Alɔ i gē gba Ujehofa ɛ̄gbā eko nɛ ɛjɛɛji alɔ jila tɔha ipu ōjila ku ujɔ, ojileyi mla ojileyi nɛhi ku alɔ foofunu ŋ, amáŋ alɔ gē gba Ujehofa ɛ̄gbā foofu alɔ, klla gē gba ɔ ɛgbā mla ācɛ apɔlɛ ku alɔ duu. Má aɛlā ōhī nɛ a lɔfu klɔcɛ eko nɛ a yɔ i ya oklɔcɛ ku abɔyi uwɔ amāŋ ɛ̄gbā ō gba ku apɔlɛ a:

• Ya otutu ku ōjila ku ujɔ. A lɔfu nwu ō gwiije mla ō ta ɛjɛɛji ācɛ nōo yɔ ipu apɔlɛ a abɔ kéē ya otutu ku ohi ō ta.

• Klɔcɛ lɛyikwu ɔ̄kā ku Ubáyíbu éyi. Oŋma ɔɔma, lɛ ifoto ku ɔdā nōo ya a pi taajɛ amāŋ lɛ ɛlā nɛ a nwu ŋma anu a ta taajɛ.

• Klɔcɛ lɛyikwu ɔkɔ ō gba nōo yɔ ipu Ubáyíbu a, cɛɛ ku a gbɛla lɛyikwu ɛgɛ nɛ ó lɔfu ta uwɔ abɔ ō ya lɔhi fiyɛ ipu ɔkɔ ō gba ku uwɔ a.

• Má uvidio ŋma ipu jw.org, cɛɛ ku a bi ɔ le kɔka mla ācɛ ɔhá amāŋ lɛ ɔdā nɛ a dɔka lɛyikwu uvidio a ta taajɛ.

• Ya otutu lɛyikwu uklɔ ku ɔna ō ta. Á jé ŋ, a lɔfu lɛ ocabɔ ku ɛgɛ nɛ a géē dɔka ō ya ɔ ipu uklɔ ku ɔna ō ta a ya ŋma ɔlɛ.

• Leyi yɛ aɔdā nɛ Ɔwɔico ya a lɔɔlɔhi ku a gbɛla tu ɔ lipu lipu, amāŋ kɛla lɛyikwu ɛlā nōó nwu uwɔ lɛyikwu Ujehofa a. a