IKPƐYI ƐLĀ Ō KLƆCƐ ƆMƐ 33
Ujehofa Yɔ I Má Oduudu Ācɛ Ɔlɛ Nu
“Eyī kú Óndú ā [nōo wɛ Ujehofa a] kwu ācɛ nēe gē lɛyítáajɛ lɛ ɔ́ ā.”—AÍJĒ 33:18.
IJÉ ƆMƐ 4 “Jehovah Is My Shepherd”
ƆDĀ NƐ ALƆ GÁĀ NWU A *
1. Ɔdiya nɛ Ujisɔsi ba Ujehofa kóō leyi kwu ācɛ nōo gē yɛce ɔ a?
OTU gbɔbu ɛɛ ku Ujisɔsi kóō kwū a, ó lɛ ɛba éyi nɛ ó ba Adā nu nōo yɔ ɔkpanco a nōo cɛgbá nɛih. Ó ba Ujehofa kóō leyi kwu ācɛ nōo gē yɛce ɔ a klla lɛ uwa gbotu. (Ujɔ́n. 17:15, 20) Ó lɛ aafu ŋ, Ujehofa humayi leyi kwu ācɛ ɔlɛ nu, teyi ta uwa klla je ogbotu lɛ uwa ɛ. Naana kpɔ a, Ujisɔsi jé ku ācɛ ɔlɛ nu géē má unwalu nɛɛnɛhi ŋma ɛgiyi Usetan. Ujisɔsi klla jé ka é géē cɛgbá otabɔ ku Ujehofa, o ya kéē hayi kpaakpa eko nɛ Ebilii lɛ unwalu bi gē lɛ uwa.
2. Ɛgɛ nɛ ɔkpá ku Aíjē Kú Ɛ̄gbā 33:18-20 ka a, ɔdiya nɛ alɔ i cika ō yuufi unwalu amāŋ ojama ŋ ma?
2 Ɛcɛ nyā nōo yɔ ipu abɔ ku Ebilii a gē bi unwalu alɛwa gē lɛ Ācɛ O Yɛce Ukraist icɛ. Alɔ gē má unwalu alɛwa nōo lɔfu cɛ lɛ abɔ hɛ alɔ iyē, nōo klla gē ja alɔ ma ku alɔ hayi kpaakpa lɛ Ujehofa gɛ ŋ. Amáŋ alɔ géē má ipu ikpɛyi ɛlā nyā, ku alɔ i cika ō yuufi ŋ. Eyī ku Ujehofa kwu ɛjɛɛji alɔ, ó gē má ɛjɛɛji unwalu nɛ alɔ yɔ ipu nu a, ó kē le tutu ō ta alɔ abɔ. Alɔ leyi yɛ ocabɔ ku Ubáyíbu ɛpa nōo mafu ɛgɛ nɛ “eyī kú [Ujehofa] kwu ācɛ nēe gē lɛyítáajɛ lɛ ɔ́ ā.”—Jé Aíjē Kú Ɛ̄gbā 33:18-20.
UJEHOFA GĒ TA ALƆ ABƆ EKO NŌÓ YA ALƆ BƐƐKA ALƆ YƆ OFOOFU ALƆ A
3. Eko nyá nōó lɔfu ya alɔ bɛɛka alɔ yɔ ofoofu alɔ a?
3 Naana nɛ alɔ lɛ ayinɛ alɛwa ipu ujɔ a, ekoohi, ó lɔfu ya alɔ bɛɛka alɔ yɔ ofuufu alɔ a. Ocabɔ mafu, ó lɔfu ya aɛdrɔ ka é yɔ ofoofu uwa eko néē yɔ i ka ɔdā néē kpɔtuce a ipu uklass iyɔbu ayipɛ inɔkpa ɔmpa uwa amāŋ eko néē le ta ujɔ ɛpɛpɛ. Ōhī ku alɔ lɔfu cɔnu amāŋ yɔ i nya mla ɔtu ō gbenyi, ohigbu ō gbɛla ka alɔ géē lɔtu ku āhɔ̄ a abɔyi alɔ, ka ɔcɛ duuma i yɔ ō ta alɔ abɔ ŋ. Alɔ lɔfu pi ɔkwaajɛ ō kɛla lɛ ācɛ ɔhá lɛyikwu ɛgɛ nɛ ɔtu yɔ i ya alɔ a, ohigbu ka alɔ gbɛla ka é gáā jé āhɔ̄ nɛ alɔ yɔ anu a ŋ. Ó kē lɛ ekoohi nɛ alɔ lɔfu gbɛla ɔdaŋ ka ɔcɛ duuma kōō lɛ ɛlá wu alɔ ɔkwɔɔkwɛyi. Ɔdā duuma lɔfu ya ku ɔtu kóō ya alɔ ku alɔ yɔ ofoofu alɔ gla, ɛlá ō gbo nyā lɔfu ya ku alɔ lɛ ɔtu ō plico klla gbɛla ku alɔ i lɛ ɔcɛ o ta alɔ abɔ ŋ. Ujehofa i kē dɔka ku ɔtu kóō ya alɔ lɛ a ŋ duudu. Ɔdiya nɛ alɔ ka lɛ a gla a?
