IKPƐYI ƐLĀ Ō KLƆCƐ ƆMƐ 19
Ɛgɛnyá Nɛ Alɔ Géē Ya Ku Alɔ Kpɔtuce Okonu Ō Ce Ku Ɛcɛ Ɛyipɛ A Lɔfu Lɔfu A?
“Ɔdā dúúmā nɛ̄ [Ujehofa] le okónu ce ka anúɔ géē yá, ó géē yá ɔ̄.”—ÁLUK. 23:19.
IJÉ ƆMƐ 142 Alɔ Bi Eyiyoce Ku Alɔ Lɔfu Lɔfu
ƆDĀ NƐ ALƆ GÁĀ NWU A a
1-2. Ɔdi nɛ alɔ cɛgbá ō ya abɔ alɔ yɔ i gbeyi ɛcɛ ɛyipɛ a?
OKONU nɛ Ujehofa ce ku anuɔ géē je ɛcɛ ɛyipɛ kwɛyi ɛcɛ nɛ̄ncɛ̄ nyā wɛ ɔdā nōo jɛ alɔ eyī nɛhi. (2 Upít. 3:13) Naana nɛ alɔ i jé eko nɛ ɛcɛ ɛyipɛ a gáā wa piii ɛ ŋ ma, aɔdā nōo yɔ i ya a mafu ka alɔ i gáā gbeyi gboji ajɛ gɛ ŋ.—Umát. 24:32-34, 36; Ācot. 1:7.
2 Ɛgɛ duuma nōó gboji nɛ alɔ humayi gba Ujehofa ɛ̄gbā ɛ, alɔ cɛgbá ō ya ku ɔtu nɛ alɔ kpoce okonu ō ce ɔɔma kóō yɔ i lɔfu tōōtɔ̄ɔ̄. Ɔdiya? Ohigbu ka ɔtu okpoce nōo lɛ ɔfu a, lɔfu je gbagbafu gla. Ɔyikpo Upɔlu kóō ka, ka ɔdaŋ ka ɔcɛ i lɛ ɔtu okpoce ŋ, ó lɛbɛɛka ‘íne nēe ī gbájí tū ɔcɛ ikpó ā.’ Ɛnyā mafu ka ó wɛ íne nōo lɔfu tɔɔtɛ lɛ alɔ ō biya. (Uhíb. 12:1) O ya ɛɛ ku ɔtu okpoce ku alɔ kóō hii je gbagbafu ŋ ma, alɔ cɛgbá ō gbɛla lipu lipu eko doodu, lɛyikwu aɔdā nōo mafu ku ɛcɛ ɛyipɛ a i gboji ō wa gɛ ŋ ma.—Uhíb. 11:1.
3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
3 Ipu ikpɛyi ɛlā nyā, alɔ géē kɛla lɛyikwu ɔwɛ ɛta nɛ alɔ lɔfu ya ku ɔtu okpoce ku alɔ kóō lɔfu tōōtɔ̄ɔ̄, lɛyikwu okonu ō ce ku ɛcɛ ɛyipɛ a: (1) ō gbɛla lipu lipu lɛyikwu ikwū ku Ujisɔsi, (2) ō gbɛla lɛyikwu ɔfu ku Ujehofa, mla (3) ō ya aɔdā nōo géē pi alɔ bla Ujehofa ajaajɛ. Oŋma ɔɔma, alɔ géē má ɛgɛ nɛ ɛlā nɛ Ujehofa da Uhabakuku, lɔfu ya ku ɔtu okpoce ku alɔ kóō lɔfu tōōtɔ̄ɔ̄ icɛ a. Aflɛyi a, alɔ leyi má āhɔ̄ ōhī nɛ alɔ lɔfu yɔ ipu nu babanya, nōo géē cɛgbá ku alɔ lɛ ɔtu okpoce olɔfu, lɛyikwu okonu ō ce ku ɛcɛ ɛyipɛ a.
