Ōhī ku uwa jɛ mla uculo nɛ acɛnyilɔ gē leyi má acɛnya bɛɛka é cɛgbá ŋ ma. Ocabɔ mafu, Hans nōo wɛ ɔcɛ o leyikwu usɛkut ipu Bolivia a kahinii: “Acɛnyilɔ ōhī jɛ mla uculo néē gē ta uwa ɔtu kwu ɔtu kéē ya ɛlā ɔwɛ ku ɔbɔɔcɛ. Acɛnyilɔ nyā gbɛla ku uwa cɛgbá fiyɛ acɛnya a, ohigbu ɛnyā, igbalɛwa é gē ya ɛlā mla acɛnya ɔwɛ nōó mafu ojilima ŋ.” Shengxian, ɔnyakwɔcɛ ku ujɔ éyi ipu Taiwan kahinii: “Ɛga nɛ um lā a, ó gē ya acɛnyilɔ alɛwa ku acɛnya i cika ō ka ɔdā néē gbɛla a lɛ uwa ŋ. Ɔdaŋ ka ɔcɛnyilɔ duuma lɛ ɔdā nɛ ɔcɛnya gbɛla lɛyikwu odee a ka tɛɛcɛ lɛ ɔmpa uwa, é gáā lɛ ojilima ce ɔ gɛ ŋ.” Ó klla lɛ aɔwɛ ɛyɛɛyɛyi ɔhá nɛ acɛnyilɔ ōhī gē mafu ka é cɛgbá fiyɛ acɛnya. Ocabɔ mafu, é lɔfu ka ɔdā ō tu ɔcɛ ɛhɛ lɛyikwu ɔcɛnya nōó mafu ojilima ŋ.

Ó wɛ ɔdā eeye nɛhi ō jé ku ɛdɔ uculo duuma nɛ acɛnyilɔ jɛ ipu nu a, ó lɔfu ya opiyabɔ gla. Ó lɔfu nwu ō jé ka acɛnyilɔ mla acɛnya joonjilɛ. (Āfi. 4:​22-24) Ɛnyā lɔfu tɔɔtɛ ŋma lɛ ō yɛce ocabɔ ku Ujehofa. Ipu ikpɛyi ɛlā nyā, alɔ géē kɛla lɛyikwu ɛgɛ nɛ Ujehofa gē ya ɛlā mla acɛnya, ɛgɛ nɛ ayinɛ nɔnyilɔ lɔfu nwu ō ya ɛlā mla acɛnya ɛgɛ nɛ Ujehofa gē ya lɛ a, mla ɛgɛ nɛ anyakwɔcɛ ku ujɔ lɔfu gbɔbu ō mafu ojilima lɛ ayinɛ nɔnya a.

ƐGƐNYÁ NƐ UJEHOFA GĒ YA ƐLĀ MLA ACƐNYA A?

Ujehofa lɛ ɛnɛɛnɛ ocabɔ taajɛ lɛyikwu ɛgɛ nɛ alɔ cika ō ya ɛlā mla acɛnya lɛ a. Abɔ ó wɛ Adā nōo gbonɛnɛ nɛhi a, ó yihɔtu ɛjɛɛji ayipɛ ɔlɛ nu. (Ujɔ́n. 3:16) Ɛgiyi Ujehofa, ayinɛ nɔnya nōo gē gba ɔ ɛ̄gbā kpaakpa a lɛbɛɛka ayi nɔnya nōo he ɔ ɔtu nɛhi a. Leyi yɛ aɔwɛ ɛyɛɛyɛyi nɛ Ujehofa mafu ka ó yihɔtu klla lɛ ojilima ce acɛnya a.

