1. Ɛgɛnyá nɛ alɔ gē lɛ itene ŋma ō gā Oblatu Ku Ikwū ku Ukraist ihayi doodu a?

 UJEHOFA je ɛnɛɛnɛ ɛhi lɛ alɔ eko nɛ ó tu Ɔyinɔnyilɔ ku nu ɛhɔ kóō wa ipu ɛcɛ nyā gáā kwū ohigbu alɔ a! (2 Ukɔ́r. 9:15) Ohigbu ka Ujisɔsi gekwu kwɛyi alɔ a, a lɔfu je piya ɔya ku Ujehofa. A klla lɔfu lɛ eyiyoce ō lā oyeeyi opiyoo ɛcɔbu. Alɔ lɛ ɔdā alɛwa nōo ya nɛ alɔ cika ō ta Ujehofa ahinya ku ɛhi kóō fula nɛ ó ya tɔɔtɛ lɛ alɔ ohigbu ka ó yihɔtu alɔ nɛɛnɛhi a! (Uróm 5:8) O ya ɛɛ ku alɔ gɔbu mafu ka ɛhi kóō fula a jɛ alɔ eyī, ku alɔ klla je mlanyi ɔdā nɛ Ujehofa mla Ujisɔsi ya lɛ alɔ a ŋ ma, Ujisɔsi je ɔ́da lɛ alɔ ō bēē gā ōjila ku Oblatu Ku Ikwū ku nu ihayi doodu.—Ulúk. 22:​19, 20.

 2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

² Ihayi nyā, alɔ géē ya Oblatu Ku Ikwū ku Ujisɔsi ɛ̄cī Usati ku Ɔya Ɔmɛnɛ 12, 2025. Ó lɛ aafu ŋ, ɛjɛɛji alɔ yɔ i ya ōmiya ō gā ōjila ɔɔma. Alɔ géē lɛ itene nɛɛnɛhi ɔdaŋ ka alɔ bi alaadi ōhī gbɔbu lɛ Oblatu amāŋ igbihi ku Oblatu a, le gbɛla lipu lipu a tu ɔdā nɛ Ujehofa mla Ɔyinɔnyilɔ ku nu ya lɛ alɔ ɛ ma. Ipu ikpɛyi ɛlā nyā, alɔ géē kɛla lɛyikwu ɔdā nɛ ofula a nwu alɔ lɛyikwu Ujehofa mla Ɔyinɔnyilɔ ku nu a. Ikpɛyi ɛlā nōo gboce ɛnyā a géē ta alɔ abɔ ō jɛyi ku ɛgɛ nɛ alɔ lɔfu lɛ itene ŋma ō fula a, mla ɛgɛ nɛ alɔ géē mafu ka ó jɛ alɔ eyī a.

ƐLĀ NƐ OFULA A NWU ALƆ LƐYIKWU UJEHOFA A

 3. Ɛgɛnyá nōó tɔɔtɛ ku ikwū ku ɔcɛ ekponu kóō lɔfu hɛ ācɛ alɛwa ta ŋma íne obiya mla ikwū a? (Má ifoto a.)