ĀHƆ̄ ƐYƐƐYƐYI NŌO CƐGBÁ KU ALƆ LƐ ƆTU OKPOCE NŌO LƆFU
4. Ōmiya ɛyɛɛyɛyi nyá cɛgbá ɔtu okpoce olɔfu a?
4 Ó lɛ ōmiya ōhī nɛ alɔ gē ya ɛ̄cī doodu, nōo ya nōó cɛgbá ku alɔ lɛ ɔtu okpoce olɔfu. Ocabɔ mafu, alɔ gē ya ōmiya nōo lɛ ō ya mla ācɛ nɛ alɔ gē piyatɔha mɛmla uwa, ɔdā nɛ alɔ géē bi le jɔɔnyɛ iyi alɔ, inɔkpa ō nyɔ, ɔba amāŋ ɔnyā ō lɛ, ayipɛ nɛŋcɛ mɛmla uklɔ ō ya. Ohigbu ɛnyā, alɔ cika ō da iyi alɔ aɔka nōo ba nyā: ‘Aɔdā nɛ um gē miya ō ya a, gē mafu ku um jé kpɔcii ku ɛcɛ nɛ alɔ ba anu nyā i gáā yɔ piyoo ŋ, ka ó gboji gɛ ŋ, ɛcɛ ɛyipɛ a géē wa i kwɛyi nu? Kɛɛ ka aɔdā nɛ um gē miya ō ya a, wɛ ekponu mla ɛ̄nɛ̄ ācɛ nōó kpɔtuce ka é géē lā oyeeyi opiyoo ŋ ma gē ya a nɛɛ?’ (Umát. 6:19, 20; Ulúk. 12:16-21) Alɔ géē miya ō ya ɔdā nōo lɔhi fiyɛ duu a, ɔdaŋ ku alɔ ya ku alɔ kpɔtuce lɔfu lɔfu ku ɛcɛ ɛyipɛ a i gboji ō wa gɛ ŋ.
5-6. Ɔdiya nɛ alɔ cɛgbá ɔtu okpoce olɔfu eko ku unwalu a? Je ocabɔ mafu.
5 Alɔ klla gē má ojama nōo cɛgbá ku alɔ lɛ ɔtu okpoce olɔfu. Alɔ lɔfu cɛgbá ō lɔtu ku o ya ŋmo, ōcē obɔbi, amāŋ aɔdā ɔhá nōo lɔfu ya ku abɔ kóō hɛ alɔ iyē. O gbɔɔ ŋmaajɛ a, alɔ lɔfu gbɛla ku alɔ géē lɔtu ku unwalu a gla. Amáŋ, igbalɛwa, ɛdɔ unwalu ɛgɛnyá gē yɔ gboji ajɛ. Ohigbu ɔɔma, alɔ cɛgbá ɔtu okpoce olɔfu, o ya ɛɛ ku alɔ lɔtu klla gɔbu yɔ i gba Ujehofa ɛ̄gbā mla eeye.—Uróm 12:12; 1 Upít. 1:6, 7.
6 Eko duuma nɛ alɔ yɔ ipu ojama, ó lɔfu ya alɔ bɛɛka ɛcɛ ɛyipɛ ku Ujehofa i ba ō wa ɛ ŋ ma. Ɔɔma mafu ka ɔtu okpoce ku alɔ i lɔfu gɛ ŋ nɛɛ? Ó lɔfu lɛ a ŋ. Leyi yɛ ocabɔ nyā ɛ. Eko duuma nɛ ɔnɔ gā, nɛ eŋkpɔ yɔ i ŋá bɔbi bɔbi, ó lɔfu ya alɔ bɛɛka ɔgwa i gáā wa fiya gɛ ŋ ma. Naana nɛ ó gē ya alɔ lɛ a, alɔ jé ka ɔgwa géē wa kpɔ. Ɔwɛ ekponu ɔɔma, ɔdaŋ ku abɔ le hɛ alɔ iye nɛhi, ó lɔfu ya alɔ bɛɛka ɛcɛ ɛyipɛ a i gáā wa fiya gɛ ŋ ma. Amáŋ, ɔdaŋ ka ɔtu okpoce ku alɔ lɔfu nɛhi, alɔ jé ka ó géē wa, ohigbu ka Ujehofa lɛ okonu a ce lɛ alɔ ɛ. (Aíjē 94:3, 14, 15; Uhíb. 6:17-19) Ɔdaŋ ku alɔ jé ɛnyā kpɔcii, ó géē ya ku alɔ yɔ i lɛ ɛ̄gbā ō gba ku Ujehofa ta aflɛyi ipu oyeeyi ku alɔ.
