IKPƐYI ƐLĀ Ō KLƆCƐ ƆMƐ 34
Gɔbu Yɔ I “Lɛyítáajɛ Lɛ Ɔ̄kwɛ̄yi Ā”
“O ka ka ayí um bá gē lɛyítáajɛ lɛ ɔ̄kwɛ̄yi ā cɛ̄ gā um gwéeyē fíyɛ́ ɔdā ɔhá dóódu á.”—3 UJƆ́N 4.
IJÉ ƆMƐ 111 Aɔdā Nōo Gē Cɛ Lɛ Alɔ Gweeye
ƆDĀ NƐ ALƆ GÁĀ NWU A *
1. Ɛgɛnyá nɛ alɔ gē lɛ itene oŋma lɛ ō ka ɔka lɛyikwu ɛgɛ nɛ alɔ bi gáā le jé “ɔ̄kwɛ̄yi ā”?
“ƐGƐNYÁ nɛ a bi le jé ɔkwɛyi a?” Ó lɛ aafu ŋ, a lɔfu cila ohi ku ɔka ɔɔma igbalɛwa ɛ. Ɛnyā wɛ ɔka nɛ alɔ gē da ayinɛ alɔ eko duuma nɛ alɔ dɔka ō jé uwa lɔɔlɔhi. Ó gē he alɔ ɔtu nɛhi ō po ɛgɛ nɛ ayinɛ alɔ wa gáā jé ɔkwɛyi a klla gbɔɔ ō yihɔtu ku Ujehofa a, alɔ kē i jɔɔnyɛ ō da uwa ɔdā nōo ya nōó he alɔ ɔtu nɛhi ō wɛ éyi ku Ācɛ Ocijali Ku Ujehofa a. (Uróm 1:11) Ɔka ō ka tɔha ɛgɛnyā gē ta alɔ abɔ gbɛla tu ɛgɛ nɛ ō wɛ éyi ku Ācɛ Ocijali Ku Ujehofa he alɔ ɔtu nɛhi a. Alɔ klla gē lɛ ɔtu caca fiyɛ ō gɔbu yɔ i “lɛyítáajɛ lɛ ɔ̄kwɛ̄yi ā.” Ɛnyā wɛ ka alɔ géē yɔ i gɔbu lā oyeeyi ku alɔ ɔwɛ nōo géē bi ɔhā gē lɛ alɔ, nōo klla géē ya ku alɔ teyi olɔhi ku Ujehofa.—3 Ujɔ́n 4.
2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
2 Ipu ikpɛyi ɛlā nyā, alɔ géē kɛla lɛyikwu aɔdā ōhī nōo ya nɛ alɔ yihɔtu ɔkwɛyi a. Cɛɛ alɔ géē leyi yɛ ɛgɛ nɛ alɔ géē gɔbu yɔ i mafu ihɔtu ku alɔ lɛ ɛnɛɛnɛ ɛhi nyā a. Ó lɛ aafu ŋ, oŋma lɛ ō leyi yɛ ɔ ɛgɛnyā géē ya ku alɔ ta Ujehofa ahinya fiyɛ, ohigbu ɛgɛ nɛ ó pi alɔ wa ipu ɔkwɛyi a. (Ujɔ́n 6:44) Ó klla géē ya ku ɔtu caca ku alɔ kóō nwune fiyɛ ō nwu ācɛ ɔhá ɔkwɛyi a.
ƆDĀ NŌO YA NƐ ALƆ YIHƆTU “Ɔ̄KWƐ̄YI Ā”
3. Ɔdi wɛ ɔdā ō cɛgbá fiyɛ duu nōo ya nɛ alɔ yihɔtu ɔkwɛyi a?