Ujehofa gē ya ɛlā mla acɛnya ɔwɛ ekponu ɛgɛ nɛ ó gē ya mla acɛnyilɔ lɛ a. Ujehofa ya acɛnyilɔ mla acɛnya gbla iyi nu. (Ohút. 1:27) Ó ya acɛnyilɔ kéē jé odee nɛhi fiyɛ acɛnya ŋ, ó kē dɔka acɛnyilɔ fiyɛ acɛnya ŋ. (2 Úklɔ́ 19:7) Ó ya acɛnyilɔ mla acɛnya ɔwɛ nɛ ɛjɛɛji uwa lɔfu jɛyi ɛlā ɔkwɛyi nōo yɔ ipu Ubáyíbu a, mla  ō ya ɛgbla ku ɛnɛɛnɛ auce ō ya ku nu. Ɔtu nɛ acɛnyilɔ mla acɛnya gē kpoce Ujehofa a gē jɛ ɔ eyī nɛhi. Ó je eyiyoce lɛ acɛnyilɔ mla acɛnya ō lā oyeeyi opiyoo ipu ɛcɛ nyā, amāŋ eyiyoce ō je piya aɔcɛ́ mla acogwɛɛya ɔkpanco. (2 Upít. 1:1) Ku ɛlā ɔkwɛyi a, Ujehofa i yihɔtu acɛnyilɔ fiyɛ acɛnya ŋ.

Ó gē jahɔ tu uwa. Ujehofa lɛ ɛlá wu ɛgɛ nɛ ɔtu gē ya acɛnya lɛ a mla unwalu néē gē má a. Ocabɔ mafu, ó jahɔ tu ɔkɔ ō gba ku Urecɛlu mla Uhana, ó kē lɛ ɔdā néē ba ɔ ɛba ku nu a ya lɛ uwa. (Ohút. 30:22; 1 Usám. 1:​10, 11, 19, 20) Ujehofa klla je alelekwu ihɔ ku nu lɛ ācɛ nōo ta Ubáyíbu a, kéē lɛ ɔ̄kā ku acɛnyilɔ nōo jahɔ tu acɛnya a ta taajɛ. Ocabɔ mafu, Ebraham yɛce ukɔ́ nɛ Ujehofa tu ɔ kóō jahɔ tu ɔnyā nu nōo lé ka Usara a. (Ohút. 21:​12-14) Udefidi nōo wɛ Ɔcɛ́ a jahɔ tu Abigɛlu. Ku ɛlā ɔkwɛyi a, ɔtu ya Udefidi ka Ujehofa ta Abigɛlu ɛhɔ kóō kɛla lɛ ɔ a. (1 Usám. 25:​32-35) Ujisɔsi nōo kē yɛce ocabɔ ku Adā nu mɛɛlɛ a, jahɔ tu Umeri nōo wɛ ɛ́nɛ́ nu a. (Ujɔ́n. 2:​3-10) Aocabɔ ɛyɛɛyɛyi nōo ba nyā, mafu ka ɔwɛ éyi nɛ Ujehofa gē mafu ka ó lɛ ojilima ce acɛnya a wɛ oŋma lɛ ō jahɔ tu uwa.

Ó lɔtuce uwa. Ocabɔ mafu, Ujehofa lɔtuce Iifu kóō tabɔ ō leyikwu ɛjɛɛji ɛcɛ a. (Ohút. 1:28) Oŋma lɛ ō ya lɛ a, ó mafu ka ó leyi má Iifu ka ó cɛgbá nɛhi ɛgɛ nɛ Adam cɛgbá lɛ a, ka ó klla wɛ otabɔ nōo tiile nɛhi. Ujehofa klla lɔtuce Udɛbɔra mla Uhulida kéē tu ācɛ ɔlɛ nu ukɔ́, kwu ɔcɛ́ mla ɔcɛ ohɛpɔ. (Ācoh. 4:​4-9; 2 Aɔ́cɛ́ 22:​14-20) Icɛ, Ujehofa lɔtuce acɛnya nōo wɛ Ācɛ O Yɛce Ukraist a, kéē ya auklɔ nɛ ó je lɛ uwa a. Acɛnya nōo wɛ ācɛ o hayi kpaakpa nyā gē yuklɔ ku ācɛ o tɔɔna ɛlā Ɔwɔico, ācɛ o gbɔbu ɔna ō ta, mla ācɛ o yuklɔ ku ɔna ō ta ipu éwo ɔhá. É gē tabɔ ō ya udrawing ku ɛgɛ néē gē bi le gwo ɔlɛ, gē tabɔ ō yuklɔ ku ɔlɛ ō gwo, klla gē leyikwu Agbla Ku Ajɔɔcɛ ku alɔ mla aɛga ɛyɛɛyɛyi nɛ alɔ gē bi le gba ɛ̄gbā a. Ōhī ku uwa gē yuklɔ ipu Ubɛtɛlu, ó kē lɛ aōhī nōo gē yuklɔ ɛga o ce ɔkpá ɔwɔ. Ayinɛ alɔ nɔnya nyā lɛbɛɛka aicɔɔja nōo lɛwa nɛhi, nɛ Ujehofa gē bi le yuklɔ ō ya ɔdā nōo wɛ ococɛ ku nu a. (Aíjē 68:11) Ó teyi peee, ka Ujehofa i gē leyi má acɛnya bɛɛka ācɛ o kwaahi amāŋ bɛɛka ācɛ nōó cika jɛ ŋ.

