1. Ɔdiya nɛ alɔ cɛgbá Ujehofa kóō ma ɔwɛ fu lɛ alɔ a? Je ocabɔ mafu.

 LEYI yɛ ɔ ku a gebi ipu upu nɛhi éyi. Āhɔ̄ ku abɔɔ a tuufi nɛhi ohigbu ku aɛbɛ́ obɔbi mla ācɛ obɔbi yɔ abɔɔ. Ó lɛ aafu ŋ, a géē gweeye nɛɛnɛhi ɔdaŋ ku a lɛ ɔcɛ éyi nōo jé ɔwɛ abɔɔ a lɔɔlɔhi má nōo géē bi uwɔ jé ɔwɛ. Ɔcɛ nōo jé ɛga nɛ aɛbɛ́ obɔbi mla ācɛ obɔbi a lɔfu ba, nōo klla géē ta uwɔ abɔ ku a hii bu ɔwɛ abɔɔ a ŋ! Ɛcɛ nɛ alɔ lā anu nyā lɛbɛɛka upu ɔɔma a. Ó le mu mla aɔdobɔbi alɛwa nōo lɔfu biya ɛma ku alɔ mla Ujehofa. Amáŋ alɔ lɛ ɔcɛ éyi nōo jila iyē nōo gē ma ɔwɛ fu lɛ alɔ lɔɔlɔhi—Ujehofa. Ó gē gbo alɔ ŋma ɛga nɛ aɔdobɔbi lɔfu ya da alɔ a, klla gē mafu ɔwɛ okpaakpa a lɛ alɔ nōo géē bi alɔ gā oyeeyi opiyoo ipu ɛcɛ ɛyipɛ a.

2. Ɛgɛnyá nɛ Ujehofa gē bi le ma ɔwɛ fu lɛ alɔ a?

² Ɛgɛnyá nɛ Ujehofa gē bi le ma ɔwɛ fu lɛ alɔ a? Ɔwɛ okpɔcii éyi nɛ ó gē ya ɛnyā a wɛ o bu ipu Ɛlā ku nu nōo wɛ Ubáyíbu a. Naana kpɔ a, ó klla gē bi alɛɛcɛ le ma ɔwɛ fu lɛ alɔ duu. Ocabɔ mafu, ó gē bi “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a le je ɔdole ku Ɛlā Ɔwɔico lɛ alɔ, nōo gē ta alɔ abɔ ō ya ōmiya ku ijeeyi a. (Umát. 24:45) Ujehofa klla gē bi acɛnyilɔ nōo cika jɛ le ma ɔwɛ fu lɛ alɔ. Ocabɔ mafu, ācɛ o leyi kwu usɛkut mla anyakwɔcɛ ku ujɔ gē je ɔtu ō tu kwu ɔtu lɛ alɔ, klla gē tu alɔ ukɔ́ nōo lɔfu ta alɔ abɔ ō lɔtu āhɔ̄ olɔnɔ nɛ alɔ yɔ anu a. Alɔ gweeye nɛhi ku alɔ lɛ ācɛ nōo gē ma ɔwɛ fu lɛ alɔ ɛpleeko olɔnɔ amoomɛ nyā a! Ɛnyā gē ta alɔ abɔ ō wɛ ɔya ku Ujehofa, o ya ɛɛ ku alɔ lɔfu jɔɔnyɛ oyeeyi babanya mla ogboogboo ɛcɛ.