³ Uce ō ya éyi nōo lɛ abɔ kwu Ujehofa ɔtu kóō tu Ɔyinɔnyilɔ ku nu ɛhɔ kóō gáā kwū ohigbu alɔ a, wɛ ɔwɛ okpaakpa nɛ ó gē ya odee a. (Obla. 32:4) Ɛgɛnyá a? Leyi yɛ ocabɔ nyā: Eko nɛ Adam biya íne ku Ɔwɔico a, ó kwu piya ɔcɛ obiya íne klla gekwu.  Ohigbu ka alɔ kē wɛ ayi ku Adam a, alɔ gē biya íne klla gē kwū duu. (Uróm 5:12) O ya ɛɛ kóō lɛ alɔ hɛta ŋma íne ō biya mla ikwū a, Ujehofa lɛ Ujisɔsi tɛhɔ kóō gáā lɛ alɔ fula. Amáŋ ɛgɛnyá nōó tɔɔtɛ ku ikwū ku ɔcɛ ekponu nōo jila iyē, kóō hɛ ācɛ alɛwa ta ŋma íne obiya mla ikwū a? Ɔyikpo Upɔlu lɛ ɔ teyi peee kahinii: “Ohígbū ka ɔ̄cɛ ékpónú [Adam] yá ikpɛ̄yí olɔfú tá Ɔwɔicō á, anɔ́ɔ odúúdú ācɛ le pīya ācobīyíne á. Ɔwɛ ékpó ɔ́ɔmā Ɔwɔicō í hɛ́ ɛpɔ̄hi lɛ odúúdú ācɛ ohígbū ka ɔ̄cɛ éyi [Ujisɔsi] lɛyítáajɛ lɛ ɔ́.” (Uróm 5:19; 1 Utím. 2:6) Ohigbu ɛnyā, ɔyikpo Upɔlu yɔ i ka ka ɛjɛɛji alɛɛcɛ kwu piya ācɛ obiya íne klla gbɔɔ ō kwū, ohigbu ka ɔcɛ éyi nōo jila iyē a lɛ ikpɛyi olɔfu ya ta Ɔwɔico. Ohigbu ɛnyā, o ya ɛɛ kóō lɛ alɔ hɛta ŋma íne obiya mla ikwū a, ɔcɛ éyi nōo jila iyē cɛgbá ō lɛyitaajɛ lɛ Ɔwɔico.

 4. Ɔdiya nɛ Ujehofa i jɛga ku ayi ku Adam nōo lɛyitaajɛ lɛ ɔ a kéē lā oyeeyi piyoo ŋ ma?

⁴ Ó cɛgbá ɔkwɔɔkwɛyi ku Ujehofa kóō tu Ujisɔsi ɛhɔ kóō gáā kwū ohigbu alɔ? Ɔdiya nɛ Ujehofa i jɛga ku ayi ku Adam nōo lɛyitaajɛ lɛ ɔ a kéē lā oyeeyi opiyoo ŋ ma? Alɔ lɔfu gbɛla ka ɛnyā wɛ ɔwɛ olɔhi fiyɛ duu ō ya ku unwalu a kóō mɛ a. Amáŋ tu Ujehofa, ɔɔma i gáā wɛ ɔdā okpaakpa ō ya ŋ. Ohigbu ka ɔɔma géē ya kóō lɛbɛɛka Adam i biya íne bɔbi bɔbi jejee ɛ ŋ, ayi nu i klla wɛ ācɛ obiya íne ŋ duu. Amáŋ, ɔɔma i kē wɛ ɔkwɛyi ŋ.

 5. Ɔdiya nɛ alɔ lɔfu lɔtuce kpɔcii ka Ujehofa géē yɔ i ya ɔdā okpaakpa eko doodu a?

⁵ O ka tu ɔ, ɔdaŋ ka Ujehofa i ya ofula a tɔɔtɛ ŋ klla lɛ ɛga jɛ lɛ ayi ku Adam kéē lā oyeeyi opiyoo naana néē jila iyē ŋ ma, ɔɔma géē mafu ka Ujehofa leyi gwu ɔwɛ okpaakpa nɛ ó gē ya odee lɛyikwu ɔdobɔbi mla ɔdā olɔhi a bonu. Ohigbu ɛnyā, ācɛ lɔfu junwalu lɛ iyi uwa ka ó géē leyi gwu ɔwɛ okpaakpa nɛ ó gē ya odee a bonu kpɔ, ō hii ya ɔdā nɛ ó ka ka anuɔ géē ya ɛcɔbu a ŋ. Ācɛ lɔfu lɛ aafu ɔdaŋ ka Ujehofa géē lɛ ɛjɛɛji okonu nɛ ó ce a tu. Amáŋ alɔ i cɛgbá ō junwalu lɛ iyi alɔ ɔdaŋ ka ɔɔma géē ya ŋ. Ɔdiya a? Ohigbu ka Ujehofa ya ɔdā okpaakpa a, naana nōo ya ɔɔma cɛgbá kóō lɛ Ɔyinɔnyilɔ ku nu gwɛɛya a. Ohigbu ɛnyā, alɔ lɔfu lɔtuce kpɔcii ka ó géē gɔbu ō ya ɔdā okpaakpa a eko doodu.