ƐGƐNYÁ NƐ AYINƐ NƆNYILƆ LƆFU NWU Ō YA ƐLĀ MLA ACƐNYA ƐGƐ NƐ UJEHOFA GĒ YA ƐLĀ MLA UWA LƐ A?

Ayinɛ nɔnyilɔ, o ya ɛɛ ku aa jé ɔdaŋ ku aa gē ya ɛlā mla ayinɛ nɔnya nōo wɛ Ācɛ O Yɛce Ukraist a ɛgɛ nɛ Ujehofa gē ya ɛlā mla uwa lɛ a, aa cika ō leyi yɛ iyi aa lɔɔlɔhi ɛgɛ nɛ aa gē gbɛla klla gē ya uce lɛ a. O ya ɛɛ kéē ya ɔɔma, ayinɛ nɔnyilɔ cɛgbá otabɔ. Idɔkitɔ lɔfu bi ɔdā ō le jila ɔkpiye ku ɔcɛ má, o ya ɛɛ kóō jé ɔdaŋ ku ɔtu ku nu yɔ i yuklɔ lɔhi amāŋ ɔdaŋ ka ɔcɛ ɔɔma yɔ i doōcē. Ɔwɛ ekponu ɔɔma, aoklobiya amāŋ aoncɛnya olɔhi mla Ɛlā ku Ɔwɔico lɔfu ta alɔ abɔ ō jé ɔdaŋ ka ɔwɛ nɛ alɔ gē leyi má acɛnya a he Ujehofa ɔtu, amāŋ ɔdaŋ ka ó he ɔ ɔtu ŋ. Ɔdi nɛ ayinɛ nɔnyilɔ lɔfu ya o ya ɛɛ kéē miyɛ otabɔ nyā a?

Da oklobiya amāŋ oncɛnya olɔhi ku uwɔ ɔka ku otabɔ. (Aíit. 18:17) Ayinɛ nɔnyilɔ lɔfu da oklobiya amāŋ oncɛnya ku uwa néē lɔtuce, nōo gbonɛnɛ, klla gē gbɛla lɔɔlɔhi ɔka ɛgɛnyā kahinii: “Ɛgɛnyá nɛ a gbɛla ku um gē ya ɛlā mla ayinɛ nɔnya lɛ a? Ɔtu gē ya uwa ku um lɛ ojilima ce uwa? Ó lɛ ɔdā duuma nɛ um lɔfu ya, o ya ɛɛ ku um ya ɛlā mla uwa ɔwɛ olɔhi fiyɛ?” Ɔdaŋ ka oklobiya amāŋ oncɛnya ku uwɔ lɛ aɔwɛ ōhī nɛ a lɔfu ya lɔhi fiyɛ a mafu gā uwɔ, kōōcō a hii cɔnu ŋ. Ikɔkɔ ɔɔma, le tutu ō ya aopiyabɔ nōo cɛgbá a.

