1-2. Ɔdi gē cɛ lɛ ācɛ ɔlɛ Ɔwɔico gweeye a? (Ujɛ́mīsi 1:​22-25)

 UJEHOFA mla Ɔyinɔnyilɔ ku nu nōo he ɔ ɔtu nɛhi a dɔka ku alɔ gweeye. Ɔcɛ nōo ta ɔkpá ku Aíjē Kú Ɛ̄gbā 119:2 a kahinii: “Ɔhā [amāŋ eeye] yɔ̄ lɛ ācɛ nēe gē yá ɔdā nɛ̄ íne ka ā, nēe klla gē tíne Óndú ā mla odúúdú ɔtū kú uwā” a. Ujisɔsi kahinii: “Ákú ācɛ nēe le ɛlā kú Ɔwɔicō pó, bī ɔ̄ le yúklɔ́ ā lɔhi [amāŋ lɛ eeye] fíyɛ́ á!”—Ulúk. 11:28.

² Abɔ alɔ wɛ ācɛ o gba Ujehofa ɛ̄gbā a, alɔ wɛ ācɛ nōo gē gweeye. Ɔdiya a? Alɔ lɛ aɔdā alɛwa nōo gē cɛ lɛ alɔ gweeye, amáŋ ɔdā ocɛgbá nɛhi éyi nōo ya wɛ ka alɔ gē jé Ɛlā ku Ɔwɔico ojigogo, klla gē ceyitikwu lɔfu lɔfu ō bi ɛlā nɛ alɔ nwu a le yuklɔ.—Jé Ujɛ́mīsi 1:​22-25.

3. Ɛgɛnyá nɛ alɔ gē lɛ itene eko duuma nɛ alɔ bi Ɛlā ku Ɔwɔico le yuklɔ a?

³ Ó lɛ ɔwɛ alɛwa nɛ alɔ gē lɛ itene eko duuma nɛ alɔ “bī [ɛlā a] le yúklɔ́.” Ocabɔ mafu, eko duuma nɛ alɔ bi ɛlā nɛ alɔ nwu ŋma ipu Ɛlā ku Ɔwɔico a le yuklɔ, alɔ gē ya ɔdā nōo he Ujehofa ɔtu, ɔɔma kē i ya ku alɔ gweeye. (Ɔ̄cok. 12:13) Ɔdā ɔhá kpɔ, eko duuma nɛ alɔ yɛce ukɔ́ nōo yɔ ipu Ɛlā ku Ɔwɔico a, alɔ gē ya ku ɛma nɛ alɔ lɛ mla ācɛ apɔlɛ ku alɔ mla ayinɛ alɔ nōo yɔ ipu ujɔ a kóō lɔhi fiyɛ. Á jé ŋ, a lɔfu má ka ɛnyā wɛ ɔkwɛyi ipu oyeeyi ku uwɔ. O ka tu ɔ, alɔ klla gē kwu ŋma aunwalu alɛwa nɛ ācɛ gē lɛ eko duuma néē ta ō lɛyitaajɛ lɛ aukɔ́ ku Ujehofa a. Ku ɛlā ɔkwɛyi a, alɔ cɛtɔha mla Udefidi nōo wɛ Ɔcɛ́ a. Igbihi nɛ ó lɛ ɛlā ka lɛyikwu íne, ɔ́da, mla ɛpɔ ō ka ku Ujehofa ipu ijé a, ó lɛ ɛlā ŋmɛyi kahinii: “A kē í cíla um ulé olɔhi nɛ̄hi ohígbū ka n kwú iyī um ú táajɛ gā uwɔ [amāŋ ohigbu ka um gē lɛyitajɛ lɛ aíne ku uwɔ a].”—Aíjē 19:​7-11.

4. Ɔdiya nōó gē tɔɔtɛ eko doodu ō bi Ɛlā ku Ɔwɔico nɛ alɔ jé a le yuklɔ ŋ ma?

