IKPƐYI ƐLĀ Ō KLƆCƐ ƆMƐ 40
“Ācɛ Nēe Gē Nwū Ācɛ Kéē Yá Ɔdā Nōo Le Kpaakpa Ā”
“Ācɛ nēe gē nwū ācɛ kéē yá ɔdā nōo le kpaakpa ā géē bá ī fíyajɛ bɛ̄ɛka aínyíláɔwɔ ā piyóó.”—UDÁN. 12:3.
IJÉ ƆMƐ 151 Ó I Je Ācɛ Nōo Kwū A Heyi
ƆDĀ NƐ ALƆ GÁĀ NWU A *
1. Ɔdā eeye nɛhi nyá yɔ i gbeyi alɔ ɛpla Ihayi Ula Ɛpa Ce Ofu Igwo Nɛ Ujisɔsi Gáā Lé Ɔcɛ́ a?
ƐPLEEKO ku Ihayi Ula Ɛpa Ce Ofu Igwo Nɛ Ujisɔsi Gáā Lé Ɔcɛ́ a, ó géē wɛ eko ku eeye nɛhi, ɔdaŋ ka é gbɔɔ ō je ācɛ nōo kwū a heyi ŋma ɔlekwu wa ipu ɛcɛ nya! Ɛjɛɛji ācɛ nɛ ācɛ néē yihɔtu ku uwa kwū a, yɔ i leyice ō má uwa kpɔ. Ɛgɔɔma nɛ ɔtu kē yɔ i ya Ujehofa lɛ duu a. (Ujób. 14:15) Leyi yɛ ɛgɛ nɛ ɛjɛɛji ācɛ ipu ɛcɛ géē yɔ i gweeye nɛhi, eko néē kwu ācɛ néē yihɔtu ku uwa a i heyi ŋma ɔlekwu a. Ɛgɛ nɛ alɔ nwu ŋma ikpɛyi ɛlā nōo gáā yɛ a, “ācɛ nēe yá ɔdā olɔhi,” nɛ iye ku uwa yɔ ipu ɔkpá ku oyeeyi a, géē heyi “cɛ́ɛ́ kéē yēeyī.” (Ācot. 24:15; Ujɔ́n. 5:29) Á jé ŋ eko yɛɛ igbihi ku Amagɛdɔn, ācɛ ōhī nɛ alɔ yihɔtu uwa nōo kwū a géē je heyi ŋma ɔlekwu. * Ɔdā ɔhá wɛ kahinii, “Ācɛ nēe kē yá ɔdōbɔ̄bí,” bɛɛka ācɛ néē lɛ ɛga ō jé Ujehofa klla kpɔtuce ɔ gbɔbu ɛɛ kéē kwū ŋ ma, géē “héyī ŋmá ɔlékwū kéē ŋmó uwā ɛpɔ̄bí.”
2-3. (a) Oŋma ɛlā nōo yɔ ipu ɔkpá Ayisáya 11:9, 10 a, ɔdi wɛ uklɔ ku ɔkpá ō nwu nɛhi néē géē ya ipu oduudu ɛcɛ a? (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
2 É géē cɛgbá ō nwu ɛjɛɛji ācɛ néē je heyi ŋma ɔlekwu a ɛlā. (Ayis. 26:9; 61:11) Ohigbu ɛnyā, ōmiya ku ɔkpá ō nwu nɛ ɛdɔ ku nu i ya jejee ɛ ŋ ma, géē cɛgbá ō ya. (Jé Ayisáya 11:9, 10.) Ɔdiya a? Ɔdā éyi nōo ya a wɛ kahinii, ācɛ nōo ya ɔdobɔbi néē je heyi ŋma ɔlekwu a, géē cɛgbá ō nwu ɛlā lɛyikwu Ajɔɔcɛ Ku Ɔwɔico, ikwū ku Ujisɔsi mla ɔdā nōo ya nɛ iye ku Ujehofa cɛgbá, mɛmla ɔdā nōo ya nɛ Ujehofa foofunu lɛ íkwu ō wɛ Ɔcɛ́ a. Ācɛ nōo ya ɔdā olɔhi néē géē je heyi ŋma ɔlekwu a, é kóō géē cɛgbá ō nwu uwa ɛlā, lɛyikwu aɔdā nɛ Ujehofa nwu ācɛ ɔlɛ nu ɛmɛɛma ka anuɔ géē ya ipu ɛcɛ a. Ōhi ku ācɛ nōo hayi kpaakpa nyā kwū gbɔbu ɛɛ néē ta Ubáyíbu kwɛyi a. Ācɛ nōo ya ɔdā olɔhi mla ācɛ nōo ya ɔdobɔbi néē géē je heyi ŋma ɔlekwu a, géē lɛ aɔdā alɛwa ō nwu.
