi nɛ ó taafu ɔdaŋ ka Ujehofa lɛ ɛlá wu ɔ ɔkwɔɔkwɛyi. Ohigbu ɔɔma, ó lɛ ɛjɛɛji ɔtu ku nu da Ujehofa ipu ɔkɔ ō gba. Ó da Ujehofa kahinii: “Woó! Óndú, eko nyá nɛ̄ n géē jikwū klá uwɔ ká ā tá um abɔ̄ gaá kwu, ɛ́ɛ́ ká ā géē pó ɔkɔ kú um? . . . Ɔdíyá nāa cɛ̄ [lɛ ācɛ gē lɛ abɔ da ācɛ ɔhá ɛyi taajɛ] ɛ́gɛ́nyā ā?” (Uháb. 1:2, 3) Ujehofa lɛ ohi ta lɛyikwu ɔkɔ nɛ ɔcɛ ō gba ɔ ɛ̄gbā kpaakpa nyā gba ŋma ɔtu a. (Uháb. 2:2, 3) Abɔɔ Uhabakuku gáā gbɛla lipu lipu lɛyikwu ɔwɛ ɛyɛɛyɛyi nɛ Ujehofa hɛ ācɛ ɔlɛ nu ta ɛ ma, ɔɔma ya kóō lɛ eeye lɛ kpɔ. Ó gáā le jé kpɔcii ka Ujehofa lɛ ɛlá wu ɔ klla géē ta ɔ abɔ kóō lɔtu ku ojama duuma. (Jé Uhábakūku 3:17-19.) Ɔdi nɛ alɔ nwu ŋma ɛnyā a? Eko duuma nɛ a yɔ ipu unwalu amaŋ ojama, gbɔɔka lɛ Ujehofa ku a da ɔ ɛgɛ nɛ ɔtu yɔ i ya uwɔ lɛ a yiili. Cɛɛ ku a klla gbolo ce ɔ kóō ta uwɔ abɔ. Eko duuma nɛ a ya lɛ a, le jé kpɔcii ka Ujehofa géē lɛ ɔfu nɛ a cɛgbá a tu uwɔ iyē cɛɛ ku a lɔtu. Eko duuma nɛ a kē má ɛgɛ nɛ ó yɔ i ta uwɔ abɔ lɛ a, ɔtu nɛ a kpoce ɔ a géē yɔ i lɔfu tōōtɔ̄ɔ̄.

7. Ɔdi nɛ aɔmaapu ku Shirley ceyitikwu ya kóō gbɛla a, ɔdi kē ta ɔ abɔ kóō hii ma ō kpɔtuce Ujehofa ŋ ma?

⁷ Gɔbu yɔ i ya aɔdā nōo géē ta uwɔ abɔ ku a yɔ kwu Ujehofa ajaajɛ. Ō ya ɔɔma je tabɔ lɛ u Shirley, ɔyinɛ alɔ nɔnya nōo lā u Papua New Guinea, eko nɛ ó yɔ ipu āhɔ̄ olɔnɔ a. b Shirley mla apɔlɛ ku nu wɛ ācɛ ogbɛha, ekoohi é gē nya ɛɛ kéē má ɔdole nōo géē jɛ uwa. Ɔmaapu uwa éyi dɔka ō ya ku Shirley kóō kpɔtuce Ujehofa gɛ ŋ. Ó da ɔ kahinii: “Aa ka alelekwu ihɔ ku Ɔwɔico yɔ i ta aa abɔ, amáŋ imi nɛ otabɔ a yɔ a? Aa wɛ ācɛ ogbɛha kpɔ ɛ. A yɔ i kpo eko ku uwɔ bɔnu ku a yɔ i tɔɔna.” Shirley kahinii: “N da iyi um ɔka kahinii: ‘Ɔwɔico lɛ ɛlá wu alɔ ɔkwɔɔkwɛyi nɛɛ, kɛɛ ka ó lɛ ɛlá wu alɔ ŋ?’  Boobu ɔɔma n lɛ ɔkɔ gba lɛ Ujehofa lɛ ɛjɛɛji ɔdā nōo yɔ ipu ɔtu ku um a da ɔ. N gɔbu yɔ i jé Ubáyíbu mla aɔkpa ku alɔ, yɔ i nyɔ gā tɔɔna klla gā ōjila ku ujɔ.” Ó gboji ŋ, ó gbɔɔ ō má ka Ujehofa yɔ i teyi ta apɔlɛ ku nu. Ó lɛ eko duuma nɛ apɔlɛ ku nu nyɔ i gbiyɔla ipu ɛmiyɛ ŋ, é klla lɛ eeye duu. Shirley kahinii: “N gáā le má ka Ujehofa yɔ i cila ɔkɔ ō gba ku um.” (1 Utím. 6:6-8) Ɔdaŋ ku a gɔbu yɔ i ya aɔdā nɛ a tɛtɛ gē ya ipu ɛ̄gbā ō gba ku Ujehofa a, a gáā jɛga ku āhɔ̄ olɔnɔ amāŋ ɔtu obɛɛpa kóō lɛ uwɔ hɛ ŋma ɛgiyi Ujehofa ŋ.

