IKPƐYI ƐLĀ Ō KLƆCƐ ƆMƐ 3
IJÉ ƆMƐ 35 ‘Jé Ɔdā Nōo Cɛgbá Fiyɛ Duu A’
Ya Ōmiya Nōo Géē Cɛ Lɛ Ujehofa Gweeye
“Ɔ̄cɛ dúúmā nōo gē lɛ ojīlīmā ce Óndú ā klla gē lɛyítáajɛ lɛ ɔ́ ā, gbɔɔ́ ō jéeyī ɛɛ́. Óndú ā lɔhi dúúdú klla le kpaakpa. Ɔ́dāŋ ka ɔ̄cɛ dúúmā jɛ́yí kú ɔdā lɔɔlɔhi, ó géē jé Óndú ā aflɛ́yí.”—AÍIT. 9:10.
ƆCƐLA
Ɛgɛ nɛ alɔ lɔfu bi ɔdā ō jé mla ohilipu le ya ōmiya ku ijeeyi a.
1. Ɔdā olɔnɔ nyá nɛ ɛjɛɛji alɔ géē cɛgbá ō ya a?
Ɛ̄CĪ doodu alɔ cɛgbá ō ya aōmiya. Ó lɛ aōmiya ōhī nōo tɔɔtɛ ō ya, bɛɛka ɔdole nɛ alɔ géē lé eko ɔci amāŋ eko nɛ alɔ géē nyɔ gáā gbiyɔla a. Amáŋ, ó lɛ aōmiya ōhī nōo gē lɔnɔ fiyɛ. Aōmiya nyā lɔfu lɛ abɔ kwu ɔbɔla ku ɔkpiye ku alɔ, eeye ku alɔ, ācɛ nɛ alɔ yihɔtu ku uwa, amāŋ ɛ̄gbā ō gba ku alɔ. Alɔ dɔka ku ōmiya nɛ alɔ gē ya a kóō tiile lɛ alɔ mla ācɛ apɔlɛ ku alɔ. Ɛ̄nɛ̄ o kē cɛgbá fiyɛ duu a, wɛ ka alɔ leyice ku aōmiya nɛ alɔ gē ya a kóō wɛ ɛ̄nɛ̄ o géē cɛ lɛ Ujehofa gweeye.—Uróm 12:1, 2.
2. Ɔdi nɛ a lɔfu ya o ya ɛɛ ku a lɔfu ya ōmiya ku ijeeyi a?
2 Ó géē tɔɔtɛ gā uwɔ fiyɛ ō ya ōmiya ku ijeeyi ɔdaŋ (1) ku a lɛ ɛjɛɛji ɛlā a jé, (2) gbɛla lɛyikwu ɛgɛ nɛ Ujehofa leyi má ɛlā a lɛ a, mla (3) ō gbɛla lɔɔlɔhi tu ɔdā nɛ a géē je ō ya a. Ikpɛyi ɛlā nyā géē kɛla lɛyikwu aɔdā ɛta nyā nɛ alɔ cɛgbá ō ya a, alɔ klla géē má ɛgɛ nɛ alɔ géē bi ohilipu ku alɔ le ya ōmiya a.—Aíit. 2:11.
LƐ ƐJƐƐJI ƐLĀ A JÉ
3. Je ocabɔ ku ɔdā nōo ya ɛɛ nōó cɛgbá ku a lɛ ɛjɛɛji ɛlā a jé gbɔbu ɛɛ ku a ya ōmiya a.
3 Ɔdā aflɛyi nɛ a cɛgbá ō ya o ya ɛɛ ku a ya ōmiya olɔhi a, wɛ ō lɛ ɛjɛɛji ɛlā a jé. Ɔdiya nɛ ɛnyā wɛ ɔdā ocɛgbá a? Leyi yɛ ɔ ka ó lɛ ɔcɛ éyi nōo lɛ unwalu ku ōcē nɛɛnɛhi nōo le yɛ gā ɛgiyi idɔkitɔ. Idɔkitɔ a géē gbɔɔ ō ya ōmiya boobu lɛyikwu ɛdɔ ɛcí néē géē je lɛ ɔ, nɛ ó gáā jila ɔcɛ a má gbɔbu amāŋ da ɔ ɔka ɛyɛɛyɛyi ŋ? Ehee, ó gáā ya lɛ a ŋ. Awɔ abɔyi uwɔ géē ya ōmiya olɔhi ɔdaŋ ka aflɛyi, a gbɛla lɛyikwu ɛjɛɛji aɛlā nōo tɛɛma kwu āhɔ̄ ku uwɔ a. Ɛgɛnyá nɛ a lɔfu ya ɔɔma a?
