IKPƐYI ƐLĀ Ō KLƆCƐ ƆMƐ 4
Ɔdā Nōo Ya Nɛ Alɔ Gē Gā Oblatu Ku Ikwū Ku Ujisɔsi A
“Aá yá ɛ̄nyā ká aá bī le blakwu um.”—ULÚK. 22:19.
IJÉ ƆMƐ 20 A Jé Ɔyi Uwɔ Lɛ Alɔ
ƆDĀ NƐ ALƆ GÁĀ NWU A *
1-2. (a) Eko nyá nɛ alɔ gē blatu ācɛ, nɛ alɔ yihɔtu uwa nōo kwū a fiyɛ duu a? (b) Ɔ́da nyá nɛ Ujisɔsi je lɛ ayikpo ku nu otu amoomɛ gbɔbu ɛɛ kóō kwū a?
ƐGƐ duuma nɛ ācɛ nɛ alɔ yihɔtu uwa a kóō kwū gboji lɛ naana, alɔ i gē je mlanyi uwa gla ŋ. Ɔdaŋ nɛ eko amāŋ ɛ̄cī néē kwū a kē gā, alɔ klla gē blatu uwa fiyɛ.
2 Ihayi doodu alɔ gē wɛ ipu umiliyɔn ku ācɛ nōo gē jila tɔha, kéē ya oblatu ku ikwū ku ɔcɛ éyi nɛ alɔ yihɔtu nu nɛhi, nōo wɛ Ujisɔsi Ukraist a. (1 Upít. 1:8) Alɔ gē jila tɔha ku alɔ blatu ɔcɛ éyi nōo je oyeeyi ku nu fula alɔ ŋma ipu íne ō biya mla ikwū a. (Umát. 20:28) Ku ɛlā ɔkwɛyi a, Ujisɔsi dɔka ku ācɛ doodu nōo gē yɛce ɔ a, kéē blatu ikwū nɛ ó kwū a. Otu amoomɛ gbɔbu ɛɛ kóō kwū a, ó lɛ ɔdole ku ɔnɔɔnɔ éyi nōo wɛ ɛdɔ ɛyɛɛyi lé tɔha mla ayikpo ku nu. Anu ó le ɔ́da je lɛ uwa kahinii: “Aá yá ɛ̄nyā ká aá bī le blakwu um.”—Ulúk. 22:19.
3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
3 Ŋma ipu ɛwa nɛhi ku ācɛ nōo gē wa Oblatu a, o ligii ku ācɛ foofunu lɛ eyiyoce ō gā ɔkpanco a. Amáŋ umiliyɔn alɛwa ku ācɛ ɔhá nōo gē wa Oblatu a, wɛ ācɛ nōo lɛ eyiyoce ō lā ipu ɛcɛ. Ipu ikpɛyi ɛlā nyā, alɔ géē kɛla lɛyikwu ɔdā nōo ya nɛ ígwu ɛplɛɛpa nyā, gē ceyitkwu wa Oblatu ihayi doodu a. Alɔ klla géē kɛla lɛyikwu itene nɛ alɔ gē lɛ ŋma ō nyɔ Oblatu a. Ku alɔ gbɔɔ ŋma ō kɛla lɛyikwu ɔdā nōo ya, nɛ ācɛ néē lɛ anɔ tu uwa ɛyi a gē wa Oblatu a.
ƆDĀ NŌO YA NƐ ĀCƐ NÉĒ LƐ ANƆ TU UWA ƐYI GĒ WA OBLATU A
4. Ɔdiya nɛ ācɛ néē lɛ anɔ tu uwa ɛyi a gē lé igbo klla gē gwa ejé eko ku Oblatu a?
