ƐLĀ Ō NWU ƆMƐ 17

Ɔdi Nɛ Ubáyíbu Da Alɔ Lɛyikwu Ujisɔsi A?

GBƆƆ

Eko duuma nɛ alɔ gbɔɔ ō nwu ɛlā lɛyikwu aɔdā nɛ Ujisɔsi ka mla aɔdā nɛ ó ya ipu ɛcɛ nyā a, alɔ géē wa i jé auce ō ya ku nu nōo géē cɛ lɛ alɔ tubla ɔ ajaajɛ mla Adā nu Ujehofa duu. Ɔdi wɛ ɛnɛɛnɛ uce ō ya nyā ōhī a? Ɛgɛnyá nɛ alɔ lɔfu gbla Ujisɔsi ya ipu oyeeyi ku alɔ a?

1. Ɔwɛ ɛgɛnyá nɛ Ujisɔsi lɛbɛɛka Adā nu a?

Ipu ɔkpanco, Ujisɔsi má Adā nu nōo lɛ ihɔtu a klla nwu ɛlā ŋma ɛgiyi nu ihayi ubiliyɔn alɛwa ɛ. Ohigbu ɛnyā a, ó gē gbɛla, gē jé ɛgɛ nɛ ɔtu gē ya ɔcɛ klla ya odee bɛɛka adā nu a duu. (Jé Ujɔ́ni 5:19.) Aku ɔkwɛyi a, Ujisɔsi gbla uce ō ya ku Adā nu yiili jaa gbeeko nɛ anu abɔyinu kahinii: “Ɔ̄cɛ nōo lɛ um má, lɛ Ádā ā má ɛɛ́.” (Ujɔ́ni 14:9) Abɔ a yɔ i nwu ɛlā lɛyikwu auce ō ya ku Ujisɔsi a, a gē wa i jé Ujehofa lɔhi fiyɛ. Ocabɔ mafu, ɔwɛ nɛ Ujisɔsi gē lɛ ɛlá wu ācɛ a géē mafu gā uwɔ ɛgɛ nɛ Ujehofa lɛ ɛlá wu uwɔ a duu.

2. Ɛgɛnyá nɛ Ujisɔsi mafu kóō yihɔtu Ujehofa a?

Ujisɔsi kahinii: “N géē yá ɔdā nɛ̄ Ádā ā tíne ka n yá ā, cɛɛ kú ācɛ kéē le jé ka n yíihɔtū tá Ádā um.” (Ujɔ́ni 14:31) Eko nɛ Ujisɔsi yɔ ɛcɛ nyā a, ó mafu ihɔtu nɛhi lɛ Adā nu ŋma lɛ ō lɛyitaajɛ lɛ ɔ eko nōó kóō lɔnɔ tu ɔ naana. Abɔ Ujisɔsi yihɔtu Adā nu nɛɛnɛhi a, ó gē kɛla lɛyikwu ɔ eko doodu klla gē ta ācɛ ɔhá abɔ kéē wa i lɛ ɛma mla Adā nu.—Ujɔ́ni 14:23.

3. Ɛgɛnyá nɛ Ujisɔsi mafu kóō yihɔtu ācɛ a?

Ubáyíbu da alɔ ka “ɔtū kú ācɛ” gē he Ujisɔsi. (Aíita 8:31) Ó mafu ihɔtu ŋma lɛ ō je otabɔ lɛ ācɛ mla ō tu uwa ɔtu kwu ɔtu. Ó ya uklɔ idaago nōo mafu ɔfu mla eyinyinyi ku nu. (Umáki 1:40-42) Ó ya odee mla ɛjɛɛji ācɛ ɔwɛ ogbonɛnɛ, ó klla meyigoo ku ɔcɛ duuma ŋ. Ɛlā ku nu je ɔtoole mla eyiyoce lɛ ɛjɛɛji ācɛ nōo jahɔ tu ɔ ɔkwɔɔkwɛyi a. Ujisɔsi le tutu ō má owe klla gekwu ohigbu ihɔtu nɛ ó lɛ lɛ alɛɛcɛ a. Amáŋ, ó yihɔtu ācɛ nōo gē yɛcɛ ɛlā ō nwu ku nu fiyɛ.—Jé Ujɔ́ni 15:13, 14.

JÉ GƆBU

Nwu ɛlā tōōtɔ̄ɔ̄ lɛyikwu uce ō ya ku Ujisɔsi. Ku a klla lɛyi yɛ ɛgɛ nɛ a géē mafu ihɔtu klla nwula abɔ ɛgɛ nɛ Ujisɔsi ya a.

