Leyi yɛ ɛgɛ nɛ Ubáyíbu cila ohi ku aɔka nyā a.

Úklɔ́ kú Ācotɛ̄hɔ̄ 24:15 da alɔ ka “géē je odúúdú ācɛ nēe gekwú ā, kwu ācɛ oyólɔhi mɛ́mla ācɛ o yá ɔdōbɔ̄bí, héyī ŋmá ɔlékwū.” Ācɛ ō ya ɔdā olɔhi a wɛ ācɛ nōo lɛyitaajɛ lɛ Ɔwɔico gbɔbu ɛɛ kéē kwū a, ohigbu ɛnyā, é lɛ iye ku uwa ta tu ipu ɔkpá ku oyeeyi a. (Umál. 3:16) Ācɛ ō ya ɔdobɔbi a wɛ ācɛ nōó lɛ ɛga ō nwu ɛlā lɛyikwu Ujehofa gbɔbu ɛɛ kéē kwū ŋ ma, ohigbu ɛnyā é ta iye ku uwa ipu ɔkpá ku oyeeyi a ŋ.

Ujɔ́ni 5:28, 29 klla kɛla lɛyikwu ígwu ɛpa nɛ ɔkpá ku Úklɔ́ kú Ācotɛ̄hɔ̄ 24:15 kɛla lɛyikwu ɔ nyā duu. Ujisɔsi ka ka “Ācɛ nēe yá ɔdā olɔhi ā” géē “héyī ŋmá ɔlékwū cɛ́ɛ́ kéē yēeyī, ācɛ nēe kē yá ɔdōbɔ̄bí ā géē héyī ŋmá ɔlékwū kéē ŋmó uwā ɛpɔ̄bí.” Ācɛ ō ya ɔdā olɔhi a wɛ ācɛ nōo ya ɔdā okpaakpa gbɔbu ɛɛ néē kwū a. É géē hɛ uwa eyi ŋma ɔlekwu ohigbu ka iye ku uwa yɔ ipu ɔkpá ku oyeeyi a. Amáŋ ācɛ ō ya ɔdobɔbi a, i ya ɔdā okpaakpa gbɔbu ɛɛ kéē kwū ŋ. Ohigbu ɔɔma, é géē hɛ uwa eyi ŋma ɔlekwu cɛɛ kéē ŋma uwa ɛpɔbi. Abɔ iye ku uwa i yɔ ipu ɔkpá ku oyeeyi ɛɛ ŋ ma, eko géē wa néē géē kɛpɔ ta uwa amāŋ ja uwa ma. Ɛpleeko ɔɔma, é géē lɛ ɛnɛɛnɛ ɛga ō nwu ɛlā lɛyikwu Ujehofa, cɛɛ, é géē lɛ iye ku uwa ta taajɛ ipu ɔkpá ku oyeeyi a.

Ɔdā Nēé Mafú Lɛ Ujɔ́ni 20:12, 13 lɛ ɔ teyi peee, ka ɛjɛɛji ācɛ néē géē je heyi ŋma ɔlekwu a, géē cɛgbá ō lɛyitaajɛ lɛ aíne ɛpɛpɛ nɛ Ujehofa géē le kwaajɛ ipu ɛcɛ ɛyipɛ a, “ɛ́gɛ́nɛ̄ é tá ɔ̄ tāajɛ ipú aɔ́kpá ā lɛ ā.” Ujehofa géē je ɛjɛɛji ācɛ nōo ta ō lɛyitaajɛ a yiifi.—Ayis. 65:20.

Udánīyɛ̄lu 12:2 da alɔ ka ācɛ ōhī nōo kwū néē géē heyi ŋma ɔlekwu a, “géē nyɔ̄ í yēeyī piyóó, ācɛ ɔhá ā géē nyɔ̄ ipú ōwē mɛ́mla uwēyī piyóó.” Ɛga ku Ubáyíbu nyā yɔ i kɛla lɛyikwu ɛpɔ amoomɛ néē géē ka tu ācɛ néē je heyi ŋma ɔlekwu a. É géē “yēeyī piyóó” amāŋ gā ipu “uwēyī piyóó.” Ɛnyā mafu ka oŋmɛyi ku ihayi ula ɛpa ce ofu igwo a, ācɛ ōhī géē lɛ oyeeyi opiyoo, Ɔwɔico kē i je ācɛ ɔhá a yiifi piyoo.—Mafú. 20:15; 21:3, 4.

