1. Ɔdiya nōó cika ō hɛ alɔ idaago ɛgɛ nɛ ɔtu gē ya ācɛ alɛwa kē kpɔtuce ɔcɛ duuma gla ŋ ma?

 ALƐƐCƐ ipu ɛcɛ ku Usetan nyā i jé ācɛ néē cika ō kpɔtuce a gɛ ŋ. Uce ō ya ku ācɛ o tɔsɔ, aigɔmɛnti, mla aotrɛyi ku ɛ̄gbā ō gba lɛ uwa abɔ gaajɛ igbalɛwa ɛ. Ɔtu kē ya ācɛ alɛwa kē kpɔtuce aɔkpa, aoladogbe, amāŋ ācɛ apɔlɛ ku uwa gla gɛ ŋ duu. Ɛnyā i cika ō hɛ alɔ idaago ŋ. Ubáyíbu tɛtɛ le ka taajɛ kahinii: “Eko nɛ̄ ɛcɛ gáā mɛ ā . . . , ācɛ . . . géē tá ka aá gbā Óndú ɛ̄gbā gɛ ŋ́, . . . ācɛ o bī ācɛ ɔhá iyē, . . . ācɛ nɛ̄ ɔ̄cɛ í lɛ ɔtūce uwá glá ŋ́.” Ɛnyā yɔ i mafu ka ācɛ géē lɛbɛɛka Usetan nōo wɛ ɔwɔ ku ɛcɛ nyā, nɛ ó tōō lɛ ɔtuce ŋ ma.—2 Utím. 3:1-4; 2 Ukɔ́r. 4:4.

2. (a) Anyɛ nɛ alɔ kpɔtuce uwa ɔkwɔɔkwɛyi gla a? (b) Ɔdi nɛ ācɛ ōhī kē lɔfu gbɛla a?

² Amáŋ alɔ nōo wɛ Ācɛ O Yɛce Ukraist a jé, ka alɔ lɔfu kpɔtuce Ujehofa mla ɛjɛɛji ɔtu ku alɔ gla. (Ujɛr. 17:7, 8) Alɔ jé kpɔcii ka ó yihɔtu alɔ, ó klla gáā “cīgbīhi kwú” aɔkpa ku nu gboogboo ŋ. (Aíjē 9:10) Alɔ klla lɔfu kpɔtuce Ujisɔsi ohigbu ka ó je oyeeyi ku nu gwɛɛya kwɛyi alɔ. (1 Upít. 3:18) Aɔdā nɛ alɔ kē má ipu oyeeyi ku alɔ ɛ ma, nwu alɔ ku alɔ kpɔtuce ɔwɛ nɛ Ubáyíbu gē mafu lɛ alɔ a gla. (2 Utím. 3:16, 17) Alɔ kē jé kpɔcii ku alɔ kpɔtuce Ujehofa, Ujisɔsi, mla Ubáyíbu gla. Amáŋ ācɛ ōhī lɔfu gbɛla ɔdaŋ kē kpɔtuce ayinɛ uwa nōo yɔ ipu ujɔ a eko doodu gla. Ɔdaŋ ka ohi a wɛ ii, ɔdiya nɛ alɔ kpɔtuce uwa gla a?

3. Ɛnɛɛnɛ ɛga nōó lɛ ɛdɔ ŋ nyá nɛ alɔ lɛ a? (Umáki 10:29, 30)

³ Ujehofa lɛ alɔ fu ō gáā wɛ ipu apɔlɛ ku nu nōo gē gba ɔ ɛ̄gbā ipu oduudu ɛcɛ a. Ɛnyā wɛ ɛnɛɛnɛ ɛga nōó lɛ ɛdɔ ŋ nōo géē ya ku alɔ lɛ ɔhā alɛwa! (Jé Umáki 10:29, 30.) Ipu oduudu ɛcɛ, alɔ lɛ ayinɛ alɛwa nōo yihɔtu ku Ujehofa nɛhi bɛɛka alɔ, nōo klla yɔ i ceyitikwu kéē lā oyeeyi ku uwa ɛgɛ nɛ Ujehofa dɔka a. Uce, uculo, amāŋ ɔwɛ nɛ alɔ gē ya ifa lɛ a lɔfu wɛ ɛyɛɛyɛyi gwu  aku uwa ta, amáŋ alɔ yihɔtu ku uwa kpɔ ɔdaŋ nōó kóō wɛ eko aflɛyi nɛ alɔ má uwa a. Ó klla gē he alɔ ɔtu fiyɛ ō yɔ tɔha mla uwa, o ya ɛɛ ku alɔ je owoofu mla gba Adā alɔ nōo yihɔtu alɔ nōo yɔ ɔkpanco a ɛ̄gbā.—Aíjē 133:1.

