1. Ɔdiya nɛ ɛ̄cī ku Oblatu a wɛ ɛ̄cī nōo cɛgbá fiyɛ duu ipu ihayi a? (Ulúku 22:​19, 20)

 LƐ ĀCƐ ɔlɛ Ujehofa, ɛ̄cī ku Oblatu Ku Ikwū ku Ujisɔsi a wɛ ɛ̄cī nōo cɛgbá lɛ uwa fiyɛ duu ipu ihayi a. Oblatu Ku Ikwū ku Ujisɔsi foofunu wɛ uculo nɛ Ujisɔsi je ɔ́da lɛ ayikpo ku nu kéē ya a. (Jé Ulúku 22:​19, 20.) Ó lɛ aɔdā alɛwa nōo ya nōó gē he alɔ ɔtu ō ya Oblatu Ku Ikwū ku Ujisɔsi a. Alɔ leyi yɛ aɔdā ōhī nōo ya a. 

2. Ɔdiya nōó gē he alɔ ɔtu ō ya Oblatu a?

² Oblatu a gē ta alɔ abɔ ō gbɛla lipu lipu tu ɛgɛ nɛ ɛya nɛ Ujisɔsi gwo a cɛgbá nɛhi lɛ, mla ɛjɛɛji ɔhā nōó ya tɔɔtɛ lɛ alɔ ō miyɛ a. Ó gē ta alɔ ɛlá kwu ɔwɛ ɛyɛɛyɛyi nɛ alɔ lɔfu mafu ka ɛya nɛ Ujisɔsi gwo kwɛyi alɔ a jɛ alɔ eyī nɛhi a. (2 Ukɔ́r. 5:​14, 15) Ó klla gē je ɛnɛɛnɛ ɛga lɛ alɔ ō ‘lɛ ɔfu tu ayinɛ alɔ iyē, cɛɛ kéē lɛ ɔfu tu alɔ iyē duu.’ (Uróm 1:12) Ihayi doodu, alɛwa ku ayinɛ alɔ nōó gē wa ōjila ku ujɔ gɛ ŋ ma gē wa Oblatu a. Ohigbu ɔwɛ ihɔtu néē ya ɛlā mla uwa eko néē wa Oblatu a, ōhī ku uwa le miya ō le cigbihi gā ɛgiyi Ujehofa. Ɔdā nɛ ācɛ alɛwa kē má klla po eko néē wa Oblatu a, lɛ abɔ kwu uwa ɔtu nɛhi néē dɔka ō gbɔɔ ō klɔcɛ ku Ubáyíbu. Ɛjɛɛji aɔdā nōo ba nyā ya ku Oblatu a kóō cɛgbá nɛhi lɛ alɔ!

3. Ɛgɛnyá nɛ Oblatu a gē ya ku alɔ piyatɔha mla ayinɛ alɔ nōo yɔ ipu oduudu ɛcɛ a? (Má ifoto a.)

³ Ó klla gē he alɔ ɔtu nɛhi ō ya Oblatu Ku Ikwū ku Ujisɔsi a, ohigbu ka alɔ jé ka ɛ̄cī ɔɔma alɔ gē piyatɔha mla ayinɛ alɔ nōo yɔ ipu oduudu ɛcɛ a. Ācɛ Ocijali Ku Ujehofa gē jila tɔha kéē ya Oblatu nyā ipu oduudu ɛcɛ, igbihi nɛ ɛnɔ gaajɛ a. Ɛjɛɛji alɔ gē jahɔ tu ɛlā ō ka tɛɛcɛ nōo kɛla lipu lipu lɛyikwu ɔdā nōo ya ɛɛ nɛ ɛhi kóō ofula a cɛgbá nɛhi a. Ipu ōjila ɔɔma, alɔ gē gwiije ɛpa ō bi le je owoofu lɛ Ujehofa, alɔ gē kɔ igbo mla ejé, klla gē cɛ  “aamí” ŋma ɔtu lɛ ɔkɔ ō gba ɛnɛ. Ipu ɛ̄cī ekponu ɔɔma, ɛjɛɛji aujɔ nōo yɔ ipu ɛcɛ nyā gē ya ɔdā ekponu ɔɔma. Gbɛla lɛyikwu ɛdɔ eeye nōo géē wɛ omoomu ɔtu ku Ujehofa mla Ujisɔsi, abɔ é gē má alɔ piyatɔha ō lɛ ojilima ce uwa ɔwɛ ɛgɛnyā a.

4. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

⁴ Ipu ikpɛyi ɛlā nyā, alɔ géē kɛla lɛyikwu aɔka nōo ba nyā: Ɛgɛnyá nɛ alɔ lɔfu lɛ ɔtu ku alɔ tutu taajɛ lɛyikwu Oblatu a? Ɛgɛnyá nɛ alɔ lɔfu je otabɔ lɛ ācɛ ɔhá kéē lɛ itene ŋma anu a? Ɛgɛnyá nɛ alɔ kē gáā lɔfu je otabɔ lɛ ayinɛ alɔ nōó gē wa ōjila ku ujɔ gɛ ŋ ma? Ohi ku aɔka nōo ba nyā, géē ta alɔ abɔ ō ya otutu taajɛ ku ɛ̄cī nōo cɛgbá fiyɛ duu ipu ihayi a.

ƐGƐNYÁ NƐ ALƆ LƆFU LƐ ƆTU KU ALƆ TUTU TAAJƐ LƐYIKWU OBLATU A?

5. (a) Ɔdiya nɛ alɔ cika ō gbɛla lipu lipu tu ɔdā nōo ya ɛɛ nɛ ofula a cɛgbá nɛhi a? (Aíjē Kú Ɛ̄gbā 49:​7, 8) (b) Ɛlā nyá nɛ a nwu ŋma ipu uvidio nyā nōo kahinii: Ɔdiya Nɛ Ujisɔsi Kwū A?

⁵ Ɔwɛ éyi nōo cɛgbá fiyɛ duu nɛ alɔ lɔfu lɛ ɔtu ku alɔ tutu taajɛ lɛyikwu Oblatu a, wɛ ō gbɛla lipu lipu lɛyikwu ɔdā nōo ya ɛɛ nɛ ikwū ku Ujisɔsi cɛgbá nɛhi a. Ó lɛ ɔdā duuma nɛ alɔ abɔyi alɔ lɔfu ya ō nya iyi alɔ ta ŋma íne ō biya mla ikwū ŋ. (Jé Aíjē Kú Ɛ̄gbā 49:​7, 8; má uvidio nyā nōo kahinii: Ɔdiya Nɛ Ujisɔsi Kwū A?) a Ohigbu ɛnyā, Ujehofa lɛ ōmiya ya ku Ujisɔsi kóō kwu oyeeyi ku nu i gwɛɛya kwɛyi alɔ, o ya ɛɛ kóō lɛ alɔ nyata. Ujehofa mla Ujisɔsi leyi gwu aɔdā alɛwa bonu o ya ɛɛ kóō ofula a kóō le tɔɔtɛ. (Uróm 6:23) Abɔ alɔ gē gbɛla lipu lipu tu ɔdā nɛ Ujehofa mla Ujisɔsi leyi gwu ɔ bonu o ya ɛɛ kóō ofula a kóō le tɔɔtɛ a, ɛgɔɔma nɛ ofula a gáā jɛ alɔ eyī tōōtɔ̄ɔ̄ lɛ a. Alɔ géē leyi yɛ aɔdā ōhī nōó je Ujehofa mla Ujisɔsi kóō ofula a kóō le tɔɔtɛ a. Amáŋ gbɔbu lɛ ɔɔma, ɔdi nɛ ofula a wɛ a?

6. Ɔdi nɛ ofula a wɛ a, ɔdiya nɛ Ujisɔsi kē cɛgbá ō fula alɔ a?