3 Ó lɛ ɔdā alɛwa nōo ya nɛ alɔ yihɔtu ɔkwɛyi a. Amáŋ ɔdā o cɛgbá fiyɛ duu a, wɛ ka alɔ yihɔtu ku Ujehofa nōo wɛ Ɔwɔico nɛ ɔkwɛyi a ŋma ɛgiyi nu a. Oŋma ipu ɛlā ku nu nōo wɛ Ubáyíbu a, alɔ gáā le má ka Ujehofa i wɛ ɔcɛ nōo lɔfu fiyɛ duu nōo Ya Ɛjɛɛji Odee ofuufunu ŋ, amáŋ ó wɛ Adā alɔ nōo yɔ ɔkpanco nōo yihɔtu alɔ klla lɛ ɛlá wu alɔ nɛhi. (1 Upít. 5:7) Alɔ klla jé ka Ɔwɔico ku alɔ ‘gbonɛnɛ nɛ̄hi, ó ī méyīnyi, ó ī cɔ̄nū fíya ŋ́. Ó klla gē ma ihɔtū nɛ̄hi fú lɛ ācɛ ɔlɛ́ nu.’ (Oyɛb. 34:6) Ujehofa yihɔtu ɛpɔ okpaakpa. (Ayis. 61:8) Ó i kwu ɔ iyē nɛhi ō má alɔ yɔ i má owe, ó kē le tutu yɔ i ya ɔtu caca lɛyikwu eko nɛ ó gáā bi ɛjɛɛji owe wa oŋmɛyi a. (Ujɛr. 29:11) Alɔ yɔ i leyice ɛnɛɛnɛ eko nyā! Ɛnyā wɛ odee nōo ya nɛ alɔ yihɔtu ku Ujehofa nɛhi a!
Ɔkwɛyi Nōo Yɔ Ipu Ubáyíbu A Lɛbɛɛka . . . Ekli O Kwajɛ A
Ɛgɛ nēe ekli o kwajɛ gē ta ɔkɔ abɔ hayi lɔhi a, ɛgɔɔma nɛ eyiyoce nɛ alɔ lɛ ŋma ipu Ubáyíbu a gē ta alɔ abɔ hayi kli eko duuma nɛ alɔ yɔ i má unwalu a. Ɛlā ɔkwɛyi nōo yɔ ipu Ubáyíbu a klla gē lɛ abɔ kwu alɔ ɔtu ō da ācɛ ɔhá lɛyikwu eyiyoce ku alɔ ɛcɔbu. (Má ogwotu ɔmɛ 4-7)
4-5. Ɔdiya nɛ ɔyikpo Upɔlu lɛ eyiyoce ku alɔ gbla ekli o kwajɛ a?
4 Ɔdi wɛ ɔdā ɔhá nōo ya nɛ alɔ yihɔtu ɔkwɛyi a? Ɔkwɛyi a gē bi itene alɛwa gē lɛ alɔ. Leyi yɛ ocabɔ mafu nyā. Ɔkwɛyi nōo yɔ ipu Ubáyíbu a lɛ ō ya mla eyiyoce ku alɔ lɛyikwu ɛcɔbu. Ō ya ɛɛ ku ɛgɛ nɛ eyiyoce ɔɔma cɛgbá nɛhi lɛ a kóō le teyi peee a, ɔyikpo Upɔlu kahinii: “Eyīyōce nɛ̄ alɔ lɛ nyā lɛbɛ̄ɛka ekli o kwajɛ kú oyēeyī kú alɔ ā.” (Uhíb. 6:19) Ɛgɛ nɛ ekli o kwajɛ gē ta ugbeenyi abɔ kóō yɔ ɛga ekponu a, ɛgɔɔma nɛ eyiyoce nɛ alɔ lɛ ŋma ipu Ubáyíbu a gē ta alɔ abɔ hayi kli eko duuma nɛ alɔ yɔ i má unwalu a.
5 Ipu ɛga ku Ubáyíbu ɔɔma, ɔyikpo Upɔlu yɔ i kɛla lɛ Ācɛ O Yɛce Ukraist néē lɛ anɔ tu uwa ɛyi a nɛ. Amáŋ ó lɛ ō ya mla Ācɛ O Yɛce Ukraist nōo lɛ eyiyoce ō lā ipu uparadais ɛcɛ nyā a duu. (Ujɔ́n. 3:16) Ku ɔkwɛyi a, ɛlā nɛ alɔ nwu lɛyikwu eyiyoce ō lā oyeeyi opiyoo a ya ku oyeeyi ku alɔ kóō lɛyi lɛ.
6-7. Ɛgɛnyá nɛ u Yvonne lɛ itene oŋma lɛ ō nwu ɛlā ɔkwɛyi lɛyikwu eyiyoce ku ɛcɔbu a?