 6. Uce ō ya ɔhá nyá lɛ abɔ kwu Ujehofa ɔtu kóō tu Ɔyinɔnyilɔ ku nu ɛhɔ kóō gáā kwū ohigbu alɔ a? (1 Ujɔ́ni 4:​9, 10)

⁶ Ó klla lɛ ɛnɛɛnɛ uce ō ya ɔhá nōo cɛgbá fiyɛ duu nōo lɛ abɔ kwu Ujehofa ɔtu kóō tu Ɔyinɔnyilɔ ku nu ɛhɔ kóō gáā kwū ohigbu alɔ: Ɔɔma kē wɛ ihɔtu nɛ ó lɛ lɛ alɔ a. (Ujɔ́n. 3:16; jé 1 Ujɔ́ni 4:​9, 10.) Ujehofa tu Ɔyinɔnyilɔ ku nu ɛhɔ kóō gáā kwū ohigbu alɔ, ohigbu ka ó dɔka ku alɔ yeeyi piyoo klla dɔka ku alɔ gáā wɛ ipu apɔlɛ ku nu. Leyi yɛ ocabɔ nyā: Ŋma eko nɛ Adam biya íne a, ó tɔɔtɛ lɛ ɔ ō gɔbu wɛ ipu apɔlɛ ku Ujehofa gɛ ŋ. Ohigbu ɛnyā, alɔ abɔyi alɔ i  wɛ ipu apɔlɛ ku Ɔwɔico eko néē ma alɔ a ŋ duu. Amáŋ ohigbu ofula a, ɛjɛɛji alɛɛcɛ nōo kpɔtuce Ɔwɔico klla lɛyitaajɛ lɛ ɔ a lɔfu gáā wɛ ipu apɔlɛ ku nu. Babanya, alɔ kóō lɔfu lɛ ɛma olɔhi mla Ujehofa mla ayinɛ alɔ. Ujehofa yihɔtu alɔ ɔkwɔɔkwɛyi!—Uróm 5:​10, 11.

 7. Ɛgɛnyá nɛ owe nɛ Ujisɔsi má a ta alɔ abɔ ō jɛyi ku ɛgɛ nɛ Ujehofa yihɔtu alɔ nɛɛnɛhi lɛ a?

⁷ Alɔ lɔfu jɛyi ku ɛgɛ nɛ Ujehofa yihɔtu alɔ nɛɛnɛhi lɛ a fiyɛ, ɔdaŋ ka alɔ gbɛla tu ɛgɛ nōó biya ɔ ɔtu nɛɛnɛhi lɛ ō má Ɔyinɔnyilɔ ku nu yɔ i má owe a. Usetan ka ka ó lɛ ɔcɛ o gba Ɔwɔico ɛ̄gbā duuma nōo géē gɔbu hayi kpaakpa lɛ ɔ eko duuma nōó le lɔnɔ ō ya lɛ a ŋ. O ya ɛɛ kóō mafu ka Usetan wɛ ɔcɛ o kɛmgbɛ a, Ujehofa jɛga lɛ Ujisɔsi kóō má owe klla gekwu. (Ujób. 2:​1-5; 1 Upít. 2:21) Ujehofa má abɔ ācɛ yɔ i ŋmo Ujisɔsi okonu, aicɔɔja gɔ, néē klla lɛ ikpusa hɛ wu ɔ abɔ playi ɛyi ɔcí a. Ujehofa klla má Ɔyinɔnyilɔ ku nu nɛ ó yihɔtu ku nu nɛhi a gekwu ɔwɛ nōo kwiiye nɛhi. (Umát. 27:​28-31, 39) Ujehofa lɛ ɔfu ō ci ɛjɛɛji aɔdā nōo ba nyā ŋma ō ya gla. Ocabɔ mafu, eko nɛ aolɛla ku Ujisɔsi kahinii: “Ó lɔtūce Ɔwɔicō nɛ, kóō lɛ ɔ́ hɛ́tá mɛ́ɛ́nɛ, ɔ́dāŋ koó tíne ō nya ɔ́ tá,” Ujehofa lɔfu lɛ ɔ nyata boobu. (Umát. 27:​42, 43) Amáŋ ɔdaŋ ka ó gē yɛ i le ya lɛ a, ó gē yɛ i tɔɔtɛ lɛ Ujisɔsi ō fula alɔ ŋ, alɔ i klla gē yɛ i lɛ eyiyoce duuma ŋ. Ohigbu ɛnyā, Ujehofa jɛga ku Ɔyinɔyilɔ ku nu kóō lɔtu owe nɛ ó yɔ i má a jaa gbeeko nɛ ó gekwu.