⁶ Ofula wɛ ɔdā nɛ ɔcɛ gba ō bi le lá odee cigbihi. Ɔlɛɛcɛ aflɛyi nōo lé ka Adam a, lɛ oyeeyi nɛ ó lɛ ɛnyá ŋ eko nɛ Ɔwɔico ya ɔ a. Eko nɛ ó lɛ íne biya a, ɛga kóō lā oyeeyi opiyoo a le hɛ anu mla ayi nɛ ó géē ma a abɔ. O ya ɛɛ kóō lɛ ɔdā nōo hɛ Adam abɔ a lá cigbihi a, Ujisɔsi kwu oyeeyi ku nu nɛ ó lɛ ɛnyá duuma ŋ ma i gwɛɛya. Ɛpleeko nɛ ó yɔ ipu ɛcɛ nyā a, Ujisɔsi i “bīyíne ɔwɛ dóódu ŋ́, ɛ́ɛ́ nɛ̄ ɔ̄cɛ dúú pó ɛ̄kɛ̄mgbɛ̄ ō kā ŋmá okónu kú nū ŋ́.” (1 Upít. 2:22) Eko nɛ Ujisɔsi kwū a, ó wɛ ɔcɛ nɛ ó lɛ ɛnyá ŋ ɛgɛ nɛ Adam lɛ gbɔbu ɛɛ nɛ ó biya íne a. Ohigbu ɛnyā, ŋma lɛ ō je oyeeyi ku nu gwɛɛya, Ujisɔsi lɛ ule ku oyeeyi nōo hɛ Adam abɔ a gba.—1 Ukɔ́r. 15:45; 1 Utím. 2:6.

7. Ojama ōhī nyá nɛ Ujisɔsi má eko nɛ ó yɔ ipu ɛcɛ nyā a?

⁷ Eko nɛ ó yɔ ipu ɛcɛ nyā a, Ujisɔsi lɛyitaajɛ lɛ Ujehofa ipu ɛjɛɛji ɔdā doodu, kwu eko nōo yɔ ɔɔma kóō le lɔnɔ a. Eko nɛ Ujisɔsi wɛ ɔyipɛ a, naana nɛ ó wɛ ɔcɛ nōo jila iyē a, ó cɛgbá ō lɛyitaajɛ lɛ Umeri mla Ujosɛfu nōo wɛ ɛ́nɛ́ mla adā nu nōó jila iyē ŋ ma. (Ulúk. 2:51) Eko nɛ Ujisɔsi kē wɛ ɛdrɔ a, ó cɛgbá ō ta ojama ŋma ɛgiyi ācɛ ɔhá. Á jé ŋ, ācɛ nōo gē kwu ɔ abɔfu kóō hii lɛyitaajɛ lɛ ɛ́nɛ́ mɛmla adā nu ŋ, amāŋ ka ó hii hayi kpaakpa lɛ Ujehofa ŋ ma. Eko nɛ Ujisɔsi kē kwu piya ijinkpa a, ó ta ojama ŋma ɛgiyi Usetan nōo wɛ Ebilii nōo kwu ɔ abɔfu kóō lɛ íne biya, nɛ ō klla da ɔ eyi caa ka ó hii hayi kpaakpa lɛ Ɔwɔico gɛ ŋ ma. (Umát. 4:​1-11) Usetan lɛ ɔtu ku nu ya ekponu ō ya ku Ujisɔsi kóō lɛ íne biya piii, o ya ɛɛ kóō hii tɔɔtɛ lɛ ɔ ō fula alɔ ŋ.

8. Aojama ɔhá nyá nɛ Ujisɔsi lɔtu ku uwa a?

⁸ Ɛpleeko nɛ ó yɔ i yuklɔ ku ɔna ō ta ku nu ipu ɛcɛ nyā a, Ujisɔsi klla má ojama ɔhá. Aolɛla ku nu ya ɔ ŋmo klla ceyitikwu ō lɛ ɔ ŋmo. (Ulúk. 4:​28, 29; 13:31) Ó cɛgbá ō lɔtu ku á jila iyē ŋ ku ācɛ nōo gē yɛce ɔ a. (Umák. 9:​33, 34)  Eko néē yɔ i kɛpɔ tu ɔ kéē je ɔ ŋmo a, é ya ɔ owe bɔbi bɔbi klla ŋmo ɔ okonu. Oŋma ɔɔma, é gáā kwu ɔ u playi ɔcí ku owe kóō kwū ɛmɛɛma bɛɛka uwi a. (Uhíb. 12:​1-3) Ó cɛgbá ō lɔtu ku owe amoomɛ nɛ ó má a abɔyi nu, nɛ ó lɛ ogbotu ku Ujehofa ŋ. b—Umát. 27:46.