7. Ɔwɛ ō gbɛla nyá nɛ alɔ cika ō leyi kwɛɛcɛ ku nu a?
7 Alɔ klla cɛgbá ɔtu okpoce olɔfu, o ya ɛɛ ku alɔ yuklɔ ku ɔna ō ta a. Ācɛ alɛwa nɛ alɔ gē tɔɔna lɛ uwa a, gbɛla ka “ɔ̄kōolɔhi” lɛyikwu ɛcɛ ɛyipɛ ku Ɔwɔico nōo yɔ i wa a, i gáā ya jila gla ŋ. (Umát. 24:14; Isík. 33:32) Alɔ cika ō leyi kwɛɛcɛ gɛɛ, ku ɔwɛ néē gē gbɛla a kóō ya ku alɔ gbɔɔ ō lɛ aafu, lɛyikwu aɛlā nɛ Ujehofa gē nwu alɔ a ŋ. O ya ɛɛ ku alɔ cɛ lɛ ɔɔma ya ŋ ma, alɔ cɛgbá ō yɔ i ya ku ɔtu okpoce ku alɔ kóō yɔ i lɔfu. Alɔ má ɔwɛ ɛta nɛ alɔ lɔfu ya ɔɔma gla a.
GBƐLA LIPU LIPU LƐYIKWU IKWŪ KU UJISƆSI
8-9. Ɛgɛnyá nōo gbɛla lipu lipu lɛyikwu ikwū ku Ujisɔsi lɔfu ya ku ɔtu okpoce ku alɔ kóō lɔfu a?
8 Ɔwɛ éyi nɛ alɔ lɔfu ya ku ɔtu okpoce ku alɔ kóō lɔfu a, wɛ ō gbɛla lipu lipu lɛyikwu ikwū ku Ujisɔsi. Ikwū ku Ujisɔsi wɛ odee nōo mafu kpɔcii, ka aokonu ō ce ku Ɔwɔico géē ya jila ɔkwɔɔkwɛyi. Ɔdaŋ ku alɔ gē gbɛla lipu lipu lɛyikwu ɔdā nōo ya ɛɛ nɛ Ujisɔsi kwū, mla ɔdā nōó je Ujehofa ō ya ɔɔma a, ó géē ya ku alɔ kpɔtuce lɔfu lɔfu, ka okonu ō ce ku oyeeyi opiyoo ipu ɛcɛ olɔhi a géē ya jila piii. Ɔdiya nɛ alɔ lɔfu ka lɛ a?
9 Gbeyi ɛ, ɔdi nɛ ó je ku Ujisɔsi kóō gáā kwū lɛ alɔ a? Ujehofa lɛ ɔyinɔnyilɔ ekponu ku nu, nɛ ó yihɔtu nɛhi, nōo klla kwu ɔ ajaajɛ fiyɛ duu a u tɛhɔ ŋma ɔkpanco, kéē lɛ ɔ ma ipu ɛcɛ nyā kóō wɛ ɔcɛ nōo jila iye. Eko nɛ ó yɔ ipu ɛcɛ a, ó lɔtu āhɔ̄ olɔnɔ alɛwa. Oŋma ɔɔma, ó má owe i bi, é klla lɛ ɔ ŋmo ɔwɛ olɔnɔ nɛhi. Ó wɛ odee nɛ̄ŋcɛ́ nɛ ó je Ujehofa a nóó! Ɔwɔico ku alɔ nōo yihɔtu alɔ a, i gáā jɛga ku Ɔyi nu kóō gáā má owe klla kwū, o ya ɛɛ ku alɔ lā oyeeyi olɔhi eko kpii foofunu ŋ. (Ujɔ́n. 3:16; 1 Upít. 1:18, 19) Abɔ Ujehofa kwu ɔyinɔnyilɔ ekponu ku nu, nōo he ɔ ɔtu nɛhi a i gwɛɛya ohigbu alɔ a, ó géē ya kóō tɔɔtɛ lɛ alɔ ō lā oyeeyi opiyoo ipu ɛcɛ ɛyipɛ a.
