1. Ɔdi nɛ Ujisɔsi géē ya nōó gboji gɛ ŋ ma?

 ALƆ lā ɛpeeko nɛ aopiyabɔ alɛwa géē ya! Ó gboji gɛ ŋ, Ujisɔsi géē kɛpɔ tu eyeeye ku ācɛ nōo lā ipu ɛcɛ nyā a. Ujisɔsi da alɔ lɛyikwu aɔdā nōo géē yɔ i ya ipu ɛcɛ nyā gbɔbu ɛɛ kóō wa gáā kɛpɔ a. Ó je “ɔdōcābɔ̄” lɛ ayikpo ku nu lɛyikwu ō wa ku nu, mla “eko nɛ̄ ɛcɛ nyā géē mɛ ā.” (Umát. 24:3) Ɔdocabɔ nyā yɔ ipu ɔkpá ku Umátiyu ɛyi 24 mla 25 mla ɔkpá ku Umáki ɛyi 13 mla Ulúku ɛyi 21.

2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a, ɛgɛnyá nɛ ɛnyā kē gáā ta alɔ abɔ a?

² Ujisɔsi bi aciije ɛta le yuklɔ o ya ɛɛ kóō ta alɔ abɔ ō le tutu taajɛ. É lɛbɛɛka ahɔ̄ ō pi lɛ alɔ a. Enyā lɛ ō ya mla aciije lɛyikwu aala mla aɛwu, ayipɛ ancɛnya nōó jé ɔcɛyilɔ ŋ nōo jeeyi mla aɛ̄nɛ̄ o wɛ aolila, mla aciije lɛyikwu ikpiije a. Eyeeye ku aaciije ɔɔma ta alɔ abɔ ō jé ka Ujisɔsi géē kɛpɔ tu ɔnyɔɔnyɛ oŋma lɛ uce ō ya ku nu. Ipu ikpɛyi ɛlā nyā, alɔ géē kɛla lɛyikwu aaciije nyā klla má ɛgɛ nɛ alɔ lɔfu bi uwa le yuklɔ a. Aciije aflɛyi nɛ alɔ gáā kɛla lɛyikwu ɔ a wɛ aciije lɛyikwu aala mla aɛwu a.

AALA MLA AƐWU A

3. Eko nyá nɛ Ujisɔsi gáā kɛpɔ tu ācɛ a?

³ Ipu aciije lɛyikwu aala mla aɛwu a, Ujisɔsi ka ka anuɔ géē kɛpɔ tu ācɛ oŋma lɛ ɛgɛ néē miyɛ ɔkooɔhi a lɛ, amāŋ ɔdaŋ ka é je otabɔ lɛ ayinɛ nu néē lɛ anɔ tu uwa ɛyi a. (Umát. 25:​31-46) Ɛpleeko ku “ōwē nɛ̄hi” a, ó géē kɛpɔ tu alɛɛcɛ ɔdaŋ néē wɛ aala amāŋ aɛwu gbɔbu lɛ eko ku Amagɛdɔn. (Umát.  24:21) Ɛgɛ nɛ ɔcogbaala gē kɔ aala ŋma ipu aɛwu a, ɔwɛ ekponu ɔɔma, Ujisɔsi géē kɔ ācɛ nōo hayi kpaakpa je otabɔ lɛ ācɛ nōo gē yɛce ɔ néē lɛ anɔ tu uwa ɛyi a, ŋma ipu ācɛ nōó ya lɛ a ŋ ma.

4. Ɛgɛ nɛ ɔkpá ku Ayisáya 11:​3, 4 ka a, ɔdiya nɛ alɔ lɔfu lɔtuce kpɔcii ka Ujisɔsi géē kɛpɔ tu ācɛ ɔwɛ okpaakpa a? (Má ifoto nōo yɔ ku Ɔda Ō Gbaajɛ nyā a.)