9. Ɛgɛnyá nɛ ɔtu gē ya alɔ lɛyikwu ikwū nɛ Ujisɔsi kwū kwɛyi alɔ a? (1 Upíta 1:8)

⁹ Ó lɛ aafu ŋ, Ujisɔsi má owe nɛhi o ya ɛɛ kóō le tɔɔtɛ lɛ ɔ ō lɛ alɔ fula. Eko duuma nɛ alɔ gbɛla lipu lipu tu ɔdā nōó je Ujisɔsi o ya ɛɛ kóō lɛ alɔ fula a, ó gē lɛ abɔ kwu alɔ ɔtu ō yihɔtu ku nu fiyɛ.—Jé 1 Upíta 1:8.

10. Ɔdi nōó je Ujehofa ō jɛga lɛ Ujisɔsi kóō kwū kwɛyi alɔ a?

¹⁰ Ɔdi nōó je Ujehofa o ya ɛɛ kóō jɛga lɛ Ujisɔsi kóō kwu oyeeyi ku nu i gwɛɛya, o ya ɛɛ kóō lɛ alɔ fula a? Ujehofa mla Ujisɔsi lɛ ɛdɔ ɛma olɔfu nɛhi nōo gē yɔ ɔtahɛ ku adā mla ɔyi a. (Aíit. 8:30) Gbɛla tu ɛgɛ nɛ ɔtu ya Ujehofa lɛ, abɔ ó má Ujisɔsi yɔ i má owe nɛhi eko nɛ ó yɔ ipu ɛcɛ nyā a. Ó lɛ aafu ŋ, ó géē kwu Ujehofa iyē nɛɛnɛhi ō má abɔ é ya ɛlā mla Ɔyinɔnyilɔ ku nu ɔwɛ obɔbi, néē leyi gwu ɔ bonu, mla ō má ɛgɛ néē ya ɔ owe bɔbi bɔbi lɛ a.

11. Je ocabɔ éyi nōo mafu ɛgɛ nɛ ɔtu ya Ujehofa lɛ eko nɛ Ujisɔsi kwū playi ɛyi ɔcí a.

¹¹ Ɛ́nɛ́ amāŋ adā nɛ ɔyi uwa kwū jejee ɛ, jé ɛgɛ nɛ ó gē kwu ɔcɛ iyē nɛhi ku ɔyi néē yihɔtu nu nɛhi a kóō kwū a. Alɔ kpɔtuce oheyi ŋma ɔlekwu a lɔfu lɔfu, amáŋ ó gē kwu alɔ iyē nɛhi kpɔ eko duuma nɛ ɔcɛ nɛ alɔ yihɔtu ku nu nɛhi a gekwu. Ocabɔ nyā ta alɔ abɔ ō jé ɛgɛ nōó kwu Ujehofa iyē nɛhi, abɔ ó yɔ i má ɔyinɔnyilɔ ku nu nōo he ɔ ɔtu nɛhi a yɔ i má owe bɔbi bɔbi, gbeeko nɛ ó kwū ɛ̄cī ku 33 Eko Ku Ukraist a. c—Umát. 3:17.

12. Ŋma obabanya gáā ta ɛ̄cī ku Oblatu a, ɔdi nɛ alɔ lɔfu ya a?

¹² Ŋma obabanya gáā ta ɛ̄cī ku Oblatu a, ceyitikwu ku a klɔcɛ lipu lipu lɛyikwu ofula a, eko nɛ a gē ya oklɔcɛ ku abɔyi uwɔ amāŋ eko nɛ aa gē ya ɛ̄gbā ō gba ku apɔlɛ. Bi u Research Guide for Jehovah’s Witnesses le yuklɔ amāŋ aɔkpá ku alɔ duuma ɔhá, o ya ɛɛ ku a nwu ɛlā tōōtɔ̄ɔ̄ lɛyikwu ofula a. d O ka tu ɔ, le má ku a gē yɛce ōmiya ku Ubáyíbu ō jé ku Oblatu a nōo yɔ ipu ɔkpá ku Oyeeyi Ku Alɔ Ācɛ O Yɛce Ukraist mla Uklɔ Ku Alɔ a. Ɛ̄cī ku Oblatu a, a kē hii je mlanyi ō  má uvidio ku Ɛ̄gbā Ō Gba Ku Ɔcɔɔci Ku Oblatu a ŋ. Ɔdaŋ ku alɔ lɛ ɔtu ku alɔ tutu taajɛ lɛyikwu Oblatu a, ó géē tɔɔtɛ lɛ alɔ fiyɛ ō je otabɔ lɛ ācɛ ɔhá kéē lɛ itene ŋma anu duu.—Ɛ́sra 7:10.

