ƐLĀ Ō NWU ƆMƐ 58
Hayi Kpaakpa Lɛ Ujehofa
Ācɛ O Yɛce Ukraist ɔkwɛyi gē ceyitikwu cɛɛ kéē hii cɛ lɛ ɔdā duuma amāŋ ɔcɛ duuma ci uwa ŋma ō gba Ujehofa ɛ̄gbā ŋ. Alɔ jé ka ɛgɔɔma nōó gē ya uwɔ lɛ duu a. Ɛgɛ nɛ a hayi kpaakpa lɛ Ujehofa a wɛ ɔdā nōo jɛ ɔ eyī nɛhi. (Jé 1 Úklɔ́ kú Aɔ́cɛ́ 28:9.) Āhɔ̄ ōhī nyá lɔfu ya kóō lɔnɔ ta uwɔ ō hayi kpaakpa lɛ Ujehofa a, ɔdi kē lɔfu ta uwɔ abɔ a?
1. Ɛgɛnyá nɛ ācɛ ɔhá lɔfu ja uwɔ má lɛyikwu ō hayi kpaakpa ku uwɔ lɛ Ujehofa a?
Ācɛ ōhī géē ceyitikwu kéē ci alɔ ŋma ō gba Ujehofa ɛ̄gbā. Ɔnyɛ gē ya ɔdobɔbi ɛgɔɔma a? Ācɛ ōhī nōo nyɛɛ ŋma ipu ɔkwɛyi a gē kɛmgbɛ lɛyikwu ɔwa ku Ujehofa o ya ɛɛ ku ɔtu okpoce ku alɔ kóō kwu gbliifi. É gē hi uwa ka ācɛ nōo cigbihi kwu ɔwɛ ō gba Ujehofa ɛ̄gbā. Ó klla lɛ aotrɛyi ku ɔwɛ ō gba ɛ̄gbā ōhī nōo gē kɛla ɛkɛmgbɛ lɛyikwu alɔ, o ya ɛɛ kéē lɛ ācɛ nōó leyi kwɛɛcɛ lɔɔlɔhi ŋ ma ci ŋma ō gba Ujehofa ɛ̄gbā. Ó wɛ ɔdobɔbi nɛhi ku alɔ taafu mla ācɛ nōo gē bɛyikwu alɔ a, ō jé ɔkpá ku uwa ɔlamu amāŋ ō jé ŋma ɛga ō kɔka, ō nyɔ gā uwɛbsaiti ku uwa amāŋ ō má auvidio ku uwa. Ujisɔsi kɛla lɛyikwu ācɛ nōo gē ceyitikwu kéē ci ācɛ ɔhá ŋma ō hayi kpaakpa gba Ujehofa ɛ̄gbā a kahinii: “Aá habɔ̄ uwā tá cīī. É wɛ aópeyī nēe ī bī aópeyī jé ɔwɛ nɛ. Ɔ́dāŋ́ ka opeyī gē bī opeyī jé ɔwɛ, uwá ɛplɛ́ɛpa géē gwōnū tá ipú ɔ̄gɔ̄.”—Umátiyu 15:14.
Ɔdaŋ ka ɔcɛ nɛ alɔ jé gbɔbu le miya ka anuɔ i dɔka ō wɛ éyi ku Ācɛ Ocijali Ku Ujehofa gɛ ŋ bɛɛ? Ó lɔfu wɛ ɔdā ō biya alɔ ɔtu nɛhi eko duuma nɛ ɔcɛ nōo kwu alɔ ajaajɛ lɛ ɛdɔ ōmiya ɛgɛnyā ya. Ɔcɛ ɛgɔɔma lɔfu kwu alɔ abɔfu ku alɔ ya ōmiya ku ɔcɛ nɛ alɔ géē hayi kpaakpa lɛ ɔ a, anu amāŋ Ujehofa. Amáŋ, alɔ cika ō le miya ō hayi kpaakpa lɛ Ɔwɔico fiyɛ ɔcɛ amāŋ ɔdā ɔhá duuma. (Umátiyu 10:37) Ohigbu ɔɔma a, alɔ gē lɛyitaajɛ lɛ ɔ́da ku Ujehofa ku alɔ hii piyatɔha mla ɛdɔ ɔcɛ ɛgɔɔma ŋ.—Jé 1 Ācɛ Ukɔ́rīnti 5:11.
2. Ɛgɛnyá nɛ ōmiya ku alɔ gē mafu ɔdaŋ ku alɔ hayi kpaakpa lɛ Ujehofa a?
