Ɔwɔico dɔka ku oduudu ācɛ kéē gbɔɔkɔ lɛ ɔ, ɛnyā géē ya kéē tubla ɔ ajaajɛ. (Aíjē kú Ɛ̄gbā 65:2) Amáŋ, ó gē jahɔ tu ɛjɛɛji ɔkɔ ō gba ŋ. Ocabɔ mafu éyi wɛ ka ɔdaŋ ka ɔba duuma gē miyɛ ɔnyā nu owe, ɔɔma lɔfu ya ku Ɔwɔico kóō hii jahɔ tu ɔkɔ ō gba ku nu ŋ. (1 Upíta 3:7) Ɔhá ku nu, eko nɛ ācɛ Isrɛlu ta ō piyabɔ ŋma ɔdobɔbi néē yɔ i ya a, Ɔwɔico ta ō po ɔkɔ ō gba ku uwa. Ɛnyā mafu peee ku alɔ i cika ō bi ɛnɛɛnɛ ɛga nɛ alɔ lɛ ō gbɔɔkɔ lɛ Ɔwɔico a le hija ŋ. Amáŋ, ɔdaŋ ka ɔcɛ nōo gē ya ɔdobɔbi nɛhi kwu piyabɔ, Ɔwɔico géē po ɔkɔ ō gba ku nu.—Jé Ayisáya 1:15; 55:7.

Má uvidio nyā nōo kahinii Does God Listen to All Prayers?

Ɔkɔ ō gba wɛ ipu ɛ̄gbā ō gba ku alɔ. Ɔɔma ya ɛɛ nɛ alɔ cika ō gbɔɔkɔ lɛ Ujehofa foofunu a, ohigbu ka anu ya alɔ a. (Umátiyu 4:10; 6:9) Abɔ alɔ i jila iyē ŋ ma, alɔ cika ō gbɔɔkɔ oŋma lɛ iye ku Ujisɔsi, ohigbu ka ó kwū ohigbu íne ō biya (oyabiya) ku alɔ. (Ujɔ́ni 14:6) Ujehofa i dɔka ku ɔkɔ ō gba ku alɔ kóō wɛ ɛ̄nɛ̄ alɔ jé ta ɛyi amāŋ ɛ̄nɛ̄ é ta tu ipu ɔkpá ŋ. Amáŋ, ó dɔka ku alɔ gbɔɔkɔ lɛ ɔ ŋma ɔtu ku alɔ.—Jé Umátiyu 6:7; Ācɛ Ufílipāyi 4:6, 7.

Ɔwɔico kóō i po ɔkɔ nɛ alɔ gē gba ipu ɔtu ku alɔ, ɔdaŋ ku alɔ i kóō ka ɔ tɛɛcɛ ŋma okonu ku alɔ ŋ. (1 Usámuwɛ̄lu 1:12, 13) Ó hi alɔ igwú ku alɔ gbɔɔkɔ lɛ ɔ eko duuma, bɛɛka eko nɛ alɔ heyi ɔcɔɔci, eko nɛ alɔ gáā gbiyɔla ɔtu, eko nɛ alɔ gáā lé ɔdole, mɛmla eko nɛ alɔ yɔ ipu unwalu a.—Jé Aíjē kú Ɛ̄gbā 55:22; Umátiyu 15:36.

Ō tubla Ɔwɔico ajaajɛ i tɔɔtɛ ŋ, ohigbu ku alɔ lā mla ācɛ nōó kpɔtuce Ɔwɔico ŋ. Ɛbɔ nɛ Ɔwɔico cokonu ka anuɔ géē bi wa ɛcɛ nya kē i tu uwa ɛhɛ, ohigbu ka é gbɛla ka ó gáā lɛyi ŋ.  (2 Utímōti 3:1, 4; 2 Upíta 3:3, 13) Ohigbu ɛnyā a, ó cɛgbá ku alɔ bēē jila tɔha mla aɔmpa alɔ nōo gē gba Ɔwɔico ɛ̄gbā, o ya ɛɛ ku alɔ lɔfu ta iyi alɔ ɔtu kwu ɔtu.—Jé Ācɛ Uhíbru 10:24, 25.

Ɔdaŋ ku a gē ya oklobiya amāŋ ɔncɛnya mla ācɛ nōo yihɔtu ku Ɔwɔico, é géē ta uwɔ abɔ ku a tubla Ɔwɔico ajaajɛ. Ipu ōjila ku Ācɛ Ocijali Ku Ujehofa, a géē lɛ ɛnɛɛnɛ ɛga opiyatɔha mla ācɛ nōo kpɔtuce Ɔwɔico. Ocabɔ ku uwa géē ta uwɔ abɔ ku ɔtu okpoce ku uwɔ kóō lɔfu duu.—Jé Ācɛ Uróm 1:11, 12.

A géē tubla Ujehofa ajaajɛ ɔdaŋ ku a gē gbɛla tu aɛlā nɛ a gē nwu ŋma ipu Ubáyíbu a. Bēē gbɛla tu aɔdā nɛ Ujehofa gē ya a, gbɛla tu aukɔ́ ku nu, mɛmla ɛjɛɛji okonu ō ce ku nu. Ɔkɔ ō gba mɛmla ō gbɛla tu aɔdā nōo ba nyā géē ta uwɔ abɔ ku a ta Ɔwɔico ahinya ŋma ɔtu ku uwɔ, ohigbu ka ó yihɔtu alɔ klla jijeeyi nɛhi.—Jé Ujóssuwa 1:8; Aíjē kú Ɛ̄gbā 1:1-3.

A géē tubla Ɔwɔico ajaajɛ ɔdaŋ ku a lɛ ɔtuce ɔ foofunu. Ɔtooce lɛbɛɛka ododo a, ɔdaŋ ku á gē wu eŋkpɔ tu ɔ ŋ, ó géē kwū. Ɔwɛ ekponu ɔɔma, ɔdaŋ ku a gē gbɛla tu aɔdā nōo ya ɛɛ nɛ a lɛ ɔtuce Ɔwɔico a, ó géē ya ku Ɔtooce ku uwɔ kóō yɔ i jɛ gɔbu klla lɔfu tōōtɔ̄ɔ̄. Jé Umátiyu 4:4; Ācɛ Uhíbru 11:1, 6.

Ujehofa lɛ ɛlá wu ācɛ nōo yihɔtu nu nɛhi. Ó gē gbo uwa ŋma ɛgiyi ɔdā duuma nōo géē ya ku Ɔtooce ku uwa kóō hii lɔfu ŋ. Ó klla gē gbo uwa ŋma ɛgiyi ɔdā duuma nōo géē ya kéē hii lɛ oyeeyi opiyoo ŋ. (Aíjē kú Ɛ̄gbā 91:1, 2, 7-10) Ó gē pi alɔ ahɔ̄ lɛyikwu ɛdɔ oyeeyi nōo lɔfu ya ku alɔ doōcē, mla ɛ̄nɛ̄ ō géē ya ku alɔ kóō hii lɛ eeye ŋ. Ujehofa gē nwu alɔ ɔwɛ nɛ alɔ géē lā ɛdɔ oyeeyi nōo lɔhi fiyɛ duu a.—Jé Aíjē kú Ɛ̄gbā 73:27, 28; Ujɛ́mīsi 4:4, 8.