1-2. Oŋma ɛlā nōo yɔ ipu ɔkpá ku 1 Upíta 4:7, 8 a, ɔdi gáā ta alɔ abɔ ku alɔ lɔtu ku āhɔ̄ olɔnɔ a?

ABƆ “eko nɛ̄ ɛcɛ gáā mɛ ā” le ba ɛ ma, ɛjɛɛji alɔ lɔfu má owe nɛɛnɛhi. (2 Utím. 3:1) Ocabɔ mafu, abɔ é lɛ abɔ ba ɔkpá kwɛyi ipu éwo éyi nōo yɔ Africa a, ācɛ a gbɔɔ ō nuunu. Unu a i wɛ unu nɛ̄ŋcɛ́ nóó. Eko ɔɔma oyeeyi ku ayinɛ alɔ nōo ba abɔɔ a le kwu ikwū ajaajɛ, ohigbu ka ācɛ yɔ i nuunu yɛ jila uwa ta. Ɔdi ta uwa abɔ ipu āhɔ̄ ō kwɔla nyā a? Ācɛ ōhī ku uwa nyɔ gáā kla ɔlɛ ayinɛ alɔ nōo yɔ ɛga nɛ unu a i faajɛ ɛgiyi uwa ŋ ma. Ɔyinɛ alɔ nɔnyilɔ éyi kahinii: “Ipu āhɔ̄ ɛgɛnyā n gē gweeye, ohigbu ku um lɛ aɔya alɛwa nōo yɔ pi um. Alɔ kē ta iyi alɔ ɔtu kwu ɔtu.”

² Eko nɛ “ákanya [amāŋ owe] nɛ̄hi ā” géē gbɔɔ a, alɔ géē lɛ eeye, ɔdaŋ ku alɔ lɛ aoklobiya mla ancɛnya olɔhi nōo yihɔtu alɔ. (Mafú 7:14) Ohigbu ɔɔma, ó géē lɔhi ku alɔ lɛ ɛma olɔfu mla ayinɛ alɔ babanya. (Jé 1 Upíta 4:7, 8.) Alɔ lɔfu nwu ɔdā alɛwa ŋma ɛgiyi Ujɛrɛmiya. Gbɔbu le eko néē ca Ujerusalɛm taajɛ a, aoklobiya ku nu nōo kwu ɔ ajaajɛ a ta ɔ abɔ kóō le wi. * Ɛgɛnyá nɛ alɔ gáā gbla Ujɛrɛmiya ya a?

3. (a) Ɔdi wɛ ɔdā nōo géē yɛ i ya ku Ujɛrɛmiya kóō kwu iyi nu bi ŋma ɛgiyi ācɛ a? (b) Ɔdi nɛ Ujɛrɛmiya da Ubaruku ɔmalotɔkpa ku nu a, ɔdi kē bɛɛcɛ ŋma anu a?

³ Ujɛrɛmiya lā mla ācɛ nōo gē ya ikpɛyi olɔfu ta Ɔwɔico ihayi ofu ɛpa amāŋ ɛ̄nɛ̄ ō fiyɛ ɔɔma. Ācɛ a kē lɛ ō ya mla aaoladogbe ku nu, ó klla lɔfu lɛ ō ya mla aɔmaapu nu ōhī nōo ŋma Anatɔɔtu,  ipɔlɛ ku nu a. (Ujɛr. 11:21; 12:6) Amáŋ, ɛnyā i ya kóō kwu iyi nu bi ŋma ɛgiyi uwa ŋ. Ku ɔkwɛyi a, ó da Ubaruku ɔmalotɔkpa ku nu nōo yɔ kwu ɔ ajaajɛ a lɛyikwu ɛgɛ nɛ ɔtu gē ya ɔ lɛ a. Alɔ abɔyi alɔ kē jé ɛgɛ nɛ ɔtu ya ɔ lɛ a duu, ohigbu ka é ta ɔ taajɛ ipu Ubáyíbu. (Ujɛr. 8:21; 9:1; 20:14-18; 45:1) Abɔ Ubaruku yɔ i ta ɛjɛɛji ɔdā nōo ya Ujɛrɛmiya a, anu mɛmla Ujɛrɛmiya gbɔɔ ō nwu ɛgɛ néē géē yihɔtu iyi uwa klla lɛ ojilima ce iyi uwa nɛhi.—Ujɛr. 20:1, 2; 26:7-11.

