Eko duuma nɛ alɔ yɔ i tutu ō klɔcɛ, alɔ lɔfu da iyi alɔ ɔka kahinii: ‘Ɔdi nɛ um yɔ i leyice ō nwu a?’ Amáŋ alɔ cɛgbá ō bla, ka naana nɛ alɔ lɔfu hɛce ka ó lɛ aɔdā okpɔcii ōhī nɛ alɔ géē nwu a, ɔɔma i wɛ ka Ujehofa i lɛ aɔdā ɛpɛpɛ nɛ ó dɔka ō nwu alɔ ŋ nɛ ŋ. Ɛgɛnyá nɛ alɔ lɔfu jahɔ tu ɛlā nɛ Ujehofa yɔ i ceyitikwu ō nwu alɔ eko duuma nɛ alɔ yɔ i ya oklɔcɛ ku Ubáyíbu a?

Gbɔɔkɔ ku ijeeyi. Ba Ujehofa ɛba kóō ta uwɔ abɔ ō jɛyi ɛlā nɛ ó dɔka ku á nwu babanya a. (Ujɛ́m. 1:5) Á hii gbolo fiyɛ ɔfu ce aɛlā nɛ a jé gbɔbu ɛ ma ŋ.—Aíit. 3:​5, 6.

Jɛga lɛ ɔfu ku ɛlā ku Ɔwɔico kóō yuklɔ ipu oyeeyi ku uwɔ. “Ɛlā kú Ɔwɔicō yēeyī.” (Uhíb. 4:12) Ohigbu ɛnyā, eko duuma nɛ alɔ gē klɔcɛ ku Ubáyíbu, ó lɔfu nwu alɔ ɛlā ɛpɛpɛ éyi klla ta alɔ abɔ ɔwɛ ɛyɛɛyɛyi ipu oyeeyi ku alɔ. Amáŋ ɔɔma géē ya foofunu ɔdaŋ ka alɔ jé ka ó lɛ aɔdā ōhī nɛ alɔ i jé ŋ, amáŋ alɔ lɔfu nwu aɛlā ɛgɛnyā ŋma ipu Ɛlā ku Ɔwɔico.

Mafu ka ɛjɛɛji ɔdā nɛ Ujehofa gē bi le nwu alɔ ɛlā a jɛ uwɔ eyī. Ɔdole ku ɛlā ku nu lɛbɛɛka “ucɛ ɛ́nɛ́nɛ̄” a. (Ayis. 25:6) A hii kwu ŋma ō jé aikpɛyi ɛlā nɛ a gbɛla ku á gáā jɔɔnyɛ ō ya oklɔcɛ lɛyikwu uwa a ŋ. Ɔdaŋ ku a bi aukɔ́ olɔhi nyā yuklɔ, a géē jɛga lɛ Ɔwɔico kóō ta uwɔ abɔ ō je piya ɔcɛ olɔhi fiyɛ, a klla géē jɔɔnyɛ ō ya oklɔcɛ lɔɔlɔhi!