1. Ɔdiya nɛ alɔ gē ta ohi ipu ōjila ku ujɔ a?

 ƆDIYA nɛ alɔ gē gā ōjila ku ujɔ a? Ɔdā okpɔcii a wɛ o ya ɛɛ ku alɔ je owoofu lɛ Ujehofa. (Aíjē 26:12; 111:1) Alɔ klla gē gā ōjila ku ujɔ, o ya ɛɛ ku alɔ lɔfu ta iyi alɔ ɔtu kwu ɔtu ɛpleeko ku āhɔ̄ olɔnɔ nyā. (1 Utes. 5:11) Alɔ gē ya aɔdā ɛpa nyā eko duuma nɛ alɔ je abɔ gico, o ya ɛɛ ku alɔ ta ohi.

2. Eko nyá nɛ alɔ lɔfu ta ohi ipu ōjila ku alɔ a?

² Ipu alaadi doodu, alɔ gē lɛ ɛga ō ta ohi ipu ōjila ku ujɔ ku alɔ. Ocabɔ mafu, oŋmɛyi ku alaadi, alɔ lɔfu ta ohi ɛpleeko néē gē ya Oklɔcɛ Ku Ɔda Ō Gbaajɛ. Ɛpleeko ku ōjila ku alɔ nɛ alɔ gē ya ɔtahɛ ku alaadi a, alɔ lɔfu ta ohi eko néē gē ya Ɛnɛɛnɛ Ɛlā Nɛ Alɔ Nwu Ŋma Ɛlā Ɔwɔico, Ubáyíbu Oklɔcɛ Ku Ujɔ, amāŋ ipu aya doodu ɔhá nɛ ɔcɛ lɔfu ta ohi ipu nu gla.

3. Ɔdi lɔfu ya kóō lɔnɔ tu alɔ ō ta ohi a, ɛgɛnyá nɛ Ācɛ Uhíbru 10:24, 25 kē gáā ta alɔ abɔ a?

³ Ɛjɛɛji alɔ dɔka ō je owoofu lɛ Ujehofa klla ta ɔmpa alɔ ɔtu kwu ɔtu. Amáŋ, ó lɛ aɔdā nōo lɔfu ya kóō lɔnɔ tu alɔ ō ta ohi. Ɔtu ku alɔ lɔfu yɔ i wu eko duuma nɛ alɔ dɔka ō ta ohi, amāŋ ó lɔfu ya alɔ ku alɔ ta ohi fiyɛ, amáŋ ekoohi ɔyinɛ ɔnyilɔ a i gē hi alɔ igwú ɔdaŋ ku alɔ je abɔ gico ŋ. Ɔdi lɔfu ta alɔ abɔ a? Ɔdā nɛ Upɔlu ta fu ācɛ Uhibru a géē ta alɔ abɔ má ohi a. Eko nɛ Upɔlu yɔ i kɛla lɛyikwu ɔdā nōo ya ɛɛ nōó cɛgbá ku ayinɛ kéē jila tɔha a, ó ku alɔ cika ō lɛ ɔtu ku alɔ kwu ō yɔ i “tá aɔ́mpa alɔ ɔtū kwu ɔtu.” (Jé Ācɛ Uhíbru 10:24, 25.) Ɔtu ku alɔ i gáā bēē wu ō je abɔ gico ŋ, ɔdaŋ ku alɔ bla ku ohi ku alɔ lɔfu ta ācɛ ɔhá ɔtu kwu ɔtu gla, ɔdaŋ nōó kóō lɛ ligii, amáŋ,  nōó mafu ɔdā nɛ alɔ kpɔtuce a. Ɔdaŋ néē kóō hi alɔ igwú igbalɛwa ŋ naana, alɔ géē gweeye ku ācɛ ɔhá ipu ujɔ géē lɛ ɛga ō ta ohi.—1 Upít. 3:8.

4. Ɔdā ɛta nyá nɛ alɔ gáā kɛla lɛyikwu ɔ ipu ikpɛyi ɛlā nyā a?