4. Ɔdi nɛ Ujehofa da Ujɛrɛmiya kóō ya a, ɛgɛnyá nɛ uklɔ ɔɔma kē ya ku ɛma nɛ Ujɛrɛmiya mla Ubaruku lɛ mla iyi uwa a kóō lɔfu tōōtɔ̄ɔ̄ a?

⁴ Ujɛrɛmiya lɛ ɔtu pi ācɛ Isrɛlu ahɔ̄ lɛyikwu ɔdā nōo géē ya ipu Ujerusalɛm a. (Ujɛr. 25:3) Ujehofa klla ta ācɛ a ɔtu kwu ɔtu kpɔ kéē piyabɔ. Ó da Ujɛrɛmiya kóō lɛ ɛlā lɛyikwu ahɔ̄ ō pi a ta tu ipu ɔkpá. (Ujɛr. 36:1-4) Ó lɔfu wɛ ka Ujɛrɛmiya mla Ubaruku bi ɔya alɛwa le yuklɔ nyā nɛ Ɔwɔico je ɔ́da lɛ uwa kéē ya a. Amáŋ ó lɛ aafu ŋ, abɔ é yɔ i yuklɔ a tɔha a, é lɛ ɛga ō kɔka nōo ya ku ɔtu okpoce ku uwa kóō lɔfu.

5. Ɛgɛnyá nɛ alɔ bi le jé ka Ubaruku wɛ ɛnɛɛnɛ oklobiya ku Ujɛrɛmiya a?

⁵ Abɔ é lɛ ɔkpá a ta kwɛyi a, Ujɛrɛmiya lɛ ɔtuce Ubaruku oklobiya ku nu, anu ó kwu ɔkpá u lɛ ɔ kóo nyɔ i da ācɛ a lɛyikwu olɛhɔ a. (Ujɛr. 36:5, 6) Ubaruku abɔyi nu lɛ ɔtu gáā yuklɔ a, naana nōó wɛ uklɔ nōo lɔfu lɛ oyeeyi ku nu kwu ikwū ajaajɛ a. Gbɛla lɛyikwu ɛgɛ nɛ ɔtu géē yɛ i he Ujɛrɛmiya lɛ lɛyikwu Ubaruku, eko nɛ Ubaruku le yɛ ta agbliihɔ nɛhi a gáā jé ɔkpá a tɛɛcɛ lɛ ācɛ a, ɛgɛ nɛ Ujɛrɛmiya da ɔ a. (Ujɛr. 36:8-10) Aotrɛyi ku Ujuda lɛ ɔdā nɛ Ubaruku ya a po, anu é lɛ ɔ́da je lɛ ɔ kóō lɛ ɔkpá a jé tɛɛcɛ lɛ uwa a! (Ujɛr. 36:14, 15) Aotrɛyi a gáā le miya ō gáā da Ujɛhoyakim ɔcɛ́ a ɔdā nɛ Ujɛrɛmiya ka a. É lɛ enyinyi ku Ubaruku má, anu é da ɔ kahinii: ‘Awɔ mɛ́mla Ujɛrɛmíya kóō le kwu gaá tayínū, nɛ̄ ɔ̄cɛ dúúmā í gáā jé ɛga nɛ̄ aá yɔ̄ ā ŋ́.’ (Ujɛr. 36:16-19) Ukɔ́ néē tu ɔ ɔɔma wɛ ukɔ́ olɔhi!

6. Ɔdi nɛ Ujɛrɛmiya mla Ubaruku ya, abɔ ācɛ a i dɔka ɛlā ku uwa ŋ ma?

