IKPƐYI ƐLĀ Ō KLƆCƐ ƆMƐ 39
Iye Ku Uwɔ Yɔ Ipu “Ɔkpá Kú Oyēeyī” A?
“Ɔkpá nēé tá iyē kú odúúdú ācɛ nēé gē lɛ ojīlīmā ce ɔ́ ā, ce iyɔ̄bū nū.”—UMÁL. 3:16.
IJÉ ƆMƐ 61 Forward, You Witnesses!
ƆDĀ NƐ ALƆ GÁĀ NWU A *
Ujehofa humayi ta iye ku ācɛ tu “ɔkpá kú oyēeyī” ŋma eko ku Ebɛlu jaa kwu icɛ (Má ogwotu ɔmɛ 1-2)
1. Ɛgɛ nɛ Umálakāyi 3:16 ka a, ɔkpá nyá nɛ Ujehofa humayi ta a, ɔdi nēé kē ta ipu nu a?
ŊMIIFI ihayi ula alɛwa, Ujehofa yɔ i ta ɛnɛɛnɛ ɔkpá éyi. Ɔdā nōo yɔ ipu ɔkpá nyā a wɛ iye ku ācɛ ɛyɛɛyɛyi, o gbɔɔ ŋma iye ku ɔlɛɛcɛ aflɛyi nōo hayi kpaakpa nēé hi ka Ebɛlu * a. (Ulúk. 11:50, 51) O gbɔɔ ŋma eko ɔɔma, Ujehofa humayi ta iye ku ācɛ ɛyɛɛyɛyi tu ipu ɔkpá ɔɔma, iye ku ācɛ nōo kē yɔ ipu ɔkpá ɔɔma icɛ a wɛ umiliyɔn alɛwa. Ipu Ubáyíbu, é hi iye ku ɔkpá ɔɔma ka “ɔkpá kú oyēeyī.”—Jé Umálakāyi 3:16; Mafú 3:5; 17:8.
2. Iye ku anyɛ nēé ta ipu ɔkpá ku oyeeyi a, ɔdi nɛ alɔ cɛgbá o ya cɛɛ ku iye ku alɔ kóō yɔ ipu ɔkpá ɔɔma duu a?
2 Ɛjɛɛji ācɛ ō gba Ujehofa ɛ̄gbā nōo lɛ ojilima ce ɔ ŋma ipiipu ɔtu klla yihɔtu ku iye ku nu nɛhi a, nēé ta iye ku uwa taajɛ ipu ɛnɛɛnɛ ɔkpá nyā a. Ācɛ nōo ba nyā kē géē lɛ ɛga ō lɛ oyeeyi opiyoo. Icɛ, alɔ lɔfu ya kéē lɛ iye ku alɔ ta tu ipu ɔkpá ɔɔma, ŋma lɛ ō yɔ kwu Ujehofa ajaajɛ klla lɛ ɛma olɔfu mɛmla ɔ, o bu ipu ikwū ku Ɔyi nu Ujisɔsi Ukraist. (Ujɔ́n. 3:16, 36) Ɛjɛɛji alɔ dɔka ku iye ku alɔ kóō yɔ ipu ɔkpá ɔɔma, ɔdaŋ ka eyiyoce ku alɔ kōō wɛ ō lā ɔkpanco amāŋ ipu ɛcɛ amanya.
3-4. (a) Ɔdaŋ ka iye ku alɔ yɔ ipu ɔkpá ku oyeeyi a babanya, alɔ géē lā oyeeyi opiyoo? Kōōcō kwu ɔ teyi peee. (b) Ɔdi nɛ alɔ gāá kɛla lɛyikwu ɔ ipu ikpɛyi ɛlā nyā mla ɛ̄nɛ̄ ō gboce ɔ a?
3 Eko duuma nēé lɛ iye ku ɔcɛ ta tu ipu ɔkpá ku oyeeyi a, ɔɔma wɛ ku ɔdā duuma nōo ya naana, ɔcɛ ɔɔma géē lɛ oyeeyi opiyoo a piii nɛɛ? Alɔ má ohi ku ɔka ɔɔma ipu ɛlā nɛ Ujehofa da Umosisi a, ipu ɔkpá ku Oōyɛbɛ̄ɛcɛ 32:33. Ujehofa kahinii: “Ɔ̄cɛ dóódu nōo bīya íne kú um ā, nɛ̄ n géē nya iyē kú nū ŋmá ipú ɔkpá kú um á.” Ohigbu ɛnyā, é je aiye nōo yɔ ipu ɔkpá ɔɔma babanya a nya gla kpɔ ɛ. Ɔcɛ lɔfu ka ku ó lɛbɛɛka upɛnsu nɛ Ujehofa gē bi le ta iye a taajɛ aflɛyi a. (Mafú 3:5) Alɔ cika ō ceyitikwu ku iye ku alɔ kóō yɔ ipu ɔkpá ɔɔma, jaa gbeeko nēé lɛ ɔ ta mla ɔdā ō ta ɔkpá nɛ ɔcɛ i nya gla ŋ.