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Amáŋ, ó lɛ ekoohi nōó lɔfu lɔnɔ tu alɔ ō yɛce ɔwɛ nɛ Ujehofa gē mafu a, ofiyɛ duu ɔdaŋ ka ó wa ŋma ɛgiyi ācɛ nōó jila iyē ŋ. Ɔdiya a? Á jé ŋ, alɔ i gáā lɔfu dɔka ɛlā néē da alɔ a ŋ. Amāŋ ɔtu lɔfu ya alɔ ku ɛlā néē da alɔ i lɛyi ŋ, ka ó klla gáā ŋma ɛgiyi Ujehofa gboogboo gla ŋ. Ɛpleeko ɔɔma, wɛ eko nɛ alɔ cɛgbá fiyɛ duu  ō lɔtuce ka Ujehofa wɛ ɔcɛ nōo yɔ i ma ɔwɛ fu lɛ ācɛ ɔlɛ nu a, mla ō lɔtuce kóō yɛce ɔwɛ o mafu ɔɔma géē ya ku alɔ miyɛ ɔhā. O ya ɛɛ ku alɔ miyɛ otabɔ ɛgɛ nɛ alɔ géē ya ku ɔtu nɛ alɔ le ce Ujehofa a kóō lɔfu fiyɛ a, ikpɛyi ɛlā oklɔcɛ nyā géē kɛla lɛyikwu aɛlā okpɔcii ɛta nyā (1) ɛgɛ nɛ Ujehofa ma ɔwɛ fu lɛ ācɛ ɔlɛ nu ɛpleeko ku ikee a, (2) ɛgɛ nɛ ó yɔ i ma ɔwɛ fu lɛ alɔ icɛ a, mla (3) ɛgɛ nɛ alɔ géē lɛ itene ɔdaŋ ku alɔ gē yɛce ɔwɛ nɛ ó gē mafu lɛ alɔ a.

ƐGƐ NƐ UJEHOFA MA ƆWƐ FU LƐ ĀCƐ ISRƐLU KU IKEE A

4-5. Ɛgɛnyá nɛ Ujehofa mafu ka ó yɔ i bi Umosisi le ma ɔwɛ fu lɛ ācɛ Isrɛlu a? (Má ifoto nōo yɔ iyɔbu ku Ɔda Ō Gbaajɛ a.)

⁴ Ujehofa lɛ Umosisi fu kóō bi ācɛ Isrɛlu a jé ɔwɛ ŋma ipu éwo ku Ijipiti. Ó kē lɛ ocabɔ je lɛ ācɛ Isrɛlu a kéē má ka anu wɛ ɔcɛ nōo yɔ i ma ɔwɛ fu lɛ uwa o bu ipu Umosisi a. Ocabɔ mafu, Ujehofa ya ku ojuja kóō gbo uwa ɔlɛɛnɔ klla ya ku ɔ́kpá ku ɔlá kóō bi uwa jé ɔwɛ ɔtu. (Oyɛb. 13:21) Umosisi yɛce ojuja a, nōo gbo anu mla ācɛ Isrɛlu a gā ɛgiyi Isu Igwɛbɛ a. Amáŋ ācɛ Ijipiti a gbɔɔ ō na ācɛ Isrɛlu a kéē lɛ uwa kwu. Ohigbu ɛnyā, ācɛ ku Isrɛlu a gbɔɔ ō yuufi nɛɛnɛhi ohigbu ka é gbɛla ku ācɛ Ijipiti a géē je uwa kpo ŋmo. É gbɛla ka Umosisi lɛ inyileyi ya ō bi uwa gā ɛgiyi Isu Igwɛbɛ a. Amáŋ ó wɛ inyileyi fluflu ŋ. Ujehofa bi Umosisi le gbo ācɛ ɔlɛ nu gā abɔɔ a. (Oyɛb. 14:2) Ɔwɔico kē lɛ uwa nyata ɔwɛ ohidaago nɛhi.—Oyɛb. 14:​26-28.

⁵ Igbihi nɛ ihayi ɔfu le gla a, Umosisi gɔbu yɔ i kpɔtuce ka Ujehofa yɔ i bi ojuja a le gbo ācɛ ɔlɛ nu bu ipu igbli a. a Ó lɛ eko éyi, nɛ Ujehofa ya ku ojuja a kóō gáā yɔ ɛyi aklɔkpɛ ku Umosisi nɛ ɛjɛɛji ācɛ Isrɛlu a lɔfu má ɔ gla. (Oyɛb. 33:​7, 9, 10) Ŋma ipu ojuja a, Ujehofa kɛla lɛ Umosisi, Umosisi kē wɛ ɔcɛ nōo da ācɛ a ɛlā nɛ Ujehofa da ɔ a. (Aíjē 99:7) Ācɛ ku Isrɛlu a lɔfu má peee ka Ujehofa yɔ i bi Umosisi le ma ɔwɛ fu lɛ uwa a.