3 Ipu ikpɛyi ɛlā nyā, alɔ géē leyi yɛ aɔka nyā: Ɛgɛnyá néē gáā yuklɔ ku ɔkpá ō nwu nɛhi nyā a? Ɛgɛnyá nɛ ɔwɛ nɛ ācɛ gáā ya uce ohigbu uklɔ ku ɛlā ō nwu nyā, géē mafu ɔdaŋ ka é géē ta iye ku uwa piyoo tu ipu ɔkpá ku oyeeyi a, amāŋ ka é gáā ta ɔ ŋ ma? Ohi ku ɔka nyā cɛgbá nɛhi lɛ alɔ icɛ. Ɛgɛ nɛ alɔ kē gáā má a, ɛnɛɛnɛ akacɛ ōhī nōo yɔ ipu ɔkpá ku Udánīyɛ̄lu mla Ɔdā Nēé Mafú Lɛ Ujɔ́ni a, géē je ɔ ta alɔ eyī peee fiyɛ, lɛyikwu ɔdā nōo géē ya eko néē géē je ācɛ nōo kwū a heyi ŋma ɔlekwu a. Aflɛyi a, alɔ leyi yɛ ɛnɛɛnɛ akacɛ éyi nōo yɔ ipu ɔkpá ku Udánīyɛ̄lu 12:1, 2 a.
“ĀCƐ ALƐWA KÚ UWÁ NĒE TƐTƐ GEKWÚ ƐƐ́ MĀ GÉĒ KPÓ HÉYĪ ŊMÁ IPÚ ÚNÓJI”
4-5. Ɔdi nɛ ɔkpá ku Udánīyɛ̄lu 12:1 da alɔ lɛyikwu ɛpleeko amoomɛ a?
4 Jé Udánīyɛ̄lu 12:1. Ɔkpá ku Udánīyɛ̄lu mafu ɔwɛ nɛ aɔdā ɛnɛɛnɛ géē ya ɔgbace ɔgbace, ɛpleeko nɛ ɛcɛ gáā mɛ a. Ocabɔ mafu, ɔkpá ku Udánīyɛ̄lu 12:1 da alɔ ka Umayikɛlu nōo wɛ Ujisɔsi Ukrasti a “gē gbō ācɛ ɔlɛ́ [Ɔwɔico].” Aya ku akacɛ nyā gbɔɔ ō ya jila ipu ihayi ku 1914, eko nɛ Ɔwɔico je Ujisɔsi piya Ɔcɛ́ ku Ajɔɔcɛ ku nu ɔkpanco a.
5 É klla gɔbu da Udaniyɛlu kpɔ, ka Ujisɔsi “géē bɛ̄cɛ,” ɛpleeko nɛ “eko kú unwalu mɛ́mla ɛdɔ ífi nēé yá ipú ɛcɛ ā jéejée ɛ́ɛ́ ŋ́ mā [géē] gbɔɔ́” a. Eko “kú unwalu mɛ́mla ɛdɔ ífi” ɔɔma, wɛ eko ku “ōwē nɛ̄hi” nɛ ɔkpá ku Umátiyu 24:21 kɛla lɛyikwu ɔ a. Ujisɔsi géē bɛɛcɛ cɛɛ kóō gbo ācɛ ɔlɛ Ɔwɔico ɛpleeko olɔnɔ nɛhi ɔɔma, nōo wɛ eko ku Amagɛdɔn a. Ɔkpá ku Ɔdā Nēé Mafú Lɛ Ujɔ́ni ka ka ācɛ nyā wɛ “ɛwa nɛ̄hi kú . . . ācɛ nēe wi ŋmá eko kú ákanya nɛ̄hi ā.”—Mafú 7:9, 14.