4. Ɔdiya nɛ alɔ cɛgbá ayinɛ alɔ a?

⁴ Babanya nōó cɛgbá fiyɛ otɛtɛ ku alɔ piyatɔha mla ayinɛ alɔ a. Ekoohi, é gē ta alɔ abɔ ɔdaŋ nɛ alɔ ipu unwalu. (Uróm 15:1; Ugal. 6:2) É klla gē ta alɔ ɔtu kwu ɔtu ō lɛ ɔdā alɛwa ō ya ipu ɛ̄gbā ō gba ku Ujehofa, mla ō gɔbu wɛ ɔya ku nu. (1 Utes. 5:11; Uhíb. 10:23-25) Gbɛla lɛyikwu ɛgɛ nɛ ɔtu gē yɛ i ya alɔ lɛ, ɔdaŋ ku alɔ i lɛ ogbotu nɛ ujɔ gē je lɛ alɔ ō ta alɔ abɔ ku alɔ hayi kli ō ya olɛla ku alɔ nōo wɛ Ebilii mla ɛcɛ obɔbi ku nu a lé ŋ ma. Ó gboji gɛ ŋ, Usetan mla ācɛ nɛ ó lɛ íkwu ikpɛyi ku uwa a géē wa i nuunu ta ācɛ ɔlɛ Ɔwɔico. Amáŋ ɛpleeko ɔɔma, ó géē jɛ alɔ eyī nɛhi ku ayinɛ alɔ je otabɔ lɛ alɔ!

5. Ɔdiya nōó lɔfu lɔnɔ tu ācɛ ōhī ō kpɔtuce ayinɛ ipu ujɔ a?

⁵ Amáŋ ó gē lɛ lɔnɔ lɛ ācɛ ōhī kéē kpɔtuce ayinɛ uwa, á jé ŋ, ohigbu kē lɛ ɔdā néē cika ō le tayinu a ka lɛ ɔyinɛ ɔhá, nɛ ɔyinɛ ɔɔma klla kwu ɛlā ɔɔma piii a u ka lɛ ɔcɛ ɔhá, amāŋ ohigbu ku ɔyinɛ éyi lɛ okonu ce amáŋ ó ya ɔdā ɔɔma ŋ. Amāŋ ɔcɛ éyi ipu ujɔ kɛla amāŋ ya odee nōo kwu uwa iye nɛhi. Ɔdaŋ ku ɔdā ɛgɛnyā le ya, ó lɔfu lɔnɔ tu alɔ ō kpɔtuce ācɛ ɔhá. Ó lɛ a, ɔdi gáā ta alɔ abɔ ō kpɔtuce ayinɛ alɔ ipu ujɔ a?

6. Ɛgɛnyá nɛ ihɔtu gáā lɔfu ta alɔ abɔ ō kpɔtuce ācɛ ɔhá a? (1 Ācɛ Ukɔ́rīnti 13:4-8)