6. Ɛgɛnyá nɛ ɔtu ya ōhī ku ācɛ Isrɛlu a lɛyikwu ɔwɛ nɛ Ujehofa yɔ i mafu lɛ uwa a? (Áluka 14:​2, 10, 11)

⁶ Amáŋ ó wɛ ɔdā okwiye, ka ɛyinɛhi ku ācɛ Isrɛlu a ta ō má ocabɔ nɛ Ujehofa yɔ i mafu lɛ uwa, ka anu yɔ i bi Umosisi le ma ɔwɛ fu lɛ uwa a. (Jé Áluka 14:​2, 10, 11.) Ŋma eko teeko, é gē ta ō miyɛ cɛ ka Ujehofa yɔ i bi Umosisi le bi uwa jé ɔwɛ a. Ohigbu ɛnyā, Ujehofa i jɛga lɛ ígwu ku ācɛ Isrɛlu ɔɔma kéē gā ipu Ajɛ Nɛ Ó Cokonu Ō Je Lɛ Uwa a ŋ.—Áluk. 14:30.

7. Je ocabɔ ku ācɛ Isrɛlu ōhī nōo yɛce ɔwɛ nɛ Ujehofa mafu lɛ uwa a. (Áluka 14:24) (Má ifoto a.)

⁷ Naana kpɔ a, ó lɛ ōhī ku ācɛ Isrɛlu a nōo yɛcɛ ɔwɛ nɛ Ujehofa mafu lɛ uwa a. Ocabɔ mafu, Ujehofa kahinii: “Ukálɛ̄bu . . . yɛce um kpaakpa.” (Jé Áluka 14:24.) Ɔwɔico lɛ ɔhā hɛ ce Ukalɛbu nɛɛnɛhi, klla jɛga lɛ ɔ kóō fu ɛga nōo géē he ɔ ɔtu ō lā ipu Ajɛ Nɛ Ó Cokonu Ō Je Lɛ Uwa a. (Ujós. 14:​12-14) Ācɛ ku Isrɛlu nɛ Ujehofa jɛga lɛ uwa kéē gā ipu Ajɛ Nɛ Ó Cokonu Ō Je Lɛ Uwa a, klla lɛ ɛnɛɛnɛ ocabɔ taajɛ ō yɛce ɔwɛ nɛ Ujehofa mafu lɛ uwa a. Eko nɛ Ujosuwa gáā kwɛyi Umosisi ō gbo ācɛ ku Isrɛlu a, é lɛ “ojílīma ce ɔ́ ipú oyēeyī kú nū dúúdú.” (Ujós. 4:14) Ohigbu ɛnyā, Ujehofa lɛ ɔhā hɛ cɛ uwa klla kwu Ajɛ Nɛ Ó Cokonu Ō Je Lɛ Uwa a i lɛ uwa.—Ujós. 21:​43, 44.

8. Lɛ ɔ teyi peee ɛgɛ nɛ Ujehofa ma ɔwɛ fu lɛ ācɛ ɔlɛ nu ɛpleeko ku aɔcɛ́ a. (Má ifoto a.)

⁸ Igbihi nɛ ihayi ōhī le gla a, Ujehofa lɛ ācɛ ohɛpɔ fu kéē ma ɔwɛ fu lɛ ācɛ ɔlɛ nu. Igbihaajɛ ɛpleeko ku aɔcɛ́ a, Ujehofa lɛ acomɛɛbɛ fu kéē ma ɔwɛ fu lɛ ācɛ ɔlɛ nu. Aɔcɛ́ nōo hayi kpaakpa a gē yɛce ukɔ́ nɛ acomɛɛbɛ a gē tu uwa a. Ocabɔ mafu, Udefidi nōo wɛ Ɔcɛ́ a miyɛ ahɔ̄ nɛ Unatan nōo wɛ ɔcomɛɛbɛ a pi ɔ a. (2 Usám. 12:​7, 13; 1 Uklɔ 17:​3, 4) Ujɛhossafati nōo wɛ Ɔcɛ́ a  yɛce ɔwɛ o mafu ku ɔcomɛɛbɛ nōo lé ka Ujahasiyɛlu a, klla je ɔtu ō tu kwu ɔtu lɛ ācɛ Ujuda a kahinii: “Aá lɛ ɔtū kpó ce ɛlā nɛ̄ ɔ̄comɛ́ɛbɛ [ku Ɔwɔico] ka lɛ aá ā.” (2 Úklɔ́ 20:​14, 15, 20) Eko nɛ ɔtu biya lɛ ɔ nɛɛnɛhi a, Uhɛsɛkayi nōo wɛ Ɔcɛ́ a dɔka otabɔ ŋma ɛgiyi Ayisaya nōo wɛ ɔcomɛɛbɛ a. (Ayis. 37:​1-6) Eko duuma nɛ aɔcɛ́ a yɛce ɔwɛ nɛ Ujehofa mafu lɛ uwa a, ó gē hɔha ce uwa klla gē je ogbotu lɛ ācɛ ɔlɛ nu. (2 Úklɔ́ 20:​29, 30; 32:22) Ó cika ō ta ɛjɛɛji ācɛ a eyī peee, ka Ujehofa yɔ i bi acomɛɛbɛ a le ma ɔwɛ fu lɛ ācɛ ɔlɛ nu a. Naana kpɔ a, ɛyinɛhi ku aɔcɛ́ a mla ācɛ Isrɛlu a ta ō jahɔ lɛ acomɛɛbɛ ku Ujehofa a.—Ujɛr. 35:​12-15.