4. Ɛgɛ nɛ ɔkpá ku Aíita 18:13 ka a, ɔdi nɛ a lɔfu ya o ya ɛɛ ku a má ku a lɛ ɛjɛɛji ɛlā a jé a? (Má ifoto a.)
4 Igbalɛwa, a géē lɔfu jé ɛjɛɛji aɛlā a ŋma lɛ ō da aɔka. Ocabɔ mafu, leyi yɛ ɔ ka é lɛ uwɔ higwu wa upati. A géē nyɔ? Ɔdaŋ ku á jé ɔcɛ nōo yɔ i higwu ku upati a amāŋ jé ōmiya nɛ ó lɛ lɛyikwu upati a ŋ, a géē cɛgbá ō da ɔ aɔka bɛɛka u: “Imi mla eko nyá néē gáā ya upati a? Ācɛ ɛmula gáā wa a? Ɔnyɛ gáā leyi kwu ɛgɛ nɛ odee géē nyɔ lɛ a? Ɔnyɛ lɔfu wa gla a? Ɔdi nɛ a miya ku ācɛ kóō ya upati ɔɔma a? É géē kɔ ejé olɔfu lɛ ācɛ?” Ohi ku aɔka nōo ba nyā géē ta uwɔ abɔ ō ya ōmiya ku ijeeyi.—Jé Aíita 18:13.
Lɛ ɛjɛɛji ɛlā nōo tɛɛma kwu āhɔ̄ ku uwɔ a jé ŋma lɛ ō da ɔka (Má ogwotu ɔmɛ 4) a
5. Ɔdi nɛ a cɛgbá ō ya igbihi nɛ a lɛ ɛjɛɛji ɛlā nōo tɛɛma kwu āhɔ̄ ku uwɔ a jé a?
5 Igbihi nɛ a lɛ ɛjɛɛji ɛlā a jé, gbɛla lɔɔlɔhi tu āhɔ̄ a. Ocabɔ mafu, a gáā le jé ka ācɛ nōó gē lɛ ojilima ce ɔwɛ nɛ Ujehofa dɔka ku alɔ lā oyeeyi ku alɔ ŋ ma géē wa ōjila a, amāŋ é géē kɔ ejé olɔfu, amáŋ ó lɛ ɔcɛ duuma nōo gáā leyi kwu ɔ o ya ɛɛ ku ācɛ kéē hii gwa fiyɛ ɔfu ŋ. Á má ka upati ɔɔma géē je piya ɛga nɛ ācɛ lɔfu ya ɔdā duuma nōo he uwa ɔtu ŋ? (1 Upít. 4:3) Amāŋ ɔdi nɛ a géē ya ɔdaŋ ka upati a géē ya ku á hii gā ōjila ku ujɔ amāŋ uklɔ ku ɔna ō ta ŋ ma? Ɔdaŋ ku a lɛ ɛlá gbo tu ɛjɛɛji ɛlā nōo tɛɛma kwu āhɔ̄ nyā a, ó géē tɔɔtɛ gā uwɔ ō ya ōmiya ku ijeeyi. Amáŋ ó lɛ ɔdā ɔhá nɛ a géē cɛgbá ō ya kpɔ. A jé ɛgɛ nɛ ɔtu ya uwɔ lɛyikwu āhɔ̄ a; amáŋ da iyi uwɔ ɔka, Ɛgɛnyá nɛ ɔtu ya Ujehofa lɛyikwu ɔ a?—Aíit. 2:6.
LEYI YƐ ƆDĀ NƐ UJEHOFA GBƐLA A
6. Ɛgɛ nɛ ɔkpá ku Ujɛ́mīsi 1:5 ka a, ɔdiya nɛ alɔ cɛgbá ō gbɔɔkɔ ku otabɔ ku Ujehofa a?
6 Gbɔɔkɔ lɛ Ujehofa kóō ta uwɔ abɔ ō jɛyi ku ɔdā nɛ ó gbɛla lɛyikwu āhɔ̄ a. Ujehofa cokonu ō je ijeeyi lɛ alɔ, o ya ɛɛ ku alɔ bi ohilipu ku alɔ le jé ɔdaŋ ka ōmiya nɛ alɔ gáā ya a géē cɛ lɛ ɔ gweeye. Ó gē je ɛdɔ ku ijeeyi nyā “ŋmá ɔtū oyēŋēē, nōo ī kiífulá ŋ́.”—Jé Ujɛ́mīsi 1:5.