⁴ Ubáyíbu ka ka eko nɛ Ujisɔsi géē kwɛyi Ujehofa ō kɛpɔ a, ó géē kɛpɔ okpaakpa eko doodu. (Jé Ayisáya 11:​3, 4.) Ó gē má ɔdā nɛ ācɛ gē ya, ɔdā néē gē gbɛla, mla ɛlā néē gē ka a—kwu ɛgɛ néē gē ya ɛlā mla ayinɛ nu néē lɛ anɔ tu uwa ɛyi a. (Umát. 12:​36, 37; 25:40) Ujisɔsi géē jé ācɛ nōo je otabɔ lɛ ayinɛ nu néē lɛ anɔ tu uwa ɛyi mla uklɔ néē gē ya a. a Ɔwɛ ocɛgbá nɛhi éyi nɛ ɔcɛ lɔfu je otabɔ lɛ ayinɛ ku Ukraist a wɛ oŋma lɛ ō ta uwa abɔ ipu uklɔ ku ɔna ō ta a. É géē kɛpɔ tu ācɛ nōo gē je otabɔ lɛ uwa nyā ka “ācɛ nēe gē yá ɔdā nōo he Ɔwɔicō ɔtū ā.” É kē géē lɛ ɛnɛɛnɛ ɛga ō “yēeyī piyóó” ipu ɛcɛ nyā. (Umát. 25:46; Mafú 7:​16, 17) Ɛnyā wɛ ɛnɛɛnɛ ule néē géē cila uwa! Oŋma lɛ ō hayi kpaakpa ɛpleeko ku owe nɛhi a mla ō gɔbu ya lɛ a, é géē ya ku iye ku uwa kóō yɔ ipu “ɔkpá kú [oyeeyi] ā.”—Mafú 20:15.

5. Ɔdi wɛ ɛlā ō nwu nōo yɔ ipu aciije lɛyikwu aala mla aɛwu a, anyɛ kē lɔfu lɛ itene ŋma anu duu a?

⁵ Mafu ku a wɛ ɔcɛ nōo hayi kpaakpa. Ācɛ nɛ Ujisɔsi bi ipu ɔtu kpɔcii ipu aciije ku nu lɛyikwu aala mla aɛwu a, wɛ ācɛ nōo lɛ eyiyoce ō lā oyeeyi opiyoo ipu ɛcɛ nyā a. É gē mafu ka é lɛ ɔtu okpoce ŋma lɛ ō je otabɔ lɛ ayinɛ ku Ukraist a ipu uklɔ ku ɔna ō ta, mla oŋma lɛ ō hayi kpaakpa ō yɛce ɔwɛ o mafu ku ɔcocɛhɔ néē cika ō lɔtuce ɔ nōo jeeyi nɛ Ujisɔsi fu a. (Umát. 24:45) Amáŋ ācɛ nōo lɛ eyiyoce ō gā ɔkpanco a cɛgbá ō lɛyitaajɛ lɛ ahɔ̄ ō pi nōo yɔ ipu aciije lɛyikwu aala mla aɛwu a duu. Ɔdiya a? Ohigbu ka Ujisɔsi gē leyi taajɛ ō má uce ō ya ku uwa, ɛlá ō gbo ku uwa, mla ɛlā néē gē ka a. Uwa abɔyi uwa cɛgbá ō hayi kpaakpa duu. Ku ɛlā ɔkwɛyi a, Ujisɔsi klla ta aaciije ɔhá nōo wɛ ahɔ̄ ō pi kpɔcii lɛ ācɛ néē lɛ anɔ tu uwa ɛyi a. Aaciije nyā yɔ ipu ɔkpá ku Umátiyu ɛyi 25. Babanya, alɔ kɛla lɛyikwu aciije lɛyikwu ayipɛ ancɛnya nōó jé ɔcɛnyilɔ ŋ nɛ ōhī ku uwa wɛ ācɛ ojeeyi, nɛ aɔhá a kē wɛ aolila a.