4. Ujisɔsi yihɔtu Adā nu

Ocabɔ ku Ujisɔsi nwu alɔ ɛgɛ nɛ alɔ géē mafu ihɔtu lɛ Ɔwɔico. Jé Ulúku 6:12 mla Ujɔ́ni 15:10; 17:26. Igbihi nɛ aa lɛ aɛga ku Ubáyíbu nyā jé, aa kɔka lɛyikwu ɔka nyā:

Ɛgɛnyá nɛ alɔ géē gbla Ujisɔsi ō mafu ihɔtu lɛ Ujehofa a?

Ujisɔsi yihɔtu Adā nu nōo yɔ ɔkpanco a klla kɛla lɛ ɔ igbalɛwa ipu ɔkɔ ō gba

5. Ujisɔsi lɛ ɛlá wu ācɛ nɛ ɛgbá ce uwa a

Ujisɔsi gē lɛ ɛgbá ku ācɛ ɔhá ta aflɛyi gbɔbu lɛ aku nu. Eko nɛ ɛ̄jɛ̄ kóō le jɛ ɔ naana a, ó gē bi eko mla ɔfu ku nu le je otabɔ lɛ ācɛ ɔhá. Jé Umáki 6:30-44, cɛɛ ku aa kɔka lɛyikwu aɔka nōo ba nyā:

Ipu ɛga ku Ubáyíbu nyā, ɔwɛ ōhī nyá nɛ Ujisɔsi mafu kóō lɛ ɛlá wu ācɛ ɔhá a?—Má ɔgba 31, 34, 41, mla 42.
Ɔdi lɛ abɔ kwu Ujisɔsi ɔtu kóō ta ācɛ abɔ a?—Má ɔgba 34.
Ohigbu ka Ujisɔsi gē gbla uce ō ya ku Ujehofa a, ɔdi nɛ ɛnyā nwu alɔ lɛyikwu Ujehofa a?
Ɔwɛ ōhī nyá nɛ alɔ lɔfu gbla Ujisɔsi ya ipu ɔwɛ nɛ ó gē lɛ ɛlá wu ācɛ ɔhá a?

6. Ujisɔsi gē nwula abɔ

Naana nɛ Ujisɔsi i lɛ ɔdā agbenu alɛwa ŋ ma a, ó kɔ ɔdā nɛ ó lɛ a mla ācɛ ɔhá. Ó kē ta alɔ ɔtu kwu ɔtu ku alɔ nwula abɔ duu. Jé Úklɔ́ kú Ācotɛ̄hɔ̄ 20:35, cɛɛ ku aa kɔka lɛyikwu ɔka nyā:

Ɛgɛ nɛ Ujisɔsi ka a, ɛgɛnyá nɛ alɔ gáā lɛ eeye a?

Lɛ UVIDIO nyā mafu, cɛɛ ku aa kɔka lɛyikwu ɔka nyā.

UVIDIO: ‘Eeye Yɔ Lɛ Ɔcɛ Nōo Gē Je A Fiyɛ Ɔcɛ Nōo Gē Miyɛ A’—Aya Ō Kpii Ku Nu (4:00)

Ɔwɛ ōhī nyá nɛ alɔ lɔfu je, naana nɛ alɔ i kóō lɛ aɔdā agbenu nwune ŋ ma?

A jé?

Ubáyíbu nwu alɔ ku alɔ gbɔɔkɔ lɛ Ujehofa ō bu iye ku Ujisɔsi. (Jé Ujɔ́ni 16:23, 24.) Eko duuma nɛ alɔ gbɔɔkɔ lɛ a, alɔ yɔ i mafu ahinya ō ta ku ɔdā nɛ Ujisɔsi ya o ya ɛɛ ku alɔ kwu piya ɔya ku Ujehofa a.

ĀCƐ ŌHĪ GĒ KA: “Ɔwɔico i gē lɛ ɛlá wu owe nɛ alɔ gē má a ŋ.”

Ohigbu ka Ujisɔsi gē gbla uce ō ya ku Adā nu a, ɛgɛnyá nɛ ó mafu lɛ alɔ ka Ujehofa gē lɛ ɛlá wu alɔ a?

ƆDI NƐ A NWU A?

Ujisɔsi yihɔtu Ujehofa klla yihɔtu ācɛ duu. Abɔ a yɔ i jé Ujisɔsi a ɛgɔɔma nɛ a gáā yɔ i jé Ujehofa tōōtɔ̄ɔ̄ duu a, ohigbu ka Ujisɔsi lɛbɛɛka Adā nu a.