⁶ Ihɔtu wɛ ɔdā okpɔcii nōo ya nɛ alɔ gē kpɔtuce ɔcɛ a. Ɔkpá ku Ācɛ Ukɔ́rīnti aflɛyi ɛyi 13, kɛla lɛyikwu ɔwɛ ɛyɛɛyɛyi nɛ ihɔtu gē ta alɔ abɔ ō kpɔtuce ācɛ ɔhá a. (Jé 1 Ācɛ Ukɔ́rīnti 13:4-8.) Ocabɔ mafu, ɔgba 4 da alɔ ka “ɔ́dāŋ ka ɔ̄cɛ he uwɔ ɔtū ayíka a lɔtūlé lɛ ɔ́, a kē í gbonɛnɛ lɛ ɔ́.” Ujehofa gē lɔtu mla alɔ ɔdaŋ nɛ alɔ kóō lɛ íne ku nu biya naana. Ohigbu ɛnyā,  alɔ cika ō lɛ ɔtu lé lɛ ayinɛ ɔdaŋ néē kóō kɛla amāŋ ya odee nōo kwu alɔ iyē. Ɔgba 5 klla kahinii: “Ɔ́dāŋ ka ɔ̄cɛ he uwɔ ɔtū, á gáā kpɔ́tūfúúlú lɛyíkwu ɔ́ ŋ́, ɛ́ɛ́ nɛ̄ a gē yɔ̄ í blakwu ɔdōōbɔ̄bí nōó yá uwɔ ā ŋ́.” Alɔ i gáā dɔka ō “yɔ̄ í blakwu ɔdōōbɔ̄bí” ŋ, ɔɔma wɛ ku alɔ i gáā yɔ i blakwu aɔdā nɛ ayinɛ alɔ ya nōo kwu alɔ iyē a eko doodu ŋ. Ɔkpá ku Ɔ̄cokóītá 7:9 da alɔ ka alɔ “híī cɔ̄nū kú ɔdā dúúmā fíyaa ŋ́.” Ó klla géē lɔhi nɛhi ku alɔ bi ɛlā nōo yɔ ipu ɔkpá ku Ācɛ Ɛ́fēsɔsi 4:26 a le yuklɔ. Ó kahinii: “Ā í mabɔ̄ ɔnū nɛ̄ a cɛ̄ ā tá gbɔbū lɛ ɛnɔ o gaajɛ”!

7. Ɛgɛnyá nɛ ukɔ́ nōo yɔ ipu ɔkpá ku Umátiyu 7:1-5 a, gáā ta alɔ abɔ kpɔtuce ācɛ ɔhá a?

⁷ Ɔdā ɔhá nōo gáā ta alɔ abɔ kpɔtuce ayinɛ alɔ a, wɛ ō leyi má uwa ɛgɛ nɛ Ujehofa gē má uwa a. Ɔwɔico yihɔtu uwa, ó klla gē blakwu íne ku nu néē gē biya a ŋ. Alɔ a i kē cika ō ya lɛ a ŋ duu. (Aíjē 130:3) Ikɔkɔ nɛ alɔ géē leyi ku alɔ kwu ɛga nɛ ayinɛ alɔ i gē ya lɔhi ŋ ma, alɔ ceyitikwu leyikwu auce olɔhi néē lɛ, klla gbɛla lɛyikwu ɔdā olɔhi néē lɔfu ya gla a. (Jé Umátiyu 7:1-5.) Alɔ lɛ ɔtuce ka ɔdā olɔhi nɛ ayinɛ alɔ bi ɔtu a ó wɛ ɔdā obɔbi ŋ, ohigbu ka ihɔtu “gē yá ka ɔ̄cɛ kóō lɔtūce ɔ̄cɛ.” (1 Ukɔ́r. 13:7) Ɛlā nyā i yɔ i ka ku Ujehofa leyice ku alɔ géē kpɔtuce ācɛ ɔhá iciici ŋ, ikɔkɔ ɔɔma, ó leyice ku alɔ géē kpɔtuce uwa ohigbu kē ya aɔdā nōo mafu ku alɔ kpɔtuce uwa gla. *

8. Ɛgɛnyá nɛ a gáā nwu ō kpɔtuce ayinɛ uwɔ a?

