1.  Ō Jé Ubabilɔn Nɛhi A

2.  Eko Nyá Nɛ Umɛsayiya Wa Ipu Ɛcɛ A?

3.  Ōmiya Lɛyikwu Ɛcí Ō Miyɛ Nōo Lɛ Ō Ya Mla Oyi

4.  Ɔba Mla Ɔnyā Ō Kɔ Hɛ Iyi Uwa Ta

5.  Aɛ̄cī Ku Eeye Ō Gwo Mla Ucɛ Ku Uwa

6.  Ōcē Nɛ Ɔcɛ Lɔfu Kpo Gla

7.  Ɔhi Ō Ta Mla Ɛpɔ Ō Ka Gwo

 1. Ō Jé Ubabilɔn Nɛhi A

Ɛgɛnyá nɛ alɔ jé ka “Ubábīlɔn Nɛ̄hi” a kwɛyi ɛjɛɛji aɔwɛ ō gba ɛ̄gbā ɛkɛmgbɛ a? (Ɔdā Nēé Mafú Lɛ Ujɔ́ni 17:5) Leyi yɛ aɔdā nōo ba nyā:

• Ó yɔ klla i yuklɔ ɛga doodu ipu oduudu ɛcɛ. Ubáyíbu ka Ubabilɔn Nɛhi a ciice ɛyi “aɛ́wa kú ācɛ aéwo.” Ɔnyā a lɛ “igelī olɔfu nɛ̄hi nɛ̄ ɔcɛ́ kú nū gē gbō aɔ́cɛ́ kú aéwɔhá kú ɛcɛ ā.”—Ɔdā Nēé Mafú Lɛ Ujɔ́ni 17:15, 18.

• Ɔnyā a i gáā wɛ ɔfu ku imeli amāŋ ɔhi ō ta gla ŋ. “Aɔ́cɛ́ kú ɛcɛ ā” mla “ācotɔ́sú” i gáā cataajɛ mla ɔnyā a ŋ.—Ɔdā Nēé Mafú Lɛ Ujɔ́ni 18:9, 15.

• Ɔwɛ ku nu i cɛtɔha mla ɔwɛ ku Ɔwɔico ŋ. É gē hi ɔ ka akwuna ohigbu kóō gē yuklɔ tɔha mla ācɛ igɔmɛnti o ya ɛɛ kóō lɛ ije amāŋ aɔda agbɛnu ɔhá. (Ɔdā Nēé Mafú Lɛ Ujɔ́ni 17:1, 2) Ó gē plla ɛjɛɛji ācɛ ku aéwo. Anu ya nɛ ɛyinɛhi ku uwa kē kwū a.—Ɔdā Nēé Mafú Lɛ Ujɔ́ni 18:23, 24.

Le cigbihi gā ɛlā ō nwu ɔmɛ 13 ogwotu ɔmɛ 6

 2. Eko Nyá Nɛ Umɛsayiya Wa Ipu Ɛcɛ A?

Ubáyíbu ka taajɛ ka alaadi ofu ɛta ce ahaanɛ géē wa i le gla gbɔbu ɛɛ ka Umɛsayiya kóō wa.—Jé Udánīyɛ̄lu 9:25, NW.

• Eko nyá nɛ alaadi 69 a gbɔɔ a? Ipu ihayi ku 455 B.C.E. Eko ɔɔma nɛ Unehemiya wa Ujerusalɛm kóō gáā lɛ ɔdɔ ku igeli a “túgwó igbɔhá ā.”—Udánīyɛ̄lu 9:25, NW; Unehemíya 2:1, 5-8.

• Ɛgɛnyá nɛ alaadi 69 a likpo lɛ a? Ipu akacɛ ku Ubáyíbu ōhī, é gē bi ɛ̄cī éyi yuklɔ kwɛyi ihayi éyi. (Áluka 14:34; Isíkɛ̄lu 4:6) Ɔɔma mafu ku alɔ lɛ ihayi ahaapa ipu alaadi éyi. Ipu akacɛ nyā, alaadi 69 a géē wɛ ihayi 483 (69 x 7).

• Eko nyá nɛ alaadi 69 a wa oŋmɛyi a? Ɔdaŋ ku a lɛ ihayi 483 gbaluka ŋma 455 B.C.E. ó géē bi alɔ wa ihayi ku 29 C.E. a Ɛnyā kē wɛ ihayi piii nɛ Ujisɔsi ya ubatisim klla je piya Umɛsayiya a!—Ulúku 3:1, 2, 21, 22.