 ⁶ Ujɛhoyakim ɔcɛ́ a gbɔɔ ō cɔnu nɛɛnɛhi eko nɛ ó lɛ ɛlā nɛ Ujɛrɛmiya ta a po a. Ó kóō lɛ ɔkpá a tɔla, anu ó lɛ ɔ́da je kéē gáā lɛ Ujɛrɛmiya mla Ubaruku kwu a. Amáŋ, Ujɛrɛmiya i yuufi ŋ. Ó kwu ɔkpá ɔhá u lɛ Ubaruku, anu ó gbɔɔ ō da ɔ olɛhɔ ku Ujehofa a. Ubaruku lɛ “odúúdú ɔdā nēe bá ɔkpá kú aflɛ́yí mɛ́mla ɛhɔ̄ ékpónú ɔ́ɔmā kpó tá tāajɛ” kpɔ.—Ujɛr. 36:26-28, 32.

7. Ɔdi wɛ ɔdā nōo lɔfu ya, abɔ Ujɛrɛmiya mla Ubaruku yɔ i yuklɔ tɔha a?

⁷ Igbalɛwa, ɔdaŋ ku ācɛ ɛpa lɔtu ojama éyi tɔha, ɛma ku uwa gē lɔfu i bi o. Ohigbu ɔɔma, Ujɛrɛmiya mla Ubaruku lɔfu gbɔɔ ō jé iyi uwa lɔɔlɔhi fiyɛ klla gáā lɛ ɛma olɔfu lɛ, abɔ é yuklɔ tɔha kéē ta ɔkpá nɛ Ujɛhoyakim nōo wɛ ɔcɛ́ obɔbi je tɔla a. Ɛgɛnyá nɛ ocabɔ ku acɛnyilɔ ɛpa nyā nōo hayi kpaakpa a lɔfu ta alɔ abɔ a?

8. Ɔdi lɔfu ci alɔ ŋma ō ya ku alɔ lɛ aoklobiya mla ancɛnya a, ɔdiya nɛ alɔ kē cika ō ceyitikwu ya ku alɔ lɛ aoklobiya mla ancɛnya a?

⁸ Ó lɔfu lɔnɔ ta alɔ ō da ācɛ ɛgɛ nɛ ɔtu gē ya alɔ lɛ a, ɔdaŋ ku ɔcɛ éyi lɛ ɔdā ō kwiiye ya alɔ gbɔbu ɛ. (Aíit. 18:19, 24) Amāŋ ó lɔfu yɔ i ya alɔ bɛɛka alɔ i lɛ eko mla ɔfu ō bi le ya ku alɔ lɛ aoklobiya amāŋ ancɛnya ŋ ma. Amáŋ, alɔ kóō hii gbɛla ka alɔ i gáā ya ɔ gla ŋ. Ɔdaŋ ku alɔ dɔka ku ayinɛ alɔ kéē yɔ pi alɔ eko duuma nɛ alɔ gbɔɔ ō má ojama amāŋ unwalu, alɔ cika ō nwu ɛgɛ nɛ alɔ géē lɛ ɔtuce uwa babanya. Ɔwɛ éyi nōo cɛgbá nɛhi nɛ alɔ lɔfu ya ɛnyā a wɛ ō da uwa ɔdā nōo yɔ ipu ɔtu ku alɔ mla ɛgɛ nɛ ɔtu gē ya alɔ lɛ a.—1 Upít. 1:22.

9. (a) Ɛgɛnyá nɛ Ujisɔsi mafu ka ó kpɔtuce aɔya ku nu a? (b) Ɔwɛ nyá nōo kɛla lɛyikwu ɔdā nōo yɔ ipu ɔtu ku uwɔ mla ɛgɛ nɛ ɔtu gē ya uwɔ lɛ géē ta uwɔ abɔ ku a lɛ aoklobiya mla ancɛnya nōo géē kwu uwɔ ajaajɛ a? Kōōcō lɛ ocabɔ éyi da alɔ.