AYIPƐ ANCƐNYA NŌÓ JÉ ƆCƐNYILƆ Ŋ NŌO JEEYI MLA AƐ̄NƐ̄ O WƐ AOLILA A

6. Ɛgɛnyá nɛ ācɛ ɛhɔ ku ayipɛ ancɛnya nōó jé ɔcɛnyilɔ ŋ ma mafu ka é wɛ ācɛ ojeeyi a? (Umátiyu 25:​6-10)

⁶ Ipu aciije nyā, Ujisɔsi kɛla lɛyikwu ayipɛ ancɛnya igwo nōó jé ɔcɛnyilɔ ŋ nōo nyɔ gáā gbeyi ɔcɛ olɔnya ɔwɛ a. (Umát. 25:​1-4) Ɛjɛɛji uwa leyice ō ba ɔcɛ olɔnya a iyē gā ɔnu ucɛ ku omɛɛlɛ mɛɛlɛ a. Ujisɔsi ka ka ɛhɔ ku uwa wɛ “ācojéeyī,” ɛhɔ ɔhá a kē wɛ “aólíla.” Ayipɛ ancɛnya nōó jé ɔcɛnyilɔ ŋ nōo jeeyi a le tutu taajɛ klla leyi kwɛɛcɛ. Ɛgɛ duuma nōó kóō gboji lɛ, é le tutu ō gbeyi ɔcɛ olɔnya a, ɔdaŋ nɛ́ ó kóō géē wa ahaapa otu naana. Ohigbu ɛnyā, é bi agege néē lɔfu lɛ anɔ tu ɔ nōo géē ta uwa abɔ ō mɛɛbɛ eko duuma nɛ otu le bi. É kóō bi anɔ mla iyi uwa ohigbu eko nɛ ɔcɛ olɔnya a le gboji ō wa. É le tutu taajɛ ku agege ku uwa kóō yɔ i cɛ gɔbu. (Jé Umátiyu 25:​6-10.) Eko nɛ ɔcɛ olɔnya a gā a, ayipɛ ancɛnya nōó jé ɔcɛnyilɔ ŋ nōo jeeyi a, le yɛ mla ɔcɛ olɔnya a gā ɔnu ucɛ ku omɛɛlɛ mɛɛlɛ a. Ɔwɛ ekponu ɔɔma, Ācɛ O Yɛce Ukraist néē lɛ anɔ tu uwa ɛyi nōo le tutu taajɛ ŋma lɛ ō leyi kwɛɛcɛ mla ō hayi kpaakpa jaa gbeeko nɛ Ukraist gáā wa a, géē miyɛ ule kóō ba Ujisɔsi Ukraist nōo wɛ ɔcɛ olɔnya a iyē ipu Ajɔɔcɛ ku  ɔkpanco ku nu. b (Mafú 7:​1-3) Ayipɛ ancɛnya ɛhɔ nōó jé ɔcɛnyilɔ ŋ nōo kē wɛ aolila a kē bɛɛ?

7. Ɔdi ya da ayipɛ ancɛnyɛ ɛhɔ nōó jé ɔcɛnyilɔ ŋ nōo wɛ aolila a, ɔdi kē ya a?

⁷ Ayipɛ ancɛnya ɛhɔ nōó jé ɔcɛnyilɔ ŋ nōo wɛ aolila a i tutu taajɛ eko nɛ ɔcɛ olɔnya a wa ɛgɛ nɛ ācɛ ojeeyi a ya a ŋ. Agege ku uwa le ba ō nyi ɛ, é kē bi anɔ ɔhá mla iyi uwa ŋ. Eko néē le jé ka ɔcɛ olɔnya a i gboji ō wa gɛ ŋ ma, é le yɛ o ya ɛɛ kéē gáā lá anɔ. É piyɛyi eko nɛ ɔcɛ olɔnya a wa a ŋ. Ɛpleeko ɔɔma, “ācɛ nēe tútū ā le yɛ tá ɛgiyí ucɛ kú ɔnyā ō lɛ ā mɛ́mla anú, anɔ́ɔ é lɛ ɔwɛ gwū á.” (Umát. 25:10) Igbihaajɛ nɛ ayipɛ ancɛnya nōó jé ɔcɛnyilɔ ŋ ma le cigbihi néē dɔka ō gā inu néē yɔ i lé ucɛ ku omɛɛlɛ mɛɛlɛ a, ɔcɛ olɔnya a da uwa kahinii: “Ń kōō jé aá ŋ́.” (Umát. 25:​11, 12) Ayipɛ ancɛnya nōó jé ɔcɛnyilɔ ŋ ɔɔma, i tutu taajɛ kéē gbeyi ɔcɛ olɔnya a ɛgɛ duuma nɛ ó géē gboji ō wa a ŋ. Ɔdi wɛ ɛlā ō nwu lɛ ācɛ néē lɛ anɔ tu uwa ɛyi a?