4 Ɛnyā lɔfu ya ku ɔka ōhī kóō wa ipu ɔtu ku alɔ. Ocabɔ mafu, ɔdi nɛ Ubáyíbu ka lɛyikwu ācɛ nɛ iye ku uwa yɔ ipu ɔkpá ku oyeeyi a mla ācɛ nɛ iye ku uwa i yɔ anu ŋ ma? Ācɛ nɛ iye ku uwa yɔ ipu ɔkpá a, eko nyá nēé gāá miyɛ ɛhi ku oyeeyi opiyoo a? Ācɛ nōo kē kwū nēé lɛ ɛga ō jé Ujehofa ŋ ma bɛ? Ó géē tɔɔtɛ ku iye ku uwa kóō yɔ ipu ɔkpá ɔɔma gla a? Alɔ géē má ohi ku aɔka nyā ipu ikpɛyi ɛlā nyā mla ɛ̄nɛ̄ ō gboce ɔ a.
IYE KU ANYƐ YƆ IPU ƆKPÁ A?
5-6. (a) Ɛgɛ nɛ ɔkpá ku Ācɛ Ufílipāyi 4:3 mafu a, anyɛ nɛ iye ku uwa wɛ ipu ācɛ nēé ta iye ku uwa tu ipu ɔkpá ku oyeeyi a? (b) Eko nyá nēé gáā ta iye ku uwa tu ipu ɔkpá ku oyeeyi a nɛ ɔdā duuma i gáā nya ɔ gla ŋ ma?
5 Iye ku anyɛ nēé ta tu ipu ɔkpá ku oyeeyi nyā a? O ya ɛɛ ku alɔ cila ohi ku ɔka ɔɔma, alɔ géē leyi yɛ ígwu ɛhɔ ku ācɛ ɛyɛɛyɛyi. Ipu ígwu ɛhɔ nyā, iye ku ācɛ ōhī ku uwa yɔ ipu ɔkpá ku oyeeyi a, amáŋ aku ācɛ ōhī i yɔ ipu nu ŋ.
6 Ígwu aflɛyi a wɛ aku ācɛ nēé fu kéē gā ɔkpanco gāá cɔcɛ mla Ujisɔsi a. Iye ku uwa yɔ ipu ɔkpá ku oyeeyi a babanya a? Ii. Ŋma ɛlā nɛ Upɔlu ka lɛ ācɛ nōo “yúklɔ́ mla [ɔ] lɔɔlɔhi” ipu Ufilipayi a, iye ku ācɛ nēé lɛ anɔ tu uwa ɛyi, nēé higwu kéē gāá lé ɔcɛ̄ mla Ujisɔsi a, yɔ ipu ɔkpá ku oyeeyi a babanya. (Jé Ācɛ Ufílipāyi 4:3) Amáŋ o ya ku iye ku uwa kóō gɔbu yɔ ipu ɔkpá ɔɔma, é cika ō hayi kpaakpa jaa gā ajaajɛ. Cɛɛ eko nēé lɛ ō fukɔ amoomɛ ku uwa miyɛ, é gēé ta iye ku uwa mla ɔdā ō ta ɔkpá nɛ ɔdā duuma i gáā nya iye ku uwa ŋma ɔkpá a gla ŋ. Ɛnyā géē ya gbɔbu ɛɛ kéē kwū amāŋ gbɔbu ɛɛ ku eko ku owe nɛhi a kóō gbɔɔ.—Mafú 7:3.
7. Ɔdi ta alɔ eyī peee ŋma ɔkpá ku Ɔdā Nēé Mafú Lɛ Ujɔ́ni 7:16, 17, lɛyikwu eko néē géē ta iye ku ɛwa nɛhi ku aala ɔhá a tu ipu ɔkpá ku oyeeyi a piyoo a?