4 Ihayi doodu, oduudu ācɛ néē lɛ anɔ tu uwa ɛyi nōo gē wa Oblatu Ku Ikwū Ku Ujisɔsi a, gē lé igbo klla gē gwa ejé a. Ɔdiya néē gē lé igbo klla gwa ejé a? O ya ɛɛ ku alɔ jé ohi ku ɔka nyā, alɔ leyi yɛ ɔdā nōo ya otu amoomɛ gbɔbu ɛɛ ku Ujisɔsi kóō kwū a. Igbihi néē lɛ ucɛ ku onyata a lé kwɛyi a, Ujisɔsi gáā lɛ ɔdā ɔhá kwaajɛ. Anu néē gā gbɔɔ ō hi ka Ɔdole Ɔnɔɔnɛ Ku Ondu alɔ a. Ó lɛ igbo a je lɛ ayikpo ku nu igwoleyi (11) nōo hayi kpaakpa lɛ ɔ a, anu ó da uwa kéē lé klla gwa a. Igbihi ɔɔma ó klla kɛla lɛyikwu okonu ō ce ɛpa. Ɛnyā kē wɛ okonu ō ce ɛyipɛ mla okonu ō ce ku Ajɔɔcɛ a. * (Ulúk. 22:19, 20, 28-30) Okonu ō ce nyā lɛ ɔ ya tɔɔtɛ lɛ ayikpo a mɛmla ācɛ ɔhá, kéē lɛ ɛga lɛ ō kwu piya ɔcɛ́ mla acogwɛɛya ɔkpanco. (Mafú 5:10; 14:1) Ācɛ néē lɛ anɔ tu uwa ɛyi ofoofunu nōo yɔ ipu okonu ō ce ɛplɛɛpa nyā klla hile ipu ɛcɛ kpɔ ɛɛ ma, lɔfu lé igbo klla gwa ejé eko ku Oblatu a.
5. Ɔdi nɛ ācɛ néē lɛ anɔ ta uwa ɛyi a jé lɛyikwu eyiyoce ku uwa a?
5 Má ɔdā ɔhá nōo ya nɛ ācɛ néē lɛ anɔ tu uwa ɛyi a gē wa Oblatu a. Ó gē je ɛnɛɛnɛ ɛga lɛ uwa ō gbɛla tu eyiyoce ku uwa. Ujehofa je ɛnɛɛnɛ eyiyoce lɛ uwa, ō lā oyeeyi opiyoo néē gáā kwū gɛ ŋ ɔkpanco. É klla lɛ ɛnɛɛnɛ ɛga ō lé ɔcɛ́ tɔha mla Ujisɔsi néē je heyi ŋma ɔlekwu, mla ācɛ ohile ku ula ofigwaahaata a. Ɛnyā nōo fiyɛ duu a, wɛ ka é géē lɛ ɛnɛɛnɛ ɛga ō yɔ iyɔbu ku Ujehofa nōo wɛ Ɔwɔico a! (1 Ukɔ́r. 15:51-53; 1 Ujɔ́n 3:2) Ācɛ néē lɛ anɔ tu uwa ɛyi a jé kpɔcii, ka é lɛ aa higwu ō jɔɔnyɛ ɛnɛɛnɛ ɛga nyā ɔkpanco. Amáŋ o ya ɛɛ kóō tɔɔtɛ lɛ uwa ō jɔɔnyɛ ɛnɛɛnɛ ɛga nyā, é cɛgbá ō hayi kpaakpa lɛ Ujehofa gbeeko néē gekwū. (2 Utím. 4:7, 8) Ācɛ néē lɛ anɔ tu uwa ɛyi a gē lɛ eeye nɛhi, eko duuma néē gē gbɛla lɛyikwu eyiyoce ku uwa o gā ɔkpanco. (Utáy. 2:13) “Aálá ɔhá” kē bɛ? (Ujɔ́n. 10:16) Ɔdi wɛ aɔdā ōhī nōo ya néē gē wa Oblatu Ku Ikwū Ku Ujisɔsi a?
ƆDĀ NŌO YA NƐ AALA ƆHÁ A GĒ WA OBLATU A
6. Ɔdiya nɛ aala ɔhá a gē wa Oblatu Ku Ikwū Ku Ujisɔsi ihayi doodu a?
