ƐLĀ okpɔcii néē cɔwɔ ka “úgbɔ́nya” ipu Ubáyíbu a, lɔfu lɛ ō ya mla ugbɔnya ɛyɛɛyɛyi. (Ācot. 8:​28, 29, 38) Amáŋ, ó lɛbɛɛka udá ku Itiyopiya a yɔ i yɛ ipu ugbɔnya nōo nwune nɛhi, fiyɛ ugbɔnya ligii néē gē bi le yuklɔ eko ku ɛfú ō kpo, amāŋ néē gē bi le kweyi inya a. Má aɔdā ōhī nōo ya nɛ alɔ ka lɛ a.

Ɔcɛ Itiyopiya a wɛ igabɔ nɛhi nōo ŋma ɛga oligbo. Ó wɛ “igabɔ̄ kú Ukándesi, ɔ̄cɛ ojīlīmā o bī ije lɛ ɔcányā kú Itiyópīya.” (Ācot. 8:27) Ācɛ Itiyopiya ku ikee a wɛ ācɛ u Sudan mla ācɛ nōo lā aya ku ɛhaajɛ ku Ijipiti babanya a. Naana nɛ ɔcɛ Itiyopiya a i lɔfu yɛ ipu ugbɔnya ekponu ɔɔma ipu ɛjɛɛji iyawu ku nu ŋ ma, ó lɔfu bi aiyo alɛwa nōo cɛgbá ɛpleeko nɛ ó yɔ i gā iyawu nōo ligbo nɛhi a. Augbɔnya néē bi le yuklɔ gáā yɛ Eko Ku Ukraist ō bi le je ācɛ ŋma ɛga éyi gā ɛga ɔhá a, lɛ aka ɛnɛ klla lɛ ɔdā ō bi le kla ɛyi nu. Ɔkpá éyi néē hi ka An Exegetical Commentary nōo kɛla lɛyikwu ɔkpá ku Úklɔ́ kú Ācotɛ̄hɔ̄ a kahinii: “Ugbɔnya ɛgɛnyā lɛ ɛga néē gē bi kpo aɛkpa mla aiyo ocɛgbá ɔhá tu ɔ, ó gē ya ku ɔcɛ kóō jɔɔnyɛ iyawu ku nu, klla gē ya kóō tɔɔtɛ lɛ ācɛ ō gā iyawu oligbo.

Ɔcɛ Itiyopiya a yɔ i jé ɔkpá eko nɛ Ufilipu má ɔ a. Ɔkpá ku Úklɔ́ kú Ācotɛ̄hɔ̄ da alɔ ka “Ufílīpu lɛ inya kwu gā ɛgiyí nū [udá ku Itiyopiya a], ó kē pó abɔ̄ ó yɔ̄ í jɔ́kpá kú Ayisáya ɔ̄comɛ́ɛbɛ ā.” (Ācot. 8:30) É ya augbɔnya néē gē bi gā iyawu a kóō kwinya nɛɛnɛhi ŋ. Ohigbu ka ugbɔnya nyā i gē kwinya nɛɛnɛhi ŋ ma, ó jɛga lɛ udá ku Itiyopiya a kóō jé ɔkpá foofunu ŋ, amáŋ ó ya kóō tɔɔtɛ lɛ Ufilipu kóō kwu ugbɔnya a abɔ ó yɔ i kwinya mla ikpo a.

Ɔcɛ Itiyopiya a “da Ufílīpu kóō wā icō gaá cīce pī anúɔ.” (Ācot. 8:31) Ugbɔnya néē gē bi le kweyi inya a, ācɛ o pɛ ugbɔnya a gē mahayi. Amáŋ ugbɔnya néē gē bi gā iyawu a, ó lɛ ɛga ō yaajɛ nɛ udá ku Itiyopiya a mla Ufilipu lɔfu yaajɛ anu.

Ohigbu ɛlā nɛ ɔkpá ku Úklɔ́ kú Ācotɛ̄hɔ̄ ɛyi 8 mla aɛlā ōhī néē bɔkwu ku nu ka a, aɔkpá ku alɔ néē ya nōó gboji ɛ ŋ ma gē mafu aifoto nɛ igabɔ ku Itiyopiya a yɔ i yɛ ipu ugbɔnya nōo gbɛ nɛhi, ikɔkɔ ugbɔnya nōo le ligii néē gē bi le kpo ɛfú amāŋ néē gē bi le kweyi inya a.