6 Leyi yɛ ocabɔ ku ɔyinɛ alɔ nɔnya éyi néē hi ka Yvonne a. Apɔlɛ ku nu i wɛ Ācɛ Ocijali Ku Ujehofa ŋ, eko nɛ ó wɛ ɔyipɛ a ó gē yuufi ō kwū. Ó blatu ɛlā éyi nɛ ó jé, nɛ ó je mlanyi gla ŋ nōo kahinii: “Ɛ̄cī éyi ōōci i gáā yɔ ɛɛ gɛ ŋ.” Ó kahinii: “Ɛlā nyā ya ń gē gbiyɔla otu gla ŋ, n gē leyi kwɛɛcɛ yɔ i gbɛla lɛyikwu ɛcɔbu a. Ipu ɔtu ku um n da iyi um ka ‘oyeeyi cika ō fiyɛ ɛnyā gbóó. Ɔdiya néē kóō ya um a?’ Ń dɔka ō kwū ŋ!”
7 Igbihaajɛ nɛ Yvonne kwu piya ɛdrɔ a, ó gáā lɛ Ācɛ Ocijali Ku Ujehofa ōhī má. Ó kahinii: “Oŋma eko ɔɔma, n gáā gbɔɔ ō kpɔtuce ka um lɔfu lɛ eyiyoce ō lā oyeeyi opiyoo ipu Uparadais ɛcɛ nyā gla.” Ɛgɛnyá nɛ ɔyinɛ alɔ nɔnya nyā lɛ itene ŋma ō nwu ɛlā ɔkwɛyi a? Ó kahinii: “Ń gē caŋjɛ otu je unwalu lɛ iyi um lɛyikwu ɛcɔbu a amāŋ ka ō kwū gɛ ŋ.” Ó lɛ aafu ŋ, Yvonne yihɔtu ɔkwɛyi nɛ ó nwu ŋma ipu Ubáyíbu a nɛhi, ó kē i gweeye nɛhi ō da ācɛ ɔhá lɛyikwu eyiyoce ku ɛcɔbu nɛ ó lɛ a.—1 Utím. 4:16.
Ɔkwɛyi Nōo Yɔ Ipu Ubáyíbu A Lɛbɛɛka . . . Agbenu A
Ō gba Ujehofa ɛ̄gbā babanya mla ō lɛ eyiyoce ō gba ɔ ɛ̄gbā ɛcɔbu piyoo ipu Ajɔɔcɛ ku nu a, lɛbɛɛka agbenu a. Ɔɔma kē fiyɛ ɔdā duuma nɛ alɔ lɔfu leyi gwu ɔ bonu babanya a. (Má ogwotu ɔmɛ 8-11)
8-9. (a) Ipu acije éyi nɛ Ujisɔsi ta a, ɛgɛnyá nɛ adā a mafu ka ɔdā agbenu nɛ ó má a jɛ ɔ eyī nɛhi a? (b) Ɛgɛnyá nɛ ɔkwɛyi nɛ a má a jɛ uwɔ eyī lɛ a?
8 Ubáyíbu klla kɛla lɛyikwu ɔkoolɔhi ku Ajɔɔcɛ ku Ɔwɔico a. Ujisɔsi lɛ ɔkwɛyi lɛyikwu Ajɔɔcɛ ɔɔma gbla ɔdā agbenu nɛhi nōo tayinu. Ɛgɛ nɛ ɔkpá ku Umátiyu 13:44 ka a, Ujisɔsi kahinii: “Ajɔ̄ɔ̄cɛ́ kú ɔkpáncō lɛbɛ̄ɛka agbénú nēé le tayínū ipácí ā. Ɔ̄cɛ éyi lɛ ɔ́ pīyɛ̄, anɔ́ɔ ó lɛ ajɛ tá klá anú á. Ɛ́gɛ́nɛ̄ ɔtū he ɔ́ lɛ ā ó nyɛ̄ɛ̄ gaá kwú ɔdā dóódu nōó lɛ ā ú kpó lá. Anɔ́ɔ ó lɛ ajɛ nɛ̄ agbénú ɔ́ɔmā yɔ̄ ā lá á.” Ɛgɛ nɛ ɛga ku Ubáyíbu nyā ka a, adā i yɔ i dɔka ɔdā agbenu gbɔbu nóó. Amáŋ abɔ ó lɛ ɔ má a, ó ya ɔdā duuma nɛ ó ya gla a o ya ɛɛ ku abɔ nu kóō lɛ ɔ kwu. Ó kóō kwu ɛjɛɛji ɔdā nɛ ó lɛ a u kpo lá. Ɔdiya a? Ohigbu ka ó jé ka ɔdā agbenu nɛ ó má a cɛgbá nɛhi. Ó cɛgbá fiyɛ ɛjɛɛji ɔdā doodu nɛ ó kpo lá a.