6 Aala ɔhá a i gē lé igbo amāŋ gwa ejé eko ku Oblatu a ŋ, amáŋ é gē nyɔ ō gā má ɔdā nōo gáā ya a. Ihayi ku 1938 wɛ eko aflɛyi néē hi aala ɔhá a igwú kéē wa Oblatu Ku Ikwū Ku Ujisɔsi a. Ɔda Ō Gbaajɛ ku Ɔya Ɔmɛta 1, ku ihayi ku 1938 kahinii: “Ó géē lɔhi nɛhi ku [aala ɔhá] a kéē yɔ ipu ōjila a, kéē yɔ i má ɔdā nōo yɔ i ya piii a. . . . Ó géē wɛ eko ku eeye ō gwo lɛ uwa abɔyi uwa duu.” Ɛgɛ néē gē gweeye ō hi ɔcɛ igwú wa u mɛɛlɛ mɛɛlɛ a, aala ɔhá a gē gweeye ō yɔ kéē má ɔdā nōo yɔ i ya eko ku Oblatu a duu.
7. Ɔdiya nɛ aala ɔhá a gē lɛ ɔtu caca ō po ɛlā ō ka tɛɛcɛ ku Oblatu a?
7 Bɛɛka ācɛ néē lɛ anɔ tu uwa ɛyi a, aala ɔhá a gē gbɛla tu eyiyoce ku uwa duu. É gē ya ɔtu caca ō po ɛlā ō ka tɛɛcɛ a. Ohigbu ka ɛla ō ka tɛɛcɛ a gē kɛla lɛyikwu ɔdā nɛ Ukraist mla ācɛ ula ofigwaahaata (144,000) a, gáā ya lɛ ācɛ nōo hayi kpaakpa ɛpleeko ku Ɔcɛ́ Ō Ce ku Ihayi Ula Ɛpa Cofigwo a. Ɛpleeko nɛ Ujisɔsi gáā lé ɔcɛ́ ɔɔma a, ācɛ nōo gáā lé ɔcɛ́ ɔkpanco mla ɔ a géē ta abɔ, lɛ ɛcɛ nyā piya uparadais klla ya ku alɛɛcɛ kéē kwu jila iyē. Leyi yɛ ɛgɛ nɛ umiliyɔn alɛwa ku aala ɔhá a nōo wa Oblatu Ku Ikwū Ku Ujisɔsi a, géē yɔ i gbɛla tu ɛgɛ nɛ aakacɛ ɛyɛɛyɛyi géē yɔ i ya jila a. Ocabɔ mafu bɛɛka ɛnyā nōo yɔ ipu ɔkpá ku Ayisáya 35:5, 6; 65:21-23; mla Ɔdā Nēé Mafú Lɛ Ujɔ́ni 21:3, 4 a. Ō leyi má iyi uwa mla ācɛ néē yihɔtu uwa a yɔ tɔha ipu ɛcɛ ɛyipɛ a, géē lɔfu ta ɔtu okpoce ku uwa lɛyikwu ɛcɔbu a. Ɛnyā klla géē ya kéē ma ō gba Ujehofa ɛ̄gbā gboogboo ŋ.—Umát. 24:13; Ugal. 6:9.
8. Ɔdi wa ɔdā ɔhá nōo ya nɛ aala ɔhá a gē wa Oblatu a?
8 Leyi yɛ ɔdā ɔhá nōo ya nɛ aala ɔhá a gē wa Oblatu a. É dɔka ō mafu ihɔtu klla je otabɔ lɛ ācɛ néē lɛ anɔ tu uwa ɛyi a. Ubáyíbu ka taajɛ ka ācɛ néē lɛ anɔ ta uwa ɛyi a, mla ācɛ nōo lɛ eyiyoce ō lā ipu ɛcɛ nyā a géē yuklɔ tɔha. Ɛgɛnyá a? Alɔ kɛla lɛyikwu acabɔ mafu ōhī.
9. Ɛgɛnyá nɛ akacɛ nōo yɔ ipu ɔkpá ku Usakaríya 8:23 a, mafu ɛgɛ nɛ ɔtu gē ya aala ɔhá a lɛyikwu ācɛ néē lɛ anɔ tu uwa ɛyi a?