Leyi yɛ ocabɔ mafu nyā. Āhɔ̄ ku ígwu ɛpa néē gáā je heyi ŋma ɔlekwu nyā lɛbɛɛka ācɛ nōo dɔka ō nyɔ gáā lā ipu éwo ɔhá a. Ācɛ ō ya ɔdā olɔhi a, lɛbɛɛka ācɛ nōo miyɛ ɔkpá nōo géē jɛga lɛ uwa ō yuklɔ amāŋ lā ipu éwo ɔhá ɔɔma néē yɔ i nyɔ a. Ɔkpá nēé miyɛ ɔɔma géē ya kēé lɛ íkwu ō ya aɔdā ōhī, ku ācɛ kēé klla jé ka é lɛ íkwu ō yuklɔ klla lā ipu éwo ɔɔma. Abɔ ɔhá ku nu, ācɛ ō ya ɔdobɔbi a, lɛbɛɛka ācɛ nōo yɔ i nyɔ gáā lā ipu éwo ɔhá, amáŋ, ɔkpá néē je lɛ uwa a, wɛ aku ugbɔga amāŋ ɛ̄nɛ̄ é géē yɔ abɔɔ eko kpii ofoofunu. Ācɛ ɛgɔɔma cɛgbá ō ya ɔdā nōo géē mafu ka é wɛ ācɛ olɔhi, gbɔbu ɛɛ ku igɔmɛnti ku abɔɔ kóō jɛga lɛ uwa kēé gɔbu lā ipu éwo a. Ɔwɛ ekponu ɔɔma, ācɛ ō ya ɔdobɔbi néē géē je heyi ŋma ɔlekwu a, géē cɛgbá ō lɛyitaajɛ lɛ íne ku Ujehofa klla mafu ka é wɛ ācɛ ō ya okpaakpa, gbɔbu ɛɛ ku Ujehofa kóō jɛga lɛ uwa ō lā ipu Uparadais. Ɛdɔ ɔkpá duuma nɛ ācɛ a miyɛ eko néē gā ipu éwo ɛpɛpɛ a naana, abɔ eko yɔ i nyɔ a, igɔmɛnti ku abɔɔ géē jɛga lɛ ācɛ ōhī kéē kwu piya ayi ajɛ, é kē lɔfu cɛ lɛ ācɛ ɔhá a yɔ ajɛ ɔlɛ uwa gɛ ŋ. Uce ō ya ku uwa mla ɛgɛ néē gē lā oyeeyi a, gáā ya ku igɔmɛnti ku abɔɔ kōó lɛ uwa piya ayi ajɛ amāŋ nu uwa cigbihi gā ɛga nēé ŋma a. Ɔwɛ ekponu ɔɔma, ɛpɔ amoomɛ néē gáā ka tu ācɛ néē je heyi ŋma ɔlekwu a, géē lɛ ō ya mla ɛgɛ nēé hayi kpaakpa klla lā oyeeyi ku uwa lɛ ipu ɛcɛ ɛyipɛ a.

Ujehofa i wɛ Ɔwɔico ku ihɔtu ofoofunu nóó, amáŋ ó klla wɛ Ɔwɔico nōo gē kɛpɔ okpaakpa. (Obla. 32:4; Aíjē 33:5) Ó géē mafu ihɔtu ku nu, oŋma lɛ ō je ācɛ ō ya ɔdā olɔhi mɛmla ācɛ ō ya ɔdobɔbi a heyi ŋma ɔlekwu. Amáŋ, ó géē cɛgbá ɛjɛɛji uwa kēé lɛyitaajɛ lɛ ɔ klla lā oyeeyi ɔwɛ nɛ ó dɔka a. Ācɛ nōo wa gáā yihɔtu nu klla lā oyeeyi ku uwa ɔwɛ nɛ ó dɔka a, nɛ ó gáā jɛga lɛ uwa kéē lā oyeeyi opiyoo ipu ɛcɛ ɛyipɛ a.