⁸ Ɛgɛ nēé gē bi ɔbɔŋgɔli le piya ojilima abɔfu ŋ ma, ɔwɛ ekponu ɔɔma gbɔbu ɛɛ ku ācɛ kéē kpɔtuce ɔcɛ, ɔcɛ ɔɔma cɛgbá ō ya ɔdā nōo géē mafu ka ācɛ kpɔtuce ɔ gla, ɔɔma kē lɔfu je eko. Ó lɛ a, ɛgɛnyá nɛ a gáā nwu ō kpɔtuce ayinɛ uwɔ a? Ceyitikwu cɛɛ ku a jé uwa lɔɔlɔhi. Kɛla mla uwa ipu ōjila ku ujɔ. Ya ōmiya cɛɛ ku a yuklɔ tɔha mla uwa ipu uklɔ ku ɔna ō ta. Bēē lɔtu mla uwa, ku a klla jɛga lɛ uwa kéē mafu gā uwɔ ka é wɛ ācɛ nɛ a lɔfu lɛ ɔtuce gla. Ɔdaŋ ka yɔ i jé ɔcɛ ɛpɛpɛ, eko aflɛyi, á lɔfu da ɔ ɛjɛɛji ɔdā doodu lɛyikwu uwɔ ŋ. Amáŋ abɔ eko yɔ i nyɔ nɛ a yɔ i jé ɔ tōōtɔ̄ɔ̄ a, a lɔfu miya ō da ɔ ɛgɛ nɛ ɔtu gē ya uwɔ lɛ a. (Ulúk. 16:10) Amáŋ ɔdi nɛ a gáā ya ɔdaŋ ka ɔyinɛ éyi lɛ ibiyaajɛ ya tu uwɔ, lɛ ɔdā otayinu nɛ a da ɔ a ka lɛ ācɛ a? A hii ya ku ɛma ku uwɔ mla ɔcɛ ɔɔma kóō je hɛ ŋ. Ikɔkɔ ɔɔma, lɛ eko je lɛ ɔ. A kē hii cɛ ku ɔdā nɛ ɔcɛ ɔɔma ofoofunu ya a, kóō ya ku a ma ō kpɔtuce ayinɛ uwɔ ohile ŋ. Mla ɛnyā ipu ɔtu, alɔ géē leyi yɛ ocabɔ nɛ ācɛ nōo hayi kpaakpa lɛ Ujehofa le taajɛ a, naana nɛ ācɛ ōhī lɛ uwa abɔ gaajɛ a, é gɔbu yɔ i kpɔtuce ācɛ ɔhá kpɔ a.

9. (a) Ɛgɛnyá nɛ Uhana gɔbu yɔ i kpɔtuce ōmiya ku Ujehofa, naana nɛ ācɛ ōhī nōo gbɔbu ipu ɛ̄gbā ō gba ku nu gē nyileyi a? (b) Ɔdi nɛ a nwu ŋma ocabɔ ku Uhana lɛyikwu ō kpɔtuce ōmiya ku Ujehofa a? (Má ifoto a.)

⁹ Ɔyinɛ nɔnyilɔ nɛ a kpɔtuce nɛɛnɛhi lɛ uwɔ abɔ gaajɛ jeeje ɛ? Ɔdaŋ ka ó lɛ a, a lɔfu lɛ itene ŋma ō leyi yɛ ocabɔ ku Uhana. Ɛpleeko ku nu, Ɛlayi nɛ ō wɛ Otrɛyi Ku Ācɛ O Gwɛɛya a, wɛ ɔcɛ o gbɔbu ipu ɛ̄gbā ō gba ipu ajɛ ku Isrɛlu a. Amáŋ ācɛ apɔlɛ ku nu i lɛ ocabɔ olɔhi taajɛ ŋ. Ayi nɔnyilɔ ku nu nōo wɛ ācɛ o gwɛɛyɛ duu a, gē gbo aja klla gē ya uce ō ta uweyi ɛyɛɛyɛyi, amáŋ adā uwa i kē ceyitikwu lɔfu lɔfu kóō na uwa ta ɔwɛ ŋ. Amáŋ Ujehofa i je Ɛlayi fu ŋma ō wɛ otrɛyi ku ācɛ o gwɛɛya boobu ŋ. Naana a, ɔɔma i ci Uhana ŋma ō nyɔ gā ipu Agbliihɔ a kóō gba ɛ̄gbā ohigbu ku Ɛlayi wɛ otrɛyi ku ācɛ o gwɛɛya ŋ. Eko nɛ Ɛlayi má Uhana yɔ i gbɔɔkɔ ŋma ipu ɔtu nobi a, ó lɛ ɛlā ŋmɛyi ɔwɛ obɔbi ku Uhana ɔ lɛ eje gwa fiyɛ ɔfu. Ó lɛ eko taajɛ ō bɔkwu ɛlā duuma ŋ, ikɔkɔ  ɔɔma ó gbɔɔ ō ŋmo Uhana nōo yɔ ipu ɔtu nobi nɛɛnɛhi a okonu boobu. (1 Usám. 1:12-16) Naana kpɔ a, Uhana lɛ okonu ce ka ɔdaŋ ka ó lɛ ɔyi nɔnyilɔ éyi lɛ, ó géē bi ɔ wa ipu Agbliihɔ nɛhi a kóō gáā yuklɔ, Ɛlayi klla gáā leyikwu ɔ a. (1 Usám. 1:11) Ó lɛ a, ó cɛgbá kéē na ayi Ɛlayi ta ɔwɛ ohigbu uce obɔbi néē gē ya a kpɔ? Ii, Ujehofa kē lɛ odee ya lɛyikwu ɔ eko okpaakpa a. (1 Usám. 4:17) Ujehofa kē lɛ ɔhā hɛ ce Uhana mla ɔyi nɔnyilɔ éyi nōo lé ka Usamuwɛlu.—1 Usám. 1:17-20.