9 Ɛgɔɔma nɛ ɔtu ya uwɔ lɛyikwu ɔkwɛyi nɛ a má a? Ó lɛ aafu ŋ ohi a wɛ u ii! Alɔ jé ka ó lɛ ɔdā duuma nɛ ɛcɛ nyā lɔfu je lɛ alɔ nɛ alɔ lɔfu le gbla eeye nɛ alɔ lɛ ō yɔ i gba Ujehofa ɛ̄gbā babanya, mla eyiyoce ō lā oyeeyi opiyoo nɛ alɔ lɛ ipu Ajɔɔcɛ ku Ɔwɔico a ŋ. Ɛnɛɛnɛ ɛga nɛ alɔ lɛ ō yɔ i jɔɔnyɛ ɛnɛɛnɛ ɛma mla Ujehofa a, fiyɛ ɔdā duuma nɛ alɔ lɔfu leyi gwo ɔ bonu a. Ɔdā nōo kē i je eeye lɛ alɔ fiyɛ duu a, wɛ ō yɔ i ya ɔdā nōo “he Óndú ā ɔtū ā.”—Ukól. 1:10.
10-11. Ɔdi lɛ abɔ kwu Michael ɔtu ō ya opiyabɔ nɛhi ipu oyeeyi ku nu a?
10 Alɛwa ku alɔ leyi gwo aɔdā o cɛgbá alɛwa bonu o ya ɛɛ ku alɔ teyi olɔhi ku Ujehofa ɛ. Ācɛ Ōhī leyi gwo aɔdā nɛhi néē miya ō ya ipu oyeeyi ku uwa ipu ɛcɛ nyā a bonu. Ōhī nōo yɔ i ceyitikwu kéē lɛ aɔdā agbenu nɛhi lɛ a habɔ ta. Ācɛ ōhī kē lɛ ɔwɛ néē gē lā oyeeyi ku uwa gbɔbu a piyabɔ duudu, abɔ é gáā lɛ Ujehofa jé a. Ɔdā nɛ ɔyinɛ alɔ éyi néē hi ka Michael a ya yɔ abɔɔ a. Ó jɛ ipu ɔkwɛyi a ŋ. Eko nɛ ó wɛ ɛdrɔ a, ó nwu ɛgɛ nɛ ó géē jé ō ya ufim ku ācɛ nōo gē bi ikpo le nuunu a. Ó kahinii: “Ɛgɛ nōo hayi mla ō má éyi ku um lɛ a gē cɛ gā um yɔbɔcɛ nɛhi. Ekoohi ó gē ya um bɛɛka ɔcɛ duuma i ya um lé gla ŋ ma.” Amáŋ eko nɛ ó gbɔɔ ō klɔcɛ ku Ubáyíbu a, Michael gáā le nwu ɛgɛ nɛ Ujehofa gē leyi má unu ō nu a. (Aíjē 11:5) Michael ka ɔba mla ɔnyā ku Ācɛ Ocijali nōo klɔcɛ mla ɔ a, “I da anuɔ ka anuɔ habɔ ō ya ufim ku ācɛ nōo gē bi ikpo le nuunu a ta jeeje ɛɛ ŋ. Ikɔkɔ ɔɔma, é gɔbu yɔ i nwu um ɛlā ɔkwɛyi nōo yɔ ipu Ubáyíbu a.”