4. Ɔdiya nɛ Ɛlayija kahinii: “Ami ōfōōfū um [wɛ ɔcomɛɛbɛ] nōo hile ā”?
4 Leyi yɛ ocabɔ ku Ɛlayija nōo wɛ ɔcɛ o hayi kpaakpa a. Ó humayi kwinya oyeeyi ku nu fiyɛ ɛ̄cī ofu ɛpa (40), igbihi nɛ Ujɛsebɛlu ce okonu ka anuɔ géē je ɔ ŋmo a. (1 Aɔ́cɛ́ 19:1-9) Igbihaajɛ, ó gā tayinu ipu ɔgɛcɔ anu ofoofunu, anɔ ó jikwu da Ujehofa kahinii: “Ami ōfōōfū um [wɛ ɔcomɛɛbɛ] nōo hile ā.” (1 Aɔ́cɛ́ 19:10) Ó lɛ acomɛɛbɛ ɔhá nōo yɔ kpɔ. Ocabɔ mafu, Obadiya lɛ acomɛɛbɛ ofu ɛhɔ (100) kpo tayinu o ya ɛɛ ku Ujɛsebɛlu kóō je uwa kpo ŋmo ŋ. (1 Aɔ́cɛ́ 18:7, 13) Ó lɛ a ɔdiya nɛ Ɛlayija gbɛla ka anuɔ ofoofu anuɔ hile a? Ó gbɛla ka acomɛɛbɛ nɛ Obadiya je ogbotu lɛ uwa a le pɛ gekwu ɛ nɛɛ? Igbihi nɛ Ujehofa bi Ɛlayija le mafu ɛyi ɛfu ku Kamɛlu ka anuɔ wɛ Ɔwɔ ɔkwɛyi a, ācɛ a ta o gba Ujehofa ɛ̄gbā kpɔ. Ɔɔma ya ɛɛ nɛ ɔtu ya Ɛlayija ku ó yɔ ofoofu nu a nɛɛ? Kɛɛ ka ó yɔ i gbɛla ka abɔ aolɛla ku nu dɔka ō je ɔ ŋmo a ka ɔcɛ duuma i jé ŋ, klla yɔ i gbɛla ka ɔcɛ duuma i lɛ ɛlá wu anuɔ ŋ nɛɛ? Ubáyíbu i je ɔ ta alɔ eyī peee ɔdā nōo ya nɛ ɔtu yɔ i ya Ɛlayija lɛ a ŋ. Amāŋ ɔdā nɛ alɔ jé kpɔcii a wɛ ka Ujehofa jé ɔdā nōo ya nɛ ɔtu ya Ɛlayija bɛɛka ó yɔ ofoofunu a, ka Ujehofa klla jé ɔwɛ okpaakpa ō bi le ta Ɛlayija abɔ.
Eko duuma nōó ya alɔ bɛɛka alɔ yɔ ofoofu alɔ, ɛlā ō ta ɔtu kwu ɔtu nyá nɛ alɔ nwu ŋma ɔwɛ nɛ Ujehofa bi le ta Ɛlayija abɔ a? (Má ogwotu ɔmɛ 5-6)
5. Ɛgɛnyá nɛ Ujehofa ya ku Ɛlayija kóō jé kpɔcii ka ó yɔ ofoofu nu ŋ ma?