 ⁴ O ya ɛɛ ku alɔ kwu piya ācɛ nōo gē bi Ɛlā ku Ɔwɔico le yuklɔ, alɔ cɛgbá ō jé mla ō klɔcɛ ku Ubáyíbu o ya ɛɛ ku alɔ jɛyi ɔdā nɛ Ujehofa dɔka ku alɔ ya a. Amáŋ, ó gē tɔɔtɛ eko doodu ŋ ohigbu ka alɔ lɛ aɔdā alɛwa ō ya ipu oyeeyi. Ohigbu ɛnyā, alɔ cɛgbá ō lɛ eko taajɛ ō ya ɛnyā. Ó lɛ a, alɔ leyi yɛ aɔdā ōhī nōo lɔfu ta alɔ abɔ ō jé Ubáyíbu ojigogo a. Alɔ klla géē leyi yɛ ɔdā nōo géē ta alɔ abɔ ō gbɛla tu ɛlā nɛ alɔ jé, mla ō má ɔwɛ ɛyɛɛyɛyi nɛ alɔ lɔfu bi ɛlā nɛ alɔ nwu a le yuklɔ ipu oyeeyi ku alɔ a.

LƐ EKO MIYA TAAJƐ Ō JÉ ƐLĀ KU ƆWƆICO

5. Auklɔ ɛyɛɛyɛyi nyá gē je ɛyinɛhi ku eko ku alɔ a?

⁵ Ɛyinɛhi ku ācɛ ɔlɛ Ujehofa lɛ ɔdā alɛwa ō ya. Alɔ gē bi eko alɛwa le teyi kwu aɔdā nɛ Ubáyíbu ka kóō wɛ aɔdā ocɛgbá nɛhi a. Ocabɔ mafu, ɛyinɛhi ku alɔ gē yuklɔ néē ge gba ije lɛ alɔ o ya ɛɛ ku alɔ lɔfu ya ɛgbá ku abɔyi alɔ mla aku ācɛ apɔlɛ ku alɔ. (1 Utím. 5:8) Ɛyinɛhi ku Ācɛ O Yɛce Ukraist gē teyi kwu aɔmaapu ku uwa nōo yɔ i doōcē amāŋ nōo kwu hilokplici ɛ ma. Ɛjɛɛji alɔ kē cɛgbá ō teyi kwu ɔbɔla ku ɔkpiye ku alɔ nōo kē i je eko duu a. Alɔ klla lɛ aɔdā ocɛgbá ō ya ipu ujɔ. Uklɔ éyi nɛ alɔ lɛ nōo cɛgbá nɛhi a wɛ ō ya ɛji ɔfu ku alɔ ō tɔɔna ku ɔkoolɔhi a. Mla ɛjɛɛji uklɔ nɛ awɔ abɔyi uwɔ lɛ ō ya a, ɛgɛnyá nɛ a lɔfu lɛ eko ō jé Ubáyíbu ojigogo, ō gbɛla lipu lipu tu ɛlā nɛ a jé, mla ō ceyitikwu ō bi ɔ le yuklɔ a?

6. Ɛgɛnyá nɛ a lɔfu je Ubáyíbu ō jé piya ɔdā ocɛgbá nɛhi a? (Má ifoto a.)

