EKOOHI, ācɛ nōo ta Ubáyíbu a gē bi ɛlā ekponu néē ka ɛga ku Ubáyíbu éyi a le yuklɔ igbalɛwa. Leyi yɛ aɛlā ɛta nōo lɔfu ya ku ācɛ nōo ta Ubáyíbu a kéē ya lɛ a:

Eko néē ta ɔ a. Ɛpleeko ku ācɛ Isrɛlu a, ācɛ alɛwa i lɛ ɔkpá ku Íne ku abɔyi uwa ŋ. Igbalɛwa, é gē po ɛlā lɛyikwu Íne a eko nɛ ɛjɛɛji uwa le jila tɔha néē yɔ i jé ɔ tɛɛcɛ lɛ uwa ipu agbliihɔ a. (Obla. 31:​10-12) Á jé ŋ, ó lɔfu lɛ ɔdā ōhī nōo yɔ i je uwa ɛlá abɔ é yɔ i jahɔ, klla bi eko alɛwa le hayi ipu ɛwa nɛhi a. (Uneh. 8:​2, 3, 7) Ipu āhɔ̄ ɛgɛnyā, ō kɛla lɛyikwu ɛlā okpɔcii a igbalɛwa lɔfu ya kóō tɔɔtɛ lɛ ācɛ a ō blatu ɛlā néē jé ŋma ɔkpiihɔ a, klla bi uwa le yuklɔ. Ō kɛla lɛyikwu aɛlā ōhī igbalɛwa klla lɔfu ta ācɛ a abɔ ō blatu ɛjɛɛji ɛlā nōo tɛɛma kwu íne nɛ Ujehofa je lɛ uwa a.—Ulīf. 18:​4-22; Obla. 5:1.

Ɛgɛ néē bi le ta ɔ a. É ta aya ōhī ku Ubáyíbu bɛɛka ijé a. Ocabɔ mafu, ɔkpá ku Aíjē Kú Ɛ̄gbā, ɔkpá ku Ijē kú Usólōmɔn, mla ɔkpá ku Ikwūayidɔ. Ekoohi, é gē kɛla ekponu ipu ijé igbalɛwa. Ɛnyā gē kɛla lɛyikwu ɛlā okpɔcii ipu ijé a, klla gē ta ācɛ nōo gē jahɔ tu ijé a abɔ kéē bi aɛlā a tu ɛyi. Ocabɔ mafu, leyi bi ɛlā nōo yɔ ipu ɔkpá ku Aíjē Kú Ɛ̄gbā 115:​9-11 a, ó kahinii: “Ācɛ Ísrɛ̄lu, aá lɛ ɔtūce Óndú ā. Anú gē tá aá abɔ̄ klla ī gbō aá á. Ācogwɛ́ɛya kú Ɔwɔicō, aá lɛ ɔtūce Óndú ā. Anú gē tá aá abɔ̄ klla ī gbō aá á. Aá nēe gē gbā Óndú ɛ̄gbā ā, aá lɛ ɔtūce ɔ́. Anú gē tá aá abɔ̄ klla ī gbō aá á.” Ō ka aɛlā nyā igbalɛwa lɔfu ta ācɛ nōo gē gwo ijé a abɔ kéē bi aɛlā okpɔcii a tu ɛyi.

Ɔdā nōo ya ɛɛ néē ta ɔ a. Ācɛ nōo ta Ubáyíbu a gē kɛla lɛyikwu aɛlā okpɔcii a igbalɛwa. Ocabɔ mafu, Ujehofa je íne lɛ ācɛ ku Isrɛlu a kéē hii lé oyi ŋ. Ujehofa kē ya ku Umosisi kóō ka ɔdā nōo ya néē cika ō lé oyi ŋ ma igbalɛwa. Ujehofa dɔka ku ācɛ a kéē le jé peee ka oyi kwɛyi oyeeyi a. (Ulīf. 17:​11, 14) Igbihaajɛ, eko nɛ ayikpo mla anyakwɔcɛ nōo yɔ Ujerusalɛm a ta ɔkpá lɛyikwu ɔdā nɛ Ācɛ O Yɛce Ukraist cika ō kwu ŋma anu o ya ɛɛ kéē ya ɔdā nōo he Ɔwɔico ɔtu a, é klla lɛ ɔdā nōo ya ɛɛ nɛ ɔcɛ i cika ō lé oyi ŋ ma teyi peee kpɔ.—Ācot. 15:​20, 29.

Naana nɛ Ubáyíbu gē kɛla lɛyikwu ɛlā ekponu igbalɛwa a, ɔɔma i wɛ ka Ujehofa dɔka kóō kwu piya uce ō ya ku alɔ ō yɔ i kɛla lɛyikwu ɛga ku Ubáyíbu éyi eko doodu ŋ. Ocabɔ mafu, Ujisɔsi kahinii: “Eko nɛ̄ a gē gbɔ̄ɔkɔ, ā híīī kɛlā cɔhá icō . . . ŋ́.” (Umát. 6:7) Igbihi nɛ ó lɛ ɛlā nyā ka a, ó kɛla lɛyikwu aɔdā ōhī nɛ alɔ lɔfu gbɔɔkɔ lɛyikwu ɔ a. (Umát. 6:​9-13) Naana nɛ alɔ i gē kɛla ekponu cɔha ico eko nɛ alɔ gē gbɔɔkɔ a ŋ ma, alɔ lɔfu gbɔɔkɔ lɛyikwu ikpɛyi ɛlā ekponu ɔɔma igbalɛwa.—Umát. 7:​7-11.

Ohigbu ɛnyā, alɔ géē ka ka ohigbu ɔdā olɔhi ya ɛɛ nɛ Ubáyíbu gē kɛla lɛyikwu ɛlā ekponu igbalɛwa a. Ɛnyā wɛ ɔwɛ éyi nɛ Ɔwɔico ku alɔ nōo gē nwu alɔ ɛlā fiyɛ duu a, gē bi le nwu alɔ ɛlā ɔwɛ nōo géē tiile lɛ alɔ a.—Ayis. 48:​17, 18.