⁹ Ujisɔsi kpɔtuce aɔya ku nu nɛhi. Ó ma ɔ fu ɛgɛ nɛ ó gē da uwa ɔtu ku nu, nɛ ó klla gē lɛ ɔdā duuma tayinu ŋma ɛgiyi uwa ŋ ma. (Ujɔ́n. 15:15) Ɔdaŋ ku alɔ a gē da aoklobiya mla ancɛnya alɔ lɛyikwu aɔdā nōo gē cɛ lɛ alɔ gweeye, aɔdā nōo gē junwalu lɛ alɔ ɔtu, mɛmla aɔdā nōo gē kwu alɔ iyē, ó géē mafu ku alɔ yɔ i gbla Ujisɔsi ya. Eko duuma nɛ ɔcɛ yɔ i kɛla gā uwɔ, jahɔ lɔɔlɔhi. Ɔdaŋ ku a gē ya lɛ a, a géē má ka awɔ mɛmla ɔcɛ ɔɔma gē gbɛla ɔwɛ ekponu, ka ɛgɛ nɛ ɔtu gē ya ɔ a ɛgɔɔma nɛ ó i ya uwɔ lɛ duu a. A klla géē wa i má ku ɔdā nɛ aa ɛplɛɛpa miya ō ya a kóō wɛ ɔdā ekponu duu. Leyi yɛ ocabɔ mafu ku ɔyinɛ alɔ nɔnya Ucindy ɛ. Ó wɛ ihayi ofu ce ahaanɛ. Ó ya ɔncɛnya tu Umarie-Louise ɔyinɛ alɔ nɔnya éyi nōo wɛ ɔcɛ ō gbɔbu ɔna ō ta, nōo wɛ ihayi ofu ɛta ce ahaapa a. Ipu alaadi doodu, Ucindy mla Umarie-Louise gē yuklɔ tɔha ipu uklɔ ku ɔna ō ta ɔcɔɔci ku ɛ̄cī ɔmɛnɛ. É gē nwula ɔtu ku uwa gē kɛla lɛyikwu aɛlā ɛyɛɛyɛyi. Ucindy kahinii:  “Ɔtu gē he um nɛhi eko duuma nɛ um gē kɔka lɛyikwu aɛlā ō cɛgbá nɛhi aɔya um, ohigbu ka ó gē ta um abɔ ku um jé ɛdɔ ācɛ néē wɛ a lɔɔlɔhi.” Bɛɛka Ucindy a, ɔdaŋ ku a gē da aoklobiya mla ancɛnya uwɔ ɔdā nōo yɔ ipu ɔtu ku uwɔ mla ɛgɛ nɛ ɔtu gē ya uwɔ lɛ, nɛ a klla gē jahɔ tu uwa eko duuma nɛ uwa a gē kɛla gā uwɔ, ó géē ya ku ɛma ku aa kóō lɔfu tōōtɔ̄ɔ̄.—Aíit. 27:9, NW.

10. Oŋma ɛlā nōo yɔ ipu ɔkpá ku Aíita 27:17 a, ɔdā olɔhi nyá lɔfu ya ɔdaŋ ku alɔ gē yuklɔ tɔha mla ayinɛ alɔ a?

¹⁰ Ɛgɛ nɛ ó ya Ujɛrɛmiya mla Ubaruku a, eko duuma nɛ alɔ yuklɔ tɔha mla ayinɛ alɔ klla gē má uce ō ya olɔhi ku uwa, ó géē ta alɔ abɔ ku alɔ nwu ɛlā ŋma ɛgiyi uwa klla tubla uwa fiyɛ. (Jé Aíita 27:17.) Ocabɔ mafu, ɔdaŋ ku a má ɔncɛnya uwɔ éyi lɛ ɔtu ipu uklɔ ku ɔna ō ta yɔ i kɛla lɛyikwu ɔdā nɛ ó kpɔtuce mla ɔkwɛyi lɛyikwu Ujehofa mla ɔdā nɛ Ujehofa tine a, ɛgɛnyá nɛ ɔtu gáā ya uwɔ lɛ a? Ó lɛ aafu ŋ, a géē yihɔtu ɔncɛnya uwɔ ɔɔma fiyɛ.

11-12. Aocabɔ nyá mafu ku ō tɔɔna mla aɔya ku alɔ géē tabɔ o ya ku ɛma ku alɔ mla uwa kóō lɔfu a?

