1-2. (a) Ɔdi gē ta alɔ abɔ nɛ alɔ gē lɔfu lɔtu āhɔ̄ olɔnɔ ɛ̄cī doodu a? Kōōcō lɛ ɛlā a teyi peee. (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

“EKO duuma nɛ um gbɔɔ ō gbɛla lɛyikwu ɛdɔ ojama mla unwalu nɛ um má ipu oyeeyi ku um a ba, n gē má ka um bu unwalu a mla ɔfu ku abɔyi um ŋ.” A ka ɛdɔ ɛlā ɛgɛnyá jejee ɛ? Ɛyinɛhi ku alɔ gē ka lɛ a. A lɔfu ka lɛ a ohigbu ɛgɛ nɛ a lɔtu ōcē obɔbi nɛhi éyi amāŋ ikwū ku ɔcɛ nɛ a yihɔtu nu a. Ɔdaŋ ku a gbɔɔ ō gbɛla lɛyikwu unwalu amāŋ ojama a, ɔtu ku uwɔ géē yɔ i da uwɔ ka lɔtu nu ɛ̄cī doodu ohigbu ka alelekwu ihɔ ku Ujehofa je “ɔfú nɛ̄ɛ̄nɛ̄hi” gā uwɔ.—2 Ukɔ́r. 4:7-9.

² Alɔ cɛgbá alelekwu ihɔ ku Ɔwɔico kóō ta alɔ abɔ ku alɔ ta ɛlá ō gbo ku ɛcɛ obɔbi nyā. (1 Ujɔ́n. 5:19) Alɔ klla cɛgbá ɔfu nɛ alɔ géē bi le nuunu ta “aálelékwū obɔ̄bíipú.” (Āfi. 6:12) Babanya, alɔ géē kɛla lɛyikwu ɔwɛ ɛpa nɛ alelekwu ihɔ ku Ɔwɔico lɔfu ta alɔ abɔ ipu unwalu nōo ba nyā. Cɛɛ igbihaajɛ, alɔ géē kɛla lɛyikwu ɔdā nɛ alɔ lɔfu ya, o ya ɛɛ ku alɔ miyɛ otabɔ nɛ alɔ miyɛ gla a ŋma ɛgiyi alelekwu ihɔ ku Ɔwɔico.

3. Ɔdi wɛ ɔwɛ éyi nɛ Ujehofa gē ta alɔ abɔ ku alɔ lɔtu ojama a?

³ Ɔwɛ éyi nɛ alelekwu ihɔ ku Ujehofa gē ta alɔ abɔ a wɛ ō je ɔfu iyē lɛ alɔ. Ɔfu nɛ alɔ cɛgbá ō bi le ya ɛjɛɛji ɔdā nɛ alɔ cika ō ya, naana nɛ alɔ yɔ i má ojama alɛwa a. Upɔlu nōo wɛ ɔcocɛhɔ a jé ka anuɔ lɔfu gba Ujehofa ɛ̄gbā gɔbu naana nɛ ó yɔ i má ojama alɛwa a, ohigbu ka ó gbolo ce ‘ɔfu ku Ohɔnyɛta’ a. (2 Ukɔ́r. 12:9) Ɛpleeko nɛ Upɔlu nyɔ gā iyawu ɔmpa ku nu kóō nyɔ i tɔɔna a, ó ceyitikwu bi eko alɛwa le tɔɔna lɛ ācɛ, ó klla yuklɔ abɔ duu, o ya ɛɛ kóō ta iyi nu abɔ. Ó yɔ ɔlɛ Akwila mla Uprisilai ipu Ukɔrinti.  É wɛ ācɛ ō gɔ ili ku aklɔkpɛ. Abɔ Upɔlu kē wɛ ɔcɛ ō ya ɛdɔ uklɔ ɛgɔɔma a, ó gē bi ɛ̄cī ōhī le yuklɔ mla uwa. (Ācot. 18:1-4) Alelekwu ihɔ je ɔfu iyē lɛ Upɔlu kóō lɔfu yuklɔ nɛ ó gē bi le ta iyi nu abɔ klla yuklɔ ku ɔna ō ta a lɔɔlɔhi.