6. Ɔdi gáā ya igbihi nɛ ɛwa nɛhi ku ācɛ a le wi ŋma eko ku unwalu nɛhi a? Lɛ ɔ teyi peee. (Má ikpɛyi ɛlā nōo yɔ ipu Ɔda Ō Gbaajɛ̄ nyā nōo kahinii “Aɔka Nɛ Ācɛ O Jé Ɔkpá Ku Alɔ Gē Da” lɛyikwu oheyi ŋma ɔlekwu wa ipu ɛcɛ nyā a.)
6 Jé Udánīyɛ̄lu 12:2. Ɔdi gáā ya igbihi nɛ ɛwa nɛhi ku ācɛ a le wi ŋma eko ku unwalu nɛhi ɔɔma a? Gbɔbu a, alɔ gbɛla ka ɔkpá ku Udánīyɛ̄lu 12:2 yɔ i kɛla lɛyikwu oheyi ŋma ɔlekwu, ku ācɛ nōo gáā gā ɔkpanco a, amāŋ uklɔ nɛhi nɛ ācɛ ɔlɛ Ɔwɔico ya, igbihi nōó hile ligii ku aolɛla kóō lɛ uklɔ ku ɔna ō ta ku alɔ ci, ipu ihayi ku 1918 a. * Amáŋ ɛgɛ nɛ alɔ jɛyi nu babanya wɛ kahinii, ó yɔ i kɛla lɛyikwu oheyi ŋma ɔlekwu ku ācɛ nōo kwū a, nōo géē ya ipu ɛcɛ ɛyipɛ nōo yɔ i wa a. Oheyi ŋma ɔlekwu nyā géē ya, oŋmɛyi ku eko amoomɛ mla igbihi ku ɛfú ō kpo ku Amagɛdɔn a.
7. (a) Ɔwɛ nyá nɛ ācɛ ōhī géē heyi kéē “yēeyī piyóó”a? (b) Ɛgɛnyá nɛ ɛnyā wɛ o “héyī ŋmá ɔlékwū . . . olɔhi fíyɛ́” a?
7 Ɔdi wɛ ɛyi ɛlā nōo yɔ ipu ɔkpá ku Udánīyɛ̄lu 12:2, nōo ka ācɛ ōhī géē heyi kéē “yēeyī piyóó” a? Ɔɔma wɛ ka ācɛ néē je heyi ŋma ɔlekwu nōo géē wa i jé Ujehofa mla Ujisɔsi, amāŋ nōo yɔ i gɔbu kéē jé uwa tōōtɔ̄ɔ̄, klla yɔ i lɛyitaajɛ lɛ uwa ɛpla ihayi ula ɛpa ce ofu igwo (1,000) a, géē miyɛ ɛhi ku oyeeyi opiyoo igbihaajɛ. (Ujɔ́n. 17:3) Ɛnyā géē wɛ o “héyī ŋmá ɔlékwū . . . olɔhi fíyɛ́,” ohigbu ka ó gáā lɛbɛɛka oheyi ŋma ɔlekwu nōo ya gbɔbu a ŋ. (Uhíb. 11:35) Ɔdiya nōó lɛ a? Ohigbu ka ācɛ néē je heyi ŋma ɔlekwu eko ɔɔma a klla gekwu kpɔ.
8. Ɛgɛnyá nɛ ācɛ ōhī géē heyi kéē “nyɔ̄ ipú ōwē mɛ́mla uwēyī piyóó” a?
8 Amáŋ ó wɛ ɛjɛɛji ācɛ nōo heyi ŋma ɔlekwu a gáā miyɛ ɛlā ō nwu ku Ujehofa ŋ. Ipu ɛbɛ nɛ Udaniyɛlu má a, ó ka ācɛ ɔhá a géē heyi “nyɔ̄ ipú ōwē mɛ́mla uwēyī piyóó.” Ohigbu ka é géē ya ikpɛyi olɔfu a, Ɔwɔico i gáā ta iye ku uwa tu ipu ɔkpá ku oyeeyi a ŋ, é kē gáā lɛ oyeeyi opiyoo ŋ duu. Ikɔkɔ ɔɔma, é géē lɛ “uwēyī piyóó,” ɔɔma wɛ ka Ɔwɔico géē je uwa yiifi a. Ó lɛ a, Udánīyɛ̄lu 12:2 yɔ i kɛla lɛyikwu ɔdā amoomɛ nōo géē ya da ɛjɛɛji ācɛ néē je heyi ŋma ɔlekwu, oŋma lɛ ɔdā néē ya igbihi néē je uwa heyi ŋma ɔlekwu a. * (Mafú 20:12) Ācɛ ōhī géē lɛ oyeeyi opiyoo, ācɛ ɔhá i kē gáā lɛ ŋ.