5 Ujehofa bi ɔwɛ alɛwa le ta Ɛlayija abɔ. Ó ta Ɛlayija ɔtu kwu ɔtu kóō kɛla ŋma ipu ɔtu. Ó da Ɛlayija ɔkā igbo ɛpa kahinii: “Ɔdí nɛ̄ a yɔ̄ ī yá amānyā ā?” (1 Aɔ́cɛ́ 19:9, 13) Eko nɛ Ɛlayija yɔ i kɛla kpɛmm a, Ujehofa yɔ i jahɔ abɔɔ ó yɔ i ka ɛgɛ nɛ ɔtu yɔ i ya ɔ a. Ujehofa ta Ɛlayija ohi ŋma lɛ ō mafu lɛ ɔ ka anuɔ yɔ i kɛla mla ɔ a, ka anuɔ kē lɔfu nɛhi. Ó klla cɛ lɛ Ɛlayija le jé kpɔcii ka ó lɛ ācɛ ku Isrɛlu alɛwa ɔhá yɔ i gba anuɔ ɛ̄gbā kpɔ. (1 Aɔ́cɛ́ 19:11, 12, 18) Ó lɛ aafu ŋ, Ɛlayija lɛ ɛbɔ ku ɔtu lɛ igbihi nɛ ó lɛ ɔtu ku nu ka nɛ Ujehofa kē lɛ ohi ta ɔ a. Ujehofa lɛ uklɔ o cɛgbá alɛwa je lɛ Ɛlayija. Ujehofa da ɔ kóō lɛ anɔ tu Uhasɛlu ɛyí kóō kwu piya ɔcɛ́ ku Usiriya, kóō le tu Ujehu ɛyí kóō kwu piya ɔcɛ́ ku Isrɛlu, cɛɛ kóō le tu Ɛlayissa ɛyí kóō kwu piya ɔcomɛɛbɛ. (1 Aɔ́cɛ́ 19:15, 16) O bu ipu auklɔ nɛ Ujehofa je lɛ Ɛlayija nyā, Ujehofa ta ɔ abɔ kóō lɛ ɔtu kwu aɔdā olɔhi nōo géē cɛ lɛ ɔ lɛ eeye. Ɔwɔico klla lɛ ɔcɛ éyi je lɛ ɔ nōo géē wɛ oklobiya nu, anu kē wɛ Ɛlayissa a. Eko duuma nɛ ɔtu yɔ i ya uwɔ ku a yɔ ofoofu uwɔ, ɛgɛnyá nɛ a lɔfu miyɛ otabɔ ku Ujehofa a?
6. Ɔdi nɛ a lɔfu gbɔɔkɔ lɛyikwu ɔ eko duuma nɛ ɔtu yɔ i ya uwɔ bɛɛka a yɔ ofoofu uwɔ a? (Aíjē Kú Ɛ̄gbā 62:8)
6 Ujehofa yɔ i hi uwɔ igwú ku a gbɔɔkɔ lɛ ɔ. Ó jé unwalu nɛ a yɔ i má a, klla yɔ i cɛ gā uwɔ jé kpɔcii ka anuɔ géē jahɔ ta uwɔ eko duuma nɛ a gbɔɔkɔ lɛ ɔ. (1 Utes. 5:17) Ɔtu gē he ɔ ō jahɔ ta ɔkɔ ō gba ku ācɛ nōo gē gba ɔ ɛ̄gbā a. (Aíit. 15:8) Ɔdi nɛ a lɔfu gbɔɔkɔ lɛyikwu ɔ eko duuma nɛ ɔtu ya uwɔ bɛɛka a yɔ ofoofu uwɔ a? Bɛɛka Ɛlayija a, da Ujehofa ɛjɛɛji ɔtu ku uwɔ. (Jé Aíjē Kú Ɛ̄gbā 62:8.) Da ɔ lɛyikwu ɔtu ō plico ku uwɔ mla ɛgɛ nōó gē lɛ abɔ kwu uwɔ iyē a. Ba Ujehofa kōó ta uwɔ abɔ jé ɔdā nɛ a gē ya eko duuma nɛ á lɛ eeye ŋ, nɛ ɔtu klla ya uwɔ bɛɛka a yɔ ofoofu uwɔ a. Ocabɔ mafu, ɔdaŋ ku a lɛ ɛga má ō tɔɔna inɔkpa amāŋ nɛ a yɔ i yuufi nɛ ɔtu klla ya uwɔ bɛɛka a yɔ ofoofu uwɔ a, ba Ujehofa kōó ya ku a lɛ ɔtu o ya ɛɛ ku a toohi. A kōō lɔfu ba ɔ kóō je ijeeyi gā uwɔ ku a toohi ɔwɛ nɛ ɛlā géē ta ācɛ a eyī peee. (Ulúk. 21:14, 15) Ɔdaŋ ku a yɔ ipu āhɔ̄ nɛ ɔtu le gbenyi gā uwɔ, ba Ujehofa kōó ta uwɔ abɔ cɛɛ ku a lɛ ɛlā a ka lɛ Ɔcɛ O Yɛce Ukraist nōo le jikoko ipu ɛlā ku Ɔwɔico. A da Ujehofa kōó ta ɔcɛ nɛ a dɔka ō kɛla a mla ɔ a abɔ cɛɛ kóō jé ɛgɛ nɛ ɔtu yɔ i ya uwɔ a. Da Ujehofa ɛjɛɛji ɔtu ku uwɔ cɛɛ ku a má ɛgɛ nɛ ó gēé cila ɔkɔ nɛ a gba a, ku a klla miyɛ otabɔ ŋma ɛgiyi ācɛ ɔhá. Ɔdaŋ ku a ya lɛ a ɛgɛ nɛ ɔtu gē ya uwɔ a géē tabɔ waajɛ.