8-9. Ɛlā nyá nɛ ācɛ néē lɛ anɔ tu uwa ɛyi a lɔfu nwu ŋma aciije lɛyikwu ayipɛ ancɛnya nōó jé ɔcɛnyilɔ ŋ ma? (Má ifoto a.)

⁸ Mafu ku a le tutu taajɛ klla leyi kwɛɛcɛ. Ujisɔsi i ka ka ígwu ɛpa ku ācɛ néē lɛ anɔ tu uwa ɛyi a géē yɔ ŋ, ígwu éyi nōo le tutu ō gbeyi jaa gbeeko nɛ Ujisɔsi géē wa ɛpleeko ku owe nɛhi a, mla ígwu ɔhá nōó gáā ya lɛ a ŋ ma. Ikɔkɔ ɔɔma, ó yɔ i lɛ ɔ teyi peee ɔdā nōo géē ya da ācɛ néē lɛ anɔ tu uwa ɛyi, ɔdaŋ ka é tutu ō hayi kpaakpa ō lɔtu jaa gā ajaajɛ ŋ ma. Ɔdaŋ ka é tutu ŋ, é gáā miyɛ ule ku uwa ŋ. (Ujɔ́n. 14:​3, 4) Ɔɔma géē wɛ ɔdā okwiye nɛhi! Ɔdaŋ ka alɔ lɛ eyiyoce ō gā ɔkpanco amāŋ ō lā ipu ɛcɛ nyā, ɛjɛɛji alɔ cɛgbá ō yuklɔ mla ahɔ̄ ō pi nōo yɔ ipu aciije ku ayipɛ ancɛnya nōó jé ɔcɛnyilɔ ŋ ma. Eyeeye ku alɔ cɛgbá ō leyi kwɛɛcɛ klla le tutu taajɛ, ɔɔma wɛ ō tutu ō lɔtu jaa gā ajaajɛ.—Umát. 24:13.

⁹ Igbihi nɛ ó lɛ aciije ta lɛyikwu ayipɛ ancɛnya nōó jé ɔcɛnyilɔ ŋ o ya ɛɛ kóō mafu ɛgbá  kóō tutu taajɛ mla ō leyi kwɛɛcɛ a, Ujisɔsi klla ta aciije ɔhá lɛyikwu ikpiije. Aciije ɔɔma mafu ɔdā nōo ya ɛɛ nōó cɛgbá ku alɔ wɛ ācɛ o yuklɔ lɔfu lɔfu a.

IKPIIJE A

10. Ɛgɛnyá nɛ acocɛhɔ ɛpa mafu ka é lɔtuce uwa gla a? (Umátiyu 25:​19-23)