7. Ɛgɛnyá nɛ a lɔfu bi le jé ɔdā nɛ Ujehofa gbɛla lɛyikwu āhɔ̄ ōhī a? Je ocabɔ mafu.
7 Eko duuma nɛ a lɛ ɔkɔ gba ku Ujehofa kóō bi uwɔ jé ɔwɛ, leyi taajɛ lɔɔlɔhi ku a má ɛgɛ nɛ ó yɔ i cila ɔkɔ ō gba ku uwɔ a. Ocabɔ mafu: Ɔdaŋ ku á jé ɛga nɛ a yɔ eko nɛ a yɔ i gā iyawu ŋ, a lɔfu da ɔcɛ éyi nōo lā ɔwɛ abɔɔ a ɔka kóō ta uwɔ abɔ. Amáŋ a géē nyɛɛ ŋma ɛgiyi nu gbɔbu ɛɛ kóō ta uwɔ ohi? Ehee, a gáā ya lɛ a ŋ. A géē jahɔ lɔɔlɔhi ta ɔwɛ nɛ ó gāá mafu gā uwɔ a. Ɔwɛ ekponu ɔɔma, igbihi nɛ a lɛ ɛba ku ijeeyi ba Ujehofa, ceyitikwu ku a jé ɛgɛ nɛ ó yɔ i cila ohi ku ɔkɔ ō gba ku uwɔ a, ŋma lɛ ō nwu ɛlā lɛyikwu aíne mla aukɔ́ ku Ubáyíbu nōo tɛɛma kwu āhɔ̄ ku uwɔ a. Ocabɔ mafu, eko duuma nɛ a yɔ i ya ōmiya ō gā upati ɛgɛ nɛ a alɔ ka gbɔbu a, a lɔfu leyi yɛ ɛlā nɛ Ubáyíbu ka lɛyikwu upati nɛ ɔcɛ duuma lɔfu ya ɔdā duuma nōo he ɔ ɔtu, ō piyatɔha mla aɔkpa obɔbi, mla ɛgbá kóō je ɛlā ku Ajɔɔcɛ a ta aflɛyi gbɔbu lɛ aɔdā nōo he alɔ ɔtu ō ya a.—Umát. 6:33; Uróm 13:13; 1 Ukɔ́r. 15:33.
8. Ɔdi nɛ a lɔfu ya ɔdaŋ ku a cɛgbá otabɔ ō má aɔdā nɛ a yɔ i dɔka a? (Má ifoto a.)
8 Naana kpɔ a, ekoohi a lɔfu cɛgbá otabɔ ō má aɔdā nɛ a yɔ i dɔka a. A lɔfu da ɔyinɛ nɔnyilɔ amāŋ ɔyinɛ nɔnya nōo jikoko ipu ɛlā ku Ɔwɔico ɔdā néē gbɛla lɛyikwu ɔ a. Amáŋ, a klla géē lɛ itene ŋma lɛ ō jila ɛlā má abɔyi uwɔ. Ó lɛ aɔdā alɛwa nōo géē ta uwɔ abɔ nōo yɔ ipu aɔkpá ku alɔ nɛ alɔ gē bi le ya oklɔcɛ, bɛɛka u Research Guide for Jehovah’s Witnesses mla u Aɛga Ku Ubáyíbu Nōo Lɔfu Ta Ācɛ O Yɛce Ukraist Abɔ. Bla ka ɔdā nɛ a bi ɔtu a: wɛ ō ya ōmiya nōo géē cɛ lɛ Ujehofa gweeye.