“ĀCƐ NĒE GĒ NWŪ ĀCƐ KÉĒ YÁ ƆDĀ NŌO LE KPAAKPA Ā”
9-10. Ɔdā ɔhá nyá gáā ya igbihi ku eko ku owe nɛhi a? Anyɛ kē gáā “fíyajɛ péee bɛ̄ɛka ɔkpáncō ā”?
9 Jé Udánīyɛ̄lu 12:3. Ɔdā ɔhá nyá gáā ya igbihi ku “eko kú unwalu” a? O ka tu ɛlā nɛ Udánīyɛ̄lu 12:2 ka a, ɔgba 3 klla kɛla lɛyikwu odee nōo géē ya igbihi ku eko ku owe nɛhi a.
10 Anyɛ gáā “fíyajɛ péee bɛ̄ɛka ɔkpáncō ā”? Ɛlā nɛ Ujisɔsi ka ipu ɔkpá ku Umátiyu 13:43 a, géē ta alɔ abɔ jé ohi a. Ó kahinii: “Eko ɔ́ɔmā ācɛ nōo ī yá ɔdā nɛ̄ Ɔwɔicō tíne ā géē ceyī bɛ̄ɛka ɛnɔ ā ipú ajɔ̄ɔ̄cɛ́ kú Ádā uwā.” Aɛlā ɔhá nōo yɛ jila ɔgba nyā ta a, mafu ka Ujisɔsi yɔ i kɛla lɛyikwu “ācɛ [amāŋ ayi] kú ajɔ̄ɔ̄cɛ́ ā,” uwa a kē wɛ ācɛ néē lɛ anɔ tu uwa ɛyi, nōo géē lé ɔcɛ́ mla Ujisɔsi ipu Ajɔɔcɛ ku ɔkpanco a. (Umát. 13:38) Ó lɛ a, alɔ lɔfu ka ka Udánīyɛ̄lu 12:3 yɔ i kɛla lɛyikwu ācɛ néē lɛ anɔ tu uwa ɛyi, mla uklɔ néē géē ya, ɛpleeko ku Ihayi Ula Ɛpa Ce Ofu Igwo Nɛ Ujisɔsi Gáā Lé Ɔcɛ́ a.
Ācɛ ula ofu igwaahata a géē yuklɔ tɔha mla Ujisɔsi kéē leyi kwu uklɔ ku ɔkpá ō nwu nōo géē ya ɛpleeko ku ihayi ula ɛpa ce ofu igwo a (Má ogwotu ɔmɛ 11)
11-12. Uklɔ nyá nɛ ācɛ ula ofu igwaahata a géē ya ɛpleeko ku ihayi ula ɛpa ce ofu igwo a?
11 Ɛgɛnyá nɛ ācɛ néē lɛ anɔ tu uwa ɛyi a gáā “nwū ācɛ kéē yá ɔdā nōo le kpaakpa ā”? Ācɛ néē lɛ anɔ tu uwa ɛyi a géē yuklɔ tɔha mla Ujisɔsi, kéē leyi kwu uklɔ ku ɔkpá ō nwu nōo géē ya ipu ɛcɛ nyā, ɛpleeko ku ihayi ula ɛpa ce ofu igwo a. Ācɛ ula ofu igwaahata (144,000) a i gáā lé ɔcɛ́ foofonu ŋ, amáŋ é géē wɛ ācɛ ogwɛɛya duu. (Mafú 1:6; 5:10; 20:6) Ó lɛ a, é géē ta abɔ “hɛ́ aéwo dóódu tá ŋmá ōcē,” cɛɛ ɛmɛɛma, é géē ta alɛɛcɛ abɔ kéē wa i jila iye kpɔ. (Mafú 22:1, 2; Isík. 47:12) Ɛnyā géē cɛ lɛ ācɛ néē lɛ anɔ tu uwa ɛyi a gweeye nɛhi!