¹⁰ Ipu aciije lɛyikwu ikpiije a, Ujisɔsi kɛla lɛyikwu acocɛhɔ ɛpa nōo mafu ka ɔkpani ku uwa lɔtuce uwa gla mla éyi ku uwa nōó ya lɛ a ŋ ma. (Umát. 25:​14-18) Acocɛhɔ ɛpa a mafu ka é lɔtuce uwa gla, oŋma lɛ ō yuklɔ lɔfu lɔfu o ya ɛɛ kéē ya ije nwune fiyɛ lɛ ɔkpani ku uwa. Gbɔbu ɛɛ kóō gā iyawu a, ó lɛ ikpiije je lɛ uwa—nōo wɛ ije nɛhi. Acocɛhɔ ɛpa néē lɔtuce uwa gla a yuklɔ lɔfu lɔfu klla bi ije ku uwa yuklɔ ɔwɛ ijeeyi. Ɔdi bɛɛcɛ ŋma anu a? Eko nɛ ɔkpani ku uwa piyɛyi a, é lɛ ije ya ɛga ɛpa fiyɛ ɛ̄nɛ̄ ó je lɛ uwa a. Ɔkpani ku uwa a cɛtra uwa nɛɛnɛhi—ó klla hi uwa igwú kéē “wā í gwéeyē mɛ́mla [anu].” (Jé Umátiyu 25:​19-23.) Amáŋ ɔcocɛhɔ ɔmɛta a kē bɛɛ? Ɔdi nɛ ó ya mla ije nɛ ɔkpani ku nu je lɛ ɔ a?

11. Ɔdi ya da ɔcocɛhɔ nōo wɛ “okwáahi” a, ɔdi kē ya a?

¹¹ Ɔcocɛhɔ ɔmɛta a miyɛ ikpiije ekponu amáŋ ó wɛ ɔcɛ “okwáahi.” Ɔkpani ku nu a leyice ka ó géē bi ikpiije a le yuklɔ ɔwɛ ijeeyi. Ikɔkɔ ɔɔma, ó gáā kwu ije a u nyi ipu ajɛ. Eko nɛ ɔkpani ku nu piyɛyi a, ɔcocɛhɔ a kwu ikpiije ekponu nɛ ɔkpani ku nu je lɛ ɔ a i cigbihi lɛ ɔ. Ɔcocɛhɔ a i lɛ uce ō ya olɔhi ŋ. Ikɔkɔ nɛ ó géē lɛ abɔ kwaajɛ lɛ ɔkpani ku nu ɛgɛ nɛ ó ya ije nwune lɛ ɔ ŋ ma, ɔcocɛhɔ a hi ɔkpani ku nu a ka “ɔ̄cɛ olɔnɔ nɛ̄hi.” Ɔcocɛhɔ a i miyɛ ō cɛtra ku ɔkpani ku nu a ŋ. Ɔdā nōo fiyɛ ɔɔma nōo ya da ɔ a, wɛ ka é kwu ikpiije ɔɔma i miyɛ ŋma ɛgiyi nu klla kwu ɔ i nu ŋma ɔlɛ ɔkpani nu a.—Umát. 25:​24, 26-30.

12. Anyɛ nɛ acocɛhɔ ɛpa néē lɔtuce uwa gla a kwɛyi uwa icɛ a?

¹² Acocɛhɔ ɛpa néē lɔtuce uwa gla a kwɛyi Ācɛ O Yɛce Ukraist néē lɛ anɔ tu uwa ɛyi nōo hayi kpaakpa a. Ɔkpani ku uwa Ujisɔsi kē hi uwa igwú kéē “wā í gwéeyē mɛ́mla [anu].” É miyɛ ule ku oyeeyi ɔkpanco nōo wɛ oheyi ŋma ɔlekwu aflɛyi a. (Umát. 25:​21, 23; Mafú 20:5b) Abɔ ɔhá ku nu, ocabɔ obɔbi ku  ɔcocɛhɔ nōo wɛ ɔcɛ okwaahi a, wɛ ahɔ̄ ō pi lɛ ācɛ néē lɛ anɔ tu uwa ɛyi a. Ɛgɛnyá a?

13-14. Ɛlā nyá nɛ ācɛ néē lɛ anɔ tu uwa ɛyi a nwu ŋma aciije lɛyikwu ikpiije a? (Má ifoto a.)