 8. Ɔtu biya lɛ Ujehofa eko nɛ ó má Ɔyinɔnyilɔ ku nu yɔ i má owe a? Lɛ ɔ teyi peee. (Má ifoto a.)

⁸ Alɔ i cika ō gbɛla ka ohigbu ka Ɔwɔico wɛ ɔcɛ nōo lɛ ɔfu fiyɛ duu a, ɔtu i gē ya ɔ ɛgɛ nɛ ó gē ya alɔ a ŋ! Ó ya alɔ ɔwɛ nɛ ɔtu gē yɔ i ya alɔ ɔwɛ ōhī. Ohigbu ka Ubáyíbu kē ka ka ó ya alɔ gbla iyi nu a, ɔɔma wɛ ka ɔtu gē ya ɔ ɛgɛ nōó gē ya alɔ lɛ a duu. Ubáyíbu kɛla lɛyikwu ɔ ka ó gē ya “ɔtūnōbí” mla “íwɔ́tū.” (Aíjē 78:​40, 41) Gbɛla lɛyikwu ɔ̄kā ku Ebraham mla Ayisiki. Ujehofa da Ebraham kóō kwu ɔyinɔnyilɔ ekponu ku nu i gwɛɛya lɛ ɔ. (Ohút. 22:​9-12; Uhíb. 11:​17-19) Gbɛla lɛyikwu ɛgɛ nɛ ɔtu géē biya klla gbenyi nɛɛnɛhi lɛ Ebraham eko nɛ ó le tutu ō je ɔyinɔnyilɔ ku nu ŋmo a. Gbɛla lɛyikwu ɛgɛ nōó géē biya Ujehofa ɔtu klla cɛ lɛ ɔtu gbenyi lɛ ɔ nɛɛnɛhi lɛ a fiyɛ, eko nɛ ó má ɛgɛ nɛ ācɛ yɔ i ya Ɔyinɔnyilɔ ku nu owe nɛɛnɛhi lɛ klla kwu i ŋmo a!—Má uvidio nyā ipu jw.org nōo kahinii: Imitate Their Faith—Abraham, Part 2.

 9. Ɛlā nyá nɛ a lɔfu nwu ŋma ɔkpá ku Ācɛ Uróm 8:​32, 38, 39 lɛyikwu ihɔtu ku Ujehofa a?