7 Ígwu ɔmpa a wɛ aku ɛwa nɛhi ku ācɛ nēé hi ku aala ɔhá a. Iye ku uwa yɔ ipu ɔkpá ku oyeeyi a babanya a? Ii. Ɔdaŋ ka é le wi ŋma ɛfu ku Amagɛdɔn, iye ku uwa géē yɔ ipu ɔkpá ku oyeeyi a kpɔ? Ii. (Mafú 7:14) Ujisɔsi ka ígwu ku ācɛ nōo yɔ nyā nōo lɛbɛɛka aala a géē “nyɔ̄ í yēeyī piyóó.” (Umát. 25:46) Amáŋ ācɛ nōo gāá wi ŋma ɛfú ku Amagɛdɔn nyā i gāá miyɛ oyeeyi opiyoo boobu ŋ. Iye ku uwa géē yɔ ipu ɔkpá ku oyeeyi a klla lɛbɛɛka é bi upɛnsu le ta ɔ a. Ɛpleeko ku Ihayi Ula Ɛpa Ce Ofigwo ku Ɔcɛ́ Ō Ce ku Ujisɔsi a, ó “géē . . . leyīkwu uwá bɛ̄ɛka ɛ́gɛ́nɛ̄ ɔ̄cogbāálá gē yá aálá ā. Ó kē í gbō uwā ga njɔɔlɔ kú éŋkpɔ̄ nōo gē je oyēeyī” a. Ācɛ nōo lɛyitaajɛ lɛ ɔwɛ nɛ Ukraist mafu a, nēé klla hɛpɔhi lɛ uwa ka é hayi kpaakpa lɛ Ujehofa a, é géē ta iye ku uwa ipu ɔkpá ku oyeeyi a piyoo.—Jé Ɔdā Nēé Mafú Lɛ Ujɔ́ni 7:16, 17.
8. Anyɛ néē ta iye ku uwa ipu ɔkpá ku oyeeyi a ŋ ma, ɔdi kē gāá ya da uwa a?
8 Ígwu ɔmɛta a wɛ aɛwu, néē géē je cataajɛ ipu ɛfú ku Amagɛdɔn. Iye ku uwa i yɔ ipu ɔkpá ku oyeeyi a ŋ. Ujisɔsi ka ka é “géē [lɛ ocataajɛ] piyóó.” (Umát. 25:46) Ɔwɔico bi alelekwu ihɔ ku nu le ya ku Upɔlu kóō le da alɔ, ka “é géē kpó ācɛ ɛ́gɔ́ɔmā yíífi piyóó.” (2 Utes. 1:9; 2 Upít. 2:9) Ɔwɛ ekponu ɔɔma, ācɛ nōo humayi kweyigedee ya Alelekwu Ihɔ ku Ɔwɔico ɔtu nobi oŋma lɛ íne nēé yɔ i biya a i gāá lā oyeeyi opiyoo ŋ, ikɔkɔ ɔɔma, é géē má ocataajɛ ogboogboo ɛcɛ. Ó teyi peee ka oheyi ŋma ɔlekwu i yɔ lɛ uwa ŋ. (Umát. 12:32; Umák. 3:28, 29; Uhíb. 6:4-6) Babanya, alɔ leyi yɛ ígwu ɛpa ku ācɛ nēé géē he uwa eyi ŋma ɔlekwu wa ipu ɛcɛ a.
ĀCƐ NƐ OHEYI ŊMA ƆLEKWU YƆ LƐ UWA A
9. Ɛgɛ néē ma ɔ fu ipu ɔkpá ku Úklɔ́ Kú Ācotɛhɔ 24:15 a, ígwu ɛpa ku ācɛ nyá néē gáā heyi ŋma ɔlekwu ipu ɛcɛ nyā a, ɛgɛnyá nɛ ígwu ɛpa nyā kē wɛ ɛyɛɛyi gwo iyi uwa ta a?
9 Ubáyíbu kɛla lɛyikwu ígwu ɛpa ku ācɛ néē géē heyi ŋma ɔlekwu, nōo géē lɛ ɛga ō lā oyeeyi opiyoo ipu ɛcɛ nyā, uwa kē wɛ “ācɛ oyólɔhi” mla ācɛ o “yá ɔdōbɔ̄bí” a. (Jé Úklɔ́ Kú Ācotɛhɔ 24:15.) “Ācɛ oyólɔhi” a wɛ ācɛ nōo gba Ujehofa ɛ̄gbā kpaakpa ɛpleeko néē yeeyi a. Abɔ ɔhá ku nu, ācɛ o “yá ɔdōbɔ̄bí” a i gba Ujehofa ɛ̄gbā kpaakpa ŋ. Ku ɛlā ɔkwɛyi a ba, ipu āhɔ̄ alɛwa uce ō ya ku uwa i kpaakpa ŋ. Ohigbu kē lɛ ígwu ɛpa nyā heyi ŋma ɔlekwu a, alɔ géē lɔfu ka ku iye ku uwa yɔ ipu ɔkpá ku oyeeyi a nɛɛ? O ya ɛɛ ku alɔ cila ɔka ɔɔma, alɔ kɛla lɛyikwu ígwu ɛpa a eyeeye.