4. Oŋma ɛlā nōo yɔ ipu ɔkpá ku 2 Ācɛ Ukɔ́rīnti 12:7-9 a, unwalu nyá nɛ Upɔlu lɛ a?

⁴ Jé 2 Ācɛ Ukɔ́rīnti 12:7-9. Ipu ɛga ku Ubáyíbu nyā, ɔdi nɛ Upɔlu yɔ i kɛla lɛyikwu ɔ eko nɛ ó ka ka anuɔ yɔ i nya mla ‘uje nōo kwu ɔ aklo’ a? Ɔdaŋ ka é lɛ uje wu uwɔ aklo, ó géē lɔnɔ ta uwɔ nɛɛnɛhi. Ó lɛ a, Upɔlu yɔ i ka ka anuɔ lɛ unwalu olɔnɔ éyi nōo ya ɔ a. Ó ka ka unwalu a ɔɔ lɛbɛɛka “ɔ̄cocɛ̄hɔ̄ kú ebilíi” nōo yɔ i ta ɔ ‘abahɔ’ a. Ó lɔfu wɛ ka ó wɛ Ebilii mla acocɛhɔ ku nu a ya nɛ Upɔlu yɔ i má unwalu a nōo lɛbɛɛka ‘uje nōo kwu ɔ aklo’ a ŋ. Amáŋ, eko nɛ alelekwu obɔbi ku Ebilii lɛ “ujē” amāŋ unwalu ku Upɔlu ɔɔma má a, ó lɔfu wɛ ka é gbɔɔ ō ya ku unwalu a kóō bɔbi fiyɛ. Ɔɔma kē lɛbɛɛka ɛgɛ nɛ ɔcɛ gē kwu uje gā ipu iyē ku ɔcɛ lipu lipu a. Ɔdi nɛ Upɔlu ya a?

5. Ɛgɛnyá nɛ Ujehofa cila ɔkɔ ō gba ku Upɔlu a?

⁵ Eko aflɛyi a, Upɔlu dɔka ku Ujehofa kóō le “ujē” ɔɔma fu. Ó kahinii: ‘Igbɛtá, n gbɔ̄ɔkɔ lɛ Óndú [Ujehofa] ā, kóō kwú [ɔ] ú ŋmá ɛgiyí um!’ Naana nɛ Upɔlu gbɔɔkɔ nɛɛnɛhi a, uje a kwu ɔ iyē kpɔ. Ɔɔma wɛ ka Ujehofa i po ɔkɔ ō gba ku nu ŋ nɛɛ? Ó lɛ a nóó. Ó po ɔkɔ ō gba ku nu nɛ. Ujehofa i je unwalu a fu ŋ, amáŋ ó je ɔfu nɛ Upɔlu cɛgbá a lɛ ɔ, o ya ɛɛ kóō lɔtu. Ujehofa kahinii: “Ɔfú kú um gē lɔfú nɛ̄hi ipú ācɛ nēe kwáahi ā.” (2 Ukɔ́r. 12:8, 9) Upɔlu lɛ eeye klla lɛ ɛbɔ ku ɔtu kpɔ, mla otabɔ ku Ujehofa!—Ufíl. 4:4-7.

6. (a) Ɛgɛnyá nɛ Ujehofa lɔfu cila ɔkɔ ō gba ku alɔ a? (b) Okonu ō ce ku Ubáyíbu nyá ipu ogwotu nyā ta uwɔ ɔtu kwu ɔtu a?

⁶ Bɛɛka Upɔlu a, ó lɛ eko duuma nɛ a gbɔɔkɔ lɛ Ujehofa kóō hɛ uwɔ ta ŋma unwalu duuma jejee ɛɛ? Ó lɔfu wɛ ku a gbɔɔkɔ lɛyikwu ɔ igbalɛwa ŋma ɔtu ku uwɔ, amáŋ unwalu a i nyɔ ŋ, ó kóō lɔfu yɔ i bɔbi tōōtɔ̄ɔ̄. Ɔɔma ya ku ɔtu kóō gbɔɔ ō junwalu gā uwɔ, ka Ujehofa lɔfu yɔ i cɔnu mla ɔ nɛɛ? Ɔdaŋ ka ó ya uwɔ lɛ a, blakwu ocabɔ mafu ku Upɔlu. Ɛgɛ nɛ Ujehofa cila ɔkɔ ō gba ku nu a, ɛgɔɔma nɛ ó gáā cila ɔkɔ ō gba ku uwɔ a! Á jé ŋ, Ujehofa i gáā fu unwalu a ŋ. Amáŋ ó géē je alelekwu ihɔ ku nu nōo géē je ɔfu nɛ a cɛgbá ō bi le lɔtu unwalu a gā awɔ. (Aíjē 61:3, 4) Unwalu a lɔfu “cē [uwɔ] gwōnū,” amáŋ Ujehofa i gáā habɔ uwɔ ta ŋ.—2 Ukɔ́r. 4:8, 9; Ufíl. 4:13.

