ƐLĀ Ō NWU ƆMƐ 3
Ɔkoolɔhi Nōo Yɔ Ipu Ubáyíbu A Ŋma Ɛgiyi Ɔwɔico Ɔkwɔɔkwɛyi Nɛɛ?
1. Ɛlā ku ɔnyɛ yɔ ipu Ubáyíbu a?
Ubáyíbu ka ācɛ géē lā ipu ɛcɛ nyā piyoo. Ɛlā nɛ Ubáyíbu kē ka nyā wɛ ɔkoolɔhi. (Aíjē kú Ɛ̄gbā 37:29) Aɔkpá nōo yɔ ipu Ubáyíbu a wɛ ofu ɛta ce ɛhili (66). Acɛnyilɔ ofu ɛpa (40) nɛ Ɔwɔico kē bi le ta Ubáyíbu á. Umosisi ta ɔkpá ku Ohútu gáā tu Oblatūkíne a. Ó ta ɛjɛɛji uwa ihayi ula ahata ce ofu igwo ɛhɔ (3,500) nōo gáā yɛ a. Ujɔni ta ɔkpá amoomɛ ku Ubáyíbu á, ó kē fiyɛ ihayi ula ɛnɛ ce ofu igwo ɛhɔ (1,900) nɛ ó ta ɔ a ɛ. Amáŋ, ɛlā ku ɔnyɛ nɛ ācɛ nōo ta Ubáyíbu a ta a? Ɔwɔico bi alelekwu ihɔ ku nu le da uwa ɔdā néē géē ta a. (2 Usámuwɛ̄lu 23:2) Ɔdā nōo yɔ ipu ɔtu ku Ɔwɔico néē ta a, ó wɛ ɔdā nōo yɔ ipu ɔtu ku uwa ŋ. Ó lɛ a, ɛlā ku Ujehofa yɔ ipu Ubáyíbu á.—Jé 2 Utímōti 3:16; 2 Upíta 1:20, 21.
Má uvidio nyā nōo kahinii Who Is the Author of the Bible?
2. Ɛgɛnyá nɛ alɔ jé ɔkwɔɔkwɛyi ku Ubáyíbu wɛ ɛlā ku Ɔwɔico a?
Alɔ jé ku Ubáyíbu wɛ ɛlā ku Ɔwɔico, ohigbu ku ɛjɛɛji ɛlā nɛ Ubáyíbu gē da alɔ lɛyikwu ɛcɔbu ku alɔ a wɛ ɔkwɛyi. Ó lɛ ɔcɛ duuma nōo lɔfu ya ɛnyā gla ŋ. (Ujóssuwa 23:14) Ɔwɔico foofunu nōo lɔfu fiyɛ duu a, lɔfu da alɔ ɔdā nōo géē ya ɛcɔbu gla a.—Jé Ayisáya 42:9; 46:10.
Ó lɛ ɔkpá duuma nōo lɛbɛɛka Ubáyíbu a ŋ. É lɛ Ubáyíbu ya ipu uce ɛyɛɛyɛyi klla lɛ uluula ku nu kɔ lɛ ācɛ. Naana néē ta Ubáyíbu gboji gboji ɛ ma, ɛlā nōo yɔ ipu nu a cɛtɔha mla aku usayɛnsi kpɔ. Ɔdā ɔhá wɛ kahinii, naana nɛ ācɛ nōo ta Ubáyíbu a wɛ ācɛ ofu ɛpa (40) a, ɛlā nɛ ɛjɛɛji uwa ta a cɛtɔha. * Ubáyíbu mafu lɛ alɔ peee ɛdɔ ihɔtu nɛ Ɔwɔico lɛ a, ó klla lɔfu je oyeeyi ku ɔcɛ piyabɔ ŋma obɔbi gā olɔhi. Aɔdā nōo ba nyā ya ɛɛ nɛ ācɛ alɛwa kpɔtuce ku Ubáyíbu wɛ ɛlā ku Ɔwɔico á.—Jé 1 Ācɛ Utesaloníka 2:13.
Má uvidio nyā nōo kahinii How Can We Be Sure the Bible Is True?
3. Ɔdi nɛ Ubáyíbu kɛla lɛyikwu ɔ a?
Ubáyíbu kɛla lɛyikwu ɔdā olɔhi nɛ Ɔwɔico géē ya lɛ alɔ a. Ó da alɔ ɔdā nōo ya ɛɛ nɛ alɔ i lā ipu uparadais nɛ Ɔwɔico je Adam mɛmla Iifu ta ipu nu a ŋ. Ó klla da alɔ ɛgɛ nɛ Ɔwɔico géē je ɛcɛ ku alɔ nyā piya Uparadais kpɔ.—Jé Ɔdā Nēé Mafú Lɛ Ujɔ́ni 21:4, 5.
Ubáyíbu klla lɛ íne mla ukɔ́ alɛwa. Íne mla aukɔ́ nyā lɔfu ta alɔ abɔ ku alɔ ya lɔhi fiyɛ ipu oyeeyi ku alɔ. Ubáyíbu lɛ aocabɔ alɛwa lɛyikwu ɛgɛ nɛ Ɔwɔico ya mla ācɛ nōo ya ɔdā olɔhi mla ɔdā nɛ ó ya ācɛ nōo ya ɔdobɔbi eko igble a. Aɔ̄kā nyā gē ta alɔ abɔ ku alɔ jé uce ō ya ku Ɔwɔico lɔɔlɔhi. Ohigbu ɛnyā, Ubáyíbu lɔfu ta uwɔ abɔ ku a jé ɛdɔ ɔcɛ nɛ Ɔwɔico wɛ a. Ó klla kɛla lɛyikwu ɔdā nɛ a cika ō ya, o ya ɛɛ ku a kwu piya oklobiya amāŋ ɔncɛnya ku nu.—Jé Aíjē kú Ɛ̄gbā 19:7, 11; Ujɛ́mīsi 2:23; 4:8.
4. Ɛgɛnyá nɛ a gáā jɛyi ɛlā nōo yɔ ipu Ubáyíbu a?
Ɛgɛ nɛ Ujisɔsi bi le kɛla Ɔwɔico lɛ ācɛ, nɛ ó gē kɛla lɛyikwu ɔkpiihɔ klla gē bi ɛlā a wɛɛcɛ, o ya ɛɛ ka ācɛ kéē “jɛ́yí ɔkpíihɔ” a, ɛgɔɔma nɛ ɔkpá nyā gáā ta uwɔ abɔ ku a jɛyi ɛlā nōo yɔ ipu Ubáyíbu duu a.—Jé Ulúku 24:27, 45.
Ɔkoolɔhi nōo ŋma ɛgiyi Ɔwɔico nyā lɔɔnyɛ fiyɛ ɔdā duuma. Amáŋ, ó wɛ ɛjɛɛji ācɛ nɛ ó gē lɔɔnyɛ tu uwa ō po a ŋ, ó gē ta ācɛ ōhī ánya. Ohigbu ɛnyā, a hii cɛ ka ɔɔma kóō ya ku ɛ̄jɛ̄ kóō jɛ uwɔ ŋ. Ohigbu ka ō nwu ɛlā lɛyikwu Ɔwɔico foofunu gáā ya ku a lɛ oyeeyi opiyoo a.—Jé Ujɔ́ni 17:3.
^ par. 3 Má ubrouciɔ nōo kahinii, A Book for All People.