Ihɔtu nɛ alɔ lɛ lɛ Ujehofa a géē ya ku alɔ hii lɛ ɔdā duuma ō ya mla ɛ̄gbā ō gba ku ɛkɛmgbɛ ŋ. Uklɔ ku alɔ, ɔwa nɛ alɔ yɔ ipu nu amāŋ ɔdā duuma ɔhá nɛ alɔ gē ya a i cika ō tɛɛma kwu ɛ̄gbā ō gba ku ɛkɛmgbɛ ŋ. Ujehofa pi alɔ ahɔ̄ kahinii: “Le bɛ̄cɛ [ŋma Ubabilɔn igeli Nɛhi a], ācɛ ɔlɛ um.”—Ɔdā Nēé Mafú Lɛ Ujɔ́ni 18:2, 4.
JÉ GƆBU
Nwu ɛgɛ nɛ á géē ya ku a hii cɛ lɛ ɔcɛ duuma ci uwɔ ŋma ō hayi kpaakpa lɛ Ujehofa ŋ. Ku a klla má ɛgɛ nɛ a géē hayi kpaakpa lɛ Ujehofa ŋma lɛ ō bɛɛcɛ ŋma Ubabilɔn igeli Nɛhi a.
3. Leyi kwɛɛcɛ ku aitica ɛkɛmgbɛ
Ɛgɛnyá nɛ alɔ cika ō ya lɛ eko duuma nɛ alɔ po ɛlā obɔbi lɛyikwu ɔwa ku Ujehofa a? Jé Aíita 14:15, cɛɛ ku aa kɔka lɛyikwu ɔka nyā:
-
Ɔdiya nɛ alɔ cika ō leyi kwɛɛcɛ, o ya ɛɛ ku alɔ hii kpɔtuce ɛjɛɛji ɛlā nɛ alɔ gē po ŋ ma?
Jé 2 Ujɔ́ni 10, cɛɛ ku aa kɔka lɛyikwu aɔka nōo ba nyā:
-
Ɛgɛnyá nɛ alɔ cika ō ya ɛlā mla ācɛ nōo cigbihi kwu ɔwɛ ō gba Ujehofa ɛ̄gbā a?
-
Ɔdaŋ ku alɔ i kóō kɛla mla ācɛ nōo cigbihi kwu ɔwɛ ō gba Ujehofa ɛ̄gbā ŋ naana, ɔwɛ ɛgɛnyá nɛ ɛlā ō nwu ku uwa lɔfu lɛ abɔ kwu alɔ iyē kpɔ a?
-
Ɛgɛnyá nɛ a gbɛla ka ɔtu géē ya Ujehofa lɛ, ɔdaŋ ku alɔ jahɔ tu ɛlā obɔbi néē ka lɛyikwu ɔ amāŋ ɔwa ku nu a?
4. Hayi kpaakpa lɛ Ɔwɔico eko duuma nɛ ɔyinɛ lɛ íne biya
Ɔdaŋ ku alɔ wa i le jé ka ɔcɛ éyi ipu ujɔ lɛ íne nɛhi éyi biya, ɔdi wɛ ɔdā nɛ alɔ cika ō ya a? Leyi yɛ ukɔ́ éyi ŋma Íne nɛ Ɔwɔico je lɛ ācɛ Isrɛlu ku ikee a. Jé Ulīfayi 5:1.
Ɛgɛ nɛ ɔgba ɔɔma ka a, ɔdaŋ ku alɔ le jé ka ɔcɛ éyi lɛ íne nɛhi éyi biya, alɔ cika ō le da anyakwɔcɛ ku ujɔ a ɔdā nɛ alɔ jé a. Amáŋ, gbɔbu ɛɛ ku a ya lɛ a, ó géē wɛ ɔdā olɔhi ku a le da ɔcɛ nōo biya íne a kóō gā ɛgiyi anyakwɔcɛ ku ujɔ nyɔ i lɛ íne nɛ ó biya a ka tɛɛcɛ lɛ uwa. Ɔdaŋ ka ó gā ɛgiyi anyakwɔcɛ ku ujɔ a nyɔ i da uwa ŋ, ihɔtu nɛ alɔ lɛ lɛ Ujehofa a géē ya ku alɔ gā ɛgiyi anyakwɔcɛ ku ujɔ a nyɔ i le da uwa. Ɛgɛnyá nɛ ikpo nɛ alɔ fu ɔɔma mafu ihɔtu ku alɔ lɛ . . .
-
Ujehofa a?
-
ɔcɛ nōo biya íne a?
-
ācɛ ɔhá nōo yɔ ipu ujɔ a?