12 Anyɛ gáā wɛ ipu ācɛ “nēe gē nwū” kéē ya ɔdā nōo le kpaakpa a? Ācɛ nyā géē lɛ ō ya mla ācɛ néē je heyi ŋma ɔlekwu mla ācɛ nōo wi ŋma Amagɛdɔn mɛmla ɔyi duuma néē lɔfu ma ipu ɛcɛ ɛyipɛ a. Oŋmɛyi ku ihayi ula ɛpa ce ofu igwo a, ɛjɛɛji ācɛ nōo lā ipu ɛcɛ a géē kwu jila iye ɛ. Ó lɛ a, eko nyá nɛ Ɔwɔico gáā ta iye ku uwa piyoo tu ipu ɔkpá ku oyeeyi a, ɛgɛ nɛ ɔcɛ gē ta odee mla ɔdā ō ta ɔkpá nɛ ɔcɛ i nya gla ŋ ikɔkɔ ō ta ɔ mla upɛnsu a?
OJAMA AMOOMƐ A
13-14. Ɔdi nɛ ɛjɛɛji ācɛ nōo jila iye a cɛgbá ō ya piii gbɔbu ɛɛ kéē lɛ oyeeyi opiyoo a?
13 Alɔ cɛgbá ō bla, ka ɔdaŋ ka ɔcɛ kwu jila iye, ɔɔma i wɛ ka ɔcɛ ɔɔma kwu oyeeyi opiyoo i lɛ ɛ ŋ. Gbɛla tu ocabɔ ku Adam mla Iifu ɛ. É wɛ ācɛ nōo jila iye, amáŋ, é cɛgbá ō mafu ka é lɛyitaajɛ lɛ Ujehofa gbɔbu ɛɛ kéē lɛ oyeeyi opiyoo. Amáŋ ó wɛ ɔdā okwiiye nɛhi, ka é ta ō lɛyitaajɛ lɛ ɔ.—Uróm 5:12.
14 Ɛgɛnyá nɛ oyeeyi gáā lɛ lɛ ācɛ ipu ɛcɛ, oŋmɛyi ku ihayi ula ɛpa ce ofu igwo a? Ɛjɛɛji ācɛ géē kwu jila iye eko ɔɔma ɛ. Ɛjɛɛji ācɛ nōo jila iye ɔɔma géē gɔbu yɔ i lɛyitaajɛ lɛ ɔcɛ́ ō lé ku Ujehofa piyoo a? Bɛɛka ōhī ku uwa géē lɛbɛɛka Adam mla Iifu, nōo ta ō lɛyitaajɛ lɛ Ujehofa naana néē jila iyē a? Ohi ku ɔka nyā cɛgbá ō le cila, amáŋ ɛgɛnyá a?
15-16. (a) Eko nyá nɛ ɛjɛɛji ācɛ géē lɛ ɛga ō mafu ka é yɔ mla Ujehofa a? (b) Ɔdi gáā wɛ oŋmɛyi ku ojama amoomɛ a?
15 É géē je Usetan ta agba ihayi ula ɛpa ce ofu igwo a. Ɛpleeko ɔɔma, ó gáā lɔfu pla ɔcɛ duuma gɛ ŋ. Amáŋ oŋmɛyi ku ihayi ula ɛpa ce ofu igwo a, é géē je Usatan hɛta ŋma agba. Cɛɛ, ó géē gbɔɔ ō ceyitikwu kóō pla alɛɛcɛ nōo jila iye a. Ɛpleeko ku ojama ɔɔma, ɛjɛɛji ācɛ ipu ɛcɛ géē lɛ ɛga ō mafu peee, ɔdaŋ ka é lɛ ojilima ce iye ku Ɔwɔico klla lɛyitaajɛ lɛ ɔcɛ́ ō lé ku nu. (Mafú 20:7-10) Ɔdā néē géē ya ɛpleeko ɔɔma, gáā mafu ɔdaŋ néē géē ta iye ku uwa ipu ɔkpá ku oyeeyi a.
16 Ubáyíbu da alɔ ka ācɛ ōhī géē yikpɛyi olɔfu bɛɛka Adam mla Iifu a, klla géē ta ō lɛyitaajɛ lɛ ɔcɛ́ ō lé ku Ujehofa. Ɔdi gáā ya da uwa a? Ɔkpá ku Ɔdā Nēé Mafú Lɛ Ujɔ́ni 20:15 da alɔ kahinii: “Ɔ̄cɛ dúúmā nēe tá iyē kú nū tū ɔkpá kú ācɛ nēe yēeyī ā ŋ́, é kwú ɔ̄ ú tá ga ipú ókpoó kú ɔlá.” Aku ɔkwɛyi a, é géē je ācɛ ō yikpɛyi olɔfu nyā yiifi piyoo. Amáŋ alɛwa ku ācɛ nōo jila iye a géē bu ojama nyā. Cɛɛ, é géē ta iye ku uwa tu ipu ɔkpá ku oyeeyi a piyoo.