⁹ Ofula a nwu alɔ ka ó lɛ ɔcɛ duuma nōo yihɔtu alɔ nɛɛnɛhi ɛgɛ nɛ Ujehofa ya a ŋ—kwu acɛ apɔlɛ ku alɔ amāŋ aɔkpa ku alɔ nōo kóō kwu alɔ ajaajɛ a. (Jé Ācɛ Uróm 8:​32, 38, 39.) Ó lɛ aafu ŋ, Ujehofa yihɔtu alɔ fiyɛ ɛgɛ nɛ alɔ kóō yihɔtu iyi alɔ a. A dɔka ō lā oyeeyi opiyoo? Ɔɔma kóō he Ujehofa ɔtu fiyɛ a. A dɔka kéē  kwu íne obiya ku uwɔ i ya uwɔ ɛhi? Ɔɔma kóō he Ujehofa ɔtu fiyɛ a. Aɔdā nɛ ó cɛgbá ŋma ɛgiyi alɔ foofunu a, wɛ ō mafu ka ɛhi kóō fula a jɛ alɔ eyī, ō kpɔtuce ɔ, mla ō lɛyitaajɛ lɛ ɔ. Ofula a wɛ ɛnɛɛnɛ ɛhi nōo mafu ɛgɛ nɛ Ujehofa yihɔtu alɔ nɛɛnɛhi lɛ a. Ipu ɛcɛ ɛyipɛ a, alɔ klla géē nwu ɛlā fiyɛ lɛyikwu ɔdā alɛwa nɛ ó ya lɛ alɔ ɛ ohigbu ka ó yihɔtu alɔ a.—Ɔ̄cok. 3:11.

ƐLĀ NƐ OFULA A NWU ALƆ LƐYIKWU UJISƆSI A

10. (a) Ɔdiya nɛ ɔtu biya lɛ Ujisɔsi nɛɛnɛhi lɛyikwu ikwū ku nu a? (b) Ɔwɛ ōhī nyá nɛ Ujisɔsi mafu ka Ujehofa le kpaakpa a? (Má ikpati nyā nōo kahinii: “ Ō Hayi Kpaakpa Ku Ujisɔsi Ya Ku Iye Ku Ujehofa Kóō Le Ya Tiihɔ.”)

¹⁰ Ujisɔsi lɛ ɛlá wu ɔdā nɛ ācɛ gē gbɛla lɛyikwu Adā nu a nɛɛnɛhi. (Ujɔ́n. 14:31) Ɔtu biya lɛ Ujisɔsi nɛɛnɛhi ohigbu ka ācɛ lɔfu gbɛla ɔwɛ obɔbi lɛyikwu Adā nu, ohigbu ka é géē ŋmo ɔ ohigbu ije néē ce ba ɔ ka ó wɛ ɔcɛ nōó gē lɛ ojilima ce Ɔwɔico ŋ mla uwi a. Ɔɔma ya ɛɛ nɛ ó gbɔɔkɔ kahinii: “Ádā um, ɔ́dāŋ́ koó tɔ́ɔtɛ́, yá kéē kwú íkókwū nyā ú ŋmá ɛgiyí um.” (Umát. 26:39) Amáŋ ohigbu ka Ujisɔsi gɔbu hayi kpaakpa lɛ Ujehofa jaa gbeeko nɛ ó kwū a, ó le mafu peee ka ɛkɛmgbɛ nɛ Usetan ka lɛyikwu Adā nu a.

11. Ɛgɛnyá nɛ Ujisɔsi mafu ka ó yihɔtu ācɛ nɛɛnɛhi a? (Ujɔ́ni 13:1)