7-8. (a) Ɛgɛnyá nɛ alelekwu ihɔ lɛbɛɛka owu a? (b) Ɛgɛnyá nɛ Upita mafu ɛgɛ nɛ alelekwu ihɔ gē yuklɔ a?

⁷ Ɔwɛ ɔhá nyá nɛ alelekwu ihɔ gē ta alɔ abɔ a? Alɔ lɔfu lɛ alelekwu ihɔ gbla owu. Ɔdaŋ ku owu gē ta lɔɔlɔhi, ó géē ya ku ugbeenyi nōo yɔ ipu eŋkpɔ kóō yɔ i nyɔ kpaakpa jaa gbeeko nɛ ó géē fu ɛga nɛ ó yɔ i nyɔ a, naana nɛ isu a kóō yɔ i ta ubagwu a. Ɔwɛ ekponu ɔɔma, alelekwu ihɔ gē ta alɔ abɔ ku alɔ kóō yɔ i gba Ujehofa ɛ̄gbā, jaa gbeeko nɛ alɔ le ta ipu ɛcɛ ɛpɛpɛ nɛ Ɔwɔico cokonu nu lɛ alɔ, naana nɛ alɔ yɔ i má unwalu ɛyɛɛyɛyi a.

⁸ Abɔ Upita wɛ ɔcɛ ō kwu ɛbeenyi a, ó jé ɔdā alɛwa lɛyikwu ɛgɛ néē gē pɛ ugbeenyi a. Ɛnyā lɔfu ya ɛɛ nɛ eko nɛ ó yɔ i kɛla lɛyikwu ɛgɛ nɛ alelekwu ihɔ gē yuklɔ a, ó bi ɛlā nōo lɔfu tɛɛma kwu ugbeenyi ō pɛ le kɛla a. Ó kahinii: “Ɔ̄comɛ́ɛbɛ dúú ī gē cɛ̄ɛ̄hɔ̄ ká abɔ̄yi nū glá ŋ́, amáŋ ācɛ nɛ̄ alelékwū kú Ɔwɔicō gē tá ā, gē cɛ̄hɔ̄ nōo ŋmá ɛgiyí Ɔwɔicō á.” Ɛlā ku Ugirisii nōo wɛ u “gē tá ā” a lɛ ō ya mla “ɛgɛ nɛ ɔcɛ gē pɛ odee amāŋ gē bi ɔcɛ gē mafu odee lɛ ɔ a.”—2 Upít. 1:21.

9. Ɔdi nɛ Upita dɔka ku ācɛ kéē gbɛla lɛyikwu ɔ eko nɛ ó ka ka alelekwu ihɔ bi ācɛ nōo ta Ubáyíbu a “tá ā”?

⁹ Ɔdi nɛ Upita dɔka ku alɔ gbɛla lɛyikwu ɔ eko nɛ ó kahinii: “Gē tá ā”? Eko nɛ Uluku nōo ta ɔkpá ku Úklɔ́ Kú Ācotɛ̄hɔ̄ a, yɔ i mafu ɛgɛ nɛ owu gē “pɛ” ugbeenyi a, ó bi ɛlā ku Ugirisii  ɔɔma le yuklɔ duu. (Ācot. 27:15) Adā éyi nōo jé odee lɛyikwu Ubáyíbu nɛɛnɛhi a kahinii: Eko nɛ Upita ka ku alelekwu ihɔ ku Ɔwɔico bi ācɛ nōo ta Ubáyíbu a “tá ā,” ó yuklɔ mla ɛlā nōo géē ta ācɛ abɔ kéē gbɛla lɛyikwu ugbeenyi ō pɛ. Upita yɔ i ka ku abɔ owu gē bi ugbeenyi ta a, ɛgɔɔma nɛ alelekwu ihɔ ku Ɔwɔico bi ācɛ nōo ta Ubáyíbu a ta a, o ya ɛɛ kéē lɔfu yuklɔ ku uwa kwɛyi. Adā a klla ka ku ācɛ nōo ta Ubáyíbu a lɛbɛɛka ugbeenyi, néē “lɛ ili néē i pla ɛhico ku nu a kpo gico amāŋ nwula tɔɔtɛ a.” É le tutu ō yuklɔ nɛ alelekwu ihɔ a yɔ i mafu lɛ uwa kéē ya a. Ujehofa lɛ aya ku nu ya. Anu je “owu” amāŋ alelekwu ihɔ a lɛ uwa a. Ācɛ nōo kē ta Ubáyíbu a kē ya aya ku uwa duu. É yuklɔ néē je lɛ uwa kéē ya a. É yɛce ɔwɛ nɛ alelekwu ihɔ ku Ɔwɔico yɔ i mafu lɛ uwa a.