ƐGƐ NƐ UJEHOFA MA ƆWƐ FU LƐ ĀCƐ O YƐCE UKRAIST KU EKO AFLƐYI A

9. Anyɛ nɛ Ujehofa fu kéē ma ɔwɛ fu lɛ ujɔ ku Ācɛ O Yɛce Ukraist ku eko aflɛyi a? (Má ifoto a.)

⁹ Igbihi néē lɛ Ujisɔsi heyi ŋma ɔlekwu a, Ujehofa kwu ujɔ ku Ācɛ O Yɛce Ukraist u kwaajɛ. Ɛgɛnyá nɛ ó ma ɔwɛ fu lɛ Ācɛ O Yɛce Ukraist ku eko aflɛyi nyā a? Ó lɛ Ujisɔsi fu kóō wɛ otrɛyi ku ujɔ a. (Āfi. 5:23) Amáŋ, Ujisɔsi i kɛla lɛ eyeeye ku ayikpo a lɛyikwu ɔdā néē cika ō ya a ŋ. Ó bi ōhī ku ayikpo a mla anyakwɔcɛ nōo yɔ Ujerusalɛm a le yuklɔ o ya ɛɛ kéē bi ujɔ a jé ɔwɛ. (Ācot. 15:​1, 2) O ka tu ɔ, é fu anyakwɔcɛ ku ujɔ o ya ɛɛ kéē bi aujɔ a jé ɔwɛ icɛ duu.—1 Utes. 5:12; Utáy. 1:5.

10. (a) Ācɛ O Yɛce Ukraist ku eko aflɛyi a yɛce ɔwɛ néē mafu lɛ uwa a? (Úklɔ́ kú Ācotɛ̄hɔ̄ 15:​30, 31) (b) Ɔdiya nɛ ācɛ ōhī ɛpleeko ku ikee a ta ō miyɛ ɛlā ku ācɛ nɛ Ujehofa yɔ i bi le ma ɔwɛ fu lɛ uwa a? (Má ikpati nyā nōo kahinii: “ Ɔdā Nōo Ya Ɛɛ Nɛ Ācɛ Ōhī Ta Ɛlā Ku Ācɛ Nɛ Ujehofa Yɔ I Bi Le Ma Ɔwɛ Fu Lɛ Uwa A.”)

¹⁰ Ācɛ O Yɛce Ukraist ku eko aflɛyi a yɛce ɔwɛ néē mafu lɛ uwa a? Alɛwa ku uwa gweeye lɛyikwu ukɔ́ néē gē miyɛ a, klla le tutu ō bi uwa le yuklɔ. Ku ɛlā ɔkwɛyi a, “é gwéeyē ohígbū ɔfú nēé le tū uwā iye ā.” (Jé Úklɔ́ kú Ācotɛ̄hɔ̄ 15:​30, 31.) Ó lɛ a, ɛgɛnyá nɛ Ujehofa gē ma ɔwɛ fu lɛ ācɛ ɔlɛ nu ɛpleeko ku alɔ nyā a?