10. Ɔdiya néē géē he “ācɛ oyólɔhi” a eyi ŋma ɔlekwu a, ɛnɛɛnɛ ɛga nyá nɛ ōhī ku uwa kē gáā jɔɔnyɛ nu a? (Má ikpɛyi ɛlā nōo yɔ ipu “Aɔka Nɛ Ācɛ O Jé Ɔkpá Ku Alɔ Gē Da” lɛyikwu oheyi ŋma ɔlekwu wa ipu ɛcɛ nyā a.)
10 “Ācɛ oyólɔhi” a wɛ ígwu ɔmɛ ɛnɛ a. Gbɔbu ɛɛ kéē kwū a, é lɛ iye ku uwa ta ipu ɔkpá ku oyeeyi a. É kwu iye ku uwa i nya ŋma ipu ɔkpá ɔɔma eko néē gekwu a nɛɛ? Ehee, ohigbu kē “yēeyī” tu Ujehofa kpɔ. Ujehofa “wɛ Ɔwɔicō kú ācɛ nēe yēeyī, ó wɛ ákú ācɛ nēe gekwú ā ŋ́, ohígbū ka ɛjɛ̄ɛ̄jī uwā yēeyī tū ɔ̄ɔ̄.” (Ulúk. 20:38) Ɛyi ɛnyā wɛ ka ɔdaŋ kē lɛ ācɛ nōo hayi kpaakpa a heyi ŋma ɔlekwu wa ipu ɛcɛ nyā, é géē ta iye ku uwa ipu ɔkpá ku oyeeyi a, amáŋ, é géē ta ɔ taajɛ kóō yɔ piyoo ŋ. (Ulúk. 14:14) Ó lɛ aafu ŋ, ōhī ku ācɛ néē gáā heyi ŋma ɔlekwu nyā, géē lɛ ɛnɛɛnɛ ɛga ō wɛ “ayí nɔ̄nyīlɔ [ku ɔcɛ́ nōo] kē í gbō odúúdú ɛcɛ.”—Aíjē 45:16.
11. Ɔdi nɛ ācɛ ō “yá ɔdōbɔ̄bí” a cɛgbá ō nwu gbɔbu ɛɛ kéē lɔfu ta iye ku uwa taajɛ ipu ɔkpá ku oyeeyi a?
11 Amoomɛ, leyi yɛ ígwu ɔmɛ ɛhɔ nōo wɛ ācɛ ō “yá ɔdōbɔ̄bí” a. Á jé ŋ, ohigbu kē jé íne ku Ujehofa ŋ ma, é lā oyeeyi okpaakpa gbɔbu ɛɛ kéē kwū ŋ. Ohigbu ɛnyā, é ta iye ku uwa taajɛ ipu ɔkpá ku oyeeyi a ŋ. Amáŋ Ɔwɔico géē he uwa eyi ŋma ɔlekwu, o ya ɛɛ kóō jɛga lɛ uwa kéē lɛ iye ku uwa ta taajɛ ipu ɔkpá ɔɔma. Ācɛ ō “yá ɔdōbɔ̄bí” nyā géē cɛgbá otabɔ nɛhi. Gbɔbu ɛɛ kéē kwū a, ōhī ku uwa ya aɔdobɔbi nɛhi. Ohigbu ɛnyā, é géē cɛgbá kéē nwu uwa ɛgɛ néē géē lā oyeeyi ɔwɛ nɛ Ujehofa dɔka a. O ya ɛɛ kéē nwu uwa ɛgɛ néē géē ya ɔɔma a, Ɔwɔico géē bi Ajɔɔcɛ ku nu, le mafu ɔwɛ néē géē yuklɔ nɛhi ō bi le nwu ācɛ ɛlā, ɔwɛ néē ya jejee ipu ɛcɛ nyā ɛ ŋ ma.
12. (a) Anyɛ gáā nwu ācɛ ō ya ɔdobɔbi a ɛlā a? (b) Ɔdi gáā ya da oduuma ku uwa nōo ta ō bi ɛlā néē nwu a le yuklɔ a?