10-11. Ɔdā ɛpa nyá nɛ alɔ cika ō ya, o ya ɛɛ ku alelekwu ihɔ ku Ɔwɔico kóō bēē mafu ɔwɛ lɛ alɔ a? Kōōcō lɛ ocabɔ éyi da alɔ.

¹⁰ Ó lɛ aafu ŋ, alɔ jé ka Ujehofa i gē bi alelekwu ihɔ ku nu le ta ācɛ abɔ kéē ta Ubáyíbu icɛ gɛ ŋ. Amáŋ, Ujehofa gē bi alelekwu ihɔ ku nu le ma ɔwɛ fu lɛ ācɛ ɔlɛ nu kpɔ ɛ. Ujehofa yɔ i ya aya ku nu kpɔ. Ɛgɛnyá nɛ alɔ géē ya, ku alɔ miyɛ otabɔ nɛ alɔ miyɛ gla a ŋma ɛgiyi alelekwu ihɔ a? Ó géē cɛgbá ku alɔ le má ku alɔ yɔ i ya aya ku alɔ. Ɛgɛnyá nɛ alɔ gáā ya ɛnyā a?

¹¹ Leyi yɛ ocabɔ nyā ɛ: Ɔdaŋ ka ɔcɛ ō pɛ ugbeenyi dɔka ku owu kóō ta ɔ abɔ, ó cika ō ya ɔdā ɛpa. Aflɛyi, ó cika ō lɛ ugbeenyi a piyeyi ta ɔwɛ nɛ owu gē ta a. Da ma, ugbeenyi a i kóō gáā yɛ gɔbu gla ŋ, ɔdaŋ ka ɔcɛ ō pɛ ugbeenyi a i bi ɔ wa ɛga nɛ owu gē ta a ŋ. Ɔmpa, ó cika ō pi ili nōo gē yɔ ɛhico ku ugbeenyi a gico klla lɛ ɔ wi kóō le nwula tɔɔtɛ. Ɔdaŋ ku owu kóō yɔ i ta nɛɛnɛhi, nɛ owu a i kē pɛ ta ipu ili ɔɔma ŋ, ugbeenyi ɔɔma i gáā yɛ gɔbu gla ŋ. Ɔwɛ ekponu ɔɔma, alɔ géē yɔ i gba Ujehofa ɛ̄gbā gɔbu, ɔdaŋ ka alelekwu ihɔ gē ta alɔ abɔ foofunu. Ɔdaŋ ku alɔ dɔka ku alelekwu ihɔ ku Ɔwɔico kóō bēē mafu ɔwɛ lɛ alɔ, alɔ cika ō ya ɔdā ɛpa. Aflɛyi, alɔ cika ō bēē yuklɔ duuma amāŋ ɔdā nɛ alelekwu ihɔ ku Ɔwɔico gē mafu lɛ ācɛ ɔlɛ Ɔwɔico  kéē ya a. Ɔmpa, alɔ cika ō yuklɔ a ɛgɛ duuma nɛ alɔ jé ku alɔ ya gla a. (Aíjē 119:32) Ɔdaŋ ku alɔ gē ya aɔdā ɛpa nyā, alelekwu ihɔ ku Ɔwɔico géē yɔ i je ɔfu lɛ alɔ, ɔfu nōo géē ta alɔ abɔ ku alɔ hayi kpaakpa yɔ i gba Ujehofa ɛ̄gbā jaa gbeeko nɛ ɛcɛ ɛpɛpɛ ku nu géē wa a.