ƐPLEEKO KU “OŊMƐ́YÍ KÚ ƐCƐ” A
17. Ɔdi nɛ alelekwu otɛhɔ a da Udaniyɛlu ka ɔ géē ya ɛpleeko ku alɔ nyā a? (Udánīyɛ̄lu 12:4, 8-10)
17 Ɔtu gē he alɔ nɛhi ō gbɛla lɛyikwu aɔdā nōo géē ya ɛcɔbu a! Amáŋ, alelekwu otɛhɔ éyi klla da Udaniyɛlu aɔdā ō cɛgbá nōo géē ya eko ku alɔ nyā, nōo wɛ eko ku “oŋmɛ́yí kú ɛcɛ” a. (Jé Udánīyɛ̄lu 12:4, 8-10; 2 Utím. 3:1-5) Alelekwu otɛhɔ a da ɔ kahinii: “Ācɛ alɛwa géē . . . jɛ́ɛ́yí ɔdā nōo yɔ̄ gē yá ā.” Ɔkwɛyi, ācɛ ɔlɛ Ɔwɔico géē jɛyi ku aakacɛ nōo yɔ ipu ɛlā ku nu a lɔɔlɔhi fiyɛ. Alelekwu otɛhɔ a klla ka gɔbu kpɔ, ka ɛpleeko ɔɔma, “ācɛ nēe bɔ̄bíipú ā, í gáā jɛ́ɛ́yí nū ŋ́. É géē bá ī bɔ̄bíipú tōōtɔ̄ɔ̄ nyɔ̄ bū.”
18. Ɔdi i gáā gboji ō ya da ācɛ obɔbiipu gɛ ŋ ma?
18 Icɛ, ó lɔfu lɛbɛɛka é gē ya ācɛ obɔbiipu a itala ku uce obɔbi néē gē ya a ŋ ma. (Umál. 3:14, 15) Amáŋ ó gboji gɛ ŋ, Ujisɔsi géē kɛpɔ tu aɛwu a klla je uwa kpo ŋma ipu aala a. (Umát. 25:31-33) Ācɛ obɔbiipu nyā i gáā wi ɛpleeko ku owe nɛhi a ŋ, oheyi ŋma ɔlekwu i kē gáā yɔ lɛ uwa ipu ɛcɛ ɛyipɛ ŋ. Iye ku uwa i kē gáā yɔ ipu “ɔkpá” nɛ Umálakāyi 3:16 kɛla lɛyikwu ɔ a ŋ.
19. Ɔdi nɛ alɔ cɛgbá ō ya babanya a, ɔdi kē ya a? (Umálakāyi 3:16-18)
19 Babanya wɛ eko nɛ alɔ cika ō mafu ipu uce ō ya ku alɔ, ka alɔ i wɛ ipu ācɛ ō bɔbiipu a ŋ ma. (Jé Umálakāyi 3:16-18.) Ujehofa yɔ i tu ācɛ doodu nɛ ó gē leyi má uwa ka “ācɛ ɔlɛ́ anúɔ” a ba. Ɛnyā kē mafu ka é cɛgbá lɛ ɔ nɛhi. Ó lɛ aafu ŋ alɔ dɔka ō wɛ ipu ācɛ nyā.
Ó géē wɛ ɔdā eeye nɛhi ō má Udaniyɛlu, ācɛ nɛ alɔ yihɔtu uwa mla alɛwa ku ācɛ ɔhá eko néē géē “héyī” cɛɛ kéē miyɛ ule ku uklɔ néē ya ipu ɛcɛ ɛyipɛ a! (Má ogwotu ɔmɛ 20)
20. Ɔdi wɛ okonu amoomɛ nɛ Ɔwɔico ce lɛ Udaniyɛlu a, ɔdiya ɛɛ nɛ a kē yɔ i leyice ō ya jila ku okonu ō ce ɔɔma a?