Le cigbihi gā ɛlā ō nwu ɔmɛ 15 ogwotu ɔmɛ 5

 3. Ōmiya Lɛyikwu Ɛcí Ō Miyɛ Nōo Lɛ Ō Ya Mla Oyi

Ó lɛ ōmiya ɛyɛɛyɛyi lɛyikwu ɛcí ō miyɛ nōo lɛ ō ya mla ō bi oyi le yuklɔ. Ōhī ku uwa i wɛ ɔdā nɛ Ɔcɛ O Yɛce Ukraist cika ō ya ŋ duudu. Ocabɔ mafu, ācɛ ōhī gē da oyi ku uwa. Ācɛ ōhī gē dɔka kéē lɛ oyi ku uwa pi klla kwu ɔ gbotu néē géē bi le yuklɔ igbihaajɛ, eko duuma néē cɛgbá ō ya ɔparesɔn.—Oblatūkíne 15:23.

Naana kpɔ a, ó lɛ ōmiya ɛyɛɛyɛyi lɛyikwu ɛcí ō miyɛ nōo lɛ ō ya mla ō bi oyi nɛ Ɔcɛ O Yɛce Ukraist cika ō miya abɔyinu. É kē lɛ ō ya mla u blood tests, hemodialysis, hemodilution, amāŋ ō bi u cell-salvage amāŋ heart-lung bypass machine le yuklɔ. Eyeeye ku Ācɛ O Yɛce Ukraist cika ō miya abɔyi nu ɛgɛ néē géē bi oyi ku nu le yuklɔ eko duuma nōó gáā miyɛ ɛcí, ya utest, amāŋ ya ɔdā duuma ipu inɛci nōo géē cɛgbá kéē pi oyi ku nu ō bi le yuklɔ ɔkwɔɔkwu ɔɔma. Eyeeye ku aidɔkitɔ lɛ ɔwɛ ɛyɛɛyɛyi néē gē je ɛcí lɛ ācɛ. Ohigbu ɛnyā, gbɔbu ɛɛ ku Ɔcɛ O Yɛce Ukraist ka ó nyɔ gā ya aparesɔn, utest, amāŋ u therapy, ó cika ō lɛ ɔka da idɔkitɔ a o ya ɛɛ kóō je ɛgɛ nɛ ó gáā bi oyi ku nu le yuklɔ a. Leyi yɛ aɔka nōo ba nyā:

• Ɔdaŋ néē kē lɛ oyi pi ŋma ɔkpiye ku um nɛ oyi ɔɔma i pɛ ipu ɔkpiye ku um ŋ eko kpii bɛɛ? Ɔtu ku um géē jɛga gā um ō leyi má oyi ɔɔma kóō wɛ ipu oyi ku um kpɔ ɛ, kɛɛ ka ɔtu ku um géē ya um kéē lɛ oyi a “pīya klá ajɛ”?—Oblatūkíne 12:23, 24.

• Ɔdaŋ ka eko nɛ um nyɔ gā miyɛ ɛcí a, néē lɛ oyi pi ŋma ɔkpiye ku um, lɛ ɔ tu ya klla kwu ɔ u pi tu ɔkpiye ku um cigbihi bɛɛ? Ŋma ɔdā nɛ um nwu ŋma ipu Ubáyíbu ɛ ma, ɔtu ku um géē junwalu gā um? Kɛɛ ku um géē gɔbu miyɛ oyi a cigbihi wa ipu ɔkpiye ku um kpɔ?

Le cigbihi gā ɛlā ō nwu ɔmɛ 39 ogwotu ɔmɛ 3

 4. Ɔba Mla Ɔnyā Ō Kɔ Hɛ Iyi Uwa Ta

Ubáyíbu da ɔba mla ɔnyā ka é hii kɔ hɛ iyi uwa ta ŋ. Ó klla lɛ ɔ ta uwa eyī peee ka ɔdaŋ kéē le kɔ hɛ iyi uwa ta, oduuma ku uwa i lɛ íkwu ō lɛ obiye ɛyipɛ ŋ. (1 Ācɛ Ukɔ́rīnti 7:10, 11) Naana kpɔ a, ó lɛ āhɔ̄ ōhī nɛ Ācɛ O Yɛce Ukraist lɔfu gbɛla ō kɔ hɛ iyi uwa ta gla.

