É ma um ihayi ku 1983. Eko néē ma um a, n yɔ jaali lɔɔlɔhi, amáŋ eko nɛ um le piya ihayi igwo a, n gáā gbɔɔ ō jé ɔnɔ nɛɛnɛhi ɛjɛɛji ɔkpiye ku um. Ihayi ɛpa nōo gboce ɔ a, Ɔcɔɔci éyi n le heyi anu n yiyawu gla gɛ ŋ ma. Ɛgɛ duuma nɛ um ceyitikwu ku um yiyawu, ó tɔɔtɛ gā um ŋ. Oŋma ɛ̄cī ɔɔma gɔbu, n yiyawu gla gɛ ŋ. Ōcē nɛ um lɛ a, i klla cɛ gā um jɛ gla ŋ. Icɛ, N yɔ ligii bɛɛka ɔyipɛ nɛŋcɛ a kpɔ.

Ɔya ligii igbihi nɛ um gbɔɔ ō dooce, nɛ um bɛɛcɛ ŋma ɔlɛ um gla ŋ ma, Ācɛ Ocijali Ku Ujehofa ɛpa wa i má um. Eko duuma nɛ augbɔga gā ɔlɛ um, igbalɛwa, n gē dɔka ō kwu tayinu, amáŋ ɛ̄cī ɔɔma, n cɛ lɛ ɔnyā a kɛla gā um. Abɔɔ é yɔ i kɛla lɛyikwu uparadaise a, n gáā bla kwu ɔdā nɛ um po eko nɛ um lɛbɛɛka ihayi igwo a. Ɛpleeko ɔɔma a, ɔcɛ nōo gē tɔɔna ipu éwo ɔhá nɛ iye nu le ku Jethro, nōo lā Usuriname a, gē wa ipɔlɛ ku alɔ ɛ̄cī ekponu ipu Ɔya gē wa i ya oklɔcɛ ku Ubáyíbu mɛmla adā um. Jethro gē ya uce mɛmla um ɔwɛ ogbonɛnɛ. N dɔka nu nɛhi. Ɛ́nɛ́ ku upapa ku um klla gē bi um biye gā ōjila ōhī ku Ācɛ Ocijali Ku Ujehofa, néē gē ya ipɔlɛ ku alɔ a. Ohigbu ɛnyā, eko nɛ Florence, éyi ku aɛ́nɛ́ a da um ɔka ɔdaŋ ku um géē dɔka ō nwu ɛlā fiyɛ a, N da ɔ ka ii.

Florence le cigbihi wa mla ɔba nu, nɛ iye nu lé ka Justus a, uwa ɛplɛɛpa gbɔɔ ō klɔcɛ ku Ubáyíbu mɛmla um. Eko néē gáā le jé ku um jé ō jé ɔkpá ŋ ma, é gbɔɔ ō nwu um ɛgɛ nɛ um géē jé ō jé ɔkpá a. Abɔ eko gbɔɔ ō nyɔ a, n gbɔɔ ō jé ɔkpá abɔyi um. Ɛ̄cī éyi, ɔba mla ɔnyā a gáā le da um ku é lɛ uwa tɛhɔ gā Usuriname kéē gáā tɔɔna abɔɔ. Ó wɛ ɔdā ō kwiye, ka ɔcɛ duuma i yɔ Orealla nōo géē klɔcɛ mla um gɔbu gɛ ŋ. Amáŋ, n gweeye nɛhi, ku Ujehofa i je um mlanyi ŋ.