A gē dɔka ɔwɛ ɛyɛɛyɛyi nōo géē ta uwɔ abɔ tɔɔna fiyɛ otɛtɛ klla gē ya ɛnyā mla ācɛ ɔhá? (Má ogwotu ɔmɛ 7)
7. Ɔdi nɛ a nwu ŋma ocaba ku Mauricio a?
7 Ujehofa je ɛnɛɛnɛ uklɔ lɛ ɛjɛɛji alɔ ō ya. A kpɔtuce gla ka Ujehofa yɔ i má ɛjɛɛji ɔdā nɛ a yɔ i ya ipu ujɔ mla ipu uklɔ ku ɔna ō ta a, ó kē jɛ ɔ eyī nɛhi. (Aíjē 110:3) Ɛgɛnyá nɛ ō lɛ ɔdā alɛwa ō ya ipu uklɔ nyā gáā ta uwɔ abɔ, eko nōó yɔ i ya uwɔ bɛɛka a yɔ ofoofu uwɔ a? Leyi yɛ ocabɔ ku ɔyinɛ alɔ éyi néē hi ka u Mauricio a. * Ó gboji ŋ igbihi nɛ u Mauricio lɛ ubatisim ya a, ɛmɛɛma, éyi ku aɛnɛɛnɛ oklobiya ku nu gā ma ō gba Ujehofa ɛ̄gbā. Mauricio kahinii: “Ō má ɛgɛ nɛ ó habɔ Ujehofa ta lɛ a cɛ gā um gbɔɔ ō yuufi. N gbɛla Iɔɔlɔhi ɔdaŋ ka um ya ɔdā nɛ um ka eko nɛ um je iyi um gwɛɛya a gla, nɛ um klla géē gɔbu wɛ ipu ɔwa ku Ujehofa kpɔ. Ó ya um bɛɛka um yɔ ofoofu um a, ka ɔcɛ duuma i klla gáā jé ɛgɛ nɛ ɔtu yɔ i ya um lɛ a ŋ.” Ɔdi ta u Mauricio abɔ a? Ó kahinii: “N gbɔɔ ō tɔɔna fiyɛ otɛtɛ. Ɛnyā ta um abɔ ku n ma ō gbɛla lɛyikwu iyi um ofoofu nu mla ɛgɛ nɛ ɔtu yɔ i ya um a. N gweeye, ɛgɛ nɛ ɔtu gē ya um gbɔbu a klla tabɔ waajɛ eko nɛ um yɔ i tɔɔna mla ayinɛ ɔhá a.” Ɔdaŋ ku alɔ i kóō tɔɔna ŋma ɔlɛ gā ɔlɛ eyī caa mla ayinɛ alɔ gla ŋ naana, é gē lɛ ɔfu tu alɔ iye kpɔ, ɔdaŋ ku alɔ tɔɔna mla uwa o bu ipu ɔdā ō le gwo uwaya mla uleta ō ta. Ɔdi ɔhá ta u Mauricio abɔ a? Ó klla kahinii: “N klla gbɔɔ ō yuklɔ nwune fiyɛ ipu ujɔ. N gē je ɔtu ta ō ya otutu klla ya aya nōo lɛ ō ya mla uklɔ ō ya ɛyi ede. Auklɔ nyā cɛ lɛ ɔtu ya um ka um jɛ Ujehofa mla ācɛ ɔhá eyī.”