• Ó kweyigede ka anuɔ i gā ta ācɛ ɔlɛ anuɔ abɔ ŋ: Ɔdaŋ ka ɔba ta ō je ɔdā agbenu nɛ ācɛ ɔlɛ nu cɛgbá a lɛ uwa jaa gbeeko nɛ ɔdole amāŋ ije duuma i yɔ lɛ uwa gɛ ŋ.—1 Utímōti 5:8.

• Ijē ō ŋmo: Unu ō nu jaa gbeeko nɛ oyeeyi ku ɔba amāŋ ɔnyā gáā kwu ikwū ajaajɛ.—Ācɛ Ugalésīya 5:19-21.

• Ɔdaŋ ka ó géē ya ku ɛma ku ɔcɛ mla Ujehofa kóō mɛ: Ɔba amāŋ ɔnyā nōo yɔ i ya kóō je lɛ lɔnɔ ta ɔmpa nu ō gba Ujehofa ɛ̄gbā.—Úklɔ́ kú Ācotɛ̄hɔ̄ 5:29.

Le cigbihi gā ɛlā ō nwu ɔmɛ 42 ogwotu ɔmɛ 3

  5. Aɛ̄cī Ku Eeye Ō Gwo Mla Ucɛ Ku Uwa

Ācɛ O Yɛce Ukraist i gē lɛ abɔ ipu aɛ̄cī ku eeye ō gwo mla ucɛ ku uwa nōó gē he Ujehofa ɔtu ŋ ma. Amáŋ, eyeeye ku Ācɛ O Yɛce Ukraist géē bi ɛlā nōó nwu ŋma Ubáyíbu a le miya ɔdā nōó géē ya eko nɛ ācɛ ɔhá yɔ i ya aɛ̄cī ku eeye ō gwo mla ucɛ ku uwa. Leyi yɛ aocabɔ nyā.

• Ɔdaŋ ku ɔcɛ lɛ okonu hɛ tu uwɔ nōo tɛɛma kwu ɛ̄cī ku eeye ō gwo mla ucɛ ku nu. A lɔfu da ɔ kahinii: “Ahinya.” Ɔdaŋ ku ɔcɛ ɔɔma dɔka ō jé gɔbu, a lɔfu da ɔ ɔdā nōo ya nɛ á gē ya ɛ̄cī ku eeye ō gwo mla ucɛ ku nu ŋ ma.

• Obiye ku uwɔ nōó wɛ ɔcɛ ocijali ŋ, lɛ uwɔ higwu ku a gáā lé ɔdole tɔha mla ācɛ apɔlɛ ku nu ɛpleeko ku ɛ̄cī ku eeye ō gwo mla ucɛ ku nu. Ɔdaŋ ku ɔtu ku uwɔ jɛga gā uwɔ ō nyɔ, a lɔfu le da obiye ku uwɔ taajɛ ka ɔdaŋ kéē gbɔɔ ō ya ucolo duuma nōo tɛɛma kwu ɛ̄cī ku eeye ō gwo mla ucɛ ku nu ɛpleeko nɛ aa jila tɔha a, ku á gáā lɛ abɔ ipu nu ŋ.

• Ɔcɛ nɛ a gē yuklɔ lɛ ɔ a lɛ ɛhi ya uwɔ amāŋ lɛ ɛga je gā uwɔ ŋma uklɔ ɛpleeko ku ɛ̄cī ku eeye ō gwo mla ucɛ ku nu. A cika ō ta? Ó wɛ o piii ŋ. Ɔcɛ nɛ a gē yuklɔ lɛ ɔ a ya uwɔ ɛhi amāŋ jɛga gā uwɔ ŋma uklɔ ohigbu ɛ̄cī ku eeye ō gwo mla ucɛ ku nu nɛɛ, kɛɛ ka ó ya uwɔ ɛhi a amāŋ je ɛga gā uwɔ ŋma uklɔ ohigbu ka uklɔ olɔhi ku uwɔ jɛ ɔ eyī?