12. Ɔdi nɛ alɔ gáā kɛla lɛyikwu ɔ babanya a?

¹² Alɔ leyi yɛ ɔwɛ ɛpa nɛ alelekwu ihɔ gē ta alɔ abɔ ɛ. Alɔ ka ɔwɛ éyi wɛ ka alelekwu ihɔ gē je ɔfu lɛ alɔ. Ɔwɛ ɔmpa a wɛ ka ó gē ta alɔ abɔ ku alɔ hayi kpaakpa eko duuma nɛ alɔ yɔ i má unwalu ɛyɛɛyɛyi. Alelekwu ihɔ gē ma ɔwɛ fu lɛ alɔ klla gē ta alɔ abɔ ku alɔ yuklɔ nɛ Ujehofa dɔka ku alɔ ya a. Uklɔ nōo géē ya ku alɔ lɛ oyeeyi opiyoo a. Babanya, alɔ géē leyi yɛ aɔdā ɛnɛ nɛ alɔ cika ō ya, o ya ɛɛ ku alɔ miyɛ otabɔ nɛ alɔ miyɛ gla a ŋma ɛgiyi alelekwu ihɔ.

13. Oŋma ɛlā nōo yɔ ipu ɔkpá ku 2 Utímōti 3:16, 17, ɔdi nɛ Ubáyíbu lɔfu ya lɛ alɔ a, amáŋ ɔdi nɛ alɔ abɔyi alɔ kē cika ō ya a?

¹³ Aflɛyi, ya oklɔcɛ ku Ubáyíbu. (Jé 2 Utímōti 3:16, 17.) Ɔwɔico bi alelekwu ihɔ le je ɛlā ku nu ta ipu ɔtu ku ācɛ nōo ta Ubáyíbu a. Eko duuma nɛ alɔ gē jé Ubáyíbu klla gē gbɛla tu ɛlā nɛ alɔ gē jé a, ɛlā ku Ɔwɔico mla aukɔ́ ku nu géē yɔ i gā ipu ɔtu ku alɔ. Ɔɔma kē i ta alɔ abɔ ku alɔ ya opiyabɔ ipu oyeeyi ku alɔ. Opiyabɔ nōo géē ya ku ɔtu kóō he Ujehofa. (Uhíb. 4:12) Amáŋ, ɔdaŋ ku alɔ dɔka ō miya otabɔ nɛ alɔ miyɛ gla a ŋma ɛgiyi alelekwu ihɔ, alɔ cika ō lɛ eko taajɛ eko doodu, ku alɔ bēē ya oklɔcɛ ku Ubáyíbu klla gē gbɛla tu ɛlā nɛ alɔ jé a lipu lipu. Ɔdaŋ ku alɔ gē ya lɛ a, ɛlā ku Ɔwɔico géē lɛ abɔ kwu ɛgɛ nɛ alɔ gē kɛla mla uce ō ya ku alɔ.

14. (a) Ɔdiya nɛ alɔ ka ku alelekwu ihɔ gē yɔ ipu alɔ eko duuma nɛ alɔ gē ya ōjila ku ujɔ a? (b) Ɔdi gáā ta alɔ abɔ ku alɔ miyɛ otabɔ nɛ alɔ miyɛ gla a ŋma ɛgiyi alelekw ihɔ eko duuma nɛ alɔ gē ya ōjila ku ujɔ a?

¹⁴ Ɔmpa, gba Ɔwɔico ɛ̄gbā tɔha mla ācɛ ɔlɛ nu. (Aíjē 22:22) Alelekwu ihɔ ku Ujehofa gē yɔ ɔtahɛ ku alɔ eko duuma nɛ alɔ gē ya ōjila ku ujɔ. (Mafú 2:29) Ɔdiya nɛ alɔ ka lɛ a? Ohigbu ka eko duuma nɛ alɔ jila tɔha mla ayinɛ alɔ ipu ōjila, alɔ gē gbɔɔkɔ lɛ Ujehofa kóō je alelekwu ihɔ ku nu lɛ alɔ, alɔ gē gwiije ku Ajɔɔcɛ nōo ŋma ipu Ubáyíbu, alɔ klla gē jahɔ tu aɛlā nɛ ayinɛ alɔ nɔnyilɔ nɛ alelekwu ihɔ fu a gē ka tɛɛcɛ ŋma ipu Ubáyíbu a. Alelekwu ihɔ klla gē ta ayinɛ alɔ nɔnya abɔ kéē yuklɔ ku uwa lɔɔlɔhi ɛyi ede. Ɔdaŋ ku alɔ dɔka ō miya otabɔ nɛ alɔ miyɛ gla a ŋma ɛgiyi alelekwu ihɔ, alɔ cika ō tutu lɔɔlɔhi gbɔbu ɛɛ ku alɔ wa ōjila ku ujɔ klla je ohi. Ɔwɛ ɔɔma, bɛɛka ili nōo gē yɔ ɛhico ku ugbeenyi nōo le nwula tɔɔtɛ a, alɔ géē le tutu ō miya otabɔ ŋma ɛgiyi alelekwu ihɔ a.