⁴ Ipu ikpɛyi ɛlā nyā, aflɛyi, alɔ géē kɛla lɛyikwu ɛgɛ nɛ alɔ lɔfu ta iyi alɔ ɔtu kwu ɔtu, ipu ujɔ nōo le ligii, nɛ ācɛ nōo gē je abɔ gico kéē ta ohi a i lɛwa lɛ a ŋ. Oŋma ɔɔma, alɔ géē kɛla lɛyikwu ɛgɛ nɛ alɔ géē ta iyi alɔ ɔtu kwu ɔtu, ipu ujɔ nōo nwune nɛhi, nɛ ācɛ nōo gē je abɔ gico kéē ta ohi a gē lɛwa. Amoomɛ, alɔ géē kɛla lɛyikwu ɛgɛ nɛ alɔ géē ta iyi alɔ ɔtu kwu ɔtu, oŋma lɛ ɛlā nɛ alɔ gē ka, eko duuma nɛ alɔ gē ta ohi a.

5. Ɛgɛnyá nɛ alɔ gáā ta ācɛ ɔhá ɔtu kwu ɔtu ɔdaŋ ku alɔ i lɛwa ipu ujɔ ku alɔ ŋ má?

⁵ Ipu ujɔ amāŋ ígwu néē lɛwa lɛ a ŋ ma, ācɛ alɛwa i gē yɔ nōo gē je abɔ gico, kéē je ohi lɛ uwa kéē ta ŋ. Ekoohi, ɔyinɛ nōo leyi kwu aya ɔɔma a géē cɛgbá ō gbeyi yɛɛ, gbɔbu ɛɛ ku ɔcɛ éyi kóō je abɔ gico. Ɛnyā lɔfu ya ku ōjila a kóō hii lɔɔnyɛ gɛ ŋ, ɛnyā i kē wɛ ɔdā ō ta ɔtu kwu ɔtu ŋ duudu. Ɔdi nɛ a lɔfu ya a? Bēē je abɔ gico igbalɛwa. Ɔdaŋ ku a gē ya lɛ a, a lɔfu lɛ abɔ kwu ācɛ ɔhá ɔtu ku uwa abɔyi uwa kóō yɔ i je abɔ gico fiyɛ.

6-7. Ɔdaŋ ku alɔ dɔka ō ta ohi, ɛgɛnyá nɛ alɔ géē ya ku ɔtu ku alɔ kóō hii bēē wu ŋ ma?

⁶ Ɔdi nɛ a lɔfu ya, ɔdaŋ ku ɔtu ku uwɔ gē wu eko duuma nɛ a dɔka ō ta ohi a? Ó gē ya ācɛ alɛwa lɛ a ɔkwɔɔkwɛyi. Naana a, o ya ɛɛ ku a lɔfu ta ayinɛ uwɔ ɔtu kwu ɔtu fiyɛ, á gbɛla ka ó géē lɔhi ku a dɔka ɔwɛ ɛyɛɛyɛyi ɔhá, nɛ a géē ya ku ɔtu ku uwɔ kóō hii bēē wu lɛyikwu ohi ō ta ŋ? Ɔdi lɔfu ta uwɔ abɔ a?

⁷ Ō leyi yɛ aɔdā ōhī néē ka ipu Ɔda Ō Gbaajɛ b ɛyɛɛyɛyi nɛ alɔ ya gáā yɛ ɛ ma géē ta alɔ abɔ. Ocabɔ mafu, ō ya otutu lɔɔlɔhi. (Aíit. 21:5) Ɔdaŋ ku a jé ikpɛyi ɛlā néē gáā klɔcɛ a lɔɔlɔhi, ó géē ya ku ɔtu ku uwɔ kóō waajɛ fiyɛ, ku a lɔfu je abɔ gico ta ohi. Ɔdā ɔhá kpɔ, ya ku ohi ku uwɔ kóō lɛ kpii. (Aíit. 15:23; 17:27) Ɔtu ku uwɔ i gáā bēē wu ŋ, ɔdaŋ ka ohi nɛ a dɔka ō ta a lɛ kpii ikɔkɔ ō le gbɔngɔɔ. Ō ta ohi nōo lɛ kpii, á jé ŋ, nɛ a kɛla éyi amāŋ ɛpa, lɔfu ya kóō tɔɔtɛ lɛ ayinɛ uwɔ ō jɛyi nu fiyɛ. Ikɔkɔ ō ta ohi nōo le likpo nɛ a ka aɔdā alɛwa ipu nu. Ō ta ohi nōo lɛ kpii ɔwɛ nɛ a jɛyi nu a, géē mafu ku a ya otutu lɔɔlɔhi, ó klla géē mafu ku a jɛyi ɛlā néē yɔ i klɔcɛ a lɔɔlɔhi duu.