GBƐLA LƐYIKWU ƆFU KU UJEHOFA
10. Oŋma ɛlā nōo yɔ ipu ɔkpá Ācɛ Ɛ́fēsɔsi 3:20 a, ɔdi nɛ Ujehofa ya gla a?
10 Ɔwɛ ɔmpa nɛ alɔ lɔfu ya ku ɔtu okpoce ku alɔ kóō lɔfu tōōtɔ̄ɔ̄ a, wɛ ō gbɛla lɛyikwu ɛdɔ ɔfu nɛ Ujehofa lɛ a. Ó lɛ ɔfu ō ya ɛjɛɛji ɔdā nɛ ó cokonu ku nu a. Ācɛ alɛwa icɛ gē gbɛla ka ō lā oyeeyi opiyoo ipu ɛcɛ ɛyipɛ a, i wɛ ɔdā nōo géē ya gla ŋ. Amáŋ, ó kē lɛ aɔdā alɛwa nōo yɔ abɔɔ nɛ Ujehofa cokonu ku nu, nɛ alɛɛcɛ i ya ɔ gla ŋ. Ɛnya tɔɔtɛ lɛ ɔ, ohigbu ka anu wɛ Ɔwɔ nōo Lɔfu Fiyɛ Duu a. (Ujób. 42:2; Umák. 10:27) Ɔɔma ya ɛɛ nɛ eko duuma nɛ ó lɛ ɛnɛɛnɛ okonu ce lɛ alɔ, ó gē hɛ alɔ idaago ŋ ma.—Jé Ācɛ Ɛ́fēsɔsi 3:20.
11. Je ocabɔ éyi ku okonu ō ce ku Ɔwɔico nɛ ācɛ gbɛla ka ó gáā ya jila gla ŋ ma. (Má ikpati nōo kahinii: “ Okonu Ō Ce Ōhī Nɛ Ācɛ Gbɛla Ka Ó Gáā Ya Jila Gla Ŋ.”)
11 Leyi yɛ aɔdā ōhī nɛ Ujehofa cokonu lɛ ācɛ ɔlɛ nu eko igble, néē gbɛla ka ó gáā ya gla ŋ ma. Ó da Ebraham mla Usara ka é géē ma ɔyinɔnyilɔ éyi eko néē le hilokpliici ɛ. (Ohút. 17:15-17) Ó klla da Ebraham ka ayaayi ku nu géē lugwu ku ajɛ ku Ukenan. Ɛpla ihayi alɛwa nɛ ayaayi ku Ebraham nōo wɛ ācɛ ku Isrɛlu a wɛ ɔfiyɛ ipu Ijipiti a, ó lɛbɛɛka okonu ō ce ɔɔma i gáā ya jila gboogboo ŋ ma. Amáŋ, ó kē le ya jila. Igbihaajɛ, Ujehofa ka Ɛlisabeti géē ma ɔyi éyi naana nɛ ó le hilokpliɔi ɛ ma. Ó klla da Umeri nɛ ó jé ɔcɛnyilɔ jejee ɛ ŋ ma, ka ó géē ma ɔyinɔnyilɔ ku nu. Ɛnyā ya ku okonu nɛ Ujehofa ce ihayi ula alɛwa ŋma ipu iga ku Idɛn a, kóō le ya jila!—Ohút. 3:15.