8. Ɔdi lɔfu ya da ayinɛ nɔnyilɔ nōo yɔ i ma ɔwɛ fu lɛ alɔ ipu ɔwa ku Ujehofa a?

⁸ O bu ipu aɔ̄kā mla ɛga ō kɔka ipu intanɛti ɛyɛɛyɛyi, aolɛla ku alɔ gē kɛmgbɛ amāŋ ya ku alɔ lɛ ɔtu obɛɛpa, lɛyikwu ayinɛ nɔnɔyilɔ nōo yɔ i ma ɔwɛ fu lɛ alɔ ipu ɔwa ku Uehofa a. (Aíjē 31:13) Ɛnyā ya kéē lɛ ayinɛ alɔ ōhī kwu lɛ ɔwɛ gwu tu uwa klla bi uwa gā inu ɛpɔ, yɔ i ciije ba uwa ka é wɛ ācɛ obɔbi duu ɛ. Ācɛ O Yɛce Ukraist ku eko aflɛyi a má unwalu ekponu ɔɔma duu, eko néē ciije ba Upɔlu klla lɛ ɔ kwu lɛ ɔwɛ gwu tu ɔ a. Ɔdi nɛ ayinɛ a ya eko ɔɔma a?

9. Ɔdi nɛ ayinɛ ōhī ya eko néē lɛ Upɔlu ta agba a?

⁹ Ayinɛ ōhī ɛpleeko ku eko aflɛyi a ma ō je otabɔ lɛ Upɔlu, eko néē lɛ ɔ ta inu agba Urom a. (2 Utím. 1:8, 15) Ɔdiya néē ya lɛ a? Uweyi yɔ i ya uwa ohigbu ka ācɛ ɔhá yɔ i má Upɔlu ka ó wɛ ɔcɛ obɔbi nɛɛ? (2 Utím. 2:8, 9) Kɛɛ ka é yɔ i yuufi ka é géē ya uwa ŋmo duu? Ɔdā duuma nōó lɔfu wɛ a, leyi yɛ ɛgɛ nɛ ɔtu lɔfu ya Upɔlu ɛpleeko ɔɔma a. Ó lɔtu ku unwalu alɛwa klla lɛ oyeeyi ku nu kwu ikwū ajaajɛ ohigbu uwa gbɔbu ɛɛ. (Ācot. 20:18-21; 2 Ukɔ́r. 1:8) Alɔ i cika ō lɛbɛɛka ācɛ nōo ta ō ta Upɔlu abɔ eko nɛ ó cɛgbá otabɔ a ŋ! Ɔdi nɛ alɔ cika ō bi ɔtu, eko duuma néē gbɔɔ ō ya ayinɛ alɔ nōo gē ma ɔwɛ fu lɛ alɔ ŋmo a?

10. Ɔdaŋ ku ayinɛ nōo yɔ i ma ɔwɛ fu lɛ alɔ a gbɔɔ ō má o ya ŋmo, ɔdi nɛ alɔ cika ō blakwu ɔ a, ɔdi kē ya a?