15. Ɛgɛnyá nɛ alelekwu ihɔ gē ta alɔ abɔ ipu uklɔ ku ɔna ō ta a?

¹⁵ Ɔmɛta, tɔɔna. Ɔdaŋ ku alɔ gē jé Ubáyíbu lɛ ācɛ eko duuma nɛ alɔ gē tɔɔna klla gē nwu ācɛ ɛlā, ó géē mafu ku alɔ yɔ i jɛga lɛ alelekwu ihɔ kóō ta alɔ abɔ ipu uklɔ ku ɔna ō ta a. (Uróm 15:18, 19) Ɔdaŋ ku alɔ dɔka ō miya otabɔ nɛ alɔ miyɛ gla a ŋma ɛgiyi alelekwu ihɔ, alɔ cika ō yuklɔ ku ɔna ō ta a lɔɔlɔhi klla jé Ubáyíbu lɛ ācɛ eko duuma nɛ ó tɔɔtɛ. Eko duuma nɛ alɔ yɔ i tɔɔna, ɔwɛ éyi nɛ alɔ lɔfu gbɔɔ ɔka ō ka mla ācɛ ɔwɛ olɔhi a wɛ ō yuklɔ mla ocabɔ ku ɔka o ka nōo gē yɔ ipu Ɔkpá Ku Ōjila ku Oyeeyi mla Uklɔ Ku Alɔ.

16. Ɔdi wɛ ɔwɛ ō tɔɔtɛ fiyɛ duu nɛ alɔ lɔfu lɛ alelekwu ihɔ a?

¹⁶ Ɔmɛnɛ, gbɔɔkɔ lɛ Ujehofa. (Umát. 7:7-11; Ulúk. 11:13) Ɔwɛ ō tɔɔtɛ fiyɛ duu nɛ alɔ lɔfu lɛ alelekwu ihɔ a wɛ ō ba Ujehofa ipu ɔkɔ ō gba kóō je lɛ alɔ. Ɔdā duuma i ci ɔkɔ ō gba ku alɔ ŋma ō fu ɛgiyi Ujehofa gla ŋ. Ɔdā duuma i lɔfu ci alɔ ŋma ō miyɛ alelekwu ihɔ ku Ujehofa gla ŋ. Alelekwu ihɔ lɔfu ta alɔ abɔ ɔdaŋ nɛ alɔ kóō yɔ ipu inu agba. Ebilii i kē lɔfu ya ɔdā duuma kóō ci alɔ ŋma ō miyɛ alelekwu ihɔ a gla ŋ. (Ujɛ́m. 1:17) Ɛgɛnyá nɛ alɔ cika ō gbɔɔkɔ, o ya ɛɛ ku alɔ miyɛ otabɔ nɛ alɔ miyɛ ŋma ɛgiyi alelekwu ihɔ  gla a? O ya ɛɛ ku alɔ cila ɔka ɔɔma, alɔ nwu ɛlā lɛyikwu ɔkɔ ō gba ŋma aciije éyi néē ta ipu ɔkpá ku Ulúku foofunu a. *

17. Ɔdi nɛ alɔ nwu lɛyikwu ɔkɔ ō gba ŋma aciije ku Ujisɔsi nōo yɔ ipu ɔkpá ku Ulúku 11:5-9, 13?