12. Ɔdi nɛ ɔkpá ku Ujóssuwa 23:14 mla Ayisáya 55:10, 11 a cɛ lɛ alɔ jé kpɔcii lɛyikwu ɔfu ku Ujehofa a?
12 Eko duuma nɛ alɔ gbɛla lɛyikwu ɛjɛɛji okonu nɛ Ujehofa ce a, mla ɛgɛ nɛ ó ya kéē le ya jila a, ó gē ya ku alɔ jé peee ka Ujehofa lɛ ɔfu nɛhi. Cɛɛ, ɔtu okpoce ku alɔ géē lɔfu tōōtɔ̄ɔ̄, lɛyikwu okonu nɛ ó ce ō bi ɛcɛ ɛyipɛ wa a. (Jé Ujóssuwa 23:14; Ayisáya 55:10, 11.) Ɛnyā gē ya ku alɔ jé ɔwɛ olɔhi ō bi le ta ācɛ abɔ, kéē wa i jé ka ɛcɛ ɛyipɛ nɛ Ujehofa cokonu ku nu a, i wɛ ɛlā ɛkɛmgbɛ ŋ. Ujehofa ka abɔyi nu lɛyikwu ɔkpanco ɛyipɛ mla ɛcɛ ɛyipɛ a kahinii: “Ɛlā nēe bá ā wɛ ɔkwɛ̄yi, nōo tōō lɔtūce.”—Mafú 21:1, 5.
YA AƆDĀ NŌO GÉĒ PI UWƆ BLA UJEHOFA AJAAJƐ
ŌJILA KU UJƆ
Ɛgɛnyá nōo ya ɔdā nyā géē ya ku ɔtu okpoce ku uwɔ kóō yɔ i lɔfu a? (Má ogwotu ɔmɛ 13)
13. Ɛgɛnyá nɛ ōjila ku ujɔ gē ya ku ɔtu okpoce ku alɔ kóō lɔfu tōōtɔ̄ɔ̄ a? Lɛ ɔ teyi peee.
13 Ɔwɛ ɔmɛta nɛ alɔ géē ya ku ɔtu okpoce ku alɔ kóō lɔfu tōōtɔ̄ɔ̄ a, wɛ ō ya aɔdā nōo géē pi alɔ bla Ujehofa ajaajɛ. Ocabɔ mafu, leyi yɛ itene nɛ alɔ gē lɛ ŋma ōjila ku ujɔ ku alɔ a. Anna nōo humayi yuklɔ ihayi alɛwa, ipu aya ɛyɛɛyɛyi ku uklɔ ō ya lɛ Ujehofa eko doodu a kahinii: “Ōjila ku ujɔ gē ya ku ɔtu okpoce ku um kóō lɔfu nɛhi. Ɔdaŋ ka ɔcɛ ō kɛla tɛɛcɛ a i kóō jé ō je ɛlā teyi peee lɔɔlɔhi ŋ, amāŋ nɛ ó kóō ka ɔdā ɛpɛpɛ duuma ŋ, n géē po ɔdā éyi nōo géē ta um abɔ, ku ɛlā ku Ubáyíbu kóō ta um eyī peee fiyɛ. Ɔɔma kē i ya ku ɔtu okpoce ku um kóō lɔfu tōōtɔ̄ɔ̄.” b Ó lɛ aafu ŋ, ɔtu okpoce ku alɔ klla gē lɔfu fiyɛ, ɔdaŋ ku alɔ jahɔ ta ohi nɛ ayinɛ alɔ gē ta ipu ōjila ku ujɔ a.—Uróm 1:11, 12; 10:17.
UKLƆ KU ƆNA Ō TA
Ɛgɛnyá nōo ya ɔdā nyā géē ya ku ɔtu okpoce ku uwɔ kóō yɔ i lɔfu a? (Má ogwotu ɔmɛ 14)
14. Ɛgɛnyá nɛ uklɔ ku ɔna ō ta a gē ya ku ɔtu okpoce ku alɔ kóō lɔfu tōōtɔ̄ɔ̄ a?