12 Anyɛ gáā nwu ācɛ ō ya ɔdobɔbi a ɛlā a? Ɛwa nɛhi a mla ācɛ ō ya ɔdā olɔhi nēé géē je heyi ŋma ɔlekwu a nɛɛ. O ya ɛɛ kéē lɛ iye ku ācɛ ō ya ɔdobɔbi a ta taajɛ ipu ɔkpá ku oyeeyi a, é géē cɛgbá ō lɛ ɛma olɔhi mla Ujehofa klla lɛ iyi uwa gwɛɛya lɛ ɔ. Ujisɔsi Ukraist mla ācɛ néē lɛ anɔ tu uwa ɛyi a, géē leyi kwu ācɛ ō ya ɔdobɔbi a lɔɔlɔhi ŋma ɔkpanco, o ya ɛɛ kéē má ɛgɛ néē gē ya mla ɛlā néē nwu uwa a. (Mafú 20:4) Oduuma ku uwa nōo ta ō lɛyitaajɛ lɛ otabɔ néē gáā je lɛ uwa ɔɔma, i gáā lɛ ɛga ō lā oyeeyi opiyoo ŋ, ɔdaŋ néē kóō wɛ ihayi ofu ɛhɔ (100). (Ayis. 65:20) Ujehofa mla Ujisɔsi lɔfu jé ipu ku alɔ, é kē gáā jɛga lɛ ɔcɛ duuma kóō ya ɔdobɔbi ipu ɛcɛ ɛyipɛ a ŋ.—Ayis. 11:9; 60:18; 65:25; Ujɔ́n. 2:25.
OHEYI ŊMA ƆLEKWU GĀ OYEEYI MLA OHEYI ŊMA ƆLEKWU KÉĒ ŊMO ƐPƆBI
13-14. (a) Ɛgɛnyá nɛ alɔ jɛyi ɛlā ku Ujisɔsi nōo yɔ ipu ɔkpá ku Ujɔ́ni 5:29 gbɔbu lɛ obabanya a? (b) Ɛlā ō cɛgbá nyá nɛ alɔ cika ō leyi bi ɔ ŋma ipu ɛlā ku Ujisɔsi ɔɔma a?
13 Ujisɔsi klla kɛla lɛyikwu ācɛ nēé géē he uwa eyī wa ipu ɛcɛ nyā a. Ocabɔ mafu, ó kahinii: “Eko géē wā, eko nɛ̄ ācɛ dóódu nēe bá únóji ā géē pó ɔkɔ kú nū. É kē géē pɛ́ wɛ̄ɛcɛ ŋmá únóji kú uwā. Ācɛ nēe yá ɔdā olɔhi ā géē héyī ŋmá ɔlékwū cɛ́ɛ́ kéē yēeyī. Ācɛ nēe kē yá ɔdōbɔ̄bí ā géē héyī ŋmá ɔlékwū kéē ŋmó uwā ɛpɔ̄bí.” (Ujɔ́n. 5:28, 29) Ɔdi wɛ ɛyi ɛlā ku Ujisɔsi nyā a?
14 Gbɔbu lɛ obabanya, alɔ jɛyi ɛlā ku Ujisɔsi ka ó yɔ i kɛla lɛyikwu aɔdā nɛ ācɛ nēé heyi ŋma ɔlekwu a géē ya, igbihi nēé lɛ uwa heyi ŋma ɔlekwu a. Ɔɔma wɛ kahinii, alɔ jɛyi nu gbɔbu ku ācɛ ōhī géē ya ɔdobɔbi ɔdaŋ ka é lɛ uwa heyi ŋma ɔlekwu, ka ācɛ ɔhá kē i ya ɔdā olɔhi. Amáŋ, leyi bi ɔ ka Ujisɔsi i yɔ i ka ipu ɛga ku Ubáyíbu ɔɔma, ka ācɛ nēé géē he uwa eyi ŋma ɔlekwu a géē ya ɔdā olɔhi amāŋ géē ya ɔdobɔbi ŋ. Amáŋ ó bi ɛlā nōo mafu ɔdā nɛ ɔcɛ le ya wa gáā yɛ ɛ ma le yuklɔ. Ó ka ācɛ “nēe yá ɔdā olɔhi ā” mɛmla ācɛ “nēe kē yá ɔdōbɔ̄bí ā.” Ɛnyā mafu ka é ya aɔdā nōo ba nyā gbɔbu ɛɛ nēé kwū á. Ɛlá ō gbo nyā lɛyi. Ɔdiya nɛ alɔ ka lɛ a? Ohigbu ka Ujehofa i kóō gáā jɛga lɛ ɔcɛ duuma kóō ya ɔdobɔbi ipu ɛcɛ ɛyipɛ a ŋ. Ó lɛ a, ó teyi peee ka ācɛ nōo ya ɔdobɔbi a, ya aɔdobɔbi ɔɔma gbɔbu ɛɛ nēé kwū a. Ó lɛ a, ɔdi wɛ ɛyi ɛlā ku Ujisɔsi eko nɛ ó ka é géē je ācɛ “héyī ŋmá ɔlékwū cɛ́ɛ́ kéē yēeyī,” mla ō “héyī ŋmá ɔlékwū kéē ŋmó uwā ɛpɔ̄bí” a?