11 Ɛgɛ nɛ Michael gɔbu yɔ i nwu ɛlā lɛyikwu Ujehofa a, ɛgɔɔma nɛ ihɔtu nɛ ó lɛ lɛ ɔ a gē nwune tōōtɔ̄ɔ̄ a. Eyinyinyi nɛ Ujehofa lɛ lɛ ācɛ nōo gē gba ɔ ɛ̄gbā a lɛ abɔ kwu ɔ ɔtu nɛhi. Abɔ eko yɔ i nyɔ a, Michael gáā le jé ka anuɔ cɛgbá ō ya ōmiya o cɛgbá nɛhi nōo géē lɛ abɔ kwu ɛjɛɛji oyeeyi ku anuɔ. Ó kahinii: “N jé ka ō habɔ unu néē gē bi ikpo nu a ta, gáā wɛ ɔdā olɔnɔ gā um ō ya fiyɛ duu ipu oyeeyi ku um a. Amáŋ n kē jé ka ɔɔma gáā cɛ lɛ Ujehofa gweeye a, n klla jé duu ka ɔdā duuma nɛ um leyi gwo ɔ bonu o ya ɛɛ ku um gba Ujehofa ɛ̄gbā a i fu ɔdā duuma ŋ.” Michael jé ka ɔkwɛyi nɛ ó gáā má a cɛgbá nɛhi, ɔɔma ya ɛɛ nɛ ó cɛ ō ya opiyabɔ nɛhi ɔɔma ipu oyeeyi ku nu a.—Ujɛ́m. 1:25.
Ɔkwɛyi Nōo Yɔ Ipu Ubáyíbu A Lɛbɛɛka . . . Agege A
Agege nōo gē fiyaajɛ lɔɔlɔhi gē ta alɔ abɔ má ɛga duuma nɛ alɔ cɛgbá ō nyɔ a eko nɛ alɔ yɔ ipu obu. Ɔwɛ ekponu ɔɔma, ɛlā ku Ɔwɔico gē ta alɔ abɔ ya ōmiya olɔhi ipu ɛcɛ ku Usetan nɛ alɔ yɔ ipu nyā. (Má ogwotu ɔmɛ 12-13)
12-13. Ɛgɛnyá nɛ ɛlā ɔkwɛyi nōo yɔ ipu Ubáyíbu a ta u Mayli abɔ a?
12 O ya ɛɛ ku alɔ jé ɛgɛ nɛ ɔkwɛyi a cɛgbá nɛhi lɛ a, Ubáyíbu lɛ ɔ gbla ɔlá ofiyajɛ ipu ajɛ odobu. (Aíjē 119:105; Āfi. 5:8) Mayli, nōo ŋma Azerbaijan a, gweeye nɛhi ohigbu otabɔ nɛ ó miyɛ ŋma Ɛlā ku Ɔwɔico a. Ó ŋma apɔlɛ nɛ ɔnyɔɔnyɛ lɛ ɔwɛ o gba ɛ̄gbā ku nu. Adā nu wɛ ɔcɛ o ya Ɔwɔ, ɛ́nɛ́ nu kē wɛ ɔcɛ Ujiyu. Ó kahinii: “Ń lɛ aafu ipu ɔtu ku um ka Ɔwɔico i yɔ ŋ nɛ nóó, amáŋ n lɛ aɔka alɛwa ō da. Ó gē hɛ um idaago, ‘Ka ɔdiya nɛ Ɔwɔico ya alɛɛcɛ, amāŋ ka ɔdi wɛ itene ku oyeeyi nɛ ɔcɛ géē lɛ owe má ɛjɛɛjɛ oyeeyi ku nu klla géē le ta ipu ɔla ikɔtɔ piyoo a?’ Ɛgɛ nɛ ācɛ gē ka ka ɔdā duuma nōo gē ya a wɛ ococɛ ku Ɔwɔico a, ó lɛ a ‘Ɔwɔico gē kwu ācɛ kéē ya ɔdā nɛ ó dɔka klla gē jɔɔnyɛ ō má uwa yɔ i moowe?
13 Mayli gɔbu yɔ i dɔka ohi ku aɔka ku nu. Igbihaajɛ ó cɛ ō klɔcɛ ku Ubáyíbu klla kwu piya éyi ku Ācɛ Ocijali Ku Ujehofa. Ó kahinii: “Ɛlā ɔkwɛyi nɛ um má ŋma ipu Ubáyíbu a ta um abɔ kwu piya ɔcɛ o lɛ eeye nɛhi babanya. Ɛlā ijeeyi nōo yɔ ipu ɛlā ku Ɔwɔico a, cɛ gā um lɛ ɛbɔ ku ipiipu ɔtu lɛ.” Bɛɛka u Mayli a, alɔ gē cɛtra Ujehofa ohigbu ɛgɛ nɛ ó hi alɔ igwú “ŋmá ipú obū kú ínoōbīya ga ipú kú ɔlá ofiyajɛ nōo nya [alɔ] tá ā á.”—1 Upít. 2:9.