14 Alɔ klla gē ya ku ɔtu okpoce ku alɔ kóō lɔfu, ɔdaŋ ku alɔ gē yuklɔ ku ɔna ō ta. (Uhíb. 10:23) Barbara nōo humayi gba Ujehofa ɛ̄gbā fiyɛ ihayi 70 ɛ ma kahinii: “Uklɔ ku ɔna ō ta a wɛ ɔdā nōo gē ya ku ɔtu okpoce ku um kóō lɔfu tōōtɔ̄ɔ̄ eko doodu. Abɔ um gē kɛla lɛ ācɛ ɔhá lɛyikwu aɛnɛɛnɛ okonu ō ce ku Ujehofa a, ɛgɔɔma nɛ ɔtu okpoce ku um gē lɔfu tōōtɔ̄ɔ̄ a.”
O YA OKLƆCƐ KU ABƆYI UWƆ
Ɛgɛnyá nōo ya ɔdā nyā géē ya ku ɔtu okpoce ku uwɔ kóō yɔ i lɔfu a? (Má ogwotu ɔmɛ 15)
15. Ɛgɛnyá nōo ya oklɔcɛ ku abɔyi alɔ gē ya ku ɔtu okpoce ku alɔ kóō lɔfu tōōtɔ̄ɔ̄ a? (Má ifoto a duu.)
15 Ó lɛ ɔdā ɔhá kpɔ nōo géē ya ku ɔtu okpoce ku alɔ kóō lɔfu tōōtɔ̄ɔ̄. Anu kē wɛ ō ya oklɔcɛ ku abɔyi alɔ a. Susan ka ó gē ta ɔ abɔ nɛhi, ɔdaŋ ka ó lɛ eko nɛ ó géē ya oklɔcɛ ku abɔyi nu a miya taajɛ. Ó kahinii: “Ɛ̄cī alaadi, n gē ya oklɔcɛ ku Ɔda Ō Gbaajɛ néē gáā klɔcɛ alaadi ɔhá a. Ɛ̄cī Umɔnde mla Utiyusde, n gē ya otutu ku ōjila ku ujɔ ku ɔtahɛ ku alaadi. N gē bi ɛ̄cī ohile ipu alaadi a le ya oklɔcɛ ku abɔyi um.” Abɔ u Susan yɛce ōmiya ka oklɔcɛ nɛ ó le taajɛ eko doodu a, ɛnyā ya ku ɔtu okpoce ku nu kóō kwu lɔfu nɛhi. Irene nōo yuklɔ ihayi alɛwa ɔlɛ ɔtahɛ ku ɛga ō yuklɔ ku alɔ a, ka ku ō klɔcɛ ku aakacɛ ku Ubáyíbu gē ya ku ɔtu okpoce ku nu kóō lɔfu. Ó kahinii: “Ó gē lɛ abɔ kwu um ɔtu ō má ku akacɛ ku Ujehofa gē ya jila, kwu aya nōo le ligii a.” c
“Ó GÉĒ YÁ JĪLA PIÍÍ”
16. Ɔdiya nɛ ɔtu ō tu kwu ɔtu nɛ Ujehofa je lɛ Uhabakuku a tiile lɛ alɔ icɛ a? (Ācɛ Uhíbru 10:36, 37)
16 Ācɛ ɔlɛ Ujehofa ōhī humayi gbeyi oŋmɛyi ku ɛcɛ obɔbi nyā gboji gboji ɛ. Ācɛ ōhī gbɛla ku oŋmɛyi ku ɛcɛ nyā yɔ i piya ɔkwu ajɛ ō wa. Amáŋ, Ujehofa jé ɛgɛ nɛ ɔtu yɔ i ya ācɛ ɔlɛ nu lɛ a yiili. Ó kóō ta ɔcomɛɛbɛ Uhabakuku ɔtu kwu ɔtu kahinii: “Lɛ ɔ́ tá tā ajɛ, ohígbū