Aɛga Ku Ubáyíbu Nōo Lɔfu Ta Ācɛ O Yɛce Ukraist Abɔ géē ya ɔ tɔɔtɛ ku alɔ má aɔgba ku Ubáyíbu mla aɔ̄kā ku Ubáyíbu nōo géē tu alɔ abɔ eko duuma nɛ alɔ yɔ i má unwalu a. Ó klla géē cɛ gā uwɔ má ɛga ku Ubáyíbu nōo le kpaakpa nɛ a géē bi le tu ācɛ ɔhá ɔtu kwu ɔtu, klla tu uwa abɔ ya ōmiya nōo géē je owoofu lɛ Ujehofa. Jé ikpɛyi ɛlā nōo he uwɔ ɔtu a. Eyeeye ku ikpɛyi ɛlā a lɛ aɔka nōo géē ta uwɔ abɔ, ó klla kɛla kpii lɛyikwu ɔ̄kā ku Ubáyíbu nōo tɛɛma kwu ikpɛyi ɛlā a. (Má ikpati “ Ɛgɛ Nɛ A Géē Bi Ɔkpá Nyā Le Yuklɔ A.”) Ó lɛ aafu ŋ, a géē má aɛga ku Ubáyíbu nōo géē tu uwɔ ukɔ́ klla je ɔtu ō tu lé nɛ a cɛgbá a gā uwɔ. A géē má ɛnɛɛnɛ agbenu ŋma ipu Ubáyíbu nɛ a géē kɔ mla ācɛ ɔhá. A klla géē má ukɔ́ ŋma ipu Ubáyíbu nɛ a géē bi le ta ācɛ ɔhá abɔ klla tu uwa ɔtu kwu ɔtu.

Ku ɛlā ɔkwɛyi a, ó lɛ aɛga ku Ubáyíbu alɛwa ɔhá nōo tɛɛma kwu eyeeye ku ikpɛyi ɛlā a nōó yɔ ipu ɔkpá nyā ŋ. É ya ɔkpá nyā o ya ɛɛ kóō ta uwɔ abɔ má aɛga ku Ubáyíbu nōo lɔfu ta uwɔ abɔ fiyɛ duu a, a kē lɔfu bi aɔdā ō bi le jila ɛlā má ɔhá le yuklɔ ɔdaŋ kóō cɛgbá. (Aíit. 2:​1-6) O ya ɛɛ ku a nwu ɛlā tōōtɔ̄ɔ̄ lɛyikwu ɛga ku Ubáyíbu, má aya ku “Scriptures Explained” ipu Ɔkpá Nɛ Ācɛ Ocijali Ku Ujehofa Gē Bi Le Jila Ɛlā Má amāŋ Watch Tower Publications Index. Ceyitikwu ku a jila aɔkpá ɛpɛpɛ má o ya ɛɛ ku ɔdā nɛ a jɛyi nu a kóō cɛtɔha mla ɛlā ō nwu ku Ubáyíbu nōo le kpaakpa a.

Ɔkpá ku Aɛga Ku Ubáyíbu Nōo Lɔfu Ta Ācɛ O Yɛce Ukraist Abɔ a kóō tu uwɔ abɔ má ijeeyi, ɔdooje mla ō jɛyi ku ɛlā nōo yɔ ipu Ubáyíbu a. Abɔ a yɔ i bi ɔkpá nyā le yuklɔ a, ó géē cɛ gā uwɔ jé kpɔcii ka “ɛlā kú Ɔwɔicō yēeyī, ó klla lɔfú.”—Uhíb. 4:12.