ƐGƐ NƐ UJEHOFA YƆ I MA ƆWƐ FU LƐ ALƆ ICƐ A

11. Je ocabɔ nōo mafu peee ka Ujehofa yɔ i bi alɛɛcɛ le ma ɔwɛ fu lɛ ācɛ ɔlɛ nu icɛ a.

¹¹ Ujehofa gɔbu yɔ i ma ɔwɛ fu lɛ ācɛ ɔlɛ nu icɛ. Ó humayi ya ɛnyā o bu ipu Ɛlā ku nu nōo wɛ Ubáyíbu a, mla Ɔyinɔnyilɔ ku nu nōo wɛ otrɛyi ku ujɔ a. A má ocabɔ duuma nōo mafu peee ka Ujehofa klla gɔbu yɔ i bi alɛɛcɛ le ma ɔwɛ fu lɛ alɔ ɛpleeko ku alɔ nyā a? Ii gboo. Ocabɔ mafu, gbɛla lɛyikwu ɔdā nōo ya igbihi ku  ihayi ku 1870 a. Ó gáā gbɔɔ ō ta u Charles Taze Russell mla ācɛ nōo gē yɛce ɔ a eyī peee, ka ihayi ku 1914 wɛ ihayi nɛ Ajɔɔcɛ ku Ɔwɔico gáā gbɔɔ ō lé ɔcɛ́ ɔkpanco a. (Udán. 4:​25, 26) Gbɔbu ɛɛ kéē wa oŋmɛyi ku ɛlā nyā a, é jila ɛlā má ŋma ipu Ubáyíbu, klla lɔtuce lɔfu lɔfu ku aakacɛ nōo yɔ ipu Ubáyíbu a géē ya jila piii. Ujehofa yɔ i ma ɔwɛ fu lɛ uwa abɔ é yɔ i jila ɛlā má ŋma ipu Ubáyíbu a? Ii gboo. Ɔdā nōo ya ɛpla ihayi ku 1914 a gáā le mafu peee ka Ajɔɔcɛ ku Ɔwɔico gbɔɔ ō lé ɔcɛ́ ɔkpanco ɛ. É gbɔɔ ō Kpo Ɛfú Ku Oduudu Ɛcɛ Aflɛyi a, ōcē ɛdɔ ɛyɛɛyɛyi le tu, ajɛ o jila iyē klla hɛ wulu, mla ɔkpɛta yɔ nɛɛnɛhi. (Ulúk. 21:​10, 11) Ó lɛ aafu ŋ, ó teyi peee ka Ujehofa yɔ i bi ācɛ oklɔcɛ ku Ubáyíbu ɔkwɛyi nyā le je otabɔ lɛ ācɛ ɔlɛ nu a.

12-13. Ɔdi nɛ ayinɛ nōo yɔ i bi alɔ jé ɔwɛ a ya ɛpleeko néē yɔ i Kpo Ɛfú Ku Oduudu Ɛcɛ Ɔmpa, o ya ɛɛ ku uklɔ ku ɔna ō ta a kóō yɔ i nyila a?

¹² Leyi yɛ ɔdā ɔhá nōo klla ya ɛpleeko néē yɔ i Kpo Ɛfú Ku Oduudu Ɛcɛ Ɔmpa a. Ayinɛ nōo yɔ i bi alɔ jé ɔwɛ nōo yɔ ɔlɛ ɔtahɛ ku abɔ ku ɛga ō yuklɔ ku alɔ a, lɛ oklɔcɛ ku ɔkpá ku Ɔdā Nēé Mafú Lɛ Ujɔ́ni 17:8 ya lɔɔlɔhi. Ŋma oklɔcɛ ku uwa a, ó gáā le ta uwa eyī peee ka ɛfú ō kpo ku oduudu ɛcɛ ɔmpa a i gáā ŋmɛyi tu Amagɛdɔn ŋ. Ohigbu ɛnyā, é gáā le jé ka eko ku ɛbɔ géē yɔ igbihi néē lɛ ɛfú a kpo mɛ, nɛ Ācɛ Ocijali Ku Ujehofa klla géē tɔɔna lɛ ācɛ alɛwa fiyɛ. Naana nɛ ɛlā a lɛbɛɛka ó lɛyi ɛpleeko ɔɔma ŋ ma, ayinɛ nōo yɔ i bi alɔ jé ɔwɛ a gáā kwu inɔkpa ku Ugilɛdi i kwaajɛ, o ya ɛɛ kéē nwu ācɛ o tɔɔna ɛlā Ɔwɔico ipu éwo ɔhá ɛlā kéē tɔɔna klla nwu ɛlā ipu oduudu ɛcɛ. É gáā gbɔɔ ō ta ācɛ o tɔɔna ipu éwo ɔhá nyā ɛhɔ kéē tɔɔna ɛpleeko ku ɛfú ō kpo a. O ka tu ɔ, ɔcocɛhɔ néē cika ō lɔtuce ɔ nōo jeeyi a klla kwu ɛnɛɛnɛ inɔkpa éyi i kwaajɛ ipu oduudu aujɔ, néē hi ka u Course in Theocratic Ministry b a, o ya ɛɛ kéē je otabɔ lɛ oduudu ācɛ o tɔɔna ɛlā Ɔwɔico kéē wɛ ɛnɛɛnɛ ācɛ o tɔɔna mla ācɛ o nwu ɛlā. O bu ipu aɔwɛ ɛyɛɛyɛyi nyā, é yɔ i lɛ ācɛ ɔlɛ Ɔwɔico tutu ku uklɔ ku ɔna ō ta nɛ ɛgbá ku nu yɔ nɛhi kpɔ a.