¹¹ Ofula a klla nwu alɔ ka Ujisɔsi lɛ ɛlá wu ācɛ nɛɛnɛhi, ofiyɛ duu ācɛ nōo gē yɛce ɔ a. (Aíit. 8:31; jé Ujɔ́ni 13:1.) Ocabɔ mafu, Ujisɔsi jé ka aɔdā ōhī nɛ ó wa ipu ɛcɛ gáā ya a géē lɔnɔ nɛhi, ofiyɛ duu ikwū nɛ ó géē kwū ɔwɛ olɔnɔ nɛhi a. Amáŋ Ujisɔsi lɛ ɛjɛɛji aɔdā olɔnɔ kpɛmm nyā ya, ó wɛ ohigbu ka Ujehofa da ɔ kóō ya lɛ a foofunu ŋ, amáŋ ohigbu ka ó yihɔtu ācɛ nɛɛnɛhi. Ujisɔsi mafu ihɔtu lɛ ācɛ nɛɛnɛhi ŋma lɛ ō tɔɔna lɛ uwa, ō nwu uwa ɛlā, mla ō je otabɔ lɛ uwa. Otu amoomɛ gbɔbu ɛɛ kóō kwū a, Ujisɔsi lɛ eko taajɛ ō na ikpo ku ayikpo ku nu, ō nwu uwa ɛlā, ō je ɔtu ō tu lé mla ɔtu ō ta kwu ɔtu lɛ uwa. (Ujɔ́n. 13:​12-15) Eko nɛ ó kóō yɔ i jé ɔnɔ  nɛɛnɛhi klla yɔ i kwū ɛyi ɔcí ku owe a, Ujisɔsi je eyiyoce lɛ uwi néē le playi ɛyi ɔcí pi ɔ a ŋma lɛ ō da ɔ ka ó géē yɔ ipu Uparadais. Ó klla mafu ka ó lɛ ɛlá wu ɛ́nɛ́ nu ŋma lɛ ō da Ujɔni kóō leyi kwu ɔ. (Ulúk. 23:​42, 43; Ujɔ́n. 19:​26, 27) Ujisɔsi mafu ɛgɛ nɛ ó yihɔtu ācɛ nɛɛnɛhi lɛ a, ó wɛ oŋma lɛ ikwū nɛ ó kwū ohigbu uwa a foofunu ŋ, amáŋ oŋma lɛ ō ya ɛlā mla uwa ɔwɛ ku ihɔtu mla ɔwɛ ogbonɛnɛ.

12. Ɛgɛnyá nɛ Ujisɔsi yɔ i ta alɔ abɔ babanya a?

¹² Ó wɛ ɔkwɛyi ka Ujisɔsi “gekwú kóō kwú igbɔhá gɛ ŋ́,” amáŋ ó gɔbu yɔ i ya ɔdā alɛwa lɛ alɔ kpɔ. (Uróm 6:10) Ɔdi nɛ ó yɔ i ya lɛ alɔ a? Ó gɔbu yɔ i yuklɔ o ya ɛɛ kóō je aɔdā olɔhi alɛwa lɛ alɔ nōo tɔɔtɛ lɛ alɔ babanya ohigbu ofula a. Leyi bi uklɔ nɛ ó yɔ i ya lɔfu lɔfu a. Ó yɔ i yuklɔ ku Ɔcɛ́, Otrɛyi Nɛhi Ku Ācɛ Ogwɛɛya, mla otrɛyi ku ujɔ. (1 Ukɔ́r. 15:25; Āfi. 5:23; Uhíb. 2:17) Anu yɔ i leyi kwu uklɔ kóō tuba ku ācɛ néē lɛ anɔ tu uwa ɛyi mla ɛwa nɛhi a, uklɔ nōo géē ŋmɛyi gbɔbu ɛɛ ku eko ku owe nɛhi a kóō ŋmɛyi a. b (Umát. 25:32; Umák. 13:27) Ó klla yɔ i bi ɔcocɛhɔ néē cika ō lɔtuce nōo jeeyi a yuklɔ ō je aɔdā nɛ alɔ cɛgbá a lɛ alɔ, o ya ɛɛ ku alɔ gɔbu yɔ i gba Ujehofa ɛ̄gbā kpaakpa ɛpleeko amoomɛ nyā a. (Umát. 24:45) Eko nɛ ó kē gáā lé ɔcɛ́ ikpɛyi ku alɔ ɛpla Ihayi Ula Ɛpa Ce Ofu Igwo a, ó géē gɔbu yɔ i ya aɔdā olɔhi alɛwa lɛ alɔ. Eko nɛ Ujehofa je Ɔyinɔnyilɔ ku nu lɛ alɔ a, ó je ɔ o ya ɛɛ kóō kwū lɛ alɔ foofunu ŋ, amáŋ o ya ɛɛ kóō ya aɔdā olɔhi alɛwa lɛ alɔ!