⁶ Ubáyíbu ō jé wɛ “ɔdā nōo lɔhi [amāŋ cɛgbá] fíyɛ́ dúú” lɛ alɔ abɔ alɔ wɛ Ācɛ O Yɛce Ukraist a, ohigbu ɛnyā alɔ cika ō le má ka alɔ gē ya lɛ a. (Ufíl. 1:10) Lɛyikwu ɔcɛ nōo lɛ eeye a, aya aflɛyi ku ɔkpá ku aíjē kú ɛ̄gbā a kahinii: “Ɛlā nɛ̄ íne kū Óndú ā gē nwū ɔ̄cɛ ā, he ɔ̄ ɔtū fíyɛ́ á. É le ɛlā kú Óndú ā kpó tū ɔtū, anɔ́ɔ é gē gbɛlá kwu ɔ́ otú mɛ́mla ɔlɛ́ɛnɔ” a. (Aíjē 1:​1, 2) Ó teyi peee, ka ɔɔma wɛ ka alɔ cɛgbá ō lɛ eko taajɛ ō jé Ubáyíbu. Eko nyá wɛ eko olɔhi fiyɛ duu ō bi le jé Ubáyíbu a? Ohi a lɔfu wɛ ɛyɛɛyɛyi lɛ eyeeye ku alɔ. Amáŋ ɔdā nōo cɛgbá a,  wɛ ka eko nɛ alɔ gáā miya taajɛ a wɛ eko nōo géē jɛga lɛ alɔ ō jé Ubáyíbu ojigogo. Ɔyinɛ alɔ nɔnyilɔ éyi nōo lé ka u Victor a kahinii: “Ó gē he um ɔtu ō jé Ubáyíbu eko ɔci. Naana nōó gē he um ɔtu ō caŋjɛ teeko eko ɔcɔɔci ŋ ma, ɔɔma wɛ eko nɛ ɔdā duuma i yɔ ō jɛ um ɛlá ŋ ma. Aɔdā alɛwa i yɔ ipu ɔtu ku um nɛ um géē gbɛla lɛyikwu ɔ eko ɔɔma ɛ ŋ, ó klla gē tɔɔtɛ gā um fiyɛ ō lɛ ɔtu ku um tu ɔdā nɛ um yɔ i jé a.” Á jé ŋ, ɔɔma lɔfu wɛ ɔkwɛyi ipu āhɔ̄ ku uwɔ. Da iyi uwɔ ɔka kahinii: ‘Eko nyá wɛ eko nōo lɔhi gā um fiyɛ duu ō bi le jé Ubáyíbu a?’

GBƐLA LIPU LIPU TU ƐLĀ NƐ A JÉ A

7-8. Ɔdi lɔfu ci alɔ ŋma ō lɛ itene lɔɔlɔhi ŋma ɛlā nɛ alɔ jé a? Je ocabɔ mafu.

⁷ Ɔdaŋ ku a lɛ eko nɛ a géē bi le jé Ubáyíbu a miya taajɛ, ó lɛ ɔdā ɔhá nɛ a klla cɛgbá ō leyi kwɛɛcɛ ku nu. Ó lɛ eko duuma nɛ a jé ɔkpá nōó gboji ŋ, ó tɔɔtɛ gā uwɔ ō blakwu ɛlā nɛ a jé a gɛ ŋ? Ɔɔma ya da ɛjɛɛji alɔ ɛ. Ɛnyā lɔfu ya eko duuma nɛ alɔ gē jé Ubáyíbu duu. Ocabɔ mafu, alɔ lɔfu miya ō jé ɛga ku Ubáyíbu alɛwa ɛ̄cī doodu. Ɔɔma wɛ ɔdā olɔhi. Alɔ cika ō ya ōmiya klla ceyitikwu lɔfu lɔfu ō yɛce ōmiya nɛ alɔ ya a. (1 Ukɔ́r. 9:26) Amáŋ, ɔdaŋ ka alɔ dɔka ō lɛ itene nōo fiyɛ duu a ŋma ipu Ubáyíbu ō jé ku alɔ, alɔ cɛgbá ō ya fiyɛ ō jé ɔ anca.

⁸ Gbɛla tu ocabɔ nyā: Aikpɔcí cɛgbá ɔwɔ o ya ɛɛ kéē wi. Amáŋ ɔdaŋ ka ɔwɔ le ya nwune fiyɛ ɔfu, ajɛ a géē je mu mla eŋkpɔ. Ɔdaŋ ka ɔwɔ a kē gɔbu yɔ i ya nwune, ó gáā gā ipu ajɛ a ŋ, aikpɔcí a i kē gáā lɛ itene duuma ŋma anu ŋ. Ó géē lɔhi fiyɛ ɔdaŋ ka ɔwɔ a ya ɛmɛɛma, ohigbu ka ɔɔma géē ya ka eŋkpɔ a kóō gā ipu ajɛ a klla ta aikpɔcí abɔ kéē jɛ. Ɔwɛ ekponu ɔɔma, alɔ cika ō lɛ abɔ ci ō jé Ubáyíbu fiya fiya nɛ alɔ i gáā lɛ eko ō gbɛla tu ɛlā nɛ alɔ jé mla ō blakwu uwa, klla bi ɛlā nɛ alɔ jé a le yuklɔ ŋ.—Ujɛ́m. 1:24.