UJEHOFA GĒ TA ALƆ ABƆ EKO NƐ OJAMA YA KU ƆTU KU ALƆ KÓŌ LE GBENYI
8. Ɛgɛnyá nɛ aojama nɛhi lɔfu lɛ abɔ kwu alɔ iyē lɛ a?
8 Alɔ leyice ō má ojama ɛyɛɛyɛyi ɛpleeko amoomɛ nyā. (2 Utím. 3:1) Amáŋ ó lɛ ɛdɔ ojama ōhī nɛ alɔ i lɔfu leyice ŋ, amáŋ nōo lɔfu hɛ alɔ idaago eko nɛ ojama a ya piii a. Á jé ŋ igbeekponu iciici alɔ gbɔɔ ō lɛ unwalu ku ije, idɔkitɔ da alɔ ku alɔ yɔ i doōcē obɔbi éyi, amáŋ ɔcɛ nɛ alɔ yihɔtu nu gáā gekwu. Ɛpleeko ɛgɛnyā ɔtu lɔfu gbenyi lɛ alɔ unwalu a klla lɔfu le fiyɛ alɔ ɔfu, ofluflu ɔdaŋ ka ɛjɛɛji aojama a wa igbeekponu amāŋ abɔ éyi yɔ i mɛ a nɛ ɔhá yɔ i wa a. Bla ka Ujehofa jé āhɔ̄ ku alɔ, ka oŋma lɛ otabɔ ku nu alɔ lɔtu ku ojama duuma abɔ alɔ yɔ i kpɔtuce ɔ a gla.
9. Kwu aojama ōhī nɛ Ujobu má a u ta alɔ eyī peee.
9 Gbɛla lɛyikwu ɛgɛ nɛ Ujehofa je otabɔ lɛ Ujobu nōo wɛ ɔcɛ o hayi kpaakpa a. Ó má ojama alɛwa nōo bɔbi nɛhi ɛpleeko kpiii. Ipu ɛ̄cī ekponu, Ujobu miyɛ olɛhɔ ku aɔda obɔbi ɛyɛɛyɛyi nōo ya, nōo cɛ lɛ ācɛ kéē lɛ aɛbɛ ku nu kpo uwi amāŋ lɛ uwa kpo ŋmo, nōo klla lɛ acocɛhɔ ku ɔlɛ nu mla ɛjɛɛji ayipɛ ɔlɛ nu kpo ŋmo. (Ujób. 1:13-19) Ó gboji ŋ igbihi ɔɔma, eko nɛ ó yɔ i yekwu kpɔ ɛɛ ma, Ujobu gbɔɔ ō doōcē nōo lɔnɔ akpaabana klla bɔbi nɛhi. (Ujób. 2:7) Āhɔ̄ ku nu a bɔbi nɛhi nōo ya kóō kahinii: “Ɛ̄jɛ̄ oyēeyī le jɛ̄ um ɛɛ́.”—Ujób. 7:16.
Ujehofa da Ujobu ɛgɛ nɛ ó lɛ ɛlá wu ɔdā doodu nɛ ó ya a, o ya ɛɛ ku Ujobu kóō kpɔtuce ka ó yihɔtu nu klla géē leyikwu ɔ (Má ogwotu ɔmɛ 10)
10. Ɛgɛnyá nɛ Ujehofa je aɔda nɛ Ujobu cɛgbá o ya ɛɛ kóō lɔtu ku aojama ku nu lɛ ɔ a? (Má ifoto nōo yɔ iyɔbu a)
10 Ujehofa yɔ i má Ujobu ipu āhɔ̄ ku nu. Abɔ Ujehofa kē yihɔtu ku Ujobu a, Ó je ɔdā nɛ Ujobu cɛgbá a lɛ ɔ, o ya kóō lɔtu ku ojama a klla hayi kpaakpa. Ujehofa kɛla lɛ Ujobu, yɔ i ta ɔ ɛlá kwu ijeeyi ku anu nōo wɛ Ɔwɔico a, mla ɛgɛ nɛ ó yihɔtu ku aɔda nɛ ó ya a. Ó kɛla lɛyikwu aɛbɛ ohidaago ɛyɛɛyɛyi. (Ujób. 38:1, 2; 39:9, 13, 19, 27; 40:15; 41:1, 2) O bu ipu ɔyipɛ oklobiya éyi nōo lé ka Ɛlihu a, Ujehofa lɛ ɔfu tu Ujobu iyē klla ta ɔ ɔtu kwu ɔtu. Ɛlihu cɛ lɛ ɔ le jé kpɔcii ka ɛjɛɛji ācɛ o gba Ujehofa ɛ̄gbā nōo gē lɔtu a, anu gē cila uwa ule á. Ó wɛ ɔɔma ofoofu nu ŋ, Ujehofa klla bi Ɛlihu le piya Ujobu ahɔ̄ ɔwɛ ogbonɛnɛ. Ɛlihu ta Ujobu abɔ kóō ma ō gbɛla iyi nu fiyɛ ɔfu, oŋma lɛ ō ta ɔ ɛlá kwu ɛgɛ nɛ ó nyɛ lɛ ɛgiyi Ujehofa, Ɔwɔico nōo Ya oduudu odee a. (Ujób. 37:14) Ujehofa klla lɛ uklɔ je lɛ Ujobu kóō ya. Ó da ɔ kóō gbɔɔkɔ kwɛyi aoklobiya nu nōo ya bɔbi a. (Ujób. 42:8-10) Ɛgɛnyá nɛ Ujehofa gē ta alɔ abɔ icɛ eko nɛ alɔ yɔ i má ojama obɔbi nɛhi a?