GƆBU KU A YƆ I NWU AƐLĀ ƐPƐPƐ

13. Ɛgɛnyá nɛ a lɔfu gɔbu yɔ i nwu ɛlā lɛyikwu ihɔtu nɛ Ɔwɔico mla Ukraist mafu lɛ alɔ a?

¹³ A lɔfu gɔbu yɔ i nwu ɛlā lɛyikwu ihɔtu nɛ Ujehofa nōo wɛ Ɔwɔico mla Ujisɔsi Ukraist mafu lɛ alɔ a, ɔdaŋ ku a gɔbu yɔ i gbɛla lipu lipu tu ɔdā néē ya gā uwɔ ɛ ma. Ipu alaadi ōhī gbɔbu lɛ Oblatu amāŋ igbihi ku Oblatu ku ihayi nyā, a lɔfu lɛ eko taajɛ ō jé ɛga éyi amāŋ alɛwa ku ɔkpá ku Umatiyu, Umaki, Uluku, mla Ujɔni a lɔɔlɔhi. A hii ceyitikwu ō jé ɛga alɛwa ku Ubáyíbu a eko ekponu ŋ. Ikɔkɔ ɔɔma, jé ɔ ɛmɛɛma ku a klla dɔka ɔdā ɔhá nōo ya nɛ alɔ cika ō yihɔtu ku Ujehofa mla Ujisɔsi a. Ceyitikwu ku a kē da ācɛ ɔhá ɛlā nɛ a nwu a.

14. Ɛgɛnyá nɛ ɛlā ō jila má lɔfu ta alɔ abɔ ō gɔbu yɔ i nwu ɛlā lɛyikwu ofula a mla aɛlā ō nwu ɔhá a? (Aíjē Kú Ɛ̄gbā 119:97) (Má ifoto a.)

¹⁴ Ɔdaŋ ka ó gboji nɛ a yɔ ipu ɔkwɛyi a ɛ, a lɔfu gbɛla ɔdaŋ ka ó lɛ aɛlā ɛpɛpɛ ɔhá nōo yɔ kpɔ nɛ a lɔfu nwu lɛyikwu ɔwɛ okpaakpa nɛ  Ɔwɔico gē ya odee, ihɔtu ku nu, mla ofula a. Ku ɛlā ɔkwɛyi a, alɔ lɔfu lɛ aɛlā alɛwa ɛpɛpɛ ō nwu eko doodu lɛyikwu aɛlā nōo ba nyā. Ó lɛ a, ɔdi nɛ a lɔfu ya a? Bēē jé ku a klla bēē klɔcɛ ɛnɛɛnɛ aɛlā alɛwa nōo yɔ ipu ɔkpá ku alɔ a. Eko duuma nɛ a lɛ odee jé ŋma ipu Ubáyíbu nɛ á jɛyi nu duudu ŋ, jila ɛlā má. Oŋma ɔɔma, bi ɛjɛɛji ɛ̄cī ohile a le gbɛla lipu lipu tu ɛlā nɛ a klɔcɛ mla ɛlā nɛ a nwu lɛyikwu Ujehofa, Ɔyinɔnyilɔ ku nu, mla ihɔtu néē mafu gā uwɔ a.—Jé Aíjē Kú Ɛ̄gbā 119:97.

15. Ɔdiya nōó cɛgbá ku alɔ gɔbu yɔ i ceyitikwu ō nwu aɛlā ɛpɛpɛ ŋma ipu Ubáyíbu a?