Leyi yɛ ɔdā nɛ Ujehofa gbɛla a (Má ogwotu ɔmɛ 8) b
9. Ɛgɛnyá nɛ alɔ lɔfu bi le jé kpɔcii ka ōmiya nɛ alɔ gáā ya a géē cɛ lɛ Ujehofa gweeye a? (Ācɛ Ɛ́fēsɔsi 5:17)
9 Ɛgɛnyá nɛ alɔ lɔfu bi le jé kpɔcii ka ōmiya nɛ alɔ gáā ya a géē cɛ lɛ Ujehofa gweeye a? Aflɛyi, alɔ cɛgbá ō lɛ ɔ jé lɔɔlɔhi. Ubáyíbu da alɔ kahinii: “Ɔ́dāŋ ka ɔ̄cɛ dúúmā jɛ́yí kú ɔdā lɔɔlɔhi, ó géē jé Óndú ā aflɛ́yí.” (Aíit. 9:10) Ku ɛlā ɔkwɛyi a, ɛyi ku ɔdā ō jé ɔkwɛyi gē wa ŋma ō jé auce ō ya ku Ujehofa, ɔdā nɛ ó bi ɔtu ō ya, ɔdā nɛ ó dɔka mla ɔdā nɛ ó dɔka ŋ ma. Da iyi uwɔ ɔka kahinii: ‘Oŋma lɛ ɔdā nɛ um jé lɛyikwu Ujehofa a, ōmiya nyá nɛ um lɔfu ya nōo géē cɛ lɛ ɔ gweeye a?’—Jé Ācɛ Ɛ́fēsɔsi 5:17.
10. Ɔdiya nɛ aukɔ́ ku Ubáyíbu cɛgbá nɛɛnɛhi fiyɛ ɔwɛ nɛ ācɛ apɔlɛ ku alɔ gē ya odee amāŋ cɛgbá fiyɛ uculo a?
10 O ya ɛɛ ku alɔ cɛ lɛ Ujehofa gweeye, ekoohi, alɔ géē cɛgbá ō je ācɛ nōo yɔ kwu alɔ ajaajɛ a abɔ gaajɛ. Ocabɔ mafu, ɛ́nɛ́ mla adā ōhī nōo bi ɔdā olɔhi ipu ɔtu, lɔfu kwu ɔyinɔnya ku uwa abɔfu kóō lɛ ɔcɛ nōo lɛ ije nɛhi lɛ, amāŋ ɔcɛ nōo lɔfu gba ije ɔnyā nwune lɛ uwa, naana nɛ ɔcɛ ɔɔma i yɔ i ya lɔhi ipu ɛ̄gbā ō gba ku Ujehofa ŋ ma. Ó wɛ ɔkwɛyi ka é dɔka kéē leyi kwu ɛgbá ku ɔyi uwa a lɔɔlɔhi, amáŋ ɔnyɛ gáā ta ɔ abɔ ō gɔbu lɛ ɛma olɔhi mla Ujehofa a? Ɛgɛnyá nɛ Ujehofa leyi má ɛlā a lɛ a? Ohi a yɔ ipu ɔkpá ku Umátiyu 6:33. Abɔɔ, Ujisɔsi ta Ācɛ O Yɛce Ukraist ɔtu kwu ɔtu kéē kwu ɛlā ku ‘Ajɔɔcɛ a i ta aflɛyi ipu oyeeyi ku uwa.’ Naana nɛ alɔ gē lɛ ojilima ce adā mla ɛ́nɛ́ alɔ mla ācɛ nōo lā yɛ jila alɔ ta a, ɔdā nōo cɛgbá lɛ alɔ fiyɛ duu a wɛ ō ya ɔdā nōo géē cɛ lɛ Ujehofa gweeye.
GBƐLA LƆƆLƆHI TU ƆDĀ NƐ A GÉĒ JE Ō YA A
11. Uce ō ya nyá néē kɛla lɛyikwu ɔ ipu ɔkpá ku Aíita 2:11, nōo géē ta alɔ abɔ ō leyi yɛ ɔdā nɛ alɔ géē je ō ya a lɔɔlɔhi a?
11 Ɔdaŋ ku a lɛ ukɔ́ ku Ubáyíbu nōo tɛɛma kwu ōmiya nɛ a gáā ya a má, a cɛgbá ō gbɛla lɔɔlɔhi tu ɔdā nɛ a géē je ō ya a. (Jé Aíita 2:11.) Ohilipu géē ta uwɔ abɔ ō gbɛla tu ɔdā nōo lɔfu bɛɛcɛ ŋma ɔdā nɛ a je ō ya a. Ekoohi ōmiya a lɔfu tɔɔtɛ lɛ alɔ ō ya fiyaa. Amáŋ ó wɛ ɛjɛɛji ōmiya tɔɔtɛ a ŋ. Ohilipu géē ta uwɔ abɔ ō ya ōmiya olɔhi ɔdaŋ nɛ āhɔ̄ a kóō le lɔnɔ naana.