Klɔcɛ ku Ɛlā ku Ɔwɔico. Ɔwɛ olɔhi fiyɛ duu nɛ ayinɛ nɔnyilɔ lɔfu bi le jé ɔdaŋ néē gē ya ɛlā mla ayinɛ nɔnya ɔwɛ okpaakpa a, wɛ ō bi Ɛlā ku Ɔwɔico le ta iyi uwa abɔ le jila ɛlá ō gbo mla uce ō ya ku uwa má. (Uhíb. 4:12) Abɔ ayinɛ nɔnyilɔ gē lɛ eko taajɛ ō klɔcɛ ku Ubáyíbu a, é géē wa i nwu ɛlā lɛyikwu acɛnyilɔ nōo ya ɛlā ɔwɛ okpaakpa mla acɛnya, mla acɛnyilɔ nōó ya ɛlā ɔwɛ olɔhi mla uwa ŋ ma. Oŋma ɔɔma, é cika ō lɛ ɛlā néē nwu a miya mla ɔwɛ néē gē bi le ya ɛlā mla ayinɛ nɔnya a. Ayinɛ nɔnyilɔ i klla cika ō lɛ abɔ bi ɛga ku Ubáyíbu éyi néē jé nōo cɛtra ɔwɛ obɔbi néē gē bi le ya ɛlā mla acɛnya a ŋ. Ikɔkɔ ɔɔma, é cika ō jé aɛga ku Ubáyíbu ɛyɛɛyɛyi ɔhá nōo géē ta uwa abɔ, kéē jé ɔwɛ okpaakpa néē cika ō bi le ya ɛlā mla acɛnya a. Ocabɔ mafu, ɔkpá ku 1 Upíta 3:7 da acɛnyilɔ kéē ya ɛlā mla acɛnya ɛmɛɛma, abɔ é jé “ka é lɔfú bɛ̄ɛka [uwa] ŋ́ mā.” a Ɛnyā mafu ka ɔcɛnya i cɛgbá amāŋ cika jɛ bɛɛka ɔcɛnyilɔ a ŋ nɛɛ? Ehee, ó lɛ a fluflu ŋ! Ɛgɛ nɛ ɔkpá ku Upíta mla aɛlā nōo yɔ ipu ɔkpá ku Ācɛ Ugalésīya 3:​26-29 mafu lɛ a, Ujehofa fu acɛnyilɔ mla acɛnya kéē wɛ ācɛ o lé ɔcɛ́ mla Ujisɔsi ɔkpanco. Ɔdaŋ ku ayinɛ nɔnyilɔ klɔcɛ ku Ɛlā ku Ɔwɔico, klla da aoklobiya  amāŋ aoncɛnya olɔhi ku uwa ɔka lɛyikwu ɔdā néē gbɛla lɛyikwu ɛgɛ néē gē bi le ya ɛlā mla ayinɛ nɔnya lɛ a, é lɔfu nwu ɔwɛ olɔhi fiyɛ néē lɔfu bi le mafu ojilima lɛ ayinɛ nɔnya a.

ƐGƐNYÁ NƐ ANYAKWƆCƐ KU UJƆ LƆFU MAFU KA É LƐ OJILIMA CE AYINƐ NƆNYA A?

Ayinɛ nɔnyilɔ nōo yɔ ipu ujɔ a klla lɔfu nwu ō ya ɛlā mla ayinɛ nɔnya ɔwɛ ojilima, ŋma lɛ ō yɛce ɛnɛɛnɛ ocabɔ ku anyakwɔcɛ ku ujɔ nōo lɛ ihɔtu a. Ɛgɛnyá nɛ anyakwɔcɛ ku ujɔ lɔfu lɛ ɛnɛɛnɛ ocabɔ taajɛ ō mafu ojilima lɛ ayinɛ nɔnya a? Leyi yɛ aɔwɛ ōhī.

É gē cɛtra ayinɛ nɔnya nōo yɔ ipu ujɔ a. Ɔyikpo Upɔlu lɛ ɛnɛɛnɛ ocabɔ taajɛ lɛ anyakwɔcɛ ku ujɔ ō yɛce. Ó cɛtra ayinɛ nɔnya ɔwɛ ɛnɛɛnɛ ipu ɔkpá nɛ ó ta gē lɛ ujɔ nōo yɔ Urom a. (Uróm 16:12) Gbɛla lɛyikwu ɛgɛ nɛ ayinɛ nɔnya nyā géē gweeye nɛhi lɛ, eko néē yɔ i jé ɔkpá nɛ Upɔlu ta gē lɛ uwa a lɛ ujɔ a. Ɔwɛ ekponu ɔɔma, anyakwɔcɛ ku ujɔ gē cɛtra ayinɛ nɔnya lɔɔlɔhi ku ɛnɛɛnɛ auce ō ya néē gē mafu, mla uklɔ néē gē ya lɛ Ujehofa a. Ɛnyā gē ta ayinɛ nɔnya a abɔ kéē jé ka ujɔ a lɛ ojilima ce uwa, ka é klla cɛgbá nɛhi. Aɛlā ō ta ɔtu kwu ɔtu nyā nɛ anyakwɔcɛ ku ujɔ gē da uwa a, lɔfu wɛ aɛlā nɛ ayinɛ nɔnya nyā cɛgbá yiili o ya ɛɛ kéē gɔbu yɔ i gba Ujehofa ɛ̄gbā kpaakpa a.—Aíit. 15:23.