8. Ɛgɛnyá nɛ Ujehofa gē má ō ceyitikwu ku alɔ ō ya ɔdā nɛ alɔ ya gla a?

⁸ Ɔdaŋ ku a ya aɔdā nōo ba nyā, nɛ ō ta ohi fiyɛ igbo éyi amāŋ ɛpa gē cɛ lɛ ɔtu ku uwɔ wu kpɔ bɛɛ? Le jé kpɔcii ku ɛgɛ nɛ a yɔ i ceyitikwu, cɛɛ ku a ya ɔdā nɛ a ya gla a jɛ Ujehofa eyī nɛhi. (Ulúk. 21:1-4) Ujehofa i cɛgbá ku alɔ ya ɔdā nōo géē fiyɛ alɔ ɔfu a ŋ. (Ufíl. 4:5) Lɛ ɔtu ku uwɔ ya ekponu ō ya ɔdā nɛ a lɔfu ya gla, lɛ ōmiya ya taajɛ ō ya ɔ, ku a klla gbɔɔkɔ lɛ Ujehofa kóō ta uwɔ abɔ ku ɔtu ku uwɔ kóō hii wu ŋ. Lɛ ācɛ ōhī ku alɔ a, ogbɔɔ ŋmaajɛ, alɔ lɔfu ya ku ōmiya a kóō wɛ ō ta ohi nōo lɛ kpii igbeyi ofoofunu.

9. Ɔdiya nōó lɔfu lɔnɔ ta uwɔ ō ta ohi ipu aujɔ nōo lɛ ācɛ ō tɔɔna ɛlā Ɔwɔico alɛwa a?

⁹ Ɔdaŋ ku ujɔ ku aa lɛ ācɛ ō tɔɔna ɛlā Ɔwɔico nōo lɛwa nɛhi, unwalu ku uwɔ lɔfu wɛ ɛyɛɛyi. Igbalɛwa, á jé ŋ, ayinɛ nōo je abɔ gico kéē ta ohi a lɛwa nɛhi, nōo ya kéē hii má  abɔ ku uwɔ ŋ. Ocabɔ mafu, Danielle humayi jɔɔnyɛ ō ta ohi ipu ōjila ku ujɔ eko doodu. c Ó gē má ɔ ka ó wɛ ipu aya ku ɛ̄gbā ō gba ku nu, ka ó wɛ ɔwɛ ō ta ācɛ ɔhá ɔtu kwu ɔtu mɛmla ɔwɛ nɛ ó géē ya, kóō kpɔtuce ɛlā nɛ Ubáyíbu gē nwu a lɔfu lɔfu. Amáŋ, eko nɛ ó gáā le ta ujɔ ɔhá néē lɛwa nɛhi a, é gē jɛga lɛ ɔ ō ta ohi igbalɛwa gɛ ŋ. Ekoohi, ó kóō gē lɛ ɛga ō ta ohi ŋ duudu. Ó kahinii: “Ɛlā a ta um icɔnu nɛhi. Ó ya um bɛɛka ɛnɛɛnɛ ɛga éyi le hɛ um abɔ ɛ ma. Eko duuma nɛ ɛlā ɛgɛnyā gbɔɔ ō ya cɔha cɔha, a géē gbɔɔ ō gbɛla kéē kweyigedee yɔ i ya uwɔ.”

10. Ɛgɛnyá nɛ alɔ gáā ya kéē lɔfu jɛga lɛ alɔ ō ta ohi ipu ōjila fiyɛ a?

