AYINƐ alɔ alɛwa nōo ŋma éwo ku uwa gā éwo ɔhá gbɔbu a, a jé ŋ, o ya ɛɛ kéē nyɔ i ya ije a le cigbihi wa ɔlɛ uwa ɛ. Ohigbu ihɔtu néē kē lɛ lɛ Ujehofa mla ācɛ ɔhá ā, é le yɛ gā ɛga néē cɛgbá ācɛ ō tɔɔna ɔkoolɔhi ku Ajɔɔcɛ a. (Umát. 22:37-39) Ɔdi néē leyi gwo ɔ bonu a, ɛgɛnyá nɛ Ujehofa kē hɔha ce uwa a? O ya ɛɛ ku alɔ cila ɔka nyā, alɔ kɛla lɛyikwu éwo ku Ucameroon nōo yɔ ɛnɔɔnɛ ku Africa a.

Ipu ihayi ku 1998, ɔyinɛ alɔ nɔnyilɔ éyi nɛ iye nu le ka Onésime a nyɛɛ ŋma éwo ku nu nōo wɛ Ucameroon a. Ó lā éwo ɔhá ihayi 14. Ɛ̄cī éyi, ipu ōjila ku ujɔ, ó lɛ ocabɔ éyi néē je lɛyikwu uklɔ ku ɔna ō ta a. Ɔcɛ ō kɛla tɛɛcɛ a kahinii: “Ɔdaŋ ku aoklobiya ɛpa yɔ ɛga ɛyɛɛyɛyi ipu ɔkpá ekponu yɔ i kwu ɛbeenyi, anɔɔ éyi yɔ i kwu ɛbeenyi fiyɛ ɔhá a, ɛ̄nɛ̄ ó kwu nwune ŋ ma i gáā nyɔ gā ɛga nɛ ɔmpa nu a yɔ i kwu nwune a ŋ?”

Ocabɔ ɔɔma ta Onésime abɔ, kóō gbɛla lɛyikwu ōcigbihi gā Ucameroon, ɛga nɛ ācɛ alɛwa dɔka ō klɔcɛ ku Ubáyíbu a. Amáŋ, ó lɛ ɔtooplico. Abɔ ó gboji nɛ ó humayi lā ajɛ ɛcɛ ɛ ma a, ō lā Ucameroon géē je ɔ iyē gla kpɔ? O ya ɛɛ kóō le jé a, Onésime le cigbihi gā lā Ucameroon ɔya ɛhili. Anɔɔ ipu ihayi ku 2012, ó kwu calɛ gā lā Ucameroon.

Onésime kahinii: “N cɛgbá ō ya opiyabɔ kóō tɔɔtɛ gā um ō lā oyeeyi ɛgɛ nɛ āhɔ̄ ku Ucameroon lɛ a. Ō yaajɛ ɛyi ubɛnci ipu Agbla Ku Ajɔɔcɛ wɛ ɔdā nōo cɛgbá ō jɛ um iye kpɔ.” Ɛhɛ kwu ɔ okonu anɔɔ ó kahinii: “Abɔ um ceyitikwu jahɔ tu ɛlā néē yɔ i ka a, ɛgɔɔma nɛ um gbɔɔ ō je mlanyi aɛnɛɛnɛ ɔcí nɛ um gē yaajɛ ɛyi nu gbɔbu a.”

Ipu ihayi ku 2013, Onésime gáā lɛ Géraldine nōo cigbihi gā Ucameroon igbihi nɛ ó lā ipu éwo ku Ufrance ihayi ahaanɛ a lɛ. Ɔhā nyá nɛ ɔba mla ɔnyā a miyɛ igbihi néē kwu uklɔ ku Ɔwɔico u ta aflɛyi ipu oyeeyi ku uwa a? Onésime kahinii: “Ami mla ɔnyā um nyɔ gā Inɔkpa Ku Ācɛ O Tɔɔna Ku Ajɔɔcɛ Ku Ɔwɔico klla gbɔɔ o yuklɔ Ubɛtɛlu ɛ. Ipu ihayi éyi, ācɛ ofu (20) nɛ alɔ gē klɔcɛ ku Ubáyíbu mla uwa a lɛ ubatisim ya. Babanya a, ó ya um bɛɛka um yɔ ɛga okpaakpa ‘ō kwu ɛbeenyi a.’ ” (Umák. 1:17, 18) Géraldine klla kahinii: “Ɛdɔ ɔhā nɛ um miyɛ ɛɛ ma fiyɛ ɔhā nɛ um kōō gbɛla ka um géē miyɛ a.”