Ó gboji lɛ a ŋ, ɔcɛ ō gbɔbu ɔna ō ta éyi nɛ iye nu lé ka Floyd a gā Orealla, anɔ ó gáā lɛ um má abɔɔ ó yɔ i tɔɔna ŋma ɔlɛ éyi gā ɔhá a. Eko nɛ ó kɛla gā um lɛyikwu ō ya oklɔcɛ ku Ubáyíbu a, n gbɔɔ ō yɛhɛ. Anɔ ó da um ɔka kahinii: “Ɔdiya nɛ a yɔ i yɛhɛ a?” N gáā le da ɔ ku um lɛ ubrociɔ néē hi ku What Does God Require of Us? a klɔcɛ gbɔbu, klla gbɔɔ ō klɔcɛ ku ɔkpá néē hi ku Knowledge That Leads to Everlasting Life * a ɛ. N gáā le da ɔ ɔdā nōo ya ɛɛ nɛ oklɔcɛ a ci a. Floyd gáā lɛ aya ohile ku ɔkpá néē hi ku Knowledge a klɔcɛ mɛmla um, amáŋ é klla gáā lɛ anu abɔyi nu tɛhɔ kóō gáā  yuklɔ ɛga ɔhá. Ɔcɛ duuma i yɔ nōo klla géē klɔcɛ ku Ubáyíbu mla um gɛ ŋ.

Amáŋ, ipu ihayi ku 2004, é gáā lɛ Granville mla Joshua, ācɛ ɛpa nōo gē gbɔbu uklɔ ku ɔna ō ta ɛdɔ ɛyɛɛyi tɛhɔ wa Orealla. É tɔɔna ŋma ɔlɛ éyi gā ɔhá a, anu é gáā lɛ um má a. Eko néē da um ɔka ɔdaŋ ku um géē dɔka ō klɔcɛ ku Ubáyíbu a, n gbɔɔ ō yɛhɛ. N da uwa kéē gbɔɔ oklɔcɛ ku ɔkpá néē hi ku Knowledge a mɛmla um ŋmaajɛ. N dɔka ō má ɔ ɔdaŋ ka é géē nwu um ɔdā ekponu nɛ aitica ku um gbɔbu a nwu a. Granville gáā le da um kéē géē ya ōjila ipɔlɛ a. Naana nōo lɛbɛɛka ihayi igwo nɛ um bɛɛcɛ ŋma ɔlɛ um ɛ ŋ má a, n dɔka ō gā ōjila a. Anu Granville gā ɔlɛ um, gáā kwu um cice ɛyi ɛglɛ, anu ō lɛ um kwu gā Agbla Ku Ajɔɔcɛ a.

Igbihaajɛ, Granville ta um ɔtu kwu ɔtu ō wɛ inɔkpá néē hi ku Theocratic Ministry a. Ó kahinii: “A yiyawu gla ŋ, amáŋ a kē kɛla gla. Ɛ̄cī éyi, a géē ya ɛlā ō ka tɛɛcɛ. A géē ya ɔ piii.” Ɛlā ō ta ɔtu kwu ɔtu nōo ka a, je ɔtooce gā um.

N gbɔɔ ō yuklɔ ku ɔna ō ta mɛmla Granville. Amáŋ, ɛyinɛhi ku aɔwɛ a lɛ ɛga nōo lico lɛ ɛgɛlɛ nɛ um gē ce ɛyi nu a. Ohigbu ɛnyā, n le da Granville kóō kwu um ce ɛyi ubiro, cɛɛ kóō bēē kwu um yɛ jila ta. Ōmiya ɔɔma yuklɔ lɔɔlɔhi. Ipu Ɔya Ɔmɛ Ɛnɛ ku ihayi ku 2005, n lɛ ubatisim ya. Ó gboji lɛ a ŋ, ayinɛ a le nwu um ɛgɛ nɛ um géē lɛyi kwu ɔkpá ku ujɔ mla aɔdā ō kɛla ipu Agbla Ku Ajɔɔcɛ a.

Ó wɛ ɔdā ō kwiye nɛhi, ka ipu ihayi ku 2007, adā um gekwu ipu amiya ku ɔkɔ́ nɛ ó yɔ anu ipu eŋkpɔ a. Apɔlɛ ku alɔ cɔnu nɛɛnɛhi. Granville gbɔɔkɔ mɛmla alɔ, klla jé ɛga ku Ubáyíbu nōo gē ta ɔtu kwu ɔtu mla alɔ. Ihayi ɛpa nōo gboce ɔ a, ɔdā ō kwiye nɛhi ɔhá nɛ alɔ i leyi ce ŋ klla le ya—Granville gekwu ipu amiya ku ɔkɔ́ nɛ ó yɔ anu ipu eŋkpɔ a kpɔ.