11. Ɔtu ō tu kwu ɔtu nyá nɛ Ubáyíbu gē je lɛ alɔ eko nɛ alɔ yɔ i má ojama a?
11 Ujehofa i gē kɛla lɛ alɔ eyī caa ɛgɛ nɛ ó ya mla Ujobu a ŋ, amáŋ Ó gē kɛla lɛ alɔ o bu ipu Ɛlā Ku Nu nōo wɛ Ubáyíbu a. (Uróm 15:4) Ó gē ta alɔ ɔtu kwu ɔtu ŋma lɛ ō je eyiyoce ku ɛcɔbu olɔhi lɛ alɔ. Leyi má aɛlā oligii ōhī nōo yɔ ipu Ubáyíbu nōo lɔfu ta alɔ ɔtu kwu eko nɛ alɔ yɔ i má ojama. Ipu ɔkpá ihɔ, Ujehofa cokonu ka ɔdā duuma—kwu aojama obɔbi nɛhi—“í lɔfú hɛ́ alɔ ŋmá ihɔtū kú [nu] . . . glá ŋ́.” (Uróm 8:38, 39) Ó klla cɛ lɛ alɔ le jé kpɔcii lɛyikwu ɔkɔ nɛ alɔ gē gba a, ka ó yɔ “kwu odúúdú ācɛ nēe gē hī ɔ̄ igwú ɔ̄kwɛ̄yi ā ajaajɛ.” (Aíjē 145:18) Ujehofa yɔ i da alɔ ka ɔdaŋ ku alɔ gbolo ce anuɔ, ku alɔ géē lɔtu ku ojama duuma klla dēē lɛ eeye eko nɛ alɔ yɔ i moowe gla. (1 Ukɔ́r. 10:13; Ujɛ́m. 1:2, 12) Ɛlā ku Ɔwɔico klla ta alɔ ɛlá kwu ɔ ka aojama nɛ alɔ yɔ i má a i gáā yɔ piyoo ŋ, ka ó klla le ligii a ɔdaŋ ku a lɛ ɔ miya ule nɛ Ujehofa gáā cila alɔ ogboogboo ɛcɛ a. (2 Ukɔ́r. 4:16-18) Ujehofa cokonu ka anuɔ géē je ohutu ku aojama ku alɔ cataajɛ, anu kē wɛ Usetan mla ɛjɛɛji ācɛ nōo gē gbla ɔ ya á. (Aíjē 37:10) A lɛ aɛga ku Ubáyíbu ō ta ɔtu kwu ɔtu ōhī kpo tu ɔtu, o ya ɛ kóō ta uwɔ abɔ lɔtu ku ojama ku ɛcɔbu ɛ?
12. Ɔdi nɛ Ujehofa leyice ku alɔ ya, ɔdaŋ ku alɔ dɔka ō lɛ itene lɔɔlɔhi ŋma Ɛlā ku nu a?