15. Anyɛ gáā “héyī ŋmá ɔlékwū cɛ́ɛ́ kéē yēeyī” a, ɔdi kē ya a?
15 Ācɛ néē ya ɔdā olɔhi gbɔbu ɛɛ kéē kwū a, géē “héyī ŋmá ɔlékwū cɛ́ɛ́ kéē yēeyī,” ohigbu ka iye ku uwa yɔ ipu ɔkpá ku oyeeyi a gbɔbu ɛ. Ɛnyā mafu ka oheyi ŋma ɔlekwu ku ācɛ “nēe yá ɔdā olɔhi,” nɛ ɔkpá ku Ujɔ́ni 5:29 kɛla lɛyikwu ɔ a, wɛ ekponu mla oheyi ŋma ɔlekwu ka “ācɛ oyólɔhi,” nɛ ɔkpá ku Úklɔ́ kú Ācotɛ̄hɔ̄ 24:15 kɛla lɛyikwu ɔ a. Ɛlā nɛ alɔ ka nyā cɛtɔha mla ɛlā nɛ Ubáyíbu ka ipu ɔkpá ka Ācɛ Uróm 6:7 nōo kahinii: “Ohígbū ka ɔ̄cɛ nōo gekwú ɛɛ́ mā le ŋmúla ŋmá ɔfú kú ínoōbīya.” Ó lɛ a, ɔdaŋ ka ācɛ ō ya ɔdā olɔhi nyā gekwu, Ujehofa géē je íne ō biya ku uwa ya uwa ɛhi. Amáŋ ó gáā je aɔdā olɔhi néē ya eko néē yeeyi a mlanyi ŋ. (Uhíb. 6:10) Amáŋ, ācɛ ō ya ɔdā olɔhi nyā nɛ Ɔwɔico géē je heyi ŋma ɔlekwu a, cika ō gɔbu yɔ i gba Ujehofa ɛ̄gbā kpaakpa, o ya ɛɛ ku iye ku uwa kóō yɔ ipu ɔkpá ku oyeeyi a gɔbu.
16. Ɔdi wɛ ɛyi ku ō “héyī ŋmá ɔlékwū kéē ŋmó uwā ɛpɔ̄bí” a?
16 Ācɛ nōo kē ya ɔdobɔbi gbɔbu ɛɛ kéē kwū a bɛ? Naana nɛ Ujehofa kwu íne ō biya ku uwa i ya uwa ɛhi ɛ eko néē kwū ɛ ma, é gba Ujehofa ɛ̄gbā kpaakpa eko néē yeeyi a ŋ. É ta iye ku uwa taajɛ ipu ɔkpá ku oyeeyi a ŋ. Ó lɛ a, oheyi ŋma ɔlekwu ku ācɛ “nēe kē yá ɔdōbɔ̄bí ā” wɛ ekponu mla oheyi ŋma ɔlekwu ka “ācɛ o yá ɔdōbɔ̄bí” nɛ ɔkpá ku Úklɔ́ kú Ācotɛ̄hɔ̄ 24:15 kɛla lɛyikwu ɔ a. Uwa a nɛ Ubáyíbu ka ka é géē “héyī ŋmá ɔlékwū kéē ŋmó uwā ɛpɔ̄bí” a. * Ɛnyā wɛ ka Ujisɔsi géē bēē jila aɔdā nɛ ācɛ nōo ba nyā géē yɔ i ya a ma. (Ulúk. 22:30) Eko géē dēē nyɔ yɛɛ gbɔbu ɛɛ ku Ujisɔsi kóō wa i jé ɔkwɔɔkwɛyi, ɔdaŋ ka ācɛ nōo ba nyā cika jɛ ku Ɔwɔico kóō ta iye ku uwa taajɛ ipu ɔkpá ku oyeeyi a. Ɔdaŋ ku ācɛ néē ya ɔdobɔbi nyā kwu piyabɔ ŋma ɔwɛ néē gē lā oyeeyi ku uwa gbɔbu, klla cokonu ō bi oyeeyi ku uwa le gba Ujehofa ɛ̄gbā, Ujehofa géē cɛ ō ta iye ku uwa taajɛ ipu ɔkpá ku oyeeyi a.