¹³ Icɛ, alɔ lɔfu má peee ka Ujehofa yɔ i ma ɔwɛ fu lɛ ācɛ ɔlɛ nu ɛpleeko olɔnɔ nɛhi ɔɔma a. Ŋmiifi eko néē Kpo Ɛfú Ku Oduudu Ɛcɛ Ɔmpa a, ācɛ ɔlɛ Ujehofa humayi lɛ ɛga ō tɔɔna ipu éwo alɛwa. Ku ɛlā ɔkwɛyi a, ācɛ alɛwa gáā lɛ Ujehofa jé ɛ, ācɛ ɔlɛ nu klla gɔbu yɔ i tɔɔna ipu oduudu ɛcɛ a.

14. Ɔdiya nɛ alɔ lɔfu kpɔtuce ɔwɛ o mafu nōo gē ŋma ɛgiyi ɔwa ku Ujehofa mla ɛgiyi anyakwɔcɛ ku ujɔ néē fu a? (Ɔdā Nēé Mafú Lɛ Ujɔ́ni 2:1) (Má ifoto a.)

¹⁴ Icɛ, ayinɛ nōo wɛ ipu Ígwu Nōo Gē Leyi Kwu Ɔwa Ku Alɔ a gɔbu yɔ i gbolo ce Ukraist kóō ma ɔwɛ fu lɛ uwa. É dɔka ku ukɔ́ néē gē tu ayinɛ a kóō mafu ɔwɛ nɛ Ujehofa mla Ujisɔsi gē leyi má ɛlā a. É kē i bi ācɛ o leyi kwu usɛkut mla anyakwɔcɛ ku ujɔ le ma ɔwɛ fu lɛ aujɔ ɛyɛɛyɛyi. c Anyakwɔcɛ ku ujɔ néē lɛ anɔ tu uwa ɛyi, mla ɛjɛɛji anyakwɔcɛ ku ujɔ ohile wɛ ācɛ nōo yɔ “abɔ̄lɔ́ná” ku Ukraist. (Jé Ɔdā Nēé Mafú Lɛ Ujɔ́ni 2:1.) Ó wɛ ɔkwɛyi, ka anyakwɔcɛ ku ujɔ nyā wɛ ācɛ nōó jila iyē ŋ klla gē ya inyileyi. Umosisi mla Ujosuwa ya inyileyi ekoohi, ɛgɔɔma nōó kē lɛ mla ayikpo a duu a. (Áluk. 20:12; Ujós. 9:​14, 15; Uróm 3:23) Amáŋ alɔ kē lɔfu má peee, ka Ujisɔsi yɔ i ma ɔwɛ fu lɛ ɔcocɛhɔ néē cika ō lɔtuce ɔ nōo jeeyi mla anyakwɔcɛ ku ujɔ néē fu a, ó kē géē gɔbu yɔ i ya ɔɔma “eko dóódu jāā gbéeko nɛ̄ ɛcɛ í mɛ.” (Umát. 28:20) Ohigbu ɛnyā, alɔ cika ō lɔtuce ɔwɛ nɛ ó gē mafu lɛ alɔ o bu ipu ayinɛ alɔ nyā nɛ ó fu kéē bi alɔ jé ɔwɛ a.