10. Ɛgɛnyá nɛ Udefidi nōo wɛ ɔcɛ́ a gɔbu yɔ i kpɔtuce ācɛ ɔhá, naana nɛ ācɛ ōhī lɛ ibiyaajɛ ya tu ɔ a?

¹⁰ Ɔkpa ku uwɔ éyi nōo kwu uwɔ ajaajɛ ya ibiyaajɛ tu uwɔ jeeje ɛ? Ɔdaŋ ka ó lɛ a, leyi yɛ ɔdā nōo ya ipu oyeeyi ku Udefidi nōo wɛ Ɔcɛ́ a. Ó lɛ ɔkpa ku nu éyi nōo lé ka Ahitofɛlu. Amáŋ eko nɛ ɔyi Udefidi néē hi ka Absalɔm a yɔ i ceyitikwu ō kwu piya ɔcɛ́ a, Ahitofɛlu ba u Absalɔm iyē ipu ikpɛyi olɔfu ō ya ɔɔma. Ó lɛ aafu ŋ, ó géē kwu Udefidi iyē nɛhi ka ɔyi nu nɔnyilɔ, mla ɔcɛ nɛ ó gbɛla ka ó wɛ ɔkpa ku nu a i klla ya aya ku nu gɛ ŋ! Amáŋ Udefidi i jɛga lɛ ibiyaajɛ nyā kóō ci ɔ ŋma ō kpɔtuce ācɛ ɔhá ŋ. Ó gɔbu kpɔtuce ɔkpa ku nu ɔhá nōo lé ka Uhusaayi, nōo ta ō yɛce ācɛ ya ikpɛyi olɔfu ɔɔma a. Ó lɛ ɔdā okpɔcii nōo ya nɛ Udefidi cika ō kpɔtuce Uhusaayi. Uhusaayi mafu ka ó wɛ ɔkpa olɔhi, ó kóō lɛ oyeeyi ku nu kwu ikwū ajaajɛ o ya ɛɛ kóō je otabɔ lɛ Udefidi.—2 Usám. 17:1-16.

11. Ɔwɛ éyi nyá nɛ ɔcocɛhɔ ku Unabalu mafu ɔtu okpoce a?

¹¹ Leyi yɛ ocabɔ nɛ ɔcocɛhɔ ku Unabalu éyi le taajɛ a kpɔ. Udefidi mla ācɛ nōo yɛce ɔ a je ogbotu lɛ acocɛhɔ ku ɔcɛ Isrɛlu éyi néē hi ka Unabalu, eko néē yɔ ipu ací a. Igbihaajɛ, Udefidi le da Unabalu nōo wɛ ɔcɛ ō gba agbenu nɛhi a kóō lɛ ɔdole je lɛ anu mla ācɛ nōo yɛce ɔ a, amáŋ Unabalu ta. Abɔ Unabalu ta kóō ya ɔdā néē da ɔ a, Udefidi kwu cɔnu nɛɛnɛhi ka anuɔ géē je Unabalu mla oduudu acɛnyilɔ nōo yɔ apɔlɛ ku nu a kpo ŋmo. Ɔcocɛhɔ ku Unabalu éyi nyɔ gáā lɛ ɔdā nōo ya nyā da Abigɛlu nōo wɛ ɔnyā ku Unabalu a. Ɔcocɛhɔ a wɛ ipu apɔlɛ a, ohigbu ɔɔma ó jé ka Abigɛlu lɔfu nya oyeeyi ku nu ta gla. Ikɔkɔ nɛ ó géē kwu a, ó kpɔtuce ka Abigɛlu lɔfu ya odee lɛyikwu āhɔ̄ a gla. Ó lɔfu lɛ ɔtu okpoce nyā ohigbu ka ó jé ka ɛjɛɛji ācɛ jé Abigɛlu ka ó wɛ ɔnyā nōo  lɛ ohilipu. Ɔdā nōo kē ya igbihaajɛ a mafu peee ka ó cika ō kpɔtuce Abigɛlu ɔkwɔɔkwɛyi. Abigɛlu ya ɛlā mla ɔtu ō lɛ o ya ɛɛ kóō lɛ Udefidi ci ŋmo ō ya ɔdā nɛ ó miya a. (1 Usám. 25:2-35) Ó kpɔtuce ka Udefidi géē ya ɛlā ɔwɛ ijeeyi.