¹⁰ Blakwu ɔdā nōo ya néē gē ya alɔ ŋmo a, mla ɔcɛ nōo ta igbihi nu a. Utímōti ɔmpa 3:12 kahinii: “É géē yá ɛjɛ̄ɛ̄jī ācɛ nēe dɔɔ̄kā  o lā oyēeyī olɔhi kú ācɔ̄lóhɔ́nyɛtá ipú opīyatɔ̄há mla Ohɔ́nyɛtá Ujísɔ̄si ā ōwē piíí.” Ohigbu ɛnyā, ó cika ō ya alɔ eyijii fluflu ŋ, abɔ Ebilii leyi hɛ kwu ayinɛ nōo yɔ i ma ɔwɛ fu lɛ alɔ a cɛɛ kóō ya uwa ŋmo a. Ó dɔka ku ayinɛ nyā kéē ma ō hayi kpaakpa lɛ Ujehofa, ó klla dɔka ō bi ɔ le ce ufi tu alɔ iyē.—1 Upít. 5:8.

11. Ɔdi nɛ alɔ nwu ŋma ocabɔ ku Onesifɔrɔsi a? (2 Utímōti 1:16-18)

¹¹ Gɔbu ku a bēē je otabɔ lɛ ayinɛ ku a klla yɔ kwu uwa gā ajaajɛ. (Jé 2 Utímōti 1:16-18.) Eko néē lɛ Upɔlu ta agba a, ɔyinɛ nɔnyilɔ éyi nōo lé ka Onesifɔrɔsi a je otabɔ lɛ ɔ, ó ya bɛɛka ayinɛ ɔhá a nōo ta ō ta Upɔlu abɔ a ŋ. “Ó yúwēyī kú [Upɔlu] ohígbū ka [ó] yɔ̄ agbá ŋ́.” Ikɔkɔ ɔɔma, Onesifɔrɔsi ceyitikwu nɛɛnɛhi tine Upɔlu, eko nɛ ó kē lɛ ɔ má a, ó ceyitikwu je otabɔ nɛ ó cɛgbá a lɛ ɔ. Ɔdā nɛ Onesifɔrɔsi ya nyā cɛ lɛ ɔ lɛ oyeeyi ku nu kwu ikwū ajaajɛ. Ɔdi nɛ alɔ nwu ŋma ɛnyā a? Alɔ jama cɛ lɛ ufi ku alɛɛcɛ kóō cɛ lɛ alɔ je ya geege amāŋ ci alɔ ŋma ō je otabɔ lɛ ayinɛ alɔ néē yɔ i ya ŋmo a ŋ. Ikɔkɔ ɔɔma, alɔ mahayi lɛ ayinɛ alɔ klla je otabɔ lɛ uwa. (Aíit. 17:17) É cɛgbá ihɔtu mla otabɔ ku alɔ.

12. Ɔdi nɛ alɔ nwu ŋma ɛgiyi ayinɛ alɔ nōo yɔ éwo ku Russia a?

¹² Gbɛla tu ɛgɛ nɛ ayinɛ alɔ ipu éwo ku Russia je otabɔ lɛ ɔmpa uwa eko néē lɛ uwa ta inu agba a. Eko duuma néē yɔ i bi uwa nyɔ kéē kɛpɔ tu uwa, ayinɛ alɔ nɔnyilɔ mla ayinɛ alɔ nɔnya gē yɛce uwa gā inu ɛpɔ a, o ya kéē mafu ka é yɔ mla uwa. Ɔdi nɛ alɔ nwu ŋma ɛnyā a? Eko duuma néē lɛ ɛkɛmgbɛ ka ba ayinɛ nōo yɔ i ma ɔwɛ fu lɛ alɔ a, lɛ uwa kwu tu inu agba, amāŋ ya uwa ŋmo, a hii yuufi ŋ. Gbɔɔkɔ lɛyikwu uwa, teyi tu ācɛ apɔlɛ ku uwa, cɛɛ ku a dɔka ɔwɛ ɛyɛɛyɛyi ɔhá nɛ a géē mafu ku a yɔ kwu uwa.—Ācot. 12:5; 2 Ukɔ́r. 1:10, 11.