¹⁰ Ɔtu ya uwɔ ɛgɛ nōó ya u Danielle a jejee ɛ? Ó lɛ a, ó lɔfu gbɔɔ ō je uwɔ má ku a hii je abɔ gico gɛ ŋ, ku a yɔ cii bēē jahɔ foofunu. Amáŋ, ɛ̄jɛ̄ kóō hii jɛ uwɔ ō yɔ i je abɔ gico ŋ. Ɔdi nɛ a lɔfu ya a? Ō ya otutu ku ohi alɛwa ipu ōjila doodu lɔfu ta uwɔ abɔ. Cɛɛ, ɔdaŋ ka é miya abɔ kwu uwɔ ogbɔɔ ŋmaajɛ ku oklɔcɛ a ŋ, a géē lɛ ɛga ō ta ohi kpɔ abɔ ōjila a yɔ i gɔbu a. Eko duuma nɛ a yɔ i ya otutu ku Oklɔcɛ ku Ɔda Ō Gbaajɛ, gbɛla lɛyikwu ɛgɛ nɛ ogwotu eyeeye a tɛɛma kwu ikpɛyi ɛlā ɔɔma a. Ɔdaŋ ku a ya lɛ a, a géē lɛ ɛnɛɛnɛ ohi ō ta abɔ oklɔcɛ a yɔ i gɔbu a. Ó wɛ ɔɔma foofunu nóó, a lɔfu ya otutu ō ta ohi ipu aogwotu, nōo kɛla lɛyikwu ɛlā ō nwu ku Ubáyíbu nōo lɔnɔ ō je teyi peee. (1 Ukɔ́r. 2:10) Ɔdiya? Ohigbu ku ācɛ nōo lɔfu je abɔ gico ipu aya ɔɔma i gáā lɛwa lɛ a ŋ. Amáŋ, ɔdaŋ ku a ya ɛjɛɛji aɔdā nōo ba nyā, nɛ a klla le má ka é jɛga gā uwɔ ō ta ohi ipu ōjila alɛwa ŋ bɛɛ? Gbɔbu ɛɛ ku ōjila kóō gbɔɔ, a lɔfu nyɔ i kɛla lɛ ɔyinɛ nōo géē leyi kwu aya ɔɔma, cɛɛ ku a da ɔ lɛyikwu ɔka nɛ a géē dɔka ō cila piii a.

11. Ɔdi nɛ ɔkpá ku Ācɛ Ufílipāyi 2:4 ta alɔ ɔtu kwu ɔtu ō ya a?

¹¹ Jé Ācɛ Ufílipāyi 2:4. Ɔwɔico bi Alelekwu Ihɔ ku nu le je otabɔ lɛ ɔyikpo Upɔlu, kóō ta Ācɛ Ō Yɛce Ukraist ɔtu kwu ɔtu, kéē gbɛla kwu aɔdā ku ācɛ ɔhá. Ɛgɛnyá nɛ alɔ lɔfu bi ukɔ́ ɔɔma le yuklɔ ipu ōjila ku ujɔ a? Oŋma lɛ ō bla ka abɔ alɔ dɔka ō ta ohi a, ɛgɔɔma nɛ ācɛ ɔhá dɔka ō ya lɛ duu a.

12. Ɔdi wɛ ɔwɛ olɔhi éyi nɛ alɔ lɔfu ta ācɛ ɔhá ɔtu kwu ɔtu ipu ōjila a? (Má ifoto a duu.)

 ¹² Gbɛla nu ɔwɛ ɛgɛnyā ɛ. Ɔdaŋ ku a yɔ i kɛla mla aɔya ku uwɔ, a géē kɛla nwune jaa gbeeko nɛ uwa abɔyi uwa i gáā lɛ ɛga ō kɛla gɛ ŋ? Á gáā ya lɛ a ŋ ma! A dɔka kóō wɛ ɔka ō ka. Ɔwɛ ekponu ɔɔma, ipu ōjila, alɔ dɔka ō jɛga lɛ ayinɛ alɛwa ɛgɛ nōó tɔɔtɛ lɛ kéē lɔfu ta ohi. Aku ɔkwɛyi a, ɔwɛ éyi nōo lɔhi fiyɛ nɛ alɔ lɔfu ta ayinɛ alɔ ɔtu kwu ɔtu a, wɛ ō jɛga lɛ uwa kéē lɔfu kɛla lɛyikwu ɔdā néē kpɔtuce a. (1 Ukɔ́r. 10:24) Alɔ leyi yɛ ɛgɛ nɛ alɔ lɔfu ya ɔɔma a.

13. Ɛgɛnyá nɛ alɔ gáā ya ku ayinɛ alɛwa kéē lɛ ɛga ō ta ohi a?