• Ɔcɛ lɛ odee je ya uwɔ ɛhi ɛpleeko ku ɛ̄cī ku eeye ō gwo mla ucɛ ku nu. Ɔcɛ nōo je odee ya uwɔ ɛhi a lɔfu kahinii: “N jé ku á gē ya ɛ̄cī ku eeye ō gwo mla ucɛ ku nu ŋ, amáŋ, n dɔka ku a miyɛ odee nyā.” Ekoohi, ɔcɛ ɔɔma yɔ i gbonɛɛnɛ gā uwɔ anca nɛ. Abɔ ɔhá ku nu, ó lɛ ɔdā duuma nōo cɛ gā uwɔ gbɛla kóō yɔ i jé ɔtu okpoce ku uwɔ má amāŋ ó dɔka ku a lɛ abɔ ipu ɛ̄cī ku eeye ō gwo mla ucɛ ku nu a nɛɛ? Ɔdaŋ ku a leyi yɛ aɛlā nyā kpɛmm, a géē miya abɔyi uwɔ ɔdaŋ ku a géē miyɛ ɛhi a. Ipu ɛjɛɛji ōmiya ku alɔ, alɔ i dɔka ō lɛ ɔtu ō bɛɛpa ŋ. Amáŋ, alɔ tine ō hayi kpaakpa lɛ Ujehofa.—Úklɔ́ kú Ācotɛ̄hɔ̄ 23:1.

Le cigbihi gā ɛlā ō nwu ɔmɛ 44 ogwotu ɔmɛ 1

 6. Ōcē Nɛ Ɔcɛ Lɔfu Kpo Gla

Ohigbu ku alɔ yihɔtu ācɛ a, alɔ gē leyi kwɛɛcɛ lɔɔlɔhi ku alɔ hii kpo ōcē ta ācɛ ɔhá ŋ. Ɛnyā kē wɛ ɔkwɛyi ɔdaŋ ku alɔ lɛ ōcē nɛ ɔcɛ lɔfu kpo gla amāŋ alɔ gbɛla ku alɔ lɛ ōcē nɛ ɔcɛ lɔfu kpo gla. Alɔ gē ya ɛnyā ohigbu ukɔ́ ku Ubáyíbu nōo kahinii: “Yíihɔtū tá ācɛ ɔ́mpa uwɔ ɛ́gɛ́nɛ̄ a ī yíihɔtū tá iyī uwɔ ā.”—Ācɛ Uróm 13:8-10.

Ɛgɛnyá nɛ ɔcɛ nōo lɛ ōcē nɛ ācɛ ɔhá lɔfu kpo gla a, gáā mafu ihɔtu lɛ ācɛ ɔhá a? Ɔcɛ nōo lɛ ōcē ɛgɛnyā i cika ō kwu ācɛ ɔhá bɔtu amāŋ lɛ okonu kwu uwa okonu, ohigbu ihɔtu nɛ ó lɛ lɛ uwa a ŋ. Ó kē cika ō cɔnu ŋ duu, ɔdaŋ ka ɔyinɛ duuma ta ō hi ɔ igwú wa ɔlɛ nu ohigbu ogbotu ku apɔlɛ ku nu. Gbɔbu ɛɛ ka ó kē ya ubatisim, ó cɛgbá ō le da ɔcɛ nōo gē leyikwu ōmiya ku anyakwɔcɛ ku ujɔ a lɛyikwu ōcē ku nu. Oŋma lɛ ō ya ɛgɛnyā, ó géē tɔɔtɛ kéē lɛ ōmiya ya taajɛ nōo géē gbo ācɛ ɔhá nōo géē wa i ya ubatisim a duu. Gbɔbu ɛɛ ku ɔcɛnyilɔ mɛmla ɔcɛnya kéē gbɔɔ iyawu ō lɛ iyi uwa, oduuma ku uwa nōo lɛ ɛdɔ ōcē ɛgɛnyā gbɔbu ɛɛ ma cɛgbá ō lɛ utɛst ku oyi ya. Oŋma lɛ ō ya ɛgɛnyā, a géē mafu ku á ‘gbɛla kwu aɔdā ku iyi uwɔ ofunu ŋ, amáŋ a gbɛla kwu aku ācɛ ɔhá duu.’—Ācɛ Ufílipāyi 2:4.