12-13. Ɛgɛnyá nɛ ohilipu lɔfu ta uwɔ abɔ ō ya ōmiya ku ijeeyi lɛyikwu ɛdɔ uklɔ nɛ a géē miyɛ ō ya a?
12 Leyi yɛ ocabɔ nyā. A yɔ i dɔka uklɔ o ya ɛɛ ku a je otabɔ lɛ ācɛ apɔlɛ ku uwɔ. A gáā lɛ uklɔ ɛpa má. A lɛ ɛlā gbo tu ɛjɛɛji ɛlā nōo yɛ jila ɔ ta a, ōmiya ku uklɔ a, eko nōó géē bēē jɛ uwɔ ō gā uklɔ a, mla aɔdā ohile ɔhá. Uklɔ ɛplɛɛpa a wɛ ɛ̄nɛ̄ Ācɛ O Yɛce Ukraist kē lɔfu ya gla. Á jé ŋ, éyi ku uklɔ a he uwɔ ɔtu fiyɛ ohigbu ku a dɔka ɛdɔ uklɔ ɛgɔɔma amāŋ é géē gba ije nwune gā uwɔ. Amáŋ, ó lɛ aɔdā ɔhá nɛ a cɛgbá ō gbɛla tu ɔ gbɔbu ɛɛ ku a ya ōmiya.
13 Ocabɔ mafu, oduuma ku uklɔ a lɔfu ci uwɔ ŋma ō gā ōjila ku ujɔ? Oduuma ku uklɔ a géē je uwɔ eko nɛ a cɛgbá ō bi le je otabɔ lɛ ācɛ apɔlɛ ku uwɔ kéē lɛ ogbotu, kéē lɛ eeye, mla ō tubla Ujehofa ajaajɛ? Ō gbɛla tu aɔka ɛgɛnyā géē ta uwɔ abɔ ō “je ɔdā nōo lɔhi fíyɛ́ dúú ā”—ɔɔma kē wɛ ɛ̄gbā ō gba ku uwɔ mla ɛgbá ku ācɛ apɔlɛ ku uwɔ—ikɔkɔ ō lɛ ɔtu ku uwɔ kwu ō ya ije nwune fiyɛ a. (Ufíl. 1:10a) Oŋma lɛ ō ya ɛgɛnyā, a géē ya ōmiya nɛ Ujehofa géē hɔha ce ɔ.
14. Ɛgɛnyá nōo bi ohilipu mla ō mafu ihɔtu lɔfu ta alɔ abɔ ō ya ōmiya néē gáā bi le ŋmo alɔ okonu amāŋ nōo géē ce ācɛ ɔhá gwonu ŋ ma?
14 Ohilipu klla géē ta alɔ abɔ ō gbɛla tu ɛgɛ nɛ ōmiya ku alɔ lɔfu lɛ abɔ kwu ācɛ ɔhá a, cɛɛ alɔ géē ya ōmiya néē gáā bi le ‘ŋmó alɔ okonu amāŋ nōo géē ce ācɛ ɔhá gwonu ŋ.’ (Ufíl. 1:10b) Ɛnyā kē cɛgbá nɛɛnɛhi ofiyɛ duu eko nɛ alɔ gáā ya ōmiya ku abɔyi alɔ lɛyikwu ɛdɔ ili nɛ alɔ géē le wiiye mla ō má eyī ku alɔ. Ocabɔ mafu, ɛdɔ ku ili éyi amāŋ ɔwɛ éyi nɛ alɔ dɔka kóō má eyī ku alɔ kóō lɛ a lɔfu he alɔ ɔtu. Amáŋ ɔdaŋ nōó he ācɛ nōo yɔ ipu ujɔ a amāŋ ācɛ nōó wɛ Ācɛ Ocijali Ku Ujehofa ŋ ɔtu ŋ kē bɛɛ? Ohilipu géē ta alɔ abɔ ō lɛ ojilima ce ɛgɛ nɛ ɔtu gē ya uwa lɛ a. Ihɔtu géē lɛ abɔ kwu alɔ ɔtu ō “gbɛlá ɔdā nōo í tīile lɛ ācɛ ɔhá” mla ō tu iyi alɔ waajɛ. (1 Ukɔ́r. 10:23, 24, 32; 1 Utím. 2:9, 10) Ɛnyā géē ta alɔ abɔ ō ya ōmiya nōo mafu ka alɔ yihɔtu ācɛ klla lɛ ojilima ce uwa.