¹³ Aflɛyi, alɔ lɔfu ya ku ohi ku alɔ kóō lɛ kpii, ku eko kóō yɔ lɛ ācɛ alɛwa ō ta ohi. Anyakwɔcɛ ku ujɔ mla ācɛ ō tɔɔna ɛlā Ɔwɔico ɔhá nōo jikoko a, lɔfu lɛ ocabɔ nyā taajɛ. Ɔdaŋ ka ohi ku uwɔ kóō le kpii, a hii kɛla lɛyikwu ɔcɛla alɛwa ŋ. Ɔdaŋ ku a kɛla lɛyikwu ɛjɛɛji ɔdā nōo yɔ ipu ogwotu a, ɔdā nōo géē hile lɛ ācɛ ɔhá kéē ka a géē lɛ ligii a. Ocabɔ mafu, ipu ogwotu nyā, alɔ kɛla lɛyikwu ɔcɛla ɛpa ku ɔdā nɛ a lɔfu ya gla. Aflɛyi, ohi nɛ a gáā ta a kóō lɛ kpii. Ɔmpa, a kē hii kɛla lɛyikwu ɔcɛla alɛwa ŋ. Ɔdaŋ ku awɔ wɛ ɔcɛ aflɛyi néē jɛga gā uwɔ ku a ta ohi lɛyikwu ogwotu nyā a, ŋma ipu ɔcɛla ɛpa a ceyitikwu ku a kɛla lɛyikwu éyi foofunu.

14. Ɔdi gáā ta alɔ abɔ ō jé igbo ɛmula nɛ alɔ cika ō je abɔ gico a? (Má ifoto a duu.)

¹⁴ Bi ijeeyi le jé igbo ɛmula nɛ a géē je abɔ gico a. Ɔdaŋ ku alɔ gē je abɔ ku alɔ gico igbalɛwa fiyɛ ɔfu, ó lɔfu kpo owu ce ɔcɛ nōo leyi kwu aya ɔɔma ɔtu kóō bēē miya abɔ kwu alɔ eko doodu, naana nɛ ācɛ ɔhá i lɛ ɛga ō ta ohi ɛ ŋ ma. Ɛnyā lɔfu ya ku abɔ kóō hɛ ācɛ ɔhá iyē, néē gáā dɔka ō je abɔ gico ŋ.—Ɔ̄cok. 3:7.

15. (a) Ɔdaŋ kéē jɛga lɛ alɔ ō ta ohi ŋ, ɔdi nɛ alɔ i cika ō ya ŋ má? (b) Ɛgɛnyá nɛ ācɛ nōo gē leyi kwu aya a géē mafu ka é lɛ ɛlá wu ɛjɛɛji ācɛ a? (Má ikpati nōo kahinii: “ Ɔdaŋ Ku Awɔ Yɔ I Leyi Kwu Aya.”)

¹⁵ Ɔdaŋ ku ayinɛ alɛwa je abɔ gico eko  duuma néē gē ya oklɔcɛ, alɔ i gáā lɔfu lɛ ɛga ō ta ohi igbalɛwa ɛgɛ nɛ alɔ dɔka a ŋ. Ekoohi, ɔyinɛ nōo leyi kwu aya ɔɔma i lɔfu hi alɔ igwú ku alɔ ta ohi ŋ duudu. Ɔɔma kē lɔfu biya alɔ ɔtu, amáŋ, eko duuma néē jɛga lɛ alɔ ō ta ohi ŋ, alɔ kóō ceyitikwu ya ku alɔ hii cɔnu mɛmla ɔyinɛ ɔɔma ŋ.—Ɔ̄cok. 7:9.

16. Ɛgɛnyá nɛ alɔ géē je ɔtu ō tu kwu ɔtu lɛ ācɛ ɔhá nōo gē ta ohi a?

¹⁶ Ɔdaŋ ku á lɛ ɛga ō ta ohi igbalɛwa ɛgɛ nɛ a dɔka a ŋ, á gbɛla ka ó géē lɔhi ku a jahɔ lɔɔlɔhi abɔ ācɛ ɔhá yɔ i ta ohi a, cɛɛ ku a cɛtra uwa oŋmɛyi ku ōjila ŋ? Ō cɛtra ayinɛ uwɔ ipu ujɔ lɔfu ta uwa ɔtu kwu ɔtu, ɛgɛ nɛ ohi ɔɔma nɛ a dɔka ō ta a géē ta uwa ɔtu kwu ɔtu lɛ a. (Aíit. 10:21) Ō cɛtra ayinɛ alɔ wɛ ɔwɛ ɔhá nɛ alɔ lɔfu ta iyi alɔ ɔtu kwu ɔtu.

17. (a) Ɛgɛnyá nɛ adā mla ɛ́nɛ́ géē ta ayipɛ ɔlɛ uwa abɔ kéē tutu ō ta ohi nōo cika lɛ ihayi ku uwa a? (b) Ɔdi wɛ ɔwɛ ɛnɛ ō ya otutu ku ohi ō ta néē mafu ipu uvidio a? (Má ɛlā néē ta ɛhaajɛ a duu.)