Judith ŋma Ucameroon le ta United States, amáŋ ó dɔka ō yuklɔ nwune fiyɛ lɛ Ujehofa. Ó kahinii: “Eko duuma nɛ um nyɔ i lɛ apɔlɛ ku um má Ucameroon nɛ um gáā cigbihi, n gē jikwu ohigbu ka ó lɛ ācɛ nɛ um gbɔɔ oklɔcɛ ku Ubáyíbu mla uwa ɛ.” Naana nōó lɛ a, Judith i cigbihi gā Ucameroon boobu ŋ. Ó yɔ i yuklɔ néē gē gba ije lɛ ɔ lɔɔlɔhi. Ɛnyā gē cɛ lɛ ɔ gba ije ku ɛci mla eyī  néē gē le kwu adā nu nōo yɔ Ucameroon a. Amáŋ, ó le cigbihi gā Ucameroon ohigbu ɔtu okpoce ku nu lɛ Ujehofa. Ó ka abɔ ku aɔdā nɛ ó jɔnyɛ nu ipu United States a gē kwu anuɔ. O gbɔɔkɔ lɛ Ujehofa kóō ta ɔ abɔ lɛ opiyabɔ ya. Ɔtu ō tu kwu ɔtu nɛ ɔcɛ ō leyi kwu usɛkut éyi mla ɔnyā nu je lɛ ɔ a ta ɔ abɔ nɛhi.

Eko nɛ Judith gbɛla lɛyikwu ɛgɛ nɛ odee wɛ eko nɛ ó cigbihi wa Ucameroon a, ó kahinii: “Bɛɛka ihayi ɛta a, n gweeye ka um ta ācɛ ɛnɛ abɔ kéē gā lɛ ubaptism ya.” Judith kwu piya ɔcɛ ō gbɔbu ɔna ō ta ɛdɔ ɛyɛɛyi. Icɛ, anu mla ɔba nu Sam-Castel, yɔ i yuklɔ ku ɔcɛ ō leyi kwu usɛkut. Amáŋ ɔdi ya da adā Judith a? Anu mla apɔlɛ ku nu lɛ inɛci éyi má ipu éwo ɔhá néē cɛ kéē géē gba ije ku inɛci, o ya ɛɛ kéē lɛ ɔparesɔn ya adā nu. Ó wɛ ɔdā eeye kéē lɛ ɔparesɔn a ya ipu ɛbɔ.

Ɔyinɛ alɔ nɔnyilɔ éyi nɛ iye ku nu le ka Victor a le calɛ gā Ucanada. Igbihi nɛ ó lɛ Ɔda Ō Gbaajɛ éyi nōo kɛla lɛyikwu inɔkpá nɛhi jé a, ó gbɔɔ ō gbɛla tu inɔkpa nɛhi nɛ ó yɔ i nyɔ a. Anɔɔ ó habɔ ō gā inɔkpa nɛhi ta, gbɔɔ ō gā inɔkpa nōo géē nwu ɔ uklɔ abɔ o ya eko kpiii a. Ó kahinii: “Ɛnyā ya ka um lɛ uklɔ lɛ boobu, ka um klla gbɔɔ ō ya ɔdā nɛ um dɔka ō ya a.” Igbihaajɛ, Victor lɛ Caroline lɛ, anu é le yɛ gā Ucameroon a. Eko néē nyɔ gáā má abɔ ku ɛga ō yuklɔ ku alɔ nōo yɔ Ucameroon a, ayinɛ alɔ ōhī ta uwa ɔtu kwu ɔtu kéē gbɛla tu ɔ, ɔdaŋ kóō géē he uwa ɔtu ō yuklɔ abɔɔ. Victor kahinii: “Alɔ i má ɔdā duuma ō lɛ abɔ ba ɔ ku alɔ ta gla ŋ, abɔ alɔ kē lɛ oyeeyi ku alɔ ya tɔɔtɛ gbɔbu a, alɔ cɛ ō yuklɔ a.” Naana nɛ Caroline lɛ ōcē éyi nōo gē je unwalu lɛ ɔ a, é le miya ō nyɔ gā yuklɔ a kpɔ.