JE OTABƆ LƐ ĀCƐ ƆHÁ KÉĒ LƐ ITENE ŊMA OBLATU A

13. Ɔdi wɛ ikpo aflɛyi nɛ alɔ lɔfu fu o ya ɛɛ ku alɔ je otabɔ lɛ ācɛ ɔhá kéē lɛ itene ŋma Oblatu a?

¹³ Ɛgɛnyá nɛ alɔ gáā lɔfu je otabɔ lɛ ācɛ ɔhá kéē lɛ itene ŋma Oblatu a? Ikpo aflɛyi nɛ alɔ lɔfu fu a, wɛ ō hi uwa igwú. Ó wɛ ācɛ nɛ alɔ gē má eko nɛ alɔ gē tɔɔna ŋma ɔlɛ gā ɔlɛ a foofunu nɛ alɔ cika ō higwu a ŋ, alɔ cika ō lɛ ōmiya ya cɛɛ ku alɔ lɛ ācɛ nɛ alɔ jé a higwu duu. Ɛnyā lɔfu lɛ ō ya mla aɔmaapu alɔ, ācɛ nɛ alɔ gē yuklɔ tɔha mla uwa, ayipɛ inɔkpa ku alɔ, mla ācɛ ɔhá nɛ alɔ jé. Ɔdaŋ ka ɔkpá ō higwu nɛ alɔ lɛ a i kóō jɛ ŋ naana, alɔ lɔfu tu ɛ̄nɛ̄ o gē yɔ ipu ɔdā ō le gwo uwaya ku alɔ a ɛhɔ fu uwa ō bi le hi uwa igwú. Ó géē hi alɔ idaago nɛhi ō má ācɛ alɛwa nōo lɔfu wa a!—Ɔ̄cok. 11:6.

14. Je ocabɔ éyi nōo mafu ɔdā nōo ya ɛɛ nɛ alɔ i cika ō leyi má ɛga nɛ alɔ lɛ ō hi ɔcɛ igwú wa Oblatu a nyɛ ŋ ma.

¹⁴ A hii leyi má ɛga nɛ awɔ abɔyi uwɔ lɛ ō hi ɔcɛ higwu wa Oblatu a nyɛ ŋ. Ó le hɛ ɔyinɛ alɔ nɔnya éyi nɛ ɔba nu i wɛ Ɔcɛ Ocijali Ku Ujehofa ŋ ma idaago, eko nɛ ɔba nu a da ɔ ka anuɔ géē yɛce ɔ gā Oblatu a. Ɔdiya nɛ ó hi ɔ idaago a? Ohigbu ka igbalɛwa ŋma igbihi, ɔyinɛ alɔ nɔnya a hi ɔba nu a igwú ɛ, amáŋ ó wa jejee ɛ ŋ. Ɔdiya nɛ ó kē ka babanya ka ó géē yɛce ɔyinɛ alɔ nɔnya a gā Oblatu a? Ɔba a kahinii: “Ɔcɛ Ocijali Ku Ujehofa éyi lɛ ɔkpá ō higwu a je gā um.” Ó ka ka ɔnyakwɔcɛ ku ujɔ éyi nɛ ó jé lɔɔlɔhi a je ɔkpá ō higwu nyā lɛ ɔ a. Ɔba ku ɔyinɛ alɔ nɔnya ɔɔma gā Oblatu ku ihayi ɔɔma klla gā Oblatu alɛwa ɔhá.

15. Ɔdi nɛ alɔ cika ō bi ɔtu eko nɛ alɔ gē hi ācɛ ɔhá igwú wa Oblatu a?