¹⁷ Ɔwɛ ɔhá nyá nɛ alɔ lɔfu ta iyi alɔ ɔtu kwu ɔtu ipu ōjila ku alɔ a? Ɔdaŋ ku a wɛ ɛ́nɛ́ amāŋ adā, ta ayipɛ ɔlɛ uwɔ abɔ kéē tutu ku ohi néē géē ta, nōo cika lɛ ihayi ku uwa. (Umát. 21:16) Ekoohi, aɛlā ō cɛgbá nɛ alɔ gē kɛla lɛyikwu ɔ ɛpleeko nɛ alɔ gē ya oklɔcɛ a, aɛlā bɛɛka unwalu nōo gē yɔ ɔtahɛ ku ɔba mla ɔnyā, amāŋ ɔwɛ nɛ alɔ cika ō le yeŋee  ipu uce ō ya ku alɔ a. Amáŋ ɛpleeko ɛgɛnyā, ó lɔfu lɛ ogwotu éyi amāŋ ɛpa nɛ ɔyipɛ nɛ̄ŋcɛ́ lɔfu ta ohi tu ɔ gla. Ɔdā ɔhá kpɔ, ta ayipɛ ɔlɛ uwɔ abɔ kéē jé, ka ó wɛ eko doodu néē je abɔ gico a néē gáā hi uwa igwú a ŋ. Ō je ɛnyā ta uwa eyī peee géē ya kéē hii cɔnu ŋ, ɔdaŋ néē kwu ɛga u lɛ ɔcɛ ɔhá kóō ta ohi.—1 Utím. 6:18. d

18. Eko duuma nɛ alɔ gē ta ohi, ɛgɛnyá nɛ alɔ géē ya ku ɔtu ku ācɛ kóō hii kwu alɔ fiyɛ ɔfu ŋ má? (Aíita 27:2)

¹⁸ Ɛjɛɛji alɔ lɔfu ya otutu, ku alɔ ta ohi nōo géē je owoofu lɛ Ujehofa klla ta aɔmpa alɔ ɔtu kwu ɔtu. (Aíit. 25:11) Naana nōó wɛ ɔdā olɔhi ekoohi, ō kɛla kpii lɛyikwu ɔdā nɛ alɔ má ɛ ma a, alɔ kóō bēē kɛla lɛyikwu iyi alɔ fiyɛ ɔfu ŋ. (Jé Aíita 27:2; 2 Ukɔ́r. 10:18) Ikɔkɔ ɔɔma, alɔ kóō ceyitikwu ya ku ɔtu ku ācɛ kóō kwu Ujehofa, Ɛlā ku nu mɛmla ɛjɛɛji ācɛ ɔlɛ nu. (Mafú. 4:11) Amáŋ, ɔdaŋ ku ɔka ku ogwotu a da alɔ ku alɔ kɛla lɛyikwu ɔdā nɛ alɔ gbɛla amāŋ má ɛ, ó géē cɛgbá ku alɔ ya lɛ a. Alɔ géē má ocabɔ ku ɛnyā ipu ogwotu nōo gboce ɛnyā a.

19. (a) Itene nyá gáā bɛɛcɛ ɔdaŋ ku alɔ gē mafu ku alɔ lɛ ɛlá wu ɛjɛɛji ayinɛ alɔ a? (Uróm 1:11, 12) (b) Ɔdi jɛ uwɔ eyī piii lɛyikwu ohi ō ta ipu ōjila a?

¹⁹ Naana nōó lɛ íne olɔfu duuma nōo yaajɛ lɛyikwu ohi ō ta ŋ ma a, ɛjɛɛji alɔ lɔfu ceyitikwu ku alɔ ta iyi alɔ ɔtu kwu ɔtu. Ɛnyā lɔfu lɛ ō ya mla ō ta ohi igbalɛwa. Amāŋ, ō ya ku ɛga nɛ alɔ lɛ ō ta ohi a kóō jɛ alɔ, mɛmla ō yɔ i gweeye ku ācɛ ɔhá lɛ ɛga ō ta ohi. Ɔdaŋ ku ɔdā nōo cɛgbá lɛ alɔ fiyɛ duu ipu ōjila ku ujɔ a, wɛ aɔdā nōo géē tiile lɛ ayinɛ alɔ, ɛjɛɛji alɔ géē jɔɔnyɛ ō ta iyi alɔ “ɔtū kwu ɔtu.”—Jé Ācɛ Uróm 1:11, 12.