¹³ Mafu ku a wɛ ɔcɛ o yuklɔ lɔfu lɔfu. Ipu aciije lɛyikwu ikpiije ɛgɛ nōó wɛ ipu aciije ku ayipɛ ancɛnya nōó jé ɔcɛnyilɔ ŋ ma, Ujisɔsi i yɔ i hɛce ka ācɛ néē lɛ anɔ tu uwa ɛyi a géē je piya ācɛ okwaahi ŋ. Ikɔkɔ ɔɔma, ó yɔ i lɛ ɔ teyi peee ɔdā nōo géē ya ɔdaŋ ka ɔtu caca ku uwa le hɛ uwa abɔ a. É gáā miyɛ “igwú nɛ̄ Ɔwɔicō hī [uwa nɛ ó klla fu uwa a] yá kóō wɛ ɔdā ō yɔ̄ piyóó ipú oyēeyi kú [uwa ŋ],” é klla gáā jɛga lɛ uwa ō gā ipu Ajɔɔcɛ ku ɔkpanco a ŋ.—2 Upít. 1:10.

¹⁴ Aaciije ku Ujisɔsi lɛyikwu ayipɛ ancɛnya nōó jé ɔcɛnyilɔ ŋ mla ikpiije a lɛ ɔ teyi peee, ka ɛjɛɛji Ācɛ O Yɛce Ukraist néē lɛ anɔ tu uwa ɛyi a cɛgbá ō lɛ otutu ya taajɛ, leyi kwɛɛcɛ, klla wɛ ācɛ o yuklɔ lɔfu lɔfu. Amáŋ Ujisɔsi kɛla ɔhá nōo wɛ ahɔ̄ ō pi lɛ ācɛ néē lɛ anɔ tu uwa ɛyi a? Ii gboo, ó ya lɛ a! Alɔ lɔfu má ahɔ̄ ō pi nyā ipu ɛlā nɛ ó ka ipu ɔkpá ku Umátiyu 24:​40, 41 a.

ANYƐ NƐ ƆWƆICO GÁĀ “JE” A?

15-16. Ɛgɛnyá nɛ ɔkpá ku Umátiyu 24:​40, 41 a ta ācɛ néē lɛ anɔ tu uwa ɛyi a abɔ má ɔdā nōo ya ɛɛ néē cɛgbá ō gɔbu yɔ i leyi kwɛɛcɛ a?

¹⁵ Gbɔbu ɛɛ kóō ta aciije ɛta nyā, Ujisɔsi kɛla lɛyikwu ɛpɔ amoomɛ néē géē ka tu ācɛ néē lɛ anɔ tu uwa ɛyi, nōo géē mafu aɛ̄nɛ̄ é cɛla ku uwa a. Ó kɛla lɛyikwu acɛnyilɔ ɛpa nōo yɔ i yuklɔ ipu ɛhɔ mla acɛnya ɛpa nōo yɔ i gba odee ɛgɔ a. Ó lɛbɛɛka acɛnyilɔ a yɔ i yuklɔ ekponu a, ó kē lɛbɛɛka acɛnya a yɔ i yuklɔ ekponu duu a, amáŋ, Ujisɔsi ka ka é géē je éyi “cɛ́ɛ́ é habɔ̄ ɔhá tá.” (Jé Umátiyu 24:​40, 41.) Anu ó ta ācɛ nōo gē yɛce ɔ a ɔtu kwu ɔtu kahinii: “Aá lɛ eyī kwɛcɛ, ohígbū ka aá jé ɛ̄cī nɛ̄ Óndú aá ā gáā wā ā ŋ́.” (Umát. 24:42) Ujisɔsi kɛla ekponu ɔɔma igbihi nɛ ó ta aciije lɛyikwu ayipɛ ancɛnya nōó jé ɔcɛnyilɔ ŋ ma. (Umát. 25:13) Aɛlā nyā tɛɛma kwu iyi uwa nɛɛ? Ó lɛbɛɛka ó lɛ a. Ācɛ néē lɛ anɔ tu uwa ɛyi nōo hayi kpaakpa ɔkwɔɔkwɛyi a foofunu nɛ Ɔwɔico gáā “je” gā Ajɔɔcɛ ku ɔkpanco a.—Ujɔ́n. 14:3.