¹¹ Alɔ leyi yɛ ocabɔ ɛpa nōo géē ta alɔ abɔ ku alɔ má ɛgɛ nōo yuklɔ tɔha ipu uklɔ uklɔ ku ɔna ō ta a gē ta ayinɛ alɔ abɔ kéē yihɔtu iyi uwa fiyɛ a. Ocabɔ aflɛyi a wɛ aku ɔyinɛ alɔ nɔnya Adeline, nōo wɛ ihayi ofu ce ɛta a (23). Adeline da Ucandice nōo wɛ ɔncɛnya nu a kóō yɛce ɔ kéē gáā tɔɔna ɛga nɛ ujɔ duuma i gē tɔɔna ŋ ma. Adeline kɛla kahinii: “Alɔ dɔka ō yuklɔ ku ɔna ō ta a mla ɔtu caca klla jɔɔnyɛ uklɔ a fiyɛ. Alɔ ɛplɛɛpa yɔ i dɔka ɔdā nōo géē ta alɔ ɔtu kwu ɔtu, o ya ɛɛ ku alɔ bi ɛjɛɛji ɔfu ku alɔ le yuklɔ le Ujehofa.” Ɛgɛnyá nɛ uwa ɛplɛɛpa lɛ itene abɔ é yuklɔ tɔha a? Adeline ka kahinii: “Oŋmɛyi ku ɛ̄cī doodu, alɔ gē kɛla lɛyikwu ɛgɛ nɛ ɔtu gē ya alɔ, ɔdā nōo ta alɔ ɔtu kwu ɔtu ŋma ɔka nɛ alɔ ka mla ācɛ, mla ɔdā nōo gē mafu lɛ alɔ ka Ujehofa gē ma ɔwɛ fu lɛ alɔ ipu uklɔ ku ɔna ō ta a. Eko duuma nɛ alɔ gbɔɔ ō kɔka lɛ a nɛɛ, ó gē lɔɔnyɛ tu alɔ i bi, ó klla gē ya ku alɔ jé iyi alɔ lɔɔlɔhi.”

¹² Ocabɔ ɔhá wɛ aku ayinɛ alɔ nɔnya ɛpa ŋma Ufrance, Ulaïla mla Umarianne. Uwa ɛplɛɛpa wɛ ācɛ nōó lɛ ɔba ɛ ŋ. É le yɛ gā Bangui nōo wɛ ɔlɛ ɔtahɛ ku Central African Republic gáā tɔɔna ipu alaadi ɛhɔ (5). Ācɛ kē lā ipu éwo ɔɔma nɛɛnɛhi. Ulaïla Kahinii: “Ami mɛmla Umarianne má unwalu ɛyɛɛyɛyi, amáŋ, ohigbu ɛgɛ nɛ alɔ  gē ka ɔtu ku alɔ lɛ iyi alɔ klla yihɔtu iyi alɔ ɔkwɔɔkwɛyi a, ó ta alɔ abɔ ku ɛma ku alɔ kóō yɔ i lɔfu tōōtɔ̄ɔ̄. Abɔ um gē má ɛgɛ nɛ Umarianne gē bi āhɔ̄ ku ācɛ a le kɛla Ɔwɔico lɛ uwa, ɛgɛ nɛ ó yihɔtu uwa, mla ɛdɔ ɔtu caca nɛ ó lɛ ipu uklɔ ku ɔna ō ta a, ó gē cɛ gā um lɛ ojilima ce ɔ fiyɛ.” Á cɛgbá ō calɛ gā ipu éwo ɔhá, gbɔbu ɛɛ ku a jɔɔnyɛ itene ɛgɛnyā ŋ. A lɛ ɛga ō jé ayinɛ alɔ fiyɛ klla ya ku ɛma ku aa kóō lɔfu, eko duuma nɛ a yuklɔ mla oduuma ku uwa nōo yɔ ipu ujɔ ku uwɔ a ipu uklɔ ku ɔna ō ta.