Ujɔ ku alɔ nōó nwune ŋ ma, i lɛ ɔnyakwucɛ ku ujɔ duuma gɛ ŋ, klla gáā hile ɔcɛ ekponu nōo gē ta ɔnyakwɔcɛ ku ujɔ abɔ a. Ó kwu um iye nɛhi, ohigbu ku oklobia ku um Granville nōo he um ɔtu nɛhi a gekwu. Ó humayi je otabɔ gā um ku um tubla Ujehofa ajaajɛ, klla gē je aɔdā nɛ um cɛgbá a gā um. Ōjila ɔhá nɛ alɔ lɛ igbihi nɛ ó kwu a, n lɛ uklɔ ō jé aogwotu ku Ɔda Ō Gbaajɛ nɛ alɔ gáā klɔcɛ a. N lɛ ogwotu aflɛyi mɛmla ɔmpa a jé, amáŋ n gbɔɔ ō jikwu nɛ ageje a kē yɔ i pɛ nɛhi. Ń lɛ ɔdā duuma ō ya fiyɛ ō gaajɛ ŋma ɛyi ede ŋ.

N gbɔɔ lɛ eeye eko nɛ ayinɛ alɔ ŋma ujɔ ɔhá wa Orealla kéē jɛ otabɔ lɛ alɔ a. Abɔ ku ɛga ō yuklɔ ku alɔ klla lɛ Kojo, ɔcɛ ō gbɔbu uklɔ ku ɔna ō ta ɛdɔ ɛyɛɛyi tɛhɔ wa. Ɔdā nōo cɛ gā um gweeye fiyɛ duu a, wɛ ku ɛ́nɛ́ um mla ɔyinɛ um nōo wɛ ɛnɛ̄ŋcɛ́ ku um a, gbɔɔ ō klɔcɛ ku Ubáyíbu klla gáā lɛ ubatisim ya. Ipu Ɔya Ɔmɛta ku ihayi ku 2015, é kwu um piya éyi ku ɔcɛ ō ta anyakwɔcɛ ku ujɔ abɔ. Eko ligii igbihi ɔɔma, n lɛ ɛlā ō ka tɛɛcɛ aflɛyi ku um ya. Ɛ̄cī ɔɔma, n gbɔɔ ō yɛhɛ klla gbɔɔ ō jikwu eko nɛ um gbɛla lɛyikwu ɔdā nɛ Granville da um ihayi ōhī gbɔbu a: “Ɛ̄cī éyi, a géē ya ɛlā ō ka tɛɛcɛ. A géē ya ɔ piii” a.

O bu ipu ōmiya ku JW Broadcasting^®, n gáā nwu odee lɛyikwu Ācɛ Ocijali Ku Ujehofa ɔhá nōo lɛ ɛdɔ unwalu ekponu nɛ um lɛ a. Naana néē lɔfu iye jaali ŋ ma, ó tɔɔtɛ lɛ uwa ō ya aɔdā alɛwa, klla lɛ eeye nɛhi. Ami abɔyi um lɔfu ya aɔdā ōhī. N dɔka ō gba Ujehofa ɛ̄gbā ɛgɛ nɛ ɔfu ku um jɛ a. Ɔɔma ya n gbɔɔ ō gbɔbu uklɔ ku ɔna ō ta eko doodu. Ó lɛ ɔka éyi nɛ um leyice ŋ, nɛ um gáā po Ɔya Ɔmahaanɛ ku ihayi ku 2019! Ipu Ɔya ɔɔma, é kwu um piya éyi ku anyakwɔcɛ ku ujɔ ipu ujɔ ku alɔ nōo lɛ Ɔcɛ O Tɔɔna Ɛla Ɔwɔico bɛɛka ofu ɛpa (40) a.

N ta ɛjɛɛji ayinɛ o he um ɔtu, nōo ya oklɔcɛ ku Ubáyíbu mɛmla um, klla ta um abɔ ō gba Ujehofa ɛ̄gbā a ahinya nɛhi. O fiyɛ duu a, ó je um eyī nɛhi ka Ujehofa i je um mlanyi ŋ.