ka eko nɛ̄ ó í yá jīla ā í yá ɛ́ɛ́ ŋ́. Amáŋ, eko nɛ̄ ó í yá jīla ā géē wā fíyaa. Ɔdā nɛ̄ n mafú gā uwɔ nyā géē yá jīla. Ó géē yá uwɔ bɛ̄ɛka ó yɔ̄ ī pi ɔkwu ajɛ ā. Amáŋ gbēyī eko nɛ̄ ó í yá ā. Ó géē yá jīla piíí, ó gáā ligbó ɛ́ɛ́ kóō yá jīla gɛ ŋ́.” (Uháb. 2:3) Ɔwɔico kɛla nyā kóō je ɔtu ō tu lé lɛ Uhabakuku foofunu nɛɛ? Kɛɛ ku ɛlā nyā lɛ itene lɛ alɔ icɛ duu? Ujehofa ya ku ɔyikpo Upɔlu kóō da Ācɛ O Yɛce Ukraist, nōo bi ɔtu caca yɔ i gbeyi ɛcɛ ɛpɛpɛ a, ɛlā ekponu ɔɔma duu. (Jé Ācɛ Uhíbru 10:36, 37.) Ohigbu ɛnyā, ɔdaŋ ku alɔ kóō yɔ i gbɛla, ku okonu nɛ Ujehofa ce ku anuɔ géē wa i hɛ alɔ ta a yɔ i pi ɔkwu ajɛ, alɔ jé kpɔcii ka ó “géē yá jīla piíí, ó gáā ligbó ɛ́ɛ́ kóō yá jīla gɛ ŋ́!”
17. Ɛgɛnyá nɛ ɔyinɛ alɔ nɔnya éyi ya ɔdā nɛ Ujehofa da Uhabakuku a?
17 Ācɛ ō gba Ujehofa ɛ̄gbā alɛwa, jahɔ tu ukɔ́ ku Ujehofa nōo ka ku alɔ “gbēyī eko nɛ̄ ó í yá ā.” Ōhī ku uwa humayi ya lɛ a ihayi alɛwa ɛ. Ocabɔ mafu, Louise gbɔɔ ō gba Ujehofa ɛ̄gbā ipu ihayi ku 1939. Ó kahinii: “Ɛpleeko ɔɔma, n gbɛla ku Amagɛdɔn géē wa gbɔbu ɛɛ ku um géē ya inɔkpa nɛhi mɛ. Amáŋ, ó ya lɛ a ŋ. Abɔ eko yɔ i nyɔ a, ɔdā nōo ta um abɔ a wɛ ō jé aɔ̄kā ku ācɛ nōo yɔ ipu Ubáyíbu, nōo gbeyi Ujehofa kóō lɛ okonu nɛ ó ce lɛ uwa a ya jila. Ó ya ku um gbeyi Ujehofa kóō lɛ aokonu ō ce ku nu ya jila duu. N jé ɔ̄kā ku ācɛ bɛɛka Unowa, Ebraham, Ujosɛfu mla ācɛ ɛyɛɛyɛyi ɔhá nōo gbeyi gboji ajɛ, gbɔbu ɛɛ kéē miyɛ ule ku ɔdā nɛ Ujehofa cokonu lɛ uwa a. Ō yɔ i kpɔtuce eko doodu ku aokonu ō ce a géē ya jila, ta ami mla ācɛ ɔhá abɔ ku alɔ jé kpɔcii ku ɛcɛ ɛyipɛ a le ba ajaajɛ ɛ.” Ācɛ nōo humayi gba Ujehofa ɛ̄gbā ihayi alɛwa ɛ ma géē cɛ mla ɛlā nyā duu!
18. Ɛgɛnyá nōo leyi yɛ aɔdā nɛ Ɔwɔico ya a, géē ta alɔ abɔ ku alɔ kpɔtuce ɛcɛ ɛyipɛ nōo yɔ i wa a lɔfu lɔfu a?