ALƆ GĒ LƐ ITENE ƆDAŊ KU ALƆ GƆBU YƆ I YƐCE ƆWƐ NƐ UJEHOFA GĒ MAFU LƐ ALƆ A

15-16. Ɔdi nɛ a nwu ŋma ɔ̄kā ku ācɛ nōo yɛce ɔwɛ o mafu ku Ujehofa a?

¹⁵ Ɔdaŋ ku alɔ gɔbu yɔ i yɛce ɔwɛ nɛ Ujehofa gē mafu lɛ alɔ a, alɔ géē jɔɔnyɛ ɔhā alɛwa babanya. Ocabɔ mafu, Andy mla u Robyn lɛyitaajɛ lɛ ɔtu ō tu kwu ɔtu néē miyɛ ō lɛ oyeeyi ku uwa ya tɔɔtɛ a. (Má ɔdā ōhī néē ka ipu nwtsty lɛyikwu Umátiyu 6:22 a.) Ohigbu ɛnyā, ó le tɔɔtɛ lɛ uwa ō je iyi uwa tɛɛcɛ ō yuklɔ ku ɔlɛ ō gwo ipu ɔwa ku alɔ. Robyn Kahinii: “Ekoohi, alɔ gē lā ɔlɛ nōo nyɛ nɛɛnɛhi nɛ alɔ i kóō gē lɛ ɛga ō bi le he ɔdole ŋ. N klla cɛgbá ō je aɔdā ō bi le je ifoto ɛyɛɛyɛyi nɛ um lɛ a lá, naana nɛ um wɛ ɔcɛ nōo dɔka ifoto ō je nɛhi a. Eko nɛ um yɔ i je uwa lá a, n jikwu nɛhi. Amáŋ bɛɛka Usara nōo wɛ ɔnyā ku Ebraham a, n lɛ ɔtu ku um ya ekponu ō hii cɛ lɛ ɔtu biya gā um ohigbu aɔdā nɛ um leyi gwu uwa bonu a ŋ, amáŋ ō gweeye ohigbu ɔdā nɛ um lɔfu ya lɛ Ujehofa babanya a.” (Uhíb. 11:15) Itene nyá nɛ u Andy mla u Robyn lɛ a? Robyn kahinii: “Alɔ lɛ eeye nɛhi ohigbu ku alɔ jé ka alɔ yɔ i je ɛjɛɛji aɔdā nɛ alɔ lɛ a lɛ Ujehofa. Eko duuma nɛ ami mla ɔba um gē yuklɔ nɛ Ujehofa je lɛ alɔ ō ya a, uklɔ ɔɔma gē cɛ lɛ alɔ gbɛla lɛyikwu ɛgɛ nɛ oyeeyi géē lɛ ipu ɛcɛ ɛyipɛ a.” Andy cɛ mla ɛlā nɛ u Robyn ka a ŋma lɛ ō ka kahinii: “Alɔ lɛ eeye nɛhi ohigbu ka alɔ je ɛjɛɛji eko mla ɔfu ku alɔ lɛ uklɔ ō ya lɛ Ujehofa.”

 ¹⁶ Ɔwɛ ɔhá nyá nɛ alɔ klla gē lɛ itene eko duuma nɛ alɔ yɛce ɔwɛ nɛ Ujehofa gē mafu lɛ alɔ a? Igbihi nɛ ó le ya mɛ ŋma inɔkpa igwo ɛpa a, Marcia lɛ ɔtu ku nu ya ekponu ō yɛce ɔtu ō tu kwu ɔtu nɛ ó miyɛ ō je piya ɔcɛ o gbɔbu ɔna ō ta a. (Umát. 6:33; Uróm 12:11) Ó kahinii: “É lɛ ɛnɛɛnɛ ɛga je gā um ō gā inɔkpa nɛhi ō gáā jé ɔkpá ihayi ɛnɛ nɛ um gáā gbo ije duuma ŋ. Amáŋ, n dɔka ō je ofiyɛ duu ku um lɛ Ujehofa. Ohigbu ɛnyā, ikɔkɔ nɛ um géē cɛ ō gā inɔkpa nɛhi a, n le miya ō lɛ uklɔ abɔ éyi nwu nōo géē ta um abɔ ō gɔbu ō wɛ ɔcɛ o gbɔbu ɔna ō ta. Ɛnyā wɛ ōmiya olɔhi fiyɛ duu éyi nɛ um ya ɛ ma. N wɛ ɔcɛ o gbɔbu ɔna ō ta nōo lɛ eeye fiyɛ babanya. Ohigbu ka uklɔ ku um klla gē jɛga gā um a, ó gē tɔɔtɛ gā um ō yuklɔ ipu Ubɛtɛlu ekoohi mla ō ya aɔdā alɛwa ɔhá lɛ Ujehofa.”