15. Ɔdi nɛ a cɛgbá ō gbɛla tu ɔ lɔɔlɔhi gbɔbu ɛɛ ku a ya ōmiya ocɛgbá nɛhi a?
15 Ɔdaŋ ku a gáā ya ōmiya nōo cɛgbá nɛɛnɛhi, gbɛla lɛyikwu ɔdā nɛ a géē cɛgbá ō ya o ya ɛɛ ku a lɛ ōmiya ɔɔma ya jila a. Ujisɔsi nwu alɔ ka eko duuma nɛ alɔ gáā ya ɔdā duuma, alɔ lɛ ɔdā nɛ alɔ gáā “ŋmó tū ɔ̄ ā jé gbɔbū.” (Ulúk. 14:28) Ohigbu ɛnyā, gbɛla tu eko mla oceyitikwu nōó géē je uwɔ o ya ɛɛ ku a lɛ ōmiya ɔɔma ya jila a. Ipu āhɔ̄ ōhī, a lɔfu kɛla lɛ ɛjɛɛji ācɛ nōo yɔ ipu apɔlɛ ku uwɔ a lɛyikwu ɔdā nɛ eyeeye ku uwa cɛgbá ō ya, o ya ɛɛ ku ōmiya a kóō nyɔ mɛɛlɛ a. Ɔdiya nɛ ɛdɔ ōmiya ɛgɛnyā cɛgbá a? Ó lɔfu ta uwɔ abɔ ō gáā má ku a cɛgbá ō ya opiyabɔ ōhī ipu ōmiya nɛ a ya a, amāŋ ta uwɔ abɔ ō má ɔdā ɔhá nōo lɔhi fiyɛ ɔɔma a. Eko duuma nɛ a kē lɛ ɛlā a ka mla ācɛ apɔlɛ ku uwɔ klla jahɔ tu ɛlā néē lɛ ō ka gā uwɔ a, ó géē ya kéē lɛ ɔtu caca ō yuklɔ tɔha mla uwɔ, o ya ɛɛ ku ōmiya nɛ a ya a kóō nyɔ mɛɛlɛ.—Aíit. 15:22.
YA ŌMIYA NŌO GÉĒ NYƆ MƐƐLƐ
16. Ɔdi nɛ a lɔfu ya nōo géē ta uwɔ abɔ ō ya ōmiya nōo géē nyɔ mɛɛlɛ a? (Má ikpati nyā nōo kahinii: “ Ɛgɛ Nɛ A Lɔfu Ya Ōmiya Ku Ijeeyi A.”)
16 Ɔdaŋ ku a lɛ ɛjɛɛji aɔdā nɛ alɔ kɛla lɛyikwu ɔ a ya, ɔɔma wɛ ku a le tutu ō ya ōmiya olɔhi ɛ. A lɛ ɛjɛɛji aɛlā nōo tɛɛma kwu āhɔ̄ a jé ɛ, a klla leyi yɛ aukɔ́ ku Ubáyíbu ɛyɛɛyɛyi nōo géē ta uwɔ abɔ ō ya ōmiya nōo géē cɛ lɛ Ujehofa gweeye a duu ɛ. Babanya, a lɔfu ba Ujehofa ɛba kóō ta uwɔ abɔ ō ya ku ōmiya ku uwɔ a kóō nyɔ mɛɛlɛ.
17. Ɔdi wɛ ɔdā okpɔcii nōo géē ta uwɔ abɔ ō ya ōmiya olɔhi a?
17 Ɔdaŋ nɛ a kóō ya ōmiya alɛwa ŋma igbihi nōo nyɔ mɛɛlɛ ɛ, bla ka ɔdā okpɔcii nōo géē ta uwɔ abɔ ō ya ōmiya olɔhi a, wɛ ō gbolo ce ijeeyi nōo ŋma ɛgiyi Ujehofa, ó wɛ ɔdā ō jé amāŋ ɔdā nɛ a má ipu oyeeyi ku uwɔ ɛ ma ŋ. Ujehofa foofunu lɔfu je ɔdā ō jé mla ohilipu gā uwɔ nōo wɛ aya ocɛgbá nɛɛnɛhi ku ijeeyi a. (Aíit. 2:1-5) Ujehofa lɔfu ta uwɔ abɔ ō ya ōmiya nōo géē cɛ lɛ ɔ gweeye.—Aíjē 23:2, 3.
IJÉ ƆMƐ 28 Ō Wɛ Ɔya Ku Ujehofa