12. Ɛgɛnyá nɛ Ujisɔsi mafu ka ó kpɔtuce ayikpo ku nu naana néē ya inyileyi ekoohi a?

¹² Ujisɔsi kpɔtuce ayikpo ku nu kpɔ naana néē gē ya inyileyi ekoohi a. (Ujɔ́n. 15:15, 16) Eko nɛ Ujemisi mla Ujɔni wa gáā da Ujisɔsi kóō je ɛnɛɛnɛ ɛga lɛ uwa ipu Ajɔɔcɛ Ku Ɔwɔico a, Ujisɔsi i gbɔɔ ō lɛ aafu lɛyikwu ɔdā néē bi ɔtu ɛɛ néē yɔ i gba Ujehofa ɛ̄gbā, amāŋ ta uwa kē hii wa ayikpo ku nu gɛ ŋ. (Umák. 10:35-40) Eko ɔhá, otu ku ɛ̄cī néē wa gáā kwu Ujisɔsi a, ɛjɛɛji ayikpo ku nu le kwu gwu ɔ ta. (Umát. 26:56) Naana a, Ujisɔsi i ma ō kpɔtuce uwa ŋ. Ó jé kē wɛ ācɛ nōó jila iyē ŋ, amáŋ ó gɔbu “yíihɔtū tū uwā jāā ga eko ámōōmɛ á.” (Ujɔ́n. 13:1) Igbihi née lɛ Ujisɔsi heyi ŋma ɔlekwu a, ó lɛ ɛnɛɛnɛ uklɔ éyi je lɛ ayikpo ku nu igwoleyi nōo hayi kpaakpa a. Uklɔ kóō yɔ i gbɔbu ipu uklɔ ku ɔna ō ta mla ō leyikwu aala ku nu. (Umát. 28:19, 20; Ujɔ́n. 21:15-17) Ó lɛ aafu ŋ, ó lɛ ɔdā ocɛgbá nɛhi nōo ya nɛ Ujisɔsi kpɔtuce ayikpo ku nu nōó jila iye ŋ nyā. Ɛjɛɛji uwa kē hayi kpaakpa ipu ɛ̄gbā ō gba ku uwa lɛ Ujehofa gbeeko néē kwū a. Ó teyi peee, ka Uhana, Udefidi, ɔcocɛhɔ ku Unabalu, Abigɛlu, mla Ujisɔsi lɛ ɛnɛɛnɛ ocabɔ kóō kpɔtuce ācɛ nɛ ó jila iye ŋ ma taajɛ lɛ alɔ.

13. Ɔdi lɔfu ya kóō lɔnɔ tu alɔ ō kpɔtuce ācɛ ɔhá a?

¹³ A kpɔtuce ɔyinɛ duuma ka ɔdā otayinu lɛ ɔ, amáŋ ɔcɛ ɔɔma lɛ ibiyaajɛ ya tu uwɔ lɛ ɛlā ɔɔma ka lɛ ācɛ jeeje ɛ? Ɔɔma wɛ ɔdā okwiiye nɛhi. Ɔyinɛ nɔnya éyi lɛ ɔdā otayinu lɛyikwu iyi nu ka lɛ ɔnyakwɔcɛ ku ujɔ éyi, klla kpɔtuce ka ó gáā da ɔcɛ duuma lɛyikwu ŋ. Ɛ̄cī nōo kē gboce ɔ a, ɔnyā ku ɔnyakwɔcɛ ku ujɔ a lɛ ɔyinɛ nɔnya a higwu kóō ta ɔ ɔtu kwu, ó lɛ aafu ŋ, ohigbu ka ó lɛ ɔda nɛ ɔyinɛ nɔnya a da ɔba nu nōo wɛ ɔnyakwɔcɛ ku ujɔ tayinu a po ɛ. Ɛnyā ya kóō kwu lɔnɔ tu ɔyinɛ nɔnya a kóō kpɔtuce ɔnyakwɔcɛ ku ujɔ ɔɔma. Amáŋ ɔyinɛ nɔnya a lɛ ɔdā okpaakpa ya ŋma lɛ ō dɔka otabɔ. Ó le da ɔnyakwɔcɛ ku ujɔ ɔhá lɛyikwu ɛlā a, ɔnyakwɔcɛ ku ujɔ ɔɔma kē ta ɔ abɔ ya kóō lɔfu kpɔtuce anyakwɔcɛ ku ujɔ kpɔ.