9 Jé Usakaríya 8:23. Akacɛ ku Ubáyíbu nyā kɛla lɛyikwu ɛgɛ nɛ ɔtu gē ya aala ɔhá a, lɛyikwu ayinɛ nɔnya mla ayinɛ nɔnyilɔ néē lɛ anɔ ta uwa ɛyi a. Ɛlā nōo ka ka “ɔ̄cɛ Ujíyu” mla “awɔ” a yɔ i kɛla lɛyikwu ígwu ekponu—ācɛ néē lɛ anɔ ta uwa ɛyi nōo hile ipu ɛcɛ a. (Uróm. 2:28, 29) Ācɛ “kú aéwo ɔhá igwó” a kwɛyi aala ɔhá a. É “lɛ abɔ̄ bī okónōgwu kú awulú,” nōo kē kwɛyi kóō yɔ kwu ācɛ néē lɛ anɔ ta uwa ɛyi a gā ajaajɛ, mla ō yɔ tɔha mla uwa ipu ɛ̄gbā ō gba ku ɔkwɛyi a. Ohigbu ɛnyā otu ku ɛ̄cī ku Oblatu a, aala ɔhá a gē mafu ɛgɛ néē yɔ kwu ācɛ néē lɛ anɔ ta uwa ɛyi a, ŋma ō lɛ eko taajɛ yɔ ipu Oblatu a.
10. Ɔdi nɛ Ujehofa ya o ya ɛɛ kóō lɛ akacɛ nōo yɔ ipu ɔkpá ku Isíkɛ̄lu 37:15-19, 24, 25 a ya jila a?
10 Jé Isíkɛ̄lu 37:15-19, 24, 25. Ujehofa lɛ akacɛ nyā ya jila, ŋma ō lɛ ācɛ néē lɛ anɔ ta uwa ɛyi a mla aala ɔhá a piyatɔha, o ya ɛɛ kéē yɔ i yuklɔ tɔha. Akacɛ a kɛla lɛyikwu ɔcí ɛpa. Ācɛ nōo lɛ eyiyoce ō lā ɔkpanco a lɛbɛɛka “ɔcí nōo kwɛyí Ujúda” (ipɔɔma néē gē fu ɔcɛ́ ku ācɛ Isrɛlu ŋma a). Ācɛ nōo kē lɛ eyiyoce ō lā ipu ɛcɛ a lɛbɛɛka “ɔcí nōo kwɛyí [Ɛfrem amāŋ] Ísrɛ̄lu” a. * Ujehofa géē kpo ígwu ɛplɛɛpa nyā tɔha cɛɛ kéē kwu “pīya ɔcí ékpónú.” Ɛnyā wɛ ka é géē yɔ i yuklɔ tɔha ɛhaajɛ ɔcɛ́ ekponu ku uwa, nōo wɛ Ujisɔsi Ukraist a. Ihayi doodu ācɛ néē lɛ anɔ tu uwa ɛyi a mla aala ɔhá a, i gē gā Oblatu a bɛɛka ígwu ɛyɛɛyɛyi ŋ, amáŋ bɛɛka “ɔ́wá kú aálá éékpónú” ipu abɔ ku “ogbāálá éékpónú.”—Ujɔ́n. 10:16.
11. Ɛgɛnyá nɛ “aálá” nɛ Ujisɔsi kɛla lɛyikwu uwa ipu ɔkpá ku Umátiyu 25:31-36, 40 a, yɔ i je otabɔ lɛ ayinɛ ku Ukraist icɛ a?
11 Jé Umátiyu 25:31-36, 40. “Aálá” nɛ Ujisɔsi kɛla lɛyikwu uwa amanya a, kwɛyi ācɛ nōo hayi kpaakpa ɛpleeko amoomɛ nyā, nōo lɛ eyiyoce ō lā ipu ɛcɛ a. É yɔ kwu ayinɛ ku Ukraist yɔ i je otabɔ lɛ uwa yuklɔ ku ɔna ō ta mla ō lɛ ācɛ piya ayikpo, nōo yɔ i ya ipu oduudu ɛcɛ icɛ a.—Umát. 24:14; 28:19, 20.
12-13. Ɔdi wɛ aɔwɛ ōhī kpɔ nɛ aala ɔhá a, gē je otabɔ lɛ ayinɛ ku Ukraist a?