13. Ɛgɛnyá nɛ okonu ō ŋmo lɔfu ya ku ɔtu nɛ alɔ kpoce Ujehofa mla ɔwa ku nu kóō gbɔɔ ō waajɛ a?

¹³ Ācɛ apɔlɛ ku alɔ nōó gē gba Ujehofa ɛ̄gbā ŋ, ācɛ nɛ alɔ gē yuklɔ tɔha mla uwa, amāŋ ayipɛ inɔɔkpa ku alɔ lɔfu ŋmo alɔ okonu, ohigbu ku alɔ gē tɔɔna amāŋ ohigbu ku alɔ gē yɛce íne ku Ujehofa. (1 Upít. 4:4) É lɔfu kahinii: “N dɔka ɛdɔ ɔcɛ nɛ a wɛ a, amáŋ ɔwɛ ō gba ɛ̄gbā ku uwɔ gē bi abɔ olɔfu klla gē má ɛlā ɔwɛ igble.” Ācɛ ōhī lɔfu ka obɔbi ku alɔ ohigbu ɔwɛ nɛ alɔ gē ya mla ācɛ néē le taajɛ ŋma ipu ujɔ a. É lɔfu kahinii: “Ɔdaŋ ku aa gē ya ācɛ lɛ a, ɛgɛnyá nɛ aa géē ka ku aa wɛ ācɛ ō yihɔtu ācɛ a?” Aɛlā ɛgɛnyā lɔfu ya ku alɔ gbɔɔ ō gbɛla ɔdaŋ ka íne nɛ Ujehofa je lɛ alɔ a kóō kpaakpa. Alɔ lɔfu gbɔɔ ō gbɛla kahinii: ‘Ujehofa yɔ i leyice ka um ya odee nōo fiyɛ um ɔfu nɛɛ? Ɔwa ku nu kóō dɔka ku alɔ jɔɔnyɛ oyeeyi dee?’ Ɔdaŋ ku a yɔ ipu āhɔ̄ ɛgɛnyā, ɔdi lɔfu ta uwɔ abɔ ku a yɔ kwu Ujehofa ajaajɛ mɛmla ɔwa ku nu a?

14. Ɔdi nɛ alɔ cika ō ya, daŋ ku ācɛ yɔ i ŋmo alɔ okonu ohigbu ō lā oyeeyi nōo cɛtɔha mla aíne ku Ujehofa, ɔ a? (Aíjē Kú Ɛ̄gbā 119:50-52)

¹⁴ Lɛ ɔtu ya ekponu ō bēē ya aɔdā nɛ Ujehofa ka ó le kpaakpa. Ujobu wɛ ɔcɛ nōo gɔbu ya aɔdā nɛ Ujehofa mafu ku ɔɔ le kpaakpa, naana nɛ ācɛ yɔ i ŋmo ɔ okonu a. Ɔcɛ éyi nōo kóō ka ka anuɔ wɛ oklobiya ku Ujobu a, ceyitkwu ya ku Ujobu kóō gbɛla ka Ɔwɔico i lɛ ɛlá wu ɔ ɔdaŋ ku Ujobu ya ɔdā okpaakpa amāŋ ɔdobɔbi ŋ. (Ujób. 4:17, 18; 22:3) Amáŋ Ujobu ta ō kpɔtuce ɛdɔ ɛkɛmgbɛ ɛgɔɔma. Ó jé ku íne ku Ujehofa lɛyikwu ɔdā olɔhi mla ɔdobɔbi a le kpaakpa, ó kē lɛ ɔtu ya ekponu ō yɔ i bi uwa yuklɔ. Ó jɛga lɛ ācɛ ɔhá kéē ya kóō hii hayi kpaakpa gba Ɔwɔico ɛ̄gbā gɛ ŋ. (Ujób. 27:5, 6) Ɔdi nɛ alɔ nwu ŋma ɛnyā a? A hii cɛ ku okonu ō ŋmo kóō ya ku a gbɔɔ ō lɛ ɔtu obɛɛpa  lɛyikwu íne ku Ujehofa ŋ. Gbɛla tu aɔdā nōo ya ipu oyeeyi ku uwɔ ɛ ma. A lɔfu má igbalɛwa ɛ, ka oyeeyi ku uwɔ gē lɔhi fiyɛ eko duuma nɛ a yɛce íne ku Ujehofa. Lɛ ɔtu ku uwɔ ya ekponu ō wɛ ipu ɔwa nōo gē bi íne ɔɔma le yuklɔ a. Ɔdaŋ ku a ya ɔɔma, ó lɛ okonu duuma nɛ ācɛ gáā ŋmo uwɔ, nōo géē hɛ uwɔ ŋma ɛgiyi Ujehofa gboogboo gla ŋ.—Jé Aíjē Kú Ɛ̄gbā 119:50-52.