13. Ɔdi gē ya ekoohi, ɔdaŋ ku alɔ gbɔɔ ō yuklɔ tɔha mla aoklobiya mla ancɛnya alɔ ajaajɛ a?

¹³ Ɔdaŋ ku alɔ gbɔɔ ō yuklɔ tɔha mla aoklobiya mɛmla ancɛnya alɔ ajaajɛ, ekoohi, ó wɛ uce ō ya olɔhi ku uwa foofunu nɛ alɔ géē yɔ i má a gɛ nóó, amáŋ alɔ géē gbɔɔ ō má ɛga néē gē ya bɔbi a duu. Naana a, ɔdi gáā ta alɔ abɔ ku alɔ yɔ kwu uwa ajaajɛ kpɔ a? Alɔ leyi yɛ ocabɔ mafu ku Ujɛrɛmiya kpɔ. Ɔdi ta ɔ abɔ kóō lɛ ɔtu ku nu kwu uce ō ya olɔhi ku aɔya ku nu klla je ɔdobɔbi néē ya ɔ a ya uwa ɛhi a?

14. Ɔdi nɛ Ujɛrɛmiya nwu lɛyikwu Ujehofa a, ɛgɛnyá nɛ ɔɔma kē ta ɔ abɔ lɛ a?

¹⁴ Ujɛrɛmiya ta ɛga ku Ubáyíbu nōo lé ka ɔkpá ku Ujɛrɛmiya a. Ó klla lɔfu wɛ ka anu ta ɔkpá ku Aɔ́cɛ́ aflɛyi mla aku ɔmpa á. Ó lɛ aafu ŋ, aɛga ku Ubáyíbu nɛ ó ta nyā mafu lɛ ɔ ɛgɛ nɛ Ujehofa gē menyinyi alɛɛcɛ nōó jila iyē ŋ ma. Ocabɔ mafu, ó jé ka eko nɛ Ahabu nōo wɛ ɔcɛ́ a le piyabɔ ŋma íne nɛ ó biya a, Ujehofa gáā le ka ku Ahabu i gáā yeeyi má eko nɛ ɛjɛɛji apɔlɛ ku nu géē je kpo yiifi a ŋ. (1 Aɔ́cɛ́ 21:27-29) Ɔwɛ ekponu ɔɔma, Ujɛrɛmiya jé ka Umanasɛ ya ɔdā nōo kwu Ujehofa iyē nɛɛnɛhi fiyɛ ɛgɛ nɛ Ahabu ya a. Naana a, Ujehofa kwu ɔdobɔbi nɛ Umanasɛ ya a i ya ɔ ɛhi, ohigbu ka ó le piyabɔ. (2 Aɔ́cɛ́ 21:16, 17; 2 Úklɔ́ 33:10-13) Ó lɛ aafu ŋ, aɔ̄kā nyā ta Ujɛrɛmiya abɔ kóō lɛ ɔtoole ɛgiyi aɔya ku nu nōo kwu ɔ ajaajɛ klla menyinyi uwa ɛgɛ nɛ Ujehofa gē ya a.—Aíjē 103:8, 9.

15. Ɛgɛnyá nɛ Ujɛrɛmiya gbla ɔtoole ku Ujehofa ya eko nɛ odee gbɔɔ ō je Ubaruku ɛlá ŋma uklɔ nɛ Ujehofa je lɛ ɔ a?

¹⁵ Ujɛrɛmiya ta Ubaruku abɔ eko nɛ aɔdā ɔhá gbɔɔ ō je Ubaruku ɛlá ŋma uklɔ nɛ Ujehofa je lɛ ɔ kóō ya a. Ikɔkɔ nɛ Ujɛrɛmiya géē yɔ i gbɛla ka oklobiya ku nu Ubaruku i gáā piyabɔ gla gɛ ŋ ma a, ó ta ɔ abɔ da ɔ ɛlā ō gbonɛnɛ nɛ Ɔwɔico ta ɔ ɛhɔ kóō da ɔ a. (Ujɛr. 45:1-5) Ɔdi nɛ alɔ lɔfu nwu ŋma ɛnyā a?