¹⁵ Ɔtu kóō hii gbenyi gā uwɔ ɔdaŋ ku á má ɔdā ɛpɛpɛ amāŋ ɔdā nōo géē cɛ lɛ ɔtu he uwɔ eko duuma nɛ a yɔ i jé Ubáyíbu amāŋ jila ɛlā má ŋ. Leyi má iyi uwɔ bɛɛka ɔcɛ nōo yɔ i ceyitikwu ō dɔka ugoolu a. Igbalɛwa, ɔcɛ nōo yɔ i dɔka ugoolu cɛgbá ō bi eko alɛwa amāŋ ɛ̄cī alɛwa gbɔbu ɛɛ kóō má ugoolu ōhī. Amáŋ ó gē cɛ lɛ ɛ̄jɛ̄ jɛ ɔ ŋ, klla lɔtule gɔbu yɔ i dɔka ugoolu a, ohigbu ka ugoolu duuma nɛ ó má ɔdaŋ nōó kóō le ligii naana, cɛgbá lɛ ɔ nɛɛnɛhi. Ɔdā ɛpɛpɛ duuma nɛ alɔ nwu ŋma ipu Ubáyíbu a cɛgbá nɛɛnɛhi fiyɛ ugoolu! (Aíjē 119:127; Aíit. 8:10) Ohigbu ɛnyā, gɔbu ku a yɔ i jé Ubáyíbu ku a klla gɔbu yɔ i dɔka aɛlā ɛpɛpɛ o ya ɛɛ ku a nwu ɛlā ŋma anu.—Aíjē 1:2.

16. Ɛgɛnyá nɛ alɔ lɔfu yɛce ocabɔ ku Ujehofa mla Ujisɔsi a?

¹⁶ Eko duuma nɛ a yɔ i klɔcɛ, gbɛla lɛyikwu ɛgɛ nɛ a lɔfu bi ɛlā nɛ a nwu a le yuklɔ ipu oyeeyi ku uwɔ a. Ocabɔ mafu, yɛce ocabɔ ku ɛgɛ nɛ Ujehofa gē ya odee ɔwɛ okpaakpa a ŋma lɛ ō ya ɛlā mla ācɛ ɔhá ɔwɛ olɔhi. Yɛce ocabɔ ku ɛgɛ nɛ Ujisɔsi yihɔtu Adā nu mla ācɛ ɔhá, ŋma lɛ ō cɛ ŋma ɔtu ō ya ɔdā nɛ Ujehofa dɔka a mla ō ta ācɛ ɔhá abɔ, ɔdaŋ ka ō ya ɔɔma kóō lɔfu ya ku oyeeyi kóō lɔnɔ tu alɔ ekoohi. O ka tu ɔ, yɛce ocabɔ ku Ujisɔsi ŋma lɛ ō tɔɔna lɛ ācɛ ɔhá, o ya ɛɛ kéē lɛ ɛnɛɛnɛ ɛga ō nwu ɛlā lɛyikwu aɔdā olɔhi alɛwa nɛ Ujehofa humayi ya lɛ alɛɛcɛ ɛ, mla ō mafu ɔtu kpoce ku uwa lɛ ofula a.

17. Ɔdi nɛ alɔ gáā kɛla lɛyikwu ɔ ipu ikpɛyi ɛlā nōo gboce ɛnyā a?

¹⁷ Ɔdaŋ ka alɔ gɔbu yɔ i nwu ɛlā lɛyikwu ofula a, alɔ géē gɔbu yɔ i yihɔtu ku Ujehofa mla Ujisɔsi tōōtɔ̄ɔ̄. Ohigbu ka alɔ kē gɔbu yɔ i yihɔtu ku uwa tōōtɔ̄ɔ̄ a, é klla géē gɔbu yɔ i yihɔtu alɔ tōōtɔ̄ɔ̄ duu. (Ujɔ́n. 14:21; Ujɛ́m. 4:8) Ohigbu ɛnyā, alɔ gɔbu bi Ubáyíbu mla aɔkpá ɛyɛɛyɛyi nɛ ɔwa ku alɔ ya tɔɔtɛ a le nwu ɛlā lɛyikwu ofula a. Ipu ikpɛyi ɛlā nōo gboce ɛnyā a, alɔ géē kɛla lɛyikwu aɔhā nɛ alɔ lɛ ohigbu ka Ujisɔsi gekwu ohigbu alɔ, mla ɛgɛ nɛ alɔ lɔfu mafu ka ihɔtu nɛ Ujehofa mafu lɛ alɔ a jɛ alɔ eyī a.