14. Ɛgɛnyá nɛ alɔ gáā ya ku alɔ yɔ i yihɔtu ku ɔkwɛyi a tōōtɔ̄ɔ̄ a? (Má ikpati nōo kahinii “ Aɛlā Ɔhá Nɛ Alɔ Lɔfu Lɛ Ɔkwɛyi Nōo Yɔ Ipu Ubáyíbu A Gbla A.”)
14 Ɛnyā wɛ aocabɔ ligii nōo mafu ɛgɛ nɛ ɔkwɛyi nōo yɔ ipu ɛlā ku Ɔwɔico a cɛgbá nɛhi lɛ a. Ó lɛ aafu ŋ, a lɔfu gbɛla lɛyikwu alɛwa ɔhá. O ya ɛɛ ku a ya ɛnyā, alɔ lɔfu lɛ ɔ ta ipu ōmiya ku oklɔcɛ ku abɔyi uwɔ gla, ku a má aɔdā ōhī nōo ya nɛ ɔkwɛyi a cika o he alɔ ɔtu tōōtɔ̄ɔ̄ a. Ɛgɛ nɛ alɔ gɔbu yɔ i yihɔtu ku ɔkwɛyi a, ɛgɔɔma nɛ alɔ gáā dɔka ɔwɛ nɛ alɔ gáā mafu ɛgɛ nɛ alɔ yihɔtu ku nu a.
ƐGƐ NƐ ALƆ GÁĀ MAFU KA ALƆ YIHƆTU ƆKWƐYI A
15. Ɔwɛ nyá nɛ alɔ gáā mafu ka alɔ yihɔtu ɔkwɛyi a?
15 Alɔ géē mafu ka alɔ yihɔtu ɔkwɛyi a oŋma lɛ ō yɔ i jé Ubáyíbu mla aɔkpá ku alɔ eko doodu. Ɛgɛ nɛ alɔ kē jé a, ɛgɛ duuma nɛ alɔ kóō yɔ ipu ɔkwɛyi a gboji ɛ naana, alɔ cɛgbá ō yɔ i jé aɔdā alɛwa eko doodu. Ō gbɔɔ ŋmaajɛ ku ɔkpá nyā kahinii: “Ó lɛ aɛlā ō nwu ɛkɛmgbɛ ɛyɛɛyɛyi ipu ɛcɛ nyā, nōo ya ku ɛlā ɔkwɛyi a kóō tōō jé fiyaa ŋ. O ya ɛɛ ku a lɛ ɔ má, a cɛgbá ō yɔ i leyi kwɛɛcɛ eko doodu. . . . O ya ɛɛ ku a kē lɛ ɔ gbotu, a cɛgbá ō ceyitikwu. Odoodo ku ɛlā ɔkwɛyi ekponu nɛ a jé a, kóō hii jɛ uwɔ ŋ. . . . Yɔ i ceyitikwu eko doodu jé aɛlā ɔkwɛyi nōo yɔ ipu Ubáyíbu a.” Ō yɔ i klɔcɛ i wɛ uklɔ ija nóó, amáŋ o ceyitikwu ku uwɔ i gáā bonu ŋ.
16. Ɔdi ŋma ipu oklɔcɛ ku abɔyi uwɔ gē lɛ abɔ kwu uwɔ ɔtu nɛhi a? (Aíita 2:4-6)
16 Ó wɛ ɛjɛɛji alɔ nōo klɔcɛ mla ō jé Ubáyíbu eko doodu he alɔ ɔtu a ŋ. Amáŋ Ujehofa yɔ i hi alɔ igwú ka alɔ “tíne” o ya ɛɛ ku alɔ lɛyi ku ɔkwɛyi a jé lɔɔlɔhi. (Jé Aíita 2:4-6.) Eko duuma nɛ alɔ ceyitikwu ya ɛnyā, alɔ géē yɔ i lɛ itene ku nu eko doodu. Lɛyikwu Ubáyíbu ō jé ku abɔyi nu, Corey ka anuɔ gē leyikwu ɔgba ku Ubáyíbu éyi foofunu eko nɛ anuɔ yɔ i jé Ubáyíbu. Ó lɛ ɔ teyi peee kahinii: “N gē jé ɛjɛɛji aɛlā néē ta ɛhaajɛ ku nu a, gē jé aɛlā duudu nōo tɛɛma kwu ɔgba a, klla gē jila aɛlā ɛyɛɛyɛyi má lɛyikwu ɔ. . . . Ō ya ɛgɛnyā ta um abɔ nwu aɔdā alɛwa!” Ɔdaŋ ka alɔ i kóō ya lɛ a ŋ naana, eko mla o ceyitikwu nɛ alɔ gē ya eko nɛ alɔ gē klɔcɛ a mafu ka ɔkwɛyi a jɛ alɔ eyī nɛhi.—Aíjē 1:1-3.