Victor mla Caroline gbɔɔ ō yuklɔ ku ɔcɛ ō gbɔbu ɔna ō ta eko doodu, o ya ɛɛ kéē ta ācɛ doodu néē má nōo dɔka ō klɔcɛ ku Ubáyíbu a abɔ. Ije néē le tayinu a ta uwa abɔ lɔɔlɔhi eko néē gbɔɔ a. Igbihi néē lɛ uklɔ ya Ucanada bɛɛka ɔya ōhī a, é kwu cigbhi wa Ucameroon, o ya ɛɛ kéē yuklɔ ku ɔcɛ ō gbɔbu ɔna ō ta eko doodu néē yɔ i ya gbɔbu a kpɔ. Ɔhā nyá néē miyɛ a? É lɛ Inɔkpa Ku Ācɛ O Tɔɔna Ku Ajɔɔcɛ Ku Ɔwɔico yɛ, é klla lɛ uklɔ ku ɔcɛ ō gbɔbu ɔna ō ta ɛdɔ ɛyɛɛyi ya duu ɛ. Babanya, é yɔ i yuklɔ ku ɔcɛ o je iyi nu tɛɛcɛ ō yuklɔ ku ɔlɛ ō gwo. Victor kahinii: “Alɔ habɔ oyeeyi nɛ alɔ yɔ i jɔɔnyɛ nu gbɔbu a ta, alɔ gboolo ce Ujehofa, ó kē leyi kwu alɔ lɔɔlɔhi.”

Ihayi ku 2002, Alain, nōo yɔ inɔkpa nɛhi ku Ugermany a, lɛ utrat ku alɔ éyi nōo kahinii: Youths—What Will You Do With Your Life? a jé. Ɛlā a lɛ abɔ kwu ɔ ɔtu nɛhi anɔɔ ó lɛ ɔdā ɛyipɛ miya ō ya a. Ihayi ku 2006, ó lɛ inɔkpa ku Ministerial Training School yɛ, anɔɔ é klla kwu ɔ u bi gā Ucameroon kóō yuklɔ ipu éwo nɛ ó ŋma piii a.

Eko nɛ ó yɔ Ucameroon a, Alain lɛ uklɔ nɛ ó gē ya eko duudu ŋ. Igbihaajɛ, ó gā lɛ uklɔ ɔhá má néē gē gba ije lɛ ɔ lɔɔlɔhi, amáŋ ó gbɔɔ ō je unwalu lɛ iyi nu, ka anuɔ i gáā lɛ ɛga ō yuklɔ ku ɔna ō ta a nwune bɛɛka ɛgɛ nɛ ó gē ya gbɔbu a gɛ ŋ. Ohigbu ɛnyā a, eko néē da ɔ kóō kwu piya ɔcɛ ō gbɔbu ɔna ō ta ɛdɔ ɛyɛɛyi a, ó kpo eko bonu ŋ. É da ɔ ɛga nɛ ó gē yuklɔ a kéē géē gba ije lɛ ɔ nwune fiyɛ, amáŋ Alain i cɛ ŋ, ikɔkɔ ɔɔma ó le miya ō kwu piya ɔcɛ ō gbɔbu ɔna ō ta ɛdɔ ɛyɛɛyi. Igbihaajɛ, Alain kwu Stéphanie nōo lā Ufrance ŋmifi ihayi alɛwa ɛ ma u lɛ. Unwalu nyá nɛ ɔyinɛ alɔ nɔnya a má eko nɛ ó nyɔ gā Ucameroon a?

Stéphanie kahinii: “N gbɔɔ ō dooce ligii ligii alɛwa, amáŋ n yɔ i gwa ɛcí eko doodu klla yɔ i  lɔfu iyē ɛmɛɛma.” Ɔba mla ɔnyā a má ɔhā alɛwa ŋma ɔtu ō lé ku uwa. Alain kahinii: “Eko éyi, alɔ nyɔ gā tɔɔna ipiipu ɔlɛ éyi néē i hi ka Ukaté, alɔ má ācɛ ɛyɛɛyɛyi nōo dɔka ō klɔcɛ ku Ubáyíbu. Igbihaajɛ, alɔ gbɔɔ ō klɔcɛ mla acɛnyilɔ ɛpa éyi ō bu ipu ɔdā ō le gwo uwaya. Ɛplɛɛpa ku uwa lɛ Ubaptism ya, é klla kwu ígwu ku ācɛ ō tɔɔna ɛlā Ɔwɔico u kwaajɛ.” Stéphanie ka tu ɔ kpɔ kahinii: “Ó lɛ eeye duuma nōo fiyɛ ō ta ācɛ abɔ kéē kwu oyeeyi ku uwa u lɛ Ujehofa gɛ ŋ. Alɔ kē lɛ eeye nyā igbalɛwa ŋmifi nɛ alɔ yɔ i yuklɔ amanya ɛ.” Babanya, Alain mla Stéphanie yɔ i yuklɔ ku ɔcɛ ō leyi kwu usɛkut.