9. Ɔdi nɛ alɔ cɛgbá ō ya ɔdaŋ ku alɔ gáā le má ku alɔ gē jé Ubáyíbu fiya fiya a?

⁹ A má ka ó lɛ ekoohi nɛ a gē jé Ubáyíbu fiya fiya? Ɔdi nɛ a cika ō ya a? Jé ɔ ɛmɛɛma o ya ɛɛ ku a lɔfu gbɛla tu ɛlā nɛ a yɔ i jé a, amāŋ ō lɛ eko taajɛ igbihi nɛ a lɛ Ubáyíbu jé mɛ nɛ a géē bi le gbɛla tu ɛlā nɛ a jé a. Ɛnyā i cɛgbá ō wɛ  ɔdā olɔnɔ ŋ. A lɔfu miya ō lɛ eko nwune taajɛ eko duuma nɛ a yɔ i ya oklɔcɛ o ya ɛɛ ku a lɔfu gbɛla tu ɛlā nɛ a jé a. Amāŋ a lɔfu miya ō jé aɔgba ligii foofunu cɛɛ a bi eko ohile a le gbɛla tu ɛlā nɛ a jé a. Victor nɛ alɔ kɛla lɛyikwu ɔ gbɔbu a kahinii: “Ɛga ku Ubáyíbu kpii nɛ um gē jé a, á jé ŋ, ɛyi éyi foofunu. Ohigbu ka um gē jé Ubáyíbu eko ɔcɔɔci a, ó gē tɔɔtɛ gā um ō bi ɛ̄cī ohile a le gbɛla tu ɛlā nɛ um jé a.” A lɔfu miya ɛgɛ nɛ a géē jé Ubáyíbu gáā kwu lɛ a abɔyi uwɔ, amáŋ ó cɛgbá ku a jé ɔ ɛmɛɛma, o ya ɛɛ kóō lɔfu tɔɔtɛ gā uwɔ ō gbɛla tu ɛlā nɛ a jé a.—Aíjē 119:97; má ikpati nyā nōo kahinii: “ Aɔka Nɛ A Lɔfu Leyi Yɛ Ɔ.”

10. Je ocabɔ mafu ku ɛgɛ nɛ a lɔfu dɔka ɔwɛ ɛyɛɛyɛyi nɛ a géē bi ɛlā nɛ a yɔ i nwu a le yuklɔ a. (1 Ācɛ Utesaloníka 5:​17, 18)