17-18. Ɔdi nɛ ɛjɛɛji ācɛ néē gáā je heyi ŋma ɔlekwu wa ipu ɛcɛ nyā a gáā cɛgbá ō ya a, ɔdi kē wɛ “ɔdā nēé . . . yá” nɛ ɔkpá ku Ɔdā Nēé Mafú Lɛ Ujɔ́ni 20:12, 13 yɔ i kɛla lɛyikwu ɔ a?
17 Ɛpleeko ku ihayi ula ɛpa ce ofu igwo a, ācɛ néē je heyi ŋma ɔlekwu a, kwu ācɛ ō ya ɔdā olɔhi mla ācɛ ō ya ɔdobɔbi gbɔbu a, géē cɛgbá ō lɛyitaajɛ lɛ íne nōo yɔ ipu ɔkpá ɛpɛpɛ néē géē nwula a. Ɔyikpo Upɔlu ka ɔdā nɛ ó má ipu ɛbɛ a kahinii: “N ma ācɛ nēe kwú ā, kwu ācɛnɛ̄hi mɛ́mla ācɛ nɛ̄ŋ́cɛ́, māháyi iyɔ̄bū akpa kú ɔcɛ́ ā. É lɛ aɔ́kpá ā nwūla. É klla lɛ ɔkpá ɔhá, nōo wɛ ɔkpá nɛ̄ iyē kú ācɛ oyēeyī ā bá ipú nū ā, nwūla. É lɛ ɛpɔ̄ ka tū ācɛ nēe gekwú ā oŋmá lɛ ɔdā nēé . . . yá ā, ɛ́gɛ́nɛ̄ é tá ɔ̄ tāajɛ ipú aɔ́kpá ā lɛ ā ā.”—Mafú 20:12, 13.
18 Ɔdi wɛ ɔdā nɛ ācɛ nēé géē heyi ŋma ɔlekwu a “yá,” néē géē bi le kɛpɔ tu uwa a? Ó géē wɛ ɔdā néē ya gbɔbu ɛɛ kéē kwū a nɛɛ? Ehee! Bla, ka eko néē kwū a, é le ŋmula ŋmá ɔfu ku íne ō biya. Ó lɛ a, “ɔdā nēé . . . yá” nɛ amanya yɔ i kɛla lɛyikwu ɔ a, i wɛ ɛdɔ oyeeyi néē tɛtɛ lā gbɔbu ɛɛ néē kwū a ŋ. Ikɔkɔ ɔɔma, ó yɔ i kɛla lɛyikwu ɛdɔ oyeeyi néē géē lā, oŋma lɛ ɛlā néē nwu uwa ipu ɛcɛ ɛyipɛ a. Ācɛnyilɔ nōo hayi kpaakpa bɛɛka Unowa, Usamuwɛlu, Udefidi, mla Udaniyɛlu a, géē cɛgbá ō nwu ɛlā lɛyikwu Ujisɔsi Ukraist klla kpɔtuce ɛya nɛ ó gwo a. Ɔdaŋ ka acɛnyilɔ nyā géē lɛ ɔdā alɛwa ō nwu, ayika ācɛ nōó jé Ɔwɔico gbɔbu ŋ ma géē lɛ ɔdā alɛwa ō nwu fiyɛ!
19. Ɔdi gáā ya da ācɛ nōo ta ō miyɛ ɛnɛɛnɛ ɛga nyā a?
19 Ɔdi gáā ya da ācɛ nōo ta ō miyɛ ɛnɛɛnɛ ɛga nyā a? Ɔdā Nēé Mafú Lɛ Ujɔ́ni 20:15 da alɔ kahinii: “Ɔ̄cɛ dúúmā nēe tá iyē kú nū tū ɔkpá kú ācɛ nēe yēeyī ā ŋ́, é kwú ɔ̄ ú tá ga ipú ókpoó kú ɔlá.” Ku ɛlā ɔkwɛyi a ba, é géē je uwa yiifi piyoo. Ohigbu ɔɔma, ó cɛgbá ku alɔ ya uce ɔwɛ nōo géē ya ku é lɛ iye ku alɔ ta ipu ɔkpá ku oyeeyi a, ka ó klla yɔ ipu ɔkpá a gɔbu!