15. Ɔdiya néē ŋmo u Brizit okonu a?

¹⁵ Leyi yɛ ocabɔ ku ɔyinɛ alɔ nɔnya Brizit ŋma éwo ku India. Ācɛ apɔlɛ ku nu gē ŋmo ɔ okonu ohugbu ka ó wɛ ɔcɛ ō gba Ujehofa ɛ̄gbā. Eko kpii igbihi nɛ ó lɛ ubatisim ya ihayi ku 1997 a, uklɔ ku ɔba nu gáā hɛ ɔ abɔ, ó kē wɛ ɔcɛ ō gba Ujehofa ɛ̄gbā ŋ. Ohigbu ɔɔma, ɔbu nu gáā le miya kéē nyɔ i lā mla adā nu mɛmla ɛ́nɛ́ nu nōo yɔ igeli ɔhá a. Amáŋ ɛnyā géē ya ku Brizit kóō má unwalu nōo nwune fiyɛ. Abɔɔ ɔba nu i lɛ uklɔ gɛ ŋ ma, ɛnyā géē ya kóō yɔ i yuklɔ eko doodu o ya ɛɛ kóō ya ɛgbá ku apɔlɛ a. Ó wɛ ɔɔma foofunu nóó, ujɔ nōo kwu abɔɔ ajaajɛ fiyɛ a wɛ umayilu ofu igwoleyi (220) ŋma ɔlɛ ɛpɛɛpɛ a. Ó wɛ ɔdā ō kwiye ka apɔlɛ ku ɔba nu klla gbɔɔ ō ya ɔ ŋmo, ohigbu ku ó wɛ ɔcɛ ō gba Ujehofa ɛ̄gbā. O ya ŋmo a kwu bɔbi nɛɛnɛhi nōo ya ku apɔlɛ ku Brizit kóō klla kwu calɛ ŋma abɔɔ kpɔ. Ó gboji ŋ, ɔba nu gáā gekwu, é kē leyice ka ɛnyā géē ya fluflu ŋ. Oŋma ɔɔma, ukansa gáā lɛ ɔyinɔnya ku nu éyi nōo wɛ ihayi igwɛɛpa (12) a ŋmo. Ɛ̄nɛ̄ ō bɔbi fiyɛ duu a wɛ kahinii, aɔmaapu ku Brizit gbɔɔ ō kpɛla ce ɔ ka anu ya ɛɛ nɛ aɔdobɔbi nyā yɔ i ya a. É da ɔ ka ɔdaŋ ku ó gē yɛ i je piya Ɔcɛ Ocijali Ku Ujehofa ŋ nɛɛ, aɔdobɔbi nyā i gē yɛ i ya da ɔ ŋ. Naana kpɔ a, Brizit gɔbu yɔ i kpɔtuce Ujehofa klla yɔ kwu ɔwa ku nu ajaajɛ.