¹⁰ Eko duuma nɛ a lɛ aɔgba ku Ubáyíbu ōhī jé, gbɛla lɛyikwu ɛgɛ nɛ a lɔfu bi uwa le yuklɔ a. Eko duuma nɛ a yɔ i jé Ɛlā ku Ɔwɔico, da iyi uwɔ ɔka kahinii: ‘Ɛgɛnyá nɛ um lɔfu bi aɛlā nyā le yuklɔ babanya amāŋ ɛcɔbu a?’ Ocabɔ mafu, alɔ je ɔ ka Ubáyíbu ō jé ku uwɔ lɛ ō ya mla ɔkpá ku 1 Ācɛ Utesaloníka 5:​17, 18. (Jé.) Igbihi nɛ a lɛ aɔgba ɛpa ɔɔma jé, a lɔfu mahayi cɛɛ ku a gbɛla tu igbo ɛmula nɛ a gē gbɔɔkɔ, mla ɛgɛ nɛ a gbɔɔkɔ lipu lipu lɛ a. A klla lɔfu gbɛla tu aɔdā nɛ Ujehofa ya gā uwɔ nōo jɛ uwɔ eyī a. Á jé ŋ, a lɔfu miya ku a géē ta Ujehofa ahinya ku aɔdā okpɔcii ɛta. Ɔdaŋ nɛ a kóō lɛ eko ligii taajɛ ō gbɛla tu aɛlā nɛ a nwu ŋma ipu Ubáyíbu a, ó géē ta uwɔ abɔ ō jɛyi ku Ɛlā ku Ɔwɔico mla ō bi ɛlā nōó ka a le yuklɔ. Gbɛla tu itene nɛ a géē lɛ ɔdaŋ ku a gē ya ɔdā ɛgɛnyā ɛ̄cī doodu mla aɛga ku Ubáyíbu ɔhá nɛ a jé a! Ku ɛlā ɔkwɛyi a, abɔ a gɔbu yɔ i ya lɛ a, a géē je piya ɔcɛ nōo gē bi Ɛlā ku Ɔwɔico le yuklɔ lɔɔlɔhi. Amáŋ, ɔdi nɛ a cika ō ya ɔdaŋ ku a gáā le má ka ó lɛ aɔdā alɛwa nɛ a cɛgbá ō ya lɔhi fiyɛ anu a?

YA ŌMIYA NƐ A JÉ KU A GÉĒ YA JILA GLA

11. Ɔdiya nɛ ɔtu lɔfu gbenyi gā uwɔ ekoohi a? Je ocabɔ mafu.

¹¹ Eko duuma nɛ a yɔ i jé Ubáyíbu, ekoohi ɔtu lɔfu gbenyi gā uwɔ ohigbu ku a má ka ó lɛ aɔdā alɛwa nɛ a cɛgbá ō ya lɔhi fiyɛ anu. Ocabɔ mafu, alɔ je ɔ ka ɛ̄cī éyi Ubáyíbu ō jé ku uwɔ lɛ ō ya mla ukɔ́ ō tu lɛyikwu ō dɔka ɔcɛ éyi fiyɛ ɔcɛ ɔhá ŋ. (Ujɛ́m. 2:​1-8) A gáā le má ku a lɔfu ya lɔhi fiyɛ ɔwɛ nɛ a gē ya ɛlā mla ācɛ ɔhá a, ohigbu ɛnyā a le miya ō lɛ aopiyabɔ ōhī ya. Ɔɔma lɔhi nɛhi! Ɛ̄cī nōo gboce ɔ a, a gáā lɛ aɛga ku Ubáyíbu ōhī jé nōo mafu ka ó cɛgbá ku a leyi kwɛɛcɛ lɛyikwu ɛlā nɛ a gē ka a. (Ujɛ́m. 3:​1-12) A gáā le má ka ekoohi a gē kɛla nōó gē gbɔtu nɛɛ ŋ, amāŋ aɛlā nōo gē cɛ lɛ ɔtu gbenyi lɛ ɔcɛ. Ohigbu ɛnyā, a gáā le miya ka eko duuma nɛ a gē kɛla lɛ ācɛ ɔhá, ó géē wɛ ɛlā nōo géē ta uwa ɔtu kwu ɔtu. Ɛ̄cī nōo gboce ɔ  kpɔ a, Ubáyíbu ō jé ku uwɔ gáā lɛ ō ya mla ukɔ́ ō tu lɛyikwu ō je piya ɔya ku ɛcɛ nyā ŋ. (Ujɛ́m. 4:​4-12) A gáā le má ku a cɛgbá ō leyi kwɛɛcɛ fiyɛ lɛyikwu ɔdā nɛ a gē jé, ɔdā nɛ a gē má, mla ɛlā nɛ a gē jahɔ tu ɔ a. Ɛ̄cī ɔmɛnɛ a, ɔtu lɔfu gbenyi gā uwɔ ku aɔdā alɛwa nɛ a cɛgbá ō ya lɔhi fiyɛ anu a.