17. Ɔdi wɛ ɛyi kóō bi ɔdā nɛ alɔ nwu a le yuklɔ a? (Ujɛ́mīsi 1:25)
17 Ɛgɛ nɛ alɔ jé a, alɔ i cika o klɔcɛ ku ɛlā ɔkwɛyi ofoofunu ŋ. O ya ɛɛ ku alɔ lɛ itene ŋma oklɔcɛ ku alɔ, alɔ cika ō lā oyeeyi ku alɔ ɔwɛ nōo mafu ka alɔ yɔ i bi ɛlā ɔkwɛyi nɛ alɔ nwu a le yuklɔ. Oŋma lɛ ō ya ɛnyā, nɛ ɔkwɛyi nɛ alɔ yɔ i nwu a gáā bi eeye ɔkwɛyi gē lɛ alɔ a. (Jé Ujɛ́mīsi 1:25.) Ɛgɛnyá nɛ alɔ gáā jé ɔkwɔɔkwɛyi ɔdaŋ ku alɔ yɔ i yɛce ɔwɛ ku ɔkwɛyi a? Ɔyinɛ alɔ nɔnyilɔ éyi ka alɔ cika ō jila iyi alɔ má, ku alɔ má ɛga nɛ alɔ yɔ i ya lɔhi mla ɛga nɛ alɔ cɛgbá ō ya lɔhi fiyɛ a. Ɔcocɛhɔ Upɔlu kahinii: “Alɔ yɛ gɔbū kú alɔ yɛce ɛdɔ kú íne ékpó nɛ̄ alɔ yɛce jāā kwu abālɔbányā ā.”—Ufíl. 3:16.
18. Ɔdiya nɛ alɔ gē ya ɔdā duuma nɛ alɔ ya gla a, o ya ɛɛ ku alɔ gɔbu yɔ i “lɛyítáajɛ lɛ ɔ̄kwɛ̄yi ā”?
18 Gbɛla kwu itene nɛ alɔ lɛ oŋma lɛ ō yɔ i “lɛyítáajɛ lɛ ɔ̄kwɛ̄yi ā”! Ó wɛ ka oyeeyi ku alɔ kwu lɔhi ofoofunu ŋ, amáŋ alɔ gē bi eeye gē lɛ Ujehofa mla ayinɛ alɔ. (Aíit. 27:11; 3 Ujɔ́n 4) Ó lɛ aafu ŋ, ó lɛ ɔdā alɛwa nōo ya nɛ alɔ cika ō yihɔtu ɔkwɛyi a klla bi ɔkwɛyi nɛ alɔ jé a yɔ i le yuklɔ ipu oyeeyi ku alɔ.
IJÉ ƆMƐ 144 Keep Your Eyes on the Prize!
^ Igbalɛwa alɔ gē ka ka ɔdā nɛ alɔ kpɔtuce mla ɔwɛ nɛ alɔ gē lā oyeeyi ku alɔ a wɛ “ɔ̄kwɛ̄yi ā.” Ɔdaŋ ka ó gboji nɛ a je piya éyi ku Ācɛ Ocijali Ku Ujehofa ɛ ŋ amāŋ ka ó gboji ɛ, ɛjɛɛji alɔ géē lɛ itene nɛhi oŋma lɛ ō leyi yɛ ɔdā nōo ya nɛ alɔ yihɔtu ɔkwɛyi a. Ō ya ɛnyā géē ta alɔ abɔ lɛ ɔtu caca ō ya ɔdā duuma nɛ alɔ ya gla, o ya ɛɛ ku alɔ teyi olɔhi ku Ujehofa.