Eko duuma néē gē cɛtra ayinɛ nɔnya, anyakwɔcɛ ku ujɔ gē mafu ku ɛlā néē ka a ŋma ipiipu ɔtu ku uwa ɔkwɔɔkwɛyi, klla gē lɛ abɔ kwu ɛlā okpɔcii a tɛɛcɛ. Ɔdiya a? Ɔyinɛ alɔ nɔnya éyi nōo lé ka u Jessica a kahinii: “Ó wɛ ɔdā olɔhi eko duuma nɛ ɔyinɛ nɔnyilɔ da ɔyinɛ nɔnya kahinii ‘ahinya uklɔ olɔhi nɛ a yɔ i ya a.’ Amáŋ ó gē he alɔ ɔtu fiyɛ eko duuma nɛ ayinɛ nɔnyilɔ cɛtra alɔ ku ɔdā olɔhi kpɔcii éyi néē má alɔ ya, bɛɛka ɛgɛ nɛ alɔ gē nwu ayipɛ ɔlɛ alɔ kéē yaajɛ cii ipu ōjila ku ujɔ, amāŋ ɛgɛ nɛ alɔ gē bi eko ku alɔ nyɔ i je ɔcɛ nɛ alɔ gē klɔcɛ ku Ubáyíbu mla ɔ a wa ōjila ku ujɔ a.” Ɔdaŋ ku anyakwɔcɛ ku ujɔ cɛtra ayinɛ nɔnya ku ɔdā olɔhi kpɔcii éyi néē ya, é gē cɛ lɛ ɔtu ya ayinɛ nɔnya a ka é cɛgbá klla tiile lɛ ujɔ a nɛhi.

É gē jahɔ tu ayinɛ nɔnya. Anyakwɔcɛ ku ujɔ nōo tu iyi uwa waajɛ a jé ka ó wɛ uwa foofunu lɛ ɛnɛɛnɛ ɛlá ō  gbo a ŋ. Anyakwɔcɛ ku ujɔ nōo wɛ ācɛ o tu iyi uwa waajɛ a gē da ayinɛ nɔnya ɔka kéē ka ɔdā néē gbɛla lɛyikwu odee a, é kē gē jahɔ lɔɔlɔhi eko duuma nɛ ayinɛ nɔnya a gē kɛla. Oŋma lɛ ō ya lɛ a, anyakwɔcɛ ku ujɔ gē ta ayinɛ nɔnya a ɔtu kwu ɔtu, uwa abɔyi uwa klla gē lɛ itene. Ɛgɛnyá a? Ɔnyakwɔcɛ ku ujɔ éyi nōo lé ka u Gerardo nōo gē yuklɔ ipu Ubɛtɛlu a kahinii: “N gē da ayinɛ nɔnya ɔka ku ɔdā néē gbɛla lɛyikwu ɔwɛ ō bi le yuklɔ ōhī a, ohigbu ka ɔɔma gē ta um abɔ ō yuklɔ ku um lɔɔlɔhi fiyɛ. Igbalɛwa, é yuklɔ ɔɔma gboji ajɛ fiyɛ ayinɛ nɔnyilɔ ōhī ɛ.” Ipu ujɔ, alɛwa ku ayinɛ nɔnya a wɛ ācɛ o gbɔbu ɔna ō ta, ohigbu ɛnyā, é lɔfu jé ɔdā alɛwa lɛyikwu ācɛ nōo lā ɔwɛ abɔɔ a. Ɔnyakwɔcɛ ku ujɔ éyi nōo lé ka u Bryan a kahinii: “Ayinɛ alɔ nɔnya lɛ ɛnɛɛnɛ auce ō ya alɛwa, klla lɛ uklɔ abɔ nɛ ɔwa ku alɔ cɛgbá a. Ohigbu ɛnyā, ceyitikwu ku a lɛ itene ŋma aɔdā néē jé a!”