¹⁷ Jé Ulúku 11:5-9, 13. Aciije ku Ujisɔsi mafu ɛgɛ nɛ alɔ cika ō gbɔɔkɔ lɛyikwu alelekwu ihɔ a. Ipu aciije a, adā a miyɛ ɔdā nɛ ó yɔ i dɔka a, ohigbu ka ó “yúwēyī o yɔ̄ ī bā odée ā piyóo ŋ́.” Ó yuufi ō ba oklobiya ku nu kóō ta ɔ abɔ ŋ, naana nōó kóō wɛ ɛpla ahapa otu a. (Má ɔdā néē ka ipu Ɔkpá Uklɔ ku alɔ ku ɔya ɔmɛhilii ku 2018 lɛyikwu Ulúk. 11:8.) Ɔdi nɛ Ujisɔsi ka aciije nyá ɔɔ gē nwu lɛyikwu ɔkɔ ō gba a? Ó kahinii: “Aá ba Ɔwɔicō ɔdā nōo ce aá ɛgbá ā, ó kē í je lɛ aá. Aá tíne odée ŋmó ɛgiyí Ɔwɔicō, a kē í lɛ ɔ́. Aá lɛ abɔ̄ gbo ɔ̄wɛ ā, é kē í nwūla ɔ́ lɛ aá.” Ó lɛ a, ɔdi nɛ alɔ nwu ŋma anu a? Alɔ nwu ka ɔdaŋ ku alɔ dɔka ku alelekwu ihɔ kóō ta alɔ abɔ, alɔ cika ō yɔ i gbɔɔkɔ lɛyikwu ɔ piyoo.

18. Oŋma aciije ku Ujisɔsi, ɔdiya nɛ alɔ lɔfu lɛ ɔtuce ku Ujehofa géē je alelekwu ihɔ ku nu lɛ alɔ a?

¹⁸ Aciije ku Ujisɔsi ɔɔma klla ta alɔ abɔ má ɔdā nōo ya nɛ Ujehofa géē je alelekwu ihɔ ku nu lɛ alɔ a. Adā ipu aciije a dɔka ō ya ugbɔga ku nu ɔga lɔɔlɔhi. Ó gbɛla ka ō dɔka ɔdole lɛ ɔ wɛ ɔdā nɛ anuɔ cika ō ya piii, naana nɛ ó kóō wa qpla ahaapa otu a. Amáŋ ó kē lɛ ɔdole duuma ō je lɛ ɔ ŋ. Ujisɔsi ka oladogbe a je igbo a lɛ adā a ohigbu ɛgɛ nɛ adā a i ya uweyi ō yɔ i ba ɔ odee a piyoo ŋ ma. Ɔdi wɛ ɛlā nɛ Ujisɔsi yɔ i nwu a? Ɔdaŋ ku ɔlɛɛcɛ nōó jila iyē ŋ ma le tutu ō ta oladogbe ku nu nōo yɔ i ba ɔ odee piyoo a abɔ, á gbɛla ka Adā ogbonɛnɛ ku alɔ nōo yɔ ɔkpanco a, géē je alelekwu ihɔ lɛ ācɛ nōo yɔ i ba ɔ piyoo kóō je lɛ uwa ŋ? Ó lɛ a, alɔ lɔfu lɛ ɔtuce ka Ujehofa géē po ɔkɔ ō gba ku alɔ, ɔdaŋ ku alɔ ba ɔ kóō je alelekwu ihɔ lɛ alɔ.—Aíjē 10:17; 66:19.

19. Ɔdiya nɛ alɔ jé kpɔcii ku alɔ géē lɔtu a?

¹⁹ Naana nɛ ɛ̄jɛ̄ i gē jɛ Ebilii ō yɔ i nuunu ta alɔ ŋ ma a, alɔ jé kpɔcii ku alɔ géē yɔ i lɔtu. Ɔdiya a? Ohigbu ku alelekwu ihɔ gē ta alɔ abɔ ɔwɛ ɛpa. Aflɛyi, ó gē je ɔfu lɛ alɔ, ɔfu nɛ alɔ cɛgbá ō bi le lɔtu unwalu ɛyɛɛyɛyi a. Ɔmpa, alelekwu ihɔ wɛ ɔfu nōo gē ta alɔ abɔ ku alɔ yɔ i gba Ujehofa ɛ̄gbā jaa gbeeko nɛ alɔ géē gā ipu ɛcɛ ɛpɛpɛ á. Alɔ kóō lɛ ɔtu ku alɔ ya ekponu ō miyɛ otabɔ duuma nɛ alɔ miyɛ gla a ŋma ɛgiyi alelekwu ihɔ a!