12. Ɔdiya nɛ ɔtu i cika ō gbenyi gā uwɔ ŋ, ɔdaŋ ku Ubáyíbu ō jé ku uwɔ le mafu ku a cɛgbá ō ya aopiyabɔ ōhī a? (Má ɛlā néē ta ɛhaajɛ ku upeji a.)

¹² Ɔdaŋ ku a má ka ó lɛ aɔdā alɛwa nɛ a cɛgbá ō ya opiyabɔ amāŋ ya lɔhi fiyɛ anu, ɔtu ka ó hii gbenyi gā uwɔ ŋ. Ō jé ka ó lɛ aɔdā ōhī nɛ a cɛgbá ō ya lɔhi fiyɛ anu a, mafu ku a wɛ ɔcɛ o tu iyi uwɔ waajɛ klla lɛ ɔtu olɔhi. Ɔdaŋ ka alɔ wɛ ācɛ o tu iyi alɔ waajɛ, alɔ géē jé Ubáyíbu mla ō dɔka ɔwɛ ɛyɛɛyɛyi nɛ alɔ lɔfu ya lɔhi fiyɛ. a Alɔ klla cɛgbá ō bla, kóō je “pīya ɔ̄cɛ ɛ̄yīpɛ̄” a wɛ ɔdā nɛ alɔ cika ō gɔbu yɔ i ya. (Ukól. 3:10; má study note nyā nōo kahinii: “is being made new.”) Ɔdi lɔfu ta uwɔ abɔ ō wɛ ɔcɛ nōo gē yɔ i bi Ɛlā ku Ɔwɔico le yuklɔ a?

13. Ɔdi wɛ ɔwɛ olɔhi éyi ō bi ɛlā nɛ a jé ɛ ma le yuklɔ a? (Má ifoto a.)

¹³ Ikɔkɔ ō ceyitikwu ō bi ɛjɛɛji ɛlā nɛ a jé a le yuklɔ igbeekponu a, a lɔfu ceyitikwu ō bi éyi amāŋ ɛpa ku uwa le yuklɔ. (Aíit. 11:2) Lɛ ɛnyā jama: Lɛ ōmiya ku aɔdā nɛ a cɛgbá ō ya lɔhi fiyɛ anu a ya, cɛɛ a lɛ éyi amāŋ ɛpa ku uwa fu ō ya lɔhi fiyɛ anu aflɛyi, cɛɛ igbihaajɛ a ceyitikwu ō ya lɔhi fiyɛ aya ohile a. Imi nɛ a cɛgbá ō gbɔɔ ŋma a?

14. Aōmiya nyá nɛ a lɔfu gbɔɔ mɛmla ɔ a?

¹⁴ A lɔfu gbɔɔ mla ɛ̄nɛ̄ a jé kóō géē tɔɔtɛ gā uwɔ fiyɛ ō ya jila a. Amāŋ a lɔfu miya ō ya lɔhi fiyɛ ɛga nɛ a má ka o cɛgbá fiyɛ duu a. Eko duuma nɛ a lɛ ōmiya ku ɛga nɛ a cɛgbá ō ya lɔhi fiyɛ anu a ya, bi aɔkpá ku alɔ le jila ɛlā má.  Á jé ŋ, alɔ lɔfu yuklɔ mla u Watch Tower Publications Index amāŋ Research Guide for Jehovah’s Witnesses. Gbɔɔkɔ lɛ Ujehofa cɛɛ ku a ba ɔ kóō ya ku “ɔtū kóō he [uwɔ], cɛ́ɛ́ kú aá yá ɔdā nōó dɔɔ̄kā kú [alɔ] yá ā.” (Ufíl. 2:13) Oŋma ɔɔma, ceyitikwu ku a bi ɛlā nɛ a nwu ɛ ma le yuklɔ. Eko duuma nɛ a má ka ó le tɔɔtɛ gā uwɔ ō ya opiyabɔ amāŋ ō ya lɔhi fiyɛ ipu uce ō ya éyi nɛ Ɔcɛ O Yɛce Ukraist cika ō lɛ a, a géē lɛ ɔtu ō tu kwu ɔtu ō gɔbu yɔ i ya opiyabɔ. Á jé ŋ, ó klla géē tɔɔtɛ gā uwɔ fiyɛ ō ya aopiyabɔ ɔhá nōo cɛgbá duu a.