¹⁶ Mafu ku a leyi kwɛɛcɛ. Oduuma ku ācɛ néē lɛ anɔ tu uwa ɛyi a nōó gɔbu ō leyi kwɛɛcɛ ŋ, é gáā tu uwa ba mla “ācɛ nēé fu ā” ŋ. (Umát. 24:31) Ɛjɛɛji ācɛ nōo kē lɛ eyiyoce ō lā oyeeyi opiyoo ipu ɛcɛ nyā a, cɛgbá ō gɔbu ō leyi kwɛɛcɛ klla gɔbu ō hayi kpaakpa duu.

17. Ɔdiya nōó cika ō junwalu lɛ alɔ lɛyikwu eko nɛ Ujehofa miya ō lɛ anɔ tu ācɛ ōhī ɛyi mla alelekwu ihɔ ku nu ŋ ma?

¹⁷ Alɔ wa gáā lɛ Ujehofa jé lɔɔlɔhi ɛ, ohigbu ɛnyā, alɔ lɔtuce ka ɛjɛɛji ɔdā nɛ ó gē ya a le kpaakpa. Ohigbu ɛnyā, alɔ i gē junwalu lɛ iyi alɔ ɔdaŋ ka Ujehofa le miya ō lɛ anɔ tu ācɛ ōhī nōo hayi kpaakpa a ɛyi ɛpleeko ku alɔ nyā ŋ. c Alɔ blakwu ɛlā nɛ Ujisɔsi ka ipu aciije ku nu lɛyikwu ācɛ nōo yuklɔ ɛpla oje ɛhɔ ku ɔnɔɔnɛ ipu ɛhɔ ku ufayin a. (Umát. 20:​1-16) Ācɛ néē hi igwú ō gáā yuklɔ ipu ɛhɔ ku ufayin a igbihaajɛ a, miyɛ ule ekponu mla ācɛ nōo gbɔɔ ō yuklɔ ipu ɛhɔ a eko aflɛyi a. Ɔwɛ ekponu ɔɔma, eko duuma néē kóō fu ācɛ néē lɛ anɔ tu uwa ɛyi a, é géē miyɛ ule ku oyeeyi opiyoo ɔkpanco ɔdaŋ ka é gɔbu hayi kpaakpa.

LƐYITAAJƐ LƐ AHƆ̄ Ō PI A

18-19. Ɛlā nyá nɛ alɔ nwu ŋma ipu aaciije nyā ɛ ma?

¹⁸ Ɛlā nyá nɛ alɔ leyi yɛ ɔ ɛ ma? Lɛ ācɛ nōo lɛ eyiyoce ō lā oyeeyi opiyoo ipu ɛcɛ nyā a, aciije lɛyikwu aala mla aɛwu a mafu ɛgɛ nōó cɛgbá nɛɛnɛhi lɛ kéē gɔbu hayi kpaakpa lɛ Ujehofa—babanya mla ɛpleeko ku owe nɛhi nōo yɔ i wa a. Gbɔbu lɛ eko ku Amagɛdɔn,  Ujisɔsi géē kɛpɔ tu ācɛ nōo hayi kpaakpa a ka é cika jɛ ō “yēeyī piyóó.”—Umát. 25:46.