Ɔyinɛ alɔ nɔnyilɔ éyi yɔ i yuklɔ ipu ōmiya ku ɔkpá nɛhi ō nwu nōo gáā ya oŋmɛyi ku ihayi ula ɛpa ce ofu igwo nɛ Ujisɔsi Gáā Lé Ɔcɛ́ a (Má ogwotu ɔmɛ 20)
20. Ɛnɛɛnɛ uklɔ nyá néē gáā ya Ɛpla Ihayi Ula Ɛpa Ce Ofu Igwo a? (Má ifoto nōo yɔ iyɔbu ku Ɔda Ō Gbaajɛ nyā a.)
20 Ɛpla Ihayi Ula Ɛpa Ce Ofu Igwo nɛ Ujisɔsi gáā lé Ɔcɛ́ a géē wɛ eko ku eeye nɛhi! Eko ɔɔma klla géē wɛ eko ku ɔkpá ō nwu nɛhi lɛ ācɛ ɔlɛ Ɔwɔico, nɛ ɛdɔ ku nu i ya jejee ipu ɛcɛ amanya ɛ ŋ ma. Ó klla géē wɛ eko néē géē leyi ya uce ō ya ku ācɛ nōo ya ɔdā olɔhi mɛmla ācɛ nōo ya ɔdobɔbi a. (Ayis. 26:9; Ācot. 17:31) Ɛgɛnyá néē gáā bi le yuklɔ ku ɛlā ō nwu ācɛ nyā a? Ikpɛyi ɛlā nōo gboce ɛnyā a géē ta alɔ abɔ jɛyi nu klla mafu ɛgɛ nɛ ɛnɛɛnɛ ōmiya nyā cika ō jɛ alɔ eyī lɛ a.
IJÉ ƆMƐ 147 Life Everlasting Is Promised
^ Ikpɛyi ɛlā nyā géē mafu ɔwɛ ɛpɛpɛ nɛ alɔ je ɛyi ɛlā ku Ujisɔsi ipu ɔkpá ku Ujɔ́ni 5:28, 29, lɛyikwu ācɛ nōo géē “héyī ŋmá ɔlékwū cɛ́ɛ́ kéē yēeyī” mla ācɛ nōo géē “héyī ŋmá ɔlékwū kéē ŋmó uwā ɛpɔ̄bí” a. Alɔ géē má ɔdā nɛ oheyi ŋma ɔlekwu ɛplɛɛpa nyā wɛ a mla ācɛ nōo wɛ ipu eyeeye ku uwa a.
^ Ō ta ku ɔkpá nyā gbɔɔ ŋma “ohútu kú ɛcɛ ā,” ɛyi ku ɔɔma kē wɛ ō gbɔɔ ku alɛɛcɛ nōo lɛ ɛga ō lɛ itene ŋma ikwū ku Ujisɔsi. (Umát. 25:34; Mafú 17:8) Ó teyi peee ka Ebɛlu nōo wɛ ɔcɛ ō hayi kpaakpa a, gáā wɛ ɔcɛ aflɛyi nēé ta iye ku nu ta ipu ɔkpá ku oyeeyi a.
^ Gbɔbu a, alɔ ka ku ɛlā nōo ka u “ŋmó uwā ɛpɔ̄bí” néē ka amanya, wɛ ō ŋmo ɔcɛ ɛpɔbi ɔwɛ nōo lɔhi ŋ. Aku ɔkwɛyi a, ɛlā nōo ku “ŋmó . . . ɛpɔ̄bí” a lɔfu lɛyi ɔɔma duu. Amáŋ ipu ɛga ku Ubáyíbu nyā, ó lɛbɛɛka ō “ŋmó . . . ɛpɔ̄bí” nɛ Ujisɔsi yɔ i kɛla lɛyikwu ɔ a, lɛ ō ya mla ō leyi taaajɛ ku a jila uce ō ya ku ɔcɛ ma lɔɔlɔhi, amáŋ, ɛgɛ nɛ udisɔnari ku Ubáyíbu ku Greek éyi ka ɔ lɛ a, ó ka ō wɛ ō “jila ɛgɛ nɛ ɔcɛ gē ya uce lɛ a ma lɔɔlɔhi.”