ƐLĀ KU ƆWƆICO KÓŌ “YƆ̄ GĒ YÚKLƆ́ IPÚ AÁ”

15. Ɛgɛnyá nɛ ācɛ ɔlɛ Ujehofa wɛ ɛyɛɛyɛyi gwu ācɛ alɛwa nōo gē jé Ubáyíbu a? (1 Ācɛ Utesaloníka 2:13)

¹⁵ Ācɛ ōhī jé Ubáyíbu igbalɛwa ɛ. Amáŋ é kpɔtuce ɛlā nɛ Ubáyíbu nwu a ɔkwɔɔkwɛyi? É gē ceyitikwu ō lā oyeeyi ku uwa ɛgɛ nɛ Ubáyíbu ka a, amāŋ ō ya opiyabɔ ipu oyeeyi ku uwa? Ehee. Ācɛ alɛwa i gē yɛce ukɔ́ ku Ubáyíbu ŋ. Amáŋ ācɛ ɔlɛ Ujehofa wɛ ɛyɛɛyi gwu ācɛ ɛgɔɔma ta! Bɛɛka Ācɛ O Yɛce Ukraist ku eko aflɛyi a, alɔ “cɛ̄ɛla ā bɛ̄ɛka olɛhɔ̄ kú Ɔwɔicō ā, ɛlā kú Ɔwɔicō nōo kē wɛ ɔkwɔ̄ɔ̄kwɛ̄yi ā.” O ka tu ɔ, alɔ gē ya ɔdā duuma nɛ alɔ ya gla a ō bi aukɔ́ ku Ubáyíbu le yuklɔ ipu oyeeyi ku alɔ.—Jé 1 Ācɛ Utesaloníka 2:13.

16. Ɔdi lɔfu ta alɔ abɔ ō jé piya ācɛ nōo gē bi Ɛlā a le yuklɔ a?

¹⁶ Ó gē tɔɔtɛ eko doodu ō jé mla ō bi Ɛlā ku Ɔwɔico le yuklɔ ŋ. Ó lɔfu yɔ i lɔnɔ tu alɔ ō lɛ eko taajɛ ō jé Ubáyíbu. Amāŋ alɔ lɔfu jé Ubáyíbu fiya fiya nɛ alɔ i lɛ eko taajɛ ō gbɛla tu ɛlā nɛ alɔ jé a ŋ. Amāŋ ɔtu lɔfu gbenyi lɛ alɔ ohigbu ɛga alɛwa nɛ alɔ má ka alɔ cɛgbá ō ya lɔhi fiyɛ anu a. Ɔdā duuma nōo lɔfu wɛ unwalu ku uwɔ a, ó wɛ ɔdā nōo géē fiyɛ uwɔ ɔfu ŋ. Mla otabɔ ku Ujehofa, a lɔfu ya ɔ lé gla. Alɔ lɛ ɔtu ku alɔ ya ekponu ō miyɛ otabɔ ku nu ō je piya ācɛ nōo gē bi Ɛlā a le yuklɔ, ó wɛ ācɛ nōo gē je uwa mlanyi ŋ. Ó lɛ aafu ŋ, ɛgɛ nɛ alɔ gē jé Ɛlā ku Ɔwɔico tōōtɔ̄ɔ̄ klla gē bi ɔ le yuklɔ ipu oyeeyi ku alɔ a, ɛgɔɔma nɛ alɔ gáā lɛ eeye lɛ duu a.—Ujɛ́m. 1:25.