17. Itene ɔhá nyá nɛ alɔ lɔfu lɛ ɔdaŋ ku alɔ gɔbu yɔ i yɛce ɔwɛ nɛ Ujehofa gē mafu lɛ alɔ a? (Ayisáya 48:​17, 18)

¹⁷ Ekoohi, alɔ gē miyɛ ukɔ́ ŋma ɛgiyi ɔwa ku alɔ nōo gē je ogbotu lɛ alɔ. Ocabɔ mafu, é gē tu alɔ ukɔ́ lɛyikwu ō yihɔtu ije fiyɛ ɔfu, mla ō lɛ abɔ ci ō ya ɔdā duuma nōo lɔfu ya ku alɔ biya íne ku Ɔwɔico a. Ipu aɔwɛ ɛyɛɛyɛyi nōo ba nyā, alɔ géē lɛ itene nɛhi ɔdaŋ ku alɔ yɛce ɔwɛ nɛ Ujehofa gē mafu lɛ alɔ a. Alɔ géē lɛ ɔtu oyeŋee klla kwu ŋma ipu unwalu alɛwa nōo lɔfu ya da alɔ a. (1 Utím. 6:​9, 10) Ɛnyā kē géē ta alɔ abɔ ku alɔ gba Ujehofa ɛ̄gbā mla oduudu ɔtu ku alɔ. Ó lɛ ɔdā duuma nōo lɔfu je eeye mla ɔtu ɛbɔ lɛ alɔ fiyɛ ɛnyā gɛ ŋ.—Jé Ayisáya 48:​17, 18.

18. Ɔdiya nɛ a lɛ ɔtu ku uwɔ ya ekponu ō yɔ i yɛce ɔwɛ nɛ Ujehofa gē mafu a?

¹⁸ Ó lɛ aafu ŋ, Ujehofa géē gɔbu yɔ i bi alɛɛcɛ le ma ɔwɛ fu lɛ alɔ ɛpleeko ku owe nɛhi a, ó kē géē gɔbu yɔ i ya ɔɔma jaa gbeeko nɛ Ukraist gbɔɔ ō lé ɔcɛ́ ipu Ihayi Ula Ɛpa Ce Ɔfu Igwo a. (Aíjē 45:16) Alɔ géē gɔbu yɔ i yɛce ɔwɛ o mafu ɔɔma, ɔdaŋ nōó kóō géē he alɔ ɔtu ō ya ɔdā ɔhá naana? Ó géē tɔɔtɛ lɛ alɔ fiyɛ ō ya ɛnyā, ɔdaŋ ku alɔ gē yɛce ɔwɛ nɛ Ujehofa gē mafu lɛ alɔ babanya a. Ohigbu ɛnyā, alɔ yɔ i yɛce ɔwɛ nɛ Ujehofa gē mafu lɛ alɔ a eko doodu, kwu ɔwɛ o mafu nɛ alɔ géē miyɛ ŋma ɛgiyi ācɛ nɛ ó fu ō leyi kwu alɔ a. (Ayis. 32:​1, 2; Uhíb. 13:17) Ɔdaŋ ku alɔ ya lɛ a, ɔtu nɛ alɔ le ce Ujehofa nōo gē ma ɔwɛ fu lɛ alɔ a géē lɔfu fiyɛ, ohigbu ka ó gē gbo alɔ ŋma ɛgiyi ɔdā duuma nōo lɔfu biya ɛma nɛ alɔ lɛ mla ɔ a, klla géē gbo alɔ gā ɔwɛ nōo géē bi alɔ gā oyeeyi opiyoo ipu ɛcɛ ɛyipɛ a.