Anyakwɔcɛ ku ujɔ néē jeeyi i cika ō leyi gwu ɛlá ō gbo ku ayinɛ nɔnya bonu ŋ. Ɔdiya a? Ɔnyakwɔcɛ ku ujɔ éyi nōo lé ka u Edward a kahinii: “Ɛlá ō gbo ku ayinɛ nɔnya lɔfu ta ɔyinɛ nɔnyilɔ abɔ kóō jɛyi odee lɔɔlɔhi fiyɛ, klla lɔfu ta ɔ abɔ kóō jé ɛgɛ nɛ ɔtu gē ya ācɛ ɔhá a.” (Aíit. 1:5) Ɔdaŋ ka ɔnyakwɔcɛ ku ujɔ i kóō gáā yuklɔ mla ɛlā nɛ ɔyinɛ nɔnya a ka ŋ naana, ó cika ō ta ɔyinɛ nɔnya a ahinya lɔɔlɔhi ku ɛgɛ nɛ ó ka ɔdā nɛ ó gbɛla a, mla ō ka ɔdā nɛ ó jé a.

É gē nwu ayinɛ nɔnya ɛlā. Anyakwɔcɛ ku ujɔ nōo jeeyi gē dɔka ɛnɛɛnɛ ɛga ō bi le nwu ayinɛ nɔnya ɛlā. Ocabɔ mafu, é lɔfu nwu ayinɛ nɔnya ɛgɛ néē géē leyikwu ōmiya ku uklɔ ku ɔna ō ta, eko duuma nɛ ɔyinɛ nɔnyilɔ nōo lɛ ubatisim ya i yɔ ŋ. Ɛlā ō nwu ɔɔma kē géē ta uwa abɔ kéē le tutu taajɛ. É lɔfu nwu uwa ɛgɛ néē gē jé ō bi umachine amāŋ aɔdā ō bi yuklɔ ɛyɛɛyɛyi le yuklɔ lɔɔlɔhi, o ya ɛɛ kéē lɔfu je otabɔ lɛ uklɔ ku ɔlɛ ō gwo, amāŋ ō yuklɔ kóō tu aɔlɛ bi ipu ɔwa ku alɔ. Ipu Ubɛtɛlu, ayinɛ nɔnyilɔ nōo gē leyikwu aya ɛyɛɛyɛyi a, nwu ayinɛ nɔnya ɛgɛ néē géē leyikwu auklɔ ō ya ɛyɛɛyɛyi bɛɛka ō ta odee bi, ō jé ō lá ɔlá, ō leyikwu aya ku ije, uklɔ ku ukɔmputa ō ya, mla auklɔ ɛyɛɛyɛyi ɔhá. Ɔdaŋ ku anyakwɔcɛ ku ujɔ nwu ayinɛ nɔnya ɛlā, é gē mafu ka é leyi má ayinɛ nɔnya a ka é wɛ ācɛ o cika jɛ, klla wɛ ācɛ néē lɔtuce gla.