12 Ihayi doodu alaadi ōhī nōo yɔ gbɔbu lɛ Oblatu a, aala ɔhá a gē je otabɔ lɛ ayinɛ ku Ukraist ŋma lɛ ō yuklɔ ku ɔna ō ta a nɛɛnɛhi. O ya ɛɛ kéē hi ācɛ nɛ ɔkoolɔhi a he uwa ɔtu a igwú wa Oblatu. (Má ikpati nōo kahinii: “ A Yɔ I Tutu Taajɛ Lɛyikwu Eko Ku Oblatu Nōo Yɔ I Wa A?”) E klla gē ceyitikwu ya ōmiya o cɛgbá ɛyɛɛyɛyi, o ya ɛɛ ku Oblatu a kóō lɛ ya ɛjɛɛji ujɔ ipu oduudu ɛcɛ a. Naana nɛ ujɔ alɛwa i gē lɛ ācɛ o lé igbo klla gē gwa ejé a ŋ ma. Aala ɔhá a gē gweeye nɛhi ō je otabɔ lɛ ayinɛ ku Ukraist aɔwɛ ɛgɛnyā. Aala a jé ka Ujisɔsi gē leyi má uklɔ néē ya lɛ ayinɛ nu a, bɛɛka anɔ piii nōo wɛ Ujisɔsi a néē ya lɛ ɔ a.—Umát. 25:37-40.
13 Ɔdi wɛ ɔdā ɔhá nōo ya nɛ oduudu alɔ, ɛgɛ duuma nɛ eyiyoce ku alɔ kóō wɛ naana nɛ alɔ gē wa Oblatu a?
ƆDĀ NŌO YA NƐ ODUUDU ALƆ GĒ WA OBLATU A
14. Ɛgɛnyá nɛ Ujehofa mla Ujisɔsi mafu ihɔtu nɛhi lɛ alɔ a?
14Ihɔtu nɛ Ujehofa mla Ujisɔsi mafu lɛ alɔ a jɛ alɔ eyī. Ujehofa mafu ihɔtu ku nu lɛ alɔ ɔwɛ alɛwa. Amáŋ ɔwɛ éyi nɛ ó mafu ihɔtu ku nu lɛ alɔ fiyɛ duu a, wɛ o ŋma lɛ ō ta Ɔyi nu ɛhɔ wa ipu ɛcɛ kóō gáā gekwū ohigbu alɔ. (Ujɔ́n. 3:16) Alɔ klla má ka Ujisɔsi abɔyi nu mafu ihɔtu nɛhi lɛ alɔ, ŋma ō cɛ kóō gekwū kwɛyi alɔ. (Ujɔ́n. 15:13) Alɔ i gba ule ku ihɔtu nɛ Ujehofa mla Ujisɔsi mafu lɛ alɔ a gboogboo gla ŋ. Amáŋ alɔ lɔfu mafu lɛ uwa ɛgɛ nɛ ó jɛ alɔ eyī nɛhi lɛ a, ŋma lɛ ɛgɛ nɛ alɔ gē lā oyeeyi ku alɔ ɛ̄cī doodu a. (Ukól. 3:15) Alɔ gē gā Oblatu ohigbu ku alɔ gbɛla tu ɛgɛ néē mafu ihɔtu nɛhi lɛ alɔ, mla ɛgɛ nɛ alɔ lɔfu mafu ihɔtu lɛ uwa duu a.
15. Ɔdiya nɛ ɛhi kóō fula a jɛ ācɛ néē lɛ anɔ ta uwa ɛyi a mla aala ɔhá a eyī nɛhi a?
15Ɛhi ku ō fula a cɛgbá ipu eyī ku alɔ nɛhi. (Umát. 20:28) Ɛhi ku ō fula a cɛgbá ipu eyī ku ācɛ néē lɛ anɔ ta uwa ɛyi a nɛhi, ohigbu ka anu cɛ lɛ uwa lɛ eyiyoce nɛhi néē lɛ a. Ohigbu ɔtu néē kpoce ɛya nɛ Ujisɔsi gwo a, Ujehofa hi uwa ka ācɛ okpaakpa klla lɛ uwa fu kéē kwu piya ayi nu. (Uróm. 5:1; 8:15-17, 23) Ɛhi ku ō fula a cɛgbá ipu eyī ku aala ɔhá a nɛhi duu. Ohigbu ka é kpɔtuce ɛya nɛ Ujisɔsi gwo duu a, é lɛ ɔtu oyeŋee lɛ ipu eyī ku Ɔwɔico. É klla lɛ ɛga lɛ ō gba ɔ ɛ̄gbā ɛ̄cī doodu, klla lɛ eyiyoce lɛ ō “wi ŋmá eko kú ákanya nɛ̄hi ā á.” (Mafú 7:13-15) Ɔwɛ éyi nɛ ācɛ néē lɛ anɔ ta uwa ɛyi mla aala ɔhá a, gē mafu ka ɛhi ku ō fula a jɛ uwa eyī nɛhi a, wɛ ō bēē wa Oblatu ihayi doodu.