16. Ɛgɛ nɛ ɔkpá ku Aíita 17:9 mafu a, ɔdi nɛ alɔ cika ō ya ɔdaŋ ku alɔ i dɔka ku ɛma nɛ alɔ lɛ mla aoklobiya mɛmla ancɛnya alɔ kóō hɛ ŋ ma?

¹⁶ Ku ɔkwɛyi a ba, alɔ i cika ō leyice ku ayinɛ alɔ géē ya ɔdā okpaakpa eko doodu ŋ. Ohigbu ɔɔma, ɔdaŋ ku alɔ kwu piya oklobiya amāŋ ɔncɛnya ɔcɛ, alɔ cika ō ceyitikwu ya ku ɛma a kóō hɛ ŋ. Ɔdaŋ ku oklobiya amāŋ ɔncɛnya alɔ lɛ ɔdobɔbi ya, alɔ cika ō tu ɔ ukɔ́ ɔkwɛyi ŋma Ubáyíbu. Amáŋ ó géē lɔhi ku alɔ ya ɔ ɔwɛ ogbonɛnɛ. (Aíjē 141:5) Ɔdaŋ ka é lɛ ɔdā ō kwiiye ya alɔ, alɔ cika ō je ya uwa ɛhi. Ɔdaŋ ku alɔ kē kwu ya uwa ɛhi, alɔ kóō hii da uwa amāŋ ɔcɛ ɔhá lɛyikwu ɔ gɛ ŋ. (Jé Aíita 17:9.) Ɛpleeko amoomɛ nyā nɛ āhɔ̄ lɔnɔ nɛɛnɛhi a, ó cɛgbá nɛhi ku alɔ lɛ ɔtu ku alɔ kwu uce ō ya olɔhi ku ayinɛ alɔ, ikɔkɔ ō lɛ ɔtu ku alɔ kwu inyileyi ku uwa! Ɔdaŋ ku alɔ gē ya lɛ a, ó géē ya ku ɛma ku alɔ mla uwa kóō lɔfu tōōtɔ̄ɔ̄. Ó cɛgbá ku alɔ ya aɔdā nōo ba nyā babanya, ohigbu ku alɔ géē cɛgbá ɛnɛɛnɛ aoklobiya mla ancɛnya ɛpleeko ku owe nɛhi a.

17. Ɛgɛnyá nɛ Ujɛrɛmiya mafu ka ó wɛ ɛnɛɛnɛ oklobiya eko ku unwalu a?

¹⁷ Uce ō ya ku Ujɛrɛmiya ɔcomɛɛbɛ a mafu ka ó wɛ oklobiya ɔkwɛyi nōo gē ta ɔcɛ abɔ eko ku unwalu. Ocabɔ mafu, ó lɛ ɔcɛ éyi nōo lé ka Ɛbɛdimɛlɛk, ó wɛ ɔcɛ éyi ŋma ipu aigabɔ. Eko néē lɛ Ujɛrɛmiya ta ipu obuga nōó lɛ eŋkpɔ anu ŋ, nōo wɛ ɔtɔɔtɔ foofunu a, Ɛbɛdimɛlɛk nyā hɛ  ɔ ta ŋma ipu nu, o ya ɛɛ kóō hii kwū ŋ. Abɔ Ɛbɛdimɛlɛk lɛ ɛnyā ya a, ó gbɔɔ ō yuufi ku aigabɔ ku ɔlɛ ɔcɛ́ a géē ya ɔ agbe. Eko nɛ Ujɛrɛmiya lɛ ɛnyā po a, ó kla okonu yɔ i leyice ku Ɛbɛdimɛlɛk oklobiya ku nu géē lɔtu abɔyi nu ŋ. Ó ceyitikwu ya ɔdā nɛ ó ya gla, naana nɛ ó yɔ inu agba a. Ó da Ɛbɛdimɛlɛk oklobiya ku nu lɛyikwu ɛlā ō ta ɔtu kwu ɔtu nɛ Ujehofa cokonu lɛ ɔ a.—Ujɛr. 38:7-13; 39:15-18.