¹⁵ Bi ipu ɔtu ku ācɛ nɛ alɔ gē higwu a lɔfu lɛ aɔka ō da, ofiyɛ duu ɔdaŋ ka é wa ōjila ku ujɔ ku alɔ duuma jejee ɛ ŋ. Ohigbu ɛnyā, alɔ cika ō gbɛla lɛyikwu aɔka néē lɔfu da a klla le tutu ō cila uwa. (Ukól. 4:6) Ocabɔ mafu, ācɛ ōhī lɔfu gbɛla kahinii: ‘Ɔdi gáā ya ipu ōjila ɔɔma a?’ ‘Ó géē je eko nwune?’ ‘Ɛdɔ ili nyá nɛ ɔcɛ cika ō je wiye a?’ ‘Ɔcɛ géē cɛgbá ō gba ije gbɔbu ɛɛ kóō gā ōjila a?’ ‘Eko nɛ ɔcɛ yɔ ōjila a, ó géē cɛgbá ō  je ɛhi ku ije?’ Eko nɛ alɔ yɔ i hi ɔcɛ igwú wa Oblatu a, alɔ lɔfu da ɔ ɔka kahinii: “A lɛ aɔka ō da duuma?” cɛɛ a lɛ ohi ku aɔka nɛ ó lɔfu da a cila. Alɔ klla lɔfu yuklɔ mla auvidio nōo kahinii: Blakwu Ikwū Ku Ujisɔsi mla u Ɔdi ge Ya Ipu Agbla ku Ajɔɔcɛ A?, o ya ɛɛ ku alɔ ta ɔ abɔ jé ɛgɛ nɛ alɔ gē bi le ya ōjila ku alɔ a. Ɛlā ō nwu ɔmɛ 28 ku ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma, lɛ aɔcɛla alɛwa nɛ alɔ lɔfu kɔ mla ɔcɛ ɔɔma.

16. Aɔka ōhī nyá nɛ ācɛ nōo wa Oblatu a lɔfu da kpɔ a?

¹⁶ Igbihi néē gā Oblatu Ku Ikwū ku Ujisɔsi a, ācɛ nɛ ɛlā a he uwa ɔtu a lɔfu lɛ aɔka ōhī ō da kpɔ. É lɔfu da ɔka lɛyikwu ɔdā nōo ya ɛɛ nɛ ɔcɛ duuma i lé igbo klla gwa ejé a ŋ ma, amāŋ ɔdā nōo ya ɛɛ nɛ ācɛ ligii lé igbo klla gwa ejé a. É klla lɔfu dɔka lɛyikwu igbo ɛmula nɛ alɔ gē ya Oblatu a. É klla lɔfu da ɔka ɔdaŋ ka ɔwɛ ekponu ɔɔma nɛ ɛjɛɛji Ācɛ Ocijiali Ku Ujehofa gē bi le ya ōjila ku uwa a. Naana néē kɛla lɛyikwu aɔka nyā ipu ɛlā ō ka tɛɛcɛ ku Oblatu a, ācɛ nōo wa ɛpɛpɛ a géē cɛgbá kéē lɛ ɛlā a tu uwa eyī peee fiyɛ. Ikpɛyi ɛlā nyā nōo yɔ ipu jw.org nōo kahinii: “Why Do Jehovah’s Witnesses Observe the Lord’s Supper Differently From the Way Other Religions Do?,” lɔfu ta alɔ abɔ ō cila aɔka ōhī néē lɛ a. Alɔ dɔka ō ya ɔdā duuma nɛ alɔ ya gla gbɔbu lɛ ɛ̄cī ku Oblatu a, ɛpleeko ku Oblatu a, mla igbihi ku Oblatu a, ō je otabɔ lɛ “odúúdú ācɛ nēé fu kéē lɛ oyēeyī” a, kéē lɛ itene ŋma Oblatu a.—Ācot. 13:48.

JE OTABƆ LƐ ĀCƐ NŌÓ GĒ WA ŌJILA KU UJƆ GƐ Ŋ MA

17. Ɛgɛnyá nɛ anyakwɔcɛ ku ujɔ lɔfu je otabɔ lɛ ācɛ nōó gē wa ōjila ku ujɔ gɛ ŋ ma? (Isíkɛ̄lu 34:​12, 16)