16. Ɔdi wɛ ɔdā nōo ya nɛ alɔ gē gā Oblatu?
16 Ɔdā ɔhá nōo ya nɛ alɔ gē wa Oblatu a, wɛ ka alɔ dɔka ō lɛyitaajɛ lɛ Ujisɔsi. Ɛgɛ duuma nɛ eyiyoce ku alɔ wɛ, eyeeye ku alɔ dɔka ō lɛyitaajɛ lɛ ɔ́da nɛ Ujisɔsi je lɛyikwu Oblakwu, otu amoomɛ gbɔbu ɛɛ kóō kwū a. Ó kahinii: “Aá yá ɛ̄nyā kú aá bī le blakwu um.”—1 Ukɔ́r. 11:23, 24.
ƐGƐ NƐ ODUUDU ALƆ GĒ LƐ ITENE ŊMA Ō WA OBLATU A
17. Ɛgɛnyá nɛ Oblatu gē tu alɔ abɔ tubla Ujehofa ajaajɛ fiyɛ a?
17Alɔ gē tubla Ujehofa ajaajɛ fiyɛ. (Ujɛ́m. 4:8) Ɛgɛ nɛ alɔ nwu gbɔbu a, eko ku Oblatu gē je ɛga lɛ alɔ ō gbɛla tu ɛnɛɛnɛ eyiyoce nɛ Ujehofa je lɛ alɔ a. Eko ɔɔma klla wɛ eko nɛ alɔ gē bi le gbɛla lipu lipu, tu ihɔtu nɛhi nɛ Ujehofa mafu lɛ alɔ a. (Ujɛr. 29:11; 1 Ujɔ́n. 4:8-10) Eko duuma nɛ alɔ gbɛla tu eyiyoce ku ɔkwɛyi nɛ alɔ lɛ ɛcɔbu, mla ihɔtu nɛhi nɛ Ujehofa mafu lɛ alɔ a, ó gē ya ku ihɔtu mla ɛma nɛ alɔ lɛ lɛ Ujehofa a kóō yɔ i lɔfu tōōtɔ̄ɔ̄.—Uróm 8:38, 39.
18. Ɔdi nɛ ō gbɛla tu ocabɔ ku Ujisɔsi gē lɛ alɔ kwu alɔ ɔtu o ya a?
18Ó gē lɛ abɔ kwu alɔ ɔtu ku alɔ yɛce ocabɔ ku Ujisɔsi. (1 Upít. 2:21) Aɛ̄cī ōhī gbɔbu lɛ ɛ̄cī ku Oblatu a, alɔ gē jé aɛga ku Ubáyíbu nōo kɛla lɛyikwu ɔdā amoomɛ nɛ Ujisɔsi ya ipu alaadi, gbɔbu ɛɛ kóō kwū mla eko nɛ ó le heyi ŋma ɔlekwu a. Cɛɛ otu ku ɛ̄cī ku Oblatu a, ɛlā ō ka tɛɛcɛ a kē i ta alɔ ɛlá kwu ihɔtu nɛ Ujisɔsi mafu lɛ alɔ a. (Āfi. 5:2; 1 Ujɔ́n. 3:16) Eko duuma nɛ alɔ gē jé Ubáyíbu lɛyikwu ɛgɛ nɛ Ujisɔsi je iyi nu gwɛɛya a klla gē gbɛla tu ɔ lipu lipu, ó gē lɛ alɔ kwu alɔ ɔtu ku alɔ gɔbu yɔ i “lā oyēeyī kú [alɔ] ɛ́gɛ́nɛ̄ Ujísɔ̄si lā ā.”—1 Ujɔ́n. 2:6.