Le cigbihi gā ɛlā ō nwu ɔmɛ 56 ogwotu ɔmɛ 2

 7. Ɔhi Ō Ta Mla Ɛpɔ Ō Ka Gwo

Ɔdaŋ ka alɔ gē ceyitikwu ta ɛjɛɛji ɔdā nɛ alɔ cɛtɔha lɛyikwu ije mla ɔhi ō ta a taajɛ, ó géē gbo alɔ ŋma unwalu ɛyɛɛyɛyi. Alɔ kē cika ō ya lɛ a mla ayinɛ alɔ nōo wɛ Ācɛ O Yɛce Ukraist a duu. (Ujɛrɛmíya 32:9-12) Naana kpɔ a, ekoohi igbaji gē wa ɔtahɛ ku Ācɛ O Yɛce Ukraist kpɔ ohigbu ije amāŋ lɛyikwu aɔdā ɔhá. Ɔdaŋ ka ɛnyā le ya, é cɛgbá ō le ka gwo fiya fiya ɔtahɛ ku iyi uwa foofunu.

Ɛgɛnyá nɛ alɔ lɔfu ya ku unwalu nɛɛnɛhi nōo lɛ ō ya mla uwi ō wi amāŋ eko nɛ ɔcɛ lɛ iye ku alɔ biya a kóō mɛ a? (Jé Umátiyu 18:15-17.) Ujisɔsi mafu ɔwɛ ɛta nɛ alɔ cika ō yɛce a lɛ alɔ:

1. Aa ceyitikwu lɛ unwalu a kagwo ɔtahɛ ku aa foofunu.—Má ɔgba 15.

2. Ɔdaŋ ka ɔɔma i yuklɔ ŋ, da ɔcɛ éyi amāŋ ācɛ ɛpa ŋma ipu ujɔ kéē ba uwɔ iyē nyɔ.—Má ɔgba 16.

3. Ɔdaŋ ka unwalu a i kē mɛ ŋ kpɔ, eko ɔɔma nɛ a lɔfu da anyakwɔcɛ ku ujɔ lɛyikwu ɔ a.—Má ɔgba 17.

Ɔdaŋ ka ó tɔɔtɛ alɔ hii bi ayinɛ alɔ gā inɛpɔ ŋ, ohigbu ka ɔɔma lɔfu ya ku ācɛ kóō gbɛla obɔbi lɛyikwu Ujehofa mla ayinɛ ipu ujɔ. (1 Ācɛ Ukɔ́rīnti 6:1-8) Naana a, ó lɛ ɛlā ōhī nɛ alɔ cɛgbá ō kagwo inɛpɔ. Ocabɔ mafu aodee bɛɛka: ɔkpá ku ɔnyā ō ta, ɛpɔ ku ɔcɛ nɛ ayi géē yɔ mla ɔ, ije nɛ ɔba cika ō yɔ i je lɛ ɔnyā nɛ ó lɛ gbɔbu amáŋ nɛ ó ta kóō je lɛ ɔ, eko nɛ ukɔmpeni nɛ a lɛ oyeeyi amāŋ aɔdā agbenu ku uwɔ tu uwa abɔ a ta ō gba ije néē cika ō gba gā uwɔ amāŋ ācɛ apɔlɛ ku uwɔ, eko nɛ ɔcɛ amāŋ ígwu ku ācɛ lɛ ije kpla ŋma ubanki amāŋ ukɔmpeni néē má gba ŋ, eko nɛ ukɔmpeni kéē lɛ ije kpla ŋma ubanki néē má gba ŋ amāŋ ō je aɔda agbenu ku ɔcɛ nōo kwū a kɔ lɛ ācɛ nɛ ɔcɛ ɔɔma ta iye ku uwa gbɔbu ɛɛ kóō kwū a. Ɔcɛ O Yɛce Ukraist duuma nōo nyɔ gā inɛpɔ o ya ɛɛ kóō lɛ aɛlā ɛgɛnyá kagwo ipu ɛbɔ a, i biya íne ku Ubáyíbu duuma ŋ.

Ɔdaŋ ka Ɔcɛ O Yɛce Ukraist éyi lɛ ɔdā obɔbi nɛɛnɛhi ya bɛɛka ō hɛ ɔcɛ baajɛ, ō cikpo ɔyipɛ nɛ̄ŋcɛ́, ō ya ɔcɛ agbe, ō wi uwi amāŋ lɛ ɔcɛ ŋmo, Ɔcɛ O Yɛce Ukraist ɔhá nōo kpo ɛpɔ ku ɛlā a lɛ aigɔmɛnti a i biya íne ku Ubáyíbu duuma ŋ.

Le cigbihi gā ɛlā ō nwu ɔmɛ 56 ogwotu ɔmɛ 3