¹⁹ Alɔ klla leyi yɛ aciije ɛpa nōo wɛ ahɔ̄ ō pi lɛ ācɛ néē lɛ anɔ tu uwa ɛyi a. Ipu aciije ku Ujisɔsi lɛyikwu ayipɛ ancɛnya nōó jé ɔcɛnyilɔ ŋ ma, ɛhɔ ku uwa mafu ka é wɛ ācɛ ojeeyi. É le tutu taajɛ klla leyi kwɛɛcɛ, le tutu ō gbeyi ɔcɛ olɔnya a ɛgɛ duuma nɛ ó géē gboji ō wa a. Amáŋ ayipɛ ancɛnya nōó jé ɔcɛnyilɔ ŋ nōo wɛ aolila a i tutu taajɛ ŋ. Ohigbu ɛnyā, ɔcɛ olɔnya a i jɛga lɛ uwa kéē gā ipu inu néē yɔ i lé ucɛ ku omɛɛlɛ mɛɛlɛ a ŋ. Alɔ abɔyi alɔ cɛgbá ō le tutu ō gbeyi ɛgɛ duuma nōó géē gboji lɛ, jaa gbeeko nɛ Ujisɔsi géē bi ɛcɛ obɔbi nyā wa oŋmɛyi. Ipu aciije ku Ujisɔsi lɛyikwu ikpiije a, alɔ klla kɛla lɛyikwu acocɛhɔ ɛpa néē mafu ka é lɔtuce uwa gla néē yuklɔ lɔfu lɔfu a. É yuklɔ lɔfu lɔfu eko nɛ ɔkpani ku uwa i yɔ ŋ ma, é kē miyɛ ō cɛtra ku nu. Amáŋ, é lɛ ɔcocɛhɔ nōo wɛ ɔcɛ okwaahi a nu. Ɔdi wɛ ɛlā ō nwu a? Alɔ cɛgbá ō bi ɔdā alɛwa abɔ yɔ i ya ipu ɛ̄gbā ō gba ku Ujehofa jaa gā ajaajɛ. Amoomɛ, alɔ kɛla lɛyikwu ɛgɛ nɛ ācɛ néē lɛ anɔ tu uwa ɛyi a, cɛgbá ō gɔbu ō leyi kwɛɛcɛ o ya ɛɛ ku Ujisɔsi kóō gáā “je” uwa ō gáā lā oyeeyi ɔkpanco nōo wɛ ule ku uwa a. É yɔ i leyice eko néē “géē túbá tɔ̄há” mla Ujisɔsi ɔkpanco a. Igbihi néē lɛ ɛfu ku Amɛgɛdɔn a kpo mɛ, é géē wɛ ɔnyā ku Ujisɔsi ipu omɛɛlɛ mɛɛlɛ ku Ɔyi Ala a.—2 Utes. 2:1; Mafú 19:​7, 9.

20. Ɔdi nɛ Ujehofa géē ya lɛ ācɛ nōo lɛyitaajɛ lɛ ahɔ̄ ō pi ku nu a?

²⁰ Eko nɛ Ujisɔsi géē wa i kɛpɔ a i gboji ō wa gɛ ŋ, amáŋ alɔ i cɛgbá ō yuufi ŋ. Ɔdaŋ ka alɔ gɔbu hayi kpaakpa, Adā alɔ nōo lɛ ihɔtu nōo yɔ ɔkpanco a géē je “ɔfú nɛ̄ɛ̄nɛ̄hi [nōó lɛ ɛdɔ ŋ]” ma lɛ alɔ, o ya ɛɛ ku alɔ “má ɛ́nyɔ́ . . . nɛ̄ [alɔ] géē bī háyi iyɔ̄bū Ɔyínɔ̄nyīlɔ kú Ɔ̄cɛ ā.” (2 Ukɔ́r. 4:7; Ulúk. 21:36) Ɔdaŋ ka alɔ lɛ eyiyoce ō gā ɔkpanco amāŋ ō lā oyeeyi opiyoo ipu ɛcɛ nyā, alɔ géē ya ɔdā nōo he Adā alɔ ɔtu ɔdaŋ ka alɔ lɛyitaajɛ lɛ ahɔ̄ ō pi nōo yɔ ipu aaciije ku Ujisɔsi a. Ohigbu ka Ujehofa gbonɛnɛ nɛhi a, ó géē “tá iyē kú [alɔ] tū ipú ɔkpá” ku oyeeyi a.—Udán. 12:1; Mafú 3:5.