Ɔdā Nōo Lɔfu Ta Uwɔ Abɔ Ku A Bēē Ya Oklɔcɛ Ku Ubáyíbu Alaadi Doodu A
Ó GĒ lɔnɔ tu uwɔ ō ya oklɔcɛ ku Ubáyíbu alaadi doodu? Ó lɔfu ya ɛjɛɛji alɔ lɛ ekoohi. Amáŋ gbɛla lɛyikwu aɔdā ɔhá nɛ alɔ gē ya ojigogo bɛɛka iyē ō gwa a. Iyē ō gwa cɛgbá eko mla ō ceyitikwu ku alɔ, amáŋ eko duuma nɛ alɔ lɛ iyē gwa, iyē ge gbo alɔ nɛɛ! Alɔ lɔfu lɛ Ubáyíbu ō klɔcɛ gbla iyē ō gwa nōo gē cɛ lɛ ɔcɛ lɛ ɔfu iyē “igbīhi nōó bī éŋkpɔ̄ lɛ ɔ́ yá yēŋēē ā.” (Āfi. 5:26) Leyi yɛ aɔdā ōhī nōo lɔfu tabɔ a:
Le eko okpɔcii nɛ a géē bi le ya oklɔcɛ a miya taajɛ. Alɔ jé ka oklɔcɛ ku abɔyi alɔ wɛ ipu “ɔdā nōo lɔhi [amāŋ cɛgbá] fíyɛ́ dúú” nɛ alɔ cɛgbá ō ya a. (Ufíl. 1:10) O ya ɛɛ kóō ta uwɔ abɔ ku a hii je eko ku oklɔcɛ ku uwɔ a mlanyi ŋ, lɛ eko mla ɛ̄cī a ta taajɛ ipu ɔkpá cɛɛ ku a kwu ɔ i ta ɛga nɛ a géē má ɔ fiyaa. Amāŋ a lɔfu lɛ ōmiya ku ɔdā nōo géē yɔ i ta uwɔ ɛlá kwu ɔ ya ipu ɔdā ō le gwu uwaya ku uwɔ eko kpii gbɔbu lɛ eko ku oklɔcɛ a.
Ɛgɛnyá nōó géē he uwɔ ɔtu ō klɔcɛ a? Ocabɔ mafu, ó géē tɔɔtɛ gā uwɔ fiyɛ ō lɛ ɔtu ku uwɔ kwu oklɔcɛ a ɔdaŋ ku a klɔcɛ ipu awa éyi? Kɛɛ ka ó géē he uwɔ ɔtu ō bi eko kpii le ya ɔ amáŋ nɛ a géē yɔ i ya ɔ igbalɛwa? A jé ɔdā nōo géē lɔhi gā uwɔ fiyɛ duu a. Ohigbu ɛnyā, bi ɛnyā ipu ɔtu eko duuma nɛ a gáā miya eko nɛ a géē bi le klɔcɛ a. Ɔdaŋ ka ɔtu ya uwɔ ku á dɔka ō klɔcɛ eko nɛ a miya a ŋ, a lɔfu ceyitikwu ku a klɔcɛ ipu uminiti igwo foofunu. Ɔdaŋ nɛ a kóō klɔcɛ ipu uminiti igwo foofunu, a lɔfu nwu aɛlā alɛwa. Boobu nɛ a kē gbɔɔ, ó géē lɛ abɔ kwu uwɔ ɔtu ō gɔbu.—Ufíl. 2:13.
Lɛ ōmiya ku aikpɛyi ɛlā nɛ a géē dɔka ō klɔcɛ lɛyikwu ɔ a miya taajɛ. Ɔdaŋ ku a gbeyi jaa gbeeko nɛ eko nɛ a cɛgbá ō ya oklɔcɛ a le ya gbɔbu ɛɛ ku a miya ɔdā nɛ a géē klɔcɛ a, á jé ŋ, á gáā lɔfu “bī ɛga nɛ̄ aá lɛ ā le yúklɔ́ [ɔwɛ] olɔhi” ŋ. (Āfi. 5:16) Ceyitikwu ku a lɛ ōmiya ku aikpɛyi ɛlā nɛ a géē dɔka ō klɔcɛ lɛyikwu a ya. Ocabɔ mafu, ɔdaŋ ku a lɛ ɔka lɛyikwu odee nɛ á jɛyi nu lɔɔlɔhi ŋ, lɛ ɔka ɔɔma ta taajɛ ipu ɔkpá ku uwɔ a. Igbihi nɛ a kē lɛ oklɔcɛ ku uwɔ a ya mɛ alaadi doodu, a lɔfu lɛ aɔdā ɔhá nɛ a géē dɔka ō klɔcɛ lɛyikwu ɔ a ta tu ipu ɔkpá ku uwɔ a.
Bēē ya opiyabɔ eko duuma nɛ ɔɔma cɛgbá. Ɔdā nōo cɛgbá fiyɛ duu a wɛ ku a gē klɔcɛ alaadi doodu. O ya ɛɛ ku ɔɔma kóō tɔɔtɛ, ɔdaŋ ka ó cɛgbá, bēē ya opiyabɔ lɛyikwu ɛ̄cī amaŋ eko, ɛgɛ nɛ a géē klɔcɛ gáā kwu lɛ, amāŋ ɔdā nɛ a dɔka ō klɔcɛ lɛyikwu ɔ a.
Ɔdaŋ ka alɔ gē klɔcɛ alaadi doodu, aɔdā olɔhi géē ya. Ɛma nɛ alɔ lɛ mla Ujehofa a géē lɔfu tōōtɔ̄ɔ̄, alɔ géē nwu ō ya ōmiya olɔhi ipu oyeeyi ku alɔ, alɔ klla géē miyɛ ɔtu ō tu kwu ɔtu.—Ujós. 1:8.
