Bɔkwu ɛlā ŋma ɛga okpaakpa ku a klla bi ɔ le yuklɔ. Ɛlā duuma nɛ a gáā ka a kóō ŋma ipu Ubáyíbu, ɔdaŋ ka ó tɔɔtɛ, lɛ ɛlā a jé ŋma ipu Ubáyíbu ɛgɛ néē ta ɔ a. Ɔdaŋ ku a gáā kɛla lɛyikwu odee nɛ ācɛ uscience ka, ɔka nōo bɛcɛ, odee nōo ya, amāŋ, aɛlā ɔhá nōo géē jé ɛlā ku uwɔ teyi peee a, le jila taajɛ gbɔbu, ku ɛga nɛ a yɔ i bɔkwu ɛlā a ŋma a wɛ ɛga okpaakpa, ka ɔda nɛ a yɔ i jila a klla wɛ ɛpɛpɛ.

Bi aɔdā nɛ a bɔkwu nu a le yuklɔ ɔwɛ nōo cika. Ɛga ku Ubáyíbu nɛ a jé a kóō cɛtɔha mla aɛlā ohile nōo yɔ ɛgiyi ɔgba nɛ a jé a, mla ɛjɛɛji ɛlā nōo yɔ ipu Ubáyíbu, mɛmla ɛlā nōo yɔ aɔkpá mla aɔdā ɔhá nɛ “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyí” a ya a. (Umát. 24:45) Ɔdaŋ ku a kɛla lɛyikwu aɔ̄kā ŋma ɛga ɔhá, bɛɛka ɔ̄kā ŋma uredio amāŋ unewspapper, kóō wɛ ɛ̄nɛ̄ a jé ka ó kpaakpa. Amáŋ, a hii lɛyi ku ɔdā néē ta a piyabɔ ŋ, amāŋ ka ɔdā ɔhá nōo wɛ ɛyɛɛyi gwo ɔdā néē ta a ŋ.

Bi ɛlā nɛ a bɔkwu nu a le gbo juju mla ācɛ nōo yɔ i jahɔ gā uwɔ a. Ɔdaŋ ku a lɛ ɛga ku Ubáyíbu jé, amāŋ lɛ ɛga nɛ a bɔkwu ɛlā ku uwɔ ŋma a hi, da ācɛ nōo yɔ i jahɔ gā uwɔ a ɔka ipu ijeeyi amāŋ bi ocabɔ le mafu ɛlā ku uwɔ, o ya ɛɛ kéē lɛ ɛlā okpɔcii nɛ a dɔka kéē jé a jé abɔyi uwa.