¹⁷ Eko nɛ alɔ yɔ i hi ācɛ igwú wa Oblatu a, ɛgɛnyá nɛ anyakwɔcɛ ku ujɔ lɔfu je otabɔ lɛ ācɛ nōó gē wa ōjila ku ujɔ gɛ ŋ ma? Mafu lɛ uwa ku a lɛ ɛlá wu uwa nɛhi. (Jé Isíkɛ̄lu 34:​11-12, 16.) Gbɔbu lɛ ɛ̄cī ku Oblatu a, ceyitikwu ku a yɛ fu alɛwa ku uwa ɛgɛ nōó tɔɔtɛ gā uwɔ gla a. Da uwa ku a lɛ ɛlá wu uwa nɛhi, ku a klla dɔka ō je otabɔ lɛ wa ɔwɛ duuma nōo tɔɔtɛ gla a. Hi uwa igwú wa Oblatu a. Ɔdaŋ ka é cɛ ō wa, ya uwa omaaba lɔɔlɔhi. Igbihi ku Oblatu a, gɔbu ku a yɔ i nyɔ gáā jila uwa má, amāŋ yɔ i gwo uwaya fu uwa mla ō je otabɔ duuma néē cɛgbá a lɛ uwa, o ya ɛɛ kéē le cigbihi gā ɛgiyi Ujehofa.—1 Upít. 2:25.

18. Ɛgɛnyá nɛ ɛjɛɛji alɔ lɔfu je otabɔ lɛ ācɛ nōó gē wa ōjila ku ujɔ gɛ ŋ ma? (Ācɛ Uróm 12:10)

 ¹⁸ Ɛjɛɛji ayinɛ alɔ nōo yɔ ipu ujɔ a lɔfu je otabɔ lɛ ācɛ nōó gē wa ōjila ku ujɔ gɛ ŋ ma, eko duuma néē wa Oblatu a. Ɛgɛnyá a? Ŋma lɛ ō ya ɛlā mla uwa ɔwɛ ihɔtu, ɔwɛ ogbonɛnɛ, mla ɔwɛ ojilima. (Jé Ācɛ Uróm 12:10.) Bla ka ó wɛ ɔdā nōo lɔfu tɔɔtɛ lɛ ōhī ku uwa ō gā ōjila ku ujɔ gɛ ŋ. Á jé ŋ, é lɔfu yɔ i yuufi lɛyikwu ɔdā nɛ ayinɛ nōo yɔ ipu ujɔ a lɔfu ka lɛ uwa amāŋ ka lɛyikwu uwa a. e Ohigbu ɛnyā, a hii da uwa ɔka nōo géē ya ku uweyi kóō kwu uwa, amāŋ kɛla duuma nōo géē ya ku ɔtu kóō biya lɛ uwa ŋ. (1 Utes. 5:11) Ayinɛ alɔ nɛ ācɛ nōo ba nyā wɛ kpɔ a. Ó wɛ ɔdā eeye nɛhi ku alɔ lɛ ɛga ō gba Ɔwɔico ɛ̄gbā tɔha mla uwa kpɔ!—Aíjē 119:176; Ācot. 20:35.

19. Itene nyá nɛ alɔ gē lɛ ɔdaŋ ku alɔ gā Oblatu ku ikwū ku Ujisɔsi a?

¹⁹ Ó wɛ ɔdā ō jɛ alɔ eyī nɛhi ka Ujisɔsi da alɔ ku alɔ ya Oblatu Ku Ikwū ku nu ihayi doodu, alɔ kē jé ɔdā nōo ya ɛɛ nōo ya ɔɔma cɛgbá nɛhi a. Ɔdaŋ ku alɔ gā Oblatu a, alɔ abɔyi alɔ mla ācɛ ɔhá gē lɛ itene ɔwɛ alɛwa. (Ayis. 48:​17, 18) Ihɔtu nɛ alɔ lɛ lɛ Ujehofa mla Ujisɔsi a gē lɔfu tōōtɔ̄ɔ̄. Alɔ gē mafu lɛ uwa ɛgɛ nɛ ɔdā néē ya lɛ alɔ a jɛ alɔ eyī nɛhi lɛ a. Alɔ gē ya ku ɛma nɛ alɔ lɛ mla ayinɛ alɔ a kóō yɔ i lɔfu tōōtɔ̄ɔ̄. Alɔ kē lɔfu je otabɔ lɛ ācɛ ɔhá kéē nwu ɛlā lɛyikwu ɛgɛ néē lɔfu jɔɔnyɛ ɛnɛɛnɛ ɔhā, nɛ ɛhi ku ofula a ya tɔɔtɛ lɛ uwa a. Alɔ ya ɔdā duuma nɛ alɔ ya gla a ō le tutu taajɛ ku Oblatu ku ihayi nyā, nōo wɛ ɛ̄cī nōo cɛgbá fiyɛ duu ipu ihayi a!