Ɔdaŋ ku a má ɔcɛ ō yɛce Ukraist ɔmpa uwɔ yɔ ipu unwalu, ta ɔ abɔ!
5. Le bɛɛcɛ ŋma ipu Ubabilɔn igeli Nɛhi a
Jé Ulúku 4:8 mla Ɔdā Nēé Mafú Lɛ Ujɔ́ni 18:4, 5, cɛɛ ku aa kɔka lɛyikwu aɔka nōo ba nyā:
-
N lɛ abɔ ipu ɔdā duuma nōo tɛɛma kwu ɛ̄gbā ō gba ku ɛkɛmgbɛ kpɔ?
-
N wɛ ipu ɔwa duuma nōo tɛɛma kwu ɔwɛ ō gba ɛ̄gbā ɔhá?
-
Ó lɛ ɔwɛ duuma nɛ uklɔ nɛ um gē ya a gē je otabɔ lɛ ɔwɛ ō gba ɛ̄gbā ku ɛkɛmgbɛ?
-
Ó lɛ aya duuma ɔhá ipu oyeeyi ku um nɛ um cɛgbá ō lɛ iyi um fo ŋma ɔwɛ ō gba ɛ̄gbā ku ɛkɛmgbɛ?
-
Ɔdaŋ ka ohi nɛ um lɛ lɛ oduuma ku aɔka nōo ba nyā wɛ u ii, opiyabɔ nyá nɛ um cika ō ya a?
Ipu āhɔ̄ duuma, ya ōmiya nōo géē cɛ gā uwɔ lɛ ɔtu ō yeŋee klla mafu ku a hayi kpaakpa lɛ Ujehofa.
Ɔdi nɛ a géē ya ɔdaŋ kéē da uwɔ ku a da ije nɛ ɔwɛ ō gba ɛ̄gbā gē bi le je otabɔ lɛ ācɛ ɔhá a?
ĀCƐ ŌHĪ GĒ KA: “N cɛgbá ō jé ɔdā nɛ ācɛ nōo cigbihi kwu ɔwɛ ō gba Ujehofa ɛ̄gbā gē ka lɛyikwu Ācɛ Ocijali Ku Ujehofa, o ya ɛɛ ku um lɛ ɔkwɛyi a teyi peee.”
-
Ɔɔma wɛ ɔdā ijeeyi? Ɔdiya nɛ a ka lɛ a?
ƆDI NƐ A NWU A?
O ya ɛɛ ku alɔ hayi kpaakpa lɛ Ujehofa a, alɔ i cika ō piyatɔha mla ācɛ nōó hayi kpaakpa lɛ ɔ ŋ ma ŋ. Alɔ klla cika ō lɛ iyi alɔ fo ŋma ɛ̄gbā ō gba ku ɛkɛmgbɛ duudu.
Aɔka ō tu alɔ ɛlá kwu ɔdā nɛ alɔ nwu
-
Ɔdiya nɛ alɔ i cika ō má, jé amāŋ jahɔ tu ɛlā ku ācɛ nōo cigbihi kwu ɔwɛ ō gba Ujehofa ɛ̄gbā ŋ ma?
-
Ɛgɛnyá nɛ alɔ cika ō ya ɛlā mla ācɛ nōó dɔka ō wɛ Ācɛ Ocijali Ku Ujehofa gɛ ŋ ma?
-
Ɛgɛnyá nɛ alɔ lɔfu lɛyitaajɛ lɛ ahɔ̄ ō pi ō nyɛɛ ŋma ipu ɔwɛ ō gba ɛ̄gbā ku ɛkɛmgbɛ a?
JILA ƐLĀ NYĀ MÁ TŌŌTƆ̄Ɔ̄
Nwu ɔdā nɛ a géē ya eko duuma nɛ ācɛ ɔhá yɔ i kɛla ɛkɛmgbɛ lɛyikwu Ācɛ Ocijali Ku Ujehofa.
Ɛgɛnyá nɛ a géē jé ɔdaŋ ka ɔwa amāŋ ɔda ō ya éyi gē je otabɔ lɛ Ubabilɔn igeli Nɛhi a?
Ɔdi nɛ ācɛ ōhī nōo gē bɛyikwu alɔ a ya o ya ɛɛ ku ɔtu okpoce ku alɔ kóō waajɛ a?
Ipu ɔ̄kā nōo kahinii: “I Had Been Looking for God Since Childhood,” jé lɛyikwu ɛgɛ nɛ ɔcogwɛɛya ku Shinto a lɛ iyi nu fo ŋma ɔdā duuma nōo tɛɛma kwu ɛ̄gbā ō gba ku ɛkɛmgbɛ a.