12 Ujehofa leyice ku alɔ cika ō lɛ eko taajɛ ō klɔcɛ ku Ubáyíbu ojigogo klla gbɛla lipu lipu tu aɔda nɛ alɔ jé a. Ɔdaŋ ku alɔ bi aɛlā nɛ alɔ nwu a le yuklɔ, ɔtu okpoce ku alɔ géē lɔfu fiyɛ, alɔ klla géē tubla Adā alɔ nōo yɔ ɔkpanco a ajaajɛ fiyɛ. Ɛnyā kē i lɛ ɔfu tu alɔ iyē ō lɔtu ku ojama. Ujehofa klla gē je alelekwu ihɔ ku nu lɛ ācɛ nōo gē gbolo ce Ɛlā ku nu a. Alelekwu ihɔ a kē lɛ “ɔfú nɛ̄ɛ̄nɛ̄hi” tu alɔ iyē o lɔtu ku ojama gla.—2 Ukɔ́r. 4:7-10.
13. Ɛgɛnyá nɛ ɔdole ku ɛlā ku Ɔwɔico nɛ “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a gē ta alɔ abɔ lɔtu a?
13 Oŋma lɛ otabɔ ku Ujehofa, “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a gē ya aɔkpa alɛwa, auvidio, mla aije nōo gē ta alɔ abɔ lɛ ɔtu okpoce olɔfu klla yɔ kwu Ujehofa ajaajɛ. (Umát. 24:45) Ó cɛgbá ku alɔ bi aɔda nɛ Ujehofa gē je lɛ alɔ nyā le yuklɔ lɔɔlɔhi. Ó gboji ɛ ŋ, ɔyinɛ alɔ nɔnya éyi ŋma United States ka ɛjɛɛji ɔdole ku ɛlā ku Ɔwɔico a jɛ anuɔ eyī nɛhi. Ó kahinii: “Ɛpla ihayi ofu ɛpa (40) nɛ um yɔ i gba Ujehofa ɛ̄gbā nyā, n má ojama ɛyɛɛyɛyi lɛyikwu ō hayi kpaakpa ku um ɛ.” Ɔyinɛ alɔ nyā má ojama obɔbi alɛwa—ɔcɛ éyi nɛ ejé lɛ ɔ kwu nōo yɔ i pɛ umoto a gā lɛ upapa nɛhi ku nu ŋmo, ɛ́nɛ́ nu mla ada nu gbɔɔ ō doōcē nɛhi klla gekwu, anu abɔyi klla lɛ ōcē ku ukansa igbo ɛpa ɛ. Ɔdi ta ɔ abɔ kóō lɔtu a? Ó kahinii: “Ujehofa leyikwu um eko doodu. Ɔdole ku ɛlā ku nu nɛ ó humayi je lɛ alɔ, o bu ipu ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī a humayi ta um abɔ lɔtu. Ohigbu ɛnyā, ɔtu gē ya um bɛɛka Ujobu nōo kahinii: ‘Jāā gbéeko nɛ̄ ikwū ŋmó um, ń gáā [habɔ uce okpaakpa mɛmla ɔkwɛyi ta gboogboo] ŋ́.’ ”—Ujób. 27:5.
Ɛgɛnyá nɛ alɔ lɔfu wɛ ɔhā lɛ ācɛ ɔhá ipu ujɔ a? (Má ogwotu ɔmɛ 14)
14. Ɛgɛnyá nɛ Ujehofa gē bi ayinɛ ipu ujɔ le ta alɔ abɔ eko nɛ alɔ yɔ i má ojama a? (1 Ācɛ Utesaloníka 4:9)
14 Ujehofa le nwu ācɛ ɔlɛ nu ō yihɔtu iyi uwa klla ta iyi uwa ɔtu kwu ɔtu eko ku unwalu. (2 Ukɔ́r. 1:3, 4; jé 1 Ācɛ Utesaloníka 4:9.) Oŋma lɛ ō yɛce ocabɔ ku Ɛlihu, ayinɛ alɔ kwu acɛnya mla acɛnyilɔ gē ya ɔtu caca, ō ta alɔ abɔ hayi kpaakpa eko nɛ alɔ yɔ i má unwalu. (Ācot. 14:22) Ocabɔ mafu, leyi yɛ ɛgɛ nɛ ujɔ ku ɔyinɛ alɔ nɔnya Diane ta ɔ ɔtu kwu ɔtu klla ta ɔ abɔ kóō tubla Ujehofa ajaajɛ igbihi nɛ ɔba nu gā lɛ unwalu ku ɔkpiye nɛhi éyi lɛ a. Diane kahinii: “Ó tɔɔtɛ fluflu ŋ. Amáŋ alɔ má abɔ olɔfu ku Ujehofa mla ihɔtu ku nu ipu aɔya olɔnɔ ɔɔma. Ujɔ ku alɔ ya ɔdā alɛwa ō ta alɔ abɔ. Ayinɛ wa gā má alɔ, é gwo uwaya fu alɔ, klla kwu alɔ ba ɔtu, ɛjɛɛji ɛnyā ta alɔ abɔ lɔtu nɛhi. Abɔ ń jé ō pɛ umoto ŋ ma, ayinɛ ā gē bi um gā ōjila ku ujɔ mla ɔna ō ta eko nɛ um nyɔ gla.” Ó wɛ ɔhā ō lɛ ɛdɔ ayinɛ ɛgɛnyā ipu ujɔ!