20 Ó lɛ aafu ŋ, alɔ lā ɛpleeko nɛ aɔdā ɛnɛɛnɛ yɔ i ya. Amáŋ ó gáā gboji gɛ ŋ, aɔdā ō hidaago alɛwa géē ya. Ó gboji gɛ ŋ, alɔ géē má ocataajɛ ku ɛjɛɛji ɔdobɔbi doodu. Igbihi ɔɔma, alɔ géē má ō ya jila ku okonu nɛ Ujehofa ce lɛ Udaniyɛlu a. Ó cokonu kahinii: “A géē héyī cɛ́ɛ́ ká ā mīyɛ ulé kú úklɔ́ nɛ̄ a yá ā, ɛ̄cī ámōōmɛ mɛ́mla eko oŋmɛ́yí kú ɛcɛ ā.” (Udán. 12:13) Ó yɔ i ŋmo uwɔ unwu ō má eko nɛ Udaniyɛlu mla ācɛ nɛ a yihɔtu uwa a géē “héyī” kpɔ a? Ó lɛ a, ya ɔdā duuma nɛ a ya gla ō hayi kpaakpa babanya, ɛnyā géē ya ku a jé kpɔcii ka Ujehofa géē ta iye ku uwɔ taajɛ ipu ɔkpá ku oyeeyi a.
IJÉ ƆMƐ 80 “Taste and See That Jehovah Is Good”
^ Ikpɛyi ɛlā nyā géē mafu ɔwɛ ɛpɛpɛ nɛ alɔ jɛyi ku uklɔ ku ɔkpá ō nwu nɛhi néē géē ya, néē ya ɛdɔ ku nu jejee ɛ ŋ, nɛ ɔkpá ku Udánīyɛ̄lu 12:2, 3 kɛla lɛyikwu ɔ a. Alɔ géē leyi yɛ eko nɛ ɛnyā géē ya mla ācɛ nōo géē yuklɔ a. Alɔ klla géē má ɛgɛ nɛ ōmiya ku uklɔ ku ɔkpá ō nwu nyā géē lɛ ācɛ nōo yɔ ipu ɛcɛ a tutu, lɛyikwu ojama amoomɛ nɛ alɔ géē má oŋmɛyi ku Ihayi Ula Ɛpa Ce Ofu Igwo a.
^ Á jé ŋ, oheyi ŋma ɔlekwu a géē gbɔɔ ŋma ācɛ nōo hayi kpaakpa ɛpleeko amoomɛ nyā, cɛɛ ācɛ nōo kwū gbɔbu lɛ uwa a géē heyi oŋma ɛgɔ éyi gā ɛgɔ ɔhá. Ɔdaŋ ka ó lɛ a, ayika ācɛ ku ɛgɔ éyi géē lɛ ɛga ō ya ācɛ néē jé lɔɔlɔhi a omaaba, ɔdaŋ ka é le heyi. Ɛgɛ duuma nōó lɛ, Ubáyíbu da alɔ ka ó heyi ŋma ɔlekwu ku ācɛ nōo gáā gā ɔkpanco a géē ya ɔwɛ “okpaakpa . . . ɔgbace ɔgbace.” Ohigbu ɛnyā, alɔ lɔfu ka ka oheyi ŋma ɔlekwu ku ācɛ nōo géē lā ipu ɛcɛ nyā, géē ya ɔwɛ okpaakpa ɔgbace ɔgbace duu.—1 Ukɔ́r. 14:33; 15:23.
^ Ɛlā nɛ alɔ je teyi peee nyā, piya ɔwɛ nɛ alɔ jɛyi nu gbɔbu a abɔ, nōo yɔ ipu ɔkpá ku Pay Attention to Daniel’s Prophecy! ɛyi 17, mla Watchtower ku Ɔya Ɔmahapa 1, 1987, upeji 21-25 a.
^ Amáŋ, ɛlā nōo ka “ācɛ oyólɔhi” mla “ācɛ o yá ɔdōbɔ̄bí” nōo yɔ ipu ɔkpá ku Ācot. 24:15 mla ɛlā nōo ka “ācɛ nēe yá ɔdā olɔhi” mla “ācɛ nēe kē yá ɔdōbɔ̄bí” nōo yɔ ipu ɔkpá ku Ujɔ́n. 5:29 a, yɔ i kɛla lɛyikwu uce nɛ ācɛ néē je heyi ŋma ɔlekwu a ya gbɔbu ɛɛ ka é kwū a.