14. Ɔdi ta ɔyinɛ alɔ nɔnyilɔ éyi abɔ kóō lɔfu kpɔtuce ācɛ ɔhá kpɔ a?

¹⁴ Ihayi alɛwa, ɔyinɛ nɔnyilɔ éyi yɔ i cɔnɔ mla anyakwɔcɛ ku ujɔ ɛpa, nɛ ɔtu ya ɔ ka ó gáā kpɔtuce uwa gla gboogboo ŋ. Amáŋ ó gáā gbɔɔ ō gbɛla tu ɛlā nɛ ɔyinɛ alɔ nɔnyilɔ éyi nɛ ó gē lɛ ojilima ce nɛhi a ka ipu ɛlā ō ka tɛɛcɛ ku nu éyi a. Ó kahinii: “Usetan wɛ olɛla ku alɔ a, ó wɛ ayinɛ alɔ ŋ.” Ɔyinɛ alɔ ɔɔma gbɛla tu ɛlā ɔɔma lɔɔlɔhi mla ɔdā nɛ ó cɛgbá ō ya a. Igbihi ɔɔma ó lɛ ɔkɔ gba lɛ Ujehofa kóō ta ɔ abɔ, anu ó nyɔ gáā lɛ ɛbɔ ya mla anyakwɔcɛ ku ujɔ ɛpa ɔɔma a.

15. Ɔdiya nɛ ō kpɔtuce ɔcɛ kpɔ gē je eko nɛhi a? Je ocabɔ mafu.

¹⁵ Aya ku uklɔ duuma hɛ uwɔ abɔ ipu ɛ̄gbā ō gba ku Ujehofa jeeje ɛ? Ɔɔma lɔfu wɛ ɔdā okwiiye nɛhi. Grete mla ɛ́nɛ́ nu gba Ujehofa ɛ̄gbā kpaakpa ɛpleeko néē lɛ abɔ ci uklɔ ku alɔ ipu Nazi Germany ɛpla ihayi ku 1930 a. Grete gē jɔɔnyɛ uklɔ kóō ta Ɔda Ō Gbaajɛ néē gē ta gē lɛ ayinɛ alɔ eko ɔɔma a. Amáŋ eko nɛ ayinɛ alɔ gáā le jé ka adā nu wɛ ipu ācɛ nōó dɔka ɛlā ɔkwɛyi a ŋ ma, é miyɛ ɔ ɛnɛɛnɛ uklɔ ɔɔma. Ɔdā nōo kē ya a wɛ ka ayinɛ a yɔ i yuufi ku á jé ŋ, adā nu lɔfu je ɔdā otayinu ōhī lɛyikwu ujɔ a lɛ ācɛ nōo yɔ i ya ayinɛ alɔ ŋmo a. Ó wɛ ɔɔma foofunu wɛ unwalu nɛ u Grete lɔtu ku nu a ŋ. Ɛpla ɛjɛɛji eko néē kpo ɛfú ku oduudu ɛcɛ ɔmpa a, é je ɔkpá ku alɔ duuma lɛ u Grete mla  ɛ́nɛ́ nu ŋ, klla ta ō kɛla mla uwa eko duuma néē lɛ uwa má ipu ulaayi. Ɛlā nyā kwu ɔyinɛ alɔ nɔnya Grete iyē nɛɛnɛhi nōo je ɔ eko alɛwa, gbɔbu ɛɛ kóō je ya ayinɛ nɔnyilɔ nyā ɛhi klla gbɔɔ ō kpɔtuce uwa kpɔ. Amáŋ abɔ eko yɔ i nyɔ a, ó jé ka Ujehofa kwu ya uwa ɛhi ɛ, ó kē ya lɛ a duu. *

16. Ɔdiya nɛ alɔ cika ō ceyitikwu nwu o ya ɛɛ ku alɔ kpɔtuce ayinɛ alɔ kpɔ a?