19. Ɛgɛnyá nɛ alɔ gáā gɔbu yɔ i yihɔtu ta Ɔwɔico a?
19Alɔ gē lɛ ɔtu caca fiyɛ ō gɔbu yɔ i yihɔtu ta Ɔwɔico. (Ujúd 20, 21) Alɔ géē gɔbu yɔ i yihɔtu ta Ɔwɔico piyoo, ɔdaŋ ku alɔ gē ceyitikwu ya ɔdā duuma nɛ alɔ ya gla o ya ɛɛ ku alɔ lɛyitaajɛ lɛ ɔ́da ku nu. Ocabɔ mafu, ɔdaŋ ka alɔ gē ceyitkwu ya ku iyē ku nu kóō le ya yeŋee, mla ō ya ku ɔtu ku nu kóō yɔ i lɛ eeye. (Aíit. 27:11; Umát. 6:9; 1 Ujɔ́n. 5:3) Ō wa Oblatu klla wɛ ɔwɛ ɔhá nōo gē lɛ abɔ kwu alɔ ɔtu ku alɔ lɛ ɔtu caca ō lā oyeeyi ku alɔ ɛ̄cī doodu, ɔwɛ nɛ alɔ géē da Ujehofa kahinii, ‘N dɔka ō yihɔtu ta uwɔ piyoo!’
20. Ɔdi wɛ ɔdā o kpɔcii nōo ya nɛ oduudu alɔ cika ō wa Oblatu a?
20 Ɔdaŋ ka eyiyoce ku alɔ wɛ ō lā ɔkpanco amāŋ ka ipu ɛcɛ, alɔ cɛgbá ō gā Oblatu a piii. Ihayi doodu nɛ alɔ le jila tɔha ɛ̄cī ɔɔma, ó gē ta alɔ ɛlá kwu ɔcɛ éyi nɛ alɔ yihɔtu nu nɛhi nōo kwū a, Ujisɔsi Ukraist. Ɛnyā nōo fiyɛ a wɛ ka alɔ gē blatu ihɔtu nōo fiyɛ duu, nɛ Ujehofa mafu lɛ alɔ ŋma lɛ ō je Ɔyi nu fula alɔ a. Ihayi nyā, é géė ya Oblatu a ɔnɔɔnɛ ku ɛ̄cī Ajuma, Ɔya Ɔmɛnɛ 15, 2022. Alɔ yihɔtu Ujehofa mla Ɔyi nu nɛhi. Ohigbu ɛnyā ɛ̄cī ku Oblatu Ku Ikwū Ku Ujisɔsi a, ɔdā duuma kóō hii cɛgbá lɛ alɔ fiyɛ ō wa Oblatu a ŋ.
IJÉ ƆMƐ 16 Praise Jah for His Son, the Anointed
^ par. 5 Ɔdaŋ ka eyiyoce ku alɔ wɛ ō lā ɔkpanco amāŋ ka ō lā ipu uparadisi ɛcɛ nyā, ihayi doodu alɔ gē leyice ō nyɔ gā Oblatu Ku Ikwū Ku Ujisɔsi. Ipu ikpɛyi ɛlā nyā, alɔ géē kɛla lɛyikwu aɛga ku Ubáyíbu nōo ya nɛ alɔ gē gā ōjila nyā mla ɛgɛ nɛ alɔ gē lɛ itene ŋma ō ya lɛ a.
^ par. 4 O ya ɛɛ ku a jé odee tōōtɔ̄ɔ̄ lɛyikwu okonu ō ce ɛyipɛ mla okonu ō ce ku Ajɔɔcɛ a, má ikpɛyi ɛlā ku Ɔda Ō Gbaajɛ nōo kahinii: “You Will Become ‘a Kingdom of Priests’” aku Ɔya Ɔmigwo 15, 2014, upeji 15-17 a.
^ par. 10 O ya ɛɛ ka jé odee tōōtɔ̄ɔ̄ lɛyikwu akacɛ nōo kɛla lɛyikwu ɔcí ɛpa nōo yɔ ipu ɔkpá ku Isíkɛ̄lu ɛyi 37 a, má ɔkpá ku Pure Worship of Jehovah—Restored At Last!, upeji 130-135, ogwotu 3-17