Gisèle ya ubaptism eko nɛ ó yɔ i jé ɔkpá lɛyikwu ɛcí ipu éwo ku Italy a. Ɛgɛ nɛ ācɛ ō gbɔbu ɔna ō ta ɛpa nōo gē klɔcɛ mla ɔ a ya oyeeyi ku uwa tɔɔtɛ lɛ a he ɔ ɔtu nɛhi, ohigbu ɛnyā a, ó dɔka ō ya nwune ipu uklɔ ku ɔna ō ta a. Ɛnyā ya ku Gisèle kōó kwu piya ɔcɛ ō gbɔbu ɔna ō ta eko doodu abɔ ó le ya mɛ ŋma inɔkpa a.

Gisèle dɔka ō kwu cigbihi gā Ucameroon o ya ɛɛ kóō ya nwune ipu ɛ̄gbā ō gbā ku Ujehofa, amáŋ, ó lɛ odee nōo yɔ i junwalu lɛ ɔ. Ó kahinii: “Ó cɛgbá ku um leyi gwo íkwu nɛ um lɛ ō lā Italy a bonu, n klla géē habɔ aɔkpa mla apɔlɛ ku um nōo yɔ italy a ta.” Naana kpɔ a, Ɔya Ɛhɔ ku 2016, Gisèle kwu ce wa Ucameroon. Igbihaajɛ, ó gáā lɛ Léonce lɛ, anu abɔ ku ɛga o yuklɔ ku alɔ nōo yɔ Ucameroon a lɛ ukɔ́ tu uwa kéē le yɛ gā Ayos, igeli éyi nōo cɛgbá Ācɛ O Tɔɔna Ɛlā Ɔwɔico nɛhi.

Ɛgɛnyá nɛ odee nyɔ lɛ ipu igeli ku Ayos eko ɔɔma a? Gisèle kahinii: “Igbalɛwa, ɔlā i gē yɔ alaadi alɛwa ŋ, ohigbu ɛnyā alɔ i gē lɛ ɔdā ō gwo uwaya ku alɔ wu ɔla ŋ. Igbalɛwa, é má uklɔ ō ya ŋ. N nwu ɛgɛ néē gē ya ɔdole mla ɔla ɛfu, alɔ klla gē bi uweelbarrow mla utorch nyɔ gā hɛ eŋkpɔ otu eko nɛ ācɛ i nwune ɔkpá gɛ ŋ.” Ɔdi ta uwa abɔ kéē lɔtu a? Gisèle kahinii: “Alelekwu ihɔ ku Ujehofa, ɔnyā anuɔ nōo gē ta anuɔ abɔ, ɔtu ō tu kwu ɔtu mla ije nɛ aɔkpa mla ācɛ apɔlɛ ku alɔ gē je lɛ alɔ ekoohi a ta alɔ abɔ nɛhi.”

Gisèle gweeye ka ó le cigbihi gā éwo nɛ ó ŋma a? “Ii! Ó lɛ ijema duuma ŋ,” ohi nɛ ó ta a yɔ abɔ a. “Aflɛyi, ó lɛ aɔdā ōhī nōo lɔnɔ tu alɔ klla cɛ lɛ ɔtu ku alɔ gbeenyi, amáŋ abɔ alɔ lɛ unwalu ɛyɛɛyɛyi a yale a, ami mla ɔba um má ka ɔdā nɛ alɔ cɛgbá o ya a nɛ alɔ ya yiili a. Alɔ kpɔtuce Ujehofa klla yɔ kwu ɔ ajaajɛ fiyɛ.” Léonce mla Gisèle le ta Inɔkpa Ku Ācɛ O Tɔɔna Ku Ajɔɔcɛ Ku Ɔwɔico, babanya a, é yɔ i yuklɔ ku ɔcɛ ō gbɔbu ɔna ō ta ɛdɔ ɛyɛɛyi eko kpii.

Bɛɛka ācɛ ō kwu ɛbeenyi nōo gē lɔtu ipu āhɔ̄ ō lɔnɔ o ya ɛɛ kéē lɛ ɛbeenyi kwu a, ācɛ nōo gē cigbihi gā éwo néē ŋma a gē leyi gwo ɔdā alɛwa bonu, o ya kéē je otabɔ lɛ ācɛ nōo dɔka ō po ɛlā Ɔwɔico a. Ujehofa i gáā mlanyi ō hɔha ce ācɛ ɔlɛ nu nōo yɔ i ceyitikwu mafu ihɔtu lɛ ācɛ, ohigbu iye ku nu a ŋ. (Uneh. 5:19; Uhíb. 6:10) Ɔdaŋ ku a lā éwo ɔhá nɛ ɛgbá ku ācɛ ō tɔɔna ɛla Ɔwɔico kē yɔ éwo nɛ ŋma a, a géē lɔfu cigbihi wa ɔlɛ gla a? Ɔdaŋ ku a ya lɛ a, Ujehofa géē hɔhā ce uwɔ nɛɛnɛhi.—Aíit. 10:22.