¹⁶ Ɔdaŋ ka ɔdā okwiye ɛgɛnyā ya da uwɔ jeeje ɛ, ceyitikwu ku a nwu ō kpɔtuce ācɛ kpɔ. Ó lɔfu je uwɔ eko, amáŋ o ceyitikwu ku uwɔ i gáā bonu ŋ. Alɔ lɔfu leyi yɛ ɔ ɔwɛ ɛgɛnyá, ɔdaŋ ka é lɛ ɛcí ifu ta ɔdole lɛ alɔ jeeje ɛ, ayika alɔ cɛgbá ō leyi kwɛɛcɛ lɔɔlɔhi ku ɔdā duuma nɛ alɔ gáā lé a. Amáŋ ohigbu ka é lɛ ɛcí ifu ta ɔdole lɛ alɔ jeeje ɛ, wɛ ka alɔ i gáā lé ɔdole gboogboo gɛ ŋ nɛɛ? Ɔwɛ ekponu ɔɔma, alɔ ka ó hii cɛ ku ɔdobɔbi nōo ya da alɔ gbɔbu ɛ ma kóō lɛ abɔ kwu ɔtu nɛ alɔ kpɔtuce ayinɛ alɔ a ŋ, ohigbu ku alɔ jé kē wɛ ācɛ nōó jila iyē ŋ. Ɔdaŋ ku alɔ ceyitikwu ya ku alɔ gbɔɔ ō kpɔtuce ayinɛ alɔ kpɔ, alɔ géē lɛ eeye nɛhi. Ó klla géē ta alɔ abɔ jé ɔdā nɛ alɔ lɔfu ya, cɛɛ ku alɔ gɔbu yɔ i kpɔtuce iyi alɔ ipu ujɔ nɛ alɔ yɔ a.

17. Ɔdiya nōó cɛgbá ku alɔ kpɔtuce ācɛ ɔhá a, ɔdi nɛ alɔ kē gáā kɛla lɛyikwu ɔ ipu ikpɛyi ɛlā nōo gboce ɛnyā a?

¹⁷ Ō kpɔtuce ācɛ ipu ɛcɛ ku Usetan nyā i wɛ ɔdā nōo kpɔ ŋ, amáŋ alɔ lɔfu kpɔtuce ayinɛ alɔ ohigbu ku alɔ yihɔtu uwa, é kē yihɔtu alɔ duu. Ɛdɔ ku ɔtu okpoce nyā ya nɛ alɔ lɛ eeye klla piyatɔha babanya a, ó klla géē je ogbotu lɛ alɔ eko nɛ alɔ gbɔɔ ō má unwalu ɛcɔbu. Ɔdi nɛ a cika ō ya ɔdaŋ ka ɔcɛ nɛ a kpɔtuce lɛ uwɔ abɔ gaajɛ jeeje ɛ, nɛ a klla kpɔtuce ɔ gla gɛ ŋ ma? Ceyitikwu ku a leyi má ɛlā ɛgɛ nɛ Ujehofa gē leyi má ɔ a, bi aukɔ́ ku Ubáyíbu le yuklɔ, ceyitikwu mafu ihɔtu lɛ ayinɛ uwɔ, cɛɛ ku a klla nwu ɛlā ŋma aocabɔ nōo yɔ ipu Ubáyíbu a. Alɔ lɔfu ya icɔnu ku alɔ lé, cɛɛ ku alɔ gbɔɔ ō kpɔtuce ācɛ ɔhá gla kpɔ. Ɔdaŋ ku alɔ ceyitikwu ya lɛ a, alɔ géē jɔɔnyɛ ɔhā alɛwa nōo gē wa ŋma ō lɛ ɛnɛɛnɛ ‘aóklóbīya ámāŋ ka aɔ́ncɛ́nyā nōo kwu ɔ̄cɛ ajaajɛ fíyɛ́ ɔyínɛ́ ipú ɔ̄cɛ á.’ (Aíit. 18:24) Amáŋ ó jɛ ɔdaŋ ku alɔ a kpɔtuce ācɛ ɔhá ŋ, é cika ō jé kē kpɔtuce alɔ gla duu. Ipu ikpɛyi ɛlā nōo gboce ɛnyā a, alɔ géē kɛla lɛyikwu ɔdā nɛ alɔ lɔfu ya o ya ɛɛ ku ayinɛ alɔ kóō kpɔtuce alɔ a.