18. Oŋma ɛlā nōo yɔ ipu ɔkpá ku Aíita 17:17 a, ɔdi nɛ alɔ cika ō ya ɔdaŋ ku oklobiya amāŋ ɔncɛnya alɔ yɔ i má owe a?

¹⁸ Icɛ, ayinɛ alɔ nɔnyilɔ mla ayinɛ alɔ nɔnya gē má unwalu ɛyɛɛyɛyi. Ocabɔ mafu, alɛwa ku uwa gē má owe ohigbu aɔdā nōo gē ya da uwa a, bɛɛka ajɛ ō jiliye klla hɛ wulu, ɛfú ō kpo, eŋkpɔ ō cenyi mɛmla aɔdā ɛyɛɛyɛyi ɔhá. Eko duuma nɛ ɔdā ɛgɛnyā le ya, ācɛ ōhī ku alɔ lɔfu hi ayinɛ alɔ nōo ba nyā igwú kéē wa gáā kla ɔlɛ alɔ. Ācɛ ɔhá klla lɔfu bi ije le ta uwa abɔ. Amáŋ, ɛjɛɛji alɔ lɔfu gbɔɔkɔ lɛ Ujehofa kóō ta ayinɛ alɔ nɔnyilɔ mla ayinɛ alɔ nɔnya abɔ. Ɔdaŋ ku alɔ po ku ɔtu le biya lɛ ɔyinɛ alɔ duuma, alɔ i gáā lɔfu jé ɔdā ō ka amāŋ ɔdā nɛ alɔ cika ō ya ŋ. Amáŋ ɛjɛɛji alɔ lɔfu tabɔ. Alɔ lɔfu lɛ eko taajɛ gáā yɔ mla oklobiya amāŋ ɔncɛnya alɔ ɔɔma. Alɔ lɔfu jahɔ lɔɔlɔhi ɔdaŋ ka é yɔ i kɛla lɛ alɔ. Alɔ kē lɔfu da oklobiya amāŋ ɔncɛnya alɔ ɔɔma lɛyikwu ɛga ku Ubáyíbu éyi nɛ alɔ dɔka fiyɛ duu nōo gē ta alɔ ɔtu kwu ɔtu a. (Ayis. 50:4) Ɔdā nōo cɛgbá fiyɛ duu a wɛ ku alɔ yɔ abɔɔ mla ɔncɛnya amāŋ oklobiya alɔ, o ya ɛɛ ku alɔ ta ɔ abɔ eko nɛ ó cɛgbá nu a.—Jé Aíita 17:17.

19. Ɛgɛnyá nōo ya ku alɔ lɛ ɛma ō lɔfu mla ayinɛ alɔ babanya géē ta alɔ abɔ ɛcɔbu a?

¹⁹ Alɔ cika ō lɛ ɔtu ku alɔ ya ekpo ō ya ku alɔ lɛ ɛma ō lɔfu mla ayinɛ alɔ nɔnyilɔ mɛmla ayinɛ alɔ nɔnya babanya. Alɔ klla cika ō lɛ ɔtu ya ekpo ku alɔ i gáā cɛ ku ɛma nɛ alɔ lɛ mla uwa a kóō hɛ ŋ. Ɔdiya a? Ohigbu ku aolɛla ku alɔ géē ceyitikwu kéē bi aɛlā ɛkɛmgbɛ le ya ku alɔ kɔ igwiigwu. É géē ceyitikwu ya ku alɔ kóō hii kpɔtuce iyi alɔ mla ō ta iyi alɔ abɔ gɛ ŋ. Amáŋ ó gáā lɛyi lɛ uwa nóó. É gáā ci alɔ ŋma ō yihɔtu ayinɛ alɔ gboogboo gla ŋ. Ó lɛ ɔdā duuma néē géē ya, nōo géē hɛ ɛma nɛ alɔ lɛ mla ayinɛ alɔ a ŋ. Ku ɛlā ɔkwɛyi a, ɛma nɛ alɔ lɛ mla ayinɛ alɔ a géē yɔ gā oŋmɛyi ku ɛcɛ obɔbi nyā jaa gā ogboogboo ɛcɛ!