Ayinɛ nɔnya alɛwa gē ya ku ācɛ ɔhá kéē lɛ itene ŋma ɛlā ō nwu néē miyɛ ŋma ɛgiyi anyakwɔcɛ ku ujɔ a. Ocabɔ mafu, ayinɛ nɔnya ōhī gē bi ɛlā néē nwu ŋma uklɔ ku ɔlɛ ō gwo ipu ɔwa ku alɔ a, le je otabɔ lɛ ayinɛ alɔ ɔhá kéē lɛ ɔlɛ uwa gwo cigbihi, igbihi nɛ amiya nōo ya abɔyi uwa kwu ɔlɛ uwa i biya taajɛ a. Ayinɛ nɔnya ɔhá gē bi ɛlā néē nwu ŋma uklɔ ku ɔna ō ta ɛga nɛ ācɛ ba lɛwa a, le je otabɔ lɛ ayinɛ alɔ nɔnya ɔhá ka é jé ō ya lɛ a duu. Ɛgɛnyá nɛ ɔtu gē ya ayinɛ alɔ nɔnya lɛyikwu anyakwɔcɛ ku ujɔ nōo nwu uwa ɛlā a? Ɔyinɛ alɔ nɔnya éyi nōo le ka u Jennifer a kahinii: “Eko nɛ um je otabɔ lɛ uklɔ ku Agbla Ku Ajɔɔcɛ éyi néē yɔ i gwo a, ɔnyakwɔcɛ ku ujɔ éyi lɛ eko ku nu taajɛ ō nwu um ɛlā. Ó má ɛgɛ nɛ um yɔ i yuklɔ lɔfu lɔfu lɛ a, ó kē ta um ahinya lɔɔlɔhi. Ó he um ɔtu ō yuklɔ mla ɔ nɛhi, ohigbu kóō yuklɔ mla ɔ cɛ gā um má ku um tiile, klla wɛ ɔcɛ néē lɔtuce gla.”

ITENE NƐ ALƆ GĒ LƐ Ō YA ƐLĀ MLA AYINƐ NƆNYA ƆWƐ OKPAAKPA BƐƐKA AYINƐ IPU KU ALƆ A

Alɔ yihɔtu ayinɛ alɔ nɔnya nōo gē gba Ujehofa ɛ̄gbā kpaakpa a ɛgɛ nɛ Ujehofa yihɔtu ku uwa lɛ a! Ohigbu ɛnyā, alɔ gē ya ɛlā mla uwa ɔwɛ okpaakpa bɛɛka é wɛ ayinɛ ipu ku alɔ a. (1 Utím. 5:​1, 2) É cɛgbá nɛhi lɛ alɔ, alɔ klla gē jɔɔnyɛ ō yuklɔ tɔha mla uwa lɔɔlɔhi. Alɔ kē gē gweeye nɛhi eko duuma néē má ku alɔ yihɔtu ku uwa klla gē ta uwa abɔ. Ɔyinɛ alɔ nɔnya éyi nōo lé ka u Vanessa a kahinii: “N ta Ujehofa ahinya nɛhi ɛgɛ nɛ um wɛ ipu ɔwa ku nu, nōo le mu mla ayinɛ nɔnyilɔ nōo gē lɛ ɔfu ɛyipɛ ta um iyē ɛ̄cī doodu a.” Ɔyinɛ alɔ nɔnya éyi nōo yɔ u Taiwan a kahinii: “N ta Ujehofa mla ɔwa ku nu ahinya nɛhi ɛgɛ néē gē leyi má acɛnya ka é cɛgbá nɛhi, klla gē lɛ ojilima ce ɛgɛ nɛ ɔtu gē ya uwa lɛ a. Ɛnyā lɛ ɔfu tu ɔtu okpoce ku um, klla ya kóō jɛ um eyī fiyɛ ō wɛ ipu ɔwa ku Ujehofa.”

Ó gē cɛ lɛ ɔtu he Ujehofa nɛhi eko duuma nɛ ó má ayinɛ nɔnyilɔ nōo hayi kpaakpa a, gē ya ɛlā mla ayinɛ nɔnya ɔwɛ nɛ ó gē ya ɛlā mla uwa lɛ a! (Aíit. 27:11) Ɔnyakwɔcɛ ku ujɔ éyi nōo lé ka u Benjamin nōo yɔ u Scotland a kahinii: “Alɛwa ku acɛnyilɔ nōo yɔ ipu ɛcɛ icɛ a i gē lɛ ojilima ce acɛnya fluflu ŋ. Ohigbu ɛnyā, eko duuma nɛ ayinɛ nɔnya yɔ ipu ōjila ku ujɔ, alɔ dɔka kéē má ku alɔ lɛ ojilima ce uwa klla yihɔtu ku uwa nɛhi.” Ɛjɛɛji alɔ kóō ya ɔdā duuma nɛ alɔ ya gla ō gbla Ujehofa ya, ŋma lɛ ō ya ɛlā mla ayinɛ alɔ nɔnya o he alɔ ɔtu ɔwɛ ihɔtu mla ojilima néē cɛgbá a.—Uróm 12:10.