ƐGƐ NƐ UJEHOFA YIHƆTU ALƆ KLLA GĒ TEYI TU ALƆ A JƐ ALƆ EYĪ
15. Ɔdiya nɛ alɔ jé kpɔcii ku alɔ lɔtu ku ojama gla a?
15 Ɛjɛɛji alɔ gē má ɛdɔ ku ojama éyi amāŋ ɔhá. Naana kpɔ a, ɛgɛ nɛ alɔ má ɛ ma, alɔ i gáā yɔ ofoofu alɔ eko nɛ alɔ yɔ i má ojama ŋ. Bɛɛka adā nōo yihɔtu ayipɛ ɔlɛ nu a, Ujehofa gē leyi kwu alɔ eko doodu. Ó yɔ kwu alɔ ajaajɛ, le tutu ō po ɔkɔ ō gba ku alɔ klla yɔ i ya ɔtu caca ō ta alɔ abɔ. (Ayis. 43:2) Alɔ jé kpɔcii ka alɔ géē mahayi eko ku unwalu gla, ohigbu ka Ujehofa yɔ i je aɔdā nɛ alɔ cɛgbá o ya ɛɛ ku alɔ lɔtu a lɛ alɔ. Ó ya alɔ ɛhi ɛyɛɛyɛyi bɛɛka ɔkɔ ō gba, Ubáyíbu, ɔdole ku ɛlā ku nu nōo yɔ caba cabɔ, mla ayinɛ nōo lɛ ihɔtu o ya ɛɛ kéē ta alɔ abɔ eko ku unwalu.
16. Ɔdi nɛ alɔ cɛgbá o ya ɛɛ ku alɔ gɔbu yɔ i jɔɔnyɛ ihɔtu ku Ɔwɔico a?
16 Ó jɛ alɔ eyī nɛhi ō lɛ Adā ɔkpanco nōo gē leyikwu alɔ! “Alɔ gwéeyē ohígbū . . . Óndú ā.” (Aíjē 33:21) Ɛgɛnyá nɛ alɔ lɔfu mafu lɛ Ujehofa ka ɛgɛ nɛ ó yihɔtu klla lɛ ɛlá wu alɔ a jɛ alɔ eyī a? Oŋma lɛ ō yuklɔ mla ɛjɛɛji aɔdā nɛ ó je lɛ alɔ ō ta alɔ abɔ a. Alɔ klla cɛgbá ō ya aya ku alɔ, o ya ku alɔ yɔ i jɔɔnyɛ ihɔtu ku Ɔwɔico. Ɛnyā wɛ kahinii, ɔdaŋ ku alɔ bi ɛjɛɛji ɔfu ku alɔ ceyitikwu lɛyitaajɛ lɛ Ujehofa klla ya ɔdā nōo kpaakpa ipeyi ku nu, ó géē leyi kwu alɔ ogboogboo ɛcɛ!—1 Upít. 3:12.
IJÉ ƆMƐ 30 My Father, My God and Friend
^ Alɔ cɛgbá otabɔ ku Ujehofa, o ya ɛɛ ku alɔ lɛ unwalu nɛ alɔ gē má icɛ a yale. Ikpɛyi ɛlā ō klɔcɛ nyā géē ta alɔ ɛlá kwu ɔ ka Ujehofa gē teyi ta ācɛ ɔlɛ nu. Ó jé unwalu nɛ eyeeye ku alɔ yɔ i má a, ó klla gē je ɔdā nɛ alɔ cɛgbá a lɛ alɔ, o ya ku alɔ lɛ aunwalu a yale.
^ Iye ōhī néē hi ipu ikpɛyi ɛlā nyā i wɛ iye ɔkwɔɔkwɛyi nɛ ācɛ ɔɔma gē lé a ŋ.