16. Abɔɔ u Brizit yɔ kwu Ujehofa mla ɔwa ku nu ajaajɛ a, ɔhā nyá nɛ Ujehofa hɛ ce ɔ a?

¹⁶ Abɔɔ Agbla ku Ajɔɔcɛ le ligbo gaaga ŋma ɛga nɛ u Brizit lā a, ɔcɛ ō leyi kwu usɛkut éyi ta ɔ ɔtu kwu ɔtu, kóō bēē tɔɔna ɔwɛ ɛga nɛ ó lā klla ya ōjila ku ujɔ ɔlɛ nu. Aflɛyi a, ó gbɛla ka ɛnyā le fiyɛ ɔ ɔfu. Amáŋ ó yɛce ukɔ́ nɛ ɔcɛ ō leyi kwu usɛkut a tu ɔ a. Ó gbɔɔ ō tɔɔna ku  ɔkoolɔhi a lɛ ācɛ ɔhá, gbɔɔ ō ya ōjila ku ujɔ ɔlɛ nu, klla gbɔɔ ō lɛ eko taajɛ ya ɛ̄gbā ō gba ku apɔlɛ mla ayinɔnya ku nu. Ɔdi bɛɛcɛ ŋma ō ceyitikwu ku nu a? Brizit gbɔɔ ō klɔcɛ ku Ubáyíbu mla ācɛ alɛwa, alɛwa ku ācɛ nōó kē klɔcɛ mla uwa a gáā lɛ ubatisim ya. Ipu ihayi ku 2005 ó kwu piya ɔcɛ o gbɔbu ɔna ō ta eko doodu. Ujehofa lɛ ɔhā hɛ ce ɔ ɛgɛ nɛ ó gɔbu kpɔtuce ɔ klla yɔ kwu ɔwa ku nu a. Ayinɔnya ku nu yɔ i gba Ujehofa ɛ̄gbā kpaakpa, ujɔ ɛpa kē yɔ ɛga nɛ u Brizit lā a babanya! Brizit jé kpɔcii ka Ujehofa jé ɔfu lɛ ɔ ɛɛ nɛ ó lɔtu āhɔ̄ ō lɔnɔ nɛhi ɔɔma mla okonu ō ŋmo ŋma ɛgiyi apɔlɛ ku nu a.

17. Ɔdi nɛ alɔ cika ō lɛ ɔtu ku alɔ ya ekponu ō ya a?

¹⁷ Ebilii dɔka ku alɔ gbɛla ka Ujehofa gē cigbihi kwu alɔ eko duuma nɛ alɔ yɔ ipu unwalu, ka ō yɔ ipu ɔwa ku Ujehofa klla géē ya ku āhɔ̄ kóō lɔnɔ tu alɔ tōōtɔ̄ɔ̄. Ebilii dɔka ku alɔ yuufi eko duuma néē lɛ ɛkɛmgbɛ ka ba ayinɛ nōo yɔ i ma ɔwɛ fu lɛ alɔ, ya uwa ŋmo amāŋ lɛ uwa ta agba a. Ó kē i dɔka ō bi okonu nɛ ācɛ gē ŋmo alɔ a, le ya cɛɛ ku alɔ ma ō kpɔtuce íne ku Ujehofa mla ɔwa ku nu. Amáŋ alɔ jé ōmiya ku ɔbiipu ku nu lɛyikwu alɔ, ohigbu ɔɔma ó gáā plla alɔ gla ŋ. (2 Ukɔ́r. 2:11) Lɛ ɔtu ku uwɔ ya ekponu ō ta aɛlā ɛkɛmgbɛ ku Ebilii mla ō yɔ kwu Ujehofa mla ɔwa ku nu gā ajaajɛ. Bla ka Ujehofa i gáā habɔ uwɔ ta gboogboo ŋ. (Aíjē 28:7) Ó lɛ a, a hii jɛga ku ɔdā duuma kóō hɛ uwɔ ŋma ɛgiyi Ujehofa ŋ!—Uróm 8:35-39.

18. Ɔdi nɛ alɔ gáā kɛla lɛyikwu ɔ ipu ikpɛyi ɛlā nōo gboce ɛnyā a?

¹⁸ Ipu ikpɛyi ɛlā nyā, alɔ kɛla lɛyikwu unwalu nɛ alɔ lɔfu má nōó lɔfu wa ŋma ipu ujɔ ŋ ma. Amáŋ ɔkwɛyi a wɛ kahinii, odee lɔfu ya ipu ujɔ nōo lɔfu ja alɔ ma ō kpɔtuce Ujehofa mla ɔwa ku nu. Ɛgɛnyá nɛ alɔ lɔfu yale ipu ɛdɔ unwalu ɛgɔɔma a? Alɔ géē kɛla lɛyikwu ɔɔma ipu ikpɛyi ɛlā nōo gboce ɛnyā a.