18 Ó wɛ ɔkwɛyi ku ɛcɛ ɛyipɛ a i wa ɛ ŋ. Amáŋ, gbɛla lɛyikwu aɔdā ōhī nōo yɛ jila alɔ ta a, bɛɛka ainyilɔwɔ, aɔcí, aɛ́bɛ́ mɛmla alɛɛcɛ bɛɛka alɔ a. Naana nōó lɛ eko nɛ aɔdā nōo ba nyā i yɔ ŋ ma a, ó lɛ ɔcɛ duuma babanya nōo géē taafu ku aɔdā nyā i yɔ ɔkwɔɔkwɛyi ŋ. É kē yɔ babanya ohigbu ku Ujehofa ya uwa a. (Ohútu 1:1, 26, 27) Ɔwɔico ku alɔ klla lɛ okonu ce lɛ alɔ ɛ, ku anuɔ géē ya ɛcɛ ɛyipɛ. Ó kē géē ya okonu ō ce ɔɔma jila. Ipu ɛcɛ ɛyipɛ a, ācɛ géē jɔɔnyɛ oyeeyi opiyoo, é klla géē lɔfu iyē. Alɔ jé kpɔcii ku ɛcɛ ɛyipɛ a géē wa ɛ̄cī nɛ Ɔwɔico le miya taajɛ ɛ má yiili.—Ayis. 65:17; Mafú 21:3, 4.
19. Ɛgɛnyá nɛ a géē ya ku ɔtu okpoce ku uwɔ kóō yɔ i lɔfu a?
19 Abɔ ɛcɛ ɛyipɛ a i wa ɛ ŋ ma, bēē ya ɛjɛɛji ɔdā nɛ a ya gla, o ya ɛɛ ku ɔtu okpoce ku uwɔ kóō lɔfu. Ikwū nɛ Ujisɔsi kwū a kóō wɛ ɔdā nōo géē yɔ i jɛ uwɔ eyī eko doodu. Bēē gbɛla lɛyikwu ɛdɔ ɔfu nɛ Ujehofa lɛ a. Bēē ya ɔdā nōo géē yɔ i pi uwɔ bla Ujehofa ajaajɛ. Ɔdaŋ ku a gē ya ɛnyā, a géē wɛ ipu ācɛ “nēe cɛ̄ɛ̄lā ā nēe klla lɔtūlé, anɔ́ɔ é mīyɛ ɔdā nɛ̄ Ɔwɔicō cokónu ō je lɛ uwá ā.”—Uhíb. 6:11, 12; Uróm 5:5.
IJÉ ƆMƐ 139 Leyi Má Iyi Uwɔ Ipu Ɛcɛ Ɛyipɛ A
a Ācɛ alɛwa icɛ i kpɔtuce okonu ō ce ku ɛcɛ ɛyipɛ a nōo yɔ ipu Ubáyíbu a ŋ. É gbɛla ka ó wɛ ɔdā nōó ya gla ŋ. Amáŋ alɔ jé kpɔcii ka ɛjɛɛji okonu nɛ Ujehofa ce a géē ya jila piii. Naana a, alɔ cɛgbá ō ceyitikwu nɛɛnɛhi, o ya ɛɛ ku ɔtu okpoce ku alɔ kóō yɔ i lɔfu eko doodu. Ɛgɛnyá a? Ikpɛyi ɛlā nyā géē je ɔ teyi peee.
b Iye ōhī néē hi ipu ikpɛyi ɛlā nyā i wɛ iye ɔkwɔɔkwɛyi nɛ ācɛ ɔɔma gē lé a ŋ.
c A lɔfu má aikpɛyi ɛlā alɛwa lɛyikwu akacɛ ipu Watch Tower Publications Index, ɛhaajɛ ku aya nōo kahinii: “Prophecy.” Ocabɔ mafu, má ikpɛyi ɛlā nōo kahinii: “What Jehovah Foretells Comes to Be,” ipu Ɔda Ō Gbaajɛ aku oyibo, ku